Ko Te Leʼo ʼo Loto—Ko He Kavega Peʼe Ko He Meʼa ʼOfa?
‘KUA ʼau fiu ʼi toku leʼo ʼo loto!’ ʼI ʼihi temi, ʼe fakamamahiʼi tatou e totatou leʼo ʼo loto. Ko te ʼu faʼahiga mamahi ʼaia ʼe ko he hoha ʼo te ʼatamai, pe ko he lotomamahi ʼaupito. Ko te leʼo ʼo loto ʼaē ʼe hoha ʼe feala ke tupu ʼaki ai he mahaki peʼe ko he lotovaivai.
Koia, kapau ko tona ʼuhiga ʼaia, ko te leʼo ʼo loto ʼe mole koa la ko he kavega? Ko ʼihi ʼe nātou manatu ʼe feiā te ʼuhiga ʼo te leʼo ʼo loto. Ko te hisitolia neʼe ina tautau tokagaʼi te leʼo ʼo loto ohage ko he fealagia ʼe tou maʼu talu mai tatatou tupu. Ko te tokolahi ʼe nātou manatu ko te leʼo ʼo loto neʼe ko he takitaki lelei ʼo ʼuhiga mo te aga ʼaē ʼe tonu ke fai, pea neʼe foaki totonu mai e te ʼAtua. Koia ʼe fakahigoaʼi te leʼo ʼo loto “ko te nofo ʼa te ʼAtua ʼi te tagata,” “ko totatou natula,” pea ko “te leʼo ʼo te ʼAtua.”
Kae, ʼi te ʼu taʼu ʼaenī, neʼe kua mafola te ʼui ʼaē ko te leʼo ʼo loto ʼe ko he meʼa tāfito ʼe tou maʼu—ko he meʼa ʼe tou maʼu mai tatatou ʼu mātuʼa pea ʼe mulimuli ki te ʼaluʼaga faka sosiale ʼaē ʼe tou maʼuʼuli ai. Ohage la, ʼe ʼui e ʼihi tōketā ko he tamasiʼi ʼe ina ako te līaki ʼo te meʼa ʼaē ʼe kovi, ʼuhi ko tana mataku tāfito ʼaē naʼa tā, ʼo tou ʼui ai ko te leʼo ʼo loto, ʼe ko te ʼu aga pea mo te ʼu akonaki ʼaē neʼe akoʼi mai e tatatou ʼu mātuʼa. Ko ʼihi ʼe nātou ʼui ko te leʼo ʼo loto ʼe mulimuli ki te ʼu meʼa ʼaē ʼe akoʼi age e te sosiete, ʼo ʼuhiga mo te ʼu aga ʼaē ʼe tonu ke fai. Ko ʼihi ʼe nātou ʼui ko te ʼu mamahi ʼo te leʼo ʼo loto, ʼe ko te fihi ʼo te meʼa ʼaē ʼe tou fakaʼamu ke tou fai pea mo te ʼu meʼa ʼaē ʼe fakamaʼua mai e te sosiete ke tou fai!
Tatau aipe pe koteā te ʼu meʼa ʼaē ʼe ʼui ʼo ʼuhiga mo te leʼo ʼo loto, kae ko te meʼa ʼaē ʼe tautau hoko, ko te hahaʼi ʼe nātou mulimuli ki tonatou leʼo ʼo loto, kae mole nātou mulimuli ki te ʼu meʼa ʼaē ʼe ʼui e tanatou ʼu mātuʼa, tonatou ʼu famili, pea mo te sosiete ʼaē ʼe nātou maʼuʼuli ai. Ko ʼihi ʼe nātou lotolelei ke sakilifisioʼi tonatou maʼuli ʼuhi ko tonatou leʼo ʼo loto! Pea logope la te kehekehe ʼo te ʼu agaʼi fenua ʼi te malamanei, kae ko te ʼu aga ohage ko te fai fakapō, te kaihaʼa, te tono, te loi, pea mo te ʼu felāveʼi fakasino ʼa he ʼu hahaʼi ʼe famili totonu, ʼe faka ʼuhiga ʼi te malamanei katoa, ʼe ko he ʼu aga ʼe kovi. ʼE mole ko te fakamoʼoni koa la ʼaia neʼe tou tutupu ake mo totatou leʼo ʼo loto?
Te Manatu ʼa Te Tohi-Tapu ʼo ʼUhiga Mo Te Leʼo ʼo Loto
ʼI tona ʼuhiga moʼoni, ko ia ʼaē ʼe pule ki totatou leʼo ʼo loto ʼe ko Sehova ʼAtua. Koia, “neʼe ina [te ʼAtua] fakatupu tatou, kae mole ko tatou totonu pe.” (Pesalemo 100:3) ʼE ina ʼiloʼi katoa peʼe feafeaʼi te faʼufaʼu ʼo totatou sino. Ko te Folafola ʼa te ʼAtua, te Tohi-Tapu, ʼe ina fakamahino mai ko te tagata neʼe faʼu ʼaki te “paki” ʼo te ʼAtua. (Senesi 1:26) Neʼe fakatupu te tagata ʼaki te fealagia ʼaē ke ina fakakeheʼi te meʼa ʼaē ʼe lelei pea mo te meʼa ʼaē ʼe kovi; talu mai te kamata, ko te leʼo ʼo loto neʼe ko he koga ia ʼo te natula ʼo te tagata.—Vakaʼi ia Senesi 2:16, 17.
ʼE fakamoʼoni te ʼapositolo ko Paulo ki te faʼahi ʼaia ʼi tana tohi fēnei ki te kau Loma: “Ko te hahaʼi ʼo te ʼu puleʼaga ʼaē ʼe mole hanatou lao [ʼa te ʼAtua] ʼe nātou mulimuli ki te ʼu meʼa ʼo te lao ʼi tanatou agamāhani, ko te ʼu hahaʼi ʼaia, logope la ʼe mole hanatou ʼu lao, ʼe ko nātou ko te lao kia nātou totonu. ʼE nātou fakahā ko nātou ko te uho ʼo te lao ʼe tohi ʼi tonatou loto, kae ko tonatou leʼo ʼo loto ʼe ina fakamoʼoni mo nātou, ʼi tanatou ʼu manatu ʼa nātou totonu, peʼe ina faka lākahalaʼi peʼe ina faka lākatonuʼi ia nātou.” (Loma 2:14, 15) Koutou fakatokagaʼi ko te tokolahi ʼaē neʼe mole nātou ako te Lao fakaʼatua ʼaē neʼe foaki ki te kau Sutea, ʼe kei nātou mulimuli ki te ʼu pelesepeto ʼa te ʼAtua, ʼo mole nātou fai te ʼu aga ʼaia ʼuhi ko te ʼu aga ʼaē ʼe fai e te hahaʼi, kae ʼe nātou ʼui “neʼe nātou tutupu feiā”!
Koia, ko te leʼo ʼo loto ʼe mole ko he kavega ia, kae ʼe ko he meʼa ʼofa ʼa te ʼAtua, ko he meʼa ʼe ʼi ai hona ʼaoga kia kita. ʼE feala ke ina fakamamahiʼi tatou. Kae kapau ʼe tou mulimuli fakalelei kiai, pea ʼe feala ke ina fakapale tatou ʼo ina fakafimālieʼi totatou loto pea mo foaki mai te tokalelei. ʼE feala ke ina takitaki tatou, mo puipui tatou, pea mo ina fakaloto mālohiʼi tatou. ʼE fakamatala fēnei e The Interpreter’s Bible: “Ko te ʼatamai pea mo te ʼu meʼa ʼe ʼi te loto ʼe feala ke puipui, mo kapau ʼe faiga he tahi ke ina faka ʼalutahi te meʼa ʼaē ʼe ina fai pea mo te meʼa ʼaē ʼe ina fakaʼamu ke ina fai.” ʼE lava feafeaʼi ki he tahi ke ina faka ʼalutahi te ʼu faʼahi ʼaia? ʼE feala koa he akoʼi ʼo totatou leʼo ʼo loto? Ko te ʼu fehuʼi ʼaia ʼe tou vakaʼi anai ʼi te alatike ʼaē ka hoa mai.