ʼE Lava Feafeaʼi Ke Tou Fiafia ʼi Te Fai ʼo Ni ʼu Tisipulo
KO TE fiafia lahi ʼaē ʼe feala ke maʼu e he tahi ʼe ko te liliu ʼaē ʼo kaugā gāue mo te ʼAtua. Ia ʼaho nei, ʼe kau ki te gāue ʼa te ʼAtua ia te fakatahiʼi ki te kokelekasio faka Kilisitiano te hahaʼi ʼaē ʼe nātou ʼoʼofa ki te faitotonu pea mo akoʼi nātou ke nātou maʼuʼuli ohage he kau Kilisitiano ʼi te temi nei pea ke nātou toe hāo foki ʼo hū ai ki te mālama foʼou.—Mikea 4:1-4; Mateo 28:19, 20; 2 Petelo 3:13.
Neʼe ko he meʼa fakatupu fiafia lahi ki te kau Fakamoʼoni ʼa Sehova ʼi Amelika Latina ʼi tanatou sisio ki te toko miliona hahaʼi ʼe nātou liliu ko ni kau tisipulo ʼa Sesu Kilisito talu mai te taʼu 1980. ʼI te gāueʼaga ʼaia ʼe fua lelei, ʼaē ʼe tokolahi ʼe nātou fakaʼapaʼapa pea mo tui ki te Tohi-Tapu, neʼe feala ke tokoni te kau minisi katoa ki te hahaʼi ʼe lauʼi hogofulu tupu ke nātou foaki tonatou maʼuli kia Sehova. ʼI tanatou kua māhani, ʼe feala ke nātou fakahā mai kia tatou he ʼu meʼa ʼo ʼuhiga mo te fiafia ʼaē ʼo te fai ʼo ni ʼu tisipulo. Ko ʼihi ʼu fakamatala ʼanatou ʼe feala ke tokoni atu ke koutou fiafia ʼi te fai ʼo ni ʼu tisipulo ʼi te faʼahi ʼaē ʼe koutou maʼuʼuli ai.
Koutou ʼIloʼi Ia Nātou ʼAē ʼe Feala Ke Liliu Ko He ʼu “Ōvi”
Neʼe ʼui fēnei e Sesu ʼi tana fekauʼi ʼaē tana ʼu ʼapositolo ke nātou ʼolo ʼo faka mafola: “ ʼI he kolo lahi, pe ko he kolo veliveli ʼe koutou hū kiai, koutou kumi pe ko ai ʼaē ʼe tāu mo ia.” (Mateo 10:11) ʼI te temi ʼaē ʼe koutou ʼolo ai ʼo ʼaʼahi te hahaʼi, ʼe lava feafeaʼi ke koutou ʼiloʼi ia nātou ʼaē ʼe feala ke koutou tokoni ki ai ʼi te faʼahi fakalaumālie? ʼE ʼui fēnei e Edward, ko te minisi katoa talu mai ia taʼu e 50 tupu: “ ʼE nātou fakahā te faʼahi ʼaia ʼi tanatou fai he ʼu fehuʼi fakamalotoloto pea mo tanatou leleiʼia te ʼu tali ʼaē ʼe toʼo mai te Tohi-Tapu.” Neʼe toe ʼui fēnei e Carol: “Kapau ʼe fakahā mai e he tahi hona fihifihia peʼe ko hona tuʼania, ʼe ko he kole moʼoni ʼaia ki he tokoni. ʼE ʼau faiga ke ʼau maʼu he ʼu tokoni ʼaoga ʼi te ʼu tohi ʼo te Sosiete Watch Tower. Ko te taʼi tokaga ʼaia ʼe iku ʼi te agamāhani ki he ako Tohi-Tapu.” Kae, ʼe mole faigafua tuʼumaʼu te ʼiloʼi ia te hahaʼi ʼaē ʼe fakamalotoloto. ʼE fakamatala fēnei e Luis: “Ko nātou ʼaē neʼe hage neʼe nātou fia logo moʼoni, neʼe nātou liliu ʼo mole kei nātou fia logo, kae ko ʼihi ʼaē neʼe hage neʼe nātou fakafeagai ʼi te kamataʼaga, neʼe nātou fetogi ʼi tanatou logo ki te meʼa ʼaē ʼe ʼui moʼoni e te Tohi-Tapu.” Mai te ʼaluʼaga ʼaē ʼe tokolahi te kau Amelika Latina ʼe nātou fakaʼapaʼapa ki te Tohi-Tapu, neʼe ina toe ʼui fēnei: “ ʼE ʼau ʼiloʼi ia nātou ʼaē ʼe feala ke tokoni ki ai ʼi te faʼahi fakalaumālie ʼi te temi ʼaē ʼe nātou foimo tali ai te meʼa ʼaē ʼe akoʼi ʼi te Tohi-Tapu, ʼi te hili ʼo taku fakahā age kia nātou.” Ko te tokoni ki te taʼi hahaʼi ʼaē “ ʼe tāu” ke nātou tuputupu ʼi te faʼahi fakalaumālie, ʼe ina foaki mai te fiafia moʼoni pea mo te loto fīmālie. ʼE lava feafeaʼi ke koutou fai te faʼahi ʼaia?
Koutou Kamata He ʼu Ako Tohi-Tapu
Ko te fakaʼaogaʼi ʼo te ʼu tohi ʼaē ʼe tā e “te tagata agatonu mo poto,” ʼi te agamāhani ʼe lelei moʼo tokoni ke mahino te hahaʼi ki te moʼoni ʼo te Tohi-Tapu. (Mateo 24:45) ʼE lava feafeaʼi koa ke koutou fakatuputupu ke nātou leleiʼia te maʼuhiga ʼo te ʼu taʼi tohi ako ʼaia faka Tohi-Tapu? ʼE tali fēnei e Edward: “Koteʼuhi ko te ʼu ʼaluʼaga ʼo te hahaʼi, tonatou agaaga, pea mo tanatou ʼu manatu ʼe kehekehe ʼaupito, ʼe ʼau faigaʼi ke ʼau mulimuli ki te ʼu meʼa ʼaia ʼi taku kamata he ʼu ako Tohi-Tapu.” ʼE mole feala ke koutou fakaʼaogaʼi he faʼahiga fai e tahi ki te hahaʼi fuli.
Ki ʼihi, e lagi ʼaoga ke lahi he ʼu fai palalau faigamālie ki te Tohi-Tapu ʼi muʼa ʼo te fakaafe ʼaē ki te ako ʼo he tohi faka Tohi-Tapu. Kae, ʼe ʼui fēnei e te taumatuʼa misionea: “ ʼI te agamāhani ʼe ma fakahā age te ako Tohi-Tapu ʼi tamā ʼuluaki ʼaʼahi.” ʼO toe feiā, ʼe ʼui fēnei e te Fakamoʼoni neʼe tokoni ki te toko 55 hahaʼi ʼo aʼu ki tanatou papitema: “Ko taku faʼahiga fai tāfito moʼo kamata ʼo he ʼu ako Tohi-Tapu ko te kamata fakahagatonu ʼaki te tohi E Feala Keke Mauli O Heegata Ite Palatiso Ite Kele.” Logope peʼe ko ʼihi ʼe mole nātou leleiʼia te manatu ʼaē ke ako he faʼahiga meʼa pe, ko ʼihi ʼe nātou fia ako te meʼa ʼaē ʼe nātou manatu ʼe ʼaoga anai ki tonatou maʼuli. Ko te fakaafe ʼaē ke fai he ʼu ako Tohi-Tapu ʼe mole totogi ʼi tonatou ʼu ʼapi, ʼi ʼihi temi, ʼe nātou lotolelei ki ai. Ko ʼihi kau misionea ʼe nātou fakamahino age te fakaafe ʼaia pea ʼe nātou ʼui age fēnei: “ ʼE ʼau fia fakahā atu peʼe feafeaʼi tamatou fai te ako. Kapau ʼe ke lotolelei kiai, ʼe feala ke ke hoko atu. Kapau ʼe mole ke loto kiai, ʼe ʼa koe pe tona filifili.” Mo kapau ʼe fakahā age feiā, ʼe mole nātou matataku ʼi te tali ʼo te ako.
Ko te tahi Fakamoʼoni neʼe tokoni ki te tokolahi neʼe mole lahi tonatou ʼu koloā pea mo tanatou ako ʼo ina ʼui fēnei: “Neʼe ʼau sio ko te ʼu kiʼi pepa lotu ʼe ʼaoga tāfito moʼo kamata ʼo he ʼu ako Tohi-Tapu.” Pe koteā pe te tohi ʼaē ʼe nātou fakaʼaogaʼi, ʼe faigaʼi e te kau pionie katoa ke lahi age tanatou fakaʼaogaʼi te Tohi-Tapu. ʼE ʼui fēnei e Carola: “ ʼI te ʼuluaki fai ʼo te ako, ʼe ʼau fakaʼaogaʼi pe te ʼu paki pea mo he ʼu vaega e nima, ke hā lelei te ʼu puani tāfito pea ke mole mata faigataʼa kia ia te Tohi-Tapu.”
Koutou Taupau Tuʼumaʼu Te Fia Logo
ʼE fiafia te hahaʼi ʼi tanatou logoʼi ʼaē ʼe nātou tuputupu, koia ʼe fakatokagaʼi mai e Jennifer ʼo fēnei: “Ke koutou fakatupu tana fia logo. Ke haʼele tuʼumaʼu ki muʼa.” Ko te fai tuʼumaʼu ʼo te ako ʼo mole koutou tō ʼi he vāhaʼa, ʼe toe tokoni foki kia nātou ke nātou logoʼi ʼe nātou tuputupu. Ko te pionie makehe neʼe tupu ʼi te tuvao, ʼe ina fakamahino te maʼuhiga ʼo te faka faigafua ʼo te ʼu fakamahino pea mo tokagaʼi tāfito te ʼu puani maʼuhiga, ke feala ai foki kia nātou ʼaē neʼe mole lahi tanatou ako ke nātou tuputupu. ʼE ina ʼui fēnei: “ ʼI toku kolo, neʼe tonu ke mātou fakavai te kele ʼi te hili ʼo te tō ʼo te pulapula. Kapau neʼe lahi fau tamatou fakavai te ʼu gāueʼaga, neʼe liliu ʼo fefeka te kele, pea neʼe mole feala ke tuputupu te pulapula, pea neʼe mamate. ʼO toe feiā, kapau ʼe lahi fau tatatou fakavai ia nātou ʼaē ʼe foʼofoʼou ʼaki he ʼu tuʼuga puani, ʼe feala ke hage ʼe faigataʼa fau pea mo nātou līaki.” Māʼiape la mo te hahaʼi ʼaē ʼe lahi tanatou fai fehuʼi ʼe tonu ke nātou tokakaga ki he faʼahi pe e tahi mo kapau ʼe nātou fia tuputupu ʼi te mahino. Neʼe ʼui fēnei e Sesu ki ʼana ʼu ʼapositolo: “ ʼE kei lahi te ʼu meʼa ke ʼau tala atu, kae mole feala ke koutou fua ʼi te temi nei.”—Soane 16:12.
Ko te tahi meʼa moʼo taupau tuʼumaʼu te fia logo, ʼe ko te fakaloto mālohiʼi ia nātou ʼaē ʼe koutou ʼaʼahi ke nātou haga fakakaukauʼi te Folafola ʼa te ʼAtua ʼi te hili ʼo takotou mavae. ʼE tokoni fēnei mai e Yolanda: “Koutou lagaʼi he fehuʼi ʼo mole koutou tali kiai. Koutou tuku age he ʼu meʼa ke nātou fai, ohage la ko te lau ʼo he koga ʼo te Tohi-Tapu peʼe ke nātou fai he ʼu kumi ʼo ʼuhiga mo tonatou faʼahi.”
Koutou Fakatuputupu Te ʼOfa Kia Sehova
ʼE tuputupu anai tokotou fiafia ʼi takotou tokoni ki takotou kau ako ke nātou liliu “ko he ʼu hahaʼi ʼe nātou maʼuliʼi te folafola, ka mole ko he ʼu hahaʼi ʼe nātou fagono pe kiai.” (Sake 1:22) ʼE lava feafeaʼi ke koutou fai te faʼahi ʼaia? ʼE uga te kau Kilisitiano moʼoni e te ʼofa kia Sehova. ʼE fakamahino fēnei e Pedro, ʼaē ʼe haʼu mai Mekesike: “ ʼE mole feala ke ʼofa te hahaʼi ki he tahi ʼe mole nātou ʼiloʼi, koia, ʼi te kamataʼaga ʼo te ako, ʼe ʼau akoʼi kia nātou te huafa ʼo te ʼAtua ʼi te Tohi-Tapu, pea ʼe ʼau kumi te ʼu fealagia moʼo faka maʼuhigaʼi te ʼu kalitate ʼo Sehova.” ʼI te fai palalau, ʼe feala ke koutou fakatuputupu te leleiʼia ʼo Sehova ʼo fakahā te ʼu meʼa ʼaē ʼe koutou logoʼi ʼo ʼuhiga mo ia. ʼE ʼui fēnei e Elisapeta: “ ʼE ʼau faiga tuʼumaʼu ke ʼau palalau ki te ʼu lelei ʼo Sehova. ʼI te lolotoga ʼo taku ʼu ako, kapau ʼe ʼau sio ki he fisiʼi teu matalelei, he manulele matalelei, he kiʼi pusi veliveli ʼe gaoʼi, ʼe ʼau ʼui tuʼumaʼu ko te gāue ʼa Sehova.” ʼE ʼui fēnei e Jennifer: “Koutou palalau ʼo ʼuhiga mo te fakapapau ʼa te ʼAtua ki he mālama foʼou ohage ko he moʼoni ʼe koutou tui papau kiai. Koutou fehuʼi age te meʼa ʼaē ka nātou fia fai anai ʼi te mālama foʼou.”
Ka metitasio he tahi ʼaki he loto fakafetaʼi ki te ʼu meʼa ʼaē ʼe ina ako ʼo ʼuhiga mo Sehova, ʼe hū ki tona loto pea ʼe ina uga ia ia ke ina fai he meʼa. Kae ʼe feala ke metitasio mo kapau ʼe kei ina manatuʼi. Ko he fakamanatu nounou ʼo he ʼu puani maʼuhiga e tolu peʼe fā ʼi te hili ʼo te ako, ʼe tokoni ai ke ina manatuʼi. Tokolahi te kau faiako Tohi-Tapu ʼe nātou kole ki te hahaʼi foʼofoʼou ke nātou tohi te ʼu vaega tāfito ʼo fakatahi mo he ʼu manatu ʼi te pasina fakaʼosi ʼo tanatou ʼu Tohi-Tapu. ʼE fakamahino fēnei e te misionea mai Pilitania te tahi meʼa lelei moʼo fai he fakamanatu: “ ʼE ʼau fehuʼi age pe neʼe feafeaʼi te fua lelei kia nātou te meʼa ʼaē neʼe nātou ako. Ko te faʼahi ʼaia ʼe ina taki nātou ke nātou metitasio ʼaki he loto fakafetaʼi ki te ʼu agaaga pea mo te ʼu lao ʼa Sehova.”
Ko te Fakamoʼoni agatonu neʼe maʼu pepa ʼi te tolu kalasi ʼo Kalaate, ʼe ina ʼui fēnei: “ ʼE tonu ke tou fiafia. ʼE feala ke sio ai tatatou kau ako ʼe tou tui ki te meʼa ʼaē ʼe tou akoʼi age.” Ko te tui ʼaē neʼe ina fakaliliu koutou ko “he tahi ʼe ina fai te gāue,” ʼe feala ke maʼu e ʼihi mo kapau ʼe koutou fakahā takotou tui.—Sake 1:25.
“ ʼE ʼau manatu ko te hahaʼi ʼe nātou logoʼi ʼe nātou ōvi ki te ʼAtua mo kapau ʼe ʼau tokoni kia nātou ke nātou ʼiloʼi te ʼu tali ki tanatou ʼu faikole,” ko te ʼui ʼaia ʼa te Fakamoʼoni neʼe tokoni ki te tokolahi ke nātou tauhi kia Sehova. “ ʼE ʼau fakamatala age kia nātou he ʼu faʼifaʼitaki neʼe hoko ʼi toku maʼuli, ohage la ko te faʼifaʼitaki ʼaenī: ʼI te temi ʼaē neʼe ma kaku ai, toku kaugā gāue pea mo ʼau, ki te telituale foʼou ʼaē neʼe hinoʼi mai, ʼi tomā ʼuhiga pionie, neʼe gata pe ki te lauʼakau veliveli, mo te potilo, pea neʼe mole hamā falā. Neʼe ma fakaʼosi pe te meʼa kai ʼaia ʼi te afiafi pea neʼe ma ʼui fēnei: ‘ ʼI te temi nei ʼe mole kei ʼi ai he meʼa ki ʼapogipogi.’ Neʼe ma faikole ʼo ʼuhiga mo te faʼahi ʼaia, pea ma ʼolo ʼo momoe. ʼI te māfoatā, neʼe pāui te Fakamoʼoni ʼo te kolo pea neʼe hū ki fale, ʼo ina ʼui fēnei: ‘Neʼe ʼau faikole kia Sehova ke ina fekauʼi mai he kau pionie. ʼI te temi nei ʼe feala ke ʼau ʼalu mo koulua ʼi te ʼaho katoa, kae mai te ʼaluʼaga ʼaē ʼe ʼau nofo ʼi te tuʼa kolo, ʼe ʼau kai anai mo koutou ʼi te fetapā, koia neʼe ʼau haʼu ai mo te meʼa kai ʼaenī maʼa tatou fuli.’ Neʼe ko te tuʼuga moʼi pipi pea mo te ʼu lauʼakau. ʼE ʼau ʼui tuʼumaʼu ki taku kau ako ko Sehova ʼe mole ina līʼakina tatou ʼi he temi mo kapau ʼe tou kumi muʼa tona Puleʼaga.”—Mateo 6:33.
Koutou Foaki He Tokoni ʼe ʼAoga
ʼE lahi age te ʼu meʼa ʼe kau ki te fai ʼo ni ʼu tisipulo ʼa Kilisito ʼi te fai pe ʼo he ako Tohi-Tapu. Ko te misionea neʼe fualoa tana gāue ohage ko he taupau feʼaluʼaki, ʼe ina ʼui fēnei: “Koutou foaki kia nātou he temi. ʼAua naʼa koutou foimo ʼolo pe ʼi te hili ʼo te ako. Kapau ʼe feala, koutou nonofo pea mo koutou fai palalau ʼi he kiʼi temi.” ʼE ʼui fēnei e Elisapeta: “ ʼE ʼau tokaga kia nātou koteʼuhi ʼe pipiki kiai tonatou maʼuli. ʼE lahi te ʼu temi ʼe ʼau tuʼania ʼo ʼuhiga mo nātou ohage ko haku ʼu fānau.” ʼE fai e ʼihi ʼu Fakamoʼoni te ʼu tokoni ʼaenī: “Koutou ʼaʼahi ia nātou mokā ʼe nātou mahahaki.” “ ʼI te temi ʼaē ʼe koutou ōvi ai ki tonatou ʼapi, ohage la ʼi te fai faka mafola, koutou ʼaʼahi nātou ʼo mole fualoa, ʼo koutou fakahā age ʼihi ʼu Fakamoʼoni kia nātou.” ʼE ʼui fēnei e Eva: “Koutou fakalogo lelei ke koutou mahino ki tona ʼuhiga pea mo te ʼaluʼaga ʼo tona maʼuli. Ko te ʼu meʼa ʼaia ʼe lave ki te aga ʼa te hahaʼi ʼo ʼuhiga mo te moʼoni pea ʼe feala ke faigataʼa tanatou tuputupu. Koutou liliu ko honatou kaumeʼa, ke feala ai hanatou falala kia koutou ʼo palalau atu ʼo ʼuhiga mo tonatou ʼu fihifihia.” ʼE toe ʼui fēnei e Carol: “Ko te tokaga moʼoni ki he tahi ʼe maʼuhiga, ʼuhi ko te ʼu fetogi ʼaē ʼe hoko ʼi tona maʼuli ʼaki te moʼoni, ʼe faka ʼuhiga anai ʼi ʼihi temi mole kei hona famili pea mo hona ʼu kaumeʼa. ʼI te agamāhani, ʼe ko he meʼa lelei kia ia ʼaē ʼe ako ke ina ʼiloʼi te faʼahi ʼaē ʼe tou nonofo ai pea ke ina ʼiloʼi papau ʼe feala ke haʼu kio tatou ʼi he temi pe.” Koutou tokoni kia ia ke ina faka ʼuhigaʼi te kokelekasio ohage ko hona famili foʼou.—Mateo 10:35; Maleko 10:29, 30.
ʼE ʼui fēnei e Yolanda: “Koutou nofo tokaga ʼo foaki he tokoni ʼe ʼaoga. Koutou heheka tahi mo nātou ʼi te ʼu fono, pea mo tokoni kia nātou pea mo ʼanatou ʼu fānau.” Ko te fakahā ʼaē ki te ʼu hahaʼi foʼou peʼe feafeaʼi te akoʼi ʼo tanatou ʼu fānau, ke lelei age ʼo tanatou ʼu lekula ʼo ʼuhiga mo te fakamaʼa, te teuteuʼi ʼo he ʼu tali ʼi te ʼu fono, pea mo te fai palalau ʼi te Ako ʼo Te Minisitelio Faka Teokalatike, ʼe ko te ʼu faʼahi fuli ʼaia ʼe kau ki te fai ʼo ni ʼu tisipulo. ʼE toe ʼui fēnei e te tahi tuagaʼane: “ ʼE maʼuhiga te akoʼi ʼo te hahaʼi foʼou ki te minisitelio. Ka ʼe mole fakatokagaʼi lelei te faʼahi ʼaia, ko ʼihi ʼe nātou matataku ʼi te gāue fai faka mafola, ʼe puli ia nātou te fiafia ʼi te tauhi kia Sehova, pea ʼe mole kei nātou faʼa kātaki.” Koia, koutou tokakaga ʼo foaki fakalelei he ako ʼi te fai faka mafola ʼi te ʼu ʼapi, ʼi te fai ʼo te ʼu ʼaʼahi, pea ʼi te kamata ʼo te ʼu ako Tohi-Tapu. ʼE koutou fiafia anai ʼi takotou sio ʼaē ki te tuputupu ʼo takotou ako ʼaki takotou tokoni pea mo takotou takitaki.
Koutou Fakaloto Mālohi Ke Nātou Kātakiʼi
ʼE ʼui fēnei e te tahi ʼe kua māhani ʼi te fai ʼo ni ʼu tisipulo: “ ʼE faigafua te meʼa noaʼi ʼo te ako mokā papitema he tahi.” ʼE tonu ke manatuʼi e te faiako pea mo ia ʼaē ʼe ako, ko te Kilisitiano ʼaē neʼe hoki papitema pe ʼe mole ko he tahi kua fakapotopoto ʼi te faʼahi fakalaumālie. ʼE tonu ke tuputupu lahi ʼi tana tui, ʼi tana leleiʼia te lao ʼa te ʼAtua, pea mo tona ʼofa ʼaē kia Sehova. ʼE maʼuhiga ke fakaloto mālohiʼi ia ia ke ina gāueʼi he agamāhani ki te ako takitokotahi ke hoholo ai tana tuputupu.—1 Timoteo 4:15.
E lagi ʼaoga kia ia ʼaē ʼe foʼou he tokoni ke tuputupu pea mo liliu ko he tahi ʼe tali kāiga ʼi te famili fakatautehina. E lagi ʼaoga he takitaki ʼi tana felāveʼi mo he ʼu hala ʼa te ʼu tēhina ʼi tana fakaōvi age kia nātou. (Mateo 18:15-35) E lagi ʼaoga ke tokoni ke liliu ko he tagata faiako poto, ʼe feala ke ina fai tana ʼu kumi totonu. ʼE fakamatala fēnei e te misionea: “Neʼe loto e te tahi neʼe ako mo ʼau, ʼi te hili ʼo tona papitema, ke lelei age tana poto ʼaē ʼi te faiako, koia neʼe ina ʼui mai, ‘ ʼe tonu ke ʼau fai he ako Tohi-Tapu foʼou ʼi te vāhaʼa ʼaenī ka haʼu, kae ʼe ʼaoga ke ʼau toe manatuʼi te ʼu ʼuluaki kapite ʼaē neʼe ʼau ako. Fakalelei siʼou loto, ʼe feala la ke ke toe fai mo ʼau te ʼu kapite ʼaia, ʼo tā vakaʼi takitahi, ke feala ai ke ʼau toʼo he ʼu nota ʼo ʼuhiga mo te ʼu fakamahino ʼo te ʼu vaega pea mo te ʼu lea fakatātā, pea ke feala ai ke ʼau fakaʼaogaʼi ʼi taku ʼalu ʼo fai te ako?’ Neʼe liliu ai ko he faiako lelei, neʼe ko te toko fā ʼo tana kau ako neʼe papitema ʼi te tahi fakatahi.”
He Koʼe ʼe Mole Maumau Temi Te Faiga ʼo Fai Ni ʼu Tisipulo
ʼE ʼui fēnei e Pamela: “Ko te fai ʼo ni ʼu tisipulo ʼe faka ʼuhiga lahi age ia ʼi he kaugamālie ʼe atolasio kia Sehova. ʼE faka ʼuhiga ke tou maʼuʼuli maʼa nātou ʼaē ʼe nātou tali te moʼoni. ʼE ʼau leleiʼia te akoʼi ʼo te moʼoni ki ʼihi—ʼe ko he meʼa fakatalakitupua! Ko he tahi ʼe sio ki te tuputupu māmālie ʼo te kau ako, tanatou fai te ʼu fetogi ʼi tonatou maʼuli pea mo lavaʼi te ʼu fihifihia ʼaē neʼe hage neʼe faigataʼa kae neʼe mole faigataʼa ia ki te laumālie ʼo Sehova. Tokolahi ia nātou ʼaē neʼe nātou ʼoʼofa kia Sehova neʼe nātou liliu ko toku ʼu kaumeʼa lelei.”
ʼE fakamatala fēnei e te misionea mai Siamani: “ ʼI taku sio kia nātou ʼaē neʼe ʼau tokoni ke nātou liliu ko ni ʼu tisipulo, ʼe ʼau sio ki niʼihi neʼe aga fakalogologo neʼe nātou tuputupu ʼo liliu ko he kau minisi ʼa te ʼAtua, ʼaē neʼe faigataʼa maʼa ʼaku taku tui kiai. ʼE ʼau sio ki te hahaʼi neʼe nātou lavaʼi te ʼu fihifihia lahi, ʼe mahino papau ʼaki te tokoni ʼa Sehova. ʼE ʼau sio ki te ʼu famili neʼe mavetevete kae ʼi te temi nei kua toe fakatahi—te fiafia ʼo te fānau mo tanatou ʼu mātuʼa ʼaē ʼe nātou fakahoko tonatou ʼu maʼua. ʼE ʼau sio ki te hahaʼi ʼe nātou fiafia ʼi te ʼuhiga ʼo tonatou maʼuli, ʼo nātou vikiʼi ia Sehova. Ko te fiafia ʼaia ʼo te fai ʼo ni ʼu tisipulo.”
Ei, ko te liliu ko he kaugā gāue ʼa Sehova ʼAtua ʼi te fai ʼo ni ʼu tisipulo ʼe ko te matapuna ʼo he fiafia lahi ʼaupito. Neʼe fakamoʼoni ki ai te ʼu fakamatala ʼa te kau misionea pea mo te kau pionie. ʼE feala ke koutou maʼu te fiafia ʼaia pea mo te loto fīmālie mo kapau ʼe koutou maʼuliʼi te ʼu tokoni pea mo koutou gāue ki te faʼahi ʼaia ʼaki totatou nefesi katoa. ʼAki te ʼu tapuakina ʼa Sehova, ʼe katoa anai tokotou fiafia.—Tāʼaga Lea 10:22; 1 Kolonito 15:58.