Tonatou Maʼuli
Ko He Fai Faka Mafola Mamaʼo ʼi Te Fetofetogi ʼAluʼaga
NEʼE FAKAMATALA E RICARDO MALICSI
ʼI taku mavae ʼi taku gāue ʼi taku mole fia kau ki te ʼu meʼa ʼo te mālama ʼuhi ko au ko te Kilisitiano, ko au mo toku famili neʼe mātou kole kiā Sehova ke tokoni mai kiā mātou ʼo ʼuhiga mo tomatou ka haʼu. ʼI tamatou faikole, neʼe mātou fakahā ai tamatou fia gāue lahi ʼi te fai faka mafola. Mole tuai pea neʼe kamata tomatou maʼuli feʼoloʼaki, ʼo mātou ʼolo ki te ʼu fenua e valu. Neʼe mātou lava fakahoko ai tamatou minisitelio ʼi te ʼu koga meʼa mamaʼo ʼaia.
NEʼE au tupu ʼi Filipine ʼi te 1933 ʼi te famili neʼe kau ki te Lotu Faʼitaliha ʼo Filipine. Ko te toko 14 ʼo te famili neʼe kau fuli kiai. ʼI toku taʼu 12, neʼe au faikole ki te ʼAtua ke ina taki au ki te lotu moʼoni. Neʼe fakahū au e taku tagata faiako ki te kalasi ako faka lotu, pea neʼe au liliu ʼo tauhi lelei ki te Lotu Katolika. Neʼe mole au tō Misa ʼi he Moeaki peʼe ko he ʼAhotapu. Kae neʼe au liliu ʼo tui gataʼa pea neʼe mole au maʼu hoku fīmālie. Neʼe au hoha ki te ʼu fehuʼi ʼo ʼuhiga mo te meʼa ʼaē ʼe hoko ki te hahaʼi mokā nātou mamate, pea mo te ʼifeli kakaha pea mo te Tahitolu. Neʼe mole au leleiʼia pea mo feʼaugaʼia te ʼu tali ʼaē neʼe fai e te kau takitaki lotu.
Neʼe Au Maʼu Te ʼu Tali Feʼauga
ʼI taku ako ʼi te univelesitē, neʼe au pipiki ki te kūtuga neʼe kau ki te ʼu fuhu, mo te ʼu gaoʼi paʼaga, mo te suluka, pea mo te tahi ʼu aga heʼeʼaoga. ʼI te tahi afiafi, neʼe au felāveʼi mo te faʼē ʼo toku ʼu kaugā ako. Neʼe ko te fafine Fakamoʼoni ʼa Sehova. Neʼe au lagaʼi age ki ai te ʼu fehuʼi pe ʼaē neʼe au fai ki taku kau faiako lotu. Neʼe ina tali mai ki taku ʼu fehuʼi fuli ʼaki te Tohi-Tapu, pea neʼe au tui ai ko te meʼa ʼaē neʼe ina ʼui mai neʼe ko te moʼoni.
Neʼe au totogi taku Tohi-Tapu pea neʼe au ako mo te kau Fakamoʼoni. Mole tuai pea neʼe au kau ki te ʼu fono fuli ʼa te kau Fakamoʼoni ʼa Sehova. ʼI taku muliʼi te fakatokaga fakapotopoto ʼa te Tohi-Tapu ʼaē ʼe ʼui ai “ko te u fakakauga ae e kovi, e ina maumauʼi te u aga e lelei,” neʼe au mavae mai ʼi toku ʼu kaumeʼa ʼaē ʼe nātou fai te ʼu aga heʼeʼaoga. (1 Kolonito 15:33) Neʼe feala ai taku tuputupu ʼi taku ako faka Tohi-Tapu, pea ki muli age neʼe au foaki toku maʼuli kiā Sehova. Hili toku papitema ʼi te taʼu 1951, neʼe au gāue pionie (ko he minisi ʼe gāue temi kātoa) lolotoga te kiʼi temi. Pea ʼi te māhina ʼo Tesepeli ʼo te taʼu 1953, neʼe au ʼohoana mo Aurea Mendoza Cruz, ʼaē neʼe liliu ko toku hoa gāue agatonu ʼi te minisitelio.
Ko He Tali Ki Tamā ʼu Faikole
Neʼe mā fia gāue pionie. Kae neʼe mole mā fakahoko atu aipe tamā fia gāue temi kātoa maʼa Sehova. Kae logola te faʼahi ʼaia, neʼe mole tuku tamā kole hoholo kiā Sehova ke ina faka fealagia mai he ʼu faigamālie ʼi tana tauhi. Kae neʼe faigataʼa tomā maʼuli. Logola te faʼahi ʼaia kae neʼe mā taupau maʼu tamā ʼu fakatuʼutuʼu fakalaumālie, pea ʼi toku taʼu 25, neʼe fakanofo au ke au tagata taupau ʼo te kokelekasio, ko te tēhina ʼe leʼoleʼo ki te kokelekasio ʼa te kau Fakamoʼoni ʼa Sehova.
ʼI te tuputupu ʼo taku mahino ki te Tohi-Tapu pea mo au mahino lelei ki te pelesepeto ʼa Sehova, neʼe au tokagaʼi ai ko taku gāue ʼe fakafifihi ki toku ʼuhiga Kilisitiano ʼaē ʼe mole tonu ke au kau ki te ʼu meʼa ʼo te mālama. (Isaia 2:2-4) Neʼe au mavae ai ʼi taku gāue. Neʼe ko he ʼahiʼahiʼi ʼo tamatou tui. Pea ʼe feafeaʼi anai haku taupau te maʼuli ʼo toku famili? Neʼe mā toe fakaōvi ai kiā Sehova ʼAtua ʼi te faikole. (Pesalemo 65:2) Neʼe mā ʼui age ki ai tomā ʼu tuʼania, kae neʼe mā toe fakahā age foki tamā fia gāue ʼi te ʼu koga meʼa ʼaē ʼe ʼaoga lahi ai he kau fai faka mafola ʼo te Puleʼaga. (Filipe 4:6, 7) Neʼe mole mā ʼamanaki ʼe hoko anai he faigamālie feiā kiā māua!
Ko Te Kamataʼaga ʼo Tamatou Feʼoloʼaki
ʼI te māhina ʼo ʼApelili ʼo te taʼu 1965, neʼe au maʼu taku gāue, ʼe au takitaki te gāue tamate ʼafi pea mo te gāue hāofaki ʼi te Malaʼe Vakalele ʼo Vientiane ʼi Laos, pea neʼe mātou ʼolo kiai. ʼI te kolo ko Vientiane, neʼe ʼi ai te toko 24 kau Fakamoʼoni, pea neʼe mā fiafia ʼi te gāue fai faka mafola mo te kau misionea pea mo te ʼu tēhina ʼo te kolo. Ki muli age, neʼe mātou hiki ki te Malaʼe Vakalele ʼo Udon Thani ʼi Tailani. Neʼe mole ʼi ai he Fakamoʼoni ʼi te kolo ʼaia. Neʼe mātou fai faka famili te ʼu fono fuli ʼo te vāhaʼa. Neʼe mā fai faka mafola ʼi te ʼu ʼapi, mo fai te ʼu ʼaʼahi, pea mo kamata te ʼu ako faka Tohi-Tapu.
Neʼe mātou manatuʼi te tokoni ʼa Sesu ki tana ʼu tisipulo ke nātou “fua o fuhifuhiga.” (Soane 15:8) Koia neʼe mātou fakatotonu ke mātou muliʼi tanatou faʼifaʼitaki pea mo haga kalagaʼi te logo lelei. Neʼe mātou maʼu ai tona ʼu fua. Neʼe tali te moʼoni e te taʼahine Thaï pea neʼe liliu ko te tuagaʼane fakalaumālie. Ko te ʼu tagata Amelika e toko lua neʼe nā tali te moʼoni pea ʼaki te temi neʼe nā liliu ko te ʼu tagata ʼāfea. Neʼe mātou haga faka mafola te logo lelei lolotoga te ʼu taʼu e hogofulu tupu ʼi te potu noleto ʼo Tailani. Kua mā fiafia ʼi tamā logo kua ʼi ai nei te kokelekasio ʼi Udon Thani! Ko ʼihi pulapula ʼo te moʼoni ʼaē neʼe mā to ai ʼe kei fua aipe.
Kae neʼe tonu ke mātou toe hiki ki te tahi koga meʼa, pea neʼe mātou kole ke tokoni mai “te Aliki o te taukai” ke mātou haga kau ki te gāue fai faka mafola. (Mateo 9:38) Neʼe mātou hiki ki Téhéran, ko te taulaga ʼo Ilania. Neʼe ko te temi pule ʼaia ʼo te Chah.
Ko Te Fai Faka Mafola ʼi Te ʼu Telituale Faigataʼa
ʼI tamatou tau atu ki Téhéran, neʼe mātou maʼu te ʼu tēhina fakalaumālie. Neʼe mātou fakatahi mo te kiʼi kūtuga ʼo te kau Fakamoʼoni ʼe toko 13 mai te ʼu fenua kehekehe. Neʼe mātou fai te ʼu fetogi ke mātou faka mafola te logo lelei ʼi Ilania. Logope neʼe mole fakafeagai fakahagatonu mai kiā mātou, kae neʼe tonu pe ke mātou tōkakaga.
ʼUhi ko te maʼumaʼua gāue ʼo nātou ʼaē neʼe fia fai ki te moʼoni, neʼe mātou tautau fai te ʼu ako faka Tohi-Tapu ʼi te māʼupō peʼe ko te māfoatā uhu. Logola te faʼahi ʼaia, kae neʼe mātou fiafia ʼi te fua ʼo te gāue kinakina ʼaia! Neʼe kaugamālie te ʼu famili Filipine pea mo Kolea neʼe nātou tali te moʼoni pea mo nātou foaki tonatou maʼuli kiā Sehova.
Neʼe fakatotonu mai ʼi taku gāue ke au hiki ki Dhaka, ʼi Bangladesh. Neʼe mātou tau kiai ʼi te māhina ʼo Tesepeli ʼo te taʼu 1977. Neʼe ko he tahi ʼaia fenua neʼe faigataʼa ai te gāue fai faka mafola. Kae neʼe mā manatuʼi tuʼumaʼu neʼe tonu ke mā fai faka mafola. ʼAki te takitaki ʼo te laumālie ʼo Sehova, neʼe kaugamālie te ʼu famili neʼe mā maʼu, pea ʼe nātou lau ko nātou ko te kau Kilisitiano. Ko ʼihi iā nātou neʼe nātou fia fai ki te ʼu moʼoni ʼe maʼu ʼi te Tohi-Tapu. (Isaia 55:1) Neʼe lahi ai te ʼu ako faka Tohi-Tapu neʼe mā kamata.
Neʼe mā manatuʼi tuʼumaʼu ko te finegalo ʼo te ʼAtua “ke fakamauli te tagata fuape.” (1 Timoteo 2:4) Meʼa lelei foki, neʼe mole ʼi ai he tahi neʼe ina faigaʼi ke ina fai mai he ʼu meʼa kovi kiā māua. Ke ʼaua naʼa hoko he meʼa ʼe kovi, neʼe mā tokaga ke lelei tamā felogoi mo te hahaʼi. Ohage ko te ʼapositolo ko Paulo, neʼe mā faigaʼi ke mā “liliu ko te mea fuli ki te tagata fuape.” (1 Kolonito 9:22) Ka fehuʼi mai te tupuʼaga ʼo tamā ʼaʼahi, neʼe mā fakamahino fakalelei age, pea neʼe mā tokagaʼi teitei pe ke agalelei te hahaʼi fuli.
ʼI Dhaka, neʼe mā maʼu te tuagaʼane Fakamoʼoni pea neʼe mā fakaloto mālohiʼi ia ia ke kau mai ki te ʼu fono mo māua pea ki muli age ki te gāue fai faka mafola. Pea neʼe fai te ako Tohi-Tapu e toku ʼohoana mo te famili pea mo ina fakaafe ia nātou ki tamatou ʼu fono. ʼAki te manavaʼofa ʼo Sehova, neʼe ʼōmai fuli te famili ki te moʼoni. Ki muli age, ko te ʼu taʼahine e toko lua ʼo te famili neʼe tokoni ki te gāue fakaliliu ʼo te ʼu tohi faka Tohi-Tapu faka Bengali, pea tokolahi ʼo tonatou famili neʼe nātou ʼiloʼi mo nātou ia Sehova. Ko te tahi kau ako Tohi-Tapu kaugamālie neʼe nātou tali te moʼoni. Tokolahi iā nātou ʼe nātou tagata ʼāfea nei peʼe nātou pionie.
Mai te ʼaluʼaga ʼaē ko Dhaka ʼe ko he kolo ʼe hahaʼi tona nofoʼi, neʼe mā fakaafe ʼihi ʼo tomā ʼu famili ke tokoni mai ki te gāue fai faka mafola. Tokolahi neʼe nātou ʼio kiai, pea neʼe ʼōmai ki Bangladesh. Neʼe mātou fiafia pea mo fakafetaʼi kiā Sehova ʼi te faigamālie ʼaē ke mātou faka mafola te logo lelei ʼi te fenua ʼaia! Neʼe kamata ʼaki te tagata e tahi, pea ia ʼaho nei ko kokelekasio e lua ʼi Bangladesh.
ʼI te māhina ʼo Sūlio ʼo te taʼu 1982, neʼe tonu ke mātou mavae mai Bangladesh. Neʼe mātou fetāgihi ʼi tamatou tauʼinē ki te ʼu tēhina. Mole faʼa fualoa kiai, neʼe au maʼu taku gāue ʼi te Malaʼe Vakalele ʼo Entebbe ʼi Ouganda, ʼaē neʼe mātou nonofo ai lolotoga te ʼu taʼu e fā mo te ʼu māhina e fitu. Koteā te gāue ka mātou lava fai moʼo faka maʼuhigaʼi te huafa lahi ʼo Sehova ʼi te fenua ʼaia?
Ko Te Tauhi Kiā Sehova ʼi Te Potu Esite ʼo Afelika
ʼI tamatou tau ki te Malaʼe Vakalele ʼo Entebbe, neʼe haʼu te tagata mo tana motokā ʼo ʼave mātou ki tomatou nofoʼaga. ʼI tamatou mavae ʼi te malaʼe vakalele, neʼe au kamata fai faka mafola ai ki te tagata taki motokā ʼo ʼuhiga mo te Puleʼaga ʼo te ʼAtua. Neʼe fehuʼi mai e te tagata: “Ko koe ko he Fakamoʼoni ʼa Sehova?” ʼI taku ʼio age ki ai, neʼe ʼui fēnei mai e te tagata taki motokā: “ ʼE ʼi ai tokotou tēhina ʼe gāue ʼi te tule leʼoleʼo ʼo te malaʼe vakalele.” Neʼe au kole atu aipe ke ina ʼave au kiai. Neʼe mātou felāveʼi mo te tēhina, ʼaē neʼe fiafia ʼi te sio mai kiā mātou, pea neʼe mātou fai mo te ʼu fakatuʼutuʼu ki te ʼu fono pea mo te gāue fai faka mafola.
ʼI te temi ʼaia, neʼe ko te toko 228 kau fai faka mafola ʼo te Puleʼaga. ʼAki te ʼu tēhina e toko lua ʼi Entebbe, neʼe mātou to te pulapula ʼo te moʼoni ʼi te taʼu 1982. Mai te ʼaluʼaga ʼaē ko te hahaʼi ʼo te fenua ʼe fia lautohi, koia neʼe mātou lava tuku ai te ʼu tuʼuga tohi, mo te ʼu lauʼi teau nusipepa. Neʼe mātou fakaafe te ʼu tēhina mai Kampala, te taulaga, ke tokoni mai kiā mātou ki te fai faka mafola ʼi te telituale ʼo Entebbe ʼi te ʼu fakaʼosi vāhaʼa. ʼI taku ʼuluaki Akonaki Maʼa Te Kaugamālie, neʼe ko te toko nima neʼe kau kiai—ʼo lau ai mo au.
Hili te ʼu taʼu e tolu, neʼe mātou fiafia ʼi tamatou sisio kiā nātou ʼaē neʼe mātou fai tanatou ako ʼe nātou tuputupu vave. (3 Soane 4) ʼI te tahi fakatahi ʼo te siliko, ko te toko ono ʼo tamatou kau ako neʼe papitema. Tokolahi iā nātou neʼe nātou ʼui mai, neʼe nātou lotomālohi ke nātou gāue pionie, koteʼuhi neʼe nātou sisio ʼe mātou gāue pionie, logola neʼe ʼi ai tamatou gāue fakamālama temi kātoa.
Neʼe mātou mahino ko tamatou fale gāue neʼe ko he tahi ʼaia telituale neʼe lava fua lelei ai te fai faka mafola. ʼI te tahi lakaga, neʼe au fakaōvi ki te tagata pule ʼo te gāue tamate afi ʼo te malaʼe vakalele, pea neʼe au vaevae mo ia te ʼamanaki faka Tohi-Tapu ʼo ʼuhiga mo te maʼuli ʼi te palatiso ʼi te kele. Neʼe au fakahā age ʼi tana Tohi-Tapu, ko te hahaʼi talagafua ʼe māʼuʼuli anai ʼi te fīmālie mo te logo tahi, ʼe mole ʼi ai anai he mamahi ʼuhi ko te maʼuli masiva, mo te mole maʼu ʼo he nofoʼaga, mo te tau, mo te mahaki pea mo te mate. (Pesalemo 46:9; Isaia 33:24; 65:21, 22; Apokalipesi 21:3, 4) ʼI tana lau te ʼu manatu ʼaia ʼi tana Tohi-Tapu, neʼe ina fia ʼiloʼi ai. Pea neʼe kamata atu aipe te ako faka Tohi-Tapu. Neʼe kau ki te ʼu fono fuli. Mole tuai pea neʼe ina foaki tona maʼuli kiā Sehova pea mo papitema. Ki muli age, neʼe kau mo mātou ʼi te gāue pionie.
Neʼe hoko tuʼa lua te tokakovi ʼi te loto fenua ko Ouganda kae mā nonofo ai, kae neʼe mole fakagata ai tamatou gāue fakalaumālie. Ko te ʼu famili ʼo nātou ʼaē neʼe gāue ʼi te Malaʼe Vakalele, pea mo ʼihi hahaʼi ʼaē neʼe taupau e nātou ʼaia, neʼe ʼave ia nātou ki Nairobi, ʼi Kenia, lolotoga te ʼu māhina e ono. Ko nātou ʼaē neʼe nonofo ʼi Ouganda, ʼaē neʼe kau ai mo mātou, neʼe mātou hoko atu tamatou ʼu fono faka Kilisitiano pea mo tamatou gāue fai faka mafola, kae neʼe mātou fai fakapotopoto.
ʼI te māhina ʼo ʼApelili ʼo te taʼu 1988, neʼe kua ʼosi toku temi gāue ʼi ai, pea neʼe mātou toe mavae mai te fenua ʼaia. Neʼe mātou mavae ʼi te Kokelekasio ʼo Entebbe ʼaki te loto fiafia, he neʼe mātou tokoni ki te tuputupu fakalaumālie ʼi ai. ʼI te māhina ʼo Sūlio ʼo te taʼu 1997, neʼe maʼu tomatou faigamālie ke mātou toe ʼaʼahi ia Entebbe. ʼAki te temi, ko ʼihi ʼo tamatou kau ako Tohi-Tapu kua nātou tagata ʼāfea. Neʼe ko he meʼa fakaofoofo ʼi tamatou sisio ko te toko 106 neʼe kau ki te Akonaki Maʼa Te Kaugamālie!
Neʼe Mātou Hiki Ki Te Telituale Neʼe Mole Heʼeki Gāueʼi
Neʼe ʼi ai koa hamatou tahi faigamālie ki te fai faka mafola? Neʼe ʼi ai te tahi faigamālie, he neʼe fakatotonu mai ke au ʼalu ʼo gāue ʼi te Malaʼe Vakalele ʼo Mogadiscio, ʼi Somalia. Neʼe mātou fakatotonu ai ke mātou fakaʼaogaʼi lelei te faigamālie ʼaia ke mātou fai faka mafola ʼi te telituale ʼaia neʼe mole heʼeki gāueʼi e he tahi.
Neʼe mātou fai faka mafola tāfito ki te hahaʼi gāue ʼi te pilo fakafofoga ʼo Filipine, mo te kau gāue Filipine, pea mo te tahi kau gāue matāpule. Neʼe mātou tau felāveʼi mo nātou ʼi te ʼu fakatauʼaga meʼa kai. Neʼe mātou fai mo te ʼu ʼaʼahi fakakaumeʼa ki tonatou ʼu ʼapi. ʼAki tamatou fio tamatou ʼu fai puleʼaki, mo te fai fakaʼeteʼete, pea mo te falala kātoa kiā Sehova, neʼe mātou lava vaevae te ʼu moʼoni faka Tohi-Tapu ki te hahaʼi, pea neʼe maʼu ai te ʼu fua ʼi te hahaʼi ʼo te lanu kehekehe. Hili kiai te ʼu taʼu e lua, neʼe mātou mavae ʼi Mogadiscio—ʼi muʼa ʼo te hoko ai ʼo te tau.
Neʼe fakatotonu mai ke au ʼalu ʼo gāue ʼi te Malaʼe Vakalele ʼo Yangon, ʼi Myanmar. Neʼe mātou toe maʼu ai te ʼu faigamālie lelei ke mātou tokoni ki te hahaʼi agatonu ke nātou ako te ʼu fakatuʼutuʼu ʼa te ʼAtua. Hili ia Myanmar, neʼe mātou hiki ki Dar-es-Salaam, ʼi Tanzanie. Ko te faka mafola ʼo te logo lelei ʼi te ʼu ʼapi ʼi Dar-es-Salaam neʼe faigafua age, koteʼuhi neʼe ʼi ai te hahaʼi neʼe palalau Fakapilitānia.
ʼI te ʼu fenua fuli ʼaē neʼe mātou gāue ai, neʼe mole lahi he ʼu fihifihia neʼe tau mo mātou ʼi te fai faka mafola, logola ʼi ʼihi ʼaluʼaga neʼe fakasiʼisiʼi te gāue ʼa te kau Fakamoʼoni ʼa Sehova. ʼUhi ko taku gāue, ʼaē neʼe tau pipiki ki te puleʼaga peʼe ko he ʼu kautahi faka malamanei, neʼe mole fakafihiʼi tamatou gāue e te hahaʼi.
Ko taku gāue neʼe ina fakamaʼuaʼi ia au mo toku ʼohoana ke mā feʼoloʼaki lolotoga te ʼu taʼu e tolugofulu. Kae kiā māua ko taku gāue neʼe ko he fealagia pe ia ke mā fakahoko tamā ʼu fakatuʼutuʼu. Neʼe ko tamā fakatuʼutuʼu ʼuluaki ke mā fakatuputupu te ʼu gāue ʼo te Puleʼaga ʼo te ʼAtua. ʼE mā fakafetaʼi kiā Sehova ʼi tana tokoni mai ke mā fakaʼaogaʼi lelei te fetofetogi tuʼumaʼu ʼo tomā ʼaluʼaga, pea mo tomā pilivilesio taulekaleka ʼaē ko te faka mafola ʼo te logo lelei ʼi te ʼu fenua mamaʼo.
Neʼe Mā Toe Liliu Ki Te Fenua ʼAē Neʼe Mā Kamata Gāue Ai
ʼI toku taʼu 58, neʼe au fakatotonu ke au letelete tautonu pea neʼe mā toe liliu ki Filipine. ʼI te temi ʼaē neʼe mā toe liliu ai, neʼe mā faikole kiā Sehova ke ina takitaki tamā haʼele. Neʼe mā kamata gāue ʼi te kokelekasio ʼi te kolo ko Trece Martires ʼi te faʼahi ʼo Cavite. ʼI tamā tau atu kiai, neʼe ko te toko 19 kau fai faka mafola pe ʼo te Puleʼaga ʼo te ʼAtua. Neʼe fakatuʼutuʼu te gāue fai faka mafola ʼi te ʼaho fuli, pea neʼe lahi ai te ʼu ako Tohi-Tapu neʼe kamata fai. Neʼe kamata tuputupu te kokelekasio. ʼI te tahi temi, neʼe lahi te ʼu ako faka Tohi-Tapu ʼo toku ʼohoana, ko ʼana ako e 19, kae neʼe au fai te ʼu ako e 14.
Mole tuai pea neʼe kamata veliveli fau te Fale ʼo Te Puleʼaga. Neʼe mātou faikole kiā Sehova ʼo ʼuhiga mo te faʼahi ʼaia. Ko te tēhina fakalaumālie mo tona ʼohoana neʼe nā foaki te moʼi kele, pea neʼe ʼio te filiale ke laga he Fale foʼou ʼo Te Puleʼaga. ʼAki te fale foʼou ʼaia, neʼe ʼi ai te mafuliʼaga foʼou ki te gāue fai faka mafola, pea ʼi te vāhaʼa fuli neʼe kaugamālie te hahaʼi ʼaē neʼe nātou kau ki te ʼu fono. ʼI te temi nei, ʼe hola kātoa tamā ʼolo ʼo tokoni ki te tahi kokelekasio ko ʼona kau fai faka mafola e toko 17.
Ko toku ʼohoana mo au ʼe mā fiafia ʼi te pilivilesio ʼaē neʼe mā maʼu ʼi te gāue ʼi te ʼu fenua kehekehe. Ka mā toe manatuʼi tomā maʼuli feʼoloʼaki, ʼe mā fiafia ʼi tamā ʼiloʼi ʼaē neʼe mā fakaʼaogaʼi lelei te temi faigamālie ʼaia—moʼo tokoni ki te hahaʼi ke nātou ako ke nātou ʼiloʼi ia Sehova!
[Mape ʼo te pasina 24, 25]
(Vakaʼi te nusipepa)
IRAN
OUGANDA
SOMALIE
TANZANIE
BANGLADESH
MYANMAR
LAOS
THAÏLANDE
PHILIPPINES
[Paki ʼo te pasina 23]
Ko au mo toku ʼohoana, ia Aurea