“ ʼAliki, Ako Mai Kia Mātou Te Faikole”

“Neʼe ʼui maʼa te tokotahi ʼo tana ʼu tisipulo kia te ia: ‘ ʼAliki, ako mai kia mātou te faikole.’ ”—Luka 11:1, MN.

1. He koʼe neʼe kole e te tisipulo ʼa Sesu ke ina akoʼi age kia nātou te faikole?

ʼI TE tahi lakaga, ʼi te taʼu 32 ʼo totatou temi, neʼe ʼi ai te tisipulo ʼa Sesu neʼe ina sioʼi ia Ia ʼi tana lolotoga faikole. Neʼe mole logo ki te meʼa ʼaē neʼe ʼui e Sesu ki tana Tāmai, he neʼe lagi faikole fakalogologo. Kae ʼi te ʼosi faikole ʼa Sesu, neʼe ʼui fēnei e te tisipulo kia te ia: “ ʼAliki, ako mai kia mātou te faikole.” (Luka 11:1, MN ) He koʼe neʼe ina kole age te faʼahi ʼaia? Ko te faikole neʼe ko he faʼahi neʼe fai tuʼumaʼu e te kau Sutea pea neʼe ko he koga ʼo tanatou tauhi. ʼE tohi ʼi te Koga Tohi-Tapu Faka Hepeleo te ʼu tuʼuga faikole ʼi te tohi ʼo Pesalemo pea mo te tahi ʼu tohi. Koia neʼe mole kole e te tisipulo ke akoʼi age kia ia he meʼa neʼe mole ina ʼiloʼi pe neʼe heʼeki ina fai ki muʼa atu. ʼE mahino ia neʼe ina ʼiloʼi lelei te ʼu faikole fia hā ʼa te kau takitaki lotu ʼo te Lotu Faka Sutea. Kae neʼe sio leva ki te faikole ʼa Sesu, pea neʼe lagi ina tokagaʼi te kehekehe ʼaupito ʼo te ʼu faikole fia maʼoniʼoni pea mo fia hā ʼa te kau lapi pea mo te faʼahiga faikole ʼa Sesu.—Mateo 6:5-8.

2. (a) Koteā ʼaē ʼe fakahā ai ko Sesu neʼe mole ina loto ke tou lau liuliuga feiā te faʼifaʼitaki ʼo te faikole ʼaē neʼe ina tuku mai? (b) He koʼe ʼe lelei ke tou ʼiloʼi peʼe feafeaʼi te faikole?

² ʼI ni ʼu māhina e 18 ki muʼa atu, ʼi tana Akonaki ʼi te Moʼuga, neʼe foaki e Sesu ki tana kau tisipulo te faʼifaʼitaki moʼo fakatafito kiai tanatou ʼu faikole. (Mateo 6:9-13) Lagi neʼe mole kau ai te tisipulo ʼi te temi ʼaia, koia ʼaki he agalelei, neʼe toe fakahā e Sesu te ʼu puani maʼuhiga ʼo te faikole faʼifaʼitaki ʼaia. ʼE lelei ke tou tokagaʼi, neʼe mole ina toe lau age te faikole, ʼo hā ʼaki mai neʼe mole ina tuku mai he faikole ke tou lau liuliuga kae mole kita mahino kiai. (Luka 11:1-4) Ohage ko te tisipulo ʼaia, ʼe tou loto mo tatou ke akoʼi tatou ke tou faikole, ke tou fakaōvi lelei kia Sehova ʼaki tatatou ʼu faikole. Koia tou vakaʼi te faʼifaʼitaki ʼaia ʼo te faikole, ʼaē neʼe tohi e te ʼapositolo ko Mateo. ʼE fai ai ia kole e fitu, ko kole e tolu ʼo ʼuhiga mo te ʼu fakatuʼutuʼu ʼa te ʼAtua pea ko kole e fā ʼo ʼuhiga mo te ʼu meʼa ʼaē ʼe ʼaoga kia kita ʼi te faʼahi fakasino pea mo fakalaumālie. ʼI te alatike ʼaenī, ʼe tou vakaʼi anai te ʼu ʼuluaki koga e tolu ʼo tana faikole.

Ko He Tāmai ʼOfa

3, 4. Koteā te faka ʼuhiga ʼo tatatou faikole kia Sehova ʼo tou ʼui ko “tamatou Tāmai”?

³ ʼI te kamata, neʼe fakahā e Sesu ʼe tonu ke hā ʼi tatatou ʼu faikole he felogoi lelei pea mo fakaʼapaʼapa mo Sehova. ʼI tana palalau tāfito ʼaē ki tana kau tisipulo ʼaē neʼe nonofo ōvi kia te ia ʼi te moʼuga ʼaia, neʼe ʼui age e Sesu kia nātou ke nātou faikole kia Sehova ʼo nātou ʼui ko “tamatou Tāmai ʼe ʼi selo.” (Mateo 6:9, MN ) Ohage ko tona ʼui e te tagata faitohi, tatau aipe pe neʼe palalau Sesu ʼi te lea faka Hepeleo peʼe ʼi te faka Alamea ʼaē neʼe palalau kiai te hahaʼi, kae ko te kupu ʼaē neʼe ina fakaʼaogaʼi ki te kupu “Tāmai” ʼe hage ko he ʼu palalau ‘ ʼe fai e he kiʼi tamasiʼi.’ Ko tatatou palalau ʼaē kia Sehova ohage ko tatatou Tāmai, ʼe hā ai tatatou felogoi lelei mo ia pea mo tatatou falala kia te ia.

⁴ ʼI tatatou ʼui ʼaē “tamatou Tāmai,” ʼe tou toe fakamoʼoni ai ʼe tou kau ki te toe famili lahi, tagata pea mo fafine, ʼe nātou ʼiloʼi ko Sehova te Matapuna ʼo te Maʼuli. (Isaia 64:8; Gaue 17:24, 28) Ko te kau Kilisitiano ʼaē neʼe fakanofo ʼaki te laumālie ʼe nātou liliu ko he ʼu “fanau a te Atua,” pea ʼe feala ke nātou “kalaga ake: Abba, Tamai!” (Loma 8:14, 15) Ko te ʼu lauʼi miliona hahaʼi kua nātou liliu ko honatou ʼu kaumeʼa agatonu. Neʼe nātou foaki tonatou maʼuli kia Sehova pea mo nātou papitema. Ko te “tahi ʼu ōvi” fuli ʼaia ʼe feala ke nātou fakaōvi kia Sehova ʼaki te huafa ʼo Sesu pea mo nātou palalau kia te Ia ʼo nātou ʼui ko “tamatou Tāmai.” (Soane 10:16, MN; 14:6) ʼE feala ʼi te temi fuli ke tou faikole ki tatatou Tāmai ʼaē ʼe ʼi selo moʼo fakavikiviki kia te ia, moʼo fakamālo ki tana lotoʼofa kia tatou, pea mo tuku age kia te ia totatou ʼu faigataʼaʼia, ʼo tou falala ʼe tokaga mai kia tatou.—Filipe 4:6, 7; 1 Petelo 5:6, 7.

Tou ʼOfa Ki Te Huafa ʼo Sehova

5. Koteā te ʼu ʼuluaki palalau ʼo te faikole ʼaē neʼe tuku mai ohage ko he faʼifaʼitaki, pea he koʼe ʼe lelei te faʼahi ʼaia?

⁵ ʼE fakahā ʼi te ʼu ʼuluaki palalau ʼo te faikole te meʼa ʼaē ʼe tonu ke tou fakamuʼamuʼa. ʼE ʼui fēnei: “Ke tāpuhā tou huafa.” (Mateo 6:9, MN ) Ei, ko te tāpuhā ʼo te huafa ʼo Sehova ʼe ko te faʼahi ʼaia ʼaē ʼe maʼuhiga tāfito kia tatou, heʼe tou ʼofa kia te ia pea ʼe mole tou leleiʼia te ʼu tuʼuga tukugakovi ʼaē ʼe fai ki tona huafa. Ko te agatuʼu ʼa Satana pea mo tana uga te ʼuluaki taumatuʼa ke nā talagataʼa kia Sehova ʼAtua, neʼe laukoviʼi ai te huafa ʼo Sehova he neʼe fakatupu te loto mahalohalo ʼo ʼuhiga mo tana pule faʼifaʼitaliha ʼi te ʼatulaulau. (Senesi 3:1-6) Pea talu mai te temi ʼaia, neʼe laukoviʼi te huafa ʼo Sehova ʼuhi ko te ʼu aga pea mo te ʼu akonaki fakaufiufi ʼa nātou ʼaē ʼe nātou lau ʼe nātou fakafofoga ia te ʼAtua.

6. Koteā ʼaē ka mole tou fai anai mo kapau ʼe tou faikole ke tāpuhā te huafa ʼo Sehova?

⁶ Ko tatatou faikole ʼaē ke tāpuhā te huafa ʼo Sehova ʼe ina fakahā ai ʼe tou lagolago katoa kia Sehova, ʼi te fihi ʼo ʼuhiga mo tana pule faʼitaliha ʼi te ʼatulaulau. ʼE loto e Sehova ke nofoʼi te kele pea mo te lagi e ni ʼu hahaʼi pea mo ni ʼu ʼaselo ʼe nātou lotolelei pea mo fiafia ʼi te fakalogo ki tana pule faitotonu, heʼe nātou ʼoʼofa kia te ia pea mo ʼoʼofa ki te ʼu meʼa fuli ʼaē ʼe pipiki ki tona huafa. (1 Fakamatala 29:10-13; Pesalemo 8:1; 148:13) Ko totatou ʼofa ki te huafa ʼo Sehova ʼe tokoni mai anai ke ʼaua naʼa tou fai he meʼa ʼe feala ke laukoviʼi ai te huafa taputapu ʼaia. (Esekiele 36:20, 21; Loma 2:21-24) Mai tona ʼaluʼaga ʼaē ko te tokalelei ʼo te lagi pea mo te kele pea mo nātou ʼaē ʼe nonofo ai ʼe fakalogo ki te tāpuhā ʼo te huafa ʼo Sehova pea mo tanatou fakalogo ki tana pule heʼe nātou ʼoʼofa kia te ia, koia ko tatatou faikole ʼaē “ke tāpuhā [tona] huafa” ʼe ko te fakahā ʼaia ʼo tatatou falala ʼe fakahoko anai te fakatuʼutuʼu ʼaē ke fakavikiviki ia Sehova.—Esekiele 38:23.

Te Puleʼaga ʼAē ʼe Tou Faikole Kiai

7, 8. (a) Koteā te Puleʼaga ʼaē neʼe akoʼi mai e Sesu ke tou faikole kiai? (b) Koteā ʼaē ʼe tou ako ʼo ʼuhiga mo te Puleʼaga ʼaia ʼi te tohi ʼa Taniela pea mo ʼa te Apokalipesi?

⁷ Ko te lua faʼahi ʼaenī ʼaē ʼe tou faikole kiai: “Ke hoko mai tou puleʼaga.” (Mateo 6:10, MN ) ʼE ʼi ai te pikipikiga ʼo te ʼu palalau ʼaia pea mo te ʼu ʼuluaki palalau ʼo te faikole ʼaē neʼe tou vakaʼi ki muʼa atu. Ko te meʼa gāue ʼaē ka fakaʼaogaʼi e Sehova moʼo tāpuhā tona huafa taputapu ʼe ko te Puleʼaga Faka Mesianike, tona puleʼaga ʼaē ʼe ʼi selo, ʼaē neʼe fakanofo ai ke Hau ia Sesu Kilisito tona ʼAlo. (Pesalemo 2:1-9) ʼI te lea faka polofeta ʼa Taniela, ʼe fakatātā te Puleʼaga Faka Mesianike ki he “foʼi maka” ʼe faka mahuʼi mai te “moʼuga.” (Taniela 2:34, 35, 44, 45) ʼE fakatātā e te moʼuga te pule faʼifaʼitaliha ʼa Sehova ʼi te ʼatulaulau, pea ko te foʼi maka, ʼaē ʼe ina fakatātā ia te Puleʼaga, ʼe ko te fakatuʼutuʼu foʼou ʼaia ʼo te pule ʼa Sehova ʼi te ʼatulaulau. Ki muli age, ʼi te lea faka polofeta, ko te foʼi maka, ‘ ʼe liliu ko te moʼuga lahi pea ʼe ina fakafonu te kele katoa,’ pea ʼe fakahā ai ko te Puleʼaga Faka Mesianike ʼe ina fakafofoga anai te pule faʼitaliha ʼa te ʼAtua ʼi tana puleʼi te kele.

⁸ ʼE fakatahi kia Kilisito ʼi te Puleʼaga ʼaia ia te toko 144 000, “neʼe totogi mai te kele” ke nātou kaugā hau pea mo pelepitelo mo ia. (Apokalipesi 5:9, 10; 14:1-4, MN; 20:6) ʼE ʼui e Taniela ko nātou ʼaia, ʼe ko “te kau maʼoniʼoni ʼa te ʼAtua Māʼoluga” ʼaē ʼo fakatahi mo Kilisito, tonatou Pule, ʼe nātou maʼu “te puleʼaga, pea mo te pule, pea mo te maʼuhiga lahi ʼo te ʼu puleʼaga ʼi te lalo lagi . . . Ko tonatou puleʼaga ʼe ko he puleʼaga ʼe mole ʼiloʼi anai hona gataʼaga, pea ko te ʼu pule fuli ʼe nātou tauhi anai pea mo fakalogo anai kia nātou.” (Taniela 7:13, 14, 18, 27) Ko te puleʼaga ʼaia ʼo selo ʼaē neʼe akoʼi e Kilisito ki tana kau tisipulo ke nātou faikole kiai.

He Koʼe ʼe Tou Haga Faikole Ke Hoko Mai Te Puleʼaga?

9. He koʼe ʼe lelei ke tou faikole ke hoko mai te Puleʼaga ʼa te ʼAtua?

⁹ ʼI te faikole ʼaē neʼe tuku mai e Kilisito, neʼe ina akoʼi mai kia tatou ke tou faikole ke hoko mai te Puleʼaga ʼo te ʼAtua. Ko te ʼu lea faka polofeta ʼo te Tohi-Tapu ʼaē kua hoko, ʼe hā ʼaki mai kua fakatuʼu te Puleʼaga Faka Mesianike ʼi selo ʼi te taʼu 1914.a Koia ʼe kei lelei koa ke tou haga faikole ke “hoko” mai te Puleʼaga ʼaia? Ei. Heʼe ʼi te lea faka polofeta ʼa Taniela, ko te Puleʼaga Faka Mesianike, ʼaē ʼe fakatātā e te foʼi maka, ʼe fakafeagai ki te ʼu puleʼaga faka politike, ʼaē ʼe fakatā ki he fakatātā lahi. Ko te foʼi maka ʼaia ʼe ina tāʼi anai te fakatātā pea mo ina laliki. ʼE ʼui fēnei e te lea faka polofeta ʼa Taniela: “Ko te puleʼaga ʼaia ʼe mole tuku anai ki he tahi hahaʼi. ʼE ina laliki anai pea mo fakagata anai te ʼu puleʼaga fuli ʼaia, pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi honatou gataʼaga.”—Taniela 2:44.

10. He koʼe ʼe tou fakaʼamu ke hoko mai te Puleʼaga ʼo te ʼAtua?

¹⁰ ʼE tou fakaʼamu ke tou sio ki te hoko mai ʼo te Puleʼaga ʼo te ʼAtua moʼo fakaʼauha te tuʼu agakovi ʼa Satana, heʼe tāpuhā ai anai ʼi te temi ʼaia te huafa taputapu ʼo Sehova pea mo pulihi ai anai ia nātou fuli ʼaē ʼe agatuʼu ki te pule faʼitaliha ʼa te ʼAtua. ʼE tou faikole fakamalotoloto fēnei: “Ke hoko mai tou puleʼaga,” pea mo tou ʼui ohage ko te ʼapositolo ko Soane: “Ameni, haele mai Aliki Sesu!” (Apokalipesi 22:20) Ei, ʼofa pe ke haʼele mai ia Sesu ʼo faka tāpuhā te huafa ʼo Sehova pea mo fakahoko te lagavaka ʼo Tana pule faʼitaliha, ke hoko ai te ʼu palalau ʼaenī ʼa te tagata fai pesalemo: “Ke nātou ʼiloʼi ko koe, ʼaē ko tou huafa ko Sehova, ko koe tokotahi pe, te Māʼoluga ʼAupito ʼi te kele katoa.”—Pesalemo 83:18.

“Ke Fai Tou Finegalo”

11, 12. (a) Koteā ʼaē ʼe tou kole mokā tou faikole ke “fai [te] finegalo [ʼo te ʼAtua] ʼi te kele, ohage ko selo”? (b) Koteā ʼaē ʼe toe faka ʼuhiga kiai tatatou faikole ʼaē ke fai te finegalo ʼo Sehova?

¹¹ Ki muli age, neʼe akoʼi e Sesu ki tana ʼu tisipulo ke nātou faikole fēnei: “Ke fai tou finegalo ʼi te kele, ohage ko selo.” (Mateo 6:10, MN ) Neʼe fakatupu ia meʼa fuli ʼuhi he neʼe ko te finegalo ʼaia ʼo Sehova. Neʼe kalaga fēnei ia te kau ʼaselo mālolohi: “E ke taau, Aliki tomatou Atua, ke ke tali te kololia, mo te fakaapaapa pea mo te mafimafi, koteuhi nee ke fakatupu ia meafuape, pea nee ke finegalo ke natou mauli pea nee fakatupu ai natou.” (Apokalipesi 4:11) ʼE ʼi ai te fakatuʼutuʼu ʼa Sehova maʼa “te ʼu meʼa ʼaē ʼi te lagi pea mo te ʼu meʼa ʼaē ʼi te kele.” (Efeso 1:8-10, MN ) ʼI tatatou kole ʼaē ke fai te finegalo ʼo te ʼAtua, ʼe tou kole ai kia Sehova ke ina fakahoko tana fakatuʼutuʼu. Tahi ʼaē meʼa, ʼe tou fakahā ai e tou fia sisio ki te fakahoko ʼo te finegalo ʼo te ʼAtua ʼi te ʼatulaulau.

¹² ʼAki te faikole ʼaia, ʼe tou toe fakahā ʼe tou tali ke ʼalutahi totatou maʼuli pea mo te finegalo ʼo Sehova. Neʼe ʼui fēnei e Sesu: “Ko taku meakai e ko taku fai te finegalo o ia ae nee ina fekaui au pea mo au fakakatoa tana gaue.” (Soane 4:34) Ohage ko Sesu ko tatou kau Kilisitiano ʼe tou fiafia ʼi te fai ʼo te finegalo ʼo te ʼAtua, heʼe kua tou foaki totatou maʼuli kia te ia. Ko tatatou ʼofa kia Sehova pea mo tona ʼAlo ʼe ina uga tatou ke mole tou maʼuʼuli “o fai ki te u holi fakatagata, kae [ke tou] mauli o fai ki te finegalo o te Atua.” (1 Petelo 4:1, 2; 2 Kolonito 5:14, 15) ʼE tou faiga ke ʼaua naʼa tou fai he ʼu meʼa ʼe tou ʼiloʼi ʼe mole ʼalutahi mo te finegalo ʼo Sehova. (1 Tesalonika 4:3-5) Kapau ʼe tou fakaʼaogaʼi totatou temi moʼo lau te Tohi-Tapu pea mo ako, pea ʼe tou “mahino pe kotea te finegalo o [“Sehova,” MN ],” ʼaē ʼe kau kiai tatatou ʼolo ʼo faka mafola ia “te Logolelei aeni o te Puleaga.”—Efeso 5:15-17; Mateo 24:14.

Te Finegalo ʼo Sehova ʼi Selo

13. Neʼe kua hoko feafeaʼi ia te finegalo ʼo te ʼAtua kae heʼeki agatuʼu ia Satana?

¹³ Neʼe kua fai te finegalo ʼo Sehova ʼi selo ʼi te ʼu temi ki muʼa atu kae heʼeki agatuʼu tona tahi foha ʼi te kau ʼaselo, ʼo liliu ko Satana. Ia Tāʼaga Lea ʼe fakatātā te ʼAlo ʼuluaki tupu ʼo te ʼAtua ki te poto. ʼE fakahā ai, lolotoga te temi loaloaga, ko te ʼAlo ʼulu tokotahi ʼo te ʼAtua neʼe “fiafia ʼi ʼona muʼa ʼi te temi fuli pe,” neʼe fiafia ʼi te fai ʼo te finegalo ʼo tana Tāmai. Ki muli age, neʼe liliu ko te “tufuga faiva” ʼa Sehova moʼo fakatupu ia meʼa fuli pe “i selo mo te kelekele, ia mea e ha pea mo mea e lilo.” (Tāʼaga Lea 8:22-31; Kolose 1:15-17) Neʼe fakaʼaogaʼi e Sehova ia Sesu ohage ko tana Folafola, peʼe ko tana Tagata ʼAve Folafola.—Soane 1:1-3.

14. Koteā ʼaē ʼe feala ke tou ako ʼi te Pesalemo 103 ʼo ʼuhiga mo te fakahoko e te kau ʼaselo te finegalo ʼo Sehova ʼi selo?

¹⁴ ʼE fakahā e te tagata fai pesalemo ko te pule faʼitaliha ʼa Sehova ʼe māʼoluga ia meʼa fuli, pea ko te kau ʼaselo fuli ʼe nātou fakalogo ki tana ʼu palalau pea mo tana ʼu fakatotonu. ʼE tou lau fēnei: “Ko Sehova totonu kua ina fakatuʼu tona hekaʼaga faka hau ʼi selo; pea ko tona ʼuhiga hau neʼe pule kia meʼa fuli. Koutou tapuakiʼi ia Sehova, ia koutou ʼaē ko tana kau ʼaselo, ʼaē ʼe lahi ʼi te mālohi, ʼaē ʼe koutou fakahoko tana folafola, ʼo koutou fakalogo ki te leʼo ʼo tana folafola. Koutou tapuakiʼi ia Sehova, ia koutou fuli ko tana ʼu kautau, ia koutou ko tana ʼu minisi, ʼaē ʼe koutou fai tona finegalo. Koutou tapuakiʼi ia Sehova, ia koutou fuli ʼaē ko tana ʼu gāue, ʼi te ʼu potu fuli ʼaē ʼe ina puleʼi [peʼe ʼo tana pule faʼitaliha].”—Pesalemo 103:19-22.

15. ʼI te temi ʼaē neʼe fakanofo ai Sesu ʼi te Puleʼaga, neʼe fakahoko feafeaʼi te finegalo ʼo te ʼAtua ʼi selo?

¹⁵ ʼI te hili ʼo tana agatuʼu, neʼe kei feala pe kia Satana ke hū ki selo, ohage ko tona fakahā ʼi te tohi ʼo Sopo. (Sopo 1:6-12; 2:1-7) Kae neʼe fakakikite e te tohi ʼo Apokalipesi ʼe ʼi ai te temi ko Satana mo tana kau temonio ʼe kapu anai ia nātou mai selo. Neʼe hoko te temi ʼaia ʼi te ʼosi fakanofo ʼo Sesu Kilisito ki te Puleʼaga ʼi te taʼu 1914. Talu mai ai, ʼe mole kei lava hū te kau agatuʼu ʼaia ki selo. Neʼe lī ifo ia nātou ki te kele. (Apokalipesi 12:7-12) ʼI selo, ʼe mole kei ʼi ai he tahi ʼe ina fakafihiʼi te pule ʼa Sehova, kae ʼe tou logo pe ki he ʼu leʼo ʼe nātou fakavikiviki ki “te Akeno,” ia Sesu Kilisito, pea mo Sehova. (Apokalipesi 4:9-11) Kua hoko moʼoni te finegalo ʼo Sehova ʼi selo.

Te Finegalo ʼo Sehova ʼi Te Kele

16. He koʼe ʼe mole ʼalutahi te faikole ʼaē neʼe akoʼi mai e Sesu pea mo te akonaki ʼa te Keletiate ʼo ʼuhiga mo te ʼamanaki ʼa te hahaʼi?

¹⁶ Ko te ʼu lotu ʼo te Keletiate ʼe nātou ʼui ʼe mole he fakatuʼutuʼu ʼa te ʼAtua maʼa te kele, heʼe ʼolo fuli anai te hahaʼi agalelei ki selo. Kae neʼe akoʼi mai e Sesu ke tou faikole fēnei: “Ke hoko mai tou puleʼaga. Ke fai tou finegalo ʼi te kele, ohage ko selo.” (Mateo 6:10, MN ) Ko tona faka ʼuhiga koa ʼe lolotoga hoko ia ʼaho nei te finegalo ʼo Sehova ʼi te kele, ʼaē kua fonu ʼi te agamālohi, mo te heʼe faitotonu, mo te mahaki pea mo te mate? Kailoa ia! ʼE tonu ke tou faikole fakamalotoloto ke fai te finegalo ʼo te ʼAtua ʼi te kele, ohage ko te fakapapau ʼaē neʼe tohi e te ʼapositolo ko Petelo: “O hage ko tana fakapapau, e tou amanaki ki he lagi foou [te Puleʼaga Faka Mesianike ʼaē ʼe pule ai Sesu] mo he kele foou [te sosiete fakatagata faitotonu], e mauli i ai te susitisia.”—2 Petelo 3:13.

17. Koteā te fakatuʼutuʼu ʼa Sehova ki te kele?

¹⁷ Neʼe ʼi ai te fakatuʼutuʼu ʼa Sehova ʼi tana fakatupu te kele. Neʼe ina takitaki te polofeta ko Isaia ke ina tohi fēnei: “Koʼeni te meʼa ʼaē neʼe ʼui e Sehova, ia Ia ʼaē neʼe ina fakatupu te lagi, Ia ia ʼaē ko te ʼAtua moʼoni, ʼaē neʼe ina faʼufaʼu te kele pea mo ina fakatupu, Ia ia ʼaē neʼe ina fakatuʼu ʼo mālohi, Ia ia ʼaē neʼe mole ina fakatupu noa, neʼe ina faʼu ke nofoʼi: ‘Ko ʼau Sehova, pea ʼe mole he tahi age.’ ” (Isaia 45:18) Neʼe fakanofo e te ʼAtua te ʼuluaki taumatuʼa ki te ʼōloto faka palatiso, pea neʼe ina fakatotonu fēnei kia nāua: “Koulua fanaunau, pea koulua liliu ʼo hahaʼi, pea koulua fakafonu te kele, pea koulua puleʼi.” (Senesi 1:27, 28; 2:15) ʼE hā lelei mai, ko te fakatuʼutuʼu ʼa totatou Tupuʼaga ko Sehova, ke nofoʼi te kele e ni ʼu hahaʼi faitotonu mo haohaoa, ʼe nātou fakalogo fakafiafia ki tana pule faʼitaliha pea mo maʼuʼuli ʼo heʼegata ʼi te Palatiso ʼaē neʼe fakapapauʼi mai e Kilisito.—Pesalemo 37:11, 29; Luka 23:43.

18, 19. (a) Koteā ʼaē ʼe tonu ke fai ʼi muʼa ʼo te fakahoko katoa ʼo te finegalo ʼo te ʼAtua ʼi te kele? (b) Koteā te tahi ʼu faʼahi ʼo te faikole ʼaē neʼe akoʼi mai e Sesu ʼe tou vakaʼi anai ʼi te alatike ka hoa mai?

¹⁸ ʼE mole feala anai ke fakahoko katoa te finegalo ʼo Sehova ʼi te kele mo kapau ʼe kei nofoʼi te kele e te ʼu hahaʼi ʼaē ʼe nātou fakafisi ki tana pule faʼitaliha. ʼAki te ʼu kautau ʼaselo mālolohi ʼaē ʼe nātou fakalogo ki te takitaki ʼa Kilisito, ko te ʼAtua ʼe ina ‘fakaʼauha anai te hahaʼi ʼaē ʼe nātou maumauʼi te kele.’ Ko te tuʼu agakovi katoa ʼa Satana, ʼaki te lotu hala, mo te ʼu kautahi faka politike kākā, mo te ʼu kautahi faifakatau ʼaē ʼe mānumānu pea mo heʼe faitotonu, pea mo te ʼu kautau solia, ʼe fakaʼauha anai nātou ʼo talu ai. (Apokalipesi 11:18; 18:21; 19:1, 2, 11-18) ʼE faka lākatonuʼi anai te pule faʼitaliha ʼa Sehova pea mo tāpuhā tona huafa. ʼE tou faikole ki te ʼu meʼa fuli ʼaia ʼi tatatou ʼui fēnei: “Ko tamatou Tāmai ʼe ʼi selo, ke tāpuhā tou huafa! Ke hoko mai tou puleʼaga. Ke fai tou finegalo ʼi te kele, ohage ko selo.”—Mateo 6:9, 10, MN.

¹⁹ Kae ʼi te faikole ʼaē neʼe tuku mai e Sesu, neʼe ina fakahā ʼe feala ke tou toe faikole ʼo ʼuhiga mo he ʼu meʼa ʼe ʼaoga kia tatou. ʼE tou vakaʼi anai te ʼu faʼahi ʼaia ʼo te faikole ʼi te alatike ʼaē ka hoa mai.

[Kiʼi nota]

Moʼo Fakamanatu

• He koʼe ʼe lelei ke tou faikole kia Sehova ʼo tou ʼui ko “tamatou Tāmai”?

• He koʼe ʼe maʼuhiga tāfito ke tou faikole ke tāpuhā te huafa ʼo Sehova?

• He koʼe ʼe tou faikole ke hoko mai te Puleʼaga ʼo te ʼAtua?

• Koteā te faka ʼuhiga ʼo tatatou faikole ke fai te finegalo ʼo te ʼAtua ʼi te kele ohage ko selo?

[Paki ʼo te pasina 9]

Ko te ʼu faikole ʼa Sesu neʼe kehekehe ʼaupito mo te ʼu faikole ʼa te kau Faliseo, ʼaē neʼe lahi fau tanatou fia hā ʼe nātou faitotonu

[Paki ʼo te pasina 10]

ʼE faikole te kau Kilisitiano ke hoko mai te Puleʼaga ʼo te ʼAtua, ke tāpuhā tona huafa, pea ke fai tona finegalo