ʼE Hāofaki e Sehova Ia Ia ʼAē ʼe Mamahi

“ ʼE lahi te ʼu malaʼia ʼo te tagata agatonu, kae ʼe hāofaki e Sehova ia ia mai te ʼu malaʼia fuli ʼaia.”​—Pesalemo 34:⁠19.

1, 2. Koteā te fihifihia neʼe hoko ki te tuagaʼane agatonu, pea he koʼe ʼe feala pe ke hoko kiā tatou he ʼaluʼaga feiā?

KO KEIKO,a ko te tuagaʼane kei finemui pea ko he Fakamoʼoni ʼa Sehova talu mai taʼu e 20 tupu. ʼI te tahi temi, neʼe gāue pionie kātoa (ko he tahi ʼe faka mafola te Puleʼaga ʼi te temi kātoa). Neʼe ina leleiʼia ʼaupito te pilivilesio ʼaia. Kae mole fualoa kiai, pea neʼe mole kei fiafia ia Keiko pea neʼe ina logoʼi ʼaupito tana nofo tokotahi. ʼE ina ʼui fēnei: “Ko te meʼa pe ʼaē neʼe au fai ko te tagi.” Moʼo pulihi tana ʼu manatu fakaloto vaivai, neʼe lahi ʼaupito te ako ʼa Keiko ia te Tohi-Tapu. ʼE ina ʼui fēnei: “Kae neʼe mole feala ke au fetogi taku faʼahiga fakakaukau. ʼI te lahi ʼaupito ʼo toku lotovaivai neʼe au fia mate.”

² Neʼe kua hoko koa kiā koutou he ʼaluʼaga feiā? ʼI tokotou ʼuhiga Fakamoʼoni ʼa Sehova, ʼe lahi te ʼu tupuʼaga ke koutou fiafia ai, koteʼuhi ʼi takotou pipiki mālohi ki te ʼAtua, ʼe koutou “mau [ai] te fakapapau o te mauli, o te mauli nei pea mo te mauli kahau.” (1 Timoteo 4:8) ʼI te temi nei ʼe koutou māʼuʼuli ʼi he palatiso fakalaumālie! Kae ʼe koutou hāo ai koa mai te ʼu lotomamahi fuli? Kailoa ia! ʼE ʼui fēnei ʼi te Tohi-Tapu: “ ʼE lahi te ʼu malaʼia ʼo te tagata agatonu.” (Pesalemo 34:19) ʼE mole fakapunamaʼuli te faʼahi ʼaia, heʼe “mauli te malama-nei katoa i te [“mālohi ʼo te,” MN ] Kovi,” ia Satana te Tevolo. (1 Soane 5:19) ʼI hona faʼahiga ʼaluʼaga pe, ʼe hoko kiā tatou fuli te ʼu fua ʼo te puleʼi ʼaia e Satana ia te kele.​—Efeso 6:⁠12.

Te ʼu Fua ʼo Te Lotomamahi

3. Koutou tuku mai he ʼu faʼifaʼitaki ʼi te Tohi-Tapu ʼa he ʼu kaugana ʼa te ʼAtua neʼe lotomamahi ʼaupito.

³ Kapau ʼe tou lotomamahi fualoa pea ʼe feala ke tou liliu ai ʼo lotovaivai. (Tāʼaga Lea 15:15) Tou talanoa ʼo ʼuhiga mo te tagata agatonu ko Sopo. ʼI tona lotomamahi ʼaupito, neʼe ina ʼui fēnei: “Ko te tagata, ʼaē neʼe tupu mai te fafine, ʼe nounou tona maʼuli pea ʼe fonu ʼi te lotohoha.” (Sopo 14:1) Neʼe kua puli te fiafia ʼo Sopo. ʼI te tahi temi, neʼe manatu ia kua līaki ia ia e Sehova. (Sopo 29:​1-5) Ko Sopo neʼe mole ko te kaugana pe ʼaia e tahi ʼa te ʼAtua ʼaē neʼe lotomamahi ʼaupito. ʼE fakamatala mai ʼi te Tohi-Tapu te hisitolia ʼo Ana, ʼaē neʼe “mamahi tona loto” ʼuhi ko tana mole maʼu hana tamasiʼi. (1 Samuele 1:​9-11) Ko Lepeka, ʼi tana hoha ʼo ʼuhiga mo te meʼa neʼe hoko ki tona famili, neʼe ina ʼui fēnei: “Kua au fehiʼa ki toku maʼuli totonu.” (Senesi 27:46) Ko Tavite, ʼi tana fakakaukauʼi tana ʼu hala, neʼe ina ʼui fēnei: “ ʼI te lolotoga ʼo te ʼaho kātoa neʼe au haʼele lotomamahi pe.” (Pesalemo 38:6) Ko te ʼu faʼifaʼitaki ʼaenī ʼe fakahā lelei ai ko te ʼu tagata mo te ʼu fafine neʼe manavasiʼi ki te ʼAtua ʼi muʼa atu ʼo te temi ʼo te kau Kilisitiano, neʼe ʼi ai te ʼu lakaga neʼe nātou lotomamahi ʼaupito ai.

4. He koʼe ʼe mole tou punamaʼuli ʼe ʼi ai anai he “ ʼu nefesi lotovaivai” ʼi te kau Kilisitiano iā ʼaho nei?

⁴ Neʼe feafeaʼi ki te kau Kilisitiano? Neʼe manatu e te ʼapositolo ko Paulo neʼe tonu ke ina ʼui age ki te kau Tesalonika ke nātou “fai he ʼu palalau fakafimālie ki te kau nefesi lotovaivai.” (1 Tesalonika 5:​14, MN ) ʼE ʼui ʼi te tohi, ko te kupu faka Keleka ʼaē neʼe fakaliliu ʼaki te ʼu kupu “te kau nefesi lotovaivai,” ʼe feala ke faka ʼuhiga kiā nātou “ ʼaē ʼi te tahi temi neʼe loto hoha ʼaupito.” ʼE fakahā ʼi te ʼu palalau ʼa Paulo ko ʼihi Kilisitiano fakanofo ʼi te kokelekasio ʼaia ʼi Tesalonika neʼe nātou lotovaivai. ʼE toe ʼi ai mo te kau nefesi lotovaivai ʼi te kau Kilisitiano iā ʼaho nei. Kae he koʼe koa ʼe nātou lotomamahi? Tou vakaʼi ia faʼahi e tolu.

ʼE Feala Ke Tou Lotomamahi ʼUhi Ko Totatou ʼUhiga Agahala

5, 6. Koteā te fakaloto fīmālie ʼe feala ke tou maʼu mai iā Loma 7:​22-25 (MN )?

⁵ ʼO mole hage ko te hahaʼi agakovi ʼaē “ ʼe mole kei nātou mahino ki te aga ʼaē ʼe tonu ke fai,” ko te kau Kilisitiano moʼoni ʼe nātou lotomamahi ʼuhi ko tonatou ʼuhiga agahala. (Efeso 4:​19, MN ) ʼE lagi nātou hage ko Paulo, ʼaē neʼe ina tohi fēnei: “ ʼE au leleiʼia moʼoni te lao ʼa te ʼAtua ʼo mulimuli ki te tagata ʼaē ʼe ʼi loto, kae ʼe au logoʼi ʼi te ʼu koga ʼo toku sino te tahi lao ʼe ina tauʼi te lao ʼo toku ʼatamai, pea ʼe ina taki fakapōpula au ki te lao ʼo te agahala ʼaē ʼi te ʼu koga ʼo toku sino.” Pea neʼe ʼui fēnei e Paulo: “Tagata fakaʼofaʼofa ʼaē ko au!”​—Loma 7:​22-24, MN.

⁶ Neʼe kua koutou hage koa la ko Paulo? ʼE mole kovi takotou mālama ki takotou ʼu vaivaiʼaga, heʼe feala ai ke koutou mahino lelei ki te kovi ʼaupito ʼo te agahala pea mo fakaloto mālohiʼi koutou ke ʼaua naʼa koutou fai he meʼa ʼe kovi. Kae ʼe mole ʼaoga ke koutou lotomamahi tuʼumaʼu pe ʼo ʼuhiga mo takotou ʼu hala. ʼO hilifaki ki te ʼu palalau ʼa Paulo ʼi muʼa atu, neʼe ina ʼui fēnei: “ ʼE au fakafetaʼi ki te ʼAtua ʼaki ia Sesu Kilisito totatou ʼAliki!” (Loma 7:​25, MN ) Ei, neʼe falala ia Paulo ko te taʼataʼa ʼo Sesu neʼe feala hana toe totogi ia ia mai tona ʼuhiga agahala.​—Loma 5:⁠18.

7. Koteā ʼaē ʼe feala ke tokoni ki he tahi ke ʼaua naʼa lotomamahi ʼuhi ko tana fia fai ʼaē ki te agahala?

⁷ Kapau ʼe koutou lotomamahi ʼaupito ʼuhi ko tokotou ʼuhiga agahala, koutou maʼu he fīmālie ʼaki te ʼu palalau ʼa te ʼapositolo ko Soane, ʼaē neʼe ina tohi fēnei: “Kapau ʼe agahala he tahi, ʼe ʼi ai totatou tokoni iā tafa ʼo te Tāmai, ko Sesu Kilisito, ko te faitotonu. Ko ia ko te sākilifisio faifakalelei ʼo ʼuhiga mo ʼatatou agahala, pea ʼe mole gata ʼaki pe tatatou ʼu agahala, kae ʼo toe kau ai mo te ʼu agahala ʼo te malamanei kātoa.” (1 Soane 2:​1, 2, MN ) Kapau ʼe koutou lotomamahi ʼuhi ko te holi ʼaē ʼo te kakano ki te agahala, koutou manatuʼi tuʼumaʼu ko Sesu neʼe mate maʼa te kau agahala, kae neʼe mole mate ia maʼa he hahaʼi haohaoa. ʼI tona ʼuhiga moʼoni, “ko tatou fuli neʼe tou agahala pea mole tou aʼu ki te kolōlia ʼo te ʼAtua.”​—Loma 3:​23, MN.

8, 9. He koʼe ʼe mole tonu ke tou tauteaʼi ia tatou totonu?

⁸ Kae kapau la neʼe koutou fai he agahala mamafa ʼi te temi muʼa. ʼE mahino ia neʼe koutou palalau ki te faʼahi ʼaia kiā Sehova ʼi te faikole, ʼo lagi koutou fai liuliuga. Neʼe tokoni atu te ʼu tagata ʼāfea ʼi te faʼahi fakalaumālie. (Sakopo 5:​14, 15) Neʼe koutou fakahemala moʼoni pea neʼe mole fakamavae koutou ʼi te kokelekasio. Peʼe neʼe lagi koutou mavae ʼi te kautahi ʼa te ʼAtua ʼi he kiʼi temi, kae neʼe koutou fakahemala ki muli age pea koutou toe liliu ʼo maʼa. ʼI te ʼu ʼaluʼaga ʼaia, ʼe lagi koutou toe manatuʼi te agahala ʼaē neʼe koutou fai ʼi te temi muʼa pea koutou lotomamahi ai. Kapau koia, koutou manatuʼi ko Sehova ʼe fakamolemole “lahi” kiā nātou ʼaē ʼe fakahemala moʼoni. (Isaia 55:7) Tahi ʼaē meʼa, ʼe mole ina loto ke tou manatu ʼe mole feala ke fakamolemole mai. ʼE ko Satana ʼaē ʼe ina loto ke koutou manatu feiā. (2 Kolonito 2:​7, 10, 11) ʼE fakaʼauha anai te Tevolo heʼe ko tona fakatūʼā ʼaia, kae ʼe ina loto ke koutou manatu ʼe tonu ke toe fakatūʼā feiā mo koutou. (Apokalipesi 20:10) ʼAua naʼa koutou tuku ia Satana ke mālo ʼi tana loto ʼaē ke ina maumauʼi takotou tui. (Efeso 6:11) Kae “koutou fakafeagai kiā ia” ʼi te faʼahi ʼaia pea ʼi te tahi age ʼu faʼahi.​—1 Petelo 5:​9, MN.

⁹ Iā Apokalipesi 12:10 (MN ), ʼe ʼui ai ko Satana ʼe ina “fakakoviʼi totatou ʼu tēhina”​—te kau Kilisitiano fakanofo. ʼE ina “fakakoviʼi ia nātou ʼi te ʼaho mo te pō” iā muʼa ʼo te ʼAtua. Kapau ʼe koutou fakakaukauʼi te vaega ʼaia, ʼe koutou mahino ai ko Satana, ia ia ʼaē ʼe ina fakakoviʼi tatou, ʼe fiafia anai mo kapau ʼe koutou fakakoviʼi ia koutou pea mo koutou tauteaʼi ia koutou totonu, kae ko Sehova ʼe mole ina fai te ʼu faʼahi ʼaia. (1 Soane 3:​19-22) Koteā te tupuʼaga ʼo hakotou lotomamahi tuʼumaʼu pe ʼo ʼuhiga mo takotou ʼu hala, ʼo feala ai leva ke koutou manatu ke koutou līaki ia Sehova? ʼAua naʼa koutou tuku ia Satana ke ina maumauʼi takotou ʼu felogoi mo te ʼAtua. Pea ʼaua naʼa lavaʼi te faiga ʼa te Tevolo ke koutou galoʼi ko Sehova ʼe “manavaʼofa, pea mo agaʼofa, tuai ʼi te ʼita pea mo mohu ʼi te lotoʼofa.”​—Ekesote 34:⁠6.

ʼE Feala Ke Tou Lotovaivai ʼUhi Ko Tatatou ʼu Tuʼakoi

10. ʼE tou lava liliu feafeaʼi ʼo lotovaivai ʼuhi ko tatatou ʼu tuʼakoi?

¹⁰ Ko ʼihi Kilisitiano ʼe nātou lotovaivai ʼuhi ko te kua faka tuʼakoi ʼo tanatou tauhi ki te ʼAtua. ʼE hoko koa kiā koutou te faʼahi ʼaia? ʼE lagi mole kei lahi tokotou temi ʼi te minisitelio ohage ko te temi muʼa ʼuhi ko he mahaki kovi, peʼe ko te kua matuʼatuʼa, peʼe ko te tahi age ʼu ʼaluʼaga. ʼE moʼoni, ʼe fakaloto mālohiʼi te kau Kilisitiano ke nātou totogi te temi moʼo kau ki te tauhi ki te ʼAtua. (Efeso 5:​15, 16) Kae e feafeaʼi mo kapau ʼe mole kei lahi takotou kau ki te minisitelio ʼuhi ko takotou ʼu tuʼakoi pea koutou lotovaivai ai?

11. ʼE lava fua lelei feafeaʼi kiā tatou te tokoni ʼa Paulo ʼaē ʼe tuʼu iā Kalate 6:⁠4?

¹¹ ʼE fakaloto mālohiʼi tatou ʼi te Tohi-Tapu ke ʼaua naʼa tou fakasiʼisiʼi tatatou gāue, kae ke tou “faifaitaki kia natou e natou mau te u fakapapau i te tui pea mo te kataki.” (Hepeleo 6:12) ʼE feala hatatou fai te faʼahi ʼaia mo kapau pe ʼe tou vakavakaʼi te faʼifaʼitaki lelei ʼo nātou ʼaia pea mo tou faʼifaʼitakiʼi tanatou tui. Kae ʼe mole fua lelei anai kiā tatou mo kapau ʼe tou fakatatau ia tatou mo ʼihi pea mo tou manatu ai ʼe mole tou fai he meʼa ʼe lelei. Koia ʼe lelei age ke tou mulimuli ki te tokoni ʼaenī ʼa Paulo: “Ke tahi vakai e te tagata tana gaue, e ina mau ai anai he mea ke fiameamea ai, kae mole ko he gaue a he tahi kehe.”​—Kalate 6:⁠4.

12. He koʼe ʼe feala ke tou fiafia ʼi te tauhi kiā Sehova?

¹² ʼE tonu ke fiafia te kau Kilisitiano tatau aipe peʼe faka tuʼakoi tanatou gāue ʼuhi ko he mahaki. ʼE fakapapau fēnei mai ʼi te Tohi-Tapu: “ ʼE mole heʼe agatonu te ʼAtua ke ina galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa.” (Hepeleo 6:​10, MN ) ʼE lagi ko he ʼu ʼaluʼaga ʼe faigataʼa kiā koutou, ʼo mole kei feala ai ke lahi takotou gāue ʼi te gāue neʼe koutou fai ʼi te temi muʼa. Kae ʼaki te tokoni ʼa Sehova, ʼe feala anai ke koutou fakatuputupu takotou kau ki he ʼu faʼahi ʼo te minisitelio, ohage ko te fai faka mafola ʼi te telefoni pea mo te faitohi. ʼE feala ke koutou tui papau ko Sehova ʼAtua ʼe ina tapuakina anai koutou ʼi takotou tauhi ʼaki tokotou nefesi kātoa pea mo tokotou ʼofa kiā te ia pea mo te hahaʼi.​—Mateo 22:​36-40.

ʼE Feala Ke Tou Lotovaivai ʼUhi Ko Te “u Temi Faigataa”

13, 14. (a) ʼE tou lava lotomamahi feafeaʼi ʼuhi ko te “u temi faigataa” ʼaenī? (b) ʼE hā feafeaʼi iā ʼaho nei te heʼeʼofa?

¹³ Logola ʼe tou ʼamanaki ke tou māʼuʼuli ʼi te mālama foʼou faitotonu ʼa te ʼAtua, kae ʼi te temi nei ʼe tou māʼuʼuli ʼi te “u temi faigataa.” (2 Timoteo 3:1) ʼE tou loto fīmālie ʼi tatatou ʼiloʼi ʼaē ko te ʼu maveuveu ʼaē ʼe hoko ʼe fakahā ai te kua ōvi mai ʼo totatou faka ʼāteaina. Kae ʼe malave kiā tatou te ʼu meʼa ʼaē ʼe hoko. Ohage la, e feafeaʼi mokā ʼe mole hakotou gāue? ʼE lagi faigataʼa te maʼu ʼo he gāue, pea ʼi te fakalaka ʼo te ʼu māhina, ʼe lagi koutou feʼekeʼaki peʼe tokagaʼi koa e Sehova tokotou ʼaluʼaga faigataʼa peʼe logo koa ki takotou ʼu faikole. Peʼe feala ke kākāʼi koutou peʼe ko he tahi faʼahiga aga heʼe faitotonu neʼe fai atu. Māʼiape la ʼi takotou lau te ʼu logo ʼi te nusipepa, ʼe feala ke koutou hage ko te tagata faitotonu ko Lote, ʼaē neʼe “mauli mamahi” ʼuhi ko te aga fakalialia ʼo te hahaʼi ʼi tona tafaʼaki.​—2 Petelo 2:⁠7.

¹⁴ ʼE ʼi ai te faʼahi ʼe hoko ʼi te ʼu ʼaho fakamuli, ʼe mole feala ke tou meʼa noaʼi. Neʼe fakakikite ʼi te Tohi-Tapu ko te tokolahi ʼe nātou “heeʼofa” anai. (2 Timoteo 3:3) ʼE lahi te ʼu loto fale ʼe mole kei maʼu ai te ʼofa faka famili. ʼE moʼoni, ʼe ʼui fēnei ʼi te tohi Family Violence, “ko te ʼu meʼa ʼaē ʼe hoko ʼe nātou fakahā mai ʼe lahi age te matehi ʼo te hahaʼi, peʼe ko tonatou tāmateʼi, peʼe nātou lotomamahi peʼe fakaʼalikiʼi nātou e ʼihi ʼi tonatou famili, ʼi he fakahoko age kiā nātou he meʼa feiā mai he tahi kehe age. Ko te potu ʼaē neʼe tonu ke ʼofainaʼi ai pea mo puipui ai te hahaʼi, kua liliu ia maʼa ʼihi hahaʼi lalahi pea mo fānau, ko te potu ʼaē ʼe nātou tuʼutāmakiʼia ai.” Ko nātou ʼaē neʼe māʼuʼuli ʼi he loto fale ʼe mole lelei ʼe feala ki muli age ke nātou loto hoha pea mo lotomamahi. Koteā ʼaē ʼe feala ke koutou fai mokā neʼe hoko kiā koutou te faʼahi ʼaia?

15. ʼE lahi feafeaʼi age te ʼofa ʼa Sehova ʼi te ʼofa ʼa te tagata?

¹⁵ Neʼe hiva fēnei ia Tavite, te tagata fai pesalemo: “ ʼI te temi ʼaē ko taku tāmai pea mo taku faʼē ʼe nā līaki anai au, ʼe tali anai au e Sehova.” (Pesalemo 27:10) ʼE fakaloto fīmālie te ʼiloʼi ʼaē ko te ʼofa ʼa Sehova ʼe lahi age ia ʼi te ʼofa ʼa he ʼu mātuʼa! Logola takotou lotomamahi he neʼe mole ʼofainaʼi koutou, pe neʼe gaohi koviʼi koutou, pe neʼe līaki koutou e he tahi ʼi takotou ʼu mātuʼa, kae ko Sehova ʼe ʼofa tuʼumaʼu pe ia kiā koutou. (Loma 8:​38, 39) Koutou manatuʼi ʼe taki mai e Sehova ia nātou ʼaē ʼe ʼofa ai. (Soane 3:16; 6:44) Tatau aipe pe neʼe gaohi feafeaʼi koutou e te hahaʼi, kae ʼe ʼofainaʼi koutou e takotou Tāmai ʼaē ʼe ʼi selo!

Te ʼu Faʼahi ʼe Tonu Ke Tou Fai Ke Puli Ai Te Lotomamahi

16, 17. Ka lotomamahi he tahi, koteā ʼaē ʼe feala ke ina fai ke mālohi tuʼumaʼu pe ʼi te faʼahi fakalaumālie?

¹⁶ ʼE ʼi ai te ʼu faʼahi ʼe feala ke koutou fai ke puli ai tokotou lotomamahi. Ohage la, koutou kau lahi ki te ʼu gāue faka Kilisitiano. Koutou metitāsioʼi te Folafola ʼa te ʼAtua, tāfito mokā hage ʼe lahi takotou lotovaivai. Neʼe hiva fēnei te tagata fai pesalemo: “ ʼI te temi ʼaē neʼe au ʼui ai: ‘ ʼE heke anai toku vaʼe,’ neʼe haga lagolago ai tou lotoʼofa kiā te au, Ê Sehova. ʼI te hoha lahi ʼo toku loto, neʼe fakapelepeleʼi toku nefesi e tau ʼu fakaloto fīmālie.” (Pesalemo 94:​18, 19) Ko te lau tuʼumaʼu ʼo te Tohi-Tapu ʼe tokoni atu anai ke koutou fakafonu tokotou ʼatamai ʼaki he ʼu palalau fakaloto fīmālie pea mo he ʼu manatu fakaloto mālohi.

¹⁷ ʼE toe maʼuhiga foki mo te faikole. Tatau aipe peʼe mole feala ke koutou fakahā fuli te ʼu meʼa ʼaē ʼi tokotou loto, kae ʼe ʼiloʼi e Sehova te meʼa ʼaē ʼe koutou fia palalau age kiai. (Loma 8:​26, 27) ʼE ʼui fēnei e te tagata fai pesalemo te fakaloto mālohi ʼaenī: “Tuku tau kavega kiā Sehova totonu, pea ko ia totonu ʼe lagolago anai kiā te koe. ʼE mole ina fakagafua anai ke tūkia ia ia ʼaē ʼe faitotonu.”​—Pesalemo 55:⁠22.

18. Koteā ʼaē ʼe feala ke fai e he tahi ʼe lotomamahi ʼuhi heʼe ko tona mahaki ʼaia?

¹⁸ Ko ʼihi ʼe nātou lotomamahi ʼuhi ko tonatou mahaki ʼaia.b Kapau ʼe koutou feiā, koutou faiga ke koutou sio ki te mālama foʼou ʼa te ʼAtua pea mo te temi ʼaē “ ʼe mole he tahi ʼe ina ʼui anai: ‘ ʼE au mahaki.’ ” (Isaia 33:24) Kae kapau ʼe putuputu takotou tō ki te lotomamahi, pea ʼe lagi lelei ke koutou vakaʼi he tōketā. (Mateo 9:12) ʼE toe maʼuhiga ke koutou tokaga ki tokotou ʼaluʼaga fakasino. Ko he kai lelei pea mo he faigaoʼi ʼe ʼaoga anai. Koutou vakaʼi ke feʼauga tokotou temi mālōlō. ʼAua naʼa koutou sioʼi fualoa te televisio, pea koutou tekeʼi te ʼu fakafiafia ʼaē ʼe koutou gaʼegaʼe ai ʼi te faʼahi fakasino pea mo tokotou loto. Kae tāfito, koutou haga fai te ʼu gāue ʼaē ʼe fakafiafia ai te ʼAtua. Logola ʼe mole heʼeki hoko mai te temi ʼaē ka “holoholo anai [e Sehova] ia loimata fuape,” kae ʼe tokoni atu anai ke koutou kātaki.​—Apokalipesi 21:4; 1 Kolonito 10:⁠13.

Tou Nonofo “ ʼi Te Lalo Nima Mālohi ʼa Te ʼAtua”

19. Koteā ʼaē ʼe fakapapau e Sehova kiā nātou ʼaē ʼe lotomamahi?

¹⁹ ʼE ʼui papau ʼi te Tohi-Tapu logola te lahi ʼo te ʼu malaʼia ʼa te tagata faitotonu, kae “ ʼe hāofaki e Sehova ia ia mai te ʼu malaʼia fuli ʼaia.” (Pesalemo 34:19) Koteā ʼaē ʼe fai e te ʼAtua? ʼI te faikole liuliuga ʼa te ʼapositolo ko Paulo ke toʼo iā ia mai tona “tala ʼi te kakano,” neʼe ʼui fēnei age e Sehova: “Ko toku mālohi ʼe lolotoga fakaliliu ʼo haohaoa ʼi te vaivai.” (2 Kolonito 12:​7-9, MN ) Koteā ʼaē neʼe fakapapau age e Sehova kiā Paulo, pea koteā ʼaē ʼe ina fakapapau atu kiā koutou? ʼE mole ina fakapapau ke ina fai he fakamālōlō ʼi te temi nei, kae ʼe ina fakapapau te mālohi ʼaē ke tou lava kātakiʼi.

20. Logola totatou ʼu fihifihia, koteā ʼaē ʼe fakapapau mai iā 1 Petelo 5:​6, 7?

²⁰ Neʼe tohi fēnei e te ʼapositolo ko Petelo: “Koutou agavaivai ʼi te lalo nima mālohi ʼa te ʼAtua ke feala hana hiki ia koutou ʼi tona temi faigamālie, vevete kiā te ia takotou ʼu tuʼania fuli, heʼe tokaga ia kiā koutou.” (1 Petelo 5:​6, 7, MN ) ʼUhi ʼaē ʼe tokaga ia Sehova kiā koutou, ʼe mole ina līʼakina anai koutou. ʼE tokoni atu anai tatau aipe pe koteā tokotou ʼu faigataʼaʼia. Koutou manatuʼi ko te kau Kilisitiano agatonu ʼe nātou nonofo “ ʼi te lalo nima mālohi ʼa te ʼAtua.” Kapau ʼe tou tauhi kiā Sehova, pea ʼe ina foaki mai anai te mālohi ke tou faʼa kātakiʼi. Kapau ʼe tou agatonu kiā te ia, ʼe mole tou mamahi anai ʼi te faʼahi fakalaumālie ʼo talu ai. Koia tou haga taupau tatatou agatonu kiā Sehova ke feala hatatou maʼu te maʼuli heʼegata ʼi te mālama foʼou ʼaē neʼe ina fakapapau mai, pea mo tou sisio ki te ʼaho ʼaē ka ina hāofaki moʼoni anai ia ia ʼaē ʼe lotomamahi ʼo talu ai!

[Kiʼi nota]

ʼE Kei Koutou Manatuʼi Koa?

• He koʼe ʼe toe lotomamahi mo te ʼu kaugana ʼa Sehova?

• Koteā ʼihi faʼahi ʼe feala ke tupu ai te lotomamahi ʼa te hahaʼi ʼa te ʼAtua?

• ʼE tokoni feafeaʼi Sehova kiā tatou ke tou kātakiʼi tatatou ʼu tuʼania?

• E feafeaʼi tatatou nonofo “ ʼi te lalo nima mālohi ʼa te ʼAtua”?

[Paki ʼo te pasina 14]

Ko te fai faka mafola ʼaki te telefoni ʼe ko he tahi faʼahi ʼaia ke koutou tauhi kiā Sehova ʼaki tokotou loto kātoa