Tou Fai Te ʼAho Fakamanatu ʼi Hona ʼAluʼaga ʼe Tau Mo Feʼauga

ʼI TE afiafi ʼo te ʼaho 14 ʼo Nisani, ʼo te taʼu 33 ʼo totatou temi, neʼe fakatuʼutuʼu ai e Sesu te ʼAho Fakamanatu.a Ko te hoki ʼosi pe ʼaia ʼo tana fai te Pāsikate mo tana ʼu ʼapositolo e 12, koia kua tou ʼiloʼi papau ai te ʼaho ʼaē neʼe fai ai. ʼI te ʼosi fakamavae ʼo Sutasi, ia ia ʼaē ka ina lavakiʼi ia ia, ko Sesu “neʼe ina toʼo te pane, ʼo ina lau te tapuaki, pea ina tofitofi, pea ina foaki kia nātou, mo ʼui maʼana: ‘Koutou toʼo, ko te meʼa ʼaenī ʼe ina fakatātā toku sino.’ Pea ʼi tana toʼo te ipu, neʼe ina fai te fakafetaʼi pea ina foaki age kia nātou, pea neʼe nātou ʼinu fuli kiai. Pea neʼe ʼui maʼana kia nātou: ‘Ko te meʼa ʼaenī ʼe ina fakatātā toku “taʼataʼa ʼo te fuakava,” ʼaē ʼe tonu ke liligi maʼa te tokolahi.’ ”​—Maleko 14:22-​24.

Neʼe fakatotonu e Sesu ki tana kau tisipulo ke nātou fakamanatu tona mate koteʼuhi ʼe maʼuhiga te ʼaho ʼaia. (Luka 22:19; 1 Kolonito 11:23-​26) Neʼe ko ia tokotahi pe neʼe feala ke ina foaki he sakilifisio moʼo totogi ʼaki te malamanei mai te malaʼia ʼaē ʼe tau mo ia, te agahala pea mo te mate. (Loma 5:​12; 6:​23) Ko te pane pea mo te vino ʼaē neʼe ina fakaʼaogaʼi, neʼe nā fakatātā tona sino pea mo tona taʼataʼa haohaoa. ʼI tatatou ʼiloʼi te ʼaho ʼaē neʼe fai ai e Sesu te ʼAho Fakamanatu, ʼe feala ke tou fakamanatu ai te toʼotoʼoga ʼaia ʼi te taʼu fuli, ʼo mulimuli pe ki te ʼaho tonu ʼaia, ohage ko te fai ʼo te Pāsikate faka Sutea. Kae ʼe tonu ke tou fai ʼi hona ʼaluʼaga ʼe tau mo feʼauga. Koteā tona tupuʼaga?

Neʼe ʼui e te ʼapositolo ko Paulo ko nātou ʼaē ʼe kau ki te kai ʼo te pane pea mo te vino, ʼe tonu anai ke nātou “kalagaʼi tuʼumaʼu te mate ʼo te ʼAliki, ʼo aʼu ki tana haʼu.” (1 Kolonito 11:26) Ko te toʼotoʼoga ʼaia ʼe ina fakatokagaʼi tāfito te mate ʼo Sesu pea mo tona faka ʼuhiga ki te malamanei. ʼE ko he toʼotoʼoga maʼuhiga, ʼe ko he temi ke tou fakakaukauʼi ai te agalelei ʼa te ʼAtua pea mo tou fakafetaʼi kia Sehova pea mo tona ʼAlo. (Loma 5:8; Tito 2:​14; 1 Soane 4:​9, 10) Koia, neʼe fai ai e Paulo te fakatokaga ʼaenī: “Ko ʼaē ʼe ina kai te pane peʼe ʼinu te ipu ʼo te ʼAliki ka mole tāu mo ia, ʼe lākahala ia ki te sino pea mo te taʼataʼa ʼo te ʼAliki.”​—1 Kolonito 11:27.

ʼI Hona ʼAluʼaga ʼe Tāu Mo Feʼauga​—ʼO Feafeaʼi?

ʼE mahino ia, ʼe mole leleiʼia anai e te ʼAtua mokā ʼe tou ʼulihi te toʼotoʼoga ʼaia ʼaki hatatou fai he ʼu aga ʼe kovi peʼe tou mulimuli ki he ʼu agaʼi fenua faka pagani. (Sake 1:​27; 4:​3, 4) Ko te toʼotoʼoga ʼaia ʼe mole ina tali te ʼu meʼa ʼaē ʼe pipiki ki te Pāsikate ʼo te Keletiate. Ko tatatou mulimuli ki te tokoni ʼa Sesu ʼaē ke tou “haga fai te meʼa ʼaenī moʼo fakamanatu kia [te ia],” ʼe tonu ke tou fia taupau te ʼAho Fakamanatu ohage pe ko tona fakatuʼutuʼu e Sesu ʼi te ʼaho ʼaia. (Luka 22:19; 1 Kolonito 11:24, 25) ʼE mole tali ʼi te toʼotoʼoga ʼaia, te ʼu meʼa ʼaē neʼe hilifaki e te ʼu ʼēkelesia ʼo te Keletiate ki te ʼaho ʼaia. ʼE ʼui fēnei e te tohi New Catholic Encyclopedia, “ko te Misa ia ʼaho nei ʼe lahi tona kehekehe mo te toʼotoʼoga ʼaē neʼe mulimuli ki ai ia Kilisito pea mo Tana kau ʼapositolo.” Pea ʼi te fai tuʼumaʼu ʼo te Misa, ʼi te ʼaho fuli, kua fakamamaʼo te Keletiate mai te meʼa ʼaē neʼe fakatuʼutuʼu e Sesu pea kua fakaliliu te toʼotoʼoga ʼaia ohage ko he meʼa ʼe mole kei maʼuhiga.

Neʼe faitohi Paulo ki te kau Kilisitiano ʼo Kolonito, he neʼe nātou fai te toʼotoʼoga ʼaia ʼi hona ʼaluʼaga ʼe mole tau mo feʼauga, koteʼuhi neʼe hoko te fihifihia ʼi te kokelekasio ʼo ʼuhiga mo te Taumafa ʼo te ʼAliki. Ko ʼihi neʼe mole nātou fakaʼapaʼapa ki te ʼuhiga taputapu ʼo te toʼotoʼoga ʼaia. Neʼe nātou ʼaumai tanatou kai afiafi pea neʼe nātou kakai ʼi muʼa ʼo te kamata ʼo te fono peʼe ʼi te lotolotoga ʼo te fono. Neʼe nātou tautau kakai pea mo ʼiʼinu fakavalevale. Ko te faʼahi ʼaia neʼe vaivai ai tanatou fealagia fakakaukau. ʼI tanatou mole nonofo tokakaga ki tonatou ʼatamai pea mo te ʼu meʼa fakalaumālie, neʼe “mole feala ke [nātou] ʼiloʼi te sino” pea neʼe nātou “lākahala ki te sino pea mo te taʼataʼa ʼo te ʼAliki.” Lolotoga te temi ʼaia, ko nātou ʼaē neʼe mole kakai, neʼe kua nātou fia kakai pea neʼe mole kei nātou tokakaga ki te toʼotoʼoga ʼaia. ʼE hā ʼaki mai ai neʼe mole he tahi ia nātou neʼe feala ke kau ki te kai ʼo te pane pea mo ʼinu te vino ʼaki he loto fakafetaʼi, pea mo he mahino katoa ki te mamalu ʼo te lakaga ʼaia​—ko te toʼotoʼoga neʼe fai moʼo fakamanatuʼi ʼo te mate ʼo te ʼAliki. Ko te faʼahi ʼaia neʼe iku ai mo tonatou fakamāuʼi, koteʼuhi neʼe nātou fakahā tanatou mole fakaʼapaʼapa, ʼo nātou meʼa noaʼi te ʼaho ʼaia.​—1 Kolonito 11:27-​34.

ʼE ʼAoga Ke Tou Maʼu Te Fakasiosio Tonu

Ko ʼihi ʼe kau ki te kai ʼo te pane mo te ʼinu ʼo te vino ʼo te ʼAho Fakamanatu, kae ki muli age ʼe nātou fakatokagaʼi neʼe mole tonu ke nātou fai te faʼahi ʼaia. Ko nātou ʼaē ʼe tonu ke nātou kau ki te kai ʼo te pane pea mo te ʼinu ʼo te vino ʼi te ʼAho Fakamanatu, ʼe fili nātou e te ʼAtua pea ʼe nātou maʼu te fakamoʼoni ʼo te laumālie ʼo te ʼAtua ʼo ʼuhiga mo te faʼahi ʼaia. (Loma 8:​15-​17; 2 Kolonito 1:​21, 22) ʼE mole ko tanatou tonu takitokotahi peʼe ko tanatou loto papau ki te ʼamanaki ʼaia ʼaē ʼe feala ai ke nātou tau mo te faʼahi ʼaia. Neʼe faka tuʼakoi e te ʼAtua ia nātou ʼaē ka hau anai mo Kilisito ʼi selo, ko te toko 144 000, pea ʼe nātou tokosiʼi mokā fakatatau mo nātou fuli ʼaē ʼe nātou maʼu te ʼu fua lelei ʼaki te sakilifisio ʼa Kilisito. (Fakahā 14:​1, 3) Ko te filifili ʼo nātou ʼaia neʼe kamata ʼi te temi ʼo Sesu, koia ia ʼaho nei, ʼe ko te tokosiʼi pe ʼaē ʼe nātou kai te pane pea mo ʼinu te vino ʼi te ʼAho Fakamanatu. Pea ʼi te mamate ʼo ʼihi ia nātou, ʼe nātou fakaʼaluʼalu ʼo tokosiʼi.

He koʼe ʼe feala ke faihala he tahi ʼi tana fakaʼaogaʼi te pane mo te vino? E lagi feala ke hoko te faʼahi ʼaia ʼuhi ko te ʼu manatu faka lotu ʼaē neʼe ina maʼu ki muʼa atu​—ʼaē ko te kau agatonu fuli ʼe ʼolo ki selo. Peʼe lagi ʼuhi ko te fia hā peʼe ko te manatu pe ʼaē kia kita​—ko te manatu ʼaē ko he tahi ʼe ʼaoga age ia ʼi ʼihi—​pea mo te holi ʼaē ke tokaga age te hahaʼi kia ia. Lagi ko te ikuʼaga ʼo he ʼu meʼa ʼe manatu mālohi kiai ʼi tona loto, ʼuhi ko he ʼu fihifihia lahi peʼe ko he tuʼutāmaki neʼe fakatupu ʼaki ai tana mole kei fia maʼuli ʼi te kele. Peʼe lagi ina fai te faʼahi ʼaia, heʼe kaumeʼa lelei mo he tahi ʼe ina maʼu te pāui ki selo. ʼE ʼaoga ke tou manatuʼi fuli ko te faʼahi ʼaia ʼe ko te ʼAtua tokotahi pe ʼaē ʼe ina vakaʼi, ka mole ko tatou. (Loma 9:​16) Koia kapau ko he tahi, “ ʼi te hili ʼo tana sivi ia ia,” ʼe ina fakatokagaʼi ʼe mole tonu ke ina kai te pane pea mo ʼinu te vino, ʼi te temi nei ʼe mole tonu anai ke ina toe kai kiai.​—1 Kolonito 11:28.

Ko te ʼamanaki ʼaē neʼe ʼuluaki foaki e te ʼAtua ki te tokolahi ʼo te malamanei, ʼe ko te maʼuli heʼegata ʼi te palatiso ʼi te kele. Ko te faʼahi ʼaia ʼe ko he tapuakina lahi ʼe tou fakatalitali kiai, pea ʼe ko he ʼamanaki ʼe feala hatatou kau fuli kiai. (Senesi 1:​28; Pesalemo 37:9, 11) ʼI te kele ʼaē ʼe fakatahitahi ai anai te hahaʼi agatonu mo te hahaʼi ʼaē ʼe nātou ʼofa mamahi kiai ʼaē ka fakatuʼuake, ʼe nātou felāveʼi anai mo te ʼu hahaʼi faitotonu ʼo te temi muʼa, ohage ko Apalahamo, Sala, Moisese, Laape, Tavite, pea mo Soane Patita​—ia nātou fuli ʼaē neʼe mamate ʼi muʼa ʼo te tofa e Sesu te ala ki te maʼuli ʼaē ʼi selo.​—Mateo 11:11; vakaʼi ia 1 Kolonito 15:20-​23.

Ko nātou ʼaē ʼe nātou maʼu te ʼamanaki ki te maʼuli ʼi te kele, ʼe nātou fakamanatu te Taumafa ʼo te ʼAliki ʼi hona ʼaluʼaga ʼe tau mo feʼauga, ʼo nātou kau ki te ʼAho Fakamanatu ʼaia pea mo nātou fakaʼapaʼapa kiai, tatau aipe peʼe mole nātou kai te pane pea mo ʼinu te vino. ʼE nātou toe maʼu foki te ʼu fua lelei ʼo te sakilifisio ʼo Kilisito, ʼaē ʼe ina faka fealagia kia nātou ke nātou maʼu he tuʼulaga lelei ʼi muʼa ʼo te ʼAtua. (Fakahā 7:​14, 15) ʼI tanatou fakalogo ki te akonaki ʼaē ʼe fai, ʼe mālohi ai tanatou loto fakafetaʼi ki te ʼu meʼa taputapu, pea ko tanatou holi ʼaē ke nātou logo tahi mo te hahaʼi ʼa te ʼAtua ʼo te potu fuli pe ʼe tuputupu ia.

ʼI te taʼu ʼaenī, ʼi te Feliatolu, ʼaho 2 ʼo ʼApelili ʼi te tō ʼo te laʼā, ʼe tou fai anai te ʼAho Fakamanatu ʼi te ʼu kokelekasio ʼa te kau Fakamoʼoni ʼa Sehova e 78 000 tupu ʼi te kele katoa. ʼE koutou ʼolo anai koa kiai?

[Nota ʼi te lalo pasina]

[Paki ʼo te pasina 8]

Ko te kau Fakamoʼoni ʼa Sehova ʼe nātou fai tuʼa tahi te ʼAho Fakamanatu ʼi te taʼu fuli