Koutou Tokaga Ki Te Kau Vāvā!

Ia ʼaho nei, ʼe tokolahi te hahaʼi ʼe nātou maʼu paʼaga ʼi tanatou fai fakakikite. ʼE ʼui fēnei e te sulunale The Daily Telegraph ʼo Lonitoni, “ ʼi te fakaōvi mai ʼo te taʼu 2000, ʼe lolotoga hoko te meʼa faikehe kae ʼe mole tou faʼa fakapunamaʼuli kiai. Ko te hahaʼi ʼe toko lauʼi afe ʼi te malamanei katoa, ʼe nātou manatu ʼe hoko anai he ʼu meʼa faikehe pea mo fakamataku ʼi te ka haʼu.” ʼE tokolahi te hahaʼi ʼe nātou ʼui, ko te fia ʼiloʼi ʼaia ʼa te hahaʼi ia te ka haʼu, ʼe tatau mo te ʼu meʼa ʼaē kua hoko ʼi te temi muʼa ʼaē neʼe ʼamanaki ai te hahaʼi ki he ʼu fetogi kae neʼe mole hoko.

ʼI TE 19 sēkulō, ʼi te lahi ʼo te ʼu saliote ʼaē neʼe toho e te ʼu hōsi, neʼe fakakikite e te tagata, ʼe lahi anai te ʼu fekauʼi hōsi ʼi te ʼu kolo ʼo Eulopa. Kae neʼe mole hoko te fakakikite ʼaia. Koia, neʼe manukiʼi ai e te sulunale The Times ʼo Lonitoni te ʼu fakakikite ʼaē ʼe mole hoko, ʼo ina ʼui fēnei: “Ko te ka haʼu ʼe hage ia ko he tuʼuga fekauʼi hōsi.”

Ko ʼihi ʼe nātou vāʼi ia nātou ʼaē ʼe nātou fakakikite te ʼu tuʼutāmaki ʼaē ka hoko. Ohage la, ko te polofesea mai te univelesitē Amelika neʼe ina fakafihiʼi ia nātou fuli ʼaē ʼe nātou tala ko te tagata ʼe ina lolotoga maumauʼi te kele, peʼe toe ʼāsili anai te maumau ʼaia. ʼE toe hā ʼi te nusipepa New Scientist te ʼu palalau ʼaenī ʼaē neʼe fai e te polofesea, “ ʼe toe ʼāsili age te lelei ʼo totatou faʼahiga maʼuli, pea ʼe hoholo feiā anai ʼo talu ai.”

ʼI te fefakafeagaiʼaki ʼa te ʼu manatu fuli ʼaia, ʼe tokolahi te hahaʼi ʼe nātou ʼui, ʼe mole fetogi anai te ʼaluʼaga ʼo te maʼuli. ʼI tanatou manukinuki kia nātou ʼaē ʼe faka tui ko te ʼAtua ʼe ina fakatokatoka anai te ʼu meʼa ʼa te tagata, ʼe nātou tatau ai mo te kau vāvā ʼo te ʼuluaki sēkulō ʼo totatou temi.

Kua Fetogi Koa He Meʼa?

ʼI te lua tohi ʼa te ʼapositolo ko Petelo ʼaē neʼe fai ʼi te teitei taʼu 64 ʼo totatou temi, neʼe fai ai te fakatokaga ʼaenī: “ ʼI te ʼu ʼaho fakaʼosi ʼe ʼōmai anai te kau vāvā mo tanatou vāvā, ʼo mulimuli ki te ʼu meʼa ʼaē ʼe nātou holi kiai.”​—2 Petelo 3:⁠3.

Ko te hahaʼi vāvā ʼe nātou faiga ke ufiufi ia ia ʼaē ʼe nātou vāʼi. Ko ia ʼaē ʼe ina fakalainoaʼi ʼihi ʼe tō ia ki te hele ʼaē ko te manatu pe kia ia totonu, heʼe ʼi te agamāhani, ko te hahaʼi vāvā ʼe nātou loto ke manatu tahi mo nātou te hahaʼi ʼaē ʼe nātou fakalogo ki tanatou manatu. Neʼe lagi feiā ʼihi kau vāvā ʼaē neʼe talanoa ki ai ia Petelo, he neʼe nātou fai “ ʼo mulimuli ki te ʼu meʼa ʼaē [ne]ʼe nātou holi kiai.” ʼI tana fakatokagaʼi tatou, neʼe fai liuliuga e te ʼapositolo tana ʼu palalau, he neʼe ina ʼui ʼe ʼōmai anai “te kau vāvā mo tanatou vāvā.”

Ko te kau vāvā ʼaia ʼo te ʼuluaki sēkulō, neʼe nātou fakafihiʼi te hoko moʼoni ʼo te ‘ ʼi henī ʼa Kilisito ʼaē neʼe fakapapauʼi mai,’ ʼo nātou ʼui fēnei: “ ʼE ʼifea koa tana ʼi henī ʼaē neʼe fakapapauʼi mai? Heʼe talu mai te ʼaho ʼaē neʼe momoe ai tatatou ʼu kui ʼi te mate, ko meʼa fuli ʼe hoko atu ohage pe ko te kamataʼaga ʼo te fakatupu.” (2 Petelo 3:​4) Neʼe ko tanatou manatu ʼaia. Kae ʼi muʼa atu ʼi te taʼu 33 ʼo totatou temi, neʼe fakakikite e Sesu ʼe hoko anai te maumau lahi ki te kolo ʼo Selusalemi. Neʼe ina ʼui fēnei, “ ʼe hoko mai anai te ʼu ʼaho kia te koe, ʼaia ka fakatuʼu ai anai e tou ʼu fili ʼi ʼou tafaʼaki he ʼā ʼaki he ʼu pou kua fakamata, pea ʼe nātou apuipui anai koe, pea ʼe nātou ʼōposi anai koe mai te ʼu potu fuli pe, pea ʼe nātou laliki anai koe ki te kele, ia koe pea mo ʼau fānau ʼaē ʼe ʼi loto ia te koe, pea ʼe mole nātou tuku anai ia te koe he maka ʼe hili ʼi he tahi maka.” Neʼe faihala ʼaupito ia nātou ʼaē neʼe nātou fakalainoaʼi te fakatokaga ʼaia! ʼI te taʼu 70 ʼo totatou temi, ko te ʼu kautau Loma neʼe nātou nofoʼi ia Selusalemi pea mo fakaʼauha te kolo ʼaia, pea neʼe mamate ai te tokolahi. He koʼe ko te tokolahi ʼo te kolo ʼaia neʼe mole nātou nonofo teuteu ki te maumau lahi ʼaia? Koteʼuhi neʼe mole mahino kia nātou, neʼe sivisivi nātou e te ʼAtua ʼaki tona ʼAlo ko Sesu.​—Luka 19:​43, 44.

ʼE talanoa te ʼapositolo ko Petelo ki te fakaʼauha ʼaē ka fakahoko anai e te ʼAtua Māfimāfi ʼi te ka haʼu. ʼE fai e Petelo te fakatokaga ʼaenī, “ko te ʼaho ʼo Sehova ʼe haʼu anai ohage ko he tagata kaihaʼa.” (2 Petelo 3:10) ʼI te temi ʼaia, ʼe pulihi anai e te ʼAtua te hahaʼi heʼe aga faka lotu ʼi te kele, pea ʼe ina hāofaki anai ia nātou ʼaē ʼe lau anai ko he ʼu hahaʼi faitotonu. Ko te nusipepa ʼaenī, kua tuʼa lahi tana fakahā ko te “ ʼi henī” ʼa Kilisito Sesu neʼe kamata ʼi te taʼu 1914. Kae ʼe mole heʼeki hoko mai te temi ʼaē ka ina pulihi anai te agakovi ʼi tona ʼuhiga tagata ʼaē ka ina fakahoko te ʼu fakamāu ʼa te ʼAtua. Koia, ʼe maʼuhiga ʼaupito te fakatokaga ʼa te ʼapositolo ke tou tokaga ki te kau vāvā, pea tāfito ʼi te temi ʼaenī.

Lagi kua fualoa takotou talitali ki te temi ʼaē ka fakatokatoka ai e te ʼAtua ia te ʼu meʼa ʼa te tagata. Koteā ʼaē ka tokoni anai kia koutou ke koutou haga talitali ʼaki he faʼa kātaki, ʼo koutou tokaga ke ʼaua naʼa fakahēʼi koutou e te kau vāvā? ʼE mātou kole atu ke koutou laulau te lua alatike moʼo tali ki te fehuʼi ʼaia.

[Talanoa ʼo te pasina 4]

“ ʼE hoko mai anai te ʼu ʼaho kia te koe, ʼaia ka . . . apuipui anai koe [e tou ʼu fili], pea ʼe nātou ʼōposi anai koe mai te ʼu potu fuli pe, . . . pea ʼe mole nātou tuku anai ia te koe he maka ʼe hili ʼi he tahi maka.” Neʼe mole tonu ke kita meʼa noaʼi te fakatokaga ʼaia. Neʼe fakaʼauha e te ʼu kautau Loma ia Selusalemi, ʼo mamate ai te hahaʼi tokolahi.