ʼE Kotou Lagolago Koa Ki Te Folafola ʼa Te ʼAtua?
1 ʼI he mālama ʼe ina fakatō ki laloʼi tuʼumaʼu ia te Tohi-Tapu, ko te kau Kilisitiano ʼe natou lagolago mālohi ki te Folafola ʼa te ʼAtua. ʼE tou tui papau “ko te Tohi-Tapu kātoa ʼe haʼu mai te ʼAtua,” koia ʼe tou manatu tahi ai mo Sesu Kilisito ʼaē neʼe ina fakahā lelei ʼi tana faikole kiā Sehova: “Ko tau folafola ʼe moʼoni.” (2 Tim. 3:16; Soa. 17:17) ʼE feafeaʼi hatatou lava lagolago lelei ki te Folafola ʼa te ʼAtua?
2 Tou Ako Ia Te Tohi-Tapu: ʼE mahino ia neʼe tokaga ia Sesu ʼo ako ia te Folafola ʼa te ʼAtua. Ko he faʼahi neʼe feala ai kiā Sesu ke faiakonaki ʼaki te Tohi-Tapu ʼi tana minisitelio. (Luka 4:16-21; 24:44-46) ʼE feafeaʼi hatatou taupau ʼi totatou ʼatamai he ʼu vaega faka Tohi-Tapu? ʼE tou fai ia te faʼahi ʼaia, ʼaki te lau ʼo te Tohi-Tapu ʼi te ʼaho fuli pea mo metitāsioʼi he vaega neʼe ina fakaloto mālohiʼi tāfito tātou peʼe mo ʼaoga ki te minisitelio. Kā tou teuteuʼi te ʼu fono, ʼe tonu ke tou vakaʼi pea mo lau ia te ʼu vaega ʼi te Tohi-Tapu pea mo feala ai ke tou teuteuʼi hatatou tali. Kā tou kau ki te ʼu fono, ʼe tonu ke tou mulimuli ʼi tatatou Tohi-Tapu ki te lau mai ʼo te ʼu vaega faka Tohi-Tapu e te tehina faiakonaki. Ko te mahino ki te ʼu koga tohi ʼo te Tohi-Tapu, ʼe ina teuteuʼi anai tātou ke tou “fakaʼaogaʼi lelei te folafola ʼo te moʼoni.”—2 Tim. 2:15.
3 Tou ʼAvahi Ia Te Tohi-Tapu: Kā tou fai faka mafola, ʼe tonu ke tou ʼavahi ia te Tohi-Tapu. Ohagē lā, kapau ʼe fealagia, ʼe tou faiga anai ke tou lau age he vaega faka Tohi-Tapu kiā ia ʼaē ʼe tou fai faka mafola ki ai. Kapau ʼe ina lagaʼi mai he fehuʼi peʼe ina fakafihiʼi ia te fai palalau, ʼe lelei anai hatatou lau age ia he vaega Tohi-Tapu moʼo tali ki te faʼahi ʼaia. Kā maʼumaʼua he tahi ʼe tou faka mafola ki ai, ʼe lagi feala pē ke tou fakamahino age he manatu faka Tohi-Tapu, ʼo ʼui fēnei: “ ʼI muʼa ʼo taku mavae, ʼe au fia lau atu te vaega ʼaenī.” Kā fealagia, tou lau te vaega ʼi tatatou Tohi-Tapu, ʼo feala kiā ia ʼaē ʼe fakalogo ke mulimuli ʼi te Tohi-Tapu ia takotou lau te vaega.
4 ʼI te fakahā age ki te tagata ia te ʼu vaega faka Tohi-Tapu ʼo ʼuhiga mo te Tahitolu ʼe mole ko he akonaki ʼe tuʼu ʼi te Tohi-Tapu, neʼe ina ʼui fēnei: “ ʼI toku maʼuli kātoa neʼe au misa, kae neʼe mole au ʼiloʼi pē lā ia te manatu ʼa te Tohi-Tapu ʼo ʼuhiga mo te akonaki ʼaia!” Neʼe ina tali atu aipē ke fai hana ako Tohi-Tapu. Neʼe ʼui e Sesu ko tana ʼu ovi ʼe natou logo anai ki tona leʼo. (Soa. 10:16, 27) ʼE tonu ki te hahaʼi fakamālotoloto ke natou sio tonu ki te Tohi-Tapu ke natou mahino ai ki te moʼoni. Koia ʼaē, tou haga lagolago ki te Folafola moʼoni ʼa te ʼAtua!