Te ʼu Fehuʼi ʼa Te Kau Lautohi

ʼI “Te Tule Leʼo” ʼo te ʼaho 15 ʼo ʼAukusito 1996, neʼe ʼui fēnei ai: “ ʼI te koga fakamuli ʼo te mamahi lahi, ko te ʼu ‘kakano’ ʼaē ka nātou feholaki kia Sehova, ʼe nātou hāo anai.” Ko tona faka ʼuhiga koa, ʼi te hili ʼo te ʼuluaki koga ʼo te mamahi lahi, ʼe lahi te hahaʼi foʼou ʼe nātou lagolago anai ki te ʼAtua?

Neʼe mole ko tona faka ʼuhiga ʼaia.

Ko te ʼu palalau ʼa Sesu ia Mateo 24⁠:22 ʼe hoko anai ʼi te temi ka haʼu, ʼuluaki ʼaki te hāofaki ʼo tana hahaʼi mai te ʼuluaki koga ʼo te mamahi lahi ʼaē ka hoko, ʼaē ko te fakaʼauha ʼo te ʼu lotu. Neʼe ʼui fēnei e te alatike: “Koutou manatuʼi, ko te ʼu ‘kakano’ ʼaia, te toe ʼo te kau fakanofo pea mo te ‘toe hahaʼi tokolahi,’ ʼe nātou hāo anai ʼi te tō fakavilivili pea mo katoa ʼo Papiloni Lahi ʼi te ʼuluaki koga ʼo te mamahi lahi.”

Kae ko te meʼa ʼaē ka fai e Sesu pea mo tana kautau ʼo te lagi ʼi te koga fakaʼosi ʼo te mamahi lahi, ʼe mole fakatupu tuʼutāmaki anai ki te kau agatonu ʼaia. Kae ko ai ʼaē ka hāo anai ʼi te koga ʼaia ʼo te mamahi lahi? ʼE ʼui ia Fakahā 7:​9, 14, ʼe hāo anai te toe hahaʼi tokolahi, ʼaē ko tonatou ʼamanaki ʼe ko te maʼuli ʼi te kele. Kae e feafeaʼi ki te kau Kilisitino fakanofo? “Ko Te ʼu Fehuʼi ʼa Te Kau Lautohi” ʼo Te Tule Leʼo Fakafalani ʼo te ʼaho 15 ʼo ʼAukusito 1990, neʼe ina fakahā pe koʼe ʼe mole feala hatatou tali fakahagatonu ʼo ʼuhiga mo te temi ʼaē ka ʼolo ai anai ki te lagi te toe ʼo te kau fakanofo. Koia, neʼe mole tali fakahagatonu e te alatike foʼou (ʼo te ʼaho 15 ʼo ʼAukusito 1996), kae neʼe ina ʼui fēnei: “ ʼO toe feiā aipe ʼi te koga fakamuli ʼo te mamahi lahi, ko te ʼu ‘kakano’ ʼaē ka nātou feholaki kia Sehova, ʼe nātou hāo anai.”

ʼO ʼuhiga mo te ʼiloʼi ʼaē peʼe feala ki ni hahaʼi foʼou ke nātou ʼiloʼi te moʼoni, pea ke nātou lagolago ki te ʼAtua ʼi te kua kamata ʼo te mamahi lahi, koutou tokagaʼi te ʼu palalau ʼa Sesu ia Mateo 24⁠:​29-31. ʼI te hoko ʼo te mamahi lahi, ʼe hā mai anai te fakaʼiloga ʼo te Foha ʼo te tagata. Neʼe ʼui e Sesu, ʼe tuki fatafata anai pea mo fetāgihi anai te ʼu telepi fuli ʼo te kele. Neʼe mole talanoa ia ʼo ʼuhiga mo he ʼu hahaʼi ʼe nātou mahino ki te ʼu meʼa ʼaē ʼe hoko, pea nātou fakahemala, mo nātou lagolago ki te ʼAtua, pea mo nātou liliu ai ko he ʼu tisipulo moʼoni.

ʼO toe feiā aipe ʼi te lea fakatātā ʼo te faga ōvi pea mo te faga tao, ʼe talanoa ai ki te Foha ʼo te tagata, pea ʼe ina fakamāuʼi te hahaʼi ʼo mulimuli pe ki te ʼu meʼa ʼaē neʼe nātou fai peʼe ko te ʼu meʼa ʼaē neʼe mole nātou fai ki muʼa atu. Neʼe mole talanoa ia Sesu ʼo ʼuhiga mo he ʼu hahaʼi ʼe kua fualoa tanatou maʼu te ʼu agaaga ʼo te ʼu tao, pea fokifā pe kua nātou tafoki ʼo liliu ko ni ʼu ōvi. ʼE haʼu ʼo fakamāu ʼo mulimuli pe ki te ʼu aga ʼaē kua fai e te hahaʼi.​—Mateo 25:31-​46.

Kae, ʼe mole tonu ke tou toe fai he tali fakahagatonu ki te puani ʼaia. Ko te hahaʼi ʼa te ʼAtua, te kau fakanofo pea mo te hahaʼi tokolahi, ʼe nātou ʼiloʼi pe koteā te meʼa ʼaē ʼe tonu ke nātou fai ʼi te temi ʼaenī​—ke nātou ʼolo ʼo faka mafola pea mo fai ni ʼu tisipulo. (Mateo 28:19, 20; Maleko 13:10) Ko te temi ʼaenī ʼaē ʼe tonu ai ke tou fakalogo ki te fakaloto mālohi ʼaenī: “ ʼI tamatou gāue fakatahi mo ia, ʼe mātou toe kole mamahi kia koutou ke ʼaua naʼa ʼalunoa takotou tali ia te ʼofa makehe ʼo te ʼAtua. Heʼe ina ʼui fēnei: ‘Neʼe ʼau fagono kia koe ʼi he temi faigamālie, pea ʼi te ʼaho ʼo te hāofaki neʼe ʼau tokoni kia koe.’ Koʼeni! Ko te temi ʼaenī ʼe ko te temi faigamālie. Koʼeni! Ko te temi ʼaenī ʼe ko te ʼaho ʼo te hāofaki.”​—2 Kolonito 6:​1, 2.