Te ʼu Fehuʼi ʼa Te Kau Lautohi

ʼI ʼihi temi, ʼe tou logo ʼe palalau te ʼu tēhina peʼe nātou faikole ki te hoko mai ʼo te Puleʼaga ʼo te ʼAtua ki te kele. ʼE ko he kupuʼi palalau koa ʼe lelei?

ʼI tona fakahagatonu, ʼe mole ko he kupuʼi palalau ia moʼo fakahā peʼe hoko feafeaʼi mai te puleʼaga. Ko te Puleʼaga ʼo te ʼAtua ʼe ʼi selo. Koia, neʼe feala ke tohi fēnei ai e te ʼapositolo ko Paulo: “ ʼE faka ʼāteaina anai ʼau e te ʼAliki mai te ʼu gāue kovi fuli pe, pea ʼe ina hāofaki anai ʼau ki tona puleʼaga ʼaē ʼe ʼi selo. Ke faka kolōliaʼi ia ia ʼo talu ai. Ameni.”​—2 Timoteo 4:​18; Mateo 13:44; 1 Kolonito 15:⁠50.

Neʼe fakatuʼu te Puleʼaga ʼi te lagi ʼi te taʼu 1914, pea ʼe mole fakatuʼu anai ia ʼi te Palatiso ʼi te kele peʼe fakatuʼu ʼi he tahi potu. ʼE ko Sesu Kilisito te Hau ʼo te Puleʼaga. ʼI tona ʼuhiga Hau, ʼe pule Sesu ki te kau ʼaselo. Koia, ʼe nofo Hau ʼi te toʼomataʼu ʼo te ʼAtua ʼi selo. ʼI selo ʼe fakatahi mo ia te kau Kilisitiano fakanofo ʼi tonatou ʼuhiga hau pea mo pelepitelo.​—Efesi 1:​19-​21; Fakahā 5:​9, 10; 20:⁠6.

Kae, ʼe faka ʼuhiga koa ʼe mole tonu ke tou toe fai ki te ʼAtua te ʼu palalau ʼaē ʼe tou maʼu ʼi te Faikole ʼa te ʼAliki, ʼaē ʼe ʼui fēnei ai: “Ke hoko mai tou puleʼaga! Ke fai tou finegalo ʼi te kele, ohage ko selo”? (Mateo 6:​10) Kailoa, ko te faikole ʼaia ʼe lelei pea ʼe ʼi ai tona tahi ʼu faka ʼuhiga.

ʼE kei toe te ʼu gāue fakaʼosi ke fakahoko e te Puleʼaga ʼo te ʼAtua ki te kele, pea ko te faʼahi ʼaia ʼaē ʼe tou manatu kiai mokā tou faikole, pea mo fakaʼaogaʼi te ʼu kupuʼi palalau ʼaia ʼaē ʼe maʼu ʼi te Faikole ʼa te ʼAliki. Ohage la, ʼe fakakikite ia Taniela 2⁠:44 ʼe “hoko mai” anai te Puleʼaga ʼo ina fakaʼauha te ʼu puleʼaga fuli, pea ʼe pule anai ki te kele. ʼE talanoa ia Fakahā 21⁠:2 ʼo ʼuhiga mo te Selusalemi Foʼou ʼaē ʼe hifo mai lagi. ʼE faʼufaʼu te Selusalemi Foʼou ʼaia e te toko 144 000 kau Kilisitiano fakanofo ʼaē ka liliu anai ko te ʼohoana ʼo Kilisito. Tahi ʼaē meʼa, ʼe nātou maʼu te tofiʼa mo Sesu ʼi te Puleʼaga. Koia, ʼe fakamatala e Fakahā 21⁠:2 tanatou tokakaga ki te kele, ʼo foaki te ʼu tapuakina ki te hahaʼi agatonu.​—Fakahā 21:​3, 4.

ʼO aʼu ki te hoko ʼo te ʼu lea faka polofeta fakaofoofo ʼaia pea mo ʼihi ʼu lea faka polofeta, ʼe toe hoko atu anai te faikole ʼaē ʼe tau mo feʼauga kia Sehova ʼAtua ohage ko tona ʼui ʼaē e Sesu, “Ke hoko mai tou puleʼaga.” Kae ʼe tonu ke tou taupau ʼi totatou ʼatamai, ʼe mole hoko mai anai te Puleʼaga ki te kele nei ʼi tona ʼuhiga moʼoni. ʼE tuʼu te Puleʼaga ʼi selo, kae mole tuʼu ia ʼi te kele.

[Haʼuʼaga ʼo te paki pasina 31]

Earth: Based on NASA photo