Te Takitaki Fakapotopoto Ki Te ʼu Taumātuʼa
“Ke fakalogo te ʼu fafine ki ʼonatou ʼohoana ohage ko hanatou fakalogo ki te ʼAliki. ʼU tagata ʼohoana, ke koutou haga ʼofa ki ʼokotou ʼohoana.”—Efeso 5:22, 25, MN.
1. Koteā te faka ʼuhiga totonu ʼo te ʼohoana?
NEʼE ʼui e Sesu neʼe fakatahiʼi e te ʼAtua ia te tagata pea mo te fafine ʼi te ʼohoana ke nā liliu ko te “kakano e tahi.” (Mateo 19:5, 6) Ko te tagata pea mo te fafine ʼaia ʼe mole tatatou tonā ʼulugaaga, kae ʼe nā gāue fakatahi ki te fakatuʼutuʼu e tahi. Ko te ʼohoana ʼe ko he fakapapau ke nā māʼuʼuli fakatahi ʼi tonā maʼuli kātoa. ʼE lahi te ʼu fenua, ʼe faigafua ai ia te māvete, kae ki te kau Kilisitiano ko te ʼohoana ʼe ko he fakatuʼutuʼu ʼe taputapu. ʼE hoki veteki mo kapau neʼe hoko he agahala mamafa.—Mateo 19:9.
2. (a) Koteā te tokoni ʼaē ʼe lava maʼu e te hahaʼi ʼohoana? (b) He koʼe ʼe maʼuhiga ke tou faiga ki he nofo ʼohoana ʼe lelei?
2 Neʼe ʼui fēnei e te fafine fai tokoni ʼohoana: “Ko te ʼohoana fiafia ʼe hoko ai ia te ʼu fetofetogi kehekehe: ʼe ʼi ai te ʼu ʼaluʼaga foʼou, ʼe hoko te ʼu fihifihia, pea ʼe fakaʼaogaʼi e te taumātuʼa te ʼu faigamālie ʼaē ʼe nā maʼu ʼi te ʼu temi kehekehe ʼo tonā maʼuli.” Maʼa te hahaʼi ʼohoana, ko te ʼu faigamālie ʼaia ʼe ko te takitaki fakapotopoto faka Tohi-Tapu, te tokoni ʼaē ʼe foaki age e tonatou ʼu tēhina mo tuagaʼane Kilisitiano, pea mo te felogoi lelei ʼaē mo Sehova ʼi te faikole. Ko he nofo ʼohoana ʼe lelei ʼe nā ʼutakiʼi te ʼu fihifihia, pea ʼaki te temi ʼe nā māʼuʼuli fiafia pea mo maʼuli fīmālie. Tahi ʼaē meʼa maʼuhiga, ko he maʼuli faka taumātuʼa feiā ʼe ina faka kolōliaʼi ia Sehova ʼAtua, ia te Tupuʼaga ʼo te nofo ʼohoana.—Senesi 2:18, 21-24; 1 Kolonito 10:31; Efeso 3:15; 1 Tesalonika 5:17.
Tou Faʼifaʼitakiʼi Ia Sesu Pea Mo Tana Kokelekasio
3. (a) Koteā te tokoni ʼaē neʼe fai e Paulo ki te hahaʼi ʼohoana? (b) Koteā te faʼifaʼitaki lelei neʼe tuku mai e Sesu?
3 Kua hili nei kiai taʼu e lua afe, neʼe fai e te ʼapositolo ko Paulo ia te tokoni ʼaoga ki te hahaʼi ʼohoana Kilisitiano ʼi tana faitohi ʼaenī: “Ohage ko te fakalogo ʼa te kokelekasio kiā Kilisito, ke toe feiā pe mo te fakalogo ʼa te ʼu fafine ki ʼonatou ʼohoana ia meʼa fuli pe. ʼU tagata ʼohoana, ke koutou haga ʼofa ki ʼokotou ʼohoana, ohage ko te ʼofa ʼa Kilisito ki te kokelekasio pea mo ina foaki ia ia totonu maʼa te kokelekasio.” (Efeso 5:24, 25, MN ) ʼE ko he faʼifaʼitaki lelei kiā tatou! Ko te ʼu fafine Kilisitiano fakapotopoto ʼaē ʼe nātou agavaivai ʼo fakalogo ki ʼonatou ʼohoana, ʼe nātou faʼifaʼitakiʼi te kokelekasio ʼaē ʼe lagolago pea mo fakalogo ki te pelesepeto ʼo ʼuhiga mo te tuʼulaga pule. Ko te ʼu tagata ʼohoana ʼaē ʼe tauhi kiā Sehova pea mo haga ʼofa ki ʼonatou hoa, ʼi te ʼu temi ʼaē ʼe maui mālie ai peʼe ko te ʼu temi faigataʼa, ʼe nātou muliʼi fakalelei ia te faʼifaʼitaki ʼofa ʼa Kilisito ki te kokelekasio pea mo tana tokaga kiai.
4. E feafeaʼi ki te ʼu tagata ʼohoana hanatou faʼifaʼitakiʼi ia Sesu?
4 Ko te ʼu tagata ʼohoana Kilisitiano ʼe pule ki ʼonatou famili, pea ko Sesu ʼaē ʼe pule kiā nātou. (1 Kolonito 11:3) Koia, ohage ko te tokaga ʼa Sesu ki tana kokelekasio, ʼe toe tokaga fakalelei mo te ʼu tagata ʼohoana ki tonatou ʼu famili ʼi te faʼahi fakalaumālie pea mo te faʼahi fakasino, pea ʼe tonu ʼi ʼihi temi ke nātou fai ni ʼu sākilifisio. ʼE nātou fakamuʼamuʼa te fīmālie ʼo tonatou famili ʼi tonatou fīmālie ʼo nātou totonu. Neʼe ʼui e Sesu: “Koia, ko te meʼa fuli pe ʼe koutou loto ke fai e te hahaʼi maʼa koutou, ʼe maʼua foki mo koutou, ke koutou toe fai feiā maʼa nātou.” (Mateo 7:12, MN ) Ko te pelesepeto ʼaia ʼe maʼuhiga ʼaupito ʼi te nofo ʼohoana. Pea ko te faʼahi ʼaia neʼe fakahā e Paulo ʼi tana ʼui ʼaenī: “ ʼE tonu ke feiā te ʼofa ʼa nātou tagata ki ʼonatou ʼohoana, ohage pe ko ʼonatou sino totonu. . . . Mole heʼeki he tagata kua fehiʼa ki tona sino; kailoa ia, ʼe ina fafaga pea mo ina fakapelepeleʼi.” (Efeso 5:28, 29, MN ) ʼE tonu ki te tagata ke ina fafaga pea mo fakapelepeleʼi tona ʼohoana ohage pe ko tana fafaga pea mo tana fakapelepeleʼi ʼo ia totonu.
5. E feafeaʼi ki te ʼu fafine ʼohoana hanatou faʼifaʼitakiʼi ia te kokelekasio faka Kilisitiano?
5 Ko te ʼu fafine ʼohoana ʼaē ʼe tauhi ki te ʼAtua ʼe nātou mulimuli ki te faʼifaʼitaki ʼa te kokelekasio faka Kilisitiano. ʼI te maʼuli ʼa Sesu ʼi te kele, ko tana ʼu tisipulo neʼe nātou tali fakafiafia ke nātou līaki te ʼu meʼa ʼaē neʼe nātou maʼumaʼua kiai ke feala hanatou mulimuli iā te ia. ʼI tana ʼosi mate, neʼe nātou hoko atu pe ia tanatou fakalogo ʼaē kiā te ia, pea hili teitei taʼu e 2 000 tupu, neʼe kei fakalogo pe te kokelekasio faka Kilisitiano moʼoni kiā Sesu, pea mo muliʼi ia tana takitaki ia meʼa fuli pe. ʼE toe feiā mo te ʼu fafine Kilisitiano, ʼe mole nātou meʼa noaʼi tonatou ʼohoana, peʼe nātou fakamālaloʼi te fakatuʼutuʼu faka Tohi-Tapu ʼo tonatou tuʼulaga pule ʼaē ʼi te ʼohoana. Kae ʼe nātou lagolago pea mo fakalogo ki ʼonatou ʼohoana, ʼo kaugā gāue mo nātou, pea ʼaki tanatou ʼu aga ʼaia ʼe nātou fakaloto mālohiʼi ai tonatou ʼu hoa. Kapau ʼe feiā ia te feʼofaʼaki ʼa te tagata pea mo te fafine, pea ʼe fīmālie anai tonā maʼuli faka taumātuʼa pea ʼe nā fiafia anai ʼi tanā ʼu felogoi.
Koutou Haga Nonofo Mo Nātou
6. Koteā te tokoni neʼe fai e Petelo ki te ʼu tagata ʼohoana, pea he koʼe ʼe maʼuhiga?
6 Mo te ʼapositolo foki ko Petelo neʼe ina tokoniʼi te hahaʼi ʼohoana, pea neʼe fai tāfito tana ʼu palalau ki te ʼu tagata ʼohoana. Neʼe ina ʼui fēnei: “Koutou haga nonofo mo nātou ʼo mulimuli pe ki te ʼatamai mālama, ʼo faka maʼuhigaʼi nātou ohage ki he ipu ʼe vaivai age, te ipu fakafafine, heʼe mo koutou foki, ʼe koutou maʼu mo nātou te tōfiga ʼo te ʼofa makehe, ke mole tāʼofi ai takotou ʼu faikole.” (1 Petelo 3:7, MN ) ʼE ʼiloga te maʼuhiga ʼo te tokoni ʼa Petelo ʼi te ʼu palalau fakaʼosi ʼo te vaega ʼaia. Kapau ko te tagata ʼe mole ina faka maʼuhigaʼi tona ʼohoana, pea ʼe mole lelei anai tana ʼu felogoi ʼaē mo Sehova. ʼE mole fakalogo anai ia Sehova ki tana ʼu faikole.
7. ʼE lava faka maʼuhigaʼi feafeaʼi e he tagata ia tona ʼohoana?
7 ʼE lava faka maʼuhigaʼi feafeaʼi e te ʼu tagata ʼohoana ia tonatou ʼu hoa? ʼE tonu ke nātou ʼoʼofa kiā nātou, mo fakaʼapaʼapa kiā nātou pea mo tokagaʼi tonatou matagafua. ʼE lagi ki te tokolahi ʼe faikehe anai ia te taʼi tokaga ʼofa ʼaia ki te fafine. Neʼe tohi fēnei e te tagata Keleka fai Tohi-Tapu: “ ʼI te lao ʼa te kau Loma neʼe mole he ʼuhiga ʼo te fafine. ʼI te lao neʼe tatau pe ia mo he tamasiʼi. . . . Neʼe fakalogo kātoa ki tona ʼohoana, pea neʼe faʼifaʼitaliha te tagata ki ai.” Kae neʼe kehe ʼosi ia mo te ʼu akonaki faka Kilisitiano! Ko te tagata ʼohoana Kilisitiano neʼe ina faka maʼuhigaʼi tona hoa. Pea neʼe fakatafito tana ʼu felogoi mo tona hoa ki te ʼu pelesepeto faka Kilisitiano, kae mole ko te ʼu meʼa ʼaē neʼe loto kiai. Tahi ʼaē, neʼe fakaʼapaʼapa kiā ia “ ʼo mulimuli pe ki te ʼatamai mālama,” heʼe ina ʼiloʼi ʼe ko te ipu ʼe vaivai age.
Koteā Te Faka ʼUhiga ʼo Te ʼUi ʼAē ʼe Ko “He Ipu ʼe Vaivai Age”?
8, 9. Ko te ʼu faʼahi fea ʼaē ʼe tatau ai te hahaʼi fafine pea mo te hahaʼi tagata?
8 ʼI te ʼui ʼa te ʼapositolo ko Petelo ko te fafine ʼe ko “he ipu ʼe vaivai age,” ʼe mole faka ʼuhiga leva ko te ʼu fafine ʼe vaivai age ʼi te tagata ʼi te faʼahi ʼo te ʼatamai pea mo te faʼahi fakalaumālie. ʼE moʼoni, ʼe lahi te ʼu tēhina ʼi te kokelekasio ʼe foaki age tonatou ʼu pilivilesio ʼe mole tuku age anai ki te hahaʼi fafine, pea ʼi te famili ko te hahaʼi fafine ʼe nātou fakalogo ki ʼonatou ʼohoana. (1 Kolonito 14:35; 1 Timoteo 2:12) Kae ko te tui, mo te faʼa kātaki, pea mo te ʼu lēkula māʼoluga fakaʼatua, ʼe fakamaʼua tatau ki te kau Kilisitiano fuli, tagata pea mo fafine. Pea ohage ko tona ʼui e Petelo, ko te tagata mo te fafine ʼe nā maʼu tatau ia “te tōfiga ʼo te ʼofa makehe.” ʼO ʼuhiga mo te hāofaki, ʼe nā tatau iā muʼa ʼo Sehova ʼAtua. (Kalate 3:28) Ko te tohi ʼaē neʼe fai e Petelo neʼe ina fai ki te kau Kilisitiano fakanofo ʼo te ʼuluaki sēkulō. Koia, neʼe ina fakamanatuʼi age ki te ʼu tagata ʼohoana Kilisitiano ʼe nātou “kaugā maʼu tofiʼa fakatahi pea mo Kilisito,” ko tona faka ʼuhiga ko nātou mo ʼonatou ʼohoana fafine ʼe nātou maʼu tatau ia te ʼamanaki ʼaē ke nātou māʼuʼuli ʼi selo. (Loma 8:17, MN ) ʼE hoko mai anai te temi ʼaē ka nātou gāue fakatahi ai ʼi te Puleʼaga ʼo te ʼAtua ʼi selo, ko he kau pelepiteIo pea mo ni ʼu hau!—Apokalipesi 5:10.
9 Ko te ʼu fafine ʼohoana Kilisitiano ʼaē neʼe fakanofo ʼaki te laumālie, neʼe mole nātou mālalo ʼi ʼonatou ʼohoana Kilisitiano ʼaē neʼe fakanofo. Pea ʼe toe feiā pe mo te hahaʼi ʼohoana ʼaē ka māʼuʼuli ʼi te kele. Ko te ʼu tagata pea mo te ʼu fafine ʼo te “toe hahaʼi tokolahi,” ʼe nātou fō ʼonatou kofu pea mo fakahihina ʼi te taʼataʼa ʼo te Akeno. ʼI te malamanei kātoa, ko te hahaʼi tagata pea mo te hahaʼi fafine ʼe nātou kau fakatahi ʼi te “ ʼaho mo te po” ki te fakavikiviki ʼo Sehova. (Apokalipesi 7:9, 10, 14, 15, MN ) Ko te hahaʼi tagata pea mo te hahaʼi fafine ʼe nātou fakatalitali fakafiafia ki “te ateaina o te kololia o te u fanau a te Atua” ʼi te temi ʼaē ka nātou maʼu ai te “mauli mooni.” (Loma 8:21; 1 Timoteo 6:19) Peʼe ko te kau fakanofo peʼe ko te tahi ʼu ōvi, kae ko te kau Kilisitiano fuli ʼe ko he “faga ōvi pe e tahi” ʼe nātou gāue fakatahi kiā Sehova ʼi te takitaki ʼa te “tagata tauhi ōvi pe e tahi.” (Soane 10:16, MN ) Koia ʼaē ʼe tonu ai ki te tagata ʼohoana pea mo tona hoa ke nā fefakaʼapaʼapaʼaʼaki!
10. Koteā te faka ʼuhiga ʼo te ʼui ʼaē ko te ʼu fafine ʼe ko “te ʼu ipu ʼe vaivai age”?
10 Koteā te faka ʼuhiga ʼo te ʼui ʼaē ko nātou fafine ʼe ko ‘te ʼu ipu ʼe vaivai age’? Neʼe lagi fia palalau ia Petelo ki te veliveli age ʼo nātou fafine, pea mo tanatou vaivai age ʼi te faʼahi fakasino ʼi te hahaʼi tagata. Pea tahi, ʼi totatou ʼuhiga agahala, ko te pilivilesio taulekaleka ʼaē ko te faifānau ʼe fakatupu gaʼegaʼe ki te ʼu fafine. Ko te ʼu fafine ʼaē ʼe kei maʼu fānau ʼe lagi nātou vaivai tuʼumaʼu. ʼE ʼaoga tāfito kiā nātou he ʼofa makehe pea mo he tokaga mokā nātou tali ia te ʼu mamahi ʼaia peʼe nātou gaʼegaʼe ʼi tanatou faitama pea mo tanatou faifānau. Kapau ʼe tokaga te tagata ki te ʼu meʼa ʼaē ʼe ʼaoga ki tona hoa, pea ʼe ko he faʼahi ʼe lagolago ʼaupito anai ki te fiafia ʼo tonā maʼuli faka taumātuʼa.
Te ʼu Taumātuʼa ʼAē ʼe Mole Lotu Tahi
11. Koteā ʼaē ʼe feala ai ki he taumātuʼa ke nā maʼuli fiafia logola ʼe mole nā lotu tahi?
11 E feafeaʼi ki te ʼu taumātuʼa ʼaē ʼe mole lotu tahi, lagi neʼe ko he tokotahi ʼi te taumātuʼa ʼaē neʼe ina tali ia te moʼoni faka Kilisitiano kae kua nā ʼosi ʼohoana? ʼE lava maʼuli fīmālie koa te taʼi taumātuʼa ʼaia? ʼE lahi te ʼu taumātuʼa feiā ʼe nātou maʼuli fiafia. Logola ʼe mole lotu tahi he taumātuʼa kae ʼe feala ke maui mālie tanā nonofo, heʼe nā fekātakiʼaki pea ʼe nā maʼu ai hanā fiafia. Pea kiā mata ʼo Sehova ʼe kei nā ʼohoana pe; ʼe kei nā ‘kakano tahi.’ Koia, ʼe tokoniʼi te ʼu ʼohoana Kilisitiano ke nātou nonofo mo ʼonatou ʼohoana ʼaē ʼe mole tauhi kiā Sehova, mo kapau ʼe mole nātou fia māvete. Kapau ʼe nātou maʼu fānau, pea ko te ʼu fānau ʼaia ʼe feala pe ke nātou maʼu ia te ʼu lelei ʼo te agatonu ʼo tanatou tāmai peʼe ko tanatou faʼē ʼaē ʼe tauhi kiā Sehova.—1 Kolonito 7:12-14.
12, 13. Kapau ʼe muliʼi e te ʼu fafine Kilisitiano ia te tokoni ʼa Petelo, ʼe nātou tokoni feafeaʼi anai ki tonatou ʼu ʼohoana?
12 Ko Petelo neʼe ina foaki te ʼu tokoni lelei ki te ʼu fafine Kilisitiano ʼaē ʼe mole lotu tahi mo tonatou ʼohoana. ʼE toe ʼaoga pe foki tana ʼu tokoni ki te ʼu tagata ʼohoana Kilisitiano. ʼE ʼui fēnei e Petelo: “Koutou fafine, koutou fakalogo ki ʼokotou ʼohoana totonu, koteʼuhi, kapau ʼe ʼi ai niʼihi ʼe mole fakalogo ki te folafola, ke nātou tafoki mai ʼuhi ko te aga ʼo tonatou ʼu ʼohoana, kae heʼeki fai he palalau, he neʼe nātou sio mata ki takotou aga ʼaē ʼe maʼa ʼo fakatahi mo te fakaʼapaʼapa ʼe lahi ʼaupito.”—1 Petelo 3:1, 2, MN.
13 ʼE ko he meʼa lelei mo kapau ʼe aga fakaʼeteʼete he fafine ʼi tana fakamahino tana tui ki tona hoa. Kae kapau ʼe mole fia fakalogo? ʼE ko he faʼahi ʼa ia pe tona filifili. Kae ʼaua naʼa koutou lotovaivai, heʼe ko te aga faka Kilisitiano ʼe ko he tahi ʼaia fakamoʼoni mālohi. Tokolahi te ʼu tagata ʼohoana ʼi te kamata neʼe mole nātou fia logo pea neʼe nātou fakafeagai ki tonatou ʼu ʼohoana, kae ʼi te temi nei kua nātou ‘tali lelei ia te maʼuli heʼegata’ he neʼe nātou sio mata ki te ʼu aga ʼo tonatou ʼu hoa. (Gaue 13:48) Koia, tatau aipe peʼe mole tali te moʼoni e te tagata, kae ʼaki te faʼifaʼitaki lelei ʼo tona ʼohoana, ʼe fua manuʼia ai tonā maʼuli faka taumātuʼa. Neʼe fakahā e te tagata ʼe ʼohoana mo te tuagaʼane, neʼe faigataʼa kiā ia hana maʼuliʼi ia te ʼu lēkula māʼoluga ʼa te kau Fakamoʼoni ʼa Sehova. Kae ʼi te tohi neʼe ina fai ki te sulunale, neʼe ina ʼui ai ko ia ʼe “ko te tagata ʼohoana fiafia ʼo te fafine agalelei” pea neʼe ina vikiviki ʼaupito te aga ʼo tona ʼohoana pea mo ʼona kaumeʼa Fakamoʼoni.
14. ʼE lava tokoni feafeaʼi he ʼu tagata ʼohoana ki ʼonatou ʼohoana ʼaē ʼe mole tauhi kiā Sehova?
14 ʼE mahino ia, ko te ʼu tagata ʼohoana Kilisitiano ʼaē neʼe nātou maʼuliʼi te ʼu tokoni ʼaē neʼe fai e Petelo, neʼe nātou faka tafoki mai ʼonatou hoa ʼaki pe tanatou aga. Neʼe sio tonu te ʼu fafine ʼaē neʼe mole tauhi kiā Sehova, ko tonatou ʼu hoa ʼe nātou fakahoko lelei ia tonatou ʼu maʼua, ʼe mole kei nātou maumauʼi te falā ki te sikaleti, mo te kava, mo te gaoʼi paʼaga pea mole kei nātou gutu tauvele. Pea ko ʼihi fafine ʼohoana feiā, neʼe nātou fai palalau mo ʼihi kau Fakamoʼoni ʼo te kokelekasio faka Kilisitiano. Neʼe malave kiā nātou ia te ʼofa faka tautēhina ʼa te kau Kilisitiano, pea ko te aga ʼa te ʼu tēhina neʼe ina faka tafoki nātou kiā Sehova.—Soane 13:34, 35.
“Te ʼUhiga Fufū ʼo Te Loto”
15, 16. Koteā te faʼahiga aga ʼaē ʼe feala anai ki he fafine Kilisitiano ke ina faka tafoki mai tona ʼohoana ʼaē ʼe mole tauhi kiā Sehova?
15 Ko te aga fea ʼaē ʼe ina lava faka tafoki mai he tagata ʼohoana? Ko te aga ʼa te ʼu fafine Kilisitiano. ʼE ʼui fēnei e Petelo: “Ko tokotou teuteu ke ʼaua naʼa ko he teuteu ʼo tuʼa ʼi he fī ʼo te lauʼulu pea mo ʼai he ʼu meʼa fakateuteu aulo peʼe ko he ʼai ʼo he ʼu kofu tuʼa, kae ko te ʼuhiga fufū ʼo te loto, ʼi te kofu ʼe mole feala ke popo ʼo te loto agamālū pea mo tokalelei, ʼaē ʼe maʼuhiga ʼaupito kiā mata ʼo te ʼAtua. Koteʼuhi he neʼe teuteu feiā ʼi te temi ʼāfea ia te kau fafine maʼoniʼoni ʼaē neʼe nātou falala ki te ʼAtua, ʼo nātou fakalogo ki ʼonatou ʼohoana totonu, ohage ko Sala ʼaē neʼe fakalogo kiā Apalahamo, ʼo ina fakahigoaʼi ko tona ‘ ʼaliki.’ Pea kua koutou liliu ko tana fānau, mo kapau ʼe koutou haga fai te meʼa ʼaē ʼe lelei pea mole koutou manavasiʼi ki he faʼahiga meʼa ʼe fakatupu mataku.”—1 Petelo 3:3-6, MN.
16 ʼE tokoni ia Petelo ki te fafine Kilisitiano ke mole ina faka maʼuhigaʼi fau tona ʼu teu ʼaē ʼe hā ki tuʼa. Kae ke ina maʼuliʼi te ʼu fua ʼo te ʼu akonaki faka Tohi-Tapu ke feala ke sio kiai tona ʼohoana. Koutou tuku ke sio pea mo fakamoʼoni ki tokotou ʼulugaaga foʼou. Lagi ʼe ina fakatatau anai mo tona ʼulugaaga ʼāfea. (Efeso 4:22-24) ʼE mahino ia, ʼe fakafimālie pea mo manakoʼia ia te “loto agamalu pea mo tokalelei” ʼo tona ʼohoana. Pea ʼe mole ko te tagata ʼohoana pe ʼaē ka ina leleiʼia te taʼi aga ʼaia, kae ʼe ko he tahi ʼaia meʼa “maʼuhiga ʼaupito kiā mata ʼo te ʼAtua.”—Kolose 3:12.
17. Koteā te faʼifaʼitaki lelei neʼe tuku mai e Sala ki te ʼu fafine ʼohoana Kilisitiano?
17 Ko Sala ʼe ko he faʼifaʼitaki lelei maʼa te ʼu fafine ʼohoana, peʼe nātou lotu tahi mo ʼonatou hoa peʼe kailoa. Ko Sala neʼe fakalogo ki te ʼuhiga pule ʼo Apalahamo. ʼI tona loto neʼe ina fakahigoaʼi ia ia ko tona “ ʼaliki.” (Senesi 18:12) Kae ko te faʼahi ʼaia neʼe mole ko hona faka mālaloʼi. ʼE mahino ia neʼe ko te fafine neʼe mālohi ʼi te faʼahi fakalaumālie ʼo ʼuhiga mo tana tui ʼaē kiā Sehova. Ei, neʼe kau ʼi te “ ʼao lahi ʼo te kau fakamoʼoni” ʼaē neʼe uga nātou e tanatou tui ke nātou “fēleleʼi ʼaki he loto faʼa kātaki ʼi te lele ʼaē kua tuku mai kiā tatou.” (Hepeleo 11:11; 12:1, MN ) ʼE mole ko he meʼa fakaufiufi ki he fafine Kilisitiano mo kapau ʼe fakatatau kiā Sala.
18. Ko te ʼu pelesepeto fea ʼaē ʼe tonu ke maʼuliʼi e te ʼu taumātuʼa ʼaē ʼe mole lotu tahi?
18 Tatau aipe mo kapau ʼe mole lotu tahi te taumātuʼa, kae ko te tagata ʼaē ʼe pule tuʼumaʼu ʼi te famili. Kapau ʼe ko te tagata ʼaē ʼe tui kiā Sehova, pea ʼe fakaʼapaʼapaʼa anai ki te lotu ʼo tona hoa, kae ʼe mole ina fai anai he meʼa ʼe mole ʼalutahi mo tana tui. Pea kapau ʼe ko te fafine ʼaē ʼe tauhi kiā Sehova, ʼe toe tokaga anai mo ia ke mole ina fai he meʼa ʼe mole ʼalutahi mo tana tui. (Gaue 5:29) Kae ʼe mole ina fakafihiʼi anai te tuʼulaga pule ʼo tona ʼohoana. ʼE fakaʼapaʼapa anai ki tona ʼuhiga pule pea mo fakalogo ki ‘te lao o tona ohoana.’—Loma 7:2.
Te ʼu Tokoni Lelei ʼa Te Tohi-Tapu
19. Koteā te ʼu meʼa ʼaē ʼe nātou fakatupu faigataʼa ia te nofo ʼohoana, pea ʼe lava tekeʼi feafeaʼi ia te ʼu fihifihia ʼaia?
19 ʼI te temi nei, ʼe lahi te ʼu meʼa ʼe nātou lava fakatupu faigataʼa ia te nofo ʼohoana. Ko ʼihi tagata ʼe mole nātou fakahoko ia tonatou ʼu maʼua faka famili. Ko ʼihi fafine ʼe mole nātou tali ia te takitaki ʼo tonatou ʼu ʼohoana. Ko ʼihi taumātuʼa, ko te fafine peʼe ko te tagata ʼe gaohi koviʼi ai. Maʼa te kau Kilisitiano ʼe lava faka faigataʼa ia tanatou agatonu ʼuhi ko te ʼu hoha faka ekonomika, mo te heʼe haohaoa, pea mo te ʼu aga heʼeʼaoga ʼo te malamanei. Logola te ʼu ʼaluʼaga ʼaia kae ko te ʼu tagata pea mo te ʼu fafine Kilisitiano ʼaē ʼe nātou maʼuliʼi te ʼu pelesepeto faka Tohi-Tapu, ʼe nātou maʼu ia te tapuakina ʼa Sehova. Tatau aipe mo kapau ʼe ko he tokotahi ʼi te taumātuʼa ʼaē ʼe ina maʼuliʼi te ʼu pelesepeto faka Tohi-Tapu, kae ʼe lelei age tonā maʼuli faka taumātuʼa. Pea tahi, ko Sehova ʼe ʼofa pea mo tokoni ki tana ʼu kaugana ʼaē logola ia te ʼu faigataʼaʼia, kae ʼe nātou agatonu aipe ki te ʼu fakapapau ʼaē neʼe nātou fai ki tonatou ʼohoana. ʼE mole galo kiā Sehova ia tanatou agatonu ʼaia.—Pesalemo 18:25; Hepeleo 6:10; 1 Petelo 3:12.
20. Koteā te tokoni neʼe foaki e Petelo maʼa te kau Kilisitiano fuli?
20 ʼI te ʼosi fai tokoni ʼa te ʼapositolo ko Petelo ki te ʼu tagata pea mo te ʼu fafine ʼohoana, neʼe ina fakaʼosi leva ia tana fai tokoni ʼaki te ʼu palalau fakaloto mālohi. Neʼe ina ʼui fēnei: “Koia, ke koutou maʼu fuli he manatu e tahi, koutou kaugā mamahi, mo ʼofa ki te ʼu tēhina, mo fonu ʼi te manavaʼofa mo te agavaivai, ʼaua naʼa koutou liufaki te kovi ki te kovi, peʼe ko te laukovi ki te laukovi, kae ke mole feiā ia, koutou tapuakiʼi, heʼe ko te ala ʼaia ʼaē neʼe pāuiʼi kiai koutou, koteʼuhi ke feala ai hakotou maʼu te tapuakina.” (1 Petelo 3:8, 9, MN ) ʼE ko he tokoni fakapotopoto kiā tatou fuli, tāfito la ki te hahaʼi ʼohoana!
ʼE Kei Koutou Manatuʼi Koa?
• ʼE faʼifaʼitakiʼi feafeaʼi e te ʼu tagata ʼohoana Kilisitiano ia Sesu?
• ʼE faʼifaʼitakiʼi feafeaʼi e te ʼu fafine ʼohoana Kilisitiano ia Sesu?
• Ko te ʼu faʼahi fea ʼaē ʼe feala ai ke faka maʼuhigaʼi e te ʼu tagata ʼohoana tonatou ʼu hoa?
• Koteā te aga ʼaē ʼe lelei ke fai e he fafine Kilisitiano ki tona ʼohoana ʼaē ʼe mole tauhi kiā Sehova?
[Paki ʼo te pasina 16]
Ko te tagata Kilisitiano ʼe ʼofa pea mo tokaga ki tona ʼohoana
Ko te fafine Kilisitiano ʼe fakaʼapaʼapa pea mo ina faka maʼuhigaʼi tona ʼohoana
[Paki ʼo te pasina 17]
ʼO mole tatau mo te lao ʼa te kau Loma, neʼe fakahā ʼi te ʼu akonaki faka Kilisitiano ʼe tonu ki te tagata ke ina faka maʼuhigaʼi tona ʼohoana
[Paki ʼo te pasina 18]
Ko te ʼu tagata pea mo te ʼu fafine ʼo te “toe hahaʼi tokolahi” ʼe nātou fakatalitali ki te maʼuli heʼegata ʼi te Palatiso
[Paki ʼo te pasina 20]
Neʼe faka ʼuhiga e Sala ia Apalahamo ʼe ko tona ʼaliki