Kei Koutou Manatuʼi Koa?

Neʼe koutou fakatokagaʼi koa te ʼu alatike fakamuli ʼo Te Tule Leʼo? Kapau koia ʼaia, pea ʼe lagi koutou leleiʼia anai te ʼu fakamanatu ʼaenī?

◻ ʼE feafeaʼi anai ia Halamaketone? (Fakahā 16:14, 16)

ʼE mole ko he tau faka nukeleʼea peʼe ko he tuʼutāmaki ʼe fakahoko e te tagata. Kailoa, ʼe ko te tau ʼaē ka fakahoko e te ʼAtua moʼo fakagata te ʼu tau ʼa te tagata, pea mo fakaʼauha ia nātou fuli ʼaē ʼe nātou fakahoko te ʼu tau, pea moʼo fakahoko ʼo te tokalelei moʼoni kia nātou ʼaē ʼe manako ki te tokalelei. ʼE mole tuai anai. (Hapakuke 2:3)​—15/4, pasina 17.

◻ Ko te faʼahiga ʼohoana fea ʼaē ʼe ina faka maʼuhigaʼi ia Sehova?

Ko he fai ʼohoana ʼe hā ai te ʼu aga faka Kilisitiano kae mole ko te ʼu aga ʼo te mālama, ʼe ina faka maʼuhigaʼi moʼoni anai ia Sehova. ʼE fiafia anai te kau Kilisitiano ʼi te fai ʼohoana ʼaia, mo kapau ʼe nātou vakavakaʼi lelei peʼe mole nātou fai te ʼu aga ʼa te mālama, tana ʼu manatu hala pea mo te ʼu fai fakalāluvale, ke mole nātou tuku te fai ʼohoana ke fakatupu kovi ki te ʼu gāue faka teokalatike ʼaē ʼe fai māhani, pea ʼi tanatou agavaivai kae mole fia hā.​—15/4, pasina 26.

◻ Koteā te ʼu agaaga ʼo he tagata agatonu?

Ko he tagata agatonu ʼe feala ke tou falala ki ai, ʼo mole falala pe ki ai he tagata, kae ko te meʼa maʼuhiga tāfito, heʼe toe falala ki ai mo te ʼAtua. Ko te maʼa ʼo tona loto ʼe hā ʼi tana ʼu aga, ʼe mole malualoi ia. ʼE mole aga fakapikopiko peʼe aga fakahehema. (2 Kolonito 4:2)​—1/5, pasina 6.

◻ He koʼe neʼe ʼui e Selemia: “ ʼE ko he meʼa lelei ki te tagata mālohi ke ina ʼamo tona ʼakau toho lolotoga tona temi tūpulaga”? (Tagilāulau 3:​27)

Ko he tahi ʼe faiga ke ina tauʼi tona ʼu fihifihia ʼi tona temi tūpulaga, ʼe tokoni anai te faʼahi ʼaia kia ia ke ina tauʼi te ʼu fihifihia ʼo tona maʼuli mokā lahi anai. (2 Timoteo 3:​12) Ko te ʼu fua lelei ʼo te agatonu ʼe lelei age ia ʼi te fīmālie faka temi ʼaē ʼe lagi tou maʼu ʼi te faifaitahi ʼo te mālama ʼaenī.​—1/5, pasina 32.

◻ Koteā te meʼa ʼaē neʼe fakatātā e te hā ʼa Moisese pea mo Elia ʼi te fetogi ʼa Sesu?

ʼI te fetogi ʼa Sesu, ko Moisese pea mo Elia neʼe nā fakatātā te ʼu tēhina kua fakanofo ʼa Sesu. Ko tanā “hā mai . . . ʼi te kolōlia” mo Sesu neʼe ina fakatātā, ko te kau Kilisitiano fakanofo ʼe ‘faka kolōliaʼi fakatahi anai nātou’ mo ia ʼi te Puleʼaga ʼo selo. (Luka 9⁠:​30, 31; Loma 8⁠:17; 2 Tesalonika 1⁠:10)​—15/5, pasina 12, 14.

◻ Koteā te “meʼa fakalilo tapu” ʼa te ʼAtua? (1 Kolonito 2:7)

Ko te “meʼa fakalilo tapu” ʼa Sehova ʼe faka ʼuhiga tāfito kia Sesu Kilisito. (Efesi 1:​9, 10) ʼE mole faka ʼuhiga pe ki te ʼiloʼi ʼaē ko Sesu te Hāko ʼaē neʼe fakapapau peʼe ko te Mesia. ʼE pipiki kiai te puleʼaga ʼaē ʼi selo, te Puleʼaga Faka Mesianike ʼo te ʼAtua, ʼe toe kau kiai te gāue ʼaē neʼe hinoʼi kia Sesu ke ina fai ʼi te fakatuʼutuʼu ʼa te ʼAtua.​—1/6, pasina 13.

◻ ʼE tonu ke faka ʼuhigaʼi feafeaʼi e he Kilisitiano te temi matuʼa peʼe ko te mahaki?

ʼE mole tonu anai ke ina ʼui ko te fihifihia ʼaia ʼe ina faka tuʼakoi tana gāue kia Sehova, kae ʼe tonu ke ina faka ʼuhiga te faʼahi ʼaia ohage ko he faigamālie moʼo fakatuputupu tana falala ʼaē kia te ia. Tahi ʼaē meʼa, ʼe ina manatuʼi anai ko te maʼuhiga ʼo te gāue ʼa he Kilisitiano, ʼe mole fakafuafua ki te lahi peʼe ki te veliveli ʼo tana gāue, kae ʼe fakafuafua ʼaki tana tui pea mo te loloto ʼo tona ʼofa. (Maleko 12:41-​44)​—1/6, pasina 26.

◻ Neʼe hā feafeaʼi te poto lahi ʼo Sehova ʼi tana fakaʼaogaʼi he ʼu tagata ke nātou tohi te Tohi-Tapu kae mole ina fakaʼaogaʼi he ʼu ʼaselo?

Kapau neʼe mole ʼi ai he ʼu tagata moʼo tohi ʼo te Tohi-Tapu, ʼe lagi faigataʼa anai hatatou mahino ki te logo ʼo te Tohi-Tapu. Koia, ʼe lelei te ʼu agaaga kehekehe ʼo te Tohi-Tapu ʼuhi ko te ʼu tagata kehekehe ʼaē neʼe nātou tohi.​—15/6, pasina 8.

◻ ʼE maʼu ʼifea te kalavi ʼo te fiafia faka famili?

Ko te kalavi ʼo te fiafia faka famili ʼe tou maʼu ʼi te Folafola ʼa te ʼAtua, te Tohi-Tapu, pea mo tatatou maʼuliʼi tana ʼu pelesepeto, ohage ko te loto lolomi, te ʼiloʼi pe ko ai te pule famili, te felogoi lelei, pea mo te ʼofa.​—15/6, pasina 23, 24.

◻ Koteā ʼaē neʼe kehekehe ʼaupito ai te ʼu fakamālōlō ʼaē neʼe fai e Sesu mo te ʼu fakamālōlō ʼaē ʼe fai māhani ia ʼaho nei e nātou ʼaē ʼe nātou ʼui ʼe nātou maʼu te mālohi moʼo fakamālōlō?

Neʼe mole kalaga te hahaʼi pea neʼe mole avea ia Sesu. Tahi ʼaē meʼa, neʼe mole ʼui e Sesu neʼe mole feala tana fakamālōlō ia ia ʼaē ʼe mahaki koteʼuhi neʼe mole feʼauga tana falā pe neʼe mole feʼauga tana tui.​—1/7, pasina 5.

◻ Neʼe tokoni feafeaʼi ia Sehova ki tana hahaʼi ke nātou kau ki tana fakatuʼutuʼu fakaʼatua ʼo ʼuhiga mo tona huafa pea mo tona Puleʼaga?

ʼUluaki, neʼe foaki e Sehova ki tana hahaʼi te moʼoni. Lua, neʼe ina foaki kia nātou tona laumālie maʼoniʼoni. Pea tolu, ʼe tou maʼu totatou fale tautēhina ʼi te malamanei katoa pea mo te ʼu fakatuʼutuʼu lelei ʼo te kautahi ʼa Sehova ʼo ʼuhiga mo te tauhi.​—1/7, pasina 19, 20.

◻ Koteā koa te vilitute?

Ko te vilitute ʼe ko te kalitate ʼo te meʼa ʼaē ʼe lelei, te agalelei, ko te aga ʼaē ʼe lelei pea mo te manatu ʼaē ʼe lelei. ʼE ko he kalitate ʼe tonu ke tou maʼuliʼi, pea ʼe ʼi ai tona ʼu fua lelei. Ko te vilitute ʼe mole gata ʼaki pe te tekeʼi ʼo te agahala; ʼe faka ʼuhiga ki te maʼuliʼi ʼo te ʼu meʼa ʼaē ʼe lelei. (1 Timoteo 6:​11)​—15/7, pasina 14.

◻ Koteā te tofiʼa maʼuhiga ʼaē ʼe feala ke tuku e te ʼu mātuʼa ki tanatou fānau?

Ko te tofiʼa maʼuhiga ʼaē ʼe feala ke foaki e te ʼu mātuʼa ki tanatou fānau ʼe ko tanatou faʼifaʼitaki lelei ʼo ʼuhiga mo te ʼofa ki te hahaʼi. ʼE maʼuhiga ʼaupito ki te ʼu tamaliki ke nātou sio pea mo nātou logo ki te fakahā e tanatou ʼu mātuʼa tonatou ʼofa lahi ki te ʼAtua ʼi te ʼu meʼa fuli ʼaē ʼe nātou fai.​—15/7, pasina 21.

◻ Koteā te ʼu meʼa ʼaē ʼe ʼaoga ke lelei ai he ako faka famili?

ʼE tonu ke fai tuʼumaʼu te ako faka famili. ʼE tonu ke koutou ‘totogi te temi’ ki te ako. (Efesi 5:​15-​17) Koutou fai he ʼu ako ʼe fakafiafia ki takotou ʼu fānau ʼo koutou fakaʼaogaʼi te Tohi-Tapu. Ke feala he leleiʼia e te fānau te ako, ʼe tonu ke nātou ʼiloʼi ʼe maʼuhiga te ako ʼaia kia nātou.​—1/8, pasina 26, 28.