Ko He Loto Fia Tokoni ʼe Maʼu Ai He ʼu Tapuakina
1. Neʼe fakahā feafeaʼi e Tavite pea mo Nehemia tanā loto fia tokoni?
1 ʼI te temi ʼaē neʼe manukiʼi ai e Koliate ia te ʼu kautau ʼo Iselaele, neʼe mole he tahi ʼi te kau sōlia neʼe fia ʼalu ʼo tauʼi ia ia. Kae neʼe ʼi ai te tama tauhi ōvi, neʼe mole poto ʼi te tau, neʼe fia ʼalu ke ina tauʼi. (1 Sam. 17:32) Ko te kau Sutea ʼaē neʼe toe liliu ki Selusalemi ʼi tanatou ʼosi ʼaunofo, neʼe mole natou toe laga ia te ʼu kaupā ʼo te kolo, kae neʼe ko te tagata ʼaē neʼe ina fakafonu ia te ʼipu vino ʼo te hau ʼo Pelesia, ʼaē neʼe ina fia tuku tana gāue fakaʼaliki ʼi te fale hau kae ke fagona ia ki Selusalemi moʼo fakatuʼutuʼu ia te gāue. (Neh. 2:5) Neʼe tapuakinaʼi e Sehova ia te ʼu tagata ʼaia, ia Tavite pea mo Nehemia, ʼi tanā loto fia tokoni.—1 Sam. 17:45, 50; Neh. 6:15, 16.
2. He koʼē ʼe tonu ke maʼu e te kau Kilisitiano he loto fia tokoni?
2 Iā ʼaho nei, ʼe mole kei maʼu ia te loto fia tokoni ʼi te mālamanei. ʼI “te u aho fakamuli” ʼaenī, ʼe maʼumaʼua ʼaupitō ia te hahaʼi, pea tokolahi ʼe natou “tahi ofa pe kia te ia.” (2 Tim. 3:1, 2) ʼE faigafua ki he tahi hana tokaga tāfito pē ki te ʼu meʼa ʼaē ʼe ʼaoga kiā ia, kae mole ina kumi anai he ʼu faigamālie moʼo tokoni kiā nātou ʼaē ʼe ʼaoga lahi kiai. Kae ʼi totatou ʼuhiga Kilisitiano, ʼe tou fia faʼifaʼitakiʼi ia Sesu, ʼaē neʼe ʼalu ʼo tokoni ki te hahaʼi. (Soa. 5:5-9; 13:12-15; 1 Pet. 2:21) ʼE tou lava fakahā feafeaʼi he loto fia tokoni, pea koteā te ʼu tapuakina ʼaē kā tou maʼu anai?
3. Koteā te fua lelei ʼo te loto fia tokoni ki te ʼu fono ʼo te kōkelekāsio?
3 Ko He Tokoni Ki Totatou ʼu Tehina: ʼE feala hatatou foaki he “meaofa fakalaumalie” ki niʼihi mokā tou fai tali ʼi te ʼu fono ʼaē ʼe fakakau kiai ia te nofoʼaki. (Loma 1:11) Ko te ʼu tali ʼe natou faka maʼuhigaʼi ia Sehova, mo natou fakapipiki mālohi ia te moʼoni ʼi totatou ʼatamai pea mo totatou loto, pea mo tou toe fiafia ai ʼi te fono. (Pes. 26:12) ʼE toe feala pē foki hatatou kole ki te taupau ako ke tou fetogi ia ia ʼaē ʼe mole lava haʼu ʼo fai tana lautohi peʼe ko tana kiʼi faifai palalau ʼi te Ako Faka Teokalatike. ʼAki te faʼahi ʼaia ʼe tou hikihiki ai anai tatatou popoto ʼi te faiakonaki.
4. Ko te tahi ʼu faʼahi fea ʼaē ʼe feala ai ke tou fakahā ai tatatou loto fia tokoni?
4 ʼE feala ke fakahā e te ʼu tehina tanatou loto fia tokoni ʼo fakahoko he ʼu maʼua gāue ʼi te kōkelekāsio. (Isa. 32:2; 1 Tim. 3:1) ʼE feala kiā tātou fuli ke tou tokoni ke hoko fakalelei ia te ʼu fakatahi, ʼo tou lagolago ki te ʼu gāue kehekehe ʼaē ʼe fai ai. Kā tou fia gāue mo te taupau faka silikō ʼi te minisitelio, peʼe tou kai meʼa kai mo ia, ʼe hoko ai “he fefakaloto mālohiʼaki.” (Loma 1:12, MN ) Kā tou fia tokoni ki te ʼu fānau ʼaē ʼe hala mo tamai, mo te ʼu fafine vītua, mo nātou ʼe māhahaki pea mo māʼimoa, mo te ʼu faʼē ʼaē ʼe natou taupau tokotahi tanatou fānau, pea mo ʼihi atu ʼi te kōkelekāsio, ʼe tou maʼu ai te fiafia pea mo te ʼofa ʼo Sehova.—Taag. 19:17; Gaue 20:35.
5. Ko te ʼu gāue fea ʼo te Fale ʼo Te Puleʼaga, ʼaē ʼe tou fia tokoni ai?
5 Ko te tahi faʼahi ʼaē ʼe feala ai ke tou foaki totatou temi pea mo totatou mālohi, ʼe ko te tokoni ki te fakamaʼa ʼo te Fale ʼo Te Puleʼaga. Tahi ʼaē meʼa, ʼuhi ʼaē heʼe tokolahi te hahaʼi ʼe natou ʼomai ki te moʼoni, ʼe ʼaoga ʼaupitō he ʼu Fale foʼou ʼo Te Puleʼaga pea mo he kau gāue moʼo laga te ʼu fale ʼaia. Ko te taumātuʼa neʼe nā toʼo tonā ʼu ʼaho mālōlō moʼo tokoni ki te Komitē Laga Fale ʼo Te Kolo, logolā neʼe mole popoto te taumātuʼa ʼaia ʼi te laga ʼo he ʼu fale. Ki muli age, neʼe akoako age ki te taumātuʼa ia te gāue pea ʼi te temi nei kua nā tokoni ki te fakatuʼu ʼo te ʼu piliki. Neʼe ʼui fēnei e te fafine ʼohoana: “Kua au maʼu toku ʼu kaumeʼa lelei ʼi taku gāue fakatahi mo te ʼu tehina mo tuagaʼane. ʼI te hili ʼo he ʼaho gāue, ʼe mā gaʼegagaʼe ʼi te faʼahi fakasino kae mā mālolohi ʼi te faʼahi fakalaumālie.”
6. He koʼē ko te minisitelio ʼe ko te gāue ʼaē ʼe maʼuhiga tāfito moʼo foaki ʼo he tokoni?
6 ʼI Te Fai Faka Mafola: Ko te gāue ʼaē ʼe maʼuhiga tāfito iā ʼaho nei ke tou foaki ai tatatou tokoni, ʼe ko te faka mafola ʼo te Puleʼaga. ʼAki te tokoni ʼaē ki te hahaʼi ke natou mahino pea mo maʼuliʼi ia te ʼu tokoni ʼa te Tohi-Tapu, ʼe natou maʼu ai he fakatuʼutuʼu ʼi te maʼuli pea mo te mālohi ʼaē ke natou fetogi tanatou ʼu agamāhani ʼaē ʼe kovi. ʼE natou ʼiloʼi ai te ʼamanaki fakaloto mālohi ʼaē ʼe tuʼu ʼi te Tohi-Tapu ʼo ʼuhiga mo te kā haʼu. Kā tou fai he ʼu ako Tohi-Tapu, ʼe tou fakahoko ai he selevisi fakafiafia pea mo maʼu ai he ʼu tapuakina ʼo talu ai. (Soa. 17:3; 1 Tim. 4:16) ʼO mulimuli ki totatou ʼu ʼaluʼaga, ʼe lagi feala ke tou gāue pionie vaeluaʼi temi peʼe pionie kātoa, peʼe tou ʼolo ki he potu ʼe ʼaoga lahi ai he kau fai faka mafola, peʼe tou ako he tahi lea.
7. He koʼē ʼe maʼuhiga tāfito iā ʼaho nei ia te loto fia tokoni?
7 Neʼe fakakikite e te Hau ko Tavite, kā kamata anai ia te ʼafio hau ʼo te Mēsia, pea ko te hahaʼi ʼa te ʼAtua “ ʼe natou foaki fakamālotoloto anai ia nātou.” (Pes. 110:3, kiʼi nota ʼi te lalo pāsina) ʼE fakaviliviliʼi e Sehova ia te tānaki ʼo te taʼukai fakalaumālie fakaʼosi, koia ʼe lahi ʼaupitō ai ia te gāue ʼe feala ai ke tou tokoni ai. (Isa. 60:22) ʼE kotou ʼui fēnei koa: “Koʼenī au! Fekauʼi au”? (Isa. 6:8) ʼE moʼoni, ʼi tatatou fakahā ʼo he loto fia tokoni, ʼe tou fakafiafia ai Sehova pea mo maʼu ai anai he ʼu tapuakina lahi.