“Omai Kia Te Au, . . . Pea e Au Fakafimalieʼi Anai Koutou”

“Tou Fai Te Meʼa ʼAē ʼe Lelei Ki Te Hahaʼi Fuli Pe”

KO TE gāue tāfito ʼa Sesu neʼe ko te faka mafola pea mo te akoʼi ʼo te logo lelei ʼo ʼuhiga mo te Puleʼaga ʼo te ʼAtua. (Maleko 1:14; Luka 8:1) Mai te ʼaluʼaga ʼaē ko te kau tisipulo ʼa Kilisito ʼe nātou fia faʼifaʼitakiʼi ia ia, koia ʼe nātou faka maʼuhigaʼi tāfito ai ʼi tonatou maʼuli, te gāue ʼaē ko te akoʼi ki te hahaʼi te logo ʼo te Tohi-Tapu ʼo ʼuhiga mo te Puleʼaga ʼo te ʼAtua. (Luka 6:40) ʼE ko he meʼa fakaloto māfana ki te kau Fakamoʼoni ʼa Sehova hanatou sisio ki te fīmālie tologa ʼaē ʼe maʼu e te hahaʼi ʼaē ʼe nātou tali te logo ʼo te Puleʼaga—ohage pe ko te meʼa ʼaē neʼe hoko ʼi te temi ʼaē neʼe nofo ai ia Sesu ʼi te kele.—Mateo 11:28-30.

ʼI tuʼa atu ʼo tana akonakiʼi te Folafola ʼa te ʼAtua, neʼe fai e Sesu te tahi ʼu gāue, ohage ko te fakamālōlō ʼo te kau mahaki pea mo te fafaga ʼo te hahaʼi pakupaku. (Mateo 14:14-21) ʼO toe feiā pe mo te kau Fakamoʼoni ʼa Sehova, ʼe nātou fai he ʼu gāue moʼo tokoni ki te hahaʼi ʼaē ʼe faigataʼaʼia, ʼo hilifaki ki tanatou gāue ʼaē ko te akoʼi ʼo te Tohi-Tapu. ʼI tona fakahagatonu, ko te Tohi-Tapu ʼe ina teuteuʼi lelei te kau Kilisitiano “ki te ʼu gāue lelei fuli pe,” pea mo uga nātou ke nātou fai “te meʼa ʼaē ʼe lelei ki te hahaʼi fuli pe.”—2 Timoteo 3:16, 17; Kalate 6:10, MN.

“Neʼe ʼi Henī Tomatou ʼu Tēhina”

ʼI te māhina ʼo Sepetepeli ʼo te taʼu 1999, neʼe hoko te mafuike ʼi Taïwan pea neʼe lahi tana maumauʼi ia te fenua. Hili kiai te ʼu māhina, ko te ʼu ʼua lalahi pea mo te holo ʼo te ʼu mata kele neʼe nātou fakatupu te toe tuʼutāmaki fakamataku neʼe hoki hokoe ʼi Venezuela. Mole heʼeki faʼa fualoa, neʼe maumauʼi te fenua ʼo Mozambique e te ʼu lōfia lalahi. ʼI te ʼu fenua ʼaia e tolu, neʼe ʼolo fakavilivili kiai te kau Fakamoʼoni ʼa Sehova ʼaki te ʼu meʼa kai, te vai moʼo ʼinu, te ʼu faitoʼo, mo te ʼu mutuʼi meʼa, mo te ʼu falelā, pea mo te ʼu meʼa kuka maʼa nātou ʼaia neʼe tau mo te tuʼutāmaki. Ko te kau gāue lotolelei ʼaē ʼe ʼi ai ʼonatou ʼu faiva faka tōketā neʼe nātou fakatuʼu te ʼu fale mahaki, pea ko te kau gāue laga fale neʼe nātou laga te ʼu ʼapi foʼou maʼa nātou ʼaē neʼe mole kei ʼi ai honatou ʼapi.

Neʼe malave ki te loto ʼo nātou ʼaē neʼe tau mo te tuʼutāmaki ia te tokoni fakavilivili ʼaē neʼe fai age kia nātou. ʼE ʼui fēnei e Malyori, ʼaē neʼe holoʼi tona ʼapi ʼi te holo ʼo te mata kele ʼi Venezuela: “ ʼI te temi ʼaē neʼe mātou mamahi ʼaupito ai, neʼe ʼi henī tomatou ʼu tēhina.” ʼI te ʼosi laga e te kau gāue lotolelei te ʼapi foʼou maʼa tona famili, neʼe ʼui fēnei e Malyori: “ ʼE mole feala ia ke feʼauga hamatou fakamālo kia Sehova ki te ʼu meʼa fuli ʼaē neʼe ina fai maʼa mātou!” ʼI te fakatoʼo age kia nātou ʼaē neʼe tau mo te tuʼutāmaki ʼo te puvai ʼi Mozambique ia te ʼu kalavi ʼo tonatou ʼu ʼapi foʼou, neʼe hivaʼi fakatahi e te kūtuga ia te katiko “Ko Sehova Ko Totatou Holaʼaga.”a

Ko te kau gāue lotolelei neʼe nātou loto fīmālie mo nātou ʼi te tokoni kia nātou ʼaē ʼe tau mo te fihifihia. Neʼe ʼui fēnei e Marcelo ʼaē neʼe gāue afilimie ʼi te nofoʼaga maʼa te hahaʼi feholaki ʼi Mozambique: “Neʼe ʼau fiafia ʼi toku ʼaoga ki te ʼu tēhina ʼaē ʼe maʼuli mamahi ʼaupito.” Neʼe ʼui e Huang, ko he tēhina neʼe kau ki te kau gāue lotolelei ʼi Taïwan: “Neʼe ko he meʼa fakafiafia ʼaupito haku kau ki te tufa ʼo te meʼa kai pea mo te ʼu falelā ki te ʼu tēhina ʼaē neʼe tau mo te fihifihia. Neʼe ko he meʼa fakaloto mālohi ki taku tui.”

Ko He Polokalama Tokoni ʼe ʼi Ai Tona ʼu Fua

Ko te gāue ʼaki he lotolelei neʼe ina fakatupu he fakafimālie fakalaumālie ki te ʼu lauʼi hogofulu afe kau pilisoni ʼi te malamanei katoa. ʼO feafeaʼi? ʼI te ʼu taʼu ʼaenī, neʼe tuku e te kau Fakamoʼoni ʼa Sehova te ʼu tohi faka Tohi-Tapu ki te toko 30 000 hahaʼi ʼe nātou pilisoni ʼi te ʼu fale pilisoni e 4 000 ʼi Amelika pe. Pea tahi ʼaē meʼa, ʼi te ʼu koga meʼa ʼaē ʼe fealagia ai, ʼe ʼaʼahi e te kau Fakamoʼoni te ʼu fale pilisoni ke nātou ako te Tohi-Tapu mo nātou ʼe nonofo ai pea mo takitaki ai te ʼu fono faka Kilisitiano. ʼE ʼaoga koa ki te kau pilisoni?

Ko ʼihi kau pilisoni ʼaē ʼe nātou ako te Tohi-Tapu kua nātou kamata vaevae te ʼu akonaki fakaloto fīmālie ʼo te Folafola ʼa te ʼAtua ki te ʼu hahaʼi ʼe nātou pilisoni tahi. Ko te meʼa kua hoko kiai, ʼe lahi te ʼu fale pilisoni ʼi te malamanei katoa kua ʼi ai te kau pilisoni ʼe nātou tauhi fakatahi kia Sehova. ʼI te taʼu 2001, ʼe fakamatala e te tagata pilisoni ʼi Oregon, ʼi Amelika: “ ʼE tuputupu tomatou kiʼi kūtuga. Ko tomatou toko 7 kau fai faka mafola ʼo te Puleʼaga pea ʼe mātou fai te ʼu ako faka Tohi-Tapu e 38. ʼE laka ʼi te toko 25 te ʼu tagata ʼaē ʼe nātou ʼōmai ki te akonaki ʼaē ʼe fai ki te kaugamālie, pea mo te ako ʼo Te Tule Leʼo, pea neʼe ko te toko 39 neʼe kau ki te ʼAho Fakamanatu [ʼo te mate ʼo Kilisito]. Mole heʼeki faʼa fualoa neʼe papitema te toko tolu!”

Te ʼu Lelei Mo Te ʼu Fiafia

ʼE tokagaʼi e te kau tagata pule ʼo te ʼu fale pilisoni te fua lelei ʼo te polokalama tokoni ʼaia. Kae ko te meʼa ʼaē ʼe malave ki te kau tagata takitaki ʼe ko te tologa ʼo te lave lelei ʼo te polokalama tokoni ʼaia. ʼE ʼui fēnei e te fakamatala: “ ʼI te ʼu taʼu e hogofulu ʼaē neʼe fai ai te polokalama ʼaia, neʼe mole toe pilisoni he tahi ʼi te kau pilisoni ʼaē neʼe mavae ʼi te fale pilisoni kae kua papitema ko he Fakamoʼoni ʼa Sehova—ʼo mole hage ko te ʼu kūtuga ʼaē ʼe lau ko te 50 peʼe ko te 60 ʼi te teau ʼe nātou toe liliu ki te fale pilisoni.” ʼI te malave kia ia ia te ʼu fua lelei neʼe maʼu e te Fakamoʼoni ʼaē ʼe gāue mo tonatou lotolelei, neʼe ʼui fēnei e te patele ʼo te fale pilisoni ʼi Idaho ʼi tana tohi ki te ʼu pilō takitaki ʼa te kau Fakamoʼoni ʼa Sehova: “Logope ʼe mole ʼau manatu tahi mo takotou ʼu akonaki, kae ʼe malave ʼaupito kia ʼau takotou kautahi.”

Neʼe toe logoʼi pe foki te fīmālie e te kau gāue lotolelei ʼi tanatou tokoni kia nātou ʼaia ʼe nonofo ʼi te ʼu fale pilisoni. ʼI tana ʼosi takitaki te fono mo te kau pilisoni ko tanatou hoki hiva ʼaē te katiko ʼo te Puleʼaga, neʼe faitohi fēnei te tēhina neʼe kau ki te polokalama tokoni ʼaia: “Neʼe ko he meʼa fakaloto mālohi ia te sioʼi he toko 28 tagata ʼe nātou kau fakatahi ʼo hiva fakavikiviki kia Sehova. Pea neʼe nātou hihiva leʼo lahi! Neʼe ko he pilivilesio haku kau ki te taʼi lakaga ʼaia!” Neʼe ʼui fēnei e te tēhina neʼe kau ki te tokoni ʼaia ki te ʼaʼahi ʼo te ʼu fale pilisoni ʼi Arizona: “Neʼe ko he pilivilesio ia te kau ki te gāue makehe ʼaia!”

Ko te kau Fakamoʼoni ʼaē ʼe nātou gāue mo tonatou lotolelei ʼe nātou ʼio ki te ʼu palalau ʼaenī neʼe fai e Sesu: “ ʼE lahi age te fiafia ʼi takita foaki, ʼi takita tali.” (Gaue 20:35, MN) ʼE nātou toe fakamoʼoni pe foki ki te fīmālie moʼoni ʼe maʼu mai te mulimuli ki te tokoni faka Tohi-Tapu, ʼaē ke fai te meʼa ʼaē ʼe lelei ki te hahaʼi fuli pe.—Tāʼaga Lea 11:25.

[Kiʼi nota]

[Paki ʼo te pasina 8]

Venezuela

[Paki ʼo te pasina 8]

Taïwan

[Paki ʼo te pasina 8]

Mozambique