Te Tali Ki ʼAkotou ʼu Fehuʼi
◼ Koteā ʼaē ʼe tonu ke tou tokakaga ki ai mokā tou ʼaʼahi he tahi ʼe pilisoni?
ʼI te malamanei katoa, ʼe maʼu ai te teitei valu miliona hahaʼi pilisoni, pea ko ʼihi ʼe nātou fia logo ki te logo lelei. (1 Tim. 2:4) ʼE maʼu e te filiale te ʼu tohi e teitei 1 400 ʼi te māhina fuli mai te hahaʼi pilisoni, pea ko tanatou famili ʼe nātou kole ai he ʼu tohi peʼe nātou kole ke ʼaʼahi nātou. Logola ʼe fia ʼiloʼi fakamalotoloto e te hahaʼi tokolahi ia te moʼoni, kae neʼe ʼasi ko ʼihi neʼe nātou kākā ʼi tanatou fia logo ki te logo lelei, he neʼe nātou fia maʼu he ʼu lelei mai te hahaʼi ʼa te ʼAtua. ʼUhi ko te faʼahi ʼaia, ʼe tonu ke tou tokagaʼi fuli te ʼu fakatokaga ʼaenī ʼo ʼuhiga mo te faka mafola ki he kau pilisoni.
ʼE fai tāfito te faitohi ki te tokolahi ʼo te kau pilisoni moʼo faka mafola kia nātou. ʼE tokoniʼi tāfito te ʼu tuagaʼane ke ʼaua naʼa nātou faitohi ki he ʼu tagata pilisoni, tatau aipe peʼe ko hanatou fia tokoni kia nātou ʼi te faʼahi fakalaumālie. ʼE ko te maʼua ʼaia ʼa te ʼu tēhina ʼaē ʼe fealagia ki te faʼahi ʼaia. ʼE feala ke hinoʼi he ʼu tuagaʼane ʼe fealagia, ke nātou faitohi ki te hahaʼi fafine pilisoni ʼaē ʼe nātou fia ʼiloʼi moʼoni te Tohi-Tapu. ʼE mole tonu ke momoli he paʼaga peʼe ko he ʼu meʼa ʼofa ki te hahaʼi pilisoni, tatau aipe peʼe gafua te faʼahi ʼaia.
Kapau ko he tahi ʼe pilisoni ʼe ina fia ʼiloʼi te moʼoni, pea ʼe tonu ke fakahā tona higoa pea mo tona tuʼasila ki te kokelekasio ʼaē ʼe tokaga ki te telituale ʼaē ʼe tuʼu ai te fale pilisoni. ʼI te agamāhani, ko te ʼu tēhina ʼaē ʼe fealagia ʼo te kokelekasio ʼaia, ʼe nātou ʼiloʼi te ʼu meʼa ʼaē ʼe tonu ke fai mokā hoko he ʼu ʼaluʼaga kehekehe. Kapau ʼe mole ʼiloʼi peʼe ko te kokelekasio fea, pea ʼe tonu ke fakahā ki te filiale.
ʼE mole kovi mokā fai e te ʼu tēhina ʼaē neʼe hinoʼi he ʼu fono mo te kau pilisoni ke tokolahi ai ia nātou ʼe ako ʼi te temi pe e tahi. Kae ʼe mole tonu anai ki te ʼu kaugā fai faka mafola, ke nātou fakatahi ʼāteaina ʼi he ʼu fakafiafia mo te kau pilisoni. Tahi ʼaē meʼa, ʼe mole lelei ki he ʼu kaugā fai faka mafola ke nātou ʼolo ki he fale pilisoni kae neʼe mole nātou fakatuʼutuʼu fakatomuʼa peʼe ko ai ka nātou ʼaʼahi, pea ke nātou fakatahitahi lelei ai mo he kau pilisoni.
ʼOfa pe mokā tou tala te logo lelei ki te hahaʼi pilisoni, ke tou “fakaʼeteʼete ohage he ʼu gata, ka ke [tou] maʼa ohage ni lupe hina.”—Mat. 10:16, MN.