Neʼe Tāʼofi Te Hoko ʼo Te Kaihaʼa ʼi Te Potu Hihifo ʼo Afelika
Neʼe fakamatala e Eunice Ebuh
“Ko te kau kaihaʼa mo ʼanatou ʼu fana neʼe nātou fakatuʼutuʼu ke nātou ʼōmai ʼi te ʼaho ʼaē ʼe mātou fai māhani ai te Ako Tohi ʼo te Kokelekasio ʼi tamatou ʼapi. Neʼe mātou tuku ava te ʼu matapā ki te ʼu tēhina mo tuagaʼane, pea ki te hahaʼi ʼaē neʼe fia logo. ʼE mahino ia neʼe kua ʼiloʼi e te kau kaihaʼa te ʼu meʼa ʼaē ʼe mātou fai māhani, pea mo te hola ʼo te fono. Neʼe fakahā mai kia mātou neʼe nātou kaihaʼa te motokā ʼi te tahi koga meʼa, pea neʼe nātou ʼōmai ʼo atalitali ʼi tomatou matapā te ʼaho pea mo te hola ʼaē ʼe fai ai tamatou ako tohi.
“Ko te vāhaʼa ʼaē neʼe nātou ʼōmai ai neʼe ko te vāhaʼa tonu ʼaē neʼe ʼaʼahi ai mātou e te tagata taupau faka silikosikilipisio. Neʼe mole fai te fono iō mātou, kae neʼe mātou fono ʼi te Fale ʼo te Puleʼaga. ʼI te hili ʼo te fono, neʼe fai te fono ʼo te kau tagata ʼāfea. ʼI te agamāhani ko ʼau mo te ʼu fānau ʼe mātou liliu ki fale, kae ko toku ʼohoana, ʼaē ʼe tagata ʼāfea, neʼe ina kole mai ke mātou talitali kia ia. Neʼe ina ʼui mai ʼe mole fualoa anai, pea neʼe mātou talitali ai.
“Ki muli age, neʼe mole kei haʼele te motokā. Kae neʼe mole lava gaohi e te tagata taupau faka silikosikilipisio pea mo toku ʼohoana ia te motokā, ʼo feiā mo te tagata mekanisia ʼaē neʼe mātou pāui ki ai.
“Neʼe haʼele lalo te ʼu toe ki fale. Hili te kiʼi temi, pea neʼe ʼau tau atu mo ʼau ki fale. Neʼe ko te lagi hola hogofulu. Ko ʼau mo taku ʼu toe neʼe mole mātou hū mo he motokā ki loto, kanaʼauala neʼe tonu ke avahi te foʼi matapā lahi.
“ ʼI taku hū ki toku kogafale, neʼe ʼau logo ki te pa fana. Neʼe ʼau feʼekeʼaki pe koteā ʼaē ʼe hoko. Neʼe ʼau faiga ke ʼau telefoni ki te kau polisi, kae neʼe kua tuʼusi te telefoni. Neʼe ʼau lele ki lalo pea mo ʼau lokaʼi te matapā ʼo muʼa, pea neʼe ʼau lele ʼo lokaʼi te matapā ʼi te lotomalie. Neʼe ʼau matehi te ʼu hila. Neʼe matataku taku ʼu tamaliki, pea neʼe ʼau ʼui age ke tuku tanatou matataku. Neʼe mātou faikole fakatahi ke puipui mātou e Sehova. ʼI te temi ʼaia, neʼe kei nofo toku ʼohoana ʼi te Fale ʼo te Puleʼaga ʼo faiga ke ina fakahaʼele te motokā.
“Neʼe ʼau fakasiosio ʼi te matapā fakamālama, pea neʼe ʼau sio ai ki te tagata neʼe foʼohake ʼi te ala ʼi tuʼa ʼo te matapā. Neʼe hage neʼe kua ʼolo te kau kaihaʼa, pea neʼe ʼau hiki te tagata ʼaē neʼe lavea ʼo ʼai ki taku motokā pea neʼe ʼau leletakiʼi ki lopitali. Neʼe tonu ke ʼau fai he meʼa logope la neʼe feala ke ʼau tuʼutāmaki ai. Kae meʼa fakaʼofaʼofa he neʼe mate te tagata ʼi te uhu ake.
“Logope la te meʼa ʼaia, kae neʼe mole he tahi tuʼutāmaki neʼe hoko. ʼAki te ʼaʼahi ʼo te tagata taupau faka silikosikilipisio neʼe mole fai ai te ako tohi ʼi tomatou ʼapi. ʼI te mole haʼele ʼa te motokā neʼe mole mātou toe liliu fakatahi ai ki fale. Neʼe mole puke e te kau kaihaʼa toku ʼohoana, he neʼe tau mai ki fale ka kua pōʼuli ʼosi. Ko te ʼu faʼahi ʼaia pea mo ʼihi atu faʼahi, neʼe nātou hāofaki mātou ʼi te po ʼaia.
“Ko Sehova tomatou mālohi pea mo tomatou holaʼaga. ʼE hage ko tona ʼui fēnei e te Tohi-Tapu: ‘Kapau ʼe mole leʼohi totonu e Sehova te kolo, pea ʼe mole he ʼaoga ʼo te nofo ʼalaʼala ʼa te tagata leʼo.’ ”—Pesalemo 127:1.