ʼI Tokotou Famili ʼe Koutou Fakamuʼamuʼa Koa Te ʼAtua
“ ʼE tonu ke ke ʼofa kia Sehova tou ʼAtua ʼaki tou loto katoa.”—àMaleko 12:29, 30.
1. ʼE maʼuhiga feafeaʼi tokita ʼofa kia Sehova?
NEʼE fehuʼi age e te sekelipa kia Sesu ʼo fēnei: “Koteā te ʼuluaki ʼo te ʼu folafola fuli?” Neʼe mole ina tuku age tana manatu, kae neʼe tali Sesu ki tana fehuʼi ʼo ina fakaʼaogaʼi te manatu ʼa te Folafola ʼa te ʼAtua ia Teutalonome 6:4, 5. Neʼe ina tali fēnei age: “Ko te ʼuluaki ʼaenī, ‘Fagono mai, Ê Iselaele, ko Sehova totatou ʼAtua ʼe ko te Sehova pe e tahi, pea ʼe tonu ke ke ʼofa kia Sehova tou ʼAtua ʼaki tou loto katoa pea mo tou nefesi katoa pea mo tou laumālie katoa pea mo tou mālohi katoa.’ ”—Maleko 12:28-30.
2. (a) Koteā te fakafeagai neʼe tau pea mo Sesu? (b) ʼI ʼihi temi, koteā ʼaē ʼe feala ke ina fakaliliu ʼo faigataʼa te leleiʼia ʼo tatou e Sehova?
2 Moʼo fakalogo ki te meʼa ʼaē neʼe higoaʼi e Sesu ko te ʼuluaki folafola—ko te folafola ʼaē ʼe maʼuhiga age—ʼe fakamaʼua tuʼumaʼu ke tou fai te meʼa ʼaē ʼe leleiʼia e Sehova. Neʼe fai e Sesu te faʼahi ʼaia, māʼia ʼi te lakaga ʼaē neʼe fakafeagai age te ʼapositolo ko Petelo ki te faiga ʼa Sesu, pea ʼi te tahi lakaga neʼe ko tona ʼu kāiga totonu neʼe nātou fai pe foki te faʼahi ʼaia. (Mateo 16:21-23; Maleko 3:21; Soane 8:29) Koteā te meʼa ʼaē ka koutou fai mo kapau ʼe koutou felāveʼi mo he ʼaluʼaga feiā? Ohage la, ʼe loto e te hahaʼi ʼo takotou famili ke mole toe hoko atu takotou ako faka Tohi-Tapu pea mo takotou fakatahi mo te kau Fakamoʼoni ʼa Sehova. ʼE koutou fakamuʼamuʼa anai koa te ʼAtua ʼo koutou fai te meʼa ʼaē ʼe ina leleiʼia? ʼE koutou fakamuʼamuʼa koa te ʼAtua, tatau aipe peʼe fakafeagai takotou famili ki ʼakotou ʼu faiga ʼaē ke koutou tauhi ki te ʼAtua?
Ko Te Hele ʼo Te Fakafeagai Faka Famili
3. (a) Koteā te ʼu fua ʼo te ʼu akonaki ʼa Sesu ʼe feala ke hoko ki te famili? (b) ʼE feala ke feafeaʼi te aga ʼo te famili ki he tahi ʼe nātou ʼofa mamahi kiai?
3 Neʼe mole meʼa noaʼi e Sesu te mamahi ʼe feala ke maʼu ʼe ia ʼaē ʼe ina tali tana ʼu akonaki mokā fakafeagai age ʼihi hahaʼi ʼo te famili. Neʼe ina ʼui fēnei: “Ko te ʼu fili anai ʼo te tagata ʼe ko nātou totonu pe ʼaē ʼo tona loto fale.” Pea tahi ʼaē meʼa, logope te ikuʼaga fakaʼofaʼofa ʼaia, neʼe fakahā e Sesu pe ko ai ʼaē ʼe tonu ke fakamuʼamuʼa ʼi tana ʼui fēnei: “Ko ʼaē ʼe lahi ake tona ʼofa ki tana tāmai pe ki tana faʼe ia te ʼau ʼe mole tāu ia mo ʼau; pea ko ʼaē ʼe lahi ake tona ʼofa ki tona foha pe ki tona ʼofafine ia te ʼau ʼe mole tāu ia mo ʼau.” (Mateo 10:34-37) ʼE tou fakamuʼamuʼa ia Sehova ʼAtua ʼi tatatou mulimuli ki te ʼu akonaki ʼo tona ʼAlo, ia Sesu Kilisito, ʼaē “ko te fakatātā totonu ʼo tona ʼuhiga totonu [ʼo te ʼAtua].”—Hepeleo 1:3; Soane 14:9.
4. (a) Koteā ʼaē neʼe ʼui e Sesu ʼo ʼuhiga mo te faʼahi ʼaē ʼe ʼaoga ke liliu ko hana tisipulo? (b) Koteā te faka ʼuhiga ʼo te fehiʼa ʼa te kau Kilisitiano ki tonatou famili?
4 ʼI te tahi lakaga, ʼi te lolotoga palalau ʼa Sesu ʼo ʼuhiga mo te faʼahi ʼaē ʼe ʼaoga ke liliu ko hana tisipulo moʼoni, neʼe ina ʼui fēnei: “Kapau ʼe haʼu he tahi kia te ʼau kaʼe ʼe mole fehiʼa ki tana tāmai, pea mo tana faʼe, pea mo tona ʼohoana, pea mo tana fānau, pea mo tona ʼu tēhina, pea mo tona ʼu tuagaʼane, ʼo aʼu ai foki ki tona nefesi totonu ʼo ia, ʼe mole feala ia ke liliu ko haku tisipulo.” (Luka 14:26) ʼE mahino papau ia neʼe mole faka ʼuhiga e Sesu ʼe tonu ki tana ʼu tisipulo ke nātou fehiʼa moʼoni ki tonatou famili, ʼuhi he neʼe ina fakatotonu ki te hahaʼi ke nātou ʼofa māʼia mo tanatou ʼu fili. (Mateo 5:44) Kae neʼe faka ʼuhiga e Sesu ʼi henī ʼe tonu ki tana ʼu tisipulo ke mole lahi ake tonatou ʼofa ki tonatou famili ʼi tonatou ʼofa ʼaē ki te ʼAtua. (Vakaʼi ia Mateo 6:24.) ʼO mulimuli ki te mālama ʼaia, ʼe ʼui fēnei e te Tohi-Tapu neʼe “fehiʼa” ia Sakopo kia Lea pea neʼe ʼofa ia kia Lasele, ʼo faka ʼuhiga neʼe mole lahi age tona ʼofa ia Lea ʼi tona ʼofa ʼaē ki tona tēhina, ia Lasele. (Senesi 29:30-32) Māʼia mo totatou “nefesi” totonu, pe ko totatou maʼuli, neʼe ʼui e Sesu ʼe tonu ke tou fehiʼa kiai, peʼe ke siʼisiʼi tokita ʼofa kiai ʼi takita ʼofa ʼaē kia Sehova!
5. ʼAki he aga fakakākā, e feafeaʼi te fakaʼaogaʼi e Satana te fakatuʼutuʼu faka famili?
5 ʼI tona ʼuhiga Tupuʼaga pea mo Matapuna ʼo te Maʼuli, ʼe tāu pea mo Sehova te atolasio katoa mai tana ʼu kaugana fuli. (Fakahā 4:11) Neʼe tohi e te ʼapositolo ko Paulo ʼo fēnei: “ ʼE ʼau tuʼutuli ia muʼa ʼo te Tāmai, ʼaē ʼe maʼu ai e te famili katoa ʼi selo pea mo te kele tonatou higoa.” (Efesi 3:14, 15) Neʼe faʼu e Sehova te fakatuʼutuʼu faka famili ʼi he faʼahiga ʼaluʼaga fakatalakitupua, ke maʼu e nātou ʼaē ʼe nātou faʼufaʼu te famili he feʼofaʼaki. (1 Hau 3:25, 26; 1 Tesalonika 2:7) Kae, ko Satana te Tevolo, ʼaki he aga fakakākā ʼe ina fakaʼaogaʼi te ʼofa faka famili ʼaia, ʼaē ʼe kau kiai te holi ʼaē ke leleiʼia tatou e nātou ʼaē ʼe tou ʼoʼofa ai. ʼE ina fakaʼāʼāsili lahi te fakafeagai faka famili, pea tokolahi ʼe nātou manatu ko he meʼa faigataʼa te lagolago mālohi ki te moʼoni faka Tohi-Tapu mokā nātou tau mo te faʼahi ʼaia.—Fakahā 12:9, 12.
Ko Te Tauʼi ʼo Te Faigataʼa
6, 7. (a) ʼE feala feafeaʼi ke tokoniʼi te ʼu famili ke nātou leleiʼia te maʼuhiga ʼo te ako faka Tohi-Tapu pea mo te fakatahi faka Kilisitiano? (b) ʼE feala feafeaʼi ke tou fakahā ʼe tou ʼofa moʼoni ki totatou famili?
6 Koteā anai ka koutou fai mo kapau ʼe maʼua ke koutou fili ke leleiʼia koutou e Sehova peʼe ke leleiʼia koutou e te famili? ʼE koutou manatu anai koa ko te ʼAtua ʼe mole ina ʼamanaki ke tou ako tana Folafola pea mo maʼuliʼi tana ʼu pelesepeto, mo kapau ʼaki takita fai feiā ʼe tou fakatupu ai te maveuveu ʼo te famili? Kae koutou fakakaukauʼi ʼo ʼuhiga mo te faʼahi ʼaia. Kapau ʼe koutou tō pea mo koutou tuku takotou ako faka Tohi-Tapu peʼe ko te fakatahitahi mo te kau Fakamoʼoni ʼa Sehova, ʼe feafeaʼi anai te mahino e nātou ʼaē ʼe koutou ʼoʼofa ai, ko te ʼatamai mālama ʼo te Tohi-Tapu ʼe ko he meʼa maʼuhiga ki te maʼuli?—Soane 17:3; 2 Tesalonika 1:6-8.
7 ʼE feala hatatou fakatā fēnei te ʼaluʼaga ʼaia: Lagi ko he tahi ʼi te famili ʼe holi mālohi ki te kava. Ko te mole tokagaʼi peʼe ko te fakalaka ʼi tona fihifihia ʼo ʼuhiga mo te ʼinu kava, ʼe ko he meʼa lelei moʼoni anai koa kia ia? ʼE lelei age koa te taupau ʼo te tokalelei ʼo tuku feiā pea mole ina fai he meʼa ʼo ʼuhiga mo tana fihifihia? Kailoa, ʼe mahino papau ia ʼe koutou loto tahi ʼi te ʼui ʼaē ʼe lelei age te faiga ke tokoni kia ia ke ina tauʼi tona fihifihia ʼo te ʼinu kava, logope pe te faka ʼuhiga ʼo te faʼahi ʼaia ke tou tau mo tona ʼita pea mo he ʼu faʼahiga gaohi koviʼi. (Tāʼaga Lea 29:25) ʼE toe feiā pe, kapau ʼe koutou ʼofa moʼoni ki tokotou famili, ʼe mole koutou tō anai ʼi tanatou ʼu faiga ʼaē ke nātou tāʼofi koutou mai takotou ako ʼo te Tohi-Tapu. (Gāue 5:29) ʼAki takotou tui mālohi ʼe feala ke koutou tokoni kia nātou ke nātou leleiʼia te maʼuliʼi ʼo te ʼu akonaki ʼa Kilisito ʼaē ʼe maʼuhiga ki totatou maʼuli.
8. E feafeaʼi hatatou maʼu he ʼu fua lelei ʼi te gāue agatonu ʼa Sesu ki te finegalo ʼa te ʼAtua?
8 ʼI ʼihi temi ko te fakamuʼamuʼa ʼo te ʼAtua ʼe feala ke faigataʼa ʼaupito. Kae koutou manatuʼi, neʼe fakaliliu foki e Satana ʼo faigataʼa te faʼahi ʼaia kia Sesu ke ina fai te finegalo ʼo te ʼAtua. Kae neʼe mole tō Sesu ʼi he temi; māʼia mo te tau tugaki ʼi te pou fakamamahi neʼe ina kātakiʼi maʼa tatou. ʼE ʼui fēnei e te Tohi-Tapu: “Ko Sesu Kilisito [ʼe ko] tatatou Fakamaʼuli.” “Neʼe mate maʼa tatou.” (Tito 3:6; 1 Tesalonika 5:10) ʼE mole tou loto fakafetaʼi koa ʼi te mole tō ʼa Sesu ʼi te fakafeagai? ʼUhi he neʼe ina kātakiʼi te mate faka sakilifisio, ʼe tou maʼu te ʼamanaki ʼo te maʼuli heʼegata ʼi he mālama foʼou, ʼe mahu ai te tokalelei pea mo te faitotonu ʼaki tatatou tui ki tona taʼataʼa ʼaē neʼe ina liligi.—Soane 3:16, 36; Fakahā 21:3, 4.
Ko He Fakapale Koloaʼia ʼe Feala Ke Tou Maʼu
9. (a) ʼE lava feafeaʼi ki te kau Kilisitiano ke nātou hāofaki niʼihi? (b) Neʼe feafeaʼi te ʼaluʼaga ʼo te maʼuli faka famili ʼa Timoteo?
9 ʼE mahino koa kia koutou ʼe toe feala ke koutou kau ki te hāofaki ʼo niʼihi, ʼo kau ai mo te ʼu kāiga ʼaē ʼe koutou ʼofa mamahi ai? Neʼe uga e Paulo ia Timoteo ʼo fēnei: “Kātaki ʼi te ʼu meʼa ʼaia [ʼaē neʼe ke akoʼi], heʼe, ʼaki tau fai te meʼa ʼaia, ʼe ke hāofaki anai ia koe, pea mo nātou ʼaē ʼe fakalogo kia koe.” (1 Timoteo 4:16) Neʼe maʼuli Timoteo ʼi he loto fale neʼe mole felogoi tahi ʼi te faʼahi faka lotu, he ko tana tāmai Keleka neʼe ko he tagata neʼe mole tui. (Gāue 16:1; 2 Timoteo 1:5; 3:14) Logope ʼe mole tou ʼiloʼi peʼe neʼe liliu ʼo tui ia te tāmai ʼa Timoteo, ʼe mahino papau ia neʼe lagi ina maʼu he manatu lelei lahi ʼaki te agatonu ʼo tona ʼohoana, ia Enise, pea mo Timoteo.
10. Koteā ʼaē ʼe feala ke fai e te kau Kilisitiano maʼa tanatou ʼu hoa ʼaē ʼe mole tui?
10 ʼE fakahā e te Tohi-Tapu ko te ʼu tagata ʼohoana pea mo te ʼu fafine ʼohoana ʼaē ʼe nātou tutuʼu mālohi maʼa te moʼoni ʼo te Tohi-Tapu, ʼe feala ke nātou kau ki te hāofaki ʼo tonatou ʼu ʼohoana ʼaē ʼe mole ko he kau Kilisitiano, ʼo nātou tokoniʼi nātou ke nātou liliu ko he ʼu hahaʼi tui. Neʼe tohi fēnei e te ʼapositolo ko Paulo: “Kapau ʼe maʼu e he tēhina he ʼohoana ʼe mole tui kae ʼe lotolelei ke nofo mo ia, ke ʼaua naʼa mavete mo ia; pea ko he fafine ʼe ina maʼu he ʼohoana ʼe mole tui, kae lotolelei ke nofo mo ia, ke ʼaua naʼa mavete mo tona ʼohoana. Heʼe ke lava ʼiloʼi feafeaʼi fafine ʼohoana, peʼe ke hāofaki anai tou ʼohoana? Peʼe ke lava ʼiloʼi feafeaʼi tagata ʼohoana, peʼe ke hāofaki anai tou ʼohoana?” (1 Kolonito 7:12, 13, 16) Neʼe fakamatala e te ʼapositolo ko Petelo peʼe feafeaʼi ki te ʼu fafine ʼohoana hanatou hāofaki tonatou ʼu ʼohoana, ʼi tana ʼui fēnei: “Koutou fakalogo ki ʼokotou ʼohoana totonu, koteʼuhi, kapau ʼe ʼi ai niʼihi ʼe mole fakalogo ki te folafola, ke nātou tafoki mai ʼuhi ko te aga ʼo tonatou ʼu ʼohoana, ka heʼeki fai he palalau.”—1 Petelo 3:1.
11, 12. (a) Koteā te fakapale neʼe maʼu e te toko lauʼi afe kau Kilisitiano, pea koteā ʼaē neʼe nātou fai ke nātou maʼu te faʼahi ʼaia? (b) Koutou fakamatala he maʼuli faka famili neʼe fakapale ʼuhi ko te faʼa kātaki agatonu.
11 ʼI te ʼu taʼu pe ʼaenī, ko te toko lauʼi afe neʼe nātou liliu ko he ʼu Fakamoʼoni ʼa Sehova hili ni ʼu māhina peʼe ko ni ʼu taʼu ʼi tanatou fakafeagai ki te ʼu gāue faka Kilisitiano ʼo tonatou kāiga Fakamoʼoni. Ko he fakapale te faʼahi ʼaia ki te kau Kilisitiano ʼaē neʼe nātou tutuʼu mālohi aipe, pea ko he tapuakina kia nātou ʼaē neʼe fakafeagai ʼi muʼa atu! ʼO ʼiloga ʼi tona leʼo te meʼa ʼaē ʼe ina logoʼi ʼi tona loto, ʼe fakamatala fēnei e te tagata ʼāfea Kilisitiano kua taʼu 74: “ ʼI ʼihi temi ʼe ʼau fakamālo ki toku ʼohoana pea mo taku ʼu fānau ʼi tanatou pipiki maʼu ki te moʼoni lolotoga te ʼu taʼu ʼaē neʼe ʼau fakafeagai ai.” Neʼe ina ʼui lolotoga taʼu e tolu neʼe ina fakafisi mālohi māʼia mo tana tuku ʼaē tona ʼohoana ke palalau age ʼo ʼuhiga mo te Tohi-Tapu. ʼE ina ʼui fēnei: “Kae neʼe fili e toku ʼohoana he temi faigamālie neʼe feala ai ke ʼau fakalogo, pea neʼe kamata palalau ki te moʼoni ʼi tana lolotoga fakaholoholo toku vaʼe. ʼI ʼoku loto fakafetaʼi ʼi tana mole tō ʼi taku fakafeagai age!”
12 Ko te tahi tagata ʼohoana neʼe fakafeagai ki tona famili neʼe ina tohi fēnei: ‘Neʼe ko ʼau te fili lahi ʼo toku ʼohoana ʼuhi ʼi tana maʼu te moʼoni, neʼe ʼau gaohi koviʼi ia ia, pea neʼe ma kē ʼi te ʼaho fuli; ʼi tona fakahagatonu, neʼe ʼau kamata tuʼumaʼu te kē. Kae neʼe mole ʼi ai hona fua; neʼe pipiki toku ʼohoana ki te Tohi-Tapu. Lolotoga taʼu e hogofulu-ma-lua neʼe ʼau fakafeagai mālohi ki te moʼoni pea ki toku ʼohoana pea mo taku tamasiʼi. Kia nāua toko lua neʼe ko ʼau te fakafofoga ʼo te Tevolo.’ Ki muli age, neʼe kamata fakasiosio e te tagata tana aga. Neʼe ina fakamahino fēnei: ‘Neʼe ʼau mahino ki taku agakovi. Neʼe ʼau lau te Tohi-Tapu, pea ʼaki te tokoni ʼo te ako ʼaia, ʼi te temi nei ko ʼau ko he Fakamoʼoni kua papitema.’ Koutou fakakaukauʼi age ki te fakapale lahi ʼo te fafine ʼohoana, ei, ʼi tana tokoni ke ‘hāofaki tona ʼohoana’ ʼi tana kātakiʼi agatonu te fakafeagai lolotoga ia taʼu e 12!
Tou Ako Mai Ia Sesu
13. (a) Koteā te ako tāfito ʼe feala ke maʼu e te ʼu tagata mo fafine ʼohoana mai te faʼahiga maʼuli ʼa Sesu? (b) ʼE lava feafeaʼi ki te hahaʼi ʼaē ʼe nātou manatu ʼe faigataʼa te fakalogo ki te finegalo ʼa te ʼAtua ke nātou maʼu he fua lelei mai te faʼifaʼitaki ʼa Sesu?
13 Ko te ako tāfito ʼe feala ke maʼu e te ʼu tagata ʼohoana pea mo te ʼu fafine ʼohoana mai te maʼuli ʼa Sesu ko tana talagafua ki te ʼAtua. Neʼe ʼui fēnei e Sesu: “ ʼE ʼau fai tuʼumaʼu te ʼu meʼa ʼaē ʼe loto ia kiai.” “ ʼE ʼau kumi, mole ko toku finegalo, kae ko te finegalo ʼo ia ʼaē neʼe ina fekauʼi mai ʼau.” (Soane 5:30; 8:29) Māʼia ʼi te temi ʼaē neʼe mata faigataʼa kia Sesu ke ina fakahoko te faʼahi maʼuhiga ʼo te finegalo ʼa te ʼAtua, neʼe talagafua ki te ʼAtua. Neʼe faikole fēnei: “Kapau ʼe ke loto kiai, fakamamaʼo ia te ʼau te ipu nei.” Kae neʼe ina ʼui atu aipe: “Kae, ke mole ko toku finegalo ʼaē ʼe tonu ke fai, kae ʼo koe ia.” (Luka 22:42) Neʼe mole kole e Sesu ki te ʼAtua ke ina fetogi Tona finegalo; neʼe ina fakahā neʼe ʼofa moʼoni ki te ʼAtua ʼi tana talagafua ʼo fakalogo ki te ʼu meʼa fuli ʼaē neʼe finegalo age ki ai e te ʼAtua. (1 Soane 5:3) ʼI te ai tuʼumaʼu ki muʼa ʼo te finegalo ʼa te ʼAtua, ohage ko tona fai e Sesu, ʼe ko te faʼahi maʼuhiga ʼaupito ki te maui mālie ʼo mole gata pe ki te maʼuli tokotahi kae ki te nofo ʼohoana pe foki pea mo te maʼuli faka famili. Tou vakaʼi pe koʼe ʼe hoko feiā te faʼahi ʼaia.
14. Neʼe feafeaʼi te maʼu ʼa te kau Kilisitiano he ʼu manatu ʼe kovi?
14 Ohage ko tana ʼui ʼi muʼa atu, mokā fakamuʼamuʼa e te hahaʼi tui te ʼAtua, ʼe nātou lotolelei ke nātou nonofo mo ia ʼaē ʼe mole tui pea ʼe nātou tokoniʼi tuʼumaʼu nātou ke tau pea mo nātou te hāofaki. Kae tatau aipe pe ko nāua toko lua ʼo te taumatuʼa ʼe ko he ʼu hahaʼi tui, ʼe feala ki tana nofo ʼohoana ke mole fakaʼaluʼalu lelei. ʼUhi ko te ʼu holi ʼo te agahala, ʼe mole fefakahāʼaki tuʼumaʼu e te ʼu tagata ʼohoana pea mo te ʼu fafine ʼohoana he ʼu manatu ʼofa. (Loma 7:19, 20; 1 Kolonito 7:28) Māʼia mo ʼihi ʼe nātou kumi ke nātou maʼu he hoa kehe, logope ʼe mole ʼi ai he ʼu tupuʼaga ʼe fakatafito ki te Tohi-Tapu ke nātou mavete. (Mateo 19:9; Hepeleo 13:4) ʼE nātou manatu ko te faʼahi ʼaia ʼe lelei age maʼa nātou, ko te finegalo ʼa te ʼAtua ʼo ʼuhiga mo te nonofo fakatahi ʼa te ʼu tagata ʼohoana pea mo te ʼu fafine ʼohoana ʼe faigataʼa fau. (Malakia 2:16; Mateo 19:5, 6) ʼE mahino ia, ko te faʼahi ʼaia ʼe ko he manatu fakatagata ia, kae mole ko te ʼu manatu ia ʼa te ʼAtua.
15. He koʼe koa ʼe ko he puipui te fakamuʼamuʼa ʼo te ʼAtua?
15 ʼE ko he puipuiʼaga te fakamuʼamuʼa ia te ʼAtua! Ko te ʼu taumatuʼa ʼaē ʼe nātou fai te faʼahi ʼaia ʼe nātou faiga ke nātou nonofo fakatahi pea ke nātou fakatokatoka tanatou ʼu fihifihia ʼaki te maʼuliʼi ʼo te ʼu tokoni ʼa te Folafola ʼa te ʼAtua. ʼE nātou tekeʼi ai te ʼu faʼahiga lotomamahi fuli ʼaē ʼe hoko ʼi te mole tokagaʼi tona finegalo. (Pesalemo 19:7-11) Neʼe fakahā te faʼahi ʼaia e te taumatuʼa kei tūpulaga ʼaē, ʼi te teuteu ʼaē ke nā mavete, neʼe nā fakatotonu ke nā mulimuli ki te tokoni ʼa te Tohi-Tapu. Ko te ʼu taʼu ki muli age, ʼi te manatuʼi ʼa te fafine ʼohoana te fiafia neʼe ina maʼu ʼi tana nofo ʼohoana, neʼe ina ʼui fēnei: “ ʼE tonu ke ʼau heka, pea ʼe ʼau tagi he neʼe meʼa pe ke ma mavete mo toku ʼohoana lolotoga te ʼu taʼu ʼaia. Koia ʼe ʼau faikole kia Sehova ʼAtua pea mo ʼau fakamālo kia ia ki tana ʼu tokoni pea mo tana takitaki ʼaē neʼe ina foaki mai kia māua toko lua ʼi te ʼu faʼahiga felogoi fakafiafia feiā.”
Kau Tagata ʼOhoana, Kau Fafine ʼOhoana—Koutou Faʼifaʼitaki Ia Kilisito!
16. Koteā te faʼifaʼitaki neʼe tuku e Sesu ki te kau tagata mo te kau fafine ʼohoana?
16 Ko Sesu, ʼaē neʼe ina fakamuʼamuʼa tuʼumaʼu ia te ʼAtua, neʼe ina tuku he faʼifaʼitaki fakatalakitupua ki te ʼu tagata mo fafine ʼohoana, pea ʼe lelei maʼa nātou hanatou tokakaga kiai. ʼE fakaloto mālohiʼi te kau tagata ʼohoana ke nātou faʼifaʼitakiʼi te agaaga ʼaē neʼe fakahā e te takitaki manavaʼofa ʼa Sesu kia nātou ʼo te kokelekasio faka Kilisitiano. (Efesi 5:23) Pea ko te kau fafine ʼohoana ʼe feala ke nātou ako mai te faʼifaʼitaki agatonu ʼa Sesu ʼi tana talagafua ki te ʼAtua.—1 Kolonito 11:3.
17, 18. ʼI he ʼaluʼaga feafeaʼi neʼe tuku e Sesu he faʼifaʼitaki lelei ki te kau tagata ʼohoana?
17 ʼE fakatotonu e te Tohi-Tapu: “ ʼU tagata ʼohoana, ke koutou haga ʼofa ki ʼokotou ʼohoana, ohage ko te ʼofa ʼa Kilisito ki te kokelekasio pea mo ina foaki ia ia totonu maʼa te kokelekasio.” (Efesi 5:25) Ko te agaaga maʼuhiga ʼaē neʼe fakahā e Sesu ʼi tona ʼofa ki te kokelekasio ʼo tana kau ʼapositolo neʼe ko tana liliu ko tonatou kaumeʼa lelei. Neʼe ina ʼui fēnei: “Neʼe ʼau fakahigoaʼi koutou ko he ʼu kaumeʼa, mai tona ʼaluʼaga ʼaē neʼe ʼau fakaʼilo atu te ʼu meʼa fuli neʼe ʼau logoʼi mai taku Tāmai.” (Soane 15:15) Koutou fakakaukauʼi ki te lahi ʼo te temi ʼaē neʼe palalau ai Sesu mo tana kau tisipulo—te lahi ʼaupito ʼo tana ʼu fai palalau mo nātou—pea mo tana falala kia nātou! ʼE mole ko he faʼifaʼitaki lelei koa la ki te ʼu tagata ʼohoana?
18 Neʼe tokaga moʼoni Sesu ki tana ʼu tisipulo pea neʼe ina fakahā he ʼofa lahi kia nātou. (Soane 13:1) Kapau neʼe mole faʼa mahino lelei kia nātou tana ʼu akonaki, ʼaki he lotoʼutaki, neʼe ina toʼo he temi moʼo fakamahinohino ʼāteaina age te ʼu meʼa kia nātou. (Mateo 13:36-43) ʼU tagata ʼohoana, ʼe tatau koa kia koutou te maʼuhiga ʼo te maʼuli fīmālie ʼi te faʼahi fakalaumālie ʼo tokotou ʼohoana? ʼE koutou fakaʼaoga koa he temi mo ia, ke koutou ʼiloʼi papau peʼe koulua mahino lelei ki te ʼu moʼoni faka Tohi-Tapu ʼi tokolua ʼatamai pea ʼi tokolua loto? Neʼe ʼalu Sesu mo tana kau tisipulo ʼi te minisitelio, lagi mo ina akoako nātou takitokotahi. ʼE koutou ʼolo koa mo tokotou ʼohoana ʼi te minisitelio, ʼo koutou kau ki te ʼu ʼaʼahi ʼi te ʼu ʼapi pea mo fai he ʼu ako faka Tohi-Tapu?
19. Neʼe feafeaʼi te tuku e Sesu he faʼifaʼitaki ki te kau tagata ʼohoana ʼi tana ʼu felogoi mo tana kau ʼapositolo ʼi te ʼu temi ʼaē neʼe toe malaga ai te ʼu vaivaiʼaga?
19 Tāfito ʼo ʼuhiga mo te ʼuhiga agahala ʼo tana kau ʼapositolo neʼe foaki e Sesu he faʼifaʼitaki mālohi ki te ʼu tagata ʼohoana. Lolotoga tana kai fakamuli mo tana kau ʼapositolo, neʼe fakatokagaʼi e Sesu he fihifihia neʼe malaga ʼo ʼuhiga mo te fakataupiepie. Neʼe fefeka koa tana fakatonutonuʼi ʼo nātou? Kailoa, kae neʼe ina fufulu ʼaki he agavaivai te ʼu vaʼe ʼo nātou takitokotahi. (Maleko 9:33-37; 10:35-45; Soane 13:2-17) ʼE koutou fakahā koa he faʼahiga faʼa kātaki feiā ki tokotou ʼohoana? ʼO mole koutou lāuga ʼo ʼuhiga mo he vaivaiʼaga kua toe malaga, ʼe koutou faiga koa ʼaki he loto faʼa kātaki ke koutou tokoni kia ia pea mo lave takotou faʼifaʼitaki ki tona loto? ʼE mahino papau ia ʼe tali lelei e te ʼu fafine ʼohoana ki he taʼi ʼofa feiā, ohage ko tona fai e te kau ʼapositolo ki muli age.
20. Koteā ʼaē ʼe mole tonu ke galoʼi ʼi he temi e te ʼu fafine ʼohoana Kilisitiano, pea ko ai ʼaē neʼe foaki ko honatou faʼifaʼitakiʼaga?
20 ʼE toe ʼaoga pe foki ki te ʼu fafine ʼohoana ke nātou faʼifaʼitaki kia Sesu, ʼo mole ina galoʼi tuʼa tahi “ko te pule ʼo Kilisito ko te ʼAtua.” Neʼe fakalogo tuʼumaʼu ki tona Tāmai ʼaē ʼe ʼi selo. ʼO toe feiā pe, ʼe mole tonu ke galoʼi te ʼu fafine ʼohoana “ko te pule ʼo te fafine ko te tagata,” ei, ko tonatou ʼohoana tonatou pule. (1 Kolonito 11:3; Efesi 5:23) Neʼe fakaloto mālohiʼi e te ʼapositolo ko Petelo te ʼu fafine ʼohoana ʼaē ko te ʼu Kilisitiano, ke nātou vakavakaʼi te faʼifaʼitaki ʼo te ʼu “fafine maʼoniʼoni” ʼo te ʼu temi muʼa, tāfito te faʼifaʼitaki ʼo Sala, “ ʼaē neʼe fakalogo kia Apalahamo, ʼo ina fakahigoaʼi ko tona ‘ ʼaliki.’ ”—1 Petelo 3:5, 6.
21. He koʼe neʼe maui mālie te nofo ʼohoana ʼa Apalahamo mo Sala kae neʼe hala ia te nofo ʼohoana ʼa Lote pea mo tona ʼohoana?
21 ʼE mahino ia neʼe tuku e Sala te ʼapi ʼaē neʼe maʼuli fīmālie ai ʼi he kolo koloaʼia, ke maʼuli ʼi te ʼu fale fehikitaki ʼi he fenua matāpule. Koteā tona tupuʼaga? Neʼe ina leleiʼia koa te taʼi faʼahiga maʼuli ʼaia? ʼE mahino papau ia ʼe mole ko te faʼahi ʼaia. Kae neʼe mavae koa ʼuhi he neʼe kole age e tona ʼohoana? ʼE mahino ia ʼe kau te faʼahi ʼaia ki te tupuʼaga ʼo tana mavae, he neʼe ʼofa Sala pea mo fakaʼapaʼapa kia Apalahamo ʼuhi ko tana ʼu kalitate faka lotu. (Senesi 18:12) Kae ko te tupuʼaga tāfito ʼo tana ʼalu mo tona ʼohoana, neʼe ko tona ʼofa kia Sehova pea tana holi fakamalotoloto ke ina mulimuli ki te takitaki ʼa te ʼAtua. (Senesi 12:1) Neʼe fiafia ia ʼi te talagafua ki te ʼAtua. ʼI te tahi age faʼahi, neʼe lotolotolua te ʼohoana ʼo Lote ʼi te fai ʼo te finegalo ʼa te ʼAtua pea neʼe sio ai ki muli mo fakaʼamu ki te ʼu meʼa ʼaē neʼe līaki ʼi tona kolo ko Sotoma. (Senesi 19:15, 25, 26; Luka 17:32) ʼI fakaʼofaʼofa leva ʼo te fakaʼosi ʼo te nofo ʼohoana ʼaia—te puli ʼo te ʼu meʼa fuli ʼuhi ko tana talagataʼa ki te ʼAtua!
22. (a) Koteā te fakasiosio ʼe tonu anai ke fai e nātou takitokotahi ʼo te famili? (b) Koteā ka tou vakaʼi anai ʼi te ako ka hoa mai?
22 ʼI tokotou ʼuhiga tagata mo fafine ʼohoana, ʼe maʼuhiga ke koutou fai te fehuʼi ʼaenī, ‘ ʼI tamatou famili ʼe mātou fakamuʼamuʼa koa te ʼAtua? ʼE ʼau faiga moʼoni koa ke ʼau fakahoko te tuʼulaga ʼi te famili ʼaē neʼe tuku mai e te ʼAtua? ʼE ʼau faiga fakamalotoloto koa ke ʼau ʼofa ki toku ʼohoana pea mo tokoni ke ina maʼu peʼe ke ina taupau maʼu he ʼu felogoi lelei mo Sehova?’ Tokolahi te ʼu famili ʼe nātou maʼu foki ni ʼu fānau. ʼE tou vakaʼi anai te tuʼulaga ʼo te ʼu mātuʼa pea mo te ʼaoga kia nātou pea mo tanatou ʼu fānau ke nātou fakamuʼamuʼa te ʼAtua.
ʼE Kei Koutou Manatuʼi Koa?
◻ Koteā te ʼu fua ʼo te ʼu akonaki ʼa Sesu ʼe feala ke hoko ʼi te ʼu famili tokolahi?
◻ Koteā te fakapale neʼe maʼu e te toko lauʼi afe ʼi tanatou faiga mālohi ʼi tonatou ʼuhiga Kilisitiano?
◻ Koteā ʼaē ka ina tokoniʼi te ʼu ʼohoana ke nātou tekeʼi te ʼu aga heʼeʼaoga pea mo te mavete?
◻ Koteā ʼaē ʼe feala ke ako e te kau tagata ʼohoana mai te faʼifaʼitaki ʼa Sesu?
◻ ʼE lava feafeaʼi ki te ʼu fafine ʼohoana ke nātou kau ki te fakafiafia ʼo tanatou nofo ʼohoana?
[Paki ʼo te pasina 10]
Neʼe kau feafeaʼi ia Sala ki te maui mālie ʼo tona nofo ʼohoana?