Kotou Fakalotoʼi Te Hahaʼi Mokā Kotou Faiako
1. ʼI te minisitelio, ʼe feafeaʼi te fakaʼaogaʼi lelei ʼo te Folafola ʼa te ʼAtua?
1 Ko he ʼu minisi ʼe gāue lelei, ohagē ko te ʼapositolo ko Paulo, ʼe natou leleiʼia ia te “fakaʼaogaʼi lelei [ʼo] te folafola ʼo te moʼoni” ʼo mole gata ʼaki pē hanatou lau ia he vaega ʼo te Tohi-Tapu. (2 Tim. 2:15) Kā tou fakaʼaogaʼi ia te Folafola ʼa te ʼAtua, ʼe feafeaʼi hatatou “fakalotoʼi” te hahaʼi mokā tou faiako?—Gāue 28:23.
2. Koteā ʼaē ʼe feala ke tou fai ke lahi age ia te fakaʼapaʼapa ʼa te hahaʼi ki te Folafola ʼa te ʼAtua?
2 Kotou Fakahā Ki Te Hahaʼi Te Meʼa ʼAē ʼe Tuʼu ʼi Te Folafola ʼa Te ʼAtua: ʼUluaki, kotou fakahā age ia te Tohi-Tapu, ke fakaʼapaʼapa ai ia te hahaʼi ki te poto fakaʼatua ʼaē ʼe maʼu ʼi loto. Ko tatatou falala ki te Folafola ʼa te ʼAtua ʼe feala ke ina uga ai te hahaʼi ke natou fakalogo lelei ki tatatou lau age ia he vaega. (Hep. 4:12) ʼE feala hatatou ʼui fēnei age: “Neʼe au tokagaʼi ia te fua lelei ʼo te ʼiloʼi ia te manatu ʼa te ʼAtua ʼo ʼuhiga mo te faʼahi ʼaia. ʼE feala ke ke tokagaʼi ʼi henī pe koteā ʼaē ʼe ʼui ʼi tana Folafola.” ʼI te ʼu temi fuli pē ʼaē ʼe fealagia ai, kotou tuku ke palalau ia te Folafola ʼa te ʼAtua, ʼo kotou lau te ʼu vaega ʼi te Tohi-Tapu.
3. ʼI tatatou ʼosi lau he vaega, koteā ʼaē ʼe feala ke tou fai moʼo tokoni ki te hahaʼi ke natou mahino ki tona fakaʼuhiga?
3 Lua, kotou fakamahino ia te vaega ʼaē neʼe lau. Tokolahi te hahaʼi ʼe faigataʼa maʼa nātou tanatou mahino mokā tou lau age ia he vaega. ʼI te agamāhani, ʼe tonu ke tou fakamahino tona pikipikiga mo te faʼahi ʼaē ʼe tou palalau kiai mo te hahaʼi. (Luka 24:26, 27) Kotou fakamaʼuhigaʼi ia te ʼu kupu tāfito. ʼE lagi ʼaoga anai ke fai he fehuʼi ke ʼiloʼi ai peʼe kua mahino lelei te hahaʼi ki te manatu ʼo te Tohi-Tapu.—Taag. 20:5; Gāue 8:30.
4. Koteā te faʼahi fakamuli ʼaē ʼe tonu ke tou fai ke tou fakalotoʼi te hahaʼi mokā tou faiako?
4 Kotou Fakamahino Ki Te Hahaʼi Te Vaega ʼAē Neʼe Lau: Tolu, kotou faiga ke malave takotou ʼu palalau ki te ʼatamai pea mo te loto ʼo te hahaʼi. Kotou tokoni ki te hahaʼi ke natou mahino peʼe feafeaʼi tanatou maʼuliʼi ia te vaega Tohi-Tapu. Ko te fakamahino kiā nātou ia te Tohi-Tapu ʼe feala ai ke fakalotoʼi he tahi ke ina fetogi ia tana manatu. (Gāue 17:2-4; 19:8) Ohagē lā, ʼi tatatou ʼosi lau ia Pesalemo 83:18, ʼe feala ke tou fakamahino ki he tahi ʼo ʼuhiga mo te maʼuhiga ʼaē ke kita ʼiloʼi ia te higoa ʼo he tahi ke tuputupu ai ia he felōgoi mo ia. Pea ʼe feala leva ke kotou fehuʼi age fēnei: “Kiā koe lā, ʼi tau ʼiloʼi ia te huafa ʼo te ʼAtua ʼe mole anai liliu ia tau ʼu faikole ʼo loloto age?” Ko te fakamahino ʼaē peʼe feafeaʼi te maʼuliʼi ia te vaega Tohi-Tapu, ʼe ko te faʼahiga fai ʼaia moʼo fakahā ia te ʼaoga ʼo te ʼu manatu ʼo te Tohi-Tapu. Ko te taʼi faiako ʼaia ʼaki ia te Folafola ʼa te ʼAtua ʼo tou fakalotoʼi ia te hahaʼi, ʼe ina taki mai ia te hahaʼi ʼaē ʼe fakamālotoloto ke natou tauhi ki te ʼAtua moʼoni pea mo maʼuli, ia Sehova.—Sel. 10:10.