ʼE Koutou Tui Moʼoni Koa Ki Te Logo Lelei?

“Ko te puleʼaga ʼo te ʼAtua kua fakaōvi mai. Koutou fakahemala, pea mo koutou tui ki te logo lelei.”—Maleko 1:15, MN.

1, 2. ʼE feafeaʼi anai hakotou fakamahino ia Maleko 1:14, 15?

NEʼE kamata e Sesu Kilisito tona minisitelio lahi ʼi Kalilea ʼi te taʼu 30 ʼo totatou temi. ʼI tana lolotoga faka mafola “te logo lelei ʼa te ʼAtua,” neʼe tokolahi te kau Kalilea neʼe nātou fia logo ʼuhi ko tana palalau ʼaenī: “Ko te temi ʼaē neʼe fakakatofa kua iku, pea ko te puleʼaga ʼo te ʼAtua kua fakaōvi mai. Koutou fakahemala, pea mo koutou tui ki te logo lelei.”—Maleko 1:14, 15, MN.

² Kua hoko mai “te temi ʼaē neʼe fakakatofa” ke kamata ai e Sesu tona minisitelio pea ke fai e te hahaʼi he fakatuʼutuʼu ke nātou maʼu ai te ʼofa ʼo te ʼAtua. (Luka 12:54-56) ‘Kua ōvi mai te puleʼaga ʼo te ʼAtua’ koteʼuhi ko Sesu kua nofo ʼi te kele ʼi tona ʼuhiga Hau Fakanofo. Ko tana gāue fai faka mafola neʼe uga ai te hahaʼi faitotonu ke nātou fakahemala. Kae neʼe nātou fakahā feafeaʼi tanatou “tui ki te logo lelei,” pea e feafeaʼi kia tatou?

3. Koteā ʼaē neʼe fai e te hahaʼi moʼo fakahā tanatou tui ʼaē ki te logo lelei?

³ Ko te ʼapositolo ko Petelo ohage ko Sesu neʼe ina fakaloto mālohiʼi ia te hahaʼi ke nātou fakahemala. ʼI tana palalau ki te kau Sutea ʼi Selusalemi ʼi te Penikosite ʼo te taʼu 33 ʼo totatou temi, neʼe ʼui fēnei e Petelo: “Koutou fakahemala pea koutou tahi papitema i te huafa o Sesu Kilisito o uhiga mo te fakamolemole o autou agahala, pea e koutou tali anai mo te Laumalie-Maonioni.” Neʼe fakahemala te ʼu toko lauʼi afe hahaʼi, pea neʼe nātou papitema, ʼo nātou liliu ai ko te ʼu tisipulo ʼa Sesu. (Gaue 2:38, 41; 4:4) ʼI te taʼu 36 ʼo totatou temi, ko te kau Senitile ʼaē neʼe fakahemala neʼe nātou fai te ʼu faʼahi ʼaia. (Gaue 10:1-48) ʼI totatou temi, ko te ʼu toko lauʼi afe hahaʼi neʼe nātou fakahemala mai tanatou ʼu agahala ʼuhi ko tanatou tui ʼaē ki te logo lelei, pea neʼe nātou foaki tonatou maʼuli ki te ʼAtua, pea nātou papitema. Neʼe nātou tali te logo lelei ʼo te maʼuli pea nātou tui ki te sakilifisio faitotogi ʼa Sesu. Tahi ʼaē meʼa, ʼe nātou maʼuliʼi te faitotonu pea mo lagolago ki te Puleʼaga ʼo te ʼAtua.

4. Koteā koa te tui?

⁴ Kae koteā koa te tui? Neʼe tohi fēnei e te ʼapositolo ko Paulo: “Ko te tui ʼe ko he ʼamanaki moʼoni ki he ʼu meʼa ʼe tou falala kiai, ko te fakamoʼoni lelei ʼo te ʼu moʼoni logope la ʼe mole tou sisio ki ai.” (Hepeleo 11:1, MN ) ʼE fakahā lelei mai e tatatou tui ʼe hoko moʼoni anai ia meʼa fuli ʼe fakapapauʼi mai e te ʼAtua ʼi tana Folafola. ʼE hage ko he pepa ʼe fakamoʼoni ai kua tou maʼu he tofiʼa. Ko te tui ʼe toe faka ʼuhiga foki ko “te fakamoʼoni lelei,” peʼe ko he fakamoʼoni ʼo ʼuhiga mo he ʼu meʼa ʼe mole tou sio kiai. Ko totatou ʼatamai pea mo totatou loto ʼaē ʼe fonu ʼi te fakafetaʼi, ʼe nā fakamoʼoni mai ko te ʼu meʼa ʼaia ʼe moʼoni, logola ʼe mole heʼeki tou sio kiai.—2 Kolonito 5:7; Efeso 1:18.

ʼE Tonu Ke Tou Tui!

5. He koʼe ʼe maʼuhiga ʼaupito te tui?

⁵ Neʼe tou tutupu ake mo te manatu ki te ʼu meʼa fakalaumālie, kae neʼe mole tou tutupu ake mo te tui. ʼI tona fakahagatonu, “e mole mau te tui e te tagata fuli.” (2 Tesalonika 3:2) Kae ʼe tonu ki te kau Kilisitiano ke nātou maʼu te tui ke feala ai hanatou maʼu te ʼu fakapapau ʼa te ʼAtua. (Hepeleo 6:12) ʼI tana ʼosi talanoa ki te ʼu hahaʼi neʼe tui, neʼe tohi fēnei e Paulo: “ ʼUhi heʼe takatakai tatou e te ʼao lahi ʼo te kau fakamoʼoni, tou līaki te ʼu meʼa fuli pe ʼaē ʼe mamafa pea mo te agahala ʼaē ʼe ina tāʼofi gafua ia tatou, pea ke tou faʼa kātaki ʼo feleleʼi ʼi te lele ʼaē kua tuku mai kia tatou, ʼo tou sioʼi tuʼumaʼu ia Sesu, te Fakafofoga tāfito pea mo haohaoa ʼo tatatou tui.” (Hepeleo 12:1, 2, MN ) Koteā koa “te agahala ʼaē ʼe ina tāʼofi gafua ia tatou”? Ko tatatou mole kei tui ki te ʼu meʼa ʼaē neʼe tou tui kiai. Moʼo taupau he tui mālohi, ʼe tonu ke tou “sioʼi tuʼumaʼu ia Sesu” pea mo muliʼi tana faʼifaʼitaki. ʼE tonu foki ke tou toe līaki te ʼu aga heʼeʼaoga, ke tou tauʼi te ʼu gāue ʼo te kakano, pea mo fakafisi ki te fia maʼu koloā, mo te ʼu filosofia ʼo te malamanei, pea mo te ʼu talatisio ʼaē ʼe mole fakatafito ki te Tohi-Tapu. (Kalate 5:19-21; Kolose 2:8; 1 Timoteo 6:9, 10; Suta 3, 4) Tahi ʼaē meʼa, ʼe tonu ke tou tui ko te ʼAtua ʼe nofo mo tatou pea ʼe fua lelei moʼoni te ʼu tokoni ʼo tana Folafola.

6, 7. He koʼe ʼe tonu ke tou faikole ʼo ʼuhiga mo te tui?

⁶ ʼE mole tou lava fakatupu te tui ʼi totatou loto ʼaki pe totatou mālohi fakatagata. Ko te tui ʼe kau ki te fua ʼo te laumālie maʼoniʼoni ʼo te ʼAtua, peʼe ko tona mālohi gāue. (Kalate 5:22, 23) Koia, ʼe feafeaʼi anai mo kapau ʼe tonu ke fakamālohiʼi tatatou tui? Neʼe ʼui fēnei e Sesu: “Kapau ko koutou . . . ʼe koutou popoto ʼi te foaki ki ʼakotou ʼu fānau he ʼu meʼa ʼofa ʼe lelei, e feafeaʼi leva la te lahi ake ia ʼo te foaki e te Tāmai ʼaē ʼe ʼi selo te laumālie maʼoniʼoni kia nātou ʼaē ʼe nātou kole kia te ia!” (Luka 11:13, MN ) Ei, tou kole te laumālie maʼoniʼoni, heʼe feala ke ina fakatupu ia tatou te tui ʼaē ʼe ʼaoga moʼo fai ia te finegalo ʼo te ʼAtua, logola te ʼu faigataʼaʼia ʼaupito ʼaē ʼe tau mo tatou.—Efeso 3:20.

⁷ ʼE tonu ke tou faikole ke lahi age tatatou tui. ʼI te kapu ʼaē e Sesu te temonio ʼi te kiʼi tamasiʼi, neʼe tagi fēnei age te tāmai ʼa te kiʼi tamasiʼi: “ ʼE ʼau tui! Ke ke tokoni mai kia te ʼau ʼi te faʼahi ʼaē ʼe ʼaoga ai ke ʼau tui!” (Maleko 9:24, MN ) Neʼe ʼui fēnei e te kau tisipulo ʼa Sesu: “Foaki mai kia mātou he tui ʼe lahi ake.” (Luka 17:5, MN ) Koia, tou faikole ʼo ʼuhiga mo tatatou tui, ʼo tou falala ko te ʼAtua ʼe ina tali te ʼu taʼi faikole ʼaia.—1 Soane 5:14.

Ko Te Tui Ki Te Folafola ʼa Te ʼAtua ʼe Maʼuhiga

8. ʼE lava tokoni feafeaʼi mai te Folafola ʼa te ʼAtua?

⁸ ʼI muʼa pe ʼo tona mate faka sakilifisio, neʼe ʼui fēnei e Sesu ki tana kau tisipulo: “Aua naʼa hoha outou loto; koutou tui ki te Atua pea koutou tui mai kia te au.” (Soane 14:1) ʼI totatou ʼuhiga Kilisitiano, ʼe tou tui ki te ʼAtua pea mo tona ʼAlo. Kae e feafeaʼi ki te Folafola ʼa te ʼAtua? Kapau ʼe tou tui ʼo ako pea mo maʼuliʼi te Tohi-Tapu, pea ʼe feala ke tokoni lahi mai ki totatou maʼuli, pea mo foaki mai te ʼu tokoni pea mo te takitaki ʼaē ʼe ʼaoga kia tatou.—Hepeleo 4:12.

9, 10. ʼE koutou fakamahino feafeaʼi anai te ʼu palalau ʼaē ʼe tuʼu ia Sakopo 1:5-8 ʼo ʼuhiga mo te tui?

⁹ ʼE lahi totatou ʼu fihifihia ʼi totatou ʼuhiga heʼe haohaoa. Kae ko tatatou tui ki te Folafola ʼa te ʼAtua ʼe lava tokoni moʼoni mai kia tatou. (Sopo 14:1) Ohage la, kapau ʼe mole tou popoto ʼi te fakatokatoka ʼo he faʼahiga fihifihia, ʼe foaki mai e te Folafola ʼa te ʼAtua te tokoni ʼaenī: “Kapau ko he tahi ia koutou e ina fia mau te poto, ke ina kole ki te Atua, e ina foaki mo te ofa ki te tagata fuape pea e mole ina valoki, e ina foakiʼage anai kia te ia. Kae ke ina kole mo tui, aua naa lotolotolua i he mea, koteuhi ko ae e lotolotolua, e hage ia ko te galu o te moana e lagai e te matagi o fakahou. Pea naa amanaki te tagata aia e ina tali anai he mea mai te Aliki: ko he tagata e lotolotolua pea e lotomaveu i ana gaue fuape.”—Sakopo 1:5-8.

¹⁰ ʼE mole valokiʼi anai tatou e Sehova ʼAtua heʼe mole tou popoto pea ʼe tou kole age te poto. Kae ʼe tokoni mai anai ke tou poto ʼi te fakatokatoka ʼo te fihifihia. ʼE lagi feala ki he ʼu tēhina mo tuagaʼane ke nātou fakatokagaʼi mai ni ʼu vaega faka Tohi-Tapu ʼe ʼaoga kia tatou, peʼe tou maʼu te ʼu vaega ʼaia ʼi te temi ʼaē ʼe tou ako ai te Tohi-Tapu. Peʼe lagi feala ke takitaki tatou e te laumālie maʼoniʼoni ʼo Sehova ʼi he tahi ʼu ʼaluʼaga. Kapau ʼe tou “kole mo tui, [ʼo mole tou] lotolotolua i he mea,” pea ʼe foaki mai anai e tatatou Tāmai ʼaē ʼe ʼi selo te poto moʼo fakatokatoka totatou ʼu fihifihia. ʼE mole feala anai ke tou fakaʼamu ʼe tou maʼu he meʼa mai te ʼAtua mo kapau ʼe tou hage ko te peau ʼo te tai ʼaē ʼe fakahou e te matagi. Koteā tona tupuʼaga? Koteʼuhi ʼe faka ʼuhiga anai neʼe tou lotolotolua pea mo loto maveuveu ʼi te faikole peʼe ko he tahi atu ʼu ʼaluʼaga—ei, māʼiape la mo tatatou tui ʼaē ki te ʼAtua. Koia ʼe tonu ke tou tui mālohi ki te Folafola ʼa te ʼAtua pea mo tana takitaki. Tou vakaʼi te ʼu faʼifaʼitaki ʼo tana tokoni pea mo tana takitaki.

Te Tui Pea Mo Te Meʼa Kai

11. Koteā te fakamoʼoni ʼe tou maʼu ʼi tatatou tui ki te Folafola ʼa te ʼAtua ʼo ʼuhiga mo te ʼu meʼa ʼaē ʼe ʼaoga kia tatou ʼi te ʼaho fuli?

¹¹ E feafeaʼi la mo kapau ʼe tou maʼuʼuli masiva? Ko te tui ki te Folafola ʼa te ʼAtua ʼe ina foaki te ʼamanaki moʼoni, ko Sehova ʼe tokaga anai ki te ʼu meʼa ʼaē ʼe ʼaoga kia tatou ʼi te ʼaho fuli, pea ʼe ina foaki moʼoni anai te meʼa kai lahi maʼa nātou ʼaē ʼe ʼoʼofa kia te ia. (Pesalemo 72:16; Luka 11:2, 3) ʼE feala ke tou lotomālohi mokā ʼe tou metitasioʼi te tokaga ʼaē ʼa Sehova ʼo fafaga tana polofeta ko Elia ʼi te temi hoge. Ki muli age, ko te ʼAtua ʼaki he moʼi falena pea mo he moʼi lolo neʼe ina fafaga faka milakulo ai ia te fafine mo tana tama, pea mo Elia. (1 Hau 17:2-16) ʼI te temi neʼe puleʼi ai ia Selusalemi e Papiloni, neʼe toe tokaga aipe ia Sehova ki te meʼa kai ʼa te polofeta ko Selemia. (Selemia 37:21) Logola ko Selemia pea mo Elia neʼe veliveli tanā meʼa kai, kae neʼe tokaga ia Sehova kia nāua. ʼE ina toe fafaga feiā mo nātou ʼaē ʼe nātou haga tui kia te ia ia ʼaho nei.—Mateo 6:11, 25-34.

12. ʼE tokoni feafeaʼi mai anai te tui ke tou maʼu hatatou meʼa kai?

¹² ʼE mole tou maʼu anai he ʼu koloā fakamālama ʼi tatatou tui pea mo tatatou maʼuliʼi te ʼu pelesepeto faka Tohi-Tapu, kae ʼe tokoni mai anai ke tou maʼu te ʼu meʼa ʼaē ʼe ʼaoga ki totatou maʼuli fakasino. Tou toʼo te fakatātā: ʼE tokoni mai te Tohi-Tapu kia tatou takitokotahi ke tou agatonu, mo faʼafai, pea mo faʼa gāue. (Tāʼaga Lea 22:29; Tagata Tānaki 5:18, 19; 2 Kolonito 8:21) ʼI te temi fuli tou faiga ke palalau lelei totatou ʼu kaugā gāue ʼo ʼuhiga mo tatou. ʼI te ʼu fenua ʼaē ʼe tahitahiga ai te maʼu ʼo he gāue ʼe totogi lelei, ʼe faigafua age te fakaʼaogaʼi ʼo te hahaʼi ʼaē ʼe agatonu, mo gāue lelei, pea mo poto gāue. Logola ko te kau gāue ʼaia ʼe lagi mole lahi tonatou ʼu koloā faka mālama, kae ʼi te agamāhani ʼe nātou maʼu te ʼu meʼa tāfito ki te maʼuli, pea mo fiafia ʼi tanatou kai te ʼu fua ʼo tanatou gāue.—2 Tesalonika 3:11, 12.

ʼE Tokoni Mai Te Tui Ke Tou ʼUtakiʼi Totatou ʼu Mamahi

13, 14. ʼE tokoni feafeaʼi te tui ke tou ʼutakiʼi te mamahi?

¹³ ʼE fakahā lelei e te Folafola ʼa te ʼAtua ʼe tou mamahi mokā mate he tahi ʼe tou ʼofa ai. Ko te pateliaka ko Apalahamo neʼe putu ʼi te mate ʼo tona ʼohoana ʼofaina ko Sala. (Senesi 23:2) Neʼe mamahi ʼaupito ia Tavite ʼi tana logo ʼaē kua mate tona foha ko Apisalome. (2 Samuele 18:33) ʼO feiā pe la mo te tagata haohaoa ko Sesu neʼe tagi ʼi te mate ʼo tona kaumeʼa ko Lasalo. (Soane 11:35, 36) Ka mate he tahi ʼe tou ʼofa ai, ʼe lagi teitei faigataʼa te pulihi ʼo totatou mamahi ʼaia, kae ko tatatou tui ki te ʼu fakapapau ʼaē ʼi te Folafola ʼa te ʼAtua, ʼe feala ke tokoni mai kia tatou ke tou ʼutakiʼi te taʼi mamahi ʼaia.

¹⁴ Neʼe ʼui e Paulo “ ʼe ʼau maʼu te ʼamanaki ʼaenī ki te ʼAtua . . . ʼe ʼi ai anai he fakatuʼuake ʼo te kau faitotonu pea mo te kau heʼe faitotonu.” (Gaue 24:15, MN ) ʼE tonu ke tou tui ko te ʼAtua ʼe fakatuʼutuʼu ke ina fakatuʼuake te tokolahi mai te mate. (Soane 5:28, 29) Ia nātou ʼaia, ʼe kau ai anai ia Apalahamo pea mo Sala, Isaake pea mo Lepeka, Sakopo pea mo Lea—ko nātou fuli ʼaia ʼe nātou momoe nei ʼi te mate pea ʼe nātou fakatalitali ke fakatuʼuake nātou ʼi te mālama foʼou ʼo te ʼAtua. (Senesi 49:29-32) ʼE ko he meʼa fakafiafia mokā fakaʼala ake anai te hahaʼi ʼaē neʼe tou ʼoʼofa ai, mai te mate ki te maʼuli ʼi te kele! (Apokalipesi 20:11-15) ʼI te temi nei, mole heʼeki pulihi e te tui te ʼu mamahi fuli, kae ʼe ina fakaōvi anai tatou ki te ʼAtua, ʼaē ʼe tokoni mai ke tou ʼutakiʼi totatou lotomamahi mokā mate he tahi neʼe tou ʼofa ai.—Pesalemo 121:1-3; 2 Kolonito 1:3.

Ko Te Tui ʼe Ina Fakaloto Mālohiʼi Te Kau Lotovaivai

15, 16. (a) He koʼe ʼe tou lava ʼui ʼe toe lotovaivai mo nātou ʼaē ʼe tui? (b) Koteā ʼaē ʼe tou lava fai moʼo tauʼi te lotovaivai?

¹⁵ ʼE fakahā e te Folafola ʼa te ʼAtua, māʼiape la mo nātou ʼaē ʼe nātou tui ʼe feala ke nātou lotovaivai. ʼI tona ʼahiʼahi lahi, neʼe manatu e Sopo ko te ʼAtua kua ina līaki ia ia. (Sopo 29:2-5) Neʼe lotovaivai ia Nehemia ʼuhi ko te maumau ʼo te kolo ʼo Selusalemi pea mo tona ʼu kaupā. (Nehemia 2:1-3) Neʼe “tagi mamahi” ia Petelo he neʼe lotomamahi ʼi tana ʼosi fakafisi kia Sesu. (Luka 22:62) Pea ko Paulo neʼe ina uga tona ʼu kaugā fagona ʼi te kokelekasio ʼo Tesalonika ke nātou fai he ʼu “palalau fakaloto fīmālie ki te ʼu nefesi ʼaē ʼe lotovaivai.” (1 Tesalonika 5:14, MN ) Koia tatau aipe mo te hahaʼi ʼaē ʼe tui ia ʼaho nei ʼe nātou lotovaivai. Koia, koteā ʼaē ʼe tou lava fai moʼo ʼutakiʼi te lotovaivai?

¹⁶ ʼE feala ke tou lotovaivai koteʼuhi ʼe tou tau mo ni ʼu fihifihia lahi. Kae ʼaua naʼa tou manatu ʼe mamafa fau, heʼe feala ke tou fakatokatoka māmālie ʼaki tatatou maʼuliʼi ia te ʼu pelesepeto faka Tohi-Tapu. ʼAki te faʼahi ʼaia ʼe feala ke tou lolomi ai totatou lotovaivai. ʼE toe ʼaoga foki ke tou gāue fakapotopoto pea mo mālōlō fakalelei. Ko te meʼa ʼaē ʼe moʼoni: ʼE tou maʼu te fīmālie fakalaumālie ʼi tatatou tui ki te ʼAtua pea mo tana Folafola, koteʼuhi ko te tui ʼaia ʼe ina fakamālohiʼi tatou ke tou tui moʼoni ko te ʼAtua ʼe tokaga moʼoni kia tatou.

17. ʼE tou ʼiloʼi feafeaʼi ko Sehova ʼe tokaga kia tatou?

¹⁷ ʼE foaki mai e Petelo te fakapapau fakaloto fīmālie ʼaenī: “Koutou fiavaivai ifo i te nima mafimafi o te Atua, koteuhi ke ina hikihiki ake koutou moka hoko mai tona temi; koutou huaki autou hoha fuape kia te ia koteuhi e tokaga ia kia koutou.” (1 Petelo 5:6, 7) Neʼe hiva fēnei te tagata fai pesalemo: “ ʼE poupouki e Sehova ia nātou ʼaē ʼe fetōkaʼi, ʼe ina fakatuʼu ake ia nātou ʼaē kua mapelu ki lalo.” (Pesalemo 145:14) ʼE tonu ke tou tui ki te ʼu fakapapau ʼaia, heʼe tou maʼu ʼi te Folafola ʼa te ʼAtua. Logola ʼe mole puli anai te lotovaivai, kae ʼe mālohi tatatou tui heʼe tou ʼiloʼi ʼe feala ke tou tuku tatatou ʼu tuʼania ki tatatou Tāmai ʼofa ʼe ʼi selo!

Te Tui Pea Mo Te Tahi ʼu ʼAhiʼahi

18, 19. ʼE tokoni feafeaʼi mai te tui ke tou ʼutakiʼi te mahaki pea mo fakaloto fīmālieʼi te ʼu tēhina mo tuagaʼane?

¹⁸ Kapau ko tatou peʼe ko he tahi ʼe tou ʼofa ai ʼe tau mo he mahaki kovi, ʼe feala ke fihifihia ai tatatou tui. Logola ko te Tohi-Tapu ʼe mole talanoa ki he fakamālōlō faka milakulo neʼe fai ki te ʼu Kilisitiano ko Epafolotito, mo Timoteo, pea mo Tolofimo, kae ʼe mahino papau ia neʼe tokoni ia Sehova kia nātou ke nātou ʼutakiʼi tonatou ʼu mamahi. (Filipe 2:25-30; 1 Timoteo 5:23; 2 Timoteo 4:20) Tahi ʼaē meʼa, ʼo ʼuhiga mo “ia ʼaē ʼe tokaga kia ia ʼaē ʼe veliveli,” neʼe hiva fēnei te tagata fai pesalemo: “Ko Sehova totonu ʼe tokoni anai ki ai ʼi tona takotoʼaga mahaki; lolotoga tona mahaki ʼe ke fetogi moʼoni anai tona moeʼaga katoa.” (Pesalemo 41:1-3) ʼE tokoni feafeaʼi mai te ʼu palalau ʼa te tagata fai pesalemo ki te fakafimālieʼi ʼo totatou ʼu tēhina mo tuagaʼane ʼaē ʼe mahahaki?

¹⁹ Ko tatatou faikole mo nātou pea mo hūfakiʼi ʼo nātou ʼe mahahaki, ʼe ko he tahi ʼaia faʼahiga tokoni fakalaumālie. ʼI te temi nei ʼe mole kei fai he ʼu fakamālōlō faka milakulo, koia ʼe tou lava kole ai ki te ʼAtua ke ina fakamālohiʼi tonatou ʼatamai moʼo kātakiʼi tonatou ʼu mahaki, pea mo fakamālohiʼi nātou ʼi te faʼahi fakalaumālie ke feala hanatou kātakiʼi te ʼu temi faigataʼa ʼaia ʼe tau mo nātou. ʼE tokoni anai ia Sehova kia nātou, pea ʼe mālohi anai tanatou tui ke nātou sio ki te temi ʼaē “ ʼe mole he tahi ʼe ina ʼui anai: ‘ ʼE ʼau mahaki.’ ” (Isaia 33:24) ʼE ko he meʼa fakaloto fīmālie hatatou ʼiloʼi, ʼaki te fakatuʼuake ʼo Sesu Kilisito pea mo te Puleʼaga ʼo te ʼAtua, ko te hahaʼi fakalogo ʼe hāofaki anai nātou ʼo talu ai mai te agahala, mo te mahaki, pea mo te mate! Koia ʼe tou fakafetaʼi ai kia Sehova ʼo ʼuhiga mo te ʼu fakapapau taulekaleka ʼaia, ‘ia ia ʼaē ka ina fakamālōlō anai totatou ʼu mahaki fuape.’—Pesalemo 103:1-3; Apokalipesi 21:1-5.

20. He koʼe ʼe tou lava ʼui ko te tui ʼe feala ke tokoni mai ke tou kātakiʼi “te ʼu ʼaho faigataʼa” ʼo te temi vaivai?

²⁰ ʼE toe lava tokoni mai te tui ke tou kātakiʼi “te ʼu ʼaho faigataʼa” ʼo te temi vaivai, te temi ʼaē kua hifohifo māmālie ai te maʼuli pea mo te mālohi. (Tagata Tānaki 12:1-7) Pea ko te hahaʼi matutuʼa ʼe feala ke nātou faikole ohage ko te tagata fai pesalemo matuʼa ʼaē neʼe hiva fēnei: “Ko koe ko toku falalaʼaga, Ê Tuʼi ʼAliki ko Sehova . . . Aua naʼa ke lituʼa kia te ʼau ʼi toku temi matuʼa; ʼi te temi ʼaē ʼe puli ai toku mālohi, ʼaua naʼa ke tuku ʼau.” (Pesalemo 71:5, 9) Neʼe mahino ki te tagata fai pesalemo neʼe ʼaoga kia ia te tokoni ʼa Sehova, ohage pe ko te tokolahi ʼo totatou ʼu kaugā fagona Kilisitiano ʼaē neʼe gāue ki te ʼAtua ʼo aʼu ki tonatou matutuʼa. ʼE feala ke nātou ʼiloʼi papau ʼaki tanatou tui ʼe nātou maʼu moʼoni te tokoni heʼegata ʼa Sehova.—Teutalonome 33:27.

Tou Tui Mālohi Ki Te Folafola ʼa Te ʼAtua

21, 22. Kapau ʼe tou tui, ʼe malave feafeaʼi anai ki tatatou ʼu felogoi mo te ʼAtua?

²¹ Ko te tui ki te logo lelei pea mo te Folafola katoa ʼa te ʼAtua, ʼe tokoni mai ke tou fakaōvi kia Sehova. (Sakopo 4:8) ʼE moʼoni ʼe ko ia totatou Tuʼi ʼAliki, kae ʼe ko ia foki totatou Tupuʼaga pea mo totatou Tāmai. (Isaia 64:8; Mateo 6:9; Gaue 4:24) ʼE hiva fēnei te tagata fai pesalemo: “Ko koe taku Tāmai, toku ʼAtua pea mo te Maka ʼo toku hāofakiʼaga.” (Pesalemo 89:26) Kapau ʼe tou tui kia Sehova pea mo tana Folafola, ʼe toe feala pe foki ke tou sio ki ai ohage ‘ko te Maka ʼo totatou hāofakiʼaga.’ ʼE ko he pilivilesio taulekaleka!

²² Ko Sehova ʼe ko te Tāmai ʼo te kau Kilisitiano fakanofo, ʼo feiā mo tonatou ʼu kaugā gāue ʼaē ʼe ʼamanaki ke nātou maʼuʼuli ʼi te kele. (Loma 8:15) Pea ko te ʼu meʼa ʼaē ʼe tou tui kia, ʼe fakahoko tuʼumaʼu e tatatou Tāmai ʼe ʼi selo. Neʼe ʼui fēnei e Tavite: “ ʼI te temi ʼaē ʼe līaki ʼau e taku tāmai pea mo taku faʼe, ko Sehova totonu ʼe ina tali anai ʼau.” (Pesalemo 27:10) Tahi ʼaē meʼa, ʼe tou maʼu te fakapapau ʼaenī: “[ʼE] mole līaki anai e Sehova tana hahaʼi, ʼuhi ko tona huafa lahi.”—1 Samuele 12:22.

23. Koteā ʼaē ʼe fakamaʼua mai kia tatou ke tou maʼu ai he ʼu felogoi tologa mo Sehova?

²³ ʼE mahino ia ke tou maʼu he felogoi tologa mo Sehova, ʼe tonu ke tou tui ki te logo lelei pea mo tali te Tohi-Tapu ʼe ko te Folafola ʼa te ʼAtua. (1 Tesalonika 2:13) ʼE tonu ke tou tui mālohi kia Sehova pea mo tuku tana Folafola ke ina takitaki totatou ala. (Pesalemo 119:105; Tāʼaga Lea 3:5, 6) ʼE tuputupu anai tatatou tui mo kapau ʼe tou falala ʼo kole tona manavaʼofa, tona loto fakamolemole, pea mo tana tokoni.

24. Koteā te manatu fakaloto fīmālie ʼaē ʼe tuʼu ia Loma 14:8?

²⁴ Ko te tui ʼe ina uga tatou ke tou foaki totatou maʼuli ki te ʼAtua ki he ʼu temi heʼegata. Tou tui mālohi, tatau aipe peʼe tonu ke tou mamate, ko tatou ko tana ʼu kaugana pea ʼe tou falala ki te fakatuʼuake. Ei, “peʼe tou maʼuʼuli peʼe tou mamate, ko tatou ʼe ʼa Sehova.” (Loma 14:8, MN ) Tou taupau maʼu te manatu fakaloto fīmālie ʼaia ʼi totatou loto ohage pe ko tatatou taupau tatatou falala ki te Folafola ʼa te ʼAtua pea mo tou haga tui ki te logo lelei.

ʼE Koutou Tali Feafeaʼi Anai?

• Koteā koa te tui, pea he koʼe ʼe tonu ke tou maʼu te kalitate ʼaia?

• He koʼe ʼe maʼuhiga ke tou tui ki te logo lelei pea mo te Folafola katoa ʼa te ʼAtua?

• ʼE tokoni feafeaʼi mai te tui ke tou ʼutakiʼi totatou ʼu fihifihia?

• Koteā anai ka tokoni mai ke mālohi tatatou tui?

[Paki ʼo te pasina 12]

Neʼe tokoni ia Sehova kia Selemia pea mo Elia ʼuhi ko tanā tui

[Paki ʼo te pasina 13]

Neʼe tui mālohi ia Sopo, mo Petelo, pea mo Nehemia

[Paki ʼo te pasina 15]

Ke tou maʼu he ʼu felogoi tologa mo Sehova, ʼe tonu ke tou tui ki te logo lelei