E Feafeaʼi He Fakalotoʼi ʼo Te Hahaʼi?
1 Neʼe ʼui ko te ʼapositolo ko Paulo neʼe ko he minisi neʼe poto ʼi te fakalotoʼi ʼo te hahaʼi. (Gaue 19:26) Māʼia mo te Hau ko Akilipa, neʼe ina ʼui fēnei kia te ia: “Kei toe siʼi pe pea ke fakatafoki au, ke au kilisitiano.” (Gaue 26:28) He koʼe neʼe poto Paulo ʼi te fakalotoʼi ʼo te hahaʼi ʼi tana minisitelio? He neʼe faigafua tana ʼu palalau mokā ina fakaʼaogaʼi te Tohi-Tapu, pea neʼe ina faka ʼalutahi tana ʼu palalau ki te hahaʼi ʼaē neʼe nātou fakalogo ki ai.—Gaue 28:23.
2 Moʼo faʼifaʼitaki kia Paulo, ʼe tonu ke tou poto mo tatou ʼi te fakalotoʼi ia te hahaʼi ʼi totatou minisitelio. ʼO feafeaʼi? ʼE tonu ke tou maʼu he fakasiosio tonu mokā tou palalau pea mokā tou fakalogo ki te hahaʼi. (Taag. 16:23) Ko faʼahi maʼuhiga e tolu ʼe tokoni mai anai ke tou fakahoko ia te faʼahi ʼaia.
3 Koutou Fakalogo Lelei: Ka palalau he tahi, koutou fakalogo lelei ke feala hakotou maʼu he manatu ʼe koutou lava felogoi ai. Kapau ʼe ina lagaʼi he fehuʼi, pea koutou faigaʼi ke koutou mahino pe koteā ʼaē ʼe manatu moʼoni kiai. ʼE ʼaoga anai ke koutou ʼiloʼi moʼoni pe koteā ʼaē ʼe tui kiai, pea he koʼe ʼe faka tui papau kiai. (Taag. 18:13) Koutou faiga, ʼaki he aga fakaʼeteʼete, ke ina tali atu ki te ʼu fehuʼi ʼaia.
4 Koutou Fai He ʼu Fehuʼi: Kapau ʼe ʼui atu e he tahi ʼe tui ki te Tahitolu, pea ʼe feala hakotou fehuʼi age: “ ʼE ke ʼiloʼi pe koteā ʼaē ʼe ʼui e te Tohi-Tapu ʼo ʼuhiga mo te faʼahi ʼaia?” ʼE feala hakotou fehuʼi age: “Kapau ʼe kau te ʼAtua ki he Tahitolu, pea ʼe mole tonu koa la ke fakahā lelei mai e te Tohi-Tapu ia te faʼahi ʼaia?” ʼAki te ʼu tali ʼaē ka ina fai atu, ʼe feala anai hakotou fakakaukauʼi mo ia te manatu ʼa te Tohi-Tapu.
5 Koutou Uga Ke Fakakaukau: Neʼe fehuʼi e te Fakamoʼoni ki te fafine neʼe faka tui ko Sesu ʼe ko te ʼAtua: ‘Kapau ʼe ke faiga ke ke fakatātā te tatau ʼa he ʼu hahaʼi e toko lua, pea koteā te faʼifaʼitaki ʼi te famili ʼe feala hau fakaʼaogaʼi?’ Neʼe ina tali fēnei: “ ʼE ʼau fakatātā anai ki he tautēhina.” Neʼe ina ʼui fēnei: “ ʼE lagi ke toʼo anai te faʼifaʼitaki ʼo he mahaga ʼe nā hokohoko lelei. Kae ʼe akoʼi mai e Sesu ke tou faka ʼuhiga te ʼAtua ʼe ko te Tāmai pea ko ia ʼe ko te ʼAlo, koteā ʼaē neʼe ina fia fakamahino mai?” Pea neʼe mahino ai ki te fafine ʼe ʼi ai te tahi ia nāua ʼe matuʼa age pea ʼe lahi age tona pule. (Mat. 20:23; Soa. 14:28; 20:17) Neʼe malave te ʼu palalau ʼaia ki tona ʼatamai pea mo tona loto, he neʼe poto te tēhina ʼi te uga ʼo tana fakakaukau.
6 ʼE tou ʼiloʼi ʼe mole tali fuli e te hahaʼi ia te moʼoni, tatau aipe peʼe tou fakamahino lelei age pea mo moʼoni te ʼu meʼa ʼaē ʼe tou fakamatala age. Kae ohage ko Paulo, tou faiga mālohi ke tou maʼu ʼi totatou telituale, te hahaʼi ʼaē ʼe lelei tonatou loto, ʼo tou fakalotoʼi nātou ke nātou tali te logo ʼo te Puleʼaga.—Gaue 19:8.