ʼE Tonu Koa Ke Tou Sio Ki He Milakulo Ke Tou Tui Ai Ki Te ʼAtua?

KO ALBERT neʼe taʼu 20 tupu ʼi te temi ʼaē neʼe ina kamata kumi ai te ʼAtua. Neʼe ina ʼahiʼahiʼi te ʼu tuʼuga lotu, kae neʼe mole ina maʼu te meʼa ʼaē neʼe loto kiai. ʼI tana lau te ʼu koga ʼo te Tohi-Tapu, neʼe ina ako ai pe neʼe feafeaʼi te ʼu felogoi ʼa te ʼAtua mo te ʼu hahaʼi ohage ko Noe, mo Apalahamo, mo Sala, pea mo Moisese. Neʼe fia ʼiloʼi e Albert te ʼAtua ʼo te Tohi-Tapu. Kae neʼe feala koa ke ina ʼiloʼi papau ʼe maʼuli moʼoni te ʼAtua?

ʼI te tahi afiafi neʼe ʼalu ia Albert ki he potu lāvaki, pea neʼe faikole fēnei, “Fakalelei age tou loto, Ê ʼAtua, foaki mai he fakaʼiloga kia ʼau​—he meʼa moʼo fakamoʼoni mai ʼe ke maʼuli.” Neʼe loaloaga te talitali ʼa Albert. Neʼe mole hoko pe la he meʼa, pea ʼe manatuʼi e Albert ko tana talitali neʼe “liliu ko he lotomamahi, ko he fakatalitali noa, ko he meʼa ʼe fakatupu ʼita.”

Ohage ko Albert, ko te tokolahi ʼe nātou manatu ʼe ko he maumau temi tanatou kumi te ʼAtua. ʼE mole lagi nātou mahino lelei ki te ʼu akonaki ʼo te kau takitaki lotu, peʼe nātou ʼiʼita ʼuhi ko te mānumānu ʼo te kau tagata ʼaē ʼe nātou fai te ʼu akonaki faka lotu ʼi te televisio. ʼI tanatou sio ki te malualoi ʼo te tokolahi ʼo nātou ʼaē ʼe tauhi lotu, ko ʼihi ʼe mole kei nātou ʼiloʼi pe koteā te meʼa ʼaē ʼe tonu ke nātou tui kiai. Kae ko Tavite, te Hau ʼo te Iselaele ʼāfea, neʼe ina fakapapau fēnei ki tona foha ko Salomone: “Kapau ʼe ke kumi [te ʼAtua], pea ʼe ina tuku anai ke ke maʼu ia ia.”​—1 Fakamatala 28:9.

Kae ʼe fakahā feafeaʼi koa e te ʼAtua ia ia? ʼE tonu koa ke koutou talitali ke koutou sio ki he fakaʼiloga​—ki he meʼa fakaofoofo ʼe ina fakamoʼoni anai kia koutou ʼe maʼuli moʼoni te ʼAtua? ʼO mulimuli ki te sivi ʼaē neʼe tā ʼi te nusipepa Time, ko te vahe lua ki te tolu ʼo te hahaʼi ʼi Amelika ʼe nātou tui ki te ʼu milakulo. Neʼe toe fakahā foki e te alatike “ko te ʼu ʼēkelesia ʼaē ʼe tuputupu vave ʼi Amelika, ʼe ko te ʼu kokelekasio Charismatique pea mo Pentecôtiste, koteʼuhi ko tanatou tauhi ʼe fakatafito ki te ʼu ‘fakaʼiloga pea mo te ʼu meʼa fakamanamana.’ ”

ʼE tonu koa ke tou sio ki he ʼu “fakaʼiloga pea mo he ʼu meʼa fakamanamana” ke tou tui ai ki te ʼAtua? Neʼe ina fakaʼaogaʼi te ʼu milakulo ʼi te temi muʼa. Koʼeni tona faʼifaʼitaki: ko Saulo ʼo Talesi, ʼaē neʼe ina fakatagaʼi te ʼu tisipulo ʼa Sesu Kilisito, te ʼAlo ʼo te ʼAtua, neʼe sio ia ki he meʼa fakaofoofo ʼi te ala ʼi tana haʼu mai Selusalemi ʼo ʼalu ki Tamasi. Ko te felāveʼi faka milakulo ʼaia mo Sesu ʼaē kua fakatuʼuake, neʼe iku ai mo te tafoki ʼa Saulo ki te Lotu Faka Kilisitiano. (Gāue 9:1-22) Koia, ko te tagata ʼaē neʼe fai fakataga ki muʼa atu neʼe liliu ai ko te ʼapositolo ko Paulo—ʼaē ʼe kau ki te ʼu ʼuluaki tagata ʼaē neʼe lagolago ki te Lotu Faka Kilisitiano!

Kae ʼe fakatupu tuʼumaʼu koa e te ʼu milakulo he tali lelei feiā? Ko te tui moʼoni ki te ʼAtua, ʼe fakalogo koa ki te sio ʼa he tahi ki he milakulo?

[Paki ʼo te pasina 3]

Ko te ʼAlo ʼo te ʼAtua neʼe palalau ʼi hona ʼaluʼaga faka milakulo kia Saulo ʼo Talesi. ʼE tonu koa ke koutou talitali ki he milakulo?