E Feafeaʼi Hakotou Akoʼi Tokotou Leʼo ʼo Loto

“ ʼE FEALA hakotou mamoe, mo kapau ʼe maʼa tokotou leʼo ʼo loto.” ʼE hā ʼaki te tāʼaga lea ʼāfea ʼaenī: Kapau ʼe tou fakalogo ki totatou leʼo ʼo loto, pea ʼe tou maʼu te tokalelei pea mo te fīmālie ʼi totatou loto.

Kae, ko te tokolahi ʼo te hahaʼi ʼe mole nātou fia fai te faʼahi ʼaia. Neʼe ʼui tonu e Itilele, ʼe ina fia hāofaki te tagata mai te manatu hala ʼo ʼuhiga mo te leʼo ʼo loto. Ko tana pule fakamataku neʼe hā ʼaki ai te aga fekai ʼa te tagata, mokā fakafisi ki tona leʼo ʼo loto. ʼE toe feiā aipe mo te hahaʼi fai fakapō ʼo te temi ʼaenī logope la ko te aga heʼeʼofa, te agamālohi​—ko nātou ʼaē ʼe nātou fakaʼalikiʼi te hahaʼi fafine pea mo te hahaʼi fai fakapō ʼaē ʼe mole nātou fakahemala. Ko te tokolahi ʼo te hahaʼi fai fakapō ʼaia ʼe ko te kau tūpulaga. Ko te tohi ʼe ina sivi te faʼahi ʼaia, ko tona kupu tāfito Ko te fānau ʼaē ʼe mole honatou leʼo ʼo loto.

Logope la ko te tokolahi ʼe mole nātou manatu anai ke nātou fai he agamālohi, tokolahi ia nātou ʼe mole nātou koviʼia te fai ʼo he ʼu aga heʼeʼaoga ʼi te ʼu felāveʼi fakasino, ke nātou loi, peʼe nātou aga fakakākā. ʼI te malamanei katoa, kua kovi ʼaupito te aga ʼa te hahaʼi. ʼI tana talanoa ki te ʼapositasia lahi ʼaē ka hoko anai ʼi te tauhi maʼa, neʼe tohi e te ʼapositolo ko Paulo, ko ʼihi Kilisitiano neʼe kua nātou tō ki te ʼu fakahala ʼo te mālama, pea neʼe “fakaʼiloga tonatou leʼo ʼo loto ʼaki he ukamea kakaha.” (1 Timoteo 4:2) Ko te aga fakahehema kua lahi ʼaupito age lolotoga te “ ʼu ʼaho fakamuli” ʼaenī. (2 Timoteo 3:1) Koia ʼe tonu ke faiga mālohi te kau Kilisitiano ke nātou hāofaki tonatou leʼo ʼo loto. ʼE feala ke tou fai te faʼahi ʼaia mo kapau ʼe tou akoʼi pea mo gāueʼi totatou leʼo ʼo loto.

Te ʼAtamai, Te Loto, Pea Mo Tokotou Leʼo ʼo Loto

Neʼe ʼui fēnei e te ʼapositolo ko Paulo: “ ʼE ʼau tala te moʼoni ia Kilisito, ʼe mole ʼau loi, koteʼuhi ko toku leʼo ʼo loto ʼe ina fakamoʼoni mo ʼau ʼi te laumālie maʼoniʼoni.” (Loma 9:1) Koia ʼe feala ke fai e te leʼo ʼo loto he fakamoʼoni. ʼE feala ke ina sivi he faʼahiga aga, peʼe ina tali peʼe ina tauteaʼi. ʼE lahi te ʼu meʼa ʼe tou logoʼi ʼe lelei pea mo kovi, neʼe ko he ʼu meʼa neʼe ʼai e totatou Tupuʼaga ki totatou loto. Kae ʼe feala ke tou akoʼi totatou leʼo ʼo loto. ʼO feafeaʼi? ʼE tonu ke tou maʼu te ʼatamai mālama ʼaē ʼe haʼu mai te Folafola ʼa te ʼAtua. ʼE ʼui fēnei e te ʼapositolo ko Paulo: “Ke koutou fetogi ia koutou ʼo fakafoʼou tokotou ʼatamai, ke feala ai hakotou ʼiloʼi papau pe koteā te finegalo ʼo te ʼAtua, tona lelei, tona tali lelei, pea mo tona haohaoa.” (Loma 12:⁠2) Kapau ʼe koutou fakahū ki tokotou ʼatamai te ʼu manatu pea mo te finegalo ʼo te ʼAtua, pea ʼe kamata haʼele lelei anai tokotou leʼo ʼo loto.

Ko te kau Fakamoʼoni ʼa Sehova ʼe nātou tokoni ki te lauʼi miliona hahaʼi ʼi te malamanei ke nātou ‘ ʼiloʼi ia Sehova ʼAtua pea mo Sesu Kilisito.’ (Soane 17:3) ʼAki tanatou ʼu ako Tohi-Tapu, ʼe nātou ako ki te hahaʼi fakamalotoloto te ʼu lekula ʼa Sehova ʼAtua ʼo ʼuhiga mo te felāveʼi fakasino, te ʼinu kava, te ʼohoana, te ʼu felogoi ʼo ʼuhiga mo te gāue, pea mo te tahi ʼu meʼa.a (Tāʼaga Lea 11:1; Maleko 10:​6-​12; 1 Kolonito 6:​9, 10; Efesi 5:​28-​33) Ko te maʼu ʼo te “ ʼatamai mālama totonu” ʼaia ʼe ko he ala maʼuhiga moʼo fakatuputupu ʼo he leʼo ʼo loto ʼe pipiki ki te ʼAtua. (Filipe 1:⁠9) ʼE mahino ia, tatau aipe peʼe kua mahino lelei he Kilisitiano ki te Tohi-Tapu, ʼe tonu ke hoko atu tana fafaga tuʼumaʼu tona ʼatamai ʼaki te Folafola ʼa te ʼAtua, mo kapau ʼe ina loto ke lelei tuʼumaʼu tona leʼo ʼo loto.​—Pesalemo 1:​1-3.

ʼE toe fakapipiki foki e te Tohi-Tapu te leʼo ʼo loto ki te mafu fakatātā, ʼaē ʼe pipiki kiai te ʼu meʼa ʼe tou logoʼi pea mo te ʼu meʼa ʼe ʼi totatou loto. (Loma 2:​15) Ko te ʼatamai pea mo te mafu ʼe tonu ke nā gāue tahi mo kapau ʼe tonu ke haʼele lelei te leʼo ʼo loto. Ko tona faka ʼuhiga ʼe mole tonu ke gata ʼaki pe ʼi takotou fakahū ʼo he ʼu tuʼuga manatu ki tokotou ʼatamai. ʼE tonu ke koutou akoʼi tokotou loto​—te ʼu meʼa ʼaē ʼe koutou logoʼi ʼi tokotou loto, takotou ʼu holi, pea mo te ʼu meʼa ʼaē ʼe koutou manako kiai, pea mo te ʼu meʼa ʼaē ʼe ʼaoga kia koutou. Ko te tohi ʼo Tāʼaga Lea ʼe ina fakaʼaogaʼi te ʼu kupuʼi palalau ohage la ko te “fakafalele tou loto,” “taki tou loto,” pea “fakatuʼu tou loto.” (Tāʼaga Lea 2:2; 23:19; 27:23) Ko te faʼahiga fai ʼaē ʼe lelei moʼo akoʼi ʼo tokotou loto, ʼe ko te metitasioʼi pea mo te fakakaukauʼi ʼo te ʼu vaega faka Tohi-Tapu. ʼE ʼui fēnei ia Pesalemo 77:12: “ ʼE mahino papau ia ʼe ʼau metitasio anai ki tau gāue katoa, pea ʼe ʼau tokaga anai ki tau faʼahiga aga.” Ko te metitasio ʼe tokoni kia tatou ke tou ʼiloʼi te ʼu meʼa ʼaē ʼi totatou loto, pea mo te ʼu meʼa ʼaē ʼe nātou uga totatou loto.

Ohage la, mo kapau ʼe ko hakotou agamāhani te suluka. Ohage ko te tokolahi, ʼe koutou ʼiloʼi lelei ʼe fakatupu tuʼutāmaki ki tokotou maʼuli. Kae, logope la te ʼu palalau fakaloto mālohi ʼo tokotou ʼu kaumeʼa pea mo tokotou famili, ʼe koutou fakatokagaʼi ʼe faigataʼa te tuku ʼo takotou suluka. ʼE lava tokoni feafeaʼi takotou metitasioʼi ʼo te Tohi-Tapu moʼo fakaloto mālohiʼi tokotou leʼo ʼo loto?

Ohage la, koutou ʼahiʼahi te metitasioʼi ʼo te ʼu palalau ʼa te ʼapositolo ko Paulo ʼaē ʼe tou maʼu ia 2 Kolonito 7:⁠1: “Koia, koteʼuhi ʼe tou maʼu te ʼu fakapapau ʼaia, kāiga ʼofaina, tou fakamaʼa ia tatou mai te meʼa ʼuli fuli pe ʼo te kakano pea mo te laumālie, ʼo fakakatoa totatou maʼoniʼoni ʼi te manavasiʼi ki te ʼAtua.” Koutou fakakaukauʼi te faka ʼuhiga ʼo te ʼu palalau ʼaenī. Koutou fai te fehuʼi ʼaenī, ‘Ko “te ʼu fakapapau” fea koa ʼaē ʼe talanoa kiai ia Paulo?’ ʼI takotou lau te kapite ki muʼa atu, ʼe koutou fakatokagaʼi anai te meʼa ʼaē ʼe talanoa kiai ʼi te ʼu ʼuluaki vaega: “ ‘ “Ke koutou mavae mai te lotolotoiga ʼo nātou, pea ke koutou mavae kehe mai ai,” ko te ʼui ʼaia ʼa Sehova, “pea ʼaua naʼa koutou fāfā ki te meʼa ʼaē ʼe heʼemaʼa” ’; ‘ “pea ʼe ʼau tali anai koutou.” ’ ‘ “Pea ʼe ʼau liliu anai ko hakotou tāmai, pea ʼe koutou liliu anai kia te ʼau ko hoku ʼu foha pea mo hoku ʼu ʼofafine,” ko te ʼui ʼaia ʼa Sehova te Māfimāfi.’ ”​—2 Kolonito 6:​17, 18.

Kua mālohi age ʼi te temi ʼaenī te fakatotonu ʼa Paulo ke tou ‘fakamaʼa mai te ʼu meʼa ʼuli fuli pe ʼo te kakano’! Moʼo fakaloto mālohiʼi tatou ke tou fai te faʼahi ʼaia, ʼe fakapapau mai e te ʼAtua ʼe ina ‘tali anai tatou,’ ko tona faka ʼuhiga, ʼe ina puipui anai tatou. ʼE feala ke koutou fai te fehuʼi ʼaenī: ‘ ʼE ʼau felogoi lelei koa mo ia​—ohage ko te felogoi ʼa he tama peʼe ko he taʼahine mo tana ʼu mātuʼa?’ ʼE mole koutou leleiʼia koa te fakaafe ʼaē ke ‘tali’ koutou e he ʼAtua ʼofaina? Kapau ʼe mole koutou faʼa mahino ki te manatu ʼaenī, koutou vakaʼi peʼe fakahā feafeaʼi e te ʼu tāmai tonatou ʼofa ki tanatou ʼu tamaliki. ʼI te temi nei koutou fakakaukauʼi age muʼa mo kapau ʼe koutou felogoi feiā mo Sehova! Kapau ʼe lahi takotou metitasioʼi ʼo te faʼahi ʼaia, pea ʼe toe ʼāsili mālohi anai takotou holi ʼaē ki te taʼi felogoi ʼaia.

Kae koutou fakatokagaʼi: ʼE hoki feala ke koutou felogoi lelei mo te ʼAtua mo kapau ʼe mole koutou “fāfā ki te meʼa ʼaē ʼe heʼemaʼa.” Koutou fai te fehuʼi ʼaenī: ‘ ʼE mole kau koa la te suluka ki te “ ʼu meʼa heʼemaʼa” ʼaē ʼe tapuʼi e te ʼAtua? ʼE mole ʼuli ai koa toku kakano mo kapau ʼe ʼau suluka, ʼo feala ai haku maʼu he ʼu mahaki kehekehe? Mai tona ʼaluʼaga ʼaē ko Sehova ʼe maʼa, peʼe “maʼoniʼoni,” ʼe feala koa la ke ina tali te aga ʼaia ʼaē ʼe ʼau fai ʼi toku loto faʼitaliha?’ (1 Petelo 1:​15, 16) Koutou fakatokagaʼi, ʼe toe fai e Paulo te tahi fakatokaga ʼo ʼuhiga mo te ‘ ʼuli ʼo te laumālie,’ peʼe ko te meʼa ʼaē ʼe holi kiai tokotou ʼatamai. Koutou fai te fehuʼi ʼaenī: ‘Ko taku fia suluka ʼe ina puleʼi koa toku ʼatamai? ʼE ʼau fakafimālieʼi koa te meʼa ʼaē ʼe ʼau loto kiai, ʼo fakatupu tuʼutāmaki ki toku maʼuli, ki toku famili, peʼe ki toku ʼuhiga ia muʼa ʼo te ʼAtua? ʼE ʼau fakagafua anai koa ki te suluka ke ina maumauʼi toku maʼuli?’ Kapau ʼe koutou fai te ʼu fehuʼi ʼaia, pea ʼe feala anai hakotou mālohi ʼo līaki te suluka!

ʼE mahino papau ia, moʼo tauʼi takotou fia suluka, ʼe ʼaoga anai kia koutou te tokoni pea mo te lagolago ʼa ʼihi. Kae ʼe ʼaoga ʼaupito anai kia koutou te metitasioʼi ʼo te Tohi-Tapu, ke koutou akoʼi pea mo fakaloto mālohiʼi tokotou leʼo ʼo loto, ke feala hakotou līaki te suluka.

Mokā Tou Fai Te Meʼa ʼAē ʼe Kovi

Logope la tatatou faiga mālohi ʼaē moʼo fai ʼo te meʼa ʼaē ʼe totonu, ʼi ʼihi temi ʼe tou tō ki totatou vaivaiʼaga pea mo tou hēʼia. ʼE fakahoha anai tatou e totatou leʼo ʼo loto, kae ʼe lagi mole tou tokagaʼi anai. Peʼe feala ke tou lotovaivai ʼaupito ʼo tupu ai hatatou fia lītuʼa ki tatatou tauhi ki te ʼAtua. Kae tou manatuʼi te faʼifaʼitaki ʼo te Hau ko Tavite. ʼI tana ʼosi tono mo Pati-Sepa, neʼe fakamamahiʼi ia ia e tona leʼo ʼo loto. ʼE ina fakamatala fēnei te mamahi ʼaē neʼe ina logoʼi: “ ʼI te ʼaho mo te po ko tou nima neʼe mamafa kia te ʼau. Ko te mokomoko ʼo toku maʼuli kua liliu ko te vevela magemage ʼo te temi māfana.” (Pesalemo 32:4) ʼE ko he toe mamahi lahi ʼaē neʼe tau mo Tavite. Kae ko te mamahi ʼaia neʼe ina uga ia Tavite ke fakahemala, pea neʼe toe felogoi lelei ai mo te ʼAtua. (Vakaʼi ia 2 Kolonito 7:​10.) Ko te kole mamahi ʼaē e Tavite ke fakamolemole age e te ʼAtua, ʼe ko he fakamoʼoni ʼaia ʼo tana fakahemala ʼaki tona loto katoa. ʼI tana fakalogo ki tona leʼo ʼo loto, neʼe feala ai kia Tavite ke ina fetogi tana aga pea ke toe fiafia ki muli age.​—Pesalemo 51.

ʼE toe feala pe ke hoko te meʼa ʼaia ia ʼaho nei. Ko ʼihi neʼe nātou ako te Tohi-Tapu mo te kau Fakamoʼoni ʼa Sehova ʼi te temi muʼa, kae neʼe nātou tuku tanatou ako ʼi tanatou ʼiloʼi ʼaē ʼe mole ʼalutahi tonatou maʼuli mo te ʼu lekula māʼoluga ʼa te ʼAtua. Lagi ko ʼihi neʼe nonofo feiā, ka mole heʼeki ʼohoana, pe neʼe nātou fai māhani he ʼu aga heʼemaʼa. Neʼe fakamamahiʼi nātou e tonatou leʼo ʼo loto!

Kapau ʼe koutou tau mo te ʼaluʼaga ʼaia, koutou tokagaʼi te ʼu palalau ʼaē neʼe fai e te ʼapositolo ko Petelo ʼi te ʼaho ʼo te Penikosite. ʼI tana fakahā te ʼu agahala ʼa te kau Sutea, “neʼe malave ai ki tonatou loto.” Neʼe mole nātou fakafisi ki te faʼahi ʼaia, kae neʼe nātou mulimuli ki te tokoni ʼa Petelo ʼo nātou fakahemala, pea neʼe nātou maʼu ai te ʼofa ʼo te ʼAtua. (Gāue 2:​37-​41) ʼE feala ke koutou fai te faʼahi ʼaia! ʼAua naʼa koutou mavae ʼi te moʼoni ʼuhi pe he neʼe fakamamahiʼi koutou e tokotou leʼo ʼo loto, kae koutou tuku tokotou leʼo ʼo loto ke ina uga koutou ke koutou ‘fakahemala pea ke koutou tafoki mai.’ (Gāue 3:​19) ʼAki takotou lotomālohi pea mo takotou faiga, ʼe feala ke koutou fai te ʼu fetogi ʼaē ʼe ʼaoga, ke koutou maʼu ai te ʼofa ʼo te ʼAtua.

Tou “Taupau Mau He Leʼo ʼo Loto ʼe Lelei”

Tatau aipe pe neʼe hoki koutou kamata ako te ʼu ala ʼo Sehova peʼe kua koutou fai te faʼahi ʼaia talu mai fualoa ʼo koutou liliu ko he Kilisitiano fakapotopoto, ʼe ʼaoga kia koutou te tokoni ʼaenī ʼa Petelo: “Koutou taupau maʼu he leʼo ʼo loto ʼe lelei.” (1 Petelo 3:​16) ʼE ʼaoga ʼaupito te leʼo ʼo loto, kae mole ko he kavega. Koutou akoʼi tokotou leʼo ʼo loto, ʼo koutou fafaga tokotou ʼatamai pea mo tokotou loto ʼaki te poto ʼaē ʼe haʼu mai te Folafola ʼa te ʼAtua, te Tohi-Tapu. Koutou fakalogo ki tokotou leʼo ʼo loto mokā ʼe ina fai atu kia koutou he fakatokaga. Ko ʼaē ʼe fakalogo lelei ki tona leʼo ʼo loto, ʼe tokalelei anai tona loto.

ʼE mahino ia, ʼe mole ko he meʼa faigafua te akoʼi ʼo tokotou leʼo ʼo loto. Kae ʼe feala ke koutou faikole kia Sehova ʼAtua ke tokoni atu kia koutou. ʼAki tana tokoni, ʼe feala anai ke koutou tauhi ki te ʼAtua ʼaē ʼe ina foaki atu he “leʼo ʼo loto ʼe lelei pea mo he tui ʼe mole malualoi.”​—1 Timoteo 1:⁠5.

[Nota ʼi te lalo pasina]

[Paki ʼo te pasina 6]

Ko te lau pea mo te metitasioʼi ʼo te Folafola ʼa te ʼAtua, ʼe tokoni anai kia tatou ke tou akoʼi totatou leʼo ʼo loto