Neʼe Nātou Fai Te Finegalo ʼo Te ʼAtua

Neʼe Ina Kumi He ʼOhoana Maʼa Isaake

KUA gaʼegaʼe ʼaupito te matuʼa ʼaē ʼe heka ōvi ki te vai keli. Neʼe fagona mo tana ʼu tagata kaugana pea mo tana ʼu kamelo e hogofulu mai te ʼu tafaʼaki ʼo te kolo ʼo Pelesepa, ki te potu tokelau ʼo Mesopotamia​—ko tona vaha mamaʼo ʼe ko kilometa e 800.a ʼI tanatou kaku ki te potu ʼaē neʼe tonu ke nātou ʼolo kiai, neʼe mānava te tagata ʼaia kua gaʼegaʼe pea neʼe ina fakakaukauʼi te gāue faigataʼa ʼaē neʼe tuku age ki ai. Neʼe ko ai koa te tagata ʼaia, pea he koʼe neʼe ina fai te fagona faigataʼa ʼaia?

Ko te tagata ʼaia neʼe ko te tagata kaugana ʼa Apalahamo, “te tagata ʼaē kua matuʼa ʼi tona loto fale.” (Senesi 24:2) Logope la ʼe mole fakahā mai tona higoa ʼi te fakamatala ʼo te Tohi-Tapu, kae ko te tagata ʼaia neʼe lagi ko Eliesele, ʼaē neʼe ʼui e Apalahamo ʼo ʼuhiga mo ia ʼe ko ‘hona foha ʼi tana hahaʼi,’ pea neʼe kua fakatuʼutuʼu ke ina ‘maʼu tona ʼu koloā.’ (Senesi 15:​2, 3) ʼE mahino papau ia, neʼe fai e Apalahamo te ʼu palalau ʼaia ʼi te temi ʼaē neʼe mole heʼeki nā maʼu fānau ai mo Sala. ʼI te temi ʼaia, neʼe kua taʼu 40 tanā tama ko Isaake, pea logope la ko Eliesele neʼe mole kei feala ke ina maʼu te ʼu koloā ʼa Apalahamo, kae neʼe kei kaugana aipe kia te ia. Koia, neʼe fakalogo kia Apalahamo ʼi te temi ʼaē neʼe ina kole age ai kia ia te meʼa faigataʼa. Neʼe koteā koa te meʼa ʼaia?

Ko He Gāue Faigataʼa

ʼI te temi ʼo Apalahamo, ko he fai ʼohoana neʼe kau kiai te famili katoa, pea mo te telepi katoa, peʼe ko te hahaʼi ʼo te Pateliaka. Koia ʼi te agaʼi fenua, neʼe ko te ʼu mātuʼa ʼaē neʼe nā filifili te ʼu ʼohoana ʼo tanatou ʼu fānau. Kae ʼi tana kumi ʼohoana maʼa tona foha ko Isaake, neʼe tau ia Apalahamo mo te fihifihia. Neʼe mole feala ke nātou ʼohoana mo te ʼu taʼahine Kanaane, he neʼe nātou fai te ʼu aga ʼe mole lelei kia mata ʼo te ʼAtua. (Teutalonome 18:​9-​12) Pea logope la neʼe ko he agaʼi fenua ke ʼohoana he tagata mo he fafine ʼo tona telepi totonu, kae ko te ʼu kāiga ʼo Apalahamo neʼe nātou nonofo mamaʼo ia kilometa ʼe lauʼi teau ʼi te potu tokelau ʼo Mesopotamia. Neʼe mole feala ke ina fekauʼi ia Isaake ke ʼalu ʼo nofo ʼi te potu ʼaia, koteʼuhi he neʼe fakapapau e Sehova kia Apalahamo: “Ki tou hāko ʼe ʼau foaki anai te fenua ʼaenī,” ʼaē ko Kanaane. (Senesi 24:7) Koia, neʼe ʼui ai e Apalahamo kia Eliesele: “ ʼAlu ki toku fenua pea mo toku ʼu kāiga, pea ʼe tonu anai ke ke fili he ʼohoana maʼa toku foha, maʼa Isaake.”​—Senesi 24:4.

ʼI te kua ʼosi ʼo tana fagona, neʼe mālōlō ia Eliesele ʼo ōvi ki te vai keli, ʼo ina fakakaukauʼi te gāue ʼaē neʼe fekauʼi kiai. Neʼe ina ʼiloʼi kua vave ʼōmai te ʼu fafine ki te vai keli ʼo ōhu vai ki te afiafi. Koia neʼe ina kole ai kia Sehova: “Ko te taʼahine ʼaē ʼe ʼau ʼui anai ki ai, ‘Fakalelei tou loto, tuku ki lalo tou ipu maka, ke feala haku ʼinu,’ pea mo ina ʼui moʼoni anai, ‘ ʼInu, pea ʼe ʼau faka ʼinu anai mo tau ʼu kamelo,’ ʼe ko te taʼahine ʼaia ʼaē ʼe tonu ke ke foaki ki tau kaugana, kia Isaake; pea ʼaki te faʼahi ʼaia, fakaʼilo mai kia te ʼau neʼe ke fakahā he ʼofa agatonu ki toku ʼaliki.”​—Senesi 24:14.

ʼI te temi ʼaē neʼe kei faikole ai, neʼe fakaōvi age ki ai te taʼahine finemui ko tona higoa ko Lepeka, pea neʼe ʼui age e Eliesele kia ia: “Fakalelei tou loto, foaki mai haku kiʼi moʼi vai ʼo tou ipu maka.” Neʼe fai e Lepeka te meʼa ʼaia, pea neʼe ina ʼui fēnei: “ ʼE ʼau ōhu anai mo he vai maʼa tau ʼu kamelo ʼo aʼu ki tanatou fiu.” Neʼe ko he agaʼofa lahi ʼaē neʼe ina fai, mai tona ʼaluʼaga ʼaē ʼe feala ke ʼinu e he kamelo te ʼu lite vai e 95 ʼi te ʼu minuta pe e hogofulu! Tatau aipe pe neʼe fia ʼiʼinu peʼe kailoa ia te ʼu kamelo ʼa Eliesele, kae ʼe mahino ia neʼe ʼiloʼi e Lepeka ko te gāue ʼaē ka ina fai ʼe kinakina ai anai. Koia, neʼe ina “foimo huaʼi tona ipu maka ki te meʼa ʼinu ʼo te ʼu manu, pea neʼe lele liuliuga ki te vai keli ʼo ōhu vai, pea neʼe ina haga ōhu te vai maʼa tana ʼu kamelo fuli.”​—Senesi 24:15-​20.

ʼI tana mahino neʼe ko Sehova ʼaē neʼe ina fakahoko te meʼa ʼaia, neʼe foaki ai e Eliesele kia Lepeka te foʼi hau aulo ki te ihu, pea mo te ʼu vesa aulo e lua, ko tonatou totogi ʼi te temi nei ʼe ko te 140 000. ʼI te ʼui age ʼaē e Lepeka ko ia ʼe ko te mokopuna ʼa Naole, te tēhina ʼo Apalahamo, neʼe fai ai e Eliesele tana kole fakafetaʼi ki te ʼAtua. Neʼe ina ʼui fēnei: “Neʼe takitaki ʼau e Sehova ki te ʼapi ʼo te ʼu tēhina ʼo toku ʼaliki.” (Senesi 24:22-​27) Neʼe ʼalu ai ia Eliesele ki te famili ʼa Lepeka. ʼAki te temi, neʼe liliu ia Lepeka ko te ʼohoana ʼo Isaake, pea neʼe ina maʼu te pilivilesio ʼaē ko te liliu ko he kui fafine ʼa te Mesia, ia Sesu.

Ko Te Ako Maʼa Tatou

Neʼe tapuakina e Sehova te ʼu faikole ʼaē neʼe fai e Eliesele ke ina maʼu he ʼohoana ʼo Isaake, ko he fafine ʼe manavasiʼi ki te ʼAtua. Kae, koutou manatuʼi ko te fai ʼohoana ʼa Isaake neʼe pipiki fakahagatonu ki te fakatuʼutuʼu ʼa te ʼAtua, ke ina fakatupu he hāko ʼaki ia Apalahamo. Koia, ʼaki te fakamatala ʼaenī ʼe mole tonu ke tou manatu, ko he tahi ʼe faikole ke ina maʼu hona ʼohoana ʼe ina maʼu faka milakulo anai te meʼa ʼaia. Kae kapau ʼe tou maʼuliʼi te ʼu pelesepeto ʼa Sehova, pea ʼe ina foaki mai anai kia tatou te mālohi ʼaē ʼe ʼaoga moʼo kātakiʼi ʼo te ʼu fihifihia ʼaē ʼe tau mo totatou maʼuli​—pe kua tou ʼohoana, peʼe kei tou selipatea.​—1 Kolonito 7:​8, 9, 28; vakaʼi ia Filipe 4:​11-​13.

Neʼe tonu kia Eliesele ke faiga mālohi moʼo fakahoko te ʼu meʼa ʼaē neʼe loto kiai ia Sehova. ʼE feala foki ke tou manatu ʼe mole ko he meʼa faigafua te mulimuli tuʼumaʼu ki te ʼu lekula ʼa Sehova. Ohage la, ʼe feala ke faigataʼa hatatou maʼu he gāue ʼe mole fakatupu kovi ki tatatou ʼu gāue faka teokalatike, peʼe ko he ʼohoana ʼe manavasiʼi ki te ʼAtua, peʼe ko he ʼu kaumeʼa ʼe nātou fakaloto mālohiʼi tatatou tui, pea mo he ʼu fakafiafia ʼe mole kovi. (Mateo 6:​33; 1 Kolonito 7:​39; 15:33; Efesi 4:​17-​19) Kae, ko Sehova ʼe feala ke tokoni kia nātou ʼaē ʼe nātou mulimuli lelei ki te ʼu pelesepeto ʼo te Tohi-Tapu. ʼE fakapapau fēnei e te Tohi-Tapu: “Falala kia Sehova ʼaki tou loto katoa, pea ʼaua naʼa ke falala ki tou ʼatamai ʼo koe totonu. ʼI tou ʼu ala fuli tokagaʼi ia ia, pea ko ia, ʼe ina fakatonutonu anai tou ʼu ala foufou.”​—Tāʼaga Lea 3:​5, 6.

[Nota ʼi te lalo pasina]