Ko Te ʼAho ʼAenī ʼo Te Hāofaki!
“Koʼeni! Ko te temi ʼaenī ʼe ko te temi faigamālie. Koʼeni! Ko te temi ʼaenī ʼe ko te ʼaho ʼo te hāofaki.”—2 Kolonito 6:2.
1. Koteā ʼaē ʼe tonu ke tou fai ke tou felogoi lelei ai mo te ʼAtua pea mo Kilisito?
KUA fakakatofa e Sehova he ʼaho moʼo fakamāuʼi te malamanei katoa. (Gāue 17:31) Ke feala hatatou hāo ʼi te ʼaho ʼaia, ʼe tonu ke tou felogoi lelei mo te ʼAtua pea mo tona Tui Fakamāu ʼaē neʼe ina fakanofo, ia Sesu Kilisito. (Soane 5:22) ʼO ʼuhiga mo te faʼahi ʼaia, ʼe tonu ke ʼalutahi tatatou aga mo te Folafola ʼa te ʼAtua pea ke tou maʼu te tui ʼaē ka ina uga tatou ke tou tokoni ki te hahaʼi ke nātou liliu ko he ʼu tisipulo moʼoni ʼa Sesu.
2. He koʼe kua mamaʼo te malamanei mai te ʼAtua?
2 ʼUhi ko te agahala, kua mamaʼo te malamanei katoa mai te ʼAtua. (Loma 5:12; Efesi 4:17, 18) Koia, ʼe feala ke hāofaki te hahaʼi ʼaē ʼe tou fai faka mafola ki ai, mo kapau ʼe nātou fakatokatoka mo te ʼAtua. Neʼe fakahā lelei e te ʼapositolo ko Paulo te faʼahi ʼaia ʼi tana faitohi ki te kau Kilisitiano ʼo Kolonito. Tou vakaʼi ia 2 Kolonito 5:10–6:10 pe koteā te meʼa ʼaē neʼe ʼui e Paulo ʼo ʼuhiga mo te fakamāu, mo te fakatokatoka ʼa te hahaʼi mo te ʼAtua, pea mo te hāofaki.
“ ʼE Tou Hoko Atu Te Fakalotoʼi ʼo Te Hahaʼi”
3. Neʼe feafeaʼi te “hoko atu [ʼa Paulo] te fakalotoʼi ʼo te hahaʼi,” pea he koʼe ʼe tonu ke tou fai feiā mo tatou ia ʼaho nei?
3 Neʼe fakapipiki e Paulo te fakamāu pea mo te fai faka mafola he neʼe ina tohi fēnei: “ ʼE tonu ke fakahā ia tatou fuli ia muʼa ʼo te fakamāuʼaga ʼa Kilisito, ke tou tahi maʼu te totogi ʼo te meʼa ʼaē neʼe tou fai ʼaki te sino, ʼo mulimuli pe ki te ʼu meʼa ʼaē neʼe tou fai, peʼe lelei, peʼe kovi. Koia ʼi tatatou ʼiloʼi te manavasiʼi ki te ʼAliki, ʼe tou hoko atu te fakalotoʼi ʼo te hahaʼi.” (2 Kolonito 5:10, 11) Neʼe ‘hoko atu e te ʼapositolo ko Paulo tana fakalotoʼi te hahaʼi’ ʼi tana faka mafola te logo lelei. E feafeaʼi tatou? ʼI te kua vave hoko mai ʼo te fakaʼosi ʼo te tuʼu ʼo te ʼu faʼahiga meʼa agakovi ʼaenī, ʼe tonu ke tou faiga mālohi ke tou fakalotoʼi te hahaʼi ke nātou fai te ʼu meʼa ʼaē ʼe ʼaoga, ke feala ai hanatou maʼu he fakamāu lelei mai ia Sesu pea ke leleiʼia nātou e te Matapuna ʼo te hāofaki, ia Sehova ʼAtua.
4, 5. (a) He koʼe ʼe mole tonu ke tou laupisi ki te ʼu meʼa ʼaē ʼe tou fai ʼi te tauhi kia Sehova? (b) Neʼe laupisi feafeaʼi ia Paulo “ ʼuhi ko te ʼAtua”?
4 Kae kapau ʼe tapuakiʼi e te ʼAtua tatatou minisitelio, pea ʼe mole tonu ke tou laupisi ai. ʼI Kolonito, ko ʼihi neʼe nātou laupisi kia nātou totonu peʼe laupisi ki ʼihi tagata, ʼo tupu ai te ʼu maveuveu ʼi te kokelekasio. (1 Kolonito 1:10-13; 3:3, 4) ʼO ʼuhiga mo te ʼaluʼaga ʼaia, neʼe tohi fēnei e Paulo: “ ʼE mole mātou toe fia vikiʼi atu mātou kia koutou, kae ʼe mātou foaki atu he faigamālie ke koutou laupisi ʼo ʼuhiga mo mātou, ke feala hakotou tali kia nātou ʼaē ʼe nātou laupisi ki te meʼa ʼaē ʼe hā, kae mole ko te loto. Heʼe kapau neʼe mātou vavale, neʼe mātou feiā ʼuhi ko te ʼAtua; pea kapau ʼe mātou fakapotopoto, ʼe mātou feiā ʼuhi ko koutou.” (2 Kolonito 5:12, 13) Ko te hahaʼi fialahi neʼe mole nātou tuʼania ki te logo tahi pea mo te lelei ʼo te kokelekasio ʼi te faʼahi fakalaumālie. Neʼe nātou fia laupisi ʼo ʼuhiga mo te ʼu meʼa ʼaē ʼe hā ki tuʼa kae mole nātou tokoni ki tonatou ʼu tēhina ke tuputupu ia nātou he loto ʼe lelei ia muʼa ʼo te ʼAtua. Koia, neʼe toe fakatonutonuʼi e Paulo te kokelekasio pea neʼe ina ʼui fēnei ki muli age: “Ko ʼaē ʼe laupisi, ke laupisi ia Sehova.”—2 Kolonito 10:17.
5 Neʼe mole laupisi koa la ia Paulo ʼo ʼuhiga mo ia? Neʼe lagi manatu feiā ʼihi ʼuhi ko te meʼa ʼaē neʼe ina ʼui ki tona ʼuhiga ʼapositolo. Kae neʼe laupisi “ ʼuhi ko te ʼAtua.” Neʼe laupisi ʼo ʼuhiga mo te ʼu fakamoʼoni ʼo tona ʼuhiga ʼapositolo, ke mole mavae te kau Kolonito mai ia Sehova. Neʼe fai e Paulo te faʼahi ʼaia ke nātou toe liliu ki te ʼAtua, he neʼe fakahēʼi nātou e te kau ʼapositolo loi. (2 Kolonito 11:16-21; 12:11, 12, 19-21; 13:10) Kae neʼe mole faiga tuʼumaʼu e Paulo ke ōfo te hahaʼi ʼi te ʼu meʼa ʼaē neʼe ina fai.—Tāʼaga Lea 21:4.
ʼE Fakamālohiʼi Koa Tatou e Te ʼOfa ʼa Kilisito?
6. ʼE tonu ke malave feafeaʼi kia tatou te ʼofa ʼa Kilisito?
6 ʼI tona ʼuhiga ʼapositolo moʼoni, neʼe faiakonaki ia Paulo ki te hahaʼi ʼo ʼuhiga mo te sakilifisio faitotogi ʼa Sesu. Neʼe malave te faʼahi ʼaia ki te maʼuli ʼa Paulo, he neʼe ina tohi fēnei: “Ko te ʼofa ʼo Kilisito ʼe ina fakamālohiʼi tatou, koteʼuhi koʼeni te meʼa ʼaē kua mātou vakaʼi: ko te tagata e tahi neʼe mate maʼa te hahaʼi fuli; koia neʼe kua mamate te hahaʼi fuli. Neʼe mate maʼa te hahaʼi fuli ke feala kia nātou ʼaē ʼe maʼuʼuli, ke mole kei nātou maʼuʼuli maʼa nātou totonu, kae ke nātou maʼuʼuli maʼa ia ʼaē neʼe mate maʼa nātou pea kua toe fakatuʼuake.” (2 Kolonito 5:14, 15) Ko he ʼofa lahi ʼaē neʼe fakahā e Sesu ʼi tana foaki tona maʼuli maʼa tatou! ʼE mahino ia ʼe ko he mālohi ʼe ina fakamālohiʼi tatou ʼi totatou maʼuli. Ko tatatou loto fakafetaʼi kia Sesu ʼi tana foaki tona maʼuli maʼa tatou, ʼe tonu ke ina uga tatou ke tou gāue mālohi moʼo tala te logo lelei ʼo te hāofaki ʼaē ʼe foaki e Sehova ʼaki tona ʼAlo ʼofaina. (Soane 3:16; vakaʼi ia Pesalemo 96:2.) Ko “te ʼofa ʼa Kilisito” ʼe ina fakamālohiʼi koa koutou ke koutou kau fakamalotoloto ki te faka mafola ʼo te Puleʼaga pea mo te gāue ʼaē ko te fai ʼo he ʼu tisipulo?—Mateo 28:19, 20.
7. Koteā te faka ʼuhiga ʼo te ʼui ʼaē ʼe “mole kei [nātou] ʼiloʼi he tahi ʼi te kakano”?
7 ʼI tanatou fakaʼaogaʼi tonatou maʼuli moʼo fakahā tonatou loto fakafetaʼi ki te meʼa ʼaē neʼe fai e Kilisito maʼa nātou, ko te kau fakanofo ʼe mole kei nātou ‘maʼuʼuli maʼa nātou, kae kua nātou maʼuʼuli maʼa te ia.’ Neʼe ʼui fēnei e Paulo: “Koia, ʼo kamata atu ʼi te temi nei, ʼe mole kei mātou ʼiloʼi he tahi ʼi te kakano. Tatau aipe pe neʼe mātou ʼiloʼi ia Kilisito ʼi tona ʼuhiga kakano, kae ʼe mahino ia ʼi te temi ʼaenī, ʼe mole mātou toe ʼiloʼi ia ia ʼi tona ʼuhiga ʼaia.” (2 Kolonito 5:16) Neʼe mole tonu ke tokagaʼi e te kau Kilisitiano te hahaʼi ʼaki te sio fakatagata, ʼo lagi nātou leleiʼia age te kau Sutea ʼi te kau Senitile, peʼe ko nātou ʼaē ʼe maʼu koloā ia nātou ʼaē ʼe māsisiva. Ko te kau fakanofo “ ʼi te temi ʼaenī, ʼe mole kei [nātou] ʼiloʼi he tahi ʼi te kakano,” heʼe maʼuhiga age kia nātou tanatou ʼu felogoi fakalaumālie mo tonatou ʼu tēhina. Ko nātou ʼaē neʼe nātou ‘ ʼiloʼi ia Kilisito ʼi tona ʼuhiga kakano’ neʼe mole gata pe ki te hahaʼi ʼaē neʼe nātou sio mata kia Sesu ʼi tana kei maʼuli ʼi te kele. Ko nātou ʼaē neʼe nātou talitali ki te Mesia, tatau aipe pe neʼe nātou sio tuʼa tahi kia Kilisito ʼi tana kei maʼuli ʼi te kakano, kae neʼe mole nātou toe sio kia te ia ʼi tona ʼuhiga ʼaia. Neʼe ina foaki tona sino ko he totogi pea neʼe fakatuʼuake ko he laumālie ʼe ina foaki te maʼuli. Ko nātou ʼaē ka fakatuʼuake ki te maʼuli ʼi selo ʼe nātou līaki anai tonatou sino kakano, kae neʼe mole heʼeki nātou sio kia Sesu Kilisito ʼi tona ʼuhiga kakano.—1 Kolonito 15:45, 50; 2 Kolonito 5:1-5.
8. ʼE liliu feafeaʼi ʼihi ʼo “fakatahi mo Kilisito”?
8 ʼE hoko atu e Paulo tana palalau ki te kau fakanofo, ʼo ina ʼui fēnei: “Ka fakatahi he tahi mo Kilisito, ʼe ko he fakatupu foʼou; kua mole te ʼu meʼa ʼāfea, koʼeni! kua tupu te ʼu meʼa foʼou.” (2 Kolonito 5:17) Ko te faka ʼuhiga ʼo te ‘fakatahi mo Kilisito’ ʼe ko te liliu ʼo tahi mo ia. (Soane 17:21) ʼE hoko te felogoi ʼaia ki he Kilisitiano, mokā taki ia ia e Sehova ki tona ʼAlo pea ina fakamoʼoni ʼaki te laumālie maʼoniʼoni ko tona foha. ʼI tana liliu ko he foha fakalaumālie ʼa te ʼAtua, ʼe liliu ai ko “he fakatupu foʼou” ʼaki te ʼamanaki ʼaē ke fakatahi mo Kilisito ʼi te Puleʼaga ʼi selo. (Soane 3:3-8; 6:44; Kalate 4:6, 7) Neʼe foaki ki te kau Kilisitiano fakanofo ʼaia te pilivilesio lahi ʼi te tauhi ʼaē kia Sehova.
“Tou Fakatokatoka Mo Te ʼAtua”
9. Koteā ʼaē neʼe fai e te ʼAtua moʼo faka fealagia ki te hahaʼi ke nātou fakatokatoka mo ia?
9 Neʼe foaki e Sehova te pilivilesio lahi ki te “fakatupu foʼou.” ʼE ʼui fēnei e Paulo: “Ko meʼa fuli ʼe haʼu mai te ʼAtua, ʼaē neʼe ina fakatokatoka tatou mo ia ʼaki ia Kilisito pea neʼe ina foaki mai kia tatou te minisitelio ʼo te fakatokatoka, ko tona faka ʼuhiga ʼaē ko te ʼAtua ʼaki ia Kilisito neʼe ina fakatokatoka te mālama mo ia, ʼo mole ina tokagaʼi tanatou ʼu hala, pea neʼe ina foaki mai kia tatou te folafola ʼo te fakatokatoka.” (2 Kolonito 5:18, 19) Neʼe mamaʼo te malamanei mai te ʼAtua talu mai te agahala ʼa Atama. Kae ʼi tona ʼofa, neʼe fai e Sehova he ʼu fakatuʼutuʼu moʼo faka fealagia ki te hahaʼi ke nātou fakatokatoka mo ia ʼaki te sakilifisio ʼa Sesu.—Loma 5:6-12.
10. Neʼe foaki e Sehova kia ai te minisitelio ʼo te fakatokatoka, pea koteā ʼaē neʼe nātou fai moʼo fakahoko te faʼahi ʼaia?
10 Neʼe foaki e Sehova te minisitelio ʼo te fakatokatoka ki te kau fakanofo, pea neʼe feala ai ke ʼui ai e Paulo: “Koia ko tatou ko he ʼu tagata fakafofoga moʼo fetogi ia Kilisito, ohage neʼe poupouki koutou e te ʼAtua ʼaki ia mātou. ʼI tamatou fetogi ia Kilisito ʼe mātou tagi fēnei atu: ‘Koutou fakatokatoka mo te ʼAtua.’ ” (2 Kolonito 5:20) ʼI te temi muʼa, neʼe fekauʼi tāfito te ʼu tagata fakafofoga ʼi te ʼu temi tau moʼo vakavakaʼi pe neʼe feala ke tāʼofi te tau. (Luka 14:31, 32) Mai tona ʼaluʼaga ʼaē ʼe mamaʼo te hahaʼi agahala mai te ʼAtua, koia neʼe ina fekauʼi ai tona ʼu tagata fakafofoga fakanofo moʼo fakahā ki te hahaʼi tana ʼu fakatuʼutuʼu ki te fakatokatoka. ʼI tanatou fetogi ia Kilisito, ʼe tagi fēnei te kau fakanofo: “Koutou fakatokatoka mo te ʼAtua.” Ko te poupouki ʼaia, ʼe ko he fakaloto mālohi ʼe fai ʼaki he loto manavaʼofa ke tou tokalelei mo te ʼAtua pea mo tou tali te hāofaki ʼaē ʼe ina faka fealagia mai ʼaki ia Kilisito.
11. ʼAki te tui ki te totogi ʼaē neʼe foaki, ko ai ʼaē ʼe ina maʼu te ʼuhiga faitotonu ia muʼa ʼo te ʼAtua?
11 Ko te hahaʼi fuli ʼaē ʼe nātou tui ki te totogi ʼaē neʼe foaki e Kilisito, ʼe feala ke nātou fakatokatoka mo te ʼAtua. (Soane 3:36) ʼE ʼui fēnei e Paulo: “Ko ia [ia Sesu] ʼaē neʼe mole ina ʼiloʼi te agahala, neʼe ina [ia Sehova] fakaliliu ko te agahala maʼa tatou, ke tou liliu ʼaki ia te ia ko te faitotonu ʼo te ʼAtua.” (2 Kolonito 5:21) Ko te tagata haohaoa ko Sesu, neʼe ko te mōlaga maʼa te ʼu agahala ʼa te hōloga fuli ʼo Atama pea ʼe ina faka ʼāteainaʼi nātou mai te agahala ʼaē neʼe nātou maʼu mai ia Atama. Kua nātou liliu “ko te faitotonu ʼo te ʼAtua” ʼaki ia Sesu. Ko te faitotonu ʼaia, peʼe ko te ʼuhiga faitotonu ia muʼa ʼo te ʼAtua, ʼe ʼuluaki maʼu e te toko 144 000 ʼaē ʼe nātou kaugā hau mo Kilisito. Lolotoga tana ʼAfio ia Taʼu e Afe, ʼe maʼu anai te ʼuhiga faitotonu pea mo haohaoa e te fānau fakakelekele ʼo te Tāmai Heʼegata ʼaē ko Sesu Kilisito. ʼE ina fai anai ke nātou liliu ʼo haohaoa ʼi tonatou ʼuhiga faitotonu, ke feala ai ke nonofo agatonu ki te ʼAtua pea ke nātou maʼu te meʼa ʼofa ʼaē ko te maʼuli heʼegata.—Isaia 9:6; Fakahā 14:1; 20:4-6, 11-15.
“Ko Te Temi ʼAenī ʼe Ko Te Temi Faigamālie Tāfito”
12. Koteā te minisitelio maʼuhiga ʼaē ʼe fakahoko e te kau fakafofoga ʼa Sehova pea mo te hahaʼi ʼaē ʼe ina fekauʼi?
12 Ke hāofaki tatou, ʼe tonu ke tou mulimuli ki te ʼu palalau ʼaenī ʼa Paulo: “ ʼI tamatou gāue fakatahi mo ia [ia Sehova], ʼe mātou toe kole mamahi atu kia koutou ke ʼaua naʼa ʼalunoa takotou tali ia te ʼofa makehe ʼo te ʼAtua. Heʼe ina ʼui fēnei: ‘Neʼe ʼau fagono kia te koe ʼi te temi faigamālie, pea ʼi te ʼaho ʼo te hāofaki neʼe ʼau tokoni kia te koe.’ Koʼeni! Ko te temi ʼaenī ʼe ko te temi faigamālie tāfito. Koʼeni! Ko te temi ʼaenī ʼe ko te ʼaho ʼo te hāofaki.” (2 Kolonito 6:1, 2) Ko te kau fakafofoga fakanofo ʼa Sehova pea mo te ʼu hahaʼi ʼaē ʼe ina fekauʼi, ʼaē ko te “tahi ʼu ōvi,” ʼe mole ʼalunoa tanatou tali te ʼofa makehe ʼo tanatou Tāmai ʼaē ʼi selo. (Soane 10:16) ʼAki tanatou agatonu pea mo tanatou gāue mālohi ʼi tanatou minisitelio ʼi te “temi faigamālie” ʼaenī, ʼe nātou kumi ai te ʼofa ʼa te ʼAtua pea mo nātou fakahā ki te hahaʼi ʼe ko “te ʼaho [ʼaenī] ʼo te hāofaki.”
13. Koteā te manatu tāfito ʼo te vaega ʼo Isaia 49:8, pea neʼe koteā tona ʼuluaki fakahoko?
13 Neʼe fakaʼaogaʼi e Paulo te ʼu palalau ʼaē ia Isaia 49:8, ʼaē ʼe tou lau fēnei ai: “Koʼeni te meʼa ʼaē neʼe ʼui e Sehova: ‘ ʼI te temi ʼo te finegaloʼofa, neʼe ʼau tali atu kia te koe, pea ʼi te ʼaho ʼo te hāofaki neʼe ʼau tokoni atu kia te koe; neʼe ʼau hāofaki koe ke ʼau foaki koe ohage ko he fuakava ki te hahaʼi, ke toe fakatuʼu te fenua, ke toe maʼu te ʼu kele ʼo te ʼu kui ʼaē neʼe maumauʼi.’ ” Neʼe ʼuluaki hoko te lea faka polofeta ʼaia ʼi te temi ʼaē neʼe faka ʼāteaina ai te hahaʼi ʼo Iselaele mai tanatou ʼaunofo ʼi Papiloni ʼo nātou toe liliu ki tonatou fenua ʼaē neʼe maumauʼi.—Isaia 49:3, 9.
14. Neʼe fakahoko feafeaʼi e Sesu ia Isaia 49:8?
14 ʼI te fakahoko fakamuli ʼo te lea faka polofeta ʼo Isaia, neʼe fekauʼi e Sehova tana “kaugana” ko Sesu ko “he mālama ki te ʼu puleʼaga, ke aʼu te hāofaki [ʼa te ʼAtua] ki te potu taupotu ʼo te kele.” (Isaia 49:6, 8; vakaʼi ia Isaia 42:1-4, 6, 7; Mateo 12:18-21.) ʼE mahino ia, ko te “temi ʼo te finegaloʼofa,” peʼe ko te “temi faigamālie,” neʼe faka ʼuhiga kia Sesu ʼi tana kei maʼuli ʼi te kele. Neʼe faikole, pea neʼe “tali” age e te ʼAtua kia te ia. Neʼe liliu ai maʼa Sesu, ʼe ko “he ʼaho ʼo te hāofaki,” he neʼe ina taupau lelei tana agatonu, pea “neʼe liliu ai ko te tafitoʼaga ʼo te hāofaki heʼegata kia nātou fuli ʼaē ʼe talagafua kia te ia.”—Hepeleo 5:7, 9; Soane 12:27, 28.
15. Neʼe ko te temi fea ʼaē neʼe faiga ai te kau Iselaelite fakalaumālie ke nātou fakamoʼoni ʼe tāu mo nātou te ʼofa makehe ʼo te ʼAtua, pea koteā tona tupuʼaga?
15 ʼE faka ʼuhiga e Paulo te vaega ʼaē ia Isaia 49:8 ki te kau Kilisitiano fakanofo, ʼo ina kole kia nātou ke ‘ ʼaua naʼa nātou faka ʼalunoa te fakatuʼutuʼu ʼo te ʼofa makehe ʼo te ʼAtua,’ ʼo mole nātou kumi tona finegaloʼofa ʼi te “temi faigamālie” pea ʼi te “ ʼaho ʼo te hāofaki” ʼaē ʼe ina foaki mai. ʼE toe ʼui fēnei e Paulo: “Koʼeni! Ko te temi ʼaenī ʼe ko te temi faigamālie tāfito. Koʼeni! Ko te temi ʼaenī ʼe ko te ʼaho ʼo te hāofaki.” (2 Kolonito 6:2) Talu mai te Penikosite ʼo te taʼu 33 ʼo totatou temi, neʼe faiga e te kau Iselaelite fakalaumālie ke nātou fakamoʼoni ʼe tāu mo nātou te ʼofa makehe ʼo te ʼAtua, ke liliu maʼa nātou tonatou “temi faigamālie” ko “he ʼaho ʼo te hāofaki.”
‘ ʼE Mātou Vikiʼi Mātou ʼi Tomatou ʼUhiga Kau Minisi ʼo Te ʼAtua’
16. Neʼe koteā te ʼu ʼaluʼaga faigataʼa ʼaē neʼe hoko kia Paulo ʼaē neʼe hā ai, ko he minisi ʼa te ʼAtua?
16 Ko ʼihi tagata ʼo te kokelekasio ʼo Kolonito neʼe mole tāu mo nātou te ʼofa makehe ʼo te ʼAtua. Neʼe nātou fasituʼu ʼo ʼuhiga mo Paulo, ʼo nātou faiga ke nātou maumauʼi tana pule faka ʼapositolo, logope la neʼe mole ina fia “fai he meʼa ke tupu ai he tūkia ʼa he tahi.” ʼE mahino papau ia neʼe ina fakahā ko ia ko he minisi ʼo te ʼAtua “ ʼi te ʼatu ʼu meʼa ʼaē neʼe ina kātakiʼi, ʼi te ʼu mamahi, ʼi te ʼāhua, ʼi te ʼu faigataʼaʼia, ʼi tona tā, ʼi te ʼu fale pilisoni, ʼi te ʼu maveuveu, ʼi te ʼu ogosia, ʼi te ʼu po ʼaē neʼe mole moe ai, ʼi te ʼu temi ʼaē neʼe mole ʼi ai [hana] meʼa kai.” (2 Kolonito 6:3-5) Ki muli age, neʼe ʼui e Paulo kapau ko nātou ʼaē neʼe nātou fakafeagai kia ia neʼe ko he kau minisi, pea neʼe “laka age” ia nātou, koteʼuhi neʼe mamahi lahi age ʼi tona pilisoniʼi, mo tona tā, mo tona tuʼutāmakiʼia pea mo tona ʼu faigataʼaʼia.—2 Kolonito 11:23-27.
17. (a) Koteā te ʼu kalitate ʼaē ʼe tonu ke tou maʼu moʼo fakahā ai ko tatou ko te ʼu minisi ʼo te ʼAtua? (b) Koteā “te ʼu mahafu ʼo te faitotonu”?
17 Ohage ko Paulo pea mo tona ʼu kaugā gāue, ʼe feala ke tou vikiʼi tatou ʼuhi ko tatou ko te ʼu minisi ʼa te ʼAtua. ʼO feafeaʼi? “ ʼAki tatatou nofo maʼa,” pea mo tatatou gāue ʼo mulimuli ki te ʼatamai mālama totonu ʼo te Tohi-Tapu. ʼE feala ke tou vikiʼi tatou ‘ ʼi tatatou lotoʼutaki,’ ʼo tou kātakiʼi te ʼu loi peʼe ko te ʼu fakafifihi, pea “ ʼaki he loto agalelei” tou fai he ʼu meʼa moʼo tokoni ki te hahaʼi. Tahi ʼaē meʼa, ʼe feala ke tou vikiʼi tatou ʼuhi ko tatou ko te ʼu minisi ʼa te ʼAtua ʼi tatatou tali te takitaki ʼo tona laumālie, mo tou fakahā te “ ʼofa ʼaē ʼe mole malualoi,” mo tou palalau ʼaki te moʼoni, pea mo tou falala ki tona mālohi moʼo fakahoko te minisitelio. ʼE tou fakatokagaʼi neʼe toe fakahā e Paulo ko ia ko he minisi “ ʼaki te ʼu mahafu ʼo te faitotonu ʼi tona nima mataʼu pea ʼi tona nima hema.” ʼI te ʼu tau ʼo te temi muʼa, ʼi te agamāhani neʼe puke te heletā ʼi te nima mataʼu kae toʼo ʼi te nima hema te meʼa tali tau. ʼI te tau fakalaumālie ʼaē neʼe ina fai ki te kau faiakonaki loi, neʼe mole fakaʼaogaʼi e Paulo te ʼu mahafu ʼo te kakano agahala—ʼaē ko te aga fakapikopiko, mo te kākā, pea mo te malualoi. (2 Kolonito 6:6, 7; 11:12-14; Tāʼaga Lea 3:32) Neʼe ina fakaʼaogaʼi te ʼu “mahafu” ʼo te faitotonu, peʼe ko te ʼu meʼa kehekehe moʼo faka mafola te tauhi moʼoni. ʼE tonu ke tou fai feiā mo tatou.
18. Kapau ko tatou ko he kau minisi ʼo te ʼAtua, ʼe feafeaʼi anai tatatou aga?
18 Kapau ko tatou ko he ʼu minisi ʼa te ʼAtua, pea ʼe tou faʼifaʼitakiʼi anai ia Paulo pea mo tona ʼu kaugā gāue. ʼE tou fai anai ohage ko te kau Kilisitiano, peʼe fakaʼapaʼapaʼi tatou peʼe kailoa. ʼE mole tou fakagata anai tatatou gāue fai faka mafola ʼuhi ko te ʼu fakamatala loi ʼaē ʼe fai ʼo ʼuhiga mo tatou, pea ʼe mole tou nekenekea anai mokā fai he ʼu talanoa lelei ʼo ʼuhiga mo tatou. ʼE tou palalau anai ʼaki te moʼoni pea ʼe lagi fakafetaʼi anai te hahaʼi ʼo ʼuhiga mo te ʼu gāue ʼaē ʼe tou fai maʼa te ʼAtua. ʼE tou falala anai kia Sehova mokā ʼe fai he ʼu fakataga kia tatou, ʼaē ʼe feala ke tou mamate ai. Pea ʼe tou tali anai ʼaki he loto fakafetaʼi, mokā fakatonutonuʼi tatou.—2 Kolonito 6:8, 9.
19. ʼE lava feafeaʼi hatatou ‘faka koloaʼia te tokolahi’ ʼi te faʼahi fakalaumālie?
19 Moʼo fakaʼosi tana fai palalau ʼo ʼuhiga mo te minisitelio ʼo te fakatokatoka, neʼe ʼui fēnei e Paulo ʼo ʼuhiga mo ia pea mo tana ʼu kaugā gāue, ʼe “mātou mamahi kae ʼe mātou fiafia tuʼumaʼu, ʼe mātou māsisiva kae mātou faka koloaʼia te tokolahi, ʼe mole hamatou meʼa kae mātou maʼu ia meʼa fuli.” (2 Kolonito 6:10) Logope la neʼe maʼuli mamahi te kau minisi ʼaia ʼuhi ko te ʼu faigataʼaʼia ʼaē neʼe tau mo nātou, kae neʼe nātou fiafia ʼi tonatou loto. Neʼe nātou māsisiva ʼi te faʼahi fakasino, kae ‘neʼe nātou faka koloaʼia te tokolahi’ ʼi te faʼahi fakalaumālie. ʼI tona fakahagatonu, neʼe nātou “maʼu ia meʼa fuli” heʼe ko tanatou tui neʼe ina foaki kia nātou te ʼu koloā fakalaumālie—ʼo kau ai mo te ʼamanaki ʼaē ke nātou liliu ko he ʼu foha ʼo te ʼAtua ʼe ʼolo anai ʼo maʼuʼuli ʼi selo. Pea neʼe nātou maʼuli tapuakina pea mo fiafia ʼi tonatou ʼuhiga kau minisi Kilisitiano. (Gāue 20:35) Ohage ko nātou, ʼe feala ke tou ‘faka koloaʼia te tokolahi’ ʼi tatatou kau ʼi te temi nei ki te minisitelio ʼo te fakatokatoka—ʼi te ʼaho ʼaenī ʼo te hāofaki!
Tou Falala ʼe Hāofaki Anai Tatou e Sehova
20. (a) Koteā ʼaē neʼe loto moʼoni kiai ia Paulo, pea he koʼe neʼe mole tonu ke fakatuai ʼo ʼuhiga mo te faʼahi ʼaia? (b) Koteā ʼaē ʼe hoko ʼo ina fakahā ai ʼe tou maʼuʼuli ʼi te temi nei ʼi te ʼaho ʼo te hāofaki?
20 ʼI te temi ʼaē neʼe tohi ai e Paulo tana lua tohi ki te kau Kolonito ʼi te lagi taʼu 55 ʼo totatou temi, neʼe kei toe pe taʼu e 15 ki te tuʼu ʼo te ʼu faʼahiga meʼa faka Sutea. Neʼe loto moʼoni e te ʼapositolo ko Paulo ke fakatokatoka te kau Sutea pea mo te kau Senitile mo te ʼAtua ʼaki ia Kilisito. Neʼe ko te ʼaho ʼaia ʼo te hāofaki, pea neʼe kua nounou te temi. Talu mai te taʼu 1914, kua tou nonofo ʼi te temi fakaʼosi ʼo te tuʼu ʼo te ʼu faʼahiga meʼa ʼaenī. Ko te fakahoko ʼo te gāue fai faka mafola ʼo te Puleʼaga ʼi te temi ʼaenī, ʼe ina fakahā lelei ai ʼe ko te ʼaho ʼaenī ʼo te hāofaki.
21. (a) Koteā te vaega ʼaē neʼe filifili ki te taʼu 1999? (b) Koteā ʼaē ʼe tonu ke tou fai ʼi te ʼaho ʼaenī ʼo te hāofaki?
21 ʼE tonu ke ʼiloʼi e te hahaʼi ʼo te ʼu fenua fuli pe koteā te fakatuʼutuʼu ʼa te ʼAtua moʼo hāofaki nātou ʼaki ia Sesu Kilisito. ʼE mole tonu ke tou tuai. Neʼe tohi fēnei e Paulo: “Koʼeni! ʼE ko te ʼaho ʼaenī ʼo te hāofaki.” Ko te vaega ʼaia ʼo 2 Kolonito 6:2 ʼe ko te vaega ʼaē ka fakaʼaogaʼi e te kau Fakamoʼoni ʼa Sehova ki te taʼu 1999. ʼE tō lelei te vaega ʼaia heʼe hoko mai anai te meʼa ʼe kovi ʼaupito age ʼi te fakaʼauha ʼo Selusalemi pea mo tona fale lotu! Kua ōvi mai te fakaʼosi ʼo te tuʼu ʼo te ʼu faʼahiga meʼa katoa ʼaenī, pea mo te hahaʼi ʼaē ʼe nonofo ʼi te kele. ʼE ko te temi ʼaenī ʼaē ʼe tonu ke tou gāue ai, kae mole tou atalitali ki he tahi ʼaho. Kapau ʼe tou tui ko Sehova ʼaē ka ina hāofaki tatou, kapau ʼe tou ʼoʼofa kia te ia, pea kapau ʼe tou fia maʼuʼuli ʼo heʼegata, pea ʼe mole tou faka ʼalunoa anai te ʼofa makehe ʼo te ʼAtua. ʼI tatatou loto moʼoni ʼaē ke tou fakaʼapaʼapa kia Sehova, ʼe tou fakahā anai ʼaki tatatou ʼu palalau pea mo tatatou ʼu aga ʼo tou kalaga fēnei: “Koʼeni! Ko te temi ʼaenī ʼe ko te ʼaho ʼo te hāofaki.”
ʼE Koutou Tali Feafeaʼi Anai?
◻ He koʼe ʼe maʼuhiga ʼaupito ke tou fakatokatoka mo te ʼAtua?
◻ Ko ai te kau fakafofoga pea mo nātou ʼaē ʼe fekauʼi ki te minisitelio ʼo te fakatokatoka?
◻ ʼE lava feafeaʼi hatatou vikiʼi tatou ʼuhi ko tatou ko te ʼu minisi ʼa te ʼAtua?
◻ Koteā te faka ʼuhiga kia koutou ʼo te vaega ʼa te kau Fakamoʼoni ʼa Sehova ki te taʼu 1999?
[Paki ʼo te pasina 17]
Ohage ko Paulo, ʼe lahi koa takotou fai faka mafola mo takotou tokoni ki te hahaʼi ke nātou fakatokatoka mo te ʼAtua?
Amelika
Falani
Côte dʼIvoire
[Paki ʼo te pasina 18]
ʼI te ʼaho ʼaenī ʼo te hāofaki, ʼe koutou kau koa ʼi te hahaʼi kaugamālie ʼaē kua nātou fakatokatoka mo Sehova ʼAtua?