“Neʼe Koutou Fetogi Taku Manatu Ki Te Kau Fakamoʼoni ʼa Sehova”
KO TE ʼu palalau ʼaia neʼe fai e te tagata takitaki ʼo te fale pilisoni ʼi Poloni, ʼo ʼuhiga mo te alatike neʼe talanoa ki te gāue ʼa te kau Fakamoʼoni ʼa Sehova, ʼi Te Tule Leʼo ʼo te ʼaho 15 ʼo ʼOketopeli 1998. Neʼe ko tona kupu tāfito “Ka Fetogi Te ʼu Loto Fefeka,” neʼe ina fakamahino te ʼu fua ʼo te gāue lelei ʼa te kau Fakamoʼoni ʼa Sehova ʼi te fale pilisoni ʼo Wołów ʼi Poloni.
ʼI muʼa ʼo te fakahā ki te kaugamālie Te Tule Leʼo ʼaia, neʼe fai he fono makehe ʼi te ʼaho 13 ʼo Sepetepeli 1998 ʼi te fale pilisoni ʼo Wołów, moʼo tufa te nusipepa ʼaia ki te hahaʼi pilisoni. Ia nātou ʼaē neʼe fakaafe ke nātou kau ki te fono ʼaia, neʼe ʼi ai te kau Fakamoʼoni ʼo te kolo ʼaia, mo te kau pilisoni ʼaē kua papitema pea mo te kau pilisoni ʼe nātou ako, pea mo te ʼu hahaʼi takitaki ʼo te fale pilisoni. Koʼeni te ʼu palalau ʼaē neʼe fai e ʼihi neʼe kau ki te fono ʼaia.
Neʼe ʼui fēnei e Jerzy, ko te Fakamoʼoni ʼa Sehova neʼe papitema ʼi te fale pilisoni kua hili kiai taʼu e nima ki muʼa atu: “ ʼE ʼau fiafia ʼaupito heʼe feala ke ʼau lau ʼi te nusipepa ʼaia, te ʼu faiga lahi ʼaē neʼe fai e te ʼu tēhina ʼo te ʼu kokelekasio ʼaē ʼe ōvi mai moʼo tokoni kia mātou.” Neʼe ina toe ʼui fēnei: “ ʼE ʼau faiga ke ʼau fetogi toku ʼulugaaga pea ʼe ʼau sio ko Sehova ʼe ina gāueʼi ʼau.”
Neʼe ʼui fēnei e te tahi tagata pilisoni ko Zdzisław ʼo ʼuhiga mo te fai faka mafola ʼi te fale pilisoni: “ ʼI te temi nei, ʼe teuteu te toko fā ke nātou papitema, pea ʼe ʼi ai te ʼu hahaʼi foʼou ʼe nātou kau ki te ʼu fono ʼi tomatou fale fono. Ko te alatike ʼaia ʼe ko he fakaloto mālohi kia mātou fuli ke mātou hoko atu tamatou gāue ʼi te minisitelio.” ʼE ko he manatu lelei ʼaia he kei toe tona ʼu taʼu e 19 ʼi te fale pilisoni!
ʼI tana ʼosi lau te alatike ʼo ʼuhiga mo te fale pilisoni ʼo Wołów, neʼe ʼui fēnei e he tagata takitaki: “Neʼe ko he fakaʼapaʼapa lahi ʼaē neʼe fai kia mātou. Neʼe mole he temi neʼe ʼau manatu ai ʼe palalauʼi anai te fale pilisoni ʼaenī ia lea e 130 ʼi te malamanei katoa. ʼE ʼau leleiʼia koutou pea ʼe ʼau loto fakafetaʼi ki takotou ʼu faiga maʼa te hahaʼi pilisoni.” Neʼe toe ʼui fēnei e te tahi tagata takitaki: “Neʼe koutou fetogi taku manatu ʼo ʼuhiga mo te kau Fakamoʼoni ʼa Sehova. ʼI muʼa atu, neʼe ʼau manatu ʼe koutou tauhi fakavale ki takotou lotu. Kua mahino kia ʼau ʼi te temi nei, ko koutou ko he ʼu hahaʼi lelei.”
Neʼe malimali ia Marek Gajos, te tagata takitaki ʼo te fale pilisoni, pea ina ʼui fēnei: “ ʼI te kamata, neʼe mātou manatu ʼe mole lava lelei anai takotou gāue. Kia mātou, ko koutou ko he ʼu hahaʼi lotu neʼe koutou fia fetogi te hahaʼi pilisoni ʼuhi ko takotou fakalogo ki te Tohi-Tapu. Kae ʼi tamatou sio ki te ʼu fua ʼo takotou ʼuluaki gāue, neʼe tupu ai tamatou fia gāue mo koutou. ʼI te temi nei, kua taʼu hiva takotou ʼōmai ki henī, pea ʼe ʼau leleiʼia ʼaupito te ʼu meʼa ʼaē neʼe koutou fai.”
Kae neʼe tali feafeaʼi e te hahaʼi pilisoni ʼo Wołów te alatike ʼaia? Neʼe kaugamālie ʼaupito te hahaʼi pilisoni ʼaē neʼe nātou fia lau te alatike ʼaia, pea neʼe toʼo fuli te ʼu nusipepa ʼa te kau Fakamoʼoni ʼo te fale pilisoni. Neʼe toe fia lau foki mo te kau takitaki ʼo te fale pilisoni, ʼo nātou kole ke ʼavage hanatou ʼu nusipepa e 40. ʼUhi ko te toe ʼāsili fia lau ʼa te hahaʼi, neʼe foaki ai e te ʼu kokelekasio ʼo te kolo he tahi ʼu nusipepa e 100 ki te ʼu tēhina ʼo te fale pilisoni. ʼI te temi ʼaia, neʼe toe tuputupu ai mo te kaugamālie ʼo nātou ʼaē neʼe kau ki te ʼu fono.
Neʼe ʼui e Piotr Choduń, ko te tagata takitaki ʼo te fale pilisoni ʼe kaugā gāue mo te kau Fakamoʼoni ʼa Sehova: “Neʼe mātou fakatotonu ke mātou tuku te nusipepa ʼaia ʼi te ʼu puha tānakiʼaga tohi fuli ʼo tomatou fale pilisoni. ʼE mātou fakaʼamu ke lau te nusipepa ʼaia e te hahaʼi pilisoni fuli ʼaē ʼe mole heʼeki nātou ako mo koutou te Tohi-Tapu.”
Neʼe maʼu he ʼu fua lelei ʼaki te faʼifaʼitaki lelei ʼa te kau Fakamoʼoni ʼa Sehova pea mo tanatou lotomālohi moʼo fai faka mafola. ʼO hilifaki ki te toko 15 hahaʼi pilisoni ʼaē neʼe nātou tuputupu ʼo aʼu ki tanatou papitema, ʼe toe ʼi ai mo te ʼu tagata takitaki e lua ʼo te fale pilisoni, kua nā foaki tonā maʼuli kia Sehova, pea neʼe kole e te tahi tagata takitaki ke fai hana ako Tohi-Tapu. ʼE mahino papau ia, ko te ʼu tēhina ʼaē ʼe nātou fai faka mafola ʼi te fale pilisoni ʼo Wołów, ʼe nātou vikiʼi ia Sehova ʼAtua ʼo ʼuhiga mo te ʼu fua lelei ʼo tanatou gāue.—Fakatatau mo 1 Kolonito 3:6, 7.
[Paki ʼo te pasina 28]
Ko he ʼu Fakamoʼoni e toko tolu pea mo he tagata pilisoni e tahi ʼi te fakahā ʼo te nusipepa ʼi te fale pilisoni