Koutou Haga Haʼele ʼi Te Ala ʼa Sehova
“Falala kia Sehova pea taupau tona ala, pea ʼe ina hikihiki anai koe ke ke maʼu te kele.”—Pesalemo 37:34.
1, 2. ʼI te manatu ʼa te Hau ko Tavite, koteā te ʼu meʼa ʼaē neʼe tonu ke fai e ia ʼaē neʼe haʼele ʼi te ala ʼa Sehova, pea koteā tona faka ʼuhiga kia tatou ia ʼaho nei?
“FAKAHĀ mai kia te ʼau te ala ʼaē ʼe tonu ke ʼau haʼele ai, he neʼe ʼau hiki toku nefesi kia te koe.” (Pesalemo 143:8) Ia ʼaho nei, ʼe toe fai e te kau Kilisitiano te ʼu palalau ʼaia ʼa te Hau ko Tavite. ʼE nātou loto fakamalotoloto ke leleiʼia nātou e Sehova pea ke nātou haʼele ʼi tona ala. Koteā te ʼu meʼa ʼaē ʼe tonu ke nātou fai? ʼI te manatu ʼa Tavite, neʼe tonu ke mulimuli ki te lao ʼa te ʼAtua. Tahi ʼaē meʼa, neʼe tonu ke falala kia Sehova kae mole ki te ʼu fuakava ʼaē ʼe ina fai mo te ʼu puleʼaga. Ei, pea neʼe toe tonu foki ke tauhi agatonu kia Sehova, kae mole ki te ʼu ʼatua ʼo te ʼu puleʼaga ʼi te ʼu tafaʼaki. Kae ki te kau Kilisitiano, ʼe ʼi ai te tahi ʼu meʼa ʼe pipiki ki tanatou haʼele ʼi te ala ʼa Sehova.
2 ʼI te tahi faʼahi, ko takita haʼele ʼi te ala ʼa Sehova, ko tona faka ʼuhiga ke kita tui ki te sakilifisio faitotogi ʼa Sesu Kilisito pea kita fakamoʼoni ko ia “te Ala, mo te Mooni pea mo te Mauli.” (Soane 3:16; 14:6; Hepeleo 5:9) Ko tona tahi faka ʼuhiga, ʼe tonu ke kita fakahoko “te lao a Kilisito,” ʼaē ʼe ina fakamaʼua mai ke tou feʼofani pea ke tou ʼofa tāfito ki te ʼu tēhina fakanofo ʼo Sesu. (Kalate 6:2; Mateo 25:34-40) Ko nātou ʼaē ʼe haʼele ʼi te ala ʼa Sehova, ʼe nātou leleiʼia tana ʼu pelesepeto pea mo tana ʼu fakatotonu. (Pesalemo 119:97; Tāʼaga Lea 4:5, 6) ʼE nātou leleiʼia tāfito tanatou pilivilesio makehe ʼaē ke nātou kau ki te minisitelio faka Kilisitiano. (Kolose 4:17; 2 Timoteo 4:5) ʼE nātou faikole tuʼumaʼu. (Loma 12:12) Pea ʼe nātou “vakai fakapotopoto, pe feafeai te agaaga fai o toutou mauli: aua naʼa hage ko te hahai galivale, kae hage ko te hahai galipoto.” (Efeso 5:15) ʼE mole nātou līaki te ʼu koloā fakalaumālie ke nātou maʼu he ʼu koloā fakasino faka temi peʼe ko he ʼu fiafia fakasino heʼeʼaoga. (Mateo 6:19, 20; 1 Soane 2:15-17) Tahi ʼaē meʼa, ʼe maʼuhiga ʼaupito ke tou nofo agatonu pea ke tou falala kia te ia. (2 Kolonito 1:9; 10:5; Efeso 4:24) Koteā tona tupuʼaga? Koteʼuhi ko totatou ʼaluʼaga ʼe tatau mo te ʼaluʼaga ʼo te Iselaele ʼo te temi ʼāfea.
ʼE ʼAoga Ke Kita Loto Falala Pea Ke Kita Agatonu
3. He koʼe ko te agatonu, mo te tui pea mo te loto falala ʼe tokoni mai anai ke tou nonofo ʼi te ala ʼa Sehova?
3 Ko Iselaele neʼe ko he puleʼaga veliveli neʼe tuʼu ʼi te lotolotoiga ʼo te ʼu puleʼaga agakovi, neʼe nātou tauhi tamapua pea neʼe nātou fai te ʼu toʼotoʼoga heʼeʼaoga. (1 Fakamatala 16:26) Ko Iselaele tokotahi pe ʼaē neʼe tauhi kia Sehova, te ʼAtua moʼoni pea mo fakapulipuli, pea neʼe ina fakamaʼua kia nātou ke nātou mulimuli ki te ʼu lekula māʼoluga ʼo ʼuhiga mo te aga ʼaē ʼe tonu ke fai. (Teutalonome 6:4) ʼO toe feiā pe ia ʼaho nei, ko te toko lauʼi miliona hahaʼi pe ʼe nātou tauhi kia Sehova, pea ʼe nātou maʼuʼuli ʼi te lotolotoiga ʼo te toko 6 miliale hahaʼi ʼaē ko tanatou ʼu lekula pea mo tanatou ʼu manatu ʼo ʼuhiga mo te lotu ʼe kehe mo tanatou ʼu manatu. Kapau ʼe tou kau ki te toko lauʼi miliona hahaʼi ʼaia, pea ʼe tonu ke tou nofo tokaga ke ʼaua naʼa malave kia tatou tanatou ʼu manatu kovi ʼaia. ʼE lava feafeaʼi hatatou tekeʼi te ʼu faʼahi ʼaia? ʼE tonu ke tou nofo agatonu kia Sehova ʼAtua, ke tou tui kia te ia pea ke tou falala ʼe ina fakahoko anai tana ʼu fakapapau. (Hepeleo 11:6) Kapau ʼe tou fai te ʼu faʼahi ʼaia pea ʼe mole tou tuku anai tatatou falala ki te ʼu meʼa ʼaē ʼe falala kiai te mālama.—Tāʼaga Lea 20:22; 1 Timoteo 6:17.
4. He koʼe koa ko te ʼu puleʼaga “kua fakapouli onatou atamai”?
4 Neʼe fakamahino e te ʼapositolo ko Paulo ʼe tonu ke kehe te kau Kilisitiano mo te mālama, ʼo ina tohi fēnei: “Ko te mea aeni e au tala atu mo au fakamooni atu i te Aliki, aua tautou toe mauli o hage ko te kau pagani, e natou mauli i te fialahi o anatou fakakaukau. Kua fakapouli onatou atamai, kua natou matapule mai te mauli o te Atua, uhi ko te vale e ia natou, ko te fua o te fefeka o onatou loto.” (Efeso 4:17, 18) Ko Sesu “te malama mooni.” (Soane 1:9) Ko nātou fuli ʼaē ʼe nātou līaki ia ia peʼe nātou lau ʼe nātou tui kia ia kae mole nātou fakalogo ki te “lao a Kilisito,” ʼe “fakapouli onatou atamai.” ʼE mole nātou haʼele ʼi te ala ʼa Sehova, kae ʼe nātou “matapule mai te mauli o te Atua.” Tatau aipe peʼe nātou manatu ʼe lahi tonatou poto fakamālama, kae ʼuhi “ko te vale e ia natou” ʼe mole nātou maʼu he ʼatamai mālama pe e tahi ʼo ʼuhiga mo Sehova ʼAtua pea mo Sesu Kilisito, ʼaē ʼe ina taki ki te maʼuli.—Soane 17:3; 1 Kolonito 3:19.
5. Logope la ʼe mū te mālama ʼo te moʼoni ʼi te malamanei, kae he koʼe koa ʼe tokosiʼi ia nātou ʼaē ʼe nātou tali?
5 Kae ʼe mū te mālama ʼo te moʼoni ʼi te malamanei! (Pesalemo 43:3; Filipe 2:15) “Ko te poto moʼoni ʼe haga kalaga ʼi te ala.” (Tāʼaga Lea 1:20) ʼI te taʼu ʼaenī kua hili, neʼe fakaʼaogaʼi e te kau Fakamoʼoni ʼa Sehova hola e tahi miliale moʼo tala ki te hahaʼi te logo ʼo ʼuhiga mo Sehova ʼAtua pea mo Sesu Kilisito. Ko te lauʼi teau afe hahaʼi neʼe nātou tali te logo ʼaia. Kae ʼe tonu koa ke tou punamaʼuli heʼe mole tali e te tokolahi te logo ʼaia? Kailoa. Neʼe talanoa ia Paulo ki “te fefeka o onatou loto.” ʼE fefeka te loto ʼo ʼihi heʼe nātou manatu pe kia nātou totonu peʼe nātou manako ki te paʼaga. Ko ʼihi ʼe nātou hēʼia ʼuhi ko te ʼu lotu loi peʼe ko te ʼu manatu fakamālama ʼaē ʼe mafola ʼi te temi ʼaenī. Neʼe līaki e te tahi ʼu hahaʼi ia te ʼAtua ʼuhi ko te ʼu mamahi lahi ʼaē neʼe tau mo nātou. Pea ko ʼihi ʼe mole nātou fia mulimuli ki te ʼu lekula māʼoluga ʼa Sehova ʼo ʼuhiga mo te aga ʼaē ʼe tonu ke fai. (Soane 3:20) ʼE feala koa ki te ʼu ʼaluʼaga ʼaia ke nātou fakafefeka te loto ʼo he tahi ʼe haʼele ʼi te ala ʼa Sehova?
6, 7. Logope la neʼe tauhi te kau Iselaelite kia Sehova ʼAtua, ko te ʼu lakaga fea ʼaē neʼe nātou hēʼia ai pea koteā tona tupuʼaga?
6 Ohage ko tona fakahā mai e Paulo, neʼe hoko te faʼahi ʼaia ʼi te Iselaele ʼo te temi ʼāfea. Neʼe ina tohi fēnei: “Ko te u faahiga mea nee hoko e uhiga mo tatou, koteuhi ke aua naa tou fekumi te kovi o hage ko te fekumi a natou alâ. Aua naa koutou liliu ko he u tauhi taulaʼatua, o hage ko ihi o natou; o faipe ki tona tohi: Nee nonofo ki lalo te hahai o kakai mo iʼinu pea nee natou tutuuʼake fakafiafia. Aua naa tou feauaki o hage ko te feauaki o ihi o natou pea nee kafo ai i he aho e tahi te toko uafulu-ma-tolu afe.”—1 Kolonito 10:6-8.
7 ʼE ʼuluaki talanoa ia Paulo ki te lakaga ʼaē neʼe atolasio ai ia Iselaele ki te ʼuhiʼi pipi aulo ʼi te vaʼe Moʼuga ʼo Sinai. (Ekesote 32:5, 6) Neʼe ko he talagataʼa fakahagatonu ʼaia ki te fakatotonu ʼaē neʼe fai age e te ʼAtua logope la neʼe nātou tali ke nātou fakalogo kiai ʼi he ʼu vāhaʼa ki muʼa atu. (Ekesote 20:4-6; 24:3) Ki muli age, ʼe talanoa ia Paulo ki te temi ʼaē neʼe tulolo ai ia Iselaele kia Paale mo te hahaʼi fafine Moapite. (Faka au 25:1-9) Neʼe fai te tauhi ki te ʼuhiʼi pipi ʼaki he ʼu aga heʼeʼaoga, pea neʼe nātou “fakafiafia.”a Neʼe kau ki te tauhi kia Paale te ʼu aga heʼeʼaoga fakalialia. (Apokalipesi 2:14) He koʼe koa neʼe fai e te kau Iselaelite te ʼu agahala ʼaia? Koteʼuhi neʼe nātou tuku tonatou loto ke ina ‘kumi te kovi’—te tauhi tamapua peʼe ko te ʼu aga heʼeʼaoga.
8. Koteā te ako ʼaē ʼe feala ke tou tāʼofi mai te ʼu meʼa ʼaē neʼe hoko ki Iselaele?
8 Neʼe fakahā mai e Paulo ʼe ʼi ai te ʼu meʼa ʼe tonu ke tou ako mai te ʼu meʼa ʼaia. Koteā te ako ʼaia? ʼE mole tulolo anai he Kilisitiano ki te ʼuhiʼi pipi aulo peʼe ki he ʼatua Moapite ʼāfea. Kae e feafeaʼi ki te ʼu aga heʼeʼaoga pea mo te ʼu fakafiafia fakavale? ʼE mafola te ʼu aga ʼaia ʼi te temi ʼaenī pea kapau ʼe tou tuku ke tupu ʼi totatou loto te holi ki te ʼu meʼa ʼaia, pea ʼe nātou fakamamaʼo anai tatou mai ia Sehova. Ko tona ikuʼaga ʼe tatau mo te ikuʼaga ʼo te tauhi tamapua—ʼe tou fakamamaʼo anai mai te ʼAtua. (Vakaʼi ia Kolose 3:5; Filipe 3:19.) Ei, ʼe fakaʼosi e Paulo tana fakamatala te ʼu meʼa ʼaia ʼo ina uga fēnei te kau Kilisitiano: “Koutou hola mai te tauhi o te u taulaʼatua.”—1 Kolonito 10:14.
Te Tokoni Ke Tou Lava Haʼele ʼi Te Ala ʼa Te ʼAtua
9. (a) Koteā te tokoni ʼaē ʼe fai mai kia tatou ke feala hatatou haga haʼele ʼi te ala ʼa Sehova? (b) Koteā te tahi faka ʼuhiga ʼo te ʼui ʼaē ʼe tou logo ki ‘te folafola ʼaē ʼe haʼu mai ʼotatou tuʼa’?
9 Kapau ʼe tou lotomālohi ke tou haʼele ʼi te ala ʼa Sehova, ʼe feala ke tou maʼu he tokoni. Neʼe fakakikite fēnei e Isaia: “ ʼE logo anai tou ʼu taliga ki he folafola ʼe haʼu mai ʼou tuʼa, ʼo ina ʼui fēnei: ‘Koʼeni te ala. Koutou haʼele ai,’ mo kapau ʼe koutou fia ʼolo ki te faʼahi mataʼu peʼe kapau ʼe koutou fia ʼolo ki te faʼahi hema.” (Isaia 30:21) Koteā te faka ʼuhiga ʼo te ʼui ʼaē ko “tou ʼu taliga” ʼe logo anai ki he “folafola ʼe haʼu mai ʼou tuʼa”? Ia ʼaho nei, ʼe mole he tahi ʼe fagono moʼoni ki te leʼo ʼo te ʼAtua pea ʼe mole ina fakahā fakahagatonu mai hana ʼu logo. ʼE tou logo fuli ki te “folafola” ʼaia ʼi hona ʼaluʼaga e tahi. ʼE fakahā mai te folafola ʼaia e te Tohi-Tapu ʼaē ʼe maʼu ai te ʼu manatu ʼa te ʼAtua pea mo te fakamatala ʼo tana ʼu felogoi mo te hahaʼi. Mai tona ʼuhiga ʼaē ʼe tou tau ʼi te ʼaho fuli mo te ʼu manatu ʼa te hahaʼi ʼaē ʼe “matapule mai te mauli o te Atua,” koia ʼe tonu ke tou lau te Tohi-Tapu pea mo metitasioʼi tuʼumaʼu ke tou nofo mālohi ʼi te faʼahi fakalaumālie. ʼE tokoni anai te faʼahi ʼaia kia tatou ke tou tekeʼi te ʼu “mea fakavale” pea “ke katoa te tagata a te Atua, kua teuteu o uhiga mo te gaue lelei fuape.” (Gaue 14:14, 15; 2 Timoteo 3:16, 17) ʼE ina fakamālohiʼi pea mo tokoni mai anai kia tatou ke tou ‘fai ke manuʼia totatou ala.’ (Sosue 1:7, 8) Ko te tupuʼaga la ʼaia ʼo te fakaloto mālohiʼi fēnei mai e te Folafola ʼa Sehova: “Naʼi fānau, koutou fakalogo mai kia te ʼau: ei, manuʼia ia nātou ʼaē ʼe nātou taupau ʼoku ala. Koutou fakalogo te akonaki pea koutou liliu ʼo poto, pea ʼaua naʼa koutou lotonoa.”—Tāʼaga Lea 8:32, 33.
10. Koteā te lua faka ʼuhiga ʼo te ʼui ʼaē ʼe tou logo ki ‘te folafola ʼaē ʼe haʼu mai ʼotatou tuʼa’?
10 Tahi ʼaē meʼa, ko “te kaugana agatonu mo fakapotopoto,” ʼe ina fakahā mai te ‘folafola ʼaē ʼe haʼu mai ʼotatou tuʼa,’ ʼi tana foaki mai “i tona temi te meakai.” (Mateo 24:45-47) ʼE tufa te meʼa kai ʼaia ʼi te tā ʼo te ʼu tohi faka Tohi-Tapu, pea ʼi te ʼu taʼu ʼaenī kua hili neʼe mahu te meʼa kai ʼaia. Ohage la ʼaki Te Tule Leʼo, kua lelei age tatatou mahino ki te ʼu lea faka polofeta. ʼI te nusipepa ʼaia, neʼe fakaloto mālohiʼi tatou ke tou kātaki ʼi te gāue fai faka mafola pea mo te fai ʼo ni ʼu tisipulo, logope la te mole fia logo ʼa te hahaʼi. Neʼe tokoni mai kia tatou ke ʼaua naʼa tou higa ʼi te ʼu hele pea ke tou maʼu te ʼu kalitate faka Kilisitiano. ʼE tou leleiʼia ʼaupito te meʼa kai ʼaia ʼaē ʼe tufa ʼi tona temi totonu!
11. Koutou fakamahino he tolu faka ʼuhiga ʼo te ʼui ʼaē ʼe tou logo ki ‘te folafola ʼaē ʼe haʼu mai ʼotatou tuʼa.’
11 Ko te tagata kaugana agatonu mo poto, ʼe ina toe tufa te meʼa kai ʼaia ʼi te ʼu fono ʼaē ʼe fai ʼi te vāhaʼa fuli. Ohage la ko te ʼu fono ʼi te kokelekasio, mo te ʼu fakatahi faka silikosipisio ʼaē ʼe fai tuʼa lua ʼi te taʼu pea mo te ʼu fakatahi lalahi. ʼE mole leleiʼia koa la e te kau Kilisitiano te ʼu fakatahi ʼaia? ʼE ko he tokoni maʼuhiga ʼaia ke tou lava haʼele ʼi te ala ʼa Sehova. Mai tona ʼuhiga ʼaē ko te tokolahi ʼo te kau Kilisitiano ʼe lahi te temi ʼaē ʼe nātou fakaʼaogaʼi ki te ako pea mo te gāue ʼo lahi ai tanatou fakakaugā mo te hahaʼi ʼaē ʼe mole lotu tahi mo nātou, koia ʼe maʼuhiga ʼaupito tanatou fakatahi mo tonatou ʼu tēhina Kilisitiano. Ko te ʼu fono ʼaia ʼe ko he faigamālie lelei ke tou “fakaʼalaʼala ki te fai o te ofa pea mo te u gaue lelei.” (Hepeleo 10:24) ʼE tou ʼofa ki totatou ʼu tēhina pea ʼe tou leleiʼia tatatou ʼu fakatahi mo nātou.—Pesalemo 133:1.
12. Koteā te meʼa ʼaē ʼe lotomālohi te kau Fakamoʼoni ʼa Sehova ke nātou fai, pea mole heʼeki faʼa fualoa neʼe nātou fakahā feafeaʼi te faʼahi ʼaia?
12 Ia ʼaho nei, ko te meʼa kai fakalaumālie ʼaia ʼe ina fakaloto mālohiʼi te toko ono miliona hahaʼi, ʼo feala ai ke nātou haʼele ʼi te ala ʼa Sehova pea ko te lauʼi miliona hahaʼi ʼe nātou ako te Tohi-Tapu ke nātou ʼiloʼi peʼe feafeaʼi hanatou fai te faʼahi ʼaia. ʼE nātou lotovaivai koa ʼuhi ko tonatou tokosiʼi, mokā fakatatau nātou ki te toko lauʼi miliale hahaʼi ʼi te kele? Kailoa! ʼE nātou lotomālohi ke nātou fakalogo ki te ‘folafola ʼaē ʼe haʼu mai ʼonatou tuʼa’ pea ke nātou agatonu ʼo fai te finegalo ʼo Sehova. Moʼo fakamoʼoni ki te lotomālohi ʼaia ia muʼa ʼo te hahaʼi fuli, lolotoga te ʼu Fakatahi Faka Tisitilike Faka Malamanei ʼaē ko “Te Faʼahiga Maʼuli ʼAē ʼe Fakamaʼua Mai e Te ʼAtua,” ko te kau telekē fuli neʼe nātou tali fakamalotoloto te fakatotonu ʼaē ʼe nātou fakahā ai pe koteā tanatou manatu. Koʼeni te fakatotonu ʼaia.
Te Fakatotonu
13, 14. Koteā te manatu fakapotopoto ʼa te kau Fakamoʼoni ʼa Sehova ʼo ʼuhiga mo te ʼaluʼaga ʼo te malamanei?
13 “Ko mātou kau Fakamoʼoni ʼa Sehova ʼaē ʼe mātou fakatahitahi ʼi te Fakatahi ʼaenī ko ‘Te Faʼahiga Maʼuli ʼAē ʼe Fakamaʼua Mai e Te ʼAtua,’ ʼe mātou loto tahi fuli ki te ʼui ʼaē ko te ala ʼa te ʼAtua ʼe ko te faʼahiga maʼuli ʼaē ʼe lelei tokotahi. Kae ʼe mātou ʼiloʼi papau, ko te tokolahi ʼo te hahaʼi ia ʼaho nei ʼe mole manatu feiā. Ko te sosiete fakatagata neʼe ina ʼahiʼahi te ʼu manatu, te ʼu filosofia pea mo te ʼu lotu kehekehe moʼo fakamahino pe koteā te faʼahiga maʼuli ʼaē ʼe lelei tokotahi. Kae kapau ʼe tou vakaʼi fakalelei te hisitolia ʼo te tagata pea mo te ʼaluʼaga ʼo te mālama ʼaenī, ʼe feala pe ke tou ʼio ki te moʼoni ʼa te ʼu palalau ʼa te ʼAtua ʼaē ʼe tuʼu ia Selemia 10:23: ‘ ʼE mole ʼa te tagata ʼaē ʼe haʼele te takitaki ʼo tana haʼele.’
14 “ ʼI te ʼaho fuli ʼe tou sio ki te moʼoni ʼo te ʼu palalau ʼaia. Ko te teitei hahaʼi fuli ʼe nātou meʼa noaʼi te faʼahiga maʼuli ʼaē ʼe fakamaʼua mai e te ʼAtua. ʼE kumi e te hahaʼi te ʼu meʼa ʼaē ʼe mata tonu kia nātou. Kae neʼe hoko ai tona ʼu fua kovi—te mavetevete ʼo te ʼu famili pea mo te mole kei takitaki ʼo te fānau; te loto mānumānu ʼaē ʼe iku ki te lotomamahi pea mo te noa; te ʼu māmio kovi pea mo te agamālohi; te ʼu tau ʼo ʼuhiga mo te lanu ʼaē ʼe kaugamālie ai te kau mātea; te ʼu aga heʼeʼaoga ʼaē ʼe tupu ai te ʼu mahaki ʼuhi ko te ʼu felāveʼi fakasino. ʼE kau te ʼu fihifihia ʼaia ʼi te ʼatu fihifihia ʼaē ʼe nātou tāʼofi te hahaʼi ke ʼaua naʼa nātou maʼuli fiafia, mo tokalelei pea mo maʼuli fīmālie.
15, 16. ʼO ʼuhiga mo te ala ʼa te ʼAtua ʼaē ʼe ina taki ki te maʼuli, koteā te fakatotonu ʼaē neʼe nātou fai?
15 “ ʼUhi ko te ʼaluʼaga fakaʼofaʼofa ʼo te malamanei pea mo te kua ōvi mai ʼo te ‘tau o te aho fakaʼilifia o te Atua Mafimafi,’ ʼaē ʼe fakahigoaʼi ko Halamaketone (Apokalipesi 16:14, 16), ko mātou kau Fakamoʼoni ʼa Sehova ʼe mātou fai te ʼu fakatotonu ʼaenī:
16 “ ʼUluaki: ʼE mātou kau kia Sehova ʼAtua he neʼe mātou foaki kia te ia tomatou maʼuli katoa, pea ʼe mātou taupau anai he tui mālohi ki te fakatuʼutuʼu ʼa Sehova ʼo ʼuhiga mo te totogi ʼaē neʼe fai ʼaki tona ʼAlo, ia Sesu Kilisito. ʼE mātou lotomālohi ke mātou haʼele ʼi te ala ʼa te ʼAtua ʼaē ʼe ina taki ki te maʼuli, pea ke mātou tauhi kia te ia ʼi tomatou ʼuhiga Fakamoʼoni pea ke mātou fakalogo ki tona pule faʼitaliha ʼaē ʼe ina fakahoko ʼaki ia Sesu Kilisito.
17, 18. Koteā te manatu ʼaē ʼe taupau anai e te kau Fakamoʼoni ʼa Sehova ʼo ʼuhiga mo te aga ʼaē ʼe tonu ke fai pea mo tonatou vāhaʼa fakatautehina faka Kilisitiano?
17 “Lua: ʼE mātou haga mulimuli anai ki te ʼu lekula māʼoluga ʼo te Tohi-Tapu ʼo ʼuhiga mo te aga ʼaē ʼe tonu ke fai pea mo te ʼu lekula fakalaumālie. ʼE mātou lotomālohi ke mātou tekeʼi te faʼahiga aga ʼa te mālama, ʼaē ʼe haʼele ʼi te agavale ʼo tanatou fakakaukau. (Efeso 4:17-19) ʼE mātou lotomālohi ke mātou nofo maʼa ia muʼa ʼo Sehova pea ke mātou ʼāteaina ʼi te mele fuli pe ʼo te malamanei.—Sakopo 1:27.
18 “Tolu: ʼE mātou nofo agatonu anai ki te manatu faka Tohi-Tapu ʼo ʼuhiga mo tomatou famili fakatautehina faka malamanei. ʼE mātou taupau anai tamatou manatu faka Kilisitiano ʼo ʼuhiga mo tamatou mole kau ki te ʼu meʼa faka politike ʼo te ʼu puleʼaga, koia ʼe mole mātou kau anai ki te ʼu maveuveu fakafenua pea mo te fehiʼa ʼo ʼuhiga mo te tahi ʼu lanu.
19, 20. (a) Koteā te meʼa ʼaē ʼe fai anai e te ʼu mātuʼa Kilisitiano? (b) ʼE fakahā feafeaʼi anai e te kau Kilisitiano moʼoni ko nātou ko te kau tisipulo ʼa Kilisito?
19 “Fā: Ko mātou ʼaē ʼe maʼu fānau ʼe mātou akoʼi anai kia nātou te ala ʼa te ʼAtua. ʼE mātou tuku anai he faʼifaʼitaki lelei ʼo ʼuhiga mo te maʼuli faka Kilisitiano, ʼo kau kiai te lau tuʼumaʼu ʼo te Tohi-Tapu, te ako faka famili pea mo te kau fakamalotoloto ki te ʼu fono ʼo te kokelekasio faka Kilisitiano pea mo te minisitelio.
20 “Nima: ʼE mātou faiga fuli anai ke mātou maʼu te ʼu kalitate fakaʼatua ʼaē ʼe fakahā e totatou Tupuʼaga, pea ohage ko Sesu ʼe mātou faiga anai ke mātou faʼifaʼitakiʼi tona ʼulugaaga pea mo tana ʼu aga. (Efeso 5:1) ʼE mātou fia fakatokatoka ia meʼa fuli ʼaki te ʼofa, ʼo mātou fakahā ai ko mātou ko te kau tisipulo ʼa Kilisito.—Soane 13:35.
21-23. Koteā te meʼa ʼaē ʼe haga fai anai e te kau Fakamoʼoni ʼa Sehova, pea koteā te meʼa ʼaē ʼe nātou tui papau kiai?
21 “Ono: ʼE mātou hoko atu anai te faka mafola ʼo te logo lelei ʼo te Puleʼaga ʼo te ʼAtua ʼo mātou fai ni ʼu tisipulo pea ʼe mātou akoʼi age anai te ala ʼo te ʼAtua ʼaē ʼe ina taki ki te maʼuli. ʼE mātou uga anai nātou ke nātou tali te ako ʼaē ʼe fai ʼi te ʼu fono ʼo te kokelekasio.—Mateo 24:14; 28:19, 20; Hepeleo 10:24, 25.
22 “Fitu: ʼI tomatou ʼuhiga takitokotahi pea mo tomatou ʼuhiga kautahi, ʼe mātou faka maʼuhigaʼi anai te finegalo ʼo te ʼAtua ʼi tomatou maʼuli. ʼE mātou fakaʼaogaʼi anai tana Folafola, te Tohi-Tapu, ke ina takitaki mātou, pea ʼe mole mātou maliu anai ki te faʼahi mataʼu peʼe ko te faʼahi hema, heʼe mātou fia fakamoʼoni ai ko te ala ʼa te ʼAtua ʼe lelei age ia ʼi te ʼu ala ʼo te mālama. ʼE mātou fia mulimuli ki te ala ʼa te ʼAtua ʼaē ʼe ina taki ki te maʼuli, ʼaki he lotomālohi pea mo he agatonu, ʼi te temi ʼaenī ʼo talu ai!
23 “ ʼE mātou fai te fakatotonu ʼaenī heʼe mātou falala katoa ki te fakapapau ʼofa ʼa te ʼAtua ʼaē ʼe ʼui ai, ko ia ʼaē ʼe ina fai te finegalo ʼo te ʼAtua ʼe maʼuli anai ʼo talu ai. ʼE mātou fai te fakatotonu ʼaenī heʼe mātou tui papau ko te maʼuliʼi ʼo te ʼu pelesepeto faka Tohi-Tapu, mo tona ʼu tokoni pea mo tona ʼu fakaloto mālohi, ʼe ko te faʼahiga maʼuli ʼaia ʼaē ʼe lelei tokotahi ia ʼaho nei pea ʼe ko te tafitoʼaga lelei ʼaia ki tomatou ka haʼu, ke feala ai hamatou maʼu te maʼuli moʼoni. (1 Timoteo 6:19; 2 Timoteo 4:7b, 8) Kae ʼe mātou fai tāfito te fakatotonu ʼaenī heʼe mātou ʼofa kia Sehova ʼAtua ʼaki tomatou loto katoa, mo tomatou nefesi katoa, mo tomatou ʼatamai katoa pea mo tomatou mālohi katoa!
24, 25. Koteā te tali ʼaē neʼe fai ki te fakatotonu ʼaia, pea koteā te lotomālohi ʼa te hahaʼi ʼaē ʼe haʼele ʼi te ala ʼa Sehova?
24 “Ko koutou fuli ʼaē ʼe kau ki te fakatahi ʼaenī, kapau ʼe koutou ʼio ki te fakatotonu ʼaenī, koutou ʼui EI!”
25 ʼI te ʼu lauʼi teau malaʼe faigaoʼi ʼi te malamanei katoa neʼe logo ai te ʼu leʼo mālohi ʼo te hahaʼi ʼaē neʼe nātou kau ki te ʼu fakatahi ʼi tanatou tali “EI!” ʼE ʼiloʼi papau e te kau Fakamoʼoni ʼa Sehova ʼe nātou haga haʼele anai ʼi te ala ʼa Sehova. ʼE nātou falala katoa kia Sehova pea mo nātou tui ʼe ina fakahoko anai tana ʼu fakapapau. ʼE nātou nonofo agatonu kia te ia, tatau aipe pe koteā te meʼa ʼaē ʼe feala ke hoko kia nātou. Pea ʼe nātou lotomālohi ke nātou fakahoko tona finegalo.
“E Kau Te Atua Mo Tatou”
26. Koteā te ʼaluʼaga fakafiafia ʼo te hahaʼi ʼaē ʼe haʼele ʼi te ala ʼa Sehova?
26 Ko te kau Fakamoʼoni ʼa Sehova ʼe nātou manatuʼi te fakaloto mālohi ʼaenī ʼa te tagata fai pesalemo: “Falala kia Sehova pea taupau tana ala, pea ʼe ina hikihiki anai koe ke ke maʼu te kele.” (Pesalemo 37:34) ʼE mole nātou galoʼi te ʼu palalau fakaloto mālohi ʼaenī ʼa Paulo: “Kapau e kau te Atua mo tatou, pe ko ai ae e fakafehagai mai kia tatou? Iaʼia ae nee mole ina fakahao tona Alo totonu, kae nee ina tukuʼage ia o uhiga mo tatou fuli, o feafeai, pe mole ina foaki mai anai te meafuape kia tatou aki iaʼia?” (Loma 8:31, 32) Ei, kapau ʼe tou haga haʼele ʼi te ala ʼa Sehova, pea ʼe ina “fakakoloa mai [anai] tatou, aki te meafuape, [ke] tou fakafiafia ai.” (1 Timoteo 6:17) ʼE mole ʼi ai he tahi potu ʼe lelei age ʼi te potu ʼaē ʼe tou nonofo ai ʼi te temi nei, ʼi te ala ʼa Sehova ʼaē ʼe tou haʼele ai mo totatou ʼu tēhina pea mo totatou ʼu tuagaʼane ʼofaina. ʼAki ia Sehova ʼi ʼotatou tafaʼaki, tou lotomālohi ke tou nofo ʼi te potu ʼaia pea ke tou kātaki ʼo aʼu ki te fakaʼosi, ʼo tou falala katoa ʼe ina fakahoko anai tana ʼu fakapapau fuli ʼi tona temi totonu.—Tito 1:2.
[Nota ʼi te lalo pasina]
a ʼO ʼuhiga mo te kupu faka Keleka ʼaē ʼe fakaliliu ʼi henī ʼaki te kupu “fakafiafia,” neʼe ʼui e te tagata sivi lea, ʼe faka ʼuhiga ki te ʼu meʼe ʼaē neʼe fai ʼi te ʼu lafeti faka pagani pea ʼe ina toe ʼui fēnei: “ ʼE kua ʼiloʼi ko te ʼu meʼe ʼaia neʼe fai pe ke tupu ai te ʼu holi fakalialia.”
Kei Koutou Manatuʼi Koa?
◻ Koteā te meʼa ʼaē ʼe maʼua ke fai e te Kilisitiano ke feala hana haʼele ʼi te ala ʼa Sehova?
◻ He koʼe koa ʼe tonu ke tou falala kia Sehova pea ke tou agatonu kia te ia?
◻ Koteā te tokoni ʼaē ʼe fai mai kia tatou ʼi tatatou haʼele ʼi te ala ʼa Sehova?
◻ Koutou fakamahino he ʼu puani maʼuhiga ʼo te fakatotonu ʼaē neʼe fai ʼi te ʼu Fakatahi “Te Faʼahiga Maʼuli ʼAē ʼe Fakamaʼua Mai e Te ʼAtua.”
[Paki ʼo te pasina 18]
Neʼe tali he fakatotonu maʼuhiga ʼi te ʼu Fakatahi Faka Tisitilike Faka Malamanei “Ko Te Faʼahiga Maʼuli ʼAē ʼe Fakamaʼua Mai e Te ʼAtua”