Te ʼu Fehuʼi ʼa Te Kau Lautohi

ʼE feala koa ke tou ʼui ko te fakamahino foʼou ʼo te kupu “taʼiake,” ʼe ina fakagafua kia tatou ke tou manatu ʼe kei mamaʼo atu te temi ʼaē ʼe tonu ke hoko ai te fakaʼosi ʼo te tuʼu ʼo te ʼu faʼahiga meʼa ʼaenī?

Kailoa. Ko te fakamahino foʼou pea mo lelei age ʼo ʼuhiga mo te puani ʼaia, ʼe tonu ke tokoni kia tatou ke tou fakatalitali tuʼumaʼu ki te fakaʼosi. ʼO feafeaʼi?

Ohage ko tona fakamahino ʼi Te Tule Leʼo ʼo te ʼaho 1 ʼo Novepeli 1995, neʼe fakaʼaogaʼi e Sesu te kupu “te taʼiake ʼaenī” ki te hahaʼi agakovi ʼo tona temi. (Mateo 11:​7, 16-​19; 12:39, 45; 17:14-​17; Gāue 2:​5, 6, 14, 40) ʼI tona ʼuhiga totonu, neʼe mole ko he fakamatala ʼaia ʼo he temi kua faka tuʼakoi pea neʼe kamata ʼi he temi totonu.

ʼI tona fakahagatonu, ko te alatike “Te ʼu Fehuʼi ʼa Te Kau Lautohi” ʼo Te Tule Leʼo ʼaia, neʼe ina faka maʼuhigaʼi te ʼu puani tāfito e lua: “Ko he taʼiake ʼe mole feala ke faka ʼuhiga ko he temi ʼe faka tuʼakoi ki he ʼu taʼu” pea, “Ko he hahaʼi ʼo he taʼiake ʼe nātou maʼuʼuli ʼi he kiʼi temi nounou.”

ʼE tou tautau fakaʼaogaʼi te kupu “taʼiake” ʼaki tona faka ʼuhiga ʼaia. Ohage la, ʼe feala ke tou ʼui, ‘ko te kau solia ʼo te taʼiake ʼo Napoléon neʼe mole nātou ʼiloʼi he meʼa ʼo ʼuhiga mo te ʼu vakalele pea mo te ʼu foʼi pulu atomike.’ ʼE tou faka ʼuhiga pe koa ki te kau solia ʼaē neʼe nātou tutupu ʼi te taʼu pe ʼaē neʼe tupu ai ia Napoléon? ʼE tou faka ʼuhiga pe koa ki te kau solia Falani ʼaē neʼe mamate ʼi muʼa ʼo te mate ʼa Napoléon? Kailoa; pea ʼe mole tou fakaʼaogaʼi te kupu “taʼiake” moʼo faka tuʼakoi he temi ki he ʼu taʼu. Kae ʼe tou faka ʼuhiga ki te kiʼi temi nounou, ʼe mole ko he ʼu taʼu ʼe lauʼi teau talu mai te temi ʼo Napoléon ʼo aʼu ki te temi ka haʼu.

ʼE toe feiā mo tatatou mahino ʼo ʼuhiga mo te meʼa ʼaē neʼe ʼui e Sesu ʼi tana lea faka polofeta ʼaē neʼe ina fai ʼi te Moʼuga ʼo Oliveto. Ko te fakahoko ʼo te ʼu faʼahi kehekehe ʼo te lea faka polofeta ʼaia, ʼe fakamoʼoni ʼaki ai ko te fakaʼosi ʼo te tuʼu ʼo te ʼu faʼahiga meʼa ʼaenī ʼe kua fakaōvi mai. (Mateo 24:32, 33) Koutou manatuʼi, ohage ko tona ʼui ia Fakahā 12⁠:​9, 10, ʼi te fakatuʼu ʼo te Puleʼaga ʼo te ʼAtua ʼi selo ʼi te 1914, neʼe lī ifo ia Satana ki te ʼu tafaʼaki ʼo te kele. Pea ʼe toe ʼui ia Fakahā ʼe ʼita kovi ia Satana ʼi te temi nei. Koteā tona tupuʼaga? Koteʼuhi ʼe ina ʼiloʼi “kua nounou tona temi.”​—Fakahā 12:12.

Koia neʼe tau mo feʼauga te kupu tāfito “Koutou Nonofo Fakaonoono!” ʼo Te Tule Leʼo ʼo te ʼaho 1 ʼo Novepeli. Ko te palakalafe ʼaē neʼe hoa kiai neʼe ina ʼui tonu fēnei: “ ʼE mole ʼaoga kia tatou ke tou ʼiloʼi te temi totonu ʼaē ka hoko ai anai te ʼu meʼa ʼaia. Kae ke tou tokakaga ʼo nonofo fakaonoono, ʼo gāueʼi tatatou tui ke mālohi, pea ke tou maʼumaʼua tuʼumaʼu ʼi te tauhi kia Sehova​—kae mole tou lau peʼe tou ʼifea ʼo ʼuhiga mo te temi.” Pea neʼe toe fakamanatuʼi ai te ʼu palalau ʼa Sesu: “Koutou haga lamalama, pea ke koutou nonofo ʼalaʼala, heʼe mole koutou ʼiloʼi pe ko ʼafea te temi ʼaē kua fakakatofa. Kaʼe ko te meʼa ʼaē ʼe ʼau tala atu kia koutou ʼe ʼau tala foki ki te hahaʼi fuli: ke koutou nonofo fakaonoono.”​—Maleko 13:33, 37.