Tou Fakamālohiʼi Tatatou Tui Ki Te Folafola ʼa Te ʼAtua

ʼE LAHI ʼaupito te hahaʼi ʼaē kua nātou lau te Tohi-Tapu. Kae ʼe lahi koa ia nātou ʼaē ʼe nātou tui ki te logo ʼaē ʼe maʼu ai? ʼE ʼui mai e te Tohi-Tapu, “ko te tui ʼe mole ko he meʼa ʼe maʼu e te hahaʼi fuli.” (2 Tesalonika 3:2) ʼE hā lelei mai, ko te tui ʼe mole ko he meʼa ʼe tou tupu mo ia. ʼE ko he meʼa ʼe tonu ke tou fakatuputupu. Māʼiape la mo nātou ʼaē kua nātou maʼu te tui, ʼe mole tonu ke nātou manatu ʼe tologa anai tanatou tui ʼo talu ai. Ko te tui, ʼe feala ke liliu ʼo vaivai pea mo mate. Koia, ʼe tonu ai ke tou faiga ke tou nofo “mālohi ʼi te tui.”​—Tito 2:2.

Ko te tupuʼaga la ʼaia ʼo te fili e te Kolesi Pule ʼa te kau Fakamoʼoni ʼa Sehova te kupu tāfito ʼaenī, “Te Tui Ki Te Folafola ʼa Te ʼAtua” moʼo fai ʼo tanatou ʼu fakatahi faka Tisitilike ʼi te taʼu 1997 pea mo te taʼu 1998. Ko te kau Fakamoʼoni ʼa Sehova ʼe lauʼi miliona pea mo te tahi ʼu hahaʼi, neʼe nātou maʼu te pilivilesio ʼaē ke nātou fakatahitahi moʼo fakamālohiʼi tanatou tui ki te Folafola ʼa te ʼAtua.

Ko Te Folafola ʼa Te ʼAtua ʼe Ko Te Moʼoni​—Te Tafitoʼaga ʼo Tatatou Tui

Neʼe ko te kupu tāfito ʼaia ʼo te ʼuluaki ʼaho ʼo te fakatahi. Moʼo kamata ʼo te ʼaho ʼaia, neʼe fai he ʼu fakavikiviki kia nātou fuli ʼaē neʼe ʼōmai ki te fakatahi ʼaia. Ko te ʼōmai ʼa te hahaʼi ki te fakatahi, neʼe ko he fakahā ʼaia ʼo tanatou fakaʼapaʼapa ki te Tohi-Tapu. Kae neʼe fai te ʼu fehuʼi fakahagatonu ʼo ʼuhiga mo tatatou tui: ‘ ʼE feala koa hatatou fakahā te ʼu meʼa ʼaē ʼe tou tui kiai, ʼo tou fakaʼaogaʼi te Folafola ʼa te ʼAtua moʼo fakamoʼoni ʼaki? ʼE tou leleiʼia koa tatatou ʼu meʼa kai fakalaumālie, ʼo mole tou meʼa noaʼi te Tohi-Tapu, mo te ʼu fono ʼo te kokelekasio, pea mo te ʼu tohi ʼa te Sosiete? ʼE tuputupu koa totatou ʼofa, mo totatou ʼatamai mālama totonu, pea mo tatatou fakasiosio poto?’ Ko te tēhina ʼaē neʼe faiakonaki, neʼe ina fakaloto mālohiʼi te hahaʼi fuli ke nātou fakalogo fakalelei ki te ʼu akonaki, ʼo ina fakatokagaʼi kia nātou “ko te Fakatahi Faka Tisitilike ʼaia ‘Te Tui Ki Te Folafola ʼa Te ʼAtua’ neʼe teuteuʼi moʼo tokoni kia tatou ke tou sivisivi ia tatou takitokotahi, pea ke tou vakaʼi takitokotahi peʼe lelei tatatou tui.”

Neʼe fai te akonaki tāfito ko tona kupu tāfito ʼaenī, “Tou Haʼele ʼAki Te Tui, Ka Mole ʼAki Te Sio.” (2 Kolonito 5:7) Neʼe ʼui fēnei e te tēhina faiakonaki, “ko te tui ʼa nātou ʼaē ʼe nātou liliu ko he kau Fakamoʼoni ʼa Sehova ʼe mole ko he hoko tui pe.” Pea ʼe moʼoni te faʼahi ʼaia! Ko te tui moʼoni ʼe mole hoko feiā pe, kae ʼe fakatafito ki he ʼu meʼa ʼe hoko moʼoni. ʼE ʼui fēnei ia Hepeleo 11:1: “Ko te tui ʼe ko he ʼamanaki moʼoni ki he ʼu meʼa ʼe tou falala kiai, ko te fakamoʼoni lelei ʼo te ʼu moʼoni logope la ʼe mole tou sio kiai.” Neʼe fakatokagaʼi fēnei e te tēhina faiakonaki: “Kapau ʼe tou loto moʼoni ke tou haʼele ʼaki te tui, pea ʼe tonu ke mālohi te tafitoʼaga ʼo tatatou tui.” Mai tona ʼuhiga ʼaē ʼe tou haʼele ʼaki te tui, ka mole ʼaki te sio, koia ʼe mole ʼaoga ai ke tou ʼiloʼi ia meʼa fuli ʼo ʼuhiga mo te faʼahiga fai ʼa Sehova peʼe ko te temi fea ʼaē ka ina fakahoko ai anai tana ʼu fakatuʼutuʼu. Ko te ʼu meʼa ʼaē kua tou ʼiloʼi ʼo ʼuhiga mo ia, ʼe tupu ai tatatou falala ki tona mālohi ʼaē ka ina fakaʼaogaʼi anai moʼo fakahoko tana ʼu fakapapau ʼaki he agaʼofa pea mo he faitotonu.

Ko te akonaki “Ko Te Kau Tūpulaga Kilisitiano​—ʼE Maʼuhiga ʼAupito ʼi Te Kokelekasio,” neʼe ko he fakamanatu ʼaia ki te kau tūpulaga, ʼe nātou maʼuhiga kia mata ʼo Sehova. Neʼe fakaloto mālohiʼi nātou ke nātou tuputupu ʼi te faʼahi fakalaumālie pea ke nātou fai he ʼu fakatuʼutuʼu, ohage la ko te lau ʼo te Tohi-Tapu katoa pea mo te maʼuliʼi ʼo te ʼu pelesepeto faka Tohi-Tapu, ke feala ke nātou foaki tonatou maʼuli kia Sehova pea mo nātou papitema. Ko te hoko atu ʼo tanatou ʼu ako ʼi tanatou ʼosi maʼu pepa, ʼe ko he faʼahi ʼe tonu ke nātou vakaʼi takitokotahi pea mo nātou vakaʼi mo tanatou ʼu mātuʼa, kae kapau ʼe nātou fai te faʼahi ʼaia, pea ʼe tonu ke nātou fai ʼaki te fakatuʼutuʼu ʼaē ke ʼaoga te faʼahi ʼaia moʼo hikihiki tanatou tauhi ki te ʼAtua. Ko te faʼahiga ako ʼaia ʼe feala ke ʼi ai hona ʼu fua lelei mo kapau ʼe tou “vakaʼi te ʼu meʼa ʼaē ʼe maʼuhiga tāfito,” ia te ʼu meʼa ʼaē ʼe pipiki ki tatatou tui.​—Filipe 1:​9, 10.

ʼOsi te akonaki ʼaia, pea neʼe fai te ʼu akonaki e tolu ʼo fakatafito ki te kupu tāfito ʼaenī, “Ko Te ʼu Lekula ʼa Ai ʼAē ʼe Koutou Mulimuli Kiai?” Ko te tui ki te Folafola ʼa te ʼAtua ʼe ina uga tatou ke tou maʼuliʼi te ʼu lekula ʼo te Tohi-Tapu. ʼE fakalogo te kau Kilisitiano ki te ʼu lao pea mo te ʼu pelesepeto ʼa Sehova. Ohage la, ʼe fakaloto mālohiʼi tatou e te Tohi-Tapu ke ʼaua naʼa tou fai he ʼu palalau heʼe fakaʼapaʼapa peʼe ko he ʼu palalau fefeka. (Efesi 4:​31, 32) Ko te tēhina faiakonaki neʼe ina fai te fehuʼi ʼaenī: “Ka koutou lotomamahi peʼe koutou ʼiʼita, ʼe koutou fai koa he ʼu palalau fefeka ki tokotou ʼohoana peʼe ko takotou ʼu tamaliki?” ʼE mahino papau ia, ko te aga ʼaia ʼe mole tau mo feʼauga mo te kau Kilisitiano. Ko te ʼAtua, ʼe toe ʼi ai foki mo tana ʼu pelesepeto ʼo ʼuhiga mo tatatou faʼahiga teu. Ko te kau Kilisitiano, ʼe tonu ke nātou teuteu “ ʼaki he [ʼu] teu lelei, . . . ʼaki he agavaivai.” (1 Timoteo 2:​9, 10) Ko te kupu “agavaivai,” ʼe faka ʼuhiga ki te fakaʼapaʼapa ʼaē kia kita totonu, pea mo kita ʼiloʼi te meʼa ʼaē ʼe tau mo feʼauga, pea mo kita fakahā te fakasiosio poto ʼi te faʼahi ʼo te teu. Ko te meʼa ʼaē ʼe ina uga tatou ʼi te faʼahi ʼaia, ʼe ko totatou ʼofa ki totatou ʼu tēhina mo tuagaʼane, mo te ʼu pelesepeto ʼo te Tohi-Tapu, pea mo te ʼiloʼi ʼo te meʼa ʼaē ʼe tau mo feʼauga ke fai e te kau Kilisitiano.

ʼI te ʼu akonaki e lua ʼaē neʼe hoa mai kiai, neʼe tou vakaʼi ai te ʼu vaega fuli ʼo te ʼu koga tohi ʼo Hepeleo 3:​7-​15 pea mo te 4:​1-​16. Ko te ʼu vaega faka Tohi-Tapu ʼaia ʼe ko he ʼu fakatokaga kia tatou ke ʼaua naʼa “fakafefeka he tahi ia [tatou] ʼuhi mālohi fakahala ʼo te agahala.” (Hepeleo 3:​13) ʼE lava feafeaʼi hatatou mālo ʼi te tau ki te agahala? ʼE tokoni mai ia Sehova kia tatou ʼaki tana Folafola. ʼE moʼoni, “ko te Folafola ʼa te ʼAtua ʼe maʼuli pea ʼe mālohi . . . pea ʼe feala ke ina ʼiloʼi lelei te ʼu manatu pea mo te ʼu fakatuʼutuʼu ʼo te loto.”​—Hepeleo 4:12.

Neʼe fai te akonaki fakaʼosi ʼo te ʼuluaki ʼaho ʼo te fakatahi, ko tona kupu tāfito ʼaenī, “Ko He Tohi Maʼa Te Hahaʼi Fuli Pe.” Neʼe fakahā ai, ʼe tonu te ʼu fakamatala ʼo te Tohi-Tapu, pea ʼe ʼi ai tona ʼaoga ʼi totatou maʼuli. Neʼe ko he meʼa fakafiafia ʼaupito te tala e te tēhina faiakonaki, kua tā te kaupepa foʼou ko ʼona pasina e 32 pea ko tona kupu tāfito ʼaenī Un livre pour tous (Ko he tohi maʼa te hahaʼi fuli pe)! Neʼe fai tāfito te kaupepa ʼaia maʼa te hahaʼi ʼaē, logope kua lahi te ʼu meʼa ʼaē neʼe nātou ako ʼi te ʼu faleako, ka ʼe mole nātou ʼiloʼi lelei te Tohi-Tapu. Koʼeni te ʼu palalau fakaʼosi ʼo te akonaki: “ ʼE tonu ke vakaʼi takitokotahi e te hahaʼi te Folafola ʼa te ʼAtua. ʼE mātou ʼiloʼi papau, kapau ʼe nātou vakaʼi fakalelei, pea ʼe mahino anai kia nātou, ko te tohi ʼaia ʼaē ʼe lelei tokotahi, ia te Tohi-Tapu, ʼe ko he tohi neʼe fai maʼa te hahaʼi fuli pe!”

Koutou Faʼifaʼitaki Ki “Te Tagata ʼAē ʼe Ina Fakakatoa Tatatou Tui”

Ko te kupu tāfito ʼaia ʼo te lua ʼaho ʼo te fakatahi neʼe ina fakatokagaʼi tāfito tatou ʼo ʼuhiga mo Sesu Kilisito, te “Tagata ʼaē ʼe ina fakakatoa tatatou tui.” ʼE tonu ke tou “mulimuli lelei ki tona ʼu tafuga vaʼe.” (Hepeleo 12:2; 1 Petelo 2:​21) ʼE lahi te ʼu hahaʼi ʼo te Keletiate ʼaē ʼe ʼui kia nātou: ‘Koutou tui ki te ʼAliki ko Sesu, pea ʼe hāofaki anai koutou!’ Kae ʼe gata pe koa te tui ki te meʼa ʼaia? ʼE ʼui mai e te Tohi-Tapu, “ko te tui, kapau ʼe mole hana ʼu gāue, pea ʼe mate ia.” (Sake 2:​26) Koia ʼo hilifaki ki tatatou tui kia Sesu, ʼe tonu ke tou fai te ʼu gāue ʼaē neʼe ina fai, tāfito ʼo tou faka mafola ia te logo lelei ʼo te Puleʼaga ʼo te ʼAtua.

Ko te ʼu akonaki ʼo te uhu neʼe talanoa tāfito ki te gāue faka mafola. Ohage ko tona fai e Paulo, ʼe tonu ke tou lotomālohi ke tou kalagaʼi te logo lelei ʼo te hāofaki. (Loma 1:​14-​16) Neʼe faka mafola ia Sesu ki te hahaʼi ʼi te ʼu potu fuli pe. Logope la ʼe fua lelei tatatou fai faka mafola ʼi te ʼu ʼapi, kae kua lahi te hahaʼi ʼaē ʼe mole kei tou maʼu atu ʼi tonatou ʼu ʼapi mokā tou ʼaʼahi nātou. (Gāue 20:20) ʼE lahi ia nātou ʼaē ʼe kei ʼolo ʼo ako, peʼe nātou gāue, peʼe nātou faifakatau, peʼe nātou folau. Koia, ʼe toe tonu foki ke tou faka mafola ʼi te ʼu koga meʼa ʼaē ʼe lahi ai te hahaʼi, pea mo te ʼu potu fuli ʼaē ʼe feala ke tou maʼu ai te hahaʼi.

Ko te akonaki “Koutou Pipiki Maʼu Pea Mo Nofo Maʼu ʼi Te Moʼoni” neʼe ina fakamanatuʼi mai kia tatou, ʼe lahi ʼaupito te ʼu tisipulo foʼou ʼaē ʼe papitema​—ko te toko 1 000 tupu ʼi te ʼaho fuli! ʼE maʼuhiga ʼaupito kia nātou ʼaia ke nātou pipiki maʼu pea mo nonofo maʼu ʼi te tui. (Kolose 2:​6, 7) Neʼe ʼui e te tēhina faiakonaki, ko te ʼu aka ʼo he fuʼu ʼakau ʼe nātou ʼinu te vai pea mo fakaʼaogaʼi te ʼu meʼa kehekehe ʼo te kele, kae ʼe toe ʼaoga foki te ʼu aka ʼaia ki te fuʼu ʼakau ke feala hana tuʼu. ʼO toe feiā aipe, kapau ʼe nātou ako tuʼumaʼu pea mo nātou fakatahi mo tonatou ʼu tēhina mo tuagaʼane, pea ʼe pipiki maʼu anai te ʼu tisipulo foʼou ʼaia ki te moʼoni.

Neʼe lelei tāfito te tokoni ʼaia kia nātou ʼaē neʼe fia papitema. Ei, ʼi te lua ʼaho ʼo te fakatahi, neʼe lahi ʼaupito te kau tisipulo foʼou ʼaē neʼe papitema, ʼo nātou mulimuli ki te faʼifaʼitaki ʼa Sesu. Ko te akonaki “Ko Te Tui Ki Te Folafola ʼa Te ʼAtua ʼe Ina Taki Ki Te Papitema” neʼe ina fakamanatuʼi kia nātou ʼaē neʼe fia papitema, ko tonatou fakauku ʼaē ʼi te vai ʼe ina fakatātā tonatou mate ʼo ʼuhiga mo tonatou faʼahiga maʼuli ʼāfea, ʼi te temi ʼaē neʼe nātou manatu pe kia nātou totonu. Ko tanatou toe tutuʼu ake mai te vai ʼe ina fakatātā tanatou toe maʼuli moʼo fai ʼo te finegalo ʼo te ʼAtua.

Ko te akonaki “Koutou Tau Mālohi ʼi Te Tui” neʼe fakatafito ki te tohi faka Tohi-Tapu ʼo Suta. Neʼe fakaloto mālohiʼi tatou ke tou puipui tatatou tui ʼo tou tauʼi te ʼu faʼahiga aga ʼaē ʼe kovi, ohage ko te aga heʼeʼaoga, te agatuʼu, pea mo te ʼapositasia. ʼOsi te akonaki ʼaia, pea neʼe fai te ʼu tokoni ki te ʼu mātuʼa​—pea tāfito ki te ʼu pule famili—​ʼaki te akonaki ʼaenī, “Koutou Tokakaga Ki Te ʼu Meʼa ʼAē ʼe ʼAoga Ki Tokotou Loto Fale.” ʼE fakamaʼua e te Tohi-Tapu ki te pule famili ke ina foaki te ʼu meʼa ʼaē ʼe ʼaoga ki tona famili ʼi te faʼahi fakalaumālie, mo te faʼahi fakasino, pea mo te ʼu meʼa ʼaē ʼe ʼi tonatou loto. (1 Timoteo 5:8) Moʼo fakahoko ʼo te faʼahi ʼaia, ʼe fakamaʼua kiai he temi, mo he ʼu felogoi lelei, pea mo kita ʼiloʼi lelei tokita famili. ʼE mahino papau ia, ʼe leleiʼia e Sehova ʼAtua te gāue kinakina ʼa te ʼu mātuʼa Kilisitiano moʼo akoʼi tanatou ʼu fānau ʼi te moʼoni.

Ko te akonaki e koga tolu ʼaē neʼe hoa mai kiai, “Tou ʼOlo Ki Te ʼApi ʼo Sehova,” neʼe ina fakaloto mālohiʼi tatou ke tou leleiʼia te ʼu fono faka Kilisitiano. ʼI te ʼu lakaga ʼaia, ʼe feala ai ke tou galoʼi te ʼu tuʼania ʼo te mālama ʼaenī. ʼI te ʼu fono ʼaia, ʼe feala ai ke tou fefakaloto mālohiʼaki, pea mo tou fakahā totatou ʼofa ki totatou kāiga ʼi te tui. (Hepeleo 10:24, 25) Ko te ʼu fono, ʼe toe tokoni foki kia tatou ke tou faiva ʼi te faiakonaki, pea ʼe tuputupu ai tatatou mahino ki te ʼu fakatuʼutuʼu ʼa te ʼAtua. (Tāʼaga Lea 27:17) ʼOfa pe ke ʼaua naʼa tou fakamamaʼo ʼi te kokelekasio, pea ke tou manatuʼi te ʼu palalau ʼaenī ʼaē neʼe fai e Sesu: “Ko te potu ʼaē ʼe fakatahi ai he toko lua pe ko he toko tolu ʼi toku huafa, pea ʼe ʼau ʼi ai ʼi te lotomalie ʼo nātou.”​—Mateo 18:20.

Ko te akonaki fakaʼosi ʼo te ʼaho ʼaia neʼe ko tona kupu tāfito ʼaenī “Te Lelei ʼo Takotou Tui​—ʼE ʼAhiʼahiʼi ʼi Te Temi ʼAenī.” Ko te tui ʼaē neʼe mole heʼeki ʼahiʼahiʼi, ʼe mole ʼiloʼi peʼe mālohi peʼe kailoa, pea ʼe mole tou ʼiloʼi peʼe lelei peʼe kailoa. ʼE hage ko he seki ʼe mole ʼave ki te fale paʼaga. ʼE tou ʼiloʼi koa peʼe ʼi ai moʼoni te falā ʼaē ʼe tohi ai? ʼO toe feiā aipe, ʼe tonu ke ʼahiʼahiʼi tatatou tui ke tou ʼiloʼi ai, peʼe ʼi ai hona fakatafito pea mo mālohi. (1 Petelo 1:​6, 7) Neʼe ʼui fēnei e te tēhina faiakonaki: “ ʼI ʼihi temi, ʼe kākāʼi e te kau takitaki lotu pea mo te kau ʼaposita te hahaʼi ʼo te televisio, ke nātou laukoviʼi tatou, ʼo nātou fai he ʼu loi ʼo ʼuhiga mo tatatou tui faka Kilisitiano pea mo totatou faʼahiga maʼuli. . . . ʼE tou tuku anai koa te hahaʼi ʼaia ʼaē fakakiviʼi e Satana, ke nātou fakamatakuʼi tatou, mo fakavaivaiʼi tatou, pea mo fakaufiufiʼi tatou ʼi tatatou tala te logo lelei? ʼE tou tuku anai koa te ʼu loi ʼaia ʼo ʼuhiga mo te moʼoni ke nātou tāʼofi tatatou kau tuʼumaʼu ki te ʼu fono pea mo tatatou gāue fai faka mafola? Peʼe tou agatonu anai koa mo lototoʼa pea mo lotomālohi ke tou haga kalagaʼi te moʼoni ʼo ʼuhiga mo Sehova pea mo tona Puleʼaga?”

Tou Maʼuli ʼUhi Ko Te Tui

Ko te kupu tāfito ʼo te tolu ʼaho ʼo te fakatahi neʼe fakatafito ki te ʼu palalau ʼaenī ʼa Paulo: “ ʼE mahino ia, ʼe mole ʼui anai ko he tahi ʼe faitotonu ki te ʼAtua ʼuhi ko te lao, koteʼuhi ‘ ʼe maʼuli anai te faitotonu ʼuhi ko te tui.’ ” (Kalate 3:​11) Ko te akonaki koga tolu ʼaenī, “Ko Te ʼu Fakakikite ʼa Soele Ki Totatou Temi,” neʼe ko he koga maʼuhiga ʼo te polokalama ʼo te uhu ʼaia. Ko te tohi ʼo Soele ʼe faka ʼuhiga ki totatou temi pea ʼe ina fai te fakatokaga mālohi ʼaenī: “Meʼa la ke feafeaʼi ki te ʼaho ʼaenī; he kua ōvi mai te ʼaho ʼo Sehova, pea ʼe hoko mai anai ohage ko he laliki ʼe haʼu mai te Māfimāfi!” (Soele 1:​15) Ohage ko he ʼu heʼe mālohi, ko te kau Kilisitiano fakanofo neʼe mole nātou tuku he meʼa ke ina tāʼofi tanatou kalagaʼi te Puleʼaga ʼi te temi fakaʼosi ʼaenī.

ʼE toe fakahā foki e te tohi ʼo Soele he ʼamanaki, ʼo ina ʼui fēnei: “Ko ia ʼaē ʼe fetapā ki te huafa ʼo Sehova ʼe hāo anai ia.” (Soele 2:​32) Kae ʼe mole gata pe te faʼahi ʼaia ki te fakaʼaogaʼi ʼo te huafa ʼo Sehova. ʼE tonu ke kita fakahemala fakamalotoloto, ʼo līaki te ʼu aga ʼaē ʼe kovi. (Soele 2:​12, 13) ʼE mole tonu ke tou fakatuatuai, heʼe kua vave hoko mai te temi ʼaē ka fakamāuʼi anai e Sehova te ʼu puleʼaga, ohage ko tana fai ki Moape, mo Amone, pea mo te potu fenua moʼugaʼia ʼo Seile ʼi te ʼu ʼaho ʼo te Hau ʼo Suta ko Sosafate.​—2 Fakamatala 20:​1-​30; Soele 3:2, 12.

Neʼe fakaloto mālohiʼi te hahaʼi fuli ʼaki te akonaki “Tou Fakahā Te Tui ʼo Tou Talitali Kia Sehova.” Ia ʼaho nei, ʼi te kua vave ʼosi ʼo te temi fakaʼosi, ʼe tou sio ai ki te kua hoko ʼo te ʼu fakapapau ʼa Sehova, pea ʼe tou fia ʼiloʼi te ʼu meʼa ʼaē ka vave hoko mai. Ko te hahaʼi ʼa Sehova, ʼe tonu ke nātou haga faʼa kātaki, ʼo nātou manatuʼi, ʼe hoko anai te ʼu meʼa fuli ʼaē neʼe fakapapau e te ʼAtua.​—Tito 2:13; 2 Petelo 3:9, 10.

Neʼe fakaʼosi te polokalama ʼo te uhu ʼaia ʼaki te kiʼi gaoʼi ko tona kupu tāfito ʼaenī, “Koutou Taupau He Mata ʼe Lelei.” Ko te gaoʼi ʼaia neʼe ina fakaloto mālohiʼi tatou ke tou vakaʼi peʼe tou faka ʼuhiga feafeaʼi te ʼu koloā. Tatau aipe pe kofea te potu ʼaē ʼe tou nonofo ai, kae kapau ʼe tou fia maʼuli fīmālie, pea ʼe tonu ke tou maʼuliʼi te tokoni ʼa Sesu, ʼaē neʼe ina ʼui ke tou maʼu he mata ʼe lelei, ʼo tou tokaga tāfito ki te Puleʼaga ʼo te ʼAtua.​—Mateo 6:​22.

Koʼeni te kupu tāfito ʼo te akonaki ʼaē neʼe fai ki te kaugamālie, “Ko Te Tui Pea Mo Tokotou Ka Haʼu.” Neʼe fakahā ai te ʼu fakamoʼoni, ko te kau takitaki fakatagata ʼe mole feala ke nātou fakatokatoka te ʼu fihifihia ʼo te malamanei. (Selemia 10:23) ʼE mole heʼeki fetogi te ʼaluʼaga ʼo te malamanei talu mai te kamataʼaga​—pea kua toe ʼāsili kovi age. E feafeaʼi te manatu ʼa te kau Fakamoʼoni ʼa Sehova ʼo ʼuhiga mo te ka haʼu? ʼE tou tui, ʼe manuʼia anai te ka haʼu ʼo te malamanei ʼi te takitaki ʼo te Puleʼaga ʼo te ʼAtua. (Mateo 5:5) ʼE fakahoko anai e te ʼAtua tana ʼu fakapapau ke fua manuʼia kia nātou fuli ʼaē ʼe nātou tui ki tana Folafola, ʼaē ʼe ina fakatotonu fēnei mai: “Koutou kumi ia Sehova, ʼi te temi ʼaē ʼe kei feala ai tona maʼu. Koutou pāui kia te ia, ʼi te temi ʼaē ʼe ōvi mai ai.”​—Isaia 55:6.

Neʼe fai e Sesu te fehuʼi maʼuhiga ʼo ʼuhiga mo totatou temi. Neʼe ina fehuʼi fēnei: “Ka haʼu anai te Foha ʼo te Tagata, ʼe ina maʼu moʼoni anai koa te tui ʼi te kele?” (Luka 18:8) ʼI te akonaki fakaʼosi, neʼe fai he fakamanatu ʼo te polokalama katoa ʼo te fakatahi pea mo fakahā ai, ko te ʼu akonaki fuli ʼaia neʼe nātou foaki he ʼu fakamoʼoni, ʼe feala ke tou tui ki te Folafola ʼa te ʼAtua, logope la ʼe tou maʼuʼuli ʼi he mālama heʼe tui ʼe tokaga pe te hahaʼi ki te ʼu koloā.

Kae ʼe feala ke tou fai takitokotahi te fehuʼi ʼaenī, ‘ ʼE ʼau kau koa kia nātou ʼaē ʼe tui mālohi ki te ʼAtua pea mo tana Folafola?’ Ko te Fakatahi Faka Tisitilike “Te Tui Ki Te Folafola ʼa Te ʼAtua,” ʼe tonu ke tokoni kia tatou ke tou ʼio ki te fehuʼi ʼaia. Pea ʼe tou loto fakafetaʼi kia Sehova ʼuhi ko tana fakamālohiʼi tatatou tui kia te ia pea mo tana Folafola taputapu, ia te Tohi-Tapu!

[Paki ʼo te pasina 24]

Neʼe kaugamālie ia nātou neʼe gāue fakafiafia moʼo tokoni ki te toko lauʼi afe hahaʼi ʼaē neʼe ʼōmai ki te fakatahi

[Paki ʼo te pasina 25]

Ko L. A. Swingle ʼaē ʼe kau ʼi te Kolesi Pule, ʼe ina fakahā te nusipepa foʼou

[Paki ʼo te pasina 25]

Neʼe fakaʼaogaʼi te ʼu malaʼe faigaoʼi lalahi ʼi te malamanei katoa

[Paki ʼo te pasina 26]

Ko te tokolahi neʼe nātou papitema moʼo fakahā ʼaki, kua nātou foaki tonatou maʼuli kia Sehova

[Paki ʼo te pasina 27]

Neʼe nātou hivaʼi fakafiafia te ʼu katiko. ʼI ʼoluga: te kiʼi gaoʼi “Tou Taupau He Mata ʼe Lelei”