Ko Te Fakamavae—ʼE Ko He Fakatuʼutuʼu ʼOfa Koa?

“MAʼONIʼONI, maʼoniʼoni, maʼoniʼoni ia Sehova ʼAtua, te Māfimāfi.” (Fakahā 4:8) ʼO mulimuli pe ki te manatu ʼaia, ko Sehova ʼe ko te Matapuna ʼo te ʼu lekula taputapu. Ko te ʼu lekula ʼaia ʼe tuʼu ʼi te ʼu “tohi taputapu,” pea ʼe fakamaʼua ki te kau Kilisitiano ke nātou muliʼi te ʼu pelesepeto ʼaia. ʼIo, ʼe tonu ke nātou tekeʼi ia meʼa fuli ʼe heʼemaʼa kia mata ʼo Sehova.—2 Timoteo 3:15; Isaia 52:11.

ʼE fakatotonu lelei e te Tohi-Tapu ʼo fēnei: “Ke ʼalutahi mo te Maʼoniʼoni ʼaē neʼe ina pāui koutou, mo koutou foki koutou liliu ʼo maʼoniʼoni ʼi takotou aga katoa, he neʼe tohi fēnei: ‘ ʼE tonu ke koutou maʼoniʼoni, heʼe ʼau maʼoniʼoni.’ ” (1 Petelo 1:15, 16) Talu mai te tupu ʼo te kokelekasio faka Kilisitiano kua hili nei kiai sēkulō e 19, neʼe tokaga lelei aipe te kau Kilisitiano moʼoni ki te puipui ʼo te kokelekasio ʼi te faʼahi fakalaumālie pea mo te ʼu aga heʼemaʼa.—Suta 3.

He Koʼe ʼe ʼAoga He Puipui

Ko te kau kaugana fuli ʼa te ʼAtua ʼe nātou felāveʼi mo te meʼa faigataʼa, ko te taupau ʼo nātou ke nātou maʼa ʼo ʼuhiga mo te aga ʼaē ʼe tonu ke fai ʼo toe feiā mo te faʼahi fakalaumālie. Ki te faʼahi ʼaia, ʼe tonu ke tou tauʼi te ʼu fili mālolohi e tolu—ko Satana, tona mālama, pea mo te ʼu holi ʼo totatou kakano agahala. (Loma 5:12; 2 Kolonito 2:11; 1 Soane 5:19) Ko te mālama ʼa Satana ʼe ina fakaneke anai koutou ke koutou fai ni ʼu aga heʼeʼaoga, ko he ʼahiʼahiʼi ʼo koutou ke koutou faʼifaʼitakiʼi tona faʼahiga maʼuli, pea ʼe ina momoli atu anai ni ʼu koloā fakamālama, ke ʼiloa koutou, ke koutou maʼu he tuʼulaga, ke koutou maʼuhiga ʼaupito pea mo mālohi. Kae ko nātou ʼaē kua nātou fakatotonu ke nātou haga nonofo ʼi te tauhi moʼoni, ʼe nātou tekeʼi te ʼu meʼa ʼaē ʼe momoli mai e Satana pea ʼe nātou tokakaga ke nātou “ ʼāteaina ʼi te mele fuli pe ʼi te faʼahi ʼo te malamanei.” Koteā tona tupuʼaga? Koteʼuhi ʼe nātou fia nonofo ʼi te puipui pea mo te tokaga ʼofa ʼa te kautahi maʼa ʼa Sehova.—Sake 1:27; 1 Soane 2:15-17.

Neʼe fai e Sehova te ʼu fakatuʼutuʼu moʼo tokoni ki he tahi ʼi te kokelekasio faka Kilisitiano ʼe tō ki te ʼu fakahala ʼa Satana ʼuhi ko te vaivaiʼaga fakatagata. Ko te kau tagata ʼāfea ʼaē kua faiva ʼi te faʼahi fakalaumālie neʼe hinoʼi nātou moʼo puipui te kokelekasio, pea mo tokoni ʼaki he lotoʼofa kia nātou ʼaē neʼe hēhē ke nātou fakahemala mai tanatou ʼu agahala pea ʼe nātou foaki te ʼu tokoni ʼaoga ke nātou toe maʼu ai te mālōlō. Ko he Kilisitiano neʼe ina fai he aga ʼe kovi, ʼe tonu ke tokoniʼi ia ia ʼaki he loto faʼa kātaki ke fakahemala pea mo fetogi tana ʼu aga.—Kalate 6:1, 2; Sake 5:13-16.

He Koʼe Ko Te Fakamavae ʼe Ko He Fakatuʼutuʼu ʼOfa

Ko te ʼu kaugana ʼa Sehova ʼaē kua papitema ʼaē ʼe nātou fai ʼaki tonatou loto faʼifaʼitaliha te meʼa ʼaē ʼe kovi pea ʼe mole nātou fia fetogi, ʼe tonu ke faka ʼuhigaʼi ia nātou ʼaia ko niʼihi ʼe mole fia fakahemala pea ʼe nātou heʼemaʼa ki te kau Kilisitiano. (Vakaʼi ia 1 Soane 2:19.) Ko te ʼu taʼi hahaʼi ʼaia ʼe mole feala ke nātou nonofo ʼi te kokelekasio faka Kilisitiano maʼa, koteʼuhi ʼe feala ke nātou ʼulihi te kokelekasio. ʼE tonu ke fakamavae nātou.

ʼO ʼuhiga mo te fakatuʼutuʼu ʼaē ke fakamavae ia nātou ʼaē neʼe nātou fai te ʼu aga ʼe kovi, ʼe feala pe ke fakatā ʼaki te meʼa ʼaenī: Ko ʼihi faleako ʼi te tuputupu ʼo te ʼu ʼohofi pea mo te ʼu aga fakapō ʼaē ʼe fai ki te kau ako, neʼe nātou tali te puleʼaki ʼaē “ko te fakaʼui ke fakamavae ʼi te faleako ia te kau ako ʼaē ʼe nātou fakaʼaogaʼi peʼe nātou fakamatakuʼi ʼihi ʼe nātou fakaʼaogaʼi he ʼu fana,” ko te ʼui ʼaia ʼa te nusipepa ʼi Toronto, ʼi Kanata ʼaē ko te The Globe and Mail. ʼE fai te fakamavae moʼo puipui te kau ako ʼaē ʼe fia mulimuli ki te polokalama, ke mole nātou felāveʼi mo he ʼu aga mālohi.

He koʼe koa ʼe ko he aga ʼofa ia he fakamavae ʼi te kokelekasio he tahi ʼe agakovi ʼe mole fia fakahemala? ʼE ko he fakahā ʼaia ʼo te ʼofa ʼaē kia Sehova pea mo tana ʼu ala. (Pesalemo 97:10) Ko te fakatuʼutuʼu ʼaia ʼe fakahā ʼaki ai te ʼofa ʼaē kia nātou ʼe nātou haga nofo ʼi te ala faitotonu heʼe ko te fakatuʼutuʼu ʼaia ʼe ina toʼo ʼi te lotolotoiga ʼo nātou he tahi ʼe feala ke ina fakahalaʼi nātou. ʼE ina toe puipui te maʼa ʼo te kokelekasio. (1 Kolonito 5:1-13) Kapau neʼe tuku ʼi te kokelekasio he aga heʼeʼaoga mamafa peʼe ko he aga heʼemaʼa ʼi te faʼahi fakalaumālie, ʼe ina ʼulihi anai pea mole lelei anai tana foaki te tauhi taputapu kia Sehova, ʼaē ʼe maʼoniʼoni ia. Pea tahi ʼaē, ʼe faka ʼuhiga te fakamavae ʼaia kia ia ʼaē neʼe agakovi ko he tokoni ke sio ki te ikuʼaga kovi ʼo tana loto fefeka, pea ke fakahemala, pea mo fai te ʼu fetogi ʼaē ʼe ʼaoga ki te faʼahi ʼaia, pea ʼe feala ai leva hona toe fakahū ki te kokelekasio.

Tona Ikuʼaga Ki ʼIhi

Ka agahala mamafa he tahi ʼi te kokelekasio, ohage la ko te tono, ʼe mole ina fakafiafia ia te loto ʼo Sehova. (Tāʼaga Lea 27:11) Ko te Kilisitiano ʼaē ʼe ina fai ni ʼu felāveʼi fakasino heʼeʼaoga, ʼe mahino papau ia neʼe mole ina maʼu te manatu ʼaē neʼe ia Sosefo ʼi te temi ʼaē neʼe ʼahiʼahiʼi ai ia ia e te ʼohoana ʼo Potifale ke nā momoe. Neʼe fēnei te tali age ʼa Sosefo: “ ʼE feafeaʼi anai haku fai te toe meʼa kovi ʼaia pea mo agahala ki toku ʼAtua?” (Senesi 39:6-12) Neʼe fakaʼapaʼapa ia Sosefo ki te ʼu lekula maʼoniʼoni ʼa Sehova pea neʼe hola ʼi te fakahala ʼaia. ʼI te tahi ia faʼahi, ʼe ʼiloga mai ko ia ʼaē neʼe tono, neʼe mole lahi tona ʼofa ki te ʼAtua ke tupu ʼaki ai hana lolomi ʼo tona fia fakafimālieʼi tona ʼu holi fakasino.—Kalate 5:19-21.

Ko he tahi kua papitema, ka ina maumauʼi te ʼu fakatotonu ʼa te ʼAtua ʼe mole ina manatuʼi te lotomamahi pea mo te mamahi fakaʼatamai ʼaē ka ina fakatupu anai ki tona ʼu kāiga ʼi te tui. Ko te lotomamahi ʼe malave lahi age ia ki ʼihi. ʼI tana ʼosi ʼiloʼi ʼaē ko tona foha neʼe ina fai te ʼu aga heʼeʼaoga, neʼe ʼui fēnei e te fafine Kilisitiano: “Tokosiʼi te ʼu tuagaʼane pea mo te ʼu tēhina ʼe nātou mahino ki te lavea pea mo te mamahi ʼaē ʼe tau mo mātou. . . . ʼE mātou lotomamahi ʼaupito.” Ko te ʼuhiga ʼo te famili katoa ʼe feala ke palalauʼi kovi. Ko te lotovaivai pea mo he ʼu manatu faka lākahalaʼi ʼo ʼuhiga mo nātou totonu, ʼe feala ke hoko ki te hahaʼi agatonu ʼo te famili. Ko te agakovi ʼa te tagata agahala ʼe ina fakatupu te lotomamahi ki te famili.

Ko Te Tokoni ʼOfa Ki Te Famili

Ko te ʼu kāiga agatonu ʼo nātou ʼaē neʼe fakamavae, ʼe ʼaoga ke nātou manatuʼi ko te fakamavae ʼe ko he fakatuʼutuʼu ʼofa pea mo puipui. Ko te ʼu faiga fuli ʼaē ʼe ʼaoga, ʼe fai moʼo tokoni kia ia ʼaē neʼe talagataʼa. Kae kapau ʼe hoholo pe tana ia talagataʼa ki te ʼAtua pea ʼe mole fia fakahemala ia, ʼe ʼaoga ke puipui te kokelekasio, koia ʼe ina fai te puleʼaki ʼo mulimuli ki te Folafola ʼa te ʼAtua, ʼaē ʼe ʼui fēnei, “koutou toʼo te tagata agakovi ʼi te lotolotoiga ʼo koutou.” (1 Kolonito 5:13) Ohage ko te ʼui ʼa te Fakamoʼoni: “Ko te fakamavae ʼo he tahi ʼe ko he fakatuʼutuʼu agatonu ʼaia kia Sehova.”

Mokā fakamavae he tahi ʼi he famili, ʼe ko te famili ʼaia ʼe lotomamahi. Koia ʼe tonu ai ki te kau tagata ʼāfea ke nātou faiga katoa ʼi te faʼahi fakalaumālie ke nātou fakafimālieʼi ia nātou ʼaia. (1 Tesalonika 5:14) ʼE feala ke hūfaki nātou e te kau tagata ʼāfea pea mo faikole fakatahi mo nātou. ʼE feala pe ʼi ʼihi temi ke nātou ʼaʼahi te ʼu Kilisitiano agatonu ʼaia, ʼo nātou fai palalau ki ni ʼu manatu maʼuhiga ʼo te Tohi-Tapu. Ko te kau tauhi ōvi ʼo te faga ōvi ʼe tonu anai ʼi te ʼu fealagia fuli ke nātou fakaloto mālohiʼi ia nātou ʼaia ʼi te faʼahi fakalaumālie ia muʼa pea mokā hili te ʼu fono faka Kilisitiano. Ko te tahi tokoni ʼe feala ke foaki kia nātou, ko te kaugā fagona mo nātou ʼi te gāue faka minisitelio. (Loma 1:11, 12) ʼE tonu ke fakahā e te kau tauhi ōvi fakalaumālie te ʼofa pea mo te tokaga ʼaē ʼe tau mo te ʼu kaugana agatonu ʼaia ʼa Sehova.—1 Tesalonika 2:7, 8.

ʼAua naʼa ʼui e ʼihi ʼi te kokelekasio ʼe tonu ke nātou meʼa noaʼi te ʼu kāiga agatonu ʼaē kia Sehova ʼo nātou ʼaia neʼe agahala. Neʼe līaki e te ʼAtua te Hau agakovi ʼo Iselaele ko Saulo, ka neʼe mole tuku e Tavite te faʼahi ʼaia ke ina pulihi tona ʼofa ʼaē ki te foha ʼo Saulo ko Sonatane. ʼIo, ko te ʼu vāhaʼa ʼo Tavite pea mo Sonatane neʼe liliu ia ʼo mālohi ʼaupito. (1 Samuele 15:22, 23; 18:1-3; 20:41) Koia ko te kokelekasio ʼe tonu ke ina lagolago pea mo ʼofa ki te ʼu Kilisitiano ʼaē ko ʼonatou ʼu kāiga neʼe agahala kia Sehova.

ʼE mole ko he aga ʼofa anai hakita mole tokagaʼi peʼe mo agakovi ki ni ʼu Kilisitiano agatonu feiā! ʼE tonu ke fakahā ki te ʼu hahaʼi agatonu ʼo te famili he tokoni makehe ʼo ʼuhiga mo te fakaloto mālohi. ʼE feala ke hage kia nātou ʼe nātou tokotahi pea faigataʼa ʼaupito tonatou ʼaluʼaga. E lagi ʼe feala ke koutou vaevae mo ia he meʼa maʼuhiga fakalaumālie peʼe ko he fakamatala fakaloto mālohi mo nātou ʼi te telefoni. Kapau ko ia ʼaē kua fakamavae ʼe tali mai te telefoni, koutou ʼui age kiai ʼe koutou fia palalau ki tona kāiga Kilisitiano. ʼE feala ke koutou fakaafe tona ʼu kāiga agatonu ki he fakatahi fakafiafia peʼe ke kai meʼa kai mo koutou. Kapau ʼe koutou felāveʼi mo nātou ʼi hakotou faifakatau, e lagi feala ke koutou fakaʼaogaʼi te ʼaluʼaga ʼaia ko he felāveʼi fakaloto mālohi. Koutou manatuʼi, ko te kau Kilisitiano agatonu ʼaē ʼe ʼi ai ʼonatou ʼu kāiga neʼe fakamavae, ʼe nātou kau tuʼumaʼu pe ʼi te kautahi maʼa ʼa Sehova. ʼE faigafua pe kia nātou ʼaia hanatou nofo tokotahi pea mo hanatou lotovaivai. Koia ʼaē, koutou nofo tokaga ʼo fakahā kia nātou te agalelei pea mo te ʼofa. Koutou haga fai te meʼa ʼaē ʼe lelei ‘kia nātou ʼaē ko ʼokotou ʼu kāiga ʼi te tui.’—Kalate 6:10.

Koutou Fakafetaʼi Ki Te Fakatuʼutuʼu ʼOfa ʼa Sehova

ʼE tou fakafetaʼi ki te fakahā ʼaē e Sehova ʼAtua te lototokaga ki te hahaʼi takitokotahi ʼo te famili faka malamanei ʼo tana kau atolasio. ʼAki tana kautahi, neʼe ina foaki ʼaki te lotoʼofa te fakatuʼutuʼu moʼo tokoniʼi tatou ke tou haʼele agatonu ʼi ʼona muʼa. Tatau aipe mo kapau ko he tahi ʼi he famili ʼe ina fai ʼi tona loto faʼitaliha he agahala pea ʼe tonu ke fakamavae ʼi te kokelekasio, ʼe feala pe hana toe liliu mai ki te kokelekasio mo kapau ʼe fakahemala moʼoni. Ko te faʼahi ʼaia neʼe fakatā ʼaki te faʼifaʼitaki ʼaenī:

Neʼe faiga te kau tagata ʼāfea ke nātou tokoniʼi te fafine ʼe tou fakahigoaʼi anai ko Anna, kae neʼe toe suluka pe ia, mo toe ʼinu, pea mo fakaʼaogaʼi te toloke. Neʼe mole fakahemala ia pea neʼe mole nofo ʼi te kokelekasio. Kae mole tuai, neʼe kamata fakahemala ia Anna ʼi tana mole kei maʼu ia te ʼofa fakatautehina ʼo te kokelekasio maʼa ʼa Sehova pea neʼe faikole kia Sehova ke tokoni mai kia ia. ʼE ina ʼui fakahagatonu ko ia neʼe mole mahino katoa ki te lototokaga ʼaē ʼa te kau tagata ʼāfea ʼo ʼuhiga mo nātou ʼaē neʼe hēhē. Neʼe toe kamata kau ia Anna ki te ʼu fono, pea ko he faʼahi neʼe tokoni ai kia ia ke toe fakahemala. Ki muli age, neʼe toe kau ki te kokelekasio ʼofa pea mo puipui. Kua toe lagolago pe ia Anna ki te lekula māʼoluga ʼa Sehova ʼo ʼuhiga mo te ʼu aga ʼaē ʼe tonu ke fai. ʼE loto fakafetaʼi ia ki te ʼofa ʼaē neʼe fakahā age e te kau tagata ʼāfea pea ʼe ina toe ʼui fēnei: “ ʼE mole feala ke koutou fakakaukauʼi pe neʼe feafeaʼi toku tokoniʼi e te ʼu tohi faka Tohi-Tapu faka Kilisitiano. Ko Sehova ʼe tokaga ʼaupito ki te ʼu meʼa ʼaē ʼe ʼaoga kia tatou.”

Ei, ko te ʼAtua neʼe ina foaki te ala ke toe liliu mai ia nātou ʼaē neʼe fakamavae ʼi te kokelekasio pea ʼe nātou fakahemala ki muli age. Neʼe tou vakaʼi māʼiape la mo te fakamavae ʼe ko he fakatuʼutuʼu ʼofa. Kae ʼe lelei age pe hakita tekeʼi te ʼaluʼaga fakaʼofaʼofa ʼaia ʼaki hakita pipiki tuʼumaʼu ki te ʼu ala faitotonu ʼo totatou ʼAtua maʼoniʼoni! ʼOfa pe ke tou loto fakafetaʼi tuʼumaʼu ʼo ʼuhiga mo te pilivilesio ʼaē ke tou fakavikiviki ia Sehova ʼaki tatatou kau ki tana kautahi maʼa, ʼofa pea mo puipui.

[Paki ʼo te pasina 26]

ʼE tou fakahā koa te ʼofa ki te ʼu kāiga agatonu ʼo nātou ʼaē neʼe fakamavae ʼi te kokelekasio?