Ko Te Kau Faka Mafola ʼo Te Puleʼaga ʼe Nātou Fakamatala
Tou Faka Mafola Te ʼu Pulapula ʼo Te Puleʼaga ʼi Te Lakaga Fuli Pe
KO TE Folafola ʼa te ʼAtua, te Tohi-Tapu, ʼe ina fakaloto mālohiʼi te faʼa gāue. Neʼe ʼui fēnei e te Hau ko Salomone: “ ʼI te uhu to tau pulapula, pea ʼo aʼu ki te afiafi ʼaua naʼa ke fakamālōlō tou nima; heʼe mole ke ʼiloʼi pe kofea te potu ʼaē ka fua ai, peʼe ko henī, peʼe ko hē, peʼe nā fua toko lua anai.”—Tagata Tānaki 11:6.
ʼI te lakaga fuli pe ʼaē ʼe nātou maʼu ai he ʼu faigamālie, ʼe feala ke fai ai te gāue, ʼe to e te kau Fakamoʼoni ʼa Sehova te “pulapula,” ʼo nātou faka mafola te logo lelei ʼo te Puleʼaga ʼo te ʼAtua. ʼI te ʼu fenua e 230 tupu pea mo te ʼu motu, ʼe hoko atu tanatou “akoʼi pea mo tala te logo lelei ʼo ʼuhiga mo Kilisito, Sesu.” (Gāue 5:42) Ko te ʼu fakamatala ʼaē ʼe hoa mai, ʼe nātou fakahā mai pe neʼe feafeaʼi te ‘mole fakamālōlō [e te kau Fakamoʼoni ʼa Sehova] tonatou ʼu nima’ ʼi te gāue fai faka mafola.
◻ ʼI te République du Cap-Vert, neʼe haʼele te fafine Fakamoʼoni ʼa Sehova lolotoga tana fai faka mafola ʼo ōvi ki te fale pilisoni. ʼI te malaʼe ʼo te fale pilisoni, ko ʼihi kau pilisoni neʼe heheka ʼi te fuʼu ʼakau. ʼI tanatou sio ki te Fakamoʼoni ʼa Sehova, neʼe pāui age te kau pilisoni ke ʼavage he ʼu nusipepa. Neʼe haʼi e te Fakamoʼoni ʼa Sehova te ʼu Tule Leʼo pea mo te ʼu Réveillez-vous! ki he foʼi maka, pea neʼe ina lī age kia nātou ʼi te kaupā ʼo te fale pilisoni. ʼAki te meʼa ʼaia, neʼe kamata ai te ʼu ako Tohi-Tapu e 12. Ko te toko tolu ʼi te kau pilisoni ʼaia neʼe nātou foaki tonatou maʼuli ki te ʼAtua pea mo nātou papitema. Ko te tahi ia nātou ʼaia ʼe kua taʼu katoa nei tana fai faka mafola ko he pionie. Kae, e feafeaʼi tanatou fai te gāue fai faka mafola ʼi te fale pilisoni? ʼUluaki ʼe vaevae te fale pilisoni ko te ʼu telituale. ʼOsi ʼaia pea ʼe vaevae te telituale ki te ʼu Fakamoʼoni ʼa Sehova e toko tolu pea ʼe nātou fai faka mafola ʼi te ʼu koga fale ʼo te fale pilisoni. Ko te ʼu kaugā fai faka mafola ʼaia ʼo te Puleʼaga, ʼe nātou hoko atu te ʼu fai palalau mo te hahaʼi ʼaē ʼe fia logo ohage pe ko te fai ʼa te kau Fakamoʼoni ʼa Sehova ʼi te malamanei katoa—ʼo nātou fai te ʼu ʼaʼahi. Kae ko te meʼa ʼaē ʼe kehekehe ai, ʼe ko te fai ʼo te ʼu ako Tohi-Tapu. ʼE mole tuʼa tahi peʼe tuʼa lua tanatou ako te Tohi-Tapu ʼi te vāhaʼa ʼi he hola katoa, heʼe ko ʼihi kau pilisoni ʼe nātou ako te Tohi-Tapu ʼi te ʼaho fuli! Tahi ʼaē meʼa, neʼe fakagafua e te tagata pule ʼo te fale pilisoni ki te ʼu Fakamoʼoni ʼa Sehova ke nātou fai te ʼu fono fuli ʼo te kokelekasio ʼi te fale pilisoni.
◻ Ko te fafine ʼi Potukalia neʼe tuku age kia ia te ʼu tuʼuga tohi ʼo te Sosiete Watch Tower ʼi te mate ʼo tana kui fafine. Mai tona ʼuhiga ʼaē neʼe mole ko he Fakamoʼoni ʼa Sehova, neʼe mole ina fia taupau te ʼu tohi ʼaia. Kae, neʼe mole ina fia maumauʼi. ʼI te tahi ʼaho neʼe palalau ʼo ʼuhiga mo te ʼu tohi ʼaia, ki te fafine Fakamoʼoni ʼa Sehova neʼe palalau mo ia ʼi te fai faka mafola ʼi te ʼu ʼapi. Neʼe fehuʼi age e te Fakamoʼoni ʼa Sehova kia ia peʼe ina ʼiloʼi te ʼuhiga moʼoni ʼo te ʼu tohi ʼaia. Neʼe tali fēnei age te fafine: “ ʼO ʼuhiga mo te faʼahi ʼaia, ʼe mole ʼau ʼiloʼi tonatou ʼuhiga moʼoni, kae ʼe lava feafeaʼi haku ʼiloʼi te faʼahi ʼaia?” Neʼe tali e te fafine te ako Tohi-Tapu, pea mole tuai pea mahino kia ia te maʼuhiga ʼo te ʼu tohi ʼa tana kui fafine. ʼI te temi nei kua papitema ko te Fakamoʼoni ʼa Sehova. Pea tahi ʼaē, ko tana taʼahine pea mo te kaumeʼa ʼo te famili, ʼe nā ako ia te Tohi-Tapu. Neʼe ko he koloā maʼuhiga ia te ʼu tohi ʼaia!