Te ʼu Fehuʼi ʼa Te Kau Lautohi

Neʼe ʼi ai te ʼu taʼu, neʼe fakahā ai e te ʼu tānaki ʼe kua tokosiʼi ia nātou ʼaē ʼe nātou kai te pane pea mo ʼinu te vino ʼi te ʼAho Fakamanatu. Ko tona faka ʼuhiga koa ʼe lahi te ʼu hahaʼi foʼou ʼe fakanofo ʼaki te laumālie maʼoniʼoni?

ʼE ʼi ai te tupuʼaga tāfito ʼo tatatou faka tui ko te toko 144 000 kau Kilisitiano fakanofo kua katoa talu mai te ʼu sēkulō.

Ia Gāue 2:​1-4, ʼe tou lau ʼo ʼuhiga mo te ʼu ʼuluaki hahaʼi ʼo te kūtuga ʼaia: “Pea ʼi te hoko mai ʼo te ʼaho ʼo te Penikosite, neʼe nātou nonofo fakatahi ʼi te koga meʼa pe e tahi, pea fokifā pe kua logo ifo te logoaʼa mai te lagi ohage ko te logoaʼa ʼo he tuʼani matagi mālohi, pea neʼe ina fakafonu te fale ʼaē neʼe nātou nonofo ai. Pea neʼe hā kia nātou te ʼu ʼalelo ohage ko he afi pea neʼe mavetevete ʼo nofo ia nātou takitokotahi, pea neʼe nātou fonu fuli ʼi te laumālie maʼoniʼoni pea neʼe nātou kamata palalau ʼi te ʼu lea kehekehe, ʼo mulimuli pe ki te ʼu meʼa ʼaē neʼe tuku age e te laumālie.”

ʼOsi ʼaia, pea neʼe fili e Sehova te tahi ʼu hahaʼi, pea neʼe ina fakanofo nātou ʼaki tona laumālie maʼoniʼoni. Neʼe toe hilifaki kia nātou ʼaia te ʼu lauʼi afe hahaʼi ʼi te kamata ʼo te Lotu Faka Kilisitiano. ʼI te fai ʼo te ʼAho Fakamanatu ʼi totatou temi, ʼe fakatokagaʼi tāfito mai kia tatou e te tēhina ʼaē ʼe ina fai te akonaki, te ʼu palalau ʼa Paulo ia Loma 8:​15-​17, ʼaē ʼe talanoa ai ki te kau fakanofo ʼaē neʼe nātou ‘maʼu te laumālie moʼo vavae ʼo nātou ohage ko he ʼu foha.’ Neʼe toe ʼui e Paulo ko te laumālie maʼoniʼoni ʼaia ʼe nātou maʼu ‘ ʼe ina fakamoʼoni mo tonatou laumālie ko nātou ko te ʼu fānau ʼa te ʼAtua, ʼo nātou maʼu fakatahi mo Kilisito te tofiʼa.’ ʼE kua ʼiloʼi papau te faʼahi ʼaia e nātou ʼaē ʼe fakanofo e te laumālie. ʼE mole ko he ʼamanaki ʼe nātou maʼu feiā pe peʼe ko he fakakaukau ʼe mole moʼoni neʼe tupu ʼi tonatou loto.

Kua tou mahino ai ko te pāui ʼaia ki selo neʼe hoko ʼi te ʼu sēkulō, māʼia mo te temi ʼaē neʼe fakahigoaʼi ko te Moyen Âge, neʼe lagi tokosiʼi ai te kau fakanofo.a ʼAki te toe fakatuʼu ʼo te Lotu Faka Kilisitiano moʼoni ʼi te teitei fakaʼosi ʼo te sēkulō ʼaē kua hili, ko te tokolahi ia nātou neʼe pāui pea mo fili. Kae ʼe hage ʼi te vaelua ʼo te ʼu taʼu 1930, neʼe kua katoa te toko 144 000. Koia neʼe kamata hā ai te kūtuga ʼo te kau Kilisitiano agatonu ʼaē ʼe nātou ʼamanaki ke nātou maʼuʼuli ʼi te kele. Neʼe fakahigoaʼi nātou e Sesu ko “te tahi ʼu ōvi,” ʼaē ʼe logo tahi ʼi te tauhi mo te kau fakanofo ʼo nātou liliu ko he faga ōvi e tahi.​—Soane 10:14-​16.

Lolotoga te ʼu taʼu e hogofulu ʼaē kua hili neʼe hā ai kua ʼosi te pāui ʼa te kau fakanofo, pea ʼe tapuakiʼi e Sehova te tuputupu ʼo te “toe hahaʼi tokolahi,” ʼaē ʼe ʼamanaki ke nātou hāo ʼi “te mamahi lahi.” (Fakahā 7:​9, 14) Ohage la, ʼi te ʼAho Fakamanatu ʼo te taʼu 1935, neʼe ko te toko 63 146 neʼe kau ki te toʼotoʼoga ʼaia, pea ko nātou ʼaē neʼe nātou fakaʼaogaʼi te pane mo te vino, neʼe ko te kau fakanofo e toko 52 465. ʼI te ʼu taʼu e tolugofulu ki muli mai, peʼe ʼi te taʼu 1965, neʼe ko te toko 1 933 089 hahaʼi ʼaē neʼe kau ki te toʼotoʼoga ʼaia pea neʼe tokosiʼi ia nātou ʼe nātou kai te pane mo ʼinu te vino, he neʼe ko te toko 11 550. ʼO aʼu mai ki te temi ʼaenī, ʼi te taʼu 1995 neʼe ko te toko 13 147 201 hahaʼi ʼaē neʼe kau ki te fakamanatu ʼaia kae neʼe ko te toko 8 645 ʼaē neʼe nātou kai te pane mo ʼinu te vino. (1 Kolonito 11:23-​26) ʼE hā lelei ai, ohage pe ko te ʼu taʼu e hogofulu ʼaē kua hili, ʼe kua tokosiʼi te toe ʼo te kau fakanofo​—ʼi te taʼu 1935 neʼe teitei toko 52 400; ʼi te taʼu 1965 neʼe ko te toko 11 500; ʼi te taʼu 1995 neʼe ko te toko 8 600. Kae, neʼe tapuakina ia nātou ʼaē ʼe nātou maʼu te ʼamanaki ke nātou maʼuʼuli ʼi te kele, pea ʼe tuputupu ʼaupito ia nātou ʼo kaugamālie.

Ko te tānaki fakamuli ʼo te ʼAho Fakamanatu, neʼe koia ʼaē neʼe fai ʼi te taʼu 1995, pea neʼe hā ai ko te toko 28 neʼe hilifaki ki te tānaki ʼaia, ʼo laka age ʼi te tānaki ʼo te taʼu ki muʼa atu logope la te kua tokosiʼi moʼoni ia nātou ʼaē ʼe nātou fakaʼaogaʼi te pane mo te vino, ʼaē ʼe nātou kau ki te toʼotoʼoga ʼaia. Kae, ʼe mole tonu ke tou lotohoha, mo kapau kua toe laka age ia nātou ʼaē ʼe nātou kai te pane pea mo ʼinu te vino. ʼI te lolotoga ʼo te ʼu taʼu kua hili, māʼia mo nātou ʼaē neʼe hoki papitema, neʼe nātou kai te pane pea mo ʼinu te vino. Kae ko te tokolahi ʼo nātou ʼaia, ʼaki te temi, neʼe nātou mahino ai neʼe nātou faihala. Ko ʼihi neʼe nātou fakamoʼoni neʼe nātou fai te faʼahi ʼaia, he neʼe hoha tonatou loto pea mo tanatou fakakaukau. Ki muli mai neʼe mahino ai kia nātou neʼe mole pāui nātou ki te maʼuli ʼaē ʼi selo. Neʼe nātou kole ai ke fakamolemole age e te ʼAtua te meʼa ʼaē neʼe nātou fai. Pea ʼe hoko atu tanatou tauhi fakalelei kia te ia ʼi tonatou ʼuhiga Kilisitiano agatonu, ʼaki te ʼamanaki ʼaē ke nātou maʼuʼuli ʼo heʼegata ʼi he faʼahi ʼe lelei.

ʼE mole ʼaoga ke tou tuʼania mo kapau ʼe kamata kai he tahi ki te pane pea mo ʼinu te vino peʼe mole kei ina fai te faʼahi ʼaia. ʼE mole ʼa tatou te ʼui pe neʼe fili he tahi ʼaki te laumālie maʼoniʼoni pea mo pāui ki te maʼuli ʼaē ʼi selo peʼe kailoa. ʼE fakamanatuʼi mai e te fakapapau mālohi ʼa Sesu: “Ko ʼau ko te tagata tauhi ōvi agalelei, pea ʼe ʼau ʼiloʼi taku ʼu ōvi.” Ohage ko tona fakamoʼoni ʼaenī, ʼe ʼiloʼi e Sehova ia nātou ʼaē neʼe ina fili ko tona ʼu foha fakalaumālie. Ko te tupuʼaga la ʼaia ʼo tatatou faka tui ko te toe ʼo te kau fakanofo ʼe toe hoko atu anai tona fakaʼaluʼalu ʼo tokosiʼi, pea ʼe fakaʼosi anai tonatou maʼuli ʼi te kele, he kua nātou matutuʼa pea ʼe hoko fakafokifā te ʼu meʼa kia nātou. Kae, tatau aipe peʼe nofo agatonu te kau fakanofo ʼaia ʼo aʼu ki tonatou mamate, ke feala ai hanatou maʼu te pale ʼo te maʼuli, ko te tahi ʼu ōvi ʼaē neʼe nātou fakamaʼa ʼonatou ʼu kofu ʼi te taʼataʼa ʼo te Akeno, ʼe feala ke nātou ʼamanaki ʼe nātou hāo anai ʼi te mamahi lahi ʼaē kua vave hoko mai.​—2 Timoteo 4:​6-8; Fakahā 2:​10.

[Kiʼi nota ʼi te lalo pasina]