Neʼe Mole Mate Tonatou Mālama
ʼI TE ʼu temi faka Tohi-Tapu neʼe ʼi ai te ʼu Fakamoʼoni ʼa Sehova neʼe tau mo nātou te ʼu faigataʼaʼia pea mo te ʼu fihifihia. Neʼe nātou tauʼi te ʼu fakafeagai pea mo te ʼu vaivaiʼaga. Logope la te ʼu faʼahi ʼaia, neʼe mole nātou lotovaivai ai. Ei, neʼe mole mate tonatou mālama.
Ohage la, neʼe fekauʼi te polofeta ko Selemia ke liliu ko he polofeta ʼa te ʼAtua ki te puleʼaga ʼaposita ʼo Suta. Neʼe ina faka mafola te fakatokaga ʼo ʼuhiga mo te fakaʼauha ʼaē ʼe tonu ke hoko ki Selusalemi. (Selemia 1:11-19) Ko te meʼa ʼaē neʼe hoko, neʼe fihi ia Selemia mo te ʼu hahaʼi ʼo te kolo ʼo nātou ʼui ko he polofeta ʼo te malaʼia.
Ko te pelepitelo ko Pasule, ia ia ʼaē neʼe pule ʼi te fale ʼo te ʼAtua, ʼi te tahi lakaga, neʼe ina haha ia Selemia ʼuhi ko te meʼa ʼaē neʼe ina fakakikite, pea neʼe ina pilisoniʼi ia ia ʼo haʼihaʼi ʼona ʼu vaʼe ki te ʼu ʼakau fakamaʼu vaʼe. ʼAki te ʼu meʼa ʼaia, ʼaē ʼe hage ko hona fakatō laloʼi, neʼe ʼui fēnei e Selemia: “Kua ʼau liliu ko he meʼa ʼe manukiʼi ʼi te ʼaho katoa; ʼe vāʼi ʼau e te hahaʼi fuli. Heʼe ʼi te temi fuli ʼaē ʼe ʼau palalau ai, ʼe ʼau kalaga. Agamālohi pea mo kaihaʼa, koʼena te ʼu meʼa ʼaē ʼe ʼau kalagaʼi. Heʼe kua liliu te folafola ʼa te ʼAtua ko he meʼa fakatupu lainoa pea mo fakatupu manukinuki kia te ʼau ʼi te ʼaho katoa.” Neʼe lotovaivai ʼaupito te polofeta ʼo ina ʼui fēnei: “ ʼE mole ʼau talanoa ʼo ʼuhiga mo ia [ia Sehova], pea ʼe mole ʼau toe palalau anai ʼo ʼuhiga mo tona huafa.”—Selemia 20:1, 2, 7-9.
Kae neʼe mole higa ia Selemia ʼi te lotovaivai. ʼI tana talanoa ʼo ʼuhiga mo “te folafola ʼa Sehova” neʼe ina tala fēnei: “Neʼe hage ʼi toku loto ko he afi kakaha ʼe nofo ʼi toku ʼu hui; pea neʼe ʼau fiu ʼi tona tāʼofi, pea neʼe mole feala haku kātakiʼi.” (Selemia 20:8, 9) Pea ke fakaloto mālohiʼi ke palalau ki te ʼu meʼa ʼaē neʼe tala e te ʼAtua, neʼe tokoni kia Selemia te laumālie maʼoniʼoni pea neʼe ina fakahoko tana fekau.
Neʼe toe felāveʼi pe foki ia Paulo mo te ʼatu ʼu ʼaluʼaga ke feala ke liliu ai ʼo lotovaivai, mokanapaula neʼe ina tuku ke lave kia ia te ʼu tupuʼaga ʼaia. Neʼe ina tauʼi te ʼu tuʼutāmaki fakamataku, te tuʼutāmaki ʼi te tai, te ʼu fakataga, pea mo tona gaohi koviʼi. ʼO hilifaki ki te ʼu meʼa ʼaia, ‘neʼe tau mo ia ʼi te ʼaho fuli te tuʼania ʼaē ʼo ʼuhiga mo te ʼu kokelekasio fuli.’ (2 Kolonito 11:23-28) Ei, ʼi te ʼaho fuli, neʼe tau ia Paulo mo te ʼu fihifihia, te tuʼania ʼo ʼuhiga mo te ʼu kokelekasio foʼou ʼaē neʼe kau ki tonatou fakatupu. Pea tahi ʼaē meʼa, neʼe heʼe haohaoa pea neʼe tonu ke ina tauʼi “te tala ʼi tona kakano,” lagi neʼe mole kei sio lelei. (2 Kolonito 12:7; Loma 7:15; Kalate 4:15) ʼI te tahi faʼahi, ko ʼihi neʼe nātou fatufatuʼi ia Paulo, pea neʼe ina logoʼi te ʼu meʼa ʼaia.—2 Kolonito 10:10.
Kae neʼe mole tuku e Paulo te ʼu meʼa ʼaia ke nātou fakaloto vaivaiʼi ia ia. ʼE mole tou ʼui leva ʼi henī, neʼe ko he tagata neʼe ina maʼu he mālohi makehe. (2 Kolonito 11:29, 30) Koteā ʼaē neʼe ina fakakakaha te ‘afi ʼaē ʼi tona loto’? ʼUluaki, neʼe tokoni tona ʼu kaumeʼa kia ia, pea ko ʼihi neʼe nātou ʼolo fakatahi mo ia ki Loma, ʼaē neʼe nofo pilisoni ai. (Gāue 28:14-16) Lua, neʼe fakafuafua lelei e te ʼapositolo te meʼa ʼaē neʼe tau mo ia. Neʼe ko nātou ʼaē neʼe nātou fakatagaʼi pea mo fakafeagai kia ia ʼaē neʼe nātou lākahala, kae neʼe mole ko Paulo. ʼO aʼu ki te fakaʼosi ʼo tona maʼuli ʼi te kele, neʼe ina fakafuafua lelei tona minisitelio pea neʼe ina ʼui fēnei: “ ʼI te temi nei kua tāʼofi maʼa ʼaku te pale ʼo te faitotonu, ʼaē ka fakapale ʼaki ʼau ʼi te ʼaho ʼaia e te ʼAliki, te tuʼi fakamāu faitotonu.”—2 Timoteo 4:8.
Ia meʼa fuli, neʼe fakaōvi tuʼumaʼu ia Paulo kia Sehova ʼAtua ʼi te faikole, pea ‘neʼe tuʼu ōvi ia te ia te ʼAliki, ʼo ina fakafonu ia ia ʼaki te mālohi.’ (2 Timoteo 4:17) Neʼe ʼui fēnei e Paulo: “ ʼE ʼau mālohi kia meʼa fuli ʼaki ia ia ʼaē ʼe ina foaki mai te mālohi.” (Filipe 4:13) Ko tana ʼu felogoi ʼaē mo te ʼAtua pea mo tona ʼu kaumeʼa faka Kilisitiano, ʼo fakatahi mo te fakafuafua lelei ʼo tona minisitelio, neʼe tokoni ai kia Paulo ke haga nofo aipe ʼi te tauhi ʼa Sehova.
Neʼe tohi fēnei e Paulo ʼaki te laumālie ʼa Sehova: “ ʼAua naʼa tou fiu ʼi te fai ʼo te meʼa ʼaē ʼe lelei, heʼe tou utu anai ʼi tona temi totonu, mo kapau ʼe mole tou fiu.” (Kalate 6:7-9) ʼE tou utu anai teā? Te maʼuli heʼegata. Koia, tou liliu ohage ko Selemia, mo Paulo, pea mo ʼihi kau fakamoʼoni agatonu ʼa Sehova ʼe tokolahi ʼaē ʼe talanoa ki ai ʼi te Tohi-Tapu. Ei, tou liliu ohage ko nātou ʼaia, pea ke ʼaua naʼa tou lotovaivai. ʼAua naʼa tou tuku ke mate totatou mālama.—Vakaʼi ia Mateo 5:14-16.
[Paki ʼo te pasina 25]
Neʼe mole tuku e Paulo pea mo Selemia ke mate tonā mālama