Tou Lave Ki Te Loto ʼo Te Hahaʼi ʼAki He Faiva ʼi Te Fakalotoʼi

ʼE TOKOLAHI te hahaʼi ʼaē ʼe mole nātou leleiʼia te kupu “fakalotoʼi.” Ki ʼihi ʼe feala ke faka ʼuhiga te kupu ʼaia ki te hahaʼi fai fakatau faiva peʼe ki te publicité neʼe gaohi moʼo kākāʼi peʼe mo uga te hahaʼi ke nātou totogi he meʼa. Māʼiape la mo te Tohi-Tapu ʼi ʼihi temi ʼe fakaʼaogaʼi ai te kupu ʼaia ʼo faka ʼuhiga ki he meʼa ʼe kovi, ohage ko te fakahehemaʼi peʼe ko te fakahēʼia ʼo he tahi. Ohage la neʼe tohi fēnei e te ʼapositolo Kilisitiano ko Paulo ki te kau Kalate: “Neʼe koutou feleleʼi lelei. Ko ai ʼaē neʼe ina tāʼofi takotou haga fakalogo ki te moʼoni? Ko te faʼahiga fakalotoʼi ʼaia ʼe mole haʼu mai ia Ia ʼaē ʼe ina pāui koutou.” (Kalate 5:​7, 8) Pea ko Paulo neʼe ina toe fai foki ki te kau Kolose te fakatokaga ʼaē ke ʼaua naʼa nātou tuku he tahi ke ina ‘fakahēʼi nātou ʼaki he ʼu palalau fakaoloolo.’ (Kolose 2⁠:⁠4) Ko te faʼahiga fakalotoʼi ʼaia ʼe fai ʼaki he ʼu fakamatala fakapoto kae ʼe fakatafito ki he ʼu meʼa hala.

Kae ʼi tana lua tohi kia Timoteo neʼe talanoa te ʼapositolo ko Paulo ki te fakalotoʼi ʼi hona tahi ʼuhiga. Neʼe ina tohi fēnei: “Haga nofo ʼi te ʼu meʼa ʼaē neʼe ke ako pea neʼe fakalotoʼi koe ke ke tui kiai, ʼi tau ʼiloʼi ʼaē pe ko ai te ʼu hahaʼi ʼaē neʼe nātou akoʼi atu kia koe te ʼu meʼa ʼaia.” (2 Timoteo 3:​14) ʼI tona ‘fakalotoʼi ʼaē ke tui’ neʼe mole kākāʼi ia Timoteo e tana faʼe pea mo tana kui fafine, ʼaē neʼe nā akoʼi kia ia te ʼu moʼoni faka Tohi-Tapu.​—2 Timoteo 1:5.a

Lolotoga tana nofo pilisoni ʼi tona ʼapi ʼi Loma, neʼe fai faka mafola ia Paulo ki te tokolahi, “mai te uhu ki te afiafi neʼe ina faigaʼi ke ina fakalotoʼi nātou ʼo ʼuhiga mo Sesu, ʼo ina kamata mai te lao ʼa Moisese pea mo te kau Polofeta.” (Gāue 28⁠:23) Neʼe kākāʼi koa e Paulo te hahaʼi ʼaē neʼe nātou fakalogo ki tana akonaki? Kailoa! Koia ʼe mahino papau ia ʼe mole kovi tuʼumaʼu te fakalotoʼi ʼo he tahi.

Ka fakaʼaogaʼi ʼi tona ʼuhiga lelei, ko te kupu faka Keleka ʼaē neʼe fakaliliu ʼaki te kupu “fakalotoʼi,” ʼe faka ʼuhiga ki te fetogi ʼa he manatu e he fakakaukau lelei pea mo fakapotopoto. Koia ʼe feala ai ki te faiako ke ina fakaʼaogaʼi te Tohi-Tapu moʼo fakalotoʼi te hahaʼi pea mo ina fakahū ki tonatou loto he tui mālohi kiai. (2 Timoteo 2:15) Ko Paulo neʼe ina fakaʼaogaʼi te faʼahiga fai ʼaia ʼi tona minisitelio. Māʼiape la mo Temetelio te tagata tufuga siliva ʼaē neʼe lau neʼe hala te ʼu akonaki faka Kilisitiano, neʼe ina fakatokagaʼi fēnei: “Ko te Paulo ʼaia, ʼo mole gata pe ʼi Efesi kae teitei pe mo te tisitilike katoa ʼo Asia, neʼe ina fakalotoʼi te kaugamālie ʼo te hahaʼi pea mo fakamaliu nātou ki te tahi manatu, ʼo ina ʼui ʼe mole ko he ʼu ʼatua te ʼu meʼa ʼaē ʼe faʼu nima.”​—Gāue 19:26.

Tou Faiga Ke Tou Fakalotoʼi Te Hahaʼi ʼi Te Minisitelio

Neʼe fakatotonu e Sesu Kilisito ki tana kau tisipulo: “Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou. Pea koʼeni, ʼe ʼau nofo mo koutou ʼi te ʼaho fuli pe, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” (Mateo 28:19, 20) ʼI te ʼu fenua e 230 tupu, ko te kau Fakamoʼoni ʼa Sehova ʼe nātou mulimuli ki te fakatotonu ʼaia. ʼI te māhina fuli pe lolotoga te taʼu gāue 1997, neʼe nātou fai te ʼu ako Tohi-Tapu e 4 552 589 ʼi te malamanei katoa.

Kapau ʼe koutou maʼu te pilivilesio ʼaia ke koutou fai he ako faka Tohi-Tapu, ʼe feala ke koutou teuteu moʼo fai hakotou ʼu tali ki te ʼu fehuʼi faigataʼa ʼaē ʼe ʼaoga kiai ke koutou fakapotopoto ʼi te palalau. Ohage la, ʼe feala ke lagaʼi atu he fehuʼi ʼo ʼuhiga mo te Tahitolu lolotoga te ako. Koteā ʼaē ka koutou fai anai mo kapau ʼe koutou ʼiloʼi ko ia ʼaē ʼe koutou fai tana ako ʼe tui ki te akonaki ʼaia? ʼE feala ke koutou tuku kia ia te tohi ʼaē ʼe talanoa ki te faʼahi ʼaia. ʼI tana ʼosi lau, lagi kua mahino anai kia ia ko te ʼAtua pea mo Sesu ʼe mole nā tatau. Kae kapau ʼe kei ʼi ai hana ʼu fehuʼi, koteā ʼaē ʼe feala ke koutou fai?

Koutou fakalogo fakalelei. Ko te faʼahi ʼaia ʼe tokoni anai kia koutou ke koutou ʼiloʼi pe koteā ʼaē ʼe tui kiai ia ia ʼaē ʼe koutou fai tana ako. Ohage la, kapau ʼe ina ʼui atu, “ ʼE ʼau tui ki te Tahitolu,” pea ʼe lagi koutou fia kamata atu aipe takotou fakamahino age kia ia, ko te akonaki ʼaia ʼe mole fakatafito ki te Tohi-Tapu. Kae ʼe ʼi ai te ʼu manatu kehekehe ʼo ʼuhiga mo te Tahitolu. ʼE mole lagi tatau te meʼa ʼaē ʼe tui kiai ia ia ʼaē ʼe koutou fai tana ako pea mo takotou manatu ʼo ʼuhiga mo te Tahitolu. ʼE toe feiā pe mo te tahi ʼu akonaki, ohage la ko te ʼui ʼaē, ka mate he tahi, pea ʼalu tona nefesi ʼo maʼuli ʼi he tahi sino, mo te tuputupua ʼo te nefesi pea mo te fakamaʼuli. Koia koutou fakalogo fakalelei ki te ʼu meʼa ʼaē ʼe ina ʼui atu, ʼi muʼa ʼo hakotou tali. ʼAua naʼa koutou mahalohalo ki te ʼu meʼa ʼaē ʼe tui kiai.​—Tāʼaga Lea 18:13.

Koutou lagaʼi he ʼu fehuʼi. Ohage ko te ʼu fehuʼi ʼaenī: ‘Neʼe ke tui tuʼumaʼu koa ki te Tahitolu? Neʼe kua ke vakaʼi fakalelei koa te meʼa ʼaē ʼe ʼui e te Tohi-Tapu ʼo ʼuhiga mo te faʼahi ʼaia? Kapau ko te ʼAtua ʼe kau ki he tahitolu, pea ʼe mole fakahā fakalelei anai koa e te Tohi-Tapu ia te faʼahi ʼaia, ʼo ina ʼui totonu mai?’ Ka koutou fai he ako, koutou fai putuputu te ʼu faʼahiga fehuʼi ʼaenī: ‘ ʼE ke mahino koa ki te ʼu meʼa ʼaē neʼe tā palalau kiai ʼo aʼu mai ki te temi nei?’ ‘ ʼE ke tali koa te fakamahino ʼaia?’ Kapau ʼe koutou fai he ʼu fehuʼi fakapotopoto pea ko ia ʼaē ʼe ako ʼe kau moʼoni anai ki tona akoʼi ʼo ia totonu. ʼE mole tonu ke ina fakalogo pe ki te ʼu fakamahino ʼaē ʼe koutou fai age ki ai.

Koutou fai he ʼu fakakaukau fakapotopoto. Ohage la, ʼi takotou fai palalau ʼo ʼuhiga mo te akonaki ʼo te Tahitolu, ʼe feala ke koutou ʼui kia ia ʼaē ʼe ako: ‘ ʼI te papitema ʼa Sesu, neʼe logoʼi te leʼo mai te lagi neʼe ina ʼui fēnei: “Ko koe ko toku ʼAlo ʼofaina.” Kapau neʼe ko te ʼAtua ʼaē neʼe ʼi te kele pea neʼe papitemaʼi, he koʼe koa ʼe logoʼi tona leʼo mai te lagi? ʼE mole faigataʼa koa la te faʼahiga fai ʼaia? Ko te ʼAtua ʼaē “ ʼe mole feala ke loi,” ʼe ina fai anai koa he faʼahiga kākā feiā?’​—Luka 3:​21, 22; Tito 1:​1, 2.

ʼI te agamāhani kapau ʼe koutou ʼaveʼave lelei takotou ʼu palalau pea ʼe lave lelei anai kia nātou ʼaē ʼe ako mo koutou. Koutou fakakaukauʼi te faʼifaʼitaki ʼo te fafine ʼaē ʼe tou fakahigoaʼi anai ko Barbara. Lolotoga tona maʼuli katoa, neʼe tui te fafine ʼaia ʼe ko Sesu te ʼAtua pea neʼe kau fakatahi mo te laumālie maʼoniʼoni ki he tahitolu. Kae ko te Fakamoʼoni ʼa Sehova neʼe ina ʼui age ki ai ko te ʼAtua pea mo Sesu ʼe nā kehekehe, pea neʼe ina fakahā age kia ia he ʼu vaega faka Tohi-Tapu moʼo fakamoʼoni ki tana ʼu palalau.b Neʼe mole feala ke fakafihiʼi e Barbara te Tohi-Tapu. Kae neʼe lotomamahi ai, he neʼe ina leleiʼia te akonaki ʼo te Tahitolu.

ʼAki he loto faʼa kātaki, neʼe fai e te Fakamoʼoni he fehuʼi ke fakakaukauʼi e Barbara. Neʼe ina fehuʼi fēnei: “Kapau neʼe ke faiga ke ke akoʼi mai ʼe tatau he ʼu tagata e toko lua, koteā te faʼifaʼitaki ʼaē ka ke fakaʼaogaʼi anai ʼi he famili?” Neʼe ina fakakaukauʼi pea ina tali fēnei: “Lagi ʼe ʼau talanoa anai ki he tautēhina.” Neʼe tali fēnei e te Fakamoʼoni: “Koia ʼaia, peʼe lagi ke talanoa anai ki he ʼu mahaga. Kae ʼi te akoʼi mai e Sesu ko te ʼAtua ʼe ko te Tāmai pea ko ia totonu ʼe ko te ʼAlo, koteā ʼaē neʼe faiga e Sesu ke ina fakamahino mai?” Pea tali fēnei e Barbara, “ ʼIo, ʼe ʼau mahino. Neʼe ina fakahā mai ʼe ʼi ai te tahi ia nāua ʼe matuʼa age pea ʼe lahi age tona ʼuhiga pule.”

Neʼe hoko atu fēnei e te tēhina: “Ei, pea neʼe mahino feiā te hahaʼi Sutea ʼaē neʼe nātou fakalogo kia Sesu, heʼe ko te sosiete faka Sutea neʼe ko he sosiete faka pateliaka.” Pea neʼe fakaʼosi e te tēhina tana palalau ʼo ina ʼui fēnei: “Kapau neʼe tā maʼu he faʼifaʼitaki lelei moʼo talanoa ki te tatau ʼa he toko lua—he tautēhina peʼe ko he mahaga—pea ʼe mahino papau ia neʼe toe feala kia Sesu, te Faiako Lahi, ke ina fai te faʼahi ʼaia. Kae neʼe ina fakaʼaogaʼi te ʼu kupu ‘tāmai’ pea mo ‘ ʼalo’ moʼo talanoa ki tona vāhaʼa mo te ʼAtua.”

Neʼe mahino ai leva kia Barbara te puani ʼaia, pea neʼe ina tali. Neʼe malave ki tona loto te ako ʼaē neʼe fai age kia ia pea neʼe fakalotoʼi ia ia ke tui kiai.

Ka Lave Ki Te Loto

Ka faka tui mālohi te hahaʼi ki he ʼu akonaki faka lotu, pea ʼe nātou toe pipiki mālohi kiai ʼaki tonatou loto. Koutou fakakaukauʼi te faʼifaʼitaki ʼo Edna, ko te fafine Katolika. Neʼe fakahā age kia ia e tana ʼu mokopuna te ʼu vaega faka Tohi-Tapu ʼaē ʼe fakamoʼoni ʼaki ai ʼe mole tatau te ʼAtua pea mo Sesu. Neʼe mahino ia Edna ki te meʼa ʼaē neʼe logo kiai. Kae neʼe ina ʼui fakamalotoloto fēnei: “ ʼE ʼau tui ki te Tahitolu tapu.”

Neʼe lagi hoko kia koutou te meʼa ʼaia. Ki te tokolahi ko te ʼu akonaki ʼo tonatou lotu ʼe pipiki ki tonatou ʼuhiga totonu. Kapau ʼe tou fia fakalotoʼi te hahaʼi ako ʼaia, pea ʼe mole feʼauga pe hatatou fakahā age kia nātou he ʼu fakakaukau fakapotopoto peʼe ko he tuʼuga vaega faka Tohi-Tapu ʼe nātou fakahā ai ʼe hala tanatou manatu. ʼE toe ʼaoga foki ke tou manavaʼofa. (Vakaʼi ia Loma 12:15; Kolose 3:​12.) ʼE moʼoni ko te faiako ʼe tonu ke mālohi tana tui ki te ʼu akonaki faka Tohi-Tapu. Ohage la, neʼe fakaʼaogaʼi e Paulo te ʼu palalau ʼaenī, “Kua ʼau ʼiloʼi papau” pea “ ʼE ʼau ʼiloʼi pea kua ʼau tui ki te ʼAliki ko Sesu.” (Loma 8:​38; 14:14) Kae kapau ʼe tou fakahā te ʼu meʼa ʼaē ʼe tou tui kiai, pea ʼe mole tonu ke tou palalau ʼaki he aga fefeka pea mo he fia faitotonu, peʼe tou vāʼi te hahaʼi ʼo fakamālaloʼi nātou. ʼE mole tou fia fakamamahiʼi ia ia ʼaē ʼe ako peʼe tou fakalainoaʼi ia ia.​—Tāʼaga Lea 12:18.

ʼE lelei age hakotou fakaʼapaʼapa ki te ʼu meʼa ʼaē ʼe tui kiai ia ia ʼaē ʼe ako, pea mo mahino kia koutou ʼe faʼitaliha ʼi te faʼahi ʼaia. Ko te kalavi ʼo te faiakonaki lelei ʼe ko te agavaivai. Ko te faiako agavaivai ʼe mole manatu ia ʼe māʼoluga ʼi te hahaʼi ʼaē ʼe ina akoʼi. (Luka 18:​9-14; Filipe 2:​3, 4) Ka tou faigaʼi ke tou fakalotoʼi te hahaʼi, pea ʼe tonu ke tou fai ʼaki he agavaivai ʼo mulimuli ki te manatu ʼo te ʼAtua, ohage ʼe tou ʼui fēnei: ‘Neʼe fakahā mai e Sehova tana manavaʼofa he neʼe tokoni mai kia ʼau ke ʼau mahino ki te ʼu meʼa ʼaia. Pea ʼe ʼau fia fakahā atu pe koteā te ʼu meʼa ʼaia.’

Neʼe tohi fēnei e Paulo ki tana ʼu tēhina Kilisitiano ʼi Kolonito: “Ko te ʼu mahafu ʼo tatatou tau ʼe mole kakano, kae ʼe mālohi ʼuhi ko te ʼAtua moʼo holoʼi te ʼu kolo tau. Heʼe tou holoʼi te ʼu fakakaukau pea mo te ʼu meʼa fialahi fuli ʼaē ʼe malaga ake ʼo fakafeagai ki te ʼiloʼi ʼo te ʼAtua; pea ʼe tou puke ʼo fakapōpulaʼi te ʼu manatu fuli pe ke nātou fakalogo kia Kilisito.” (2 Kolonito 10:​4, 5) Ia ʼaho nei, ʼe fakaʼaogaʼi e te kau Fakamoʼoni ʼa Sehova te Folafola ʼa te ʼAtua moʼo holoʼi te ʼu akonaki hala ʼaē ʼe tui mālohi kiai te hahaʼi, ʼo toe feiā pe mo te ʼu meʼa ʼaē ʼe nātou maʼuliʼi pea mo te ʼu agaaga ʼaē ʼe mole leleiʼia e te ʼAtua. (1 Kolonito 6:​9-11) ʼI tanatou fai feiā, ʼe manatuʼi e te kau Fakamoʼoni te loto faʼa kātaki pea mo te ʼofa ʼaē neʼe fakahā e Sehova kia nātou. ʼE nātou fiafia ʼaupito ʼi tanatou maʼu tana Folafola, te Tohi-Tapu, pea ʼe nātou fakaʼaogaʼi te meʼa gāue mālohi ʼaia moʼo pulihi te ʼu akonaki hala pea mo nātou lave ki te loto ʼo te hahaʼi ʼaki te faiva ʼo te fakalotoʼi!

[Nota ʼi te lalo pasina]

[Talanoa ʼo te pasina 23]

Koutou Lave Ki Te Loto ʼo Te Hahaʼi ʼAē ʼe Koutou Akoʼi

◻ Koutou faikole kia Sehova ke ina takitaki koutou ke feala hakotou lave ki te loto ʼo ia ʼaē ʼe ako.​—Nehemia 2:​4, 5; Isaia 50:4.

◻ Koutou fakasiosio tonu pe koteā te ʼu meʼa ʼaē ʼe tui kiai ia ia ʼaē ʼe ako pea he koʼe ʼe lagi ina leleiʼia he akonaki hala.​—Gāue 17:22, 23.

◻ ʼAki he agalelei pea mo he loto faʼa kātaki, koutou fakatafito takotou fakakaukau ki te Tohi-Tapu kae koutou palalau ki te meʼa ʼaē ka koutou felogoi lelei ai.​—Gāue 17:24-34.

◻ Kapau ʼe feala, pea koutou fakaʼaogaʼi he ʼu faʼifaʼitaki lelei moʼo fakamahino ʼaki te ʼu akonaki faka Tohi-Tapu.​—Maleko 4:​33, 34.

◻ Koutou fakahā ki te hahaʼi ako te ʼu fua lelei ʼaē ka nātou maʼu anai mo kapau ʼe nātou tali te ʼatamai mālama totonu ʼaē ʼe maʼu ʼi te Tohi-Tapu.​—1 Timoteo 2:​3, 4; 2 Timoteo 3:14, 15.