Ko Sehova—Te ʼAtua ʼAē ʼe Ina Fakahā Te ʼu Meʼa Fakalilo
“ ʼE ʼi ai te ʼAtua ʼi te lagi, ko ia ʼaē ʼe ina Fakahā te ʼu meʼa fakalilo.”—Taniela 2:28.
1, 2. (a) Koteā te kehekehe ʼo Sehova pea mo tona Fili lahi? (b) ʼE hā feafeaʼi te kehekehe ʼaia ʼi te hahaʼi?
KO SEHOVA, te ʼAtua māʼoluga pea mo ʼofa ʼo te ʼatulaulau, te Tupuʼaga tokotahi, ʼe ko te ʼAtua ʼe agapoto pea mo faitotonu. ʼE mole ina fufū tona ʼuhiga, tana ʼu gāue, peʼe ko tana ʼu fakatuʼutuʼu. ʼI tona temi totonu, pea mo te temi ʼaē ʼe loto kiai, ʼe ina fakahā ia ia. ʼI te faʼahi ʼaia ʼe kehekehe ai mo tona Fili, ia Satana te Tevolo, ʼaē ʼe faiga ke ina fufū tona ʼuhiga moʼoni pea mo tana ʼu fakatuʼutuʼu.
2 Ohage ko te fefakafeagaiʼaki ʼa Sehova pea mo Satana, ʼe toe feiā mo tanā ʼu hahaʼi tauhi. Ko nātou ʼaē ʼe nātou mulimuli ki te takitaki ʼa Satana ʼe nātou loi pea mo aga fakakākā. ʼE nātou faiga ke ʼui ko nātou ko he ʼu hahaʼi agalelei, kae ʼe nātou fai te ʼu gāue ʼe pipiki ki te fakapōʼuli. Neʼe ʼui ki te kau Kilisitiano ʼo Kolonito ke ʼaua naʼa nātou punamaʼuli ki te faʼahi ʼaia. “Heʼe ko te ʼu faʼahiga tagata ʼaia ʼe ko he kau ʼapositolo loi, ko he kau gāue fakakākā, ʼe nātou fakaliliu ia nātou ko he kau ʼapositolo ʼa Kilisito. Pea ʼe mole fakapunamaʼuli te faʼahi ʼaia, heʼe ko Satana totonu ʼe ina fakaliliu tuʼumaʼu pe ia ia ko he ʼaselo ʼo te mālama.” (2 Kolonito 11:13, 14) Kae ko te kau Kilisitiano ʼe nātou mulimuli ki tonatou takitaki ko Kilisito. ʼI tana kei maʼuli ʼi te kele, neʼe hā lelei ia ia te ʼulugaaga ʼo tana Tāmai, ia Sehova ʼAtua. (Hepeleo 1:1-3) Koia ʼi tanatou muliʼi ia Kilisito, ʼe faʼifaʼitakiʼi e te kau Kilisitiano ia Sehova, te ʼAtua ʼo te moʼoni, ʼaē ʼe mole ina fufū he meʼa pea mo ʼAtua ʼo te mālama gigila. Mo nātou foki ʼe mole nātou fufū tonatou ʼuhiga, tanatou ʼu gāue, peʼe ko tanatou ʼu fakatuʼutuʼu.—Efesi 4:17-19; 5:1, 2.
3. ʼE lava feafeaʼi hatatou fakafisi ki te fakakoviʼi ʼaē ʼo te fakakinau ʼo te hahaʼi ʼaē ʼe liliu ko he kau Fakamoʼoni ʼa Sehova, ke nātou kau ki he “magaʼi lotu fakafūfū”?
3 ʼI te ʼu lakaga ʼaē ʼe manatu ai ia Sehova ʼe lelei, ʼe ina fakahā te ʼu meʼa ʼaē ʼo ʼuhiga mo tana ʼu fakatuʼutuʼu pea mo te ka haʼu, ʼaē neʼe mole ʼiloʼi e te hahaʼi ʼo aʼu ki te temi nei. ʼI te ʼaluʼaga ʼaia, ʼe ko ia ko he ʼAtua ʼe ina fakahā te ʼu meʼa fakalilo. Koia, ko te hahaʼi ʼaē ʼe nātou fia tauhi kia te ia, ʼe fakaafe nātou, ʼio ʼe uga nātou ke nātou ako te ʼu meʼa ʼaia ʼaē neʼe ina fakahā mai. Neʼe fakahā te faʼahi ʼaia ʼi te tānaki neʼe fai ʼi te taʼu 1994 ʼo ʼuhiga mo te toko 145 000 tupu kau Fakamoʼoni ʼi te fenua ʼo Eulopa, neʼe fakafuafua neʼe nātou tahi tali takitokotahi ia te ʼu akonaki ʼa te kau Fakamoʼoni ʼa Sehova ia taʼu e tolu ʼi muʼa ʼo tanatou fili ke nātou liliu ko he kau Fakamoʼoni. Neʼe nātou fili te faʼahi ʼaia ʼo mulimuli ki tonatou loto faʼitaliha, kae neʼe mole fakakinauʼi nātou. Pea neʼe kei nātou faʼitaliha ʼo ʼuhiga mo te meʼa ʼaē ʼe nātou loto kiai pea mo te ʼu meʼa ʼaē ʼe nātou fia fai. Ohage la, ʼi te mole kei fia mulimuli e ʼihi te ʼu lekula māʼoluga ʼo ʼuhiga mo te aga ʼaē ʼe tonu ke fai e te kau Kilisitiano, ko nātou ʼaia, ki muli age, ʼe nātou fili ke nātou mavae ʼi te kau Fakamoʼoni ʼa Sehova. Kae ʼe ko te meʼa ʼaē ʼe tou fakatokagaʼi, ʼi te ʼu taʼu ʼaenī e nima kua hili, ko te tokolahi ia nātou ʼaē neʼe mavae ʼi te moʼoni, neʼe nātou fai te ʼu fakatuʼutuʼu ke nātou liliu ʼo toe kau ki te kau Fakamoʼoni ʼa Sehova pea mo nātou toe fai te gāue.
4. Koteā te meʼa ʼaē ʼe mole tonu ke tuʼania kiai te kau Kilisitiano agatonu, pea koteā tona tupuʼaga?
4 ʼE mahino ia, ʼe mole ko nātou fuli ʼaē neʼe fakamavae ʼaē ʼe nātou toe liliu mai, pea ia nātou ʼaia ko ʼihi neʼe nātou maʼu tuʼulaga ʼi te kokelekasio faka Kilisitiano. ʼE mole tonu ke tou punamaʼuli ki te faʼahi ʼaia, heʼe māʼia mo te tisipulo ʼa Sesu ʼaē neʼe felogoi lelei mo ia, te ʼapositolo ko Sutasi, neʼe fakafisi ki ai. (Mateo 26:14-16, 20-25) Kae ʼe tonu koa ke tou tuʼania ʼo ʼuhiga mo te Lotu Faka Kilisitiano? ʼE mole fakatupu kovi koa te faʼahi ʼaia ki te lelei ʼo te gāue ʼa te kau Fakamoʼoni ʼa Sehova, ʼaē ko te akoʼi ʼo te hahaʼi? Kailoa ia, ohage pe ko te aga ʼaē neʼe fai e Sutasi Isikaliote, neʼe mole ina fakagata te fakahoko ʼo te ʼu fakatuʼutuʼu ʼa te ʼAtua.
ʼE Māfimāfi Kae ʼe Manavaʼofa
5. ʼE tou ʼiloʼi feafeaʼi ʼe ʼofa ia Sehova pea mo Sesu ki te hahaʼi, pea neʼe nā fakahā feafeaʼi te ʼofa ʼaia?
5 Ko Sehova ʼe ko he ʼAtua ʼofa. ʼE tokaga ia ki te hahaʼi. (1 Soane 4:7-11) Logope la tona tuʼulaga māʼoluga, kae ʼe fia kaumeʼa ia mo te hahaʼi. ʼO ʼuhiga mo tana kaugana ʼo te temi muʼa, ʼe tou lau fēnei: “ ‘Neʼe tui ia Apalahamo kia Sehova, pea neʼe lau ai ko ia ʼe ko te faitotonu,’ pea neʼe fakahigoaʼi ai ko te ‘kaumeʼa ʼo Sehova.’ ” (Sake 2:23; 2 Fakamatala 20:7; Isaia 41:8) Ohage ko te fefakahāʼaki e he ʼu kaumeʼa te ʼu meʼa ʼe mole tonu ke fakahā, pe ko he ʼu meʼa ʼe mole tonu ke ʼiloʼi e ʼihi, ʼe toe fai feiā pe e Sehova mo tona ʼu kaumeʼa. ʼI te faʼahi ʼaia neʼe faʼifaʼitakiʼi e Sesu tana Tāmai, koteʼuhi neʼe liliu tana ʼu tisipulo ko tona ʼu kaumeʼa pea neʼe ina vaevae mo nātou te ʼu meʼa fakalilo. Neʼe ina ʼui fēnei age kia nātou: “ ʼE mole ʼau toe fakahigoaʼi koutou ko te kau kaugana, koteʼuhi ʼe mole ʼiloʼi e te tagata kaugana te meʼa ʼaē ʼe fai e tona pule. Ka kua ʼau fakahigoaʼi koutou ko te ʼu kaumeʼa, koteʼuhi he kua ʼau fakaʼilo atu kia koutou ia meʼa fuli ʼaē neʼe ʼau logo kiai mai taku Tāmai.” (Soane 15:15) Ko te ʼu meʼa fakafūfū, peʼe ko te ʼu “meʼa fakalilo,” ʼaē ʼe fefakahāʼaki e Sehova, mo tona ʼAlo pea mo tonā ʼu kaumeʼa ʼe fakatupu ai te logo tahi ia nātou pea mo te noʼo mālohi ʼo te ʼofa pea mo te tauhi.—Kolose 3:14.
6. He koʼe ʼe mole fufū e Sehova te ʼu meʼa ʼaē ka ina fai?
6 Ko te faka ʼuhiga ʼo te huafa ʼo Sehova, “ ʼE Ina Fakahoko,” ʼe ina fakahā ai ʼe feala kia ia ke ina fakahoko te meʼa ʼaē ʼe ʼaoga moʼo fakahoko ʼo tana fakatuʼutuʼu. ʼO mole hage ko te tagata, ʼe mole fufū e Sehova te ʼu meʼa ʼaē ka ina fai naʼa tāʼofi e ʼihi tana fakahoko ʼo te ʼu meʼa ʼaia. ʼE mole feala ke tāʼofi ia ia e he tahi, koia ʼe ina fakahā ʼi tana Folafola, te Tohi-Tapu, te ʼu tuʼuga meʼa ʼaē ka ina fai. ʼE ina fakapapau fēnei: “Ko taku folafola . . . ʼe mole toe liliu mai anai kia te ʼau ka mole hona ʼu fua, kae ʼe mahino papau ia ʼe ina fai anai te meʼa ʼaē kua ʼau leleiʼia, pea ʼe fakahoko moʼoni anai te meʼa ʼaē neʼe ʼau fekauʼi ki ai.”—Isaia 55:11.
7. (a) Koteā ʼaē neʼe fakakikite e Sehova ʼi Eteni, pea neʼe fakamoʼoni feafeaʼi e Satana ko te ʼAtua ʼe moʼoni? (b) ʼE kei moʼoni feafeaʼi te pelesepeto ʼaē ʼe tuʼu ia 2 Kolonito 13:8?
7 ʼI te hili pe ʼo te agatuʼu ʼi Eteni, neʼe fakahā lelei e Sehova te ikuʼaga ʼo te fihifihia ʼaia ʼaē neʼe hoko ia ia pea mo tona Fili, ia Satana. ʼE fakavolu anai te Hāko ʼaē neʼe fakapapau e te ʼAtua kae mole fakavolu ʼo talu ai, kae ʼo ʼuhiga mo Satana ʼe fakavolu anai ia ia ʼo talu ai. (Senesi 3:15) ʼI te taʼu 33 ʼo totatou temi, neʼe fakavolu moʼoni e te Tevolo te Hāko, ia Kilisito Sesu, ʼi tana fakahoko tona mate. ʼAki te faʼahi ʼaia, neʼe fakahoko e Satana te lea faka polofeta pea neʼe ina toe fakamoʼoni ai ko Sehova ʼe ko te ʼAtua ʼo te moʼoni, logope neʼe mole ko te faʼahi ʼaia ʼaē neʼe fia fakahā e Satana. Ko tana fehiʼa ki te moʼoni pea mo te faitotonu, mo tona fialahi, pea mo tana mole fakahemala, neʼe tupu ai tana fakahoko katoa te ʼu meʼa ʼaē neʼe fakakikite e te ʼAtua ke ina fai. ʼIo, ʼe moʼoni te pelesepeto ʼaenī kia nātou fuli ʼaē ʼe fakafeagai ki te moʼoni, māʼia mo Satana: “ ʼE mole feala ke tou fai he meʼa ʼe fakafeagai ki te moʼoni, kae ʼe tou fai pe maʼa te moʼoni.”—2 Kolonito 13:8.
8, 9. (a) Koteā ʼaē ʼe ʼiloʼi e Satana, kae ko tana ʼiloʼi te meʼa ʼaia, ʼe ina fetogi koa te fakahoko ʼo te ʼu fakatuʼutuʼu ʼa Sehova? (b) Koteā te fakatokaga ʼaē ʼe mole tokagaʼi e te kau fili ʼa Sehova, pea koteā tona tupuʼaga?
8 Talu mai te fakatuʼu ʼo te Puleʼaga ʼa te ʼAtua ʼi hona ʼaluʼaga fakapulipuli ʼi te taʼu 1914, neʼe hoko te vaega ʼo Fakahā 12:12: “Koia ke koutou fiafia, selo, pea mo koutou ʼe nonofo ai! Malaʼia ki te kele pea mo te tai, he kua hifo atu te Tevolo kia koutou, mo tona ʼita lahi, he kua ina ʼiloʼi kua nounou tona temi.” Kae ko tana ʼiloʼi ʼaē kua nounou tona temi, ʼe ina uga koa ia Satana ke ina fetogi tana ʼu fakatuʼutuʼu? Kapau ʼe fai e Satana te faʼahi ʼaia, pea ʼe ina fakahā ai anai ko Sehova ʼe ko te ʼAtua ʼo te moʼoni pea ʼi tona ʼuhiga Pule Māʼoluga, ʼe ko ia tokotahi pe ʼaē ʼe tau mo feʼauga ke tou tauhi ki ai. Kae ʼe mole loto te Tevolo ki te faʼahi ʼaia, tatau aipe peʼe ina ʼiloʼi ʼe moʼoni te ʼu meʼa ʼaia ʼo ʼuhiga mo Sehova.
9 ʼE fakahāhā e Sehova pe koteā te meʼa ka hoko ʼi te temi ʼaē ka haʼu ai anai ia Kilisito moʼo fakamāuʼi te tuʼu faka malamanei ʼa Satana. (Mateo 24:29-31; 25:31-46) ʼO ʼuhiga mo te faʼahi ʼaia, ʼe tala fēnei e tana Folafola ʼo ʼuhiga mo te ʼu pule ʼo te malamanei: “Ka nātou ʼui anai: ‘Tokalelei pea mo fīmālie!’ pea ʼe tonu anai ke hoko fakafokifā he fakaʼauha kia nātou, ohage ko te ʼu nunuʼa ʼo te tuʼania ki te fafine faitama.” (1 Tesalonika 5:3) Ko nātou ʼaē ʼe nātou muliʼi ia Satana ʼe mole nātou tokagaʼi te fakatokaga ʼaia. ʼE nātou kivi ʼuhi ko te kovi ʼo tonatou loto, pea ʼe ko te faʼahi ʼaia ʼe ina tāʼofi ke mole nātou fakahemala mai tonatou ala ʼaē ʼe kovi, pea mo fetogi tanatou ʼu fakatuʼutuʼu pea mo te ʼu meʼa ʼaē ʼe nātou fai moʼo fakafeagai ki te ʼu fakatuʼutuʼu ʼa Sehova.
10. (a) Neʼe hoko feafeaʼi te vaega ʼo 1 Tesalonika 5:3, kae ʼe tonu ke feafeaʼi te aga ʼa te hahaʼi ʼa Sehova? (b) He koʼe ko te hahaʼi ʼaē ʼe mole tui ʼe lagi ʼāsili anai tanatou agakovi ki te hahaʼi ʼaē ʼa te ʼAtua?
10 Tāfito talu mai te taʼu 1986, ʼi te temi ʼaē neʼe tala ai e te Kautahi ʼo te ʼu Puleʼaga Fakatahi, ko te Taʼu ʼaia ʼo te Tokalelei ʼi te Malamanei Katoa, neʼe lahi te talanoa ʼi te malamanei katoa ʼo ʼuhiga mo te tokalelei pea mo te fīmālie. Neʼe fai te ʼu fakatuʼutuʼu ʼi te faiga ʼaē ke fakahoko te tokalelei ʼi te malamanei, pea neʼe ʼi ai tona ʼu fua. ʼE ko te fakahoko katoa koa ʼaia ʼo te lea faka polofeta ʼaia, peʼe feala koa ke tou ʼamanaki, ʼi te temi ka haʼu, ki he tala fakapunamaʼuli feiā? ʼI tona temi totonu, ʼe fakamālamaʼi anai tatou e Sehova ʼo ʼuhiga mo te faʼahi ʼaia. Lolotoga te temi ʼaenī, tou nonofo ʼalaʼala ʼi te faʼahi fakalaumālie, “ ʼo talitali pea mo ʼaua naʼa galo [kia tatou] te hoko mai ʼo te ʼaho ʼo Sehova.” (2 Petelo 3:12) ʼI te hoholo ʼo te temi pea mo te ʼāsili palalau ʼa te hahaʼi ʼo ʼuhiga mo te tokalelei pea mo te fīmālie, ko nātou ʼaē ʼe nātou ʼiloʼi te fakatokaga ʼaia, kae mole nātou fia fakatokagaʼi, ʼe lagi lahi age tanatou agapauʼu ʼo nātou ʼui ʼe mole fakahoko anai e Sehova tana folafola, peʼe mole feala anai ke ina fakahoko. (Vakaʼi ia Tagata Tānaki 8:11-13; 2 Petelo 3:3, 4.) Kae ʼe ʼiloʼi e te kau Kilisitiano ʼe fakahoko anai e Sehova tana fakatuʼutuʼu!
Tou Fakaʼapaʼapa Ki Te ʼu Hahaʼi ʼAē ʼe Fakaʼaogaʼi e Sehova
11. Koteā te meʼa ʼaē neʼe mahino kiai ia Taniela pea mo Sosefo ʼo ʼuhiga mo Sehova?
11 ʼI te temi ʼaē neʼe pule ai te Hau ko Nepukanesa ʼi Papiloni, neʼe ina fai te moemisi faikehe neʼe mole kei ina manatuʼi, pea neʼe kumi tokoni. Ko tana ʼu pelepitelo, mo tana hahaʼi gaohi meʼa fakamanamana, pea mo te ʼu tagata faifakalauʼakau neʼe mole feala ke nātou tala age te meʼa ʼaē neʼe moemisi kiai pea mo nātou fakamahino age. Kae ko te tagata kaugana ʼa te ʼAtua ia Taniela, neʼe feala ke ina fai te faʼahi ʼaia, kae neʼe ina ʼui lelei age ko te fakahā ʼo te moemisi pea mo tona faka ʼuhiga ʼe mole ko he meʼa ʼe ina fai ʼaki tona poto fakatagata. Neʼe ʼui fēnei e Taniela: “ ʼE ʼi ai te ʼAtua ʼi te lagi, ko ia ʼaē ʼe ina Fakahā te ʼu meʼa fakalilo, pea neʼe ina fakahā ki te Hau ko Nepukanesa te meʼa ʼaē ʼe tonu ke hoko ʼi te koga fakamuli ʼo te ʼu ʼaho.” (Taniela 2:1-30) ʼI te ʼu sēkulō ki muʼa atu, ko Sosefo, te tahi polofeta ʼa te ʼAtua, neʼe toe mahino mo ia ʼe ko Sehova ʼaē ʼe ina Fakahā te ʼu meʼa fakalilo.—Senesi 40:8-22; Amosi 3:7, 8.
12, 13. (a) Neʼe ko ai te polofeta lahi ʼa te ʼAtua, pea he koʼe ʼe koutou tali feiā? (b) Ko ai ia ʼaho nei ʼe nātou tauhi ohage ko he “ ʼu kaugana ʼo te ʼu meʼa fakalilo tapu ʼo te ʼAtua,” pea ʼe tonu ke tou faka ʼuhiga feafeaʼi ia nātou?
12 Ko te polofeta lahi tokotahi ʼa Sehova ʼaē neʼe gāue ʼi te kele neʼe ko Sesu. (Gāue 3:19-24) Neʼe fakamahino fēnei e Paulo: “ ʼI te temi muʼa, neʼe lahi te ʼu lakaga pea mo te ʼu ʼaluʼaga, neʼe palalau ai te ʼAtua ki ʼatatou ʼu kui ʼaki te kau polofeta, neʼe palalau mai kia tatou, ʼi te fakaʼosi ʼo te ʼu ʼaho ʼaenī, ʼaki te ʼAlo neʼe ina fakanofo ia ia ke ina maʼu te tōfiga ʼo meʼa fuli, pea ʼaki ia ia neʼe ina fai te ʼu tuʼu ʼo te ʼu faʼahiga meʼa.”—Hepeleo 1:1, 2.
13 Neʼe palalau ia Sehova ki te ʼu ʼuluaki Kilisitiano ʼaki tona ʼAlo, ia Sesu, ʼaē neʼe ina fakahā te ʼu meʼa fakalilo fakalaumālie kia nātou. Neʼe ʼui fēnei e Sesu kia nātou: “Kua tuku atu kia koutou te mahino ki te ʼu meʼa fakalilo tapu ʼo te puleʼaga ʼo te ʼAtua.” (Luka 8:10) Ki muli age, neʼe ʼui e Paulo ko te kau Kilisitiano fakanofo ʼe ko te hahaʼi “fakalogo ʼa Kilisito pea ʼe ko he ʼu tagata kaugana ʼo te ʼu meʼa fakalilo tapu ʼo te ʼAtua.” (1 Kolonito 4:1) Ia ʼaho nei, ʼe haga tauhi te kau Kilisitiano fakanofo ʼi tonatou ʼuhiga ʼaia, ʼo nātou faʼufaʼu te tagata kaugana agatonu mo poto ʼaē, ʼaki te Kolesi Pule, ʼe ina foaki te meʼa kai fakalaumālie ʼi tona temi totonu. (Mateo 24:45-47) Kapau ʼe tou fakaʼapaʼapa lahi ki te ʼu polofeta ʼaē neʼe fakaʼaogaʼi e te ʼAtua ʼi te temi muʼa, kae tāfito te ʼAlo ʼo te ʼAtua, ʼe mole tonu koa la ke tou toe fakaʼapaʼapa ki te tagata kaugana agatonu mo poto ʼaē ʼe fakaʼaogaʼi e Sehova ʼi te temi nei, moʼo fakahā mai te ʼu manatu faka Tohi-Tapu ʼaē ʼe ʼaoga ʼaupito ki tana hahaʼi ʼi te ʼu temi faigataʼa ʼaenī?—2 Timoteo 3:1-5, 13.
ʼE Tonu Koa Ke ʼIloʼi Peʼe Kailoa?
14. Ko te temi fea ʼaē ʼe fai fakafūfū ai e te kau Kilisitiano tanatou ʼu gāue, pea ko ai te faʼifaʼitaki ʼaē ʼe nātou mulimuli ki ai ʼi tanatou fai te faʼahi ʼaia?
14 Ko te fakahāhā e Sehova te ʼu meʼa, ʼe faka ʼuhiga ʼaki koa ʼe tonu ke fakahā tuʼumaʼu e te kau Kilisitiano te ʼu meʼa fuli ʼaē ʼe nātou ʼiloʼi, ʼi te ʼu ʼaluʼaga fuli? ʼE mulimuli te kau Kilisitiano ki te tokoni ʼaē neʼe fai e Sesu ki tana ʼu tisipulo, ke nātou “fakaʼeteʼete ohage he ʼu gata, ka ke [nātou] maʼa ohage ni lupe hina.” (Mateo 10:16) Kapau ʼe ʼui age kia nātou ʼe mole feala ke nātou tauhi ki te ʼAtua ohage ko te meʼa ʼaē ʼe kole age e tonatou leʼo ʼo loto ke nātou fai, pea ʼe haga fakalogo aipe te kau Kilisitiano ki te ʼAtua, koteʼuhi ʼe nātou ʼiloʼi ʼe mole he kautahi fakatagata ʼe feala ke ina fakagata te tauhi ʼaē kia Sehova. (Gāue 5:29) Neʼe fakahā e Sesu totonu tana fakamuʼamuʼa ia te faʼahi ʼaia. ʼE tou lau fēnei: “Pea ʼi te hili ʼo te ʼu meʼa ʼaia, neʼe hoko atu te feʼaluʼaki ʼa Sesu ʼi Kalilea, he neʼe mole fia feʼaluʼaki ia ʼi Sutea, koteʼuhi neʼe kumi e te kau Sutea ke nātou matehi ia ia. Kaʼe neʼe kua fakaōvi mai te lafeti ʼo te kau Sutea, te lafeti ʼo te ʼu tapenakulo. Koia neʼe ʼui maʼa Sesu kia nātou [tona ʼu tēhina totonu ʼaē neʼe mole tui kia te ia]: . . . ‘Koutou hake koutou ki te lafeti; ʼe mole ʼau hake nei ʼau ki te lafeti ʼaia, he ko toku temi ʼaē kua fakakatofa ʼe mole heʼeki hoko katoa mai.’ Pea ʼi tana ʼosi ʼui te ʼu meʼa ʼaia kia nātou, neʼe nofo ia ʼi Kalilea. Kaʼe ʼi te hake ʼo ʼona tēhina ki te lafeti, neʼe hake ai mo ia, ʼo mole hake fakahāhā, kaʼe neʼe hake fakafūfū pe ia.”—Soane 7:1, 2, 6, 8-10.
ʼE Tonu Koa Ke Tou Fakahā Peʼe Kailoa?
15. Neʼe fakahā feafeaʼi e Sosefo te taupau ʼo he meʼa ʼe mole tonu ke ʼiloʼi e ʼihi, ʼe ko he fakahā ʼaia ʼo tokita ʼofa ʼi ʼihi temi?
15 ʼI ʼihi lakaga, ko te mole fakahā ʼo he meʼa ʼe ko he agapoto ia pea ʼe hā ʼaki ai takita ʼofa. Ohage la, koteā ʼaē neʼe fai e Sosefo, te tāmai tauhi ʼa Sesu, ʼi te temi ʼaē neʼe ina ʼiloʼi ai ko te fafine ʼaē neʼe fakapapau ke nā ʼohoana, ia Malia, neʼe kua faitama? ʼE tou lau fēnei: “Kaʼe ko Sosefo tona ʼohoana, neʼe ko te tagata agatonu ia, pea neʼe mole ina loto ke talaki fakahāhā, ka neʼe fakakaukau ia ke nā mavete fakafūfū.” (Mateo 1:18, 19) Neʼe ko hana agakovi, mo kanapaula neʼe ina tala fakahāhā te meʼa ʼaē neʼe hoko!
16. Koteā te maʼua ʼaē ʼe maʼu e te ʼu tagata ʼāfea pea mo nātou ʼo te kokelekasio, ʼo ʼuhiga mo te ʼu meʼa ʼaē ʼe mole tonu ke fakahā?
16 Ko te ʼu meʼa ʼaē ʼe mole tonu ke fakahā, pea mo feala ke tupu ʼaki ai he fihifihia, peʼe fakaloto mamahi, ʼe mole tonu ke tala kia nātou ʼaē ʼe mole honatou pikipikiga mo te faʼahi ʼaia. ʼE manatuʼi e te kau tagata ʼāfea te faʼahi ʼaia mokā ʼe tonu ke nātou tokoniʼi, peʼe fakaloto fīmālieʼi he ʼu Kilisitiano, peʼe tonu ke fakatonutonuʼi nātou ʼuhi ko he agahala mamafa neʼe nātou fai kia Sehova. ʼE maʼuhiga ke fakatokatoka te ʼu meʼa ʼaia ʼaki te Tohi-Tapu; ʼe mole tonu ke fakahā te ʼu meʼa ʼaia kia nātou ʼaē ʼe mole ʼi ai honatou pikipikiga mo te faʼahi ʼaia pea ʼe mole ko he agaʼofa ʼaia. ʼE mahino ia ʼe mole faiga anai e te kau Kilisitiano ʼo te kokelekasio ke nātou kumikumi ki te kau tagata ʼāfea ke nātou ʼiloʼi te ʼu meʼa ʼaē ʼe mole tonu ke fakahā kia nātou, kae ʼe nātou fakaʼapaʼapa anai ki te maʼua ʼaē ʼo te ʼu tagata ʼāfea ke nātou taupau fakafūfū te ʼu meʼa ʼaia. ʼE ʼui fēnei ia Tāʼaga Lea 25:9: “Palalau maʼa koe ki tou tatau, pea ʼaua naʼa ke fakahā te ʼu palalau ʼaē ʼe mole tonu ke ke fakahā ki ʼihi.”
17. He koʼe ʼe taupau e te kau Kilisitiano te ʼu meʼa ʼaē ʼe mole tonu ke fakahā, kae he koʼe ʼe mole feala ke nātou fai tuʼumaʼu te faʼahi ʼaia?
17 ʼE toe moʼoni te faʼahi ʼaia ʼi te lotolotoiga ʼo te famili pea mo te ʼu kaumeʼa. ʼE maʼuhiga te taupau ʼo te ʼu meʼa ʼaē ʼe mole tonu ke fakahā moʼo tekeʼi te ʼu femahinohalaʼaki pea mo te ʼu tokakovi. “ ʼE foaki e te matagi ʼo te potu tokelau te ʼua ohage ko he fānauʼi ʼi te mamahi, pea ko te ʼalelo ʼaē ʼe ina fakahā he meʼa ʼe mole tonu ke ʼiloʼi e ʼihi, ʼe ko he fofoga ia neʼe kita laukoviʼi.” (Tāʼaga Lea 25:23) ʼE mahino papau ia, ko tatatou agatonu kia Sehova pea mo tana ʼu pelesepeto faitotonu, pea mo tatatou ʼofa ʼaē kia nātou ʼaē ʼe higa ʼi te tui, ʼe lagi fakamaʼua ai kia tatou ʼi ʼihi temi ke tou tala ki te ʼu mātuʼa, mo te ʼu tagata ʼāfea Kilisitiano, peʼe ki te ʼu hahaʼi ʼaē ʼe ʼi ai honatou pikipikiga, te ʼu meʼa ʼaē ʼe mole tonu ke fakahā.a Kae ʼi te agamāhani, ʼe mole tala e te kau Kilisitiano te ʼu meʼa ʼaē neʼe fakahā e ʼihi kia nātou, ʼo nātou taupau te ʼu meʼa ʼaia ohage pe ko tanatou taupau tanatou ʼu meʼa ʼa nātou totonu.
18. Koteā te ʼu kalitate e tolu ʼaē ʼe feala ke tokoni mai kia tatou ke tou ʼiloʼi te meʼa ʼaē ʼe tonu ke tou fakahā pea mo te meʼa ʼaē ʼe tonu ke tou taupau?
18 Moʼo fakanounou, ʼe faʼifaʼitaki he Kilisitiano kia Sehova ʼi tana taupau te ʼu meʼa ʼaē ʼe mole tonu ke fakahā, mo kapau ʼe ʼaoga, pea ʼe hoki ina fakahā anai te ʼu meʼa ʼaia mo kapau ʼe tonu ke ina fai. ʼI tana vakaʼi ʼaē pe koteā te meʼa ʼaē ʼe tonu ke ina fakahā pea mo te meʼa ʼaē ʼe tonu ke ina taupau maʼa ia, ʼe ina fai anai ʼaki te agavaivai, mo te tui, pea mo te ʼofa. Ko te agavaivai ʼe ina tāʼofi anai ia ia ke ʼaua naʼa ina faka maʼuhigaʼi fau ia ia, mo ina faiga ke fia hā ki te hahaʼi ʼi tana ʼui age kia nātou te ʼu meʼa fuli ʼaē ʼe ina ʼiloʼi, peʼe laupisi ʼe ʼi ai te ʼu meʼa ʼe ina ʼiloʼi, kae mole ina fia fakahā. Ko te tui ki te Folafola ʼa Sehova pea mo te kokelekasio faka Kilisitiano, ʼe ina uga anai ia ia ke talanoa ki te ʼu manatu faka Tohi-Tapu, pea mo tokaga naʼa ina ʼui he ʼu meʼa ʼe fakatupu lotomamahi anai ki ʼihi. Ei, ʼe uga anai ia ia e te ʼofa ke ina fakahā te ʼu meʼa ʼaē ʼe fakavikiviki ki te ʼAtua, pea mo te ʼu meʼa ʼaē ʼe tonu ke ʼiloʼi e te hahaʼi ke feala ai hanatou maʼu te maʼuli. ʼI te tahi faʼahi, ʼe ina taupau anai te ʼu meʼa ʼaē ʼe mole tonu ke fakahā, heʼe ina ʼiloʼi ʼe mole ko he agaʼofa, mo kapau ʼe ina tala te ʼu meʼa ʼaia.
19. Koteā te ʼu gāue ʼaē ʼe feala ai ke tou ʼiloʼi pe ko ai te ʼu Kilisitiano moʼoni, pea koteā tona fua?
19 Ko te manatu fakapotopoto ʼaia ʼe ko he tokoni kia tatou ke tou ʼiloʼi pe ko ai te kau Kilisitiano moʼoni. ʼE mole nātou fufū te ʼuhiga ʼa te ʼAtua ʼo nātou ʼui ʼe mole hona huafa peʼe ʼaki te akonaki ʼo te Tahitolu ʼaē ʼe nātou ʼui ko he misitelio pea ʼe mole feala hona fakamahino. Ko te ʼu ʼatua ʼaē ʼe mole ʼiloʼi tonatou higoa ʼe ko te fakaʼiloga ʼaia ʼo te lotu hala kae mole ko te lotu moʼoni. (Vakaʼi ia Gāue 17:22, 23.) ʼE leleiʼia moʼoni e te kau Fakamoʼoni ʼa Sehova ʼaē neʼe fakanofo, tonatou pilivilesio ʼaē “ko he ʼu tagata kaugana ʼo te ʼu meʼa fakalilo tapu ʼo te ʼAtua.” ʼI tanatou fakahāhā te ʼu meʼa fakalilo ʼaia ki te hahaʼi, ʼe nātou tokoni ki te hahaʼi fakamalotoloto ke nātou faiga ke nātou kaumeʼa mo Sehova.—1 Kolonito 4:1; 14:22-25; Sakalia 8:23; Malakia 3:18.
[Nota ʼi te lalo pasina]
a Koutou vakaʼi te alatike “ ʼAua naʼa koutou kau ki te ʼu agahala ʼo ʼihi” ʼi te Te Tule Leʼo Fakafalani ʼo te ʼaho 15 ʼo Novepeli 1985.
ʼE Koutou Tali Feafeaʼi Anai?
◻ He koʼe ʼe mole fufū e Sehova te ʼu meʼa ʼaē ka ina fai?
◻ ʼE fakahā e Sehova kia ai tana ʼu meʼa fakalilo?
◻ Koteā te maʼua ʼa te kau Kilisitiano ʼo ʼuhiga mo te ʼu meʼa ʼaē ʼe mole tonu ke fakahā?
◻ Koteā te ʼu kalitate e tolu ʼaē ʼe tokoni anai ki he Kilisitiano ke ina ʼiloʼi te meʼa ʼaē ʼe tonu ke ina fakahā pea mo te meʼa ʼaē ʼe tonu ke ina taupau?
[Paki ʼo te pasina 8, 9]
ʼE fakahā e Sehova te ʼu meʼa fakalilo ʼaki tana Folafola