Ko Te ʼu Faikole ʼi Te Tohi-Tapu—ʼE ʼAoga Ke Vakavakaʼi Fakalelei

NEʼE fai e te fafine loto tuʼania, mo te hau, pea mo te ʼAlo totonu ʼa te ʼAtua te ʼu faikole ka tou vakavakaʼi fakalelei ʼi te temi nei. Ko te ʼu faikole takitahi neʼe fai ʼi te ʼu ʼaluʼaga kehekehe. Kae, ko te ʼu taʼi ʼaluʼaga ʼaia ʼe feala ke malave kia tatou ia ʼaho nei. Koteā ʼaē ʼe feala ke tou ako mai te ʼu faʼifaʼitaki ʼaia?

“Sio Ki Te Mamahi ʼo Tau Fafine Kaugana”

ʼE koutou lolotoga tauʼi koa he fihifihia ʼe faigataʼa hona fakatokatoka? Peʼe lahi fau koa takotou nofo tuʼania? ʼE tatau tokotou ʼaluʼaga mo Ana ʼi muʼa ʼaē ʼo tana fānauʼi tana ʼuluaki tamasiʼi, ko Samuele. Neʼe mole ʼi ai hana fānau pea neʼe fakalainoaʼi ia e te tahi fafine. ʼIo, ʼi te lahi fau ʼo te mamahi ʼa Ana neʼe mole kei kai pe la. (1 Samuele 1:2-8, 15, 16) Neʼe pāui kia Sehova pea mo ina fai te kolekole ʼaenī:

“Ê Sehova ʼo te ʼatu kautau, kapau ʼe ke sio ki te mamahi ʼo tau fafine kaugana, pea mo ke manatuʼi moʼoni ia ʼau, pea ʼaua naʼa galo ia koe tau fafine kaugana, ke ke foaki moʼoni ki tau fafine kaugana he tamasiʼi tagata, pea ʼe ʼau foaki anai kia Sehova te ʼu ʼaho fuli ʼo tona maʼuli, pea ko te tele ʼe mole fakalaka anai ʼi tona ʼulu.”—1 Samuele 1:11.

Koutou fakatokagaʼi neʼe mole palalau ia Ana ki he ʼu tuʼuga meʼa. Neʼe palalau kia Sehova ʼo ina fai te kole fakahagatonu (ko he tamasiʼi tagata) pea neʼe ina hilifaki kiai te fakapapau (ke ina tuku te tamasiʼi ʼaia ke gāue maʼa te ʼAtua). Koteā te ako ʼe tou maʼu mai te faikole ʼaia?

ʼI te temi ʼo te mamahi, koutou fakahā fakalelei tokotou fihifihia ʼi te faikole. ʼO mole lauʼia pe koteā tokotou fihifihia—pe ko he ʼaluʼaga ʼi tokotou loto fale peʼe ko he mahaki—koutou faikole kia Sehova ʼo ʼuhiga mo te faʼahi ʼaia. Koutou fakahā fakalelei te ʼaluʼaga totonu ʼo tokotou fihifihia pea mo te meʼa ʼaē ʼe koutou logoʼi ia koutou. “ ʼI te afiafi fuli ʼe ʼau tuku fuli toku ʼu faigataʼaʼia kia Sehova,” ko te ʼui ʼaia ʼa te fafine vitua ko Luisa. “ ʼI ʼihi temi ʼe lahi toku ʼu fihifihia, kae ʼe ʼau fakamahinohino lelei fuli pe.”

Ko te palalau kia Sehova ʼaki ni ʼu palalau ʼe fakahagatonu, ʼe maʼu ai te ʼu fua. ʼI te fai ʼo te faʼahi ʼaia, ʼe tokoni kia tatou ke tou mahino lelei ki totatou fihifihia, ʼo feala aipe ke hage kia tatou ʼe mole mamafa fau. Ko te fai ʼo ni ʼu faikole fakahagatonu ʼe nātou fakafimālieʼi tatou mai te tuʼania. Ia muʼa ʼo tana maʼu ʼo he tali ki tana faikole, neʼe kua loto falala pe ia Ana, pea “ko tona fofoga neʼe mole kei mamahi.” (1 Samuele 1:18) Tahi ʼaē meʼa, mokā ʼe tou palalau fakahagatonu, ʼe ko he faʼahi ʼe ina faka fealagia kia tatou ke tou ʼiloʼi te ʼu tali ʼaē ʼo ʼuhiga mo ʼatatou ʼu faikole. ʼE ʼui fēnei e Bernard, ko te Kilisitiano ʼi Siamani: “Kapau ʼe ʼau fakamatalatala lelei taku ʼu faikole, pea ʼe ʼau toe mahino lelei ki te ʼu tali.”

“ ʼE Ko ʼAu Ko Te Kiʼi Tama Pe”

Kae, ko he tahi ʼe feala ke ina logoʼi he faʼahiga tuʼania ʼe kehe age mo kapau ʼe ina maʼu he gāue neʼe hinoʼi ia ki ai, ʼe hage kia ia ʼe mole tau mo ia. ʼE koutou kinakina koa ʼi ʼihi temi ʼi te ʼu maʼua ʼaē neʼe tuku atu e Sehova kia koutou? Peʼe ʼui koa e ʼihi ʼe mole tau mo koutou te gāue ʼaē neʼe hinoʼi atu kia koutou? Ko te tūpulaga ko Salomone neʼe hoko kia ia te ʼaluʼaga feiā ʼi te temi ʼaē neʼe fakanofo hau ia ia ʼi Iselaele. Ko ʼihi tagata māʼoluga neʼe lelei age kia nātou he fakanofo ʼo he tahi kehe ʼi te hekaʼaga hau. (1 Hau 1:5-7, 41-46; 2:13-22) ʼI tana kamata nofo hau, neʼe fai e Salomone te kole ʼaenī:

“Sehova, toku ʼAtua, neʼe ke fakanofo hau tau tagata kaugana . . . Ko ʼau ʼe ko he kiʼi tama pe. ʼE mole ʼau ʼiloʼi te hū ki tuʼa pea mo te hū ki loto. . . . Ke ke foaki ki tau tagata kaugana he loto fakalogo moʼo fakamāu ʼo tau hahaʼi, ke sio mamaʼo ki te meʼa ʼaē ʼe lelei pea mo te meʼa ʼaē ʼe kovi.”—1 Hau 3:7-9.

Neʼe faikole tāfito ia Salomone ʼo ʼuhiga mo tana ʼu felogoi ʼaē mo Sehova, ki te pilivilesio ʼaē neʼe tonu ke ina foaki, pea ki tana fealagia ʼaē ʼo fakahoko ʼo tana gāue. ʼO toe feiā aipe, ʼi te temi ʼaē ʼe foaki mai kia tatou he gāue, ʼe hage kia tatou ʼe mole tou lavaʼi, ʼe tonu anai ke tou kolekole ki te ʼAtua ke ina akoʼi tatou ke tou fai te gāue ʼaia. Koutou vakaʼi age te ʼu faʼifaʼitaki ʼaenī:

Neʼe ʼui fēnei e Eugène, “ ʼI te temi ʼaē neʼe kole mai ai ke ʼau fai te toe maʼua lahi ʼi te filiale ʼo te Sosiete Watch Tower, neʼe hage ia ʼe mole ʼau lavaʼi. Neʼe ʼi ai ʼihi neʼe popoto age pea mo māhani ki te gāue. ʼI te ʼu po e lua ki muli age neʼe veliveli pe taku moe, he neʼe lahi taku faikole, ʼo ʼau maʼu ai te mālohi pea mo te loto tokalelei ʼaē neʼe ʼaoga kia ʼau.”

Neʼe kole age kia Roy ke ina fai te akonaki ʼo te ʼavaifo ʼo te tūpulaga neʼe mate fakafokifā pea mo fakamataku neʼe ʼiloa e te kaugamālie. Ko te lauʼi teau neʼe kau ʼi te ʼavaifo. Koteā te meʼa neʼe fai e Roy? “Neʼe tahitahiga taku faikole ʼo ʼuhiga mo te lotomālohi pea mo te poto ʼaē ke ʼau maʼu he ʼu palalau tonu moʼo fakahā ni ʼu manatu ʼe fakatupu lotomālohi pea mo fakafimālie.”

ʼUhi ko te Tupuʼaga ʼe ina ‘fakahaʼele ki muʼa’ pea ko tana kautahi ʼe mafola, ko te meʼa ʼe hoko, ko te ʼu kaugana e tokolahi ʼe tuku kia nātou te ʼu gāue. (Isaia 60:22) Kapau neʼe kole atu ke koutou fakatuputupu takotou kau ki he gāue, ke koutou falala ko Sehova ʼe feala ke tokoni atu kia koutou ki takotou mole heʼeki māhani, ʼi te fai ako peʼe ko takotou ʼu fealagia ki te maʼua ʼaia. Ke koutou fakaōvi ki te ʼAtua ohage ko tona fai e Salomone, pea ʼe Ina akoʼi anai koutou ke koutou fakahoko te gāue ʼaia.

“Ke Nātou Logo Tahi”

Ko te tolu ʼaluʼaga ʼe hoko ia ʼaho nei, mokā ʼe tou fakafofoga he kūtuga ʼaki te faikole. Kapau ʼe tou hūfaki niʼihi, koteā anai ʼe tonu ke tou kole? Koutou fakatokagaʼi te faikole ʼa Sesu ʼaē ʼe tuʼu ʼi te tohi ʼo Soane kapite 17. Neʼe ina fai te faikole ʼaia ʼi te po fakaʼosi ʼaē ʼo tana kei nofo mo tana kau tisipulo ʼi te kele. Ko te ʼu faʼahiga kolekole feafeaʼi ʼaē neʼe ina fai ki tana Tāmai ʼe ʼi selo?

Neʼe palalau tāfito ia Sesu ki tanatou ʼu fakatuʼutuʼu pea mo te ʼamanaki ʼaē neʼe maʼu ʼe nātou fuli ʼaē ʼe kau ʼi te faikole. Neʼe talanoa ki te faka kolōlia ʼo te huafa ʼo Sehova ʼAtua pea mo te fakahā ʼo te Puleʼaga. Neʼe fakahā fakalelei e Sesu te maʼuhiga ʼaē ʼo te felogoi lelei mo te Tāmai pea mo te ʼAlo, ʼaē ʼe fakatafito ki te ʼatamai mālama ʼo te Tohi-Tapu. Neʼe talanoa ke ʼaua naʼa nātou kau ki te malamanei, ʼaē ko he meʼa ʼe ina teuteuʼi anai tana kau tisipulo ki te fakafeagai. Neʼe kole pe foki e Kilisito ki tana Tāmai ke ina puipui te kau tisipulo pea ke ina fakatahiʼi nātou ʼi te tauhi moʼoni.

Ei, neʼe faka maʼuhigaʼi e Sesu te logo tahi. (Soane 17:20, 21) ʼI te kamataʼaga ʼo te po ʼaia, neʼe malaga ʼi te kau tisipulo te fihi ʼe mole tau mo tonatou ʼuhiga tagata. (Luka 22:24-27) Kae ʼi te faikole, neʼe mole haga ia Kilisito ʼo tauteaʼi nātou kae neʼe ina fakatahiʼi. ʼO toe feiā aipe, ko te ʼu faikole faka famili pea mo te ʼu faikole ʼi te kokelekasio, ʼe tonu ke ʼiloga ʼi te faikole te ʼofa pea mo kumi he fakatokatoka ki te ʼu tokakovi ʼaē ʼe hoko ia nātou. Ko tatou fuli ʼaē neʼe fakafofoga e he tahi ʼi te faikole ʼe tonu anai ke tou logo tahi.—Pesalemo 133:1-3.

Ko te logo tahi ʼaia ʼe ʼiloga ʼi te temi ʼaē ʼe ʼui ai ʼe nātou ʼaē ʼe nātou fakalogo, “Ameni,” peʼe “Ke fai pe kiai,” ʼi te fakaʼosi ʼo te kole. Ke fealagia te faʼahi ʼaia, ʼe tonu ke nātou mahino pea ke nātou ʼio kia meʼa fuli neʼe talanoa kiai. Koia, ʼi te faikole ʼe mole tonu anai ke talanoa ʼo ʼuhiga mo he meʼa ʼe mole faʼa ʼiloʼi ʼe nātou ʼaē ʼe kau ki te faikole. Ohage la, ko he tagata ʼāfea ʼe ina fakafofoga te kokelekasio ʼaki te faikole, ʼe feala ke ina kole te tapuakina ʼa Sehova ʼo ʼuhiga mo he tēhina peʼe ko he tuagaʼane ʼi te faʼahi fakalaumālie ʼe kovi tona mahaki. Kae ʼe lelei age anai mo kapau neʼe ina fai te faʼahi ʼaia mo kapau ko te tokolahi ia nātou ʼaē ʼe ina fakafofoga ʼaki te faikole ʼe nātou ʼiloʼi te tagata peʼe ko te fafine ʼaia pea kua nātou logo ki tona mahaki.

Ke koutou toe fakatokagaʼi age ko Sesu neʼe mole ina fakamatalatala te ʼu meʼa ʼaē ʼe ʼaoga ki te hahaʼi takitokotahi. Ko te fai ʼo te faʼahi ʼaia ʼe feala pe ko he talanoa ki ni ʼu meʼa ʼa ʼihi ʼe mole tonu ke ʼiloʼi, heʼe ko te tokosiʼi pe ʼaē ʼe nātou ʼiloʼi. Ko te ʼu tokaga tāfito ki he tahi, ʼe tau ia mo he faikole ʼāteaina pe, ʼaē ko he faʼahi ʼe feala ke talanoa lahi kiai.

ʼE tonu anai koa ke feafeaʼi he teuteu ʼa he tahi ʼo ʼuhiga mo hana fakafofoga ʼaki te faikole he fakatahi lahi ʼa he kau atolasio? ʼE ʼui fēnei e te tēhina Kilisitiano: “ ʼE ʼau fakakaukauʼi fakatomuʼa pe koteā te ʼu meʼa ʼaē ka ʼau fakamālo kiai, pe koteā te ʼu meʼa ʼaē ʼe loto ki ai te ʼu tēhina, pea koteā te ʼu kole ʼaē ʼe feala ke ʼau palalau kiai ʼo ʼuhiga mo nātou. ʼE ʼau hilifaki kiai taku ʼu manatu, ʼo kau ai te ʼu palalau fakavikiviki, kua tokalelei ʼi toku ʼatamai. ʼI muʼa ʼo haku faikole ia muʼa ʼo te kaugamālie, ʼe ʼau faikole pe ʼi toku loto, ʼo ʼau kole ke tokoni mai ke ʼau fakafofoga fakalelei te ʼu tēhina.”

Logope la te ʼu ʼaluʼaga ʼaē ʼe tau mo koutou, ʼe mahino ia ʼe koutou maʼu anai ʼi te Tohi-Tapu he faikole neʼe fai e he tahi neʼe tau mo ni ʼu ʼaluʼaga ʼe tatau mo tokotou faʼahi. Ko te ʼu tuʼuga faikole ʼaē ʼe tuʼu ʼi te Tohi-Tapu ʼe ko he fakamoʼoni ia ʼo te lotoʼofa ʼa te ʼAtua. ʼAki te lau ʼo te ʼu faikole ʼaia pea mo metitasioʼi ʼe tokoni anai kia koutou ke nātou faka koloaʼia takotou ʼu faikole.

[Talanoa ʼo te pasina 5]

KO HE ʼU FAIKOLE FAKAOFOOFO ʼI TE TOHI-TAPU

Neʼe fai e te kau kaugana ʼa Sehova te ʼu faikole ʼi te ʼu ʼaluʼaga kehekehe ʼaupito. ʼE koutou felāveʼi koa mo he ʼaluʼaga ohage ko te ʼu ʼaluʼaga ʼaenī ʼe hoa mai?

ʼE ʼaoga koa kia koutou te tokoni ʼa te ʼAtua, ohage ko Eliesea?—Senesi 24:12-14.

ʼE koutou felāveʼi koa mo he tuʼutāmaki lahi, ohage ko te meʼa neʼe hoko kia Sakopo?—Senesi 32:9-12.

ʼE lahi ʼaupito koa takotou fia ʼiloʼi te ʼAtua, ohage ko Moisese?—Ekesote 33:12-17.

ʼE koutou felāveʼi koa mo he ʼu fakafeagai, ohage ko Elia?—1 Hau 18:36, 37.

ʼE faigataʼa koa kia koutou te fai faka mafola, ohage ko Selemia?—Selemia 20:7-12.

ʼE ʼaoga koa ke koutou vevete takotou ʼu agahala pea mo kumi te fakamolemole, ohage ko Taniela?—Taniela 9:3-19.

ʼE fakatagaʼi koa koutou, ohage ko te kau tisipulo ʼa Sesu?—Gāue 4:24-31.

Vakaʼi ia Mateo 6:9-13; Soane 17:1-26; Filipe 4:6, 7; Sake 5:16.

[Talanoa ʼo te pasina 6]

TE TAʼI FAIKOLE MOKĀ TOU LOLOTOGA TAUʼI HE AGAMĀHANI KUA TAUAKA

ʼE koutou lolotoga tauʼi koa he vaivaiʼaga? ʼE lava feafeaʼi koa ki te ʼu faikole ʼaē ʼi te Tohi-Tapu ke fua manuʼia? Tou ako ia Tavite ʼaē neʼe faikole ʼi te ʼu temi kehekehe ʼo ʼuhiga mo tona ʼu vaivaiʼaga.

Neʼe hiva fēnei e Tavite: “Sivisivi ʼau, Ê ʼAtua, pea ke ke ʼiloʼi toku loto. Vakaʼi ia ʼau, pea ke ke ʼiloʼi taku ʼu manatu ʼaē ʼe ʼepu.” (Pesalemo 139:23) Neʼe ko te loto ʼo Tavite ke kumi e Sehova te ʼu meʼa ʼaē ʼi tona loto ʼaē ʼe mole lelei. ʼE fakaliliu pe, ko Tavite neʼe pāui ki te tokoni ʼa Sehova moʼo tekeʼi te agahala.

Kae ko te ʼu vaivaiʼaga ʼo Tavite neʼe mālohi age ia te ia, pea neʼe agahala mamafa. ʼI henī pe foki, neʼe toe tokoni aipe te faikole kia te ia—ko te temi ʼaia moʼo toe fakatuʼu tana ʼu felogoi mo te ʼAtua. ʼO mulimuli kia Pesalemo 51:2, neʼe kole fēnei e Tavite: “Fufulu katoa ʼau ʼi taku hala, pea mo fakamaʼa ʼau ʼi taku agahala.”

ʼE toe feala pe foki ke tou kole ʼaki te agavaivai te tokoni ʼa Sehova moʼo lolomi ʼo te ʼu fakafalele kovi ʼaē ʼi ʼotatou loto. ʼE ko he meʼa ʼe ina fakaloto mālohiʼi anai tatou ke tou tekeʼi he vaivaiʼaga faigataʼa pea ʼe lava ke tokoni kia tatou ke tou tekeʼi te agahala. Kapau ʼe tou toe higa pe ki te vaivaiʼaga ʼaia, ʼe tonu pe ke tou toe fakaōvi kia Sehova ʼo kole ke tokoni mai kia tatou ke hoko atu pe tatatou tau.

[Paki ʼo te pasina 7]

Ko te ʼu faikole ʼaē ʼe fai ʼo ʼuhiga mo he kūtuga ʼe tonu ke faka maʼuhigaʼi te ʼu ʼamanaki faka Tohi-Tapu pea mo te ʼu fakatuʼutuʼu fakalaumālie ʼaē ʼe manatu kiai te tokolahi