Ko Te Fakafimālie Kia Nātou ʼAē ʼe “Mamahi [Tonatou] Loto”

IA ʼAHO nei, ʼe mole kei maʼu ʼi te mālama ʼa Satana “te aga ʼaē ʼe tonu ke fai.” (Efesi 4:19; 1 Soane 5:19) Kua lahi ʼaupito te tono pea mo te folonikasio. ʼE lahi te ʼu fenua, ko te ʼu ʼohoana e 50 ki te teau peʼe fakalaka, ʼe iku ki te ʼu mavete. Kua lahi te tali ʼo te femomoeʼaki ʼa te hahaʼi tagata pea mo te hahaʼi fafine. Ko te ʼu agamālohi ʼi te ʼu felāveʼi fakasino—ko te fakaʼalikiʼi—ʼe tou logo tuʼumaʼu pe ʼi te ʼu tala logo. Ko te ʼu fakahāʼaga ʼo te felāveʼi fakasino fakalialia ʼe ko he matani gāue ʼe maʼu ai te ʼu lauʼi miliale tola.—Loma 1:26, 27.

ʼI te ʼu aga fakalialia ʼo te ʼu felāveʼi fakasino, ʼe kau ai te fakaʼalikiʼi ʼo te kiʼi tamaliki. Ohage ko te poto ʼo te mālama ʼa Satana, ko te fakaʼalikiʼi ʼo te kiʼi tamaliki ʼe ko he aga “fakamanu, fakatemonio.” (Sake 3:15) ʼI Amelika pe, ʼe ʼui e te nusipepa Time “ ʼe ko te ʼu tānaki e 400 000 tupu, ʼe fakahā e te kau faiako pea mo te ʼu tōketā ki te kau polisi ʼi te taʼu fuli ʼo ʼuhiga mo te ʼu agamālohi ʼi te ʼu felāveʼi fakasino.” Mokā lalahi ia nātou ʼaē neʼe fai ki ai te ʼu aga ʼaia, tokolahi ia nātou ʼe kei nātou nofo mo te ʼu lavea fakatupu lotomamahi, pea ʼe moʼoni te ʼu lotomamahi ʼaia! ʼE ʼui fēnei e te Tohi-Tapu: “Ko te laumālie [te meʼa ʼaē ʼe loto ki ai totatou ʼatamai, te ʼu meʼa ʼe logoʼi ʼi te loto pea mo te ʼu manatu] ʼo te tagata ʼe feala ke ina kātakiʼi tona mahaki; kae ki te laumālie ʼaē ʼe mamahi [ʼe lavea, ʼe lotomamahi], ko ai ʼaē ʼe feala ke ina kātakiʼi?”—Tāʼaga Lea 18:14.

Ko te logo lelei ʼo te Puleʼaga ʼo te ʼAtua ʼe fia fai kiai te ʼu faʼahiga hahaʼi kehekehe, ʼo kau ai mo nātou ʼe “lotomamahi” pea mo nātou ʼaē ʼe “lotovaivai.” (Isaia 61:1-4) Koia ʼe mole fakapunamaʼuli ai te tali e te tokolahi ʼe lotomamahi te fakaafe ʼaenī: “Ko ʼaē ʼe fia ʼinu ke haʼu; ko ʼaē ʼe loto ki ai, ke ina toʼo noa te vai ʼo te maʼuli.” (Fakahā 22:17) Ko te kokelekasio faka Kilisitiano ʼe feala ke liliu ko he potu ʼe maʼu ai te fakafimālie kia nātou ʼaia. ʼE nātou fiafia ai ʼi tanatou ʼiloʼi kua vave liliu te mamahi ko he meʼa ʼe kau ki te temi ʼāfea. (Isaia 65:17) Kae ʼi muʼa ʼo te aʼu ki te temi ʼaia, e lagi ʼaoga kia nātou he ‘fakafimālie’ pea mo ‘faitoʼo’ tonatou ʼu lavea. Koia neʼe foaki ai e Paulo te tokoni ʼaoga ʼaenī ki te kau Kilisitiano: “Koutou maʼu he ʼu palalau fakaloto fīmālie ʼo ʼuhiga mo te ʼu nefesi ʼaē ʼe lotovaivai, ke koutou lagolago kia nātou ʼe vaivai, pea mo koutou kātaki fualoa ki te hahaʼi fuli pe.”—1 Tesalonika 5:14.

“Te ʼu Manatu ʼe Lolomi”

ʼI te ʼu taʼu pe ʼaenī, ko ʼihi neʼe nātou “lotomamahi” ʼi te ʼu faʼahiga meʼa neʼe mahino gataʼa ki ʼihi. ʼE ko he ʼu hahaʼi kua nātou fotufotuʼa, kae ohage ko te meʼa ʼaē neʼe fakamatalatala ʼo ʼuhiga mo “te ʼu manatu ʼe lolomi,” ʼe nātou ʼui neʼe fakaʼalikiʼi nātou ʼi te temi ʼaē neʼe kei nātou veliveli ai.a Ko ʼihi neʼe mole heʼeki hake ia nātou te manatu ʼaē neʼe fakaʼalikiʼi nātou, fokifā pe, ko te ʼu meʼa neʼe hoko kia nātou ʼi muʼa atu, ʼe nātou toe manatuʼi te ʼu meʼa ʼaē neʼe fai kia nātou e he tahi kua lahi (peʼe ko ni ʼu hahaʼi lalahi) ʼi tanatou kei veliveli. ʼE maʼu koa ʼi te kokelekasio faka Kilisitiano niʼihi ʼe ia nātou te ʼu faʼahiga lotomamahi ʼaia? Ei, ʼe maʼu ʼi ʼihi ʼu fenua, pea ko te kau Kilisitiano ʼaia ʼe feala ke nātou tau mo he lotomamahi loloto, te ʼita, te manatu ʼo te tukugakoviʼi ʼo nātou totonu, te ufiufi, peʼe ko te manatu ʼaē ʼe nātou tokotahi. Ohage ko Tavite, ʼe feala ke nātou logoʼi ʼi ʼihi temi ʼe nātou mamaʼo ʼi te ʼAtua pea mo nātou kalaga fēnei: “He koʼe koa, Ê Sehova, ʼe ke tuʼu mamaʼo? He koʼe koa ʼe ke nono ʼi te ʼu temi ʼo te mamahi?”—Pesalemo 10:1.

ʼE lahi te ʼu faʼahi ʼo te ʼu “manatu” ʼaia ʼe mole faʼa mahino lelei kiai te ʼu tōketā ʼaē ʼe nātou sivi te ʼatamai. Logope la te faʼahi ʼaia, ko te ʼu taʼi “manatu” ʼaia, ʼe feala ke malave ki te maʼuli fakalaumālie ʼo te kau Kilisitiano ʼaē kua foaki tonatou maʼuli. Koia ʼe tou falala ki te Folafola ʼa te ʼAtua moʼo fakatokatoka te ʼu taʼi manatu ʼaia. ʼE foaki e te Tohi-Tapu “te fakasiosio tonu ʼo ʼuhiga mo te ʼu meʼa fuli.” (2 Timoteo 2:7; 3:16) ʼE toe tokoni pe foki ki te hahaʼi fuli ʼaē ʼe felāveʼi mo te faʼahi ʼaia ke nātou tui kia Sehova, “te Tāmai ʼo te ʼu manavaʼofa mamahi pea ko te ʼAtua ʼo te fakaloto fakafimālie fuli, ʼaē ʼe ina fakafimālieʼi tatou ʼi totatou ʼu mamahi fuli.”—2 Kolonito 1:3, 4.

Neʼe Hoko Moʼoni Koa Te ʼu Fakaʼaliki Fakasino?

ʼI te malamanei, ʼe lahi te ʼu fihi ki te ʼuhiga totonu ʼo te ʼu “manatu” ʼaia pea mo te ikuʼaga ʼo te ʼu meʼa ʼaia neʼe hoko moʼoni. ʼE mole “kau [te kau Fakamoʼoni ʼa Sehova] ʼi te malamanei” pea ʼe mole nātou kau ki te fihi ʼaia. (Soane 17:16) ʼO mulimuli ki te ʼu tānaki neʼe fai, ʼi ʼihi temi ʼe moʼoni te ʼu “manatu” ʼaia. Ohage la, ʼi te ʼosi “manatuʼi” e te tagata ʼe gāue ʼi te fale assurance, ko Frank Fitzpatrick neʼe fakaʼalikiʼi ia ia e te patele, e lagi ko te toko teau neʼe nātou toe fakahā mo nātou neʼe fakaʼalikiʼi nātou e te patele pe ʼaia. Ki muli age, neʼe fakamoʼoni e te patele ʼaia te fakaʼaliki ʼaē neʼe ina fai.

Kae, ko he meʼa ʼe feala hatatou fakatokagaʼi, ʼe tokolahi ia nātou ʼaē neʼe mole feala ke nātou fakamoʼoni ki “te ʼu meʼa ʼaē ʼe nātou manatuʼi.” Ko ʼihi neʼe nātou lotomamahi ʼi te ʼaluʼaga ʼaia, neʼe ia nātou te ʼu suvenia ʼo he tahi neʼe ina fakaʼalikiʼi peʼe ko he fakaʼalikiʼi neʼe hoko ʼi he potu. Kae ki muli age, ʼi te fakasiosioʼi lelei ʼo te ʼu “meʼa [ʼaia] ʼe nātou manatuʼi” neʼe mole feala ke ʼui ʼe moʼoni.

Ko Te Foaki ʼo He Nonoʼaga

Kae, e feafeaʼi ʼo he lava foaki ʼo he fakafimālie kia nātou ʼaē neʼe “mamahi [tonatou] loto” ʼuhi ko te ʼu taʼi “manatu” ʼaia? Koutou manatuʼi te lea fakatātā ʼa Sesu ʼo ʼuhiga mo te tagata Samalitana lotoʼofa. Ko te tagata neʼe ʼohofi e te kau kaihaʼa, neʼe nātou tā te tagata ʼaia pea neʼe nātou kaihaʼa tana ʼu meʼa. ʼI te haʼu ʼa te tagata Samalitana, neʼe fonu ia ia te ʼofa ki te tagata ʼaia neʼe lavea. Koteā te meʼa neʼe ina fai? Neʼe ina faigaʼi koa ke ina ʼiloʼi te ʼu meʼa fuli ʼo ʼuhiga mo te faʼahiga tā ʼaē neʼe fai ki te tagata? Peʼe neʼe ina ʼiloʼi koa he meʼa e te tagata Samalitana ʼo ʼuhiga mo te kau kaihaʼa pea mo foimo tuli ai nātou? Kailoa. Ko te tagata neʼe lavea! Koia neʼe ʼaofi fakalelei e te tagata Samalitana tona ʼu mataʼi lavea pea neʼe ina ʼave ia ia ki te nofoʼaga ke mālōlō ai.—Luka 10:30-37.

ʼI tona fakahagatonu, ʼe ʼi ai te kehekehe ʼi te ʼu lavea fakasino pea mo he “loto ʼe mamahi” ʼuhi ko he fakaʼaliki moʼoni neʼe hoko ʼi te temi ʼaē neʼe kei tou veliveli ai. Kae ko te ʼu ʼaluʼaga ʼaia e lua ʼe nā fakatupu te mamahi lahi. Koia, ko te meʼa ʼaē neʼe fai e te tagata Samalitana ki te Sutea ʼaē neʼe lavea, ʼe hā mai ai te meʼa ʼaē ʼe feala ke fai moʼo tokoni ki he Kilisitiano ʼe lotomamahi. Ko te ʼuluaki meʼa ʼaē ʼe tonu ke fai, ke kita foaki te fakafimālie ʼi te ʼofa pea mo tokoniʼi ia ia ke mālōlō.

Neʼe fakamamahiʼi e te Tevolo te tagata agatonu ko Sopo, heʼe ʼi tana manatu ʼe haga anai te mamahi ʼi te loto pea mo te mamahi fakasino ʼo maumauʼi tana agatonu. (Sopo 1:11; 2:5) Talu mai ai, neʼe faiga tuʼumaʼu e Satana ke ina fakaʼaogaʼi te mamahi—peʼe ina fai fakahagatonu peʼe kailoa—moʼo fakavaivai te tui ʼa te kau kaugana ʼa te ʼAtua. (Vakaʼi ia 2 Kolonito 12:7-9.) ʼE feala koa ke tou lotolotolua ko te Tevolo ʼe ina fakaʼaogaʼi te fakaʼalikiʼi ʼo te tamasiʼi pea mo te “lotovaivai” ʼo te hahaʼi fotufotuʼa ʼaē neʼe fakamamahiʼi ʼi te faʼahi ʼaia (peʼe nātou tuʼania ʼaki he ʼu “manatu” neʼe fakamamahiʼi nātou) moʼo fakavaivai te tui ʼa te kau Kilisitiano? Ohage ko tona fai e Sesu ʼi te temi ʼaē ʼe ʼohofiʼi ai e Satana, ko he Kilisitiano ʼe tau mo he mamahi kae ʼe fakafisi fakamālohi ke ʼaua naʼa ina līaki tana agatonu, ʼe ina ʼui fēnei: “ ʼAlu, Satana!”—Mateo 4:10.

Tou Nofo Mālohi ʼi Te Faʼahi Fakalaumālie

Neʼe tā e “te tagata kaugana agatonu mo poto” te ʼu tohi moʼo tokoni ki te fakafimālieʼi ʼo te mamahi ʼo he tahi ʼi te faʼahi fakalaumālie pea mo fakafimālieʼi te loto ʼo he tahi neʼe fakaʼalikiʼi ʼi tana kei veliveli. (Mateo 24:45-47) ʼE ʼiloga ʼi te ʼu meʼa ʼaē kua hoko ʼe fīmālie ia ia ʼaē ʼe lotomamahi mo kapau ʼe ina tuku tana falala ki te ‘mālohi ʼo te ʼAliki pea mo te mālohi ʼo tona māfimāfi,’ ʼo kofuʼi “te teu tau katoa ʼo te ʼAtua.” (Efesi 6:10-17) Ko te teu tau ʼaia ʼe kau kiai te “moʼoni” ʼo te Tohi-Tapu, ʼaē ʼe ina fakahā fakalelei ko Satana ko te fili tāfito pea mo fakainaina te fakapōʼuli ʼaē ʼe gāue ai ia ia mo tana hahaʼi ʼaē ʼe lagolago kia ia. (Soane 3:19) Koia, ʼe ʼi ai “te meʼa puipui fatafata ʼo te faitotonu.” Ko ia ʼaē ʼe lotomamahi ʼe faiga anai ke pipiki maʼu ki te ʼu lekula faitotonu. Ohage la, ko ʼihi ʼe mālohi tonatou ʼu holi ʼo nātou fakamamahiʼi aipe ia nātou totonu peʼe nātou fai he aga heʼeʼaoga. ʼI te ʼu temi ʼaē ʼe nātou tekeʼi ai te ʼu holi ʼaia, ʼe nātou mālo!

Ko te teu tau fakalaumālie ʼe kau kiai “te logo lelei ʼo te tokalelei.” Ko te palalau ki niʼihi ʼo ʼuhiga mo te ʼu fakatuʼutuʼu ʼa Sehova, ʼe ina fakamālohiʼi ia ia ʼaē ʼe palalau ʼo toe feiā aipe kia ia ʼaē ʼe fagono. (1 Timoteo 4:16) Kapau ʼe koutou kau ia nātou ʼaē ʼe “mamahi [tonatou] loto” ʼo tupu ai he faigataʼa kia koutou hakotou palalau ʼo ʼuhiga mo te logo lelei, koutou faigaʼi ke koutou kaugā fagona mo he tahi Kilisitiano ʼi tana fai te gāue maʼuhiga ʼaia. Pea ʼaua naʼa galo ia koutou “te meʼa tali tau lahi ʼo te tui.” Koutou tui ko Sehova ʼe ʼofa kia koutou pea ʼe ina toe foaki atu anai te ʼu meʼa fuli ʼaē kua puli ia koutou. Koutou tui papau ko Sesu ʼe ʼofa mo ia kia koutou, pea neʼe ina fakamoʼoni te faʼahi ʼaia ʼaki tana mate ʼaē maʼa koutou. (Soane 3:16) Tuʼumaʼu pe neʼe loi ia Satana ʼo ina lau ko Sehova ʼe mole tokaga ki tana ʼu kaugana. Ko tana tahi ʼaia loi mamafa pea mo fakalialia.—Soane 8:44; vakaʼi ia Sopo 4:1, 15-18; 42:10-15.

Kapau ko te mamahi ʼo tokotou loto ʼe fakatupu faigataʼa kia koutou hakotou tui ko Sehova ʼe tokaga kia koutou, ʼe tokoni anai kia koutou ke koutou fakakaugā mo niʼihi ʼe nātou tui mālohi ʼe tokaga kia koutou. (Pesalemo 119:107, 111; Tāʼaga Lea 18:1; Hepeleo 10:23-25) ʼAua naʼa koutou tuku ia Satana ke ina faʼao ia koutou te totogi ʼo te maʼuli. Koutou manatuʼi, “te puloga ʼo te hāofaki” ʼe ko he tahi ʼaia koga ʼo te teu tau, ohage pe ko “te heletā ʼo te laumālie.” Ko te Tohi-Tapu neʼe tohi ʼaki te laumālie maʼoniʼoni, ʼaē ʼe mole feala kia Satana ke ina maumauʼi. (2 Timoteo 3:16; Hepeleo 4:12) Ko tana ʼu folafola fakamālōlō ʼe feala ke nātou fakafimālieʼi te ʼu mamahi ʼo te loto.—Vakaʼi ia Pesalemo 107:20; 2 Kolonito 10:4, 5.

Pea, koutou faikole tuʼumaʼu ke koutou lotomālohi moʼo kātakiʼi te ʼu mamahi ʼaia. (Loma 12:12; Efesi 6:18) Ko te faikole fakamalotoloto neʼe lagolago kia Sesu ʼi te temi ʼaē neʼe tau tugaki ai, pea ʼe toe feala pe ke toe tokoni atu kia koutou. (Luka 22:41-43) ʼE faigataʼa koa kia koutou hakotou faikole? Koutou kole ki niʼihi ke faikole mo koutou pea mo faikole maʼa koutou. (Kolose 1:3; Sake 5:14) ʼE lagolago anai te laumālie maʼoniʼoni ki takotou ʼu faikole. (Vakaʼi ia Loma 8:26, 27.) Ohage pe ko te mahaki fakasino ʼaē ʼe fakamamahi ki te sino, ko ʼihi ʼe ʼi ai tonatou ʼu lavea loloto ʼi tonatou loto ʼe mole feala ke faitoʼo ʼo talu ai ʼi te tuʼu ʼo te ʼu faʼahiga meʼa ʼaenī. Kae ʼaki te tokoni ʼa Sehova ʼe feala ke tou kātakiʼi, pea ko te loto faʼa kātaki ʼe ko he mālo ia, ohage ko te meʼa ʼaē neʼe hoko kia Sesu. (Soane 16:33) “Falala kia [Sehova] ʼi te temi fuli pe, Ê hahaʼi! Koutou fakahā tokotou loto ʼi ʼona muʼa. Ko te ʼAtua ʼe ko he nonoʼaga maʼa tatou.”—Pesalemo 62:8.

E Feafeaʼi Kia Ia ʼAē ʼe Lau Neʼe Ina Fai Te Fakaʼalikiʼi?

Ko he tahi ʼe ina fai moʼoni he ʼu felāveʼi fakasino mo he tamasiʼi ʼe ko he tagata fai fakaʼaliki pea ʼe tonu ke faka ʼuhigaʼi feiā ia ia ʼaia. Ko he tahi neʼe hoko kia ia he meʼa feiā ʼe feala hana tala ia ia ʼaē neʼe ina fai te aga ʼaia. Kae, ʼe mole tonu anai ke fai fakavilivili he tukugakoviʼi mo kapau ʼe fakatafito pe ki “te ʼu manatu ʼe lolomi” ʼo ʼuhiga mo te fakaʼaliki. ʼI te ʼaluʼaga ʼaia, ko te meʼa ʼaē ʼe maʼuhiga age, ko te toe maʼu e ia ʼaē ʼe lotomamahi te manatu Fakapototopo ʼo ʼuhiga mo te ʼu meʼa ʼaē ʼi tona loto. Hili kiai he kiʼi temi, kua lagi feala leva ke ina fakafuafua tana ʼu “manatu” pea mo fai he puleʼaki ʼo ʼuhiga mo te meʼa ʼaē ʼe ina fia fai ki te ʼu manatu ʼaia.

Koutou fakatokagaʼi te meʼa ʼaē neʼe hoko kia Donna. Neʼe haʼele kovi tana kai pea neʼe ʼalu ai ki te tagata fai tokoni ʼo ʼuhiga mo te faʼahi ʼaia—pea neʼe ko he tahi neʼe mole ʼiloʼi papau peʼe poto ʼi te faʼahi ʼaia. Mole tuai pea neʼe ina tukugakoviʼi tana tāmai neʼe ina fakaʼaliki ia ia pea neʼe ʼave ai ki te telepinale te meʼa ʼaia. Neʼe mole feala ke fai he meʼa e te telepinale ki tana matuʼa, pea neʼe mole pilisoniʼi ia, kae neʼe tonu ke ina totogi te 100 000 tola ʼo ʼuhiga mo te telepinale. Pea ʼi te hili ʼo te ʼu meʼa fuli ʼaia, neʼe ʼui age e Donna ki tana ʼu mātuʼa ʼe mole kei tui ia neʼe hoko he fakaʼaliki!

ʼI he ʼaluʼaga fakapotopoto, neʼe ʼui fēnei e Salomone: “ ʼAua naʼa ke hū ki tuʼa ʼo fai fakavilivili he fakamāu.” (Tāʼaga Lea 25:8) Kapau ʼe ʼi ai he meʼa moʼo fakamoʼoni ko ia ʼaē ʼe lau neʼe ina fai te fakaʼaliki ʼe kei ina lolotoga fai te fakaʼalikiʼi ʼo te kiʼi tamaliki, ʼe feala ke fai he valoki. ʼE feala ke tokoni te kau tagata ʼāfea ʼo te kokelekasio ki te faʼahi ʼaia. Kae, ʼaua naʼa koutou fai fakavilivili te meʼa ʼaia. E lagi feala pe ke koutou tuku feiāʼi te fihifihia ʼaia. Kae, kapau ʼe koutou fia felogoi mo ia ʼaē neʼe ina fai atu te aga fakaʼaliki (ʼi te ʼosi ʼo te ʼuluaki felogoi ʼe koutou fakafuafua ʼe koutou lava tali ki te ʼu meʼa ka ina ʼui atu), ʼe feala ke koutou fai te faʼahi ʼaia.

Lolotoga te temi ʼaē ʼe fakafimālie ai te ʼu “manatu,” ʼe feala ke hoko he ʼu ʼaluʼaga ʼe mole lelei. Ohage la, ʼe feala ke hake ʼi te fakakaukau ʼa he tahi he ʼu meʼa ʼo ʼuhiga mo ia neʼe fakaʼalikiʼi e he tahi, ʼe sio kiai ʼi te ʼaho fuli. ʼE mole ʼi ai he ʼu lekula moʼo fakatokatoka te faʼahi ʼaia. “ ʼE tahi ʼamo anai tana ʼāmoga.” (Kalate 6:5) ʼI ʼihi temi, ʼe feala ke logoʼi e he tahi ko hona kāiga peʼe ko he tahi ʼi tona famili neʼe ina fai te faʼahi ʼaia. Koutou manatuʼi te natula fakamahalohalo ʼo ʼihi “manatu ʼe lolomi” ʼi te temi ʼaē ʼe tonu ai ke fakahā ia ia ʼaē neʼe ina fai te fakaʼalikiʼi. ʼI te taʼi ʼaluʼaga ʼaia, kapau ʼe mole heʼeki ʼiloʼi lelei peʼe moʼoni te meʼa ʼaē neʼe hoko, kapau ʼe koutou taupau tuʼumaʼu takotou ʼu felogoi mo te famili—ʼo koutou fai ni ʼu ʼaʼahi, peʼe koutou faitohi, peʼe koutou fai telefoni—ʼe koutou fakahā ai anai ʼe koutou faigaʼi ke koutou mulimuli ki te Tohi-Tapu.—Vakaʼi ia Efesi 6:1-3.

Koteā ʼAē ʼe Lava Fai e Te Kau Tagata ʼĀfea?

Kapau ko he tahi ʼi te kokelekasio ʼe ina manatuʼi neʼe fakaʼalikiʼi ia ia ʼi tana kei veliveli ʼe ʼalu ki te ʼu tagata ʼāfea, ʼi te agamāhani ko he tagata ʼāfea e toko lua ʼe hinoʼi moʼo tokoni kia ia ʼaia. ʼE tonu anai ki te ʼu tagata ʼāfea ʼaia ke nā tokoni fakalelei ia ia ʼaē ʼe lotomamahi ke ina ʼuluaki tauʼi te mamahi ʼaē ʼe tau ʼi tona loto. Ko te ʼu higoa ʼo te ʼu hahaʼi ʼaē neʼe nātou fakaʼaliki ʼe mole tonu anai ke fakahā.

Ko te ʼuluaki gāue ʼa te ʼu tagata ʼāfea ʼe tonu ke nā fai tonā ʼuhiga tauhi ōvi. (Isaia 32:1, 2; 1 Petelo 5:2, 3) ʼE tonu anai ke nā tokakaga tāfito ʼo “kofuʼi te ʼu ʼofa mamahi ʼo te manavaʼofa, pea mo te agalelei, te manatu agavaivai, te agamālū pea mo te kātaki fualoa.” (Kolose 3:12) ʼE tonu anai ke nā fagono fakalelei pea mo nā fai ni ʼu palalau ʼe fakaloto fīmālie ʼaki te Tohi-Tapu. (Tāʼaga Lea 12:18) Ko ʼihi ia nātou ʼaē ʼe nātou lotomamahi ʼuhi ko “te ʼu meʼa ʼaē ʼe nātou manatuʼi,” neʼe nātou fakahā tanatou loto fakafetaʼi ki te ʼu tagata ʼāfea ʼi tanatou ʼu ʼaʼahi ʼaē ʼe nātou fai tuʼumaʼu peʼe ko tanatou ʼu telefoni ʼaē moʼo ʼiloʼi peʼe nātou lelei pe. Ko te ʼu taʼi felogoi ʼaia ʼe mole tonu ke fualoa, kae ʼe nātou fakahā aipe ko te kautahi ʼa Sehova ʼe tokaga kia nātou ʼaia. ʼI te temi ʼaē ʼe ʼiloʼi e ia ʼaē ʼe lotomamahi ko tona ʼu tēhina Kilisitiano ʼe nātou ʼoʼofa moʼoni kia ia, ʼe feala aipe ke tokoni kia ia ke ina toe maʼu he fīmālie pea mo maʼu he manatu fakapotopoto ʼo ʼuhiga mo te ʼu meʼa ʼaē ʼi tona loto.

Koteā ʼe hoko mo kapau ko ia ʼaē ʼe mamahi ʼe ina fakatotonu ke ina fai he tukugakoviʼi?b Kapau koia ʼaia, pea ʼe feala ki te ʼu tagata ʼāfea e lua ke nā tokoniʼi ia ia, ʼo faka ʼalutahi mo te pelesepeto ʼaē ia Mateo 18:15, ʼe tonu anai ke ʼalu fakahagatonu ʼo felogoi mo ia ʼaē ʼe talaʼakiʼi. Kapau ko ia ʼaē ʼe ina fai te tukugakoviʼi ʼe mole ina lavaʼi te felogoi fakahagatonu ʼaia, ʼe feala ke ina fai te faʼahi ʼaia ʼi te telefoni peʼe ina fai he tohi. ʼI tona taʼi fai ʼaia, ʼe tuku kia ia ʼaē neʼe tukugakoviʼi he faigamālie ke ina fai he fakamatala ʼe moʼoni ia muʼa ʼo Sehova moʼo tali ki te tukugakoviʼi ʼaē neʼe fai kia ia. ʼE toe feala pe foki ke ina fakahā he fakamoʼoni neʼe mole ina fakahoko te fakaʼaliki ʼaia. Peʼe lagi fakahā anai e ia ʼaē ʼe tukugakoviʼi pea ʼe feala ke hoko ai he fakatokatoka. ʼE ko he tapuakina anai mo kapau ʼe hoko feiā! Kapau ʼe fakahā e ia ʼaē neʼe tukugakoviʼi neʼe ina fai te aga ʼaia, ko te ʼu tagata ʼāfea e lua ʼe feala ke nā fakatokatoka te fihifihia ʼaia ʼo mulimuli pe ki te ʼu pelesepeto ʼa te Tohi-Tapu.

Kapau ʼe hala te tukugakovi, ʼe tonu anai ke fakamahino e te ʼu tagata ʼāfea kia ia ʼaē neʼe ina fai te tukugakovi ʼaia ʼe mole he tahi meʼa ke fai ʼi he fakamāu. Pea ʼe hoko atu pe anai te aga ʼa te kokelekasio kia ia ʼaē ʼe tukugakoviʼi ohage ko he tahi neʼe mole ina fai he aga fakaʼaliki. ʼE fakahā e te Tohi-Tapu, ʼe tonu ke ʼi ai he ʼu fakamoʼoni e lua peʼe tolu ʼi muʼa ʼo he fai ʼo he faifakamāu. (2 Kolonito 13:1; 1 Timoteo 5:19) Tatau aipe peʼe tokolahi ʼe nātou “manatuʼi” neʼe fakaʼalikiʼi nātou e te tagata peʼe ko te fafine pe ʼaia, ko te ʼuhiga ʼo te ʼu taʼi fakamanatu ʼaia ʼe mole ʼiloʼi papau peʼe moʼoni, ʼo mole feala ai ke fai he fakamāu kae mole ʼi ai hona ʼu fakamoʼoni. ʼE mole faka ʼuhiga ia ko te ʼu taʼi “manatu” ʼaia ʼe loi (peʼe moʼoni). Kae ʼe tonu ke muliʼi te ʼu pelesepeto ʼo te Tohi-Tapu moʼo fakahoko he faifakamāu.

Kae kapau la ko ia ʼaē ʼe tukugakoviʼi—logope tana fakafisi ki te agakovi ʼaia—ʼe lākahala moʼoni, koteā anai te meʼa ʼe hoko ki ai? ʼE hāo koa ia mo te fakatūʼa? Kailoa ia! Ko te ʼiloʼi peʼe lākahala moʼoni peʼe kailoa, ʼe feala pe ke tuku ki te ʼu nima ʼo Sehova. “Ko te ʼu agahala ʼa ʼihi tagata ʼe ʼasi ki te kaugamālie, ʼo taki fakahagatonu ki te fakamāu, kae ko ʼihi tagata ʼe toe hā tonatou ʼu agahala ki muli age.” (1 Timoteo 5:24; Loma 12:19; 14:12) ʼE ʼui fēnei e te Tāʼaga Lea: “Ko te fakatalitali ʼa te kau faitotonu ʼe ko he meʼa fakafiafia, kae ko te ʼamanaki ʼa te kau agakovi ʼe puli anai ia.” “ ʼI te temi ʼaē ʼe mate ai te tagata agakovi, ʼe puli ai tana ʼamanaki.” (Tāʼaga Lea 10:28; 11:7) Pea, ko Sehova ʼAtua pea mo Kilisito Sesu ʼe nā fai anai te fakamāu heʼegata ʼi te faitotonu.—1 Kolonito 4:5.

Tou Fakafeagai Ki Te Tevolo

Mokā kātakiʼi e te kau Kilisitiano he mamahi fakasino lahi peʼe ko he mamahi ʼi tonatou loto, ʼe ko he fakamoʼoni ʼaia ʼe nātou lotomālohi pea mo nātou ʼofa ki te ʼAtua! Pea ʼe ko he fakamoʼoni ia ki te mālohi ʼo te laumālie ʼa Sehova tana lagolago kia nātou ʼaia!—Vakaʼi ia 2 Kolonito 4:7.

ʼE faka ʼuhiga te ʼu palalau ʼa Petelo ki te faʼahiga hahaʼi ʼaia: “Koutou tekeʼi fakamālohi [ia Satana] ʼaki te tui.” (1 Petelo 5:9) ʼE mole faigafua te fai ʼo te faʼahi ʼaia. ʼI ʼihi temi, ʼe feala pe ke mata faigataʼa hakita fakakaukau lelei pea mo fakapotopoto. Kae ʼaua naʼa koutou lotovaivai! Kua vave pe te fakaʼauha ʼo te Tevolo pea mo tana ʼu gāue kākā. ʼI tona fakahagatonu, ʼe tou fakaʼamu ki te temi ʼaia, te temi ʼaē “ko te ʼAtua totonu . . . ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he tagilāulau, he mamahi. Ko te ʼu meʼa ʼāfea kua puli ia.”—Fakahā 21:3, 4.

[Nota ʼi te lalo pasina]