Ko Te Felogoi Lelei—Te Puleʼaki Ki He Nofo ʼOhoana Fakafiafia
ʼI te taʼu 1778, neʼe faʼu e Robert Barron he faʼahiga loka foʼou, ʼe ʼi ai tona ʼu kiʼi ukamea e lua, pea ko te ʼu foʼi loka ʼo te temi ʼaenī, ʼe fai ʼo mulimuli ki te foʼi loka ʼaia. ʼE kita fakaʼaogaʼi te kalavi e tahi moʼo fakagaūgaūe te ʼu kiʼi ukamea ʼaia e lua ʼo te foʼi loka.
ʼO TOE feiā pe, ko te nofo ʼohoana fiafia ʼe fakalogo ki te gāue fakatahi ʼa te tagata pea mo te fafine. ʼE ʼaoga tāfito ke nā felogoi lelei pea mo palalau fakahagatonu mo kapau ʼe nā loto ke maui mālie tonā maʼuli faka taumatuʼa.
Koteā Te Faka ʼUhiga ʼo Te Felogoi Lelei
ʼE tonu ke feafeaʼi te felogoi lelei ʼa he taumatuʼa? ʼE ʼui e te tikisionalio ko te felogoi ʼe ko “te fefakahāʼaki ʼo he ʼu manatu pea mo he ʼu meʼa ʼe kita ʼiloʼi, ʼaki te ʼu palalau, pe ko te ʼu tohi, pe ko te ʼu kamokamo.” Koia ʼe tonu ke tou fakahā te ʼu meʼa ʼaē ʼe ʼi totatou loto pea mo tatatou ʼu manatu. Pea ko te felogoi lelei ʼe toe faka ʼuhiga ki te palalau ki te ʼu meʼa lelei ʼaē ʼe nātou lagalaga he tahi, mo fakaloto mālohiʼi, pe ko he ʼu vilitute, pe ko he ʼu meʼa ʼe vikiʼi pea mo fakaloto fīmālie.—Efeso 4:29-32; Filipe 4:8.
ʼE feala anai ke felogoi lelei he toko lua mo kapau ʼe nā fefalalaʼaki pea mo femahinoʼaki. ʼE maʼu anai e te taumatuʼa te ʼu kalitate ʼaia mo kapau ʼe nā faka ʼuhiga tonā nofo ʼohoana ko he ʼu felogoi ʼe tonu ke tologa ʼi tonā maʼuli katoa pea mo nā faiga mālohi ke haʼele lelei. ʼI tana talanoa ki te faʼahiga felogoi ʼaia, neʼe tohi fēnei e Joseph Addison, te tagata faitohi ʼo te 18 sēkulō: “Ko he toko lua neʼe nā fefiliʼaki ʼi te lotolotoiga ʼo te hahaʼi fuli, ʼaki te fakatuʼutuʼu ʼaē ke nā fefakafiafiaʼaki, mo agalelei, mo popoto, mo manavaʼofa, pea mo loto faʼa kātaki ʼo ʼuhiga mo tanā ʼu hala pea mo tanā ʼu kalitate, ʼo aʼu ki tonā mate.” ʼI meʼa fakafiafia he taumatuʼa feiā! Pea ʼe feala ke fakamataleleiʼi tokotou maʼuli faka taumatuʼa e te ʼu kalitate taulekaleka ʼaia, heʼe koutou maʼu anai te ʼu kalitate ʼaia mo kapau ʼe koutou felogoi lelei.
Te ʼu Meʼa ʼAē ʼe Fakatupu Kovi Ki He ʼu Felogoi Lelei
Ko te tokolahi ʼo te ʼu taumatuʼa ʼe nātou teuteuʼi tonatou fai ʼohoana ʼaki he loto falala pea mo he fiafia lahi. Kae ki te tokolahi mole tuai pea puli tanatou fiafia pea vaivai tonatou loto falala. ʼE nātou lotomamahi pea mo ʼiʼita, ʼo feala ai ke mālohi tanatou fefehiʼaʼaki. Ko te maʼuli faka taumatuʼa ʼe liliu leva ia ko he faʼahiga maʼuli ʼe tonu ke nā fekātakiʼaki “ ʼo aʼu ki tonā fakamavete e te mate.” Koia moʼo hikihiki pea mo lagolago ki te felogoi lelei ʼa te taumatuʼa, ʼe tonu muʼa ke nā tauʼi he ʼu fihifihia.
ʼE toe feala foki ke fakatupu kovi ki he ʼu felogoi lelei, mo kapau ʼe mataku he tahi ʼi te fakahā ki tona ʼohoana te meʼa ʼaē ʼe fakaʼamu kiai pe ko hana manatu. Ohage la, ʼe feala ke tuʼania naʼa līaki ia ia e tona hoa mokā ina ʼiloʼi anai ʼe ʼi ai tona mahaki kovi. ʼE lava feafeaʼi anai hana fakamahino ki tona ʼohoana, ʼe fetogi anai te agaaga ʼo tona sino peʼe ko tona maʼuli ʼuhi ko te tafa ʼaē ka fai kia ia? ʼI te ʼu ʼaluʼaga ʼaia, ʼe maʼuhiga ʼaupito ke nā palalau fakahagatonu, mo nā fai he ʼu fakatuʼutuʼu fakapotopoto ki te ka haʼu. ʼE tonu ke nā fefakahā lelei ʼaki tonā feʼofani, pea ke nā fai he ʼu palalau fakapelepele, heʼe nā fakahā ai anai ʼe nā fetokagaʼaki ke tupu ai hanā loto fīmālie. ʼE moʼoni ai te tāʼaga lea ʼaenī ʼo ʼuhiga mo te nofo ʼohoana: “Ko he kaumeʼa moʼoni ʼe ʼofa ia ʼi te temi fuli pe, pea ʼe ko he tēhina ia ʼe tupu mokā ʼe ʼi ai he mamahi.”—Tāʼaga Lea 17:17.
ʼE toe feala foki ke maumauʼi te felogoi ʼa he taumatuʼa kapau ʼe nofo ʼita he tahi ia nāua. Neʼe ʼui tonu ko te ʼohoana ʼe ko te fakatahi ʼo he toko lua ʼe nā loto fakamolemole. Ke feala hana mulimuli ki te palalau ʼaia, ʼe tonu ke faiga mālohi te taumatuʼa ke nā maʼuliʼi te tokoni ʼaē neʼe fai e te ʼapositolo ko Paulo: “Vakai naa to ifo te laa ki toutou ita.” (Efeso 4:26) ʼE tonu ke tou agavaivai ʼi tatatou ʼu felogoi, ke feala hatatou maʼuliʼi te tokoni ʼaia, kae mole tou nofo ʼita. Ko te taumatuʼa ʼe mole tonu ke nā hoko ʼita, peʼe nā kē tuʼumaʼu peʼe nā nonofo ʼita. (Tāʼaga Lea 30:33) ʼE nā faiga ke nā faʼifaʼitakiʼi te ʼAtua ʼaē ʼe mole nofo ʼita. (Selemia 3:12) Ei, ʼe tonu ki te taumatuʼa ke nā fefakamolemoleʼaki ʼaki he lotolelei.—Mateo 18:35.
Ko te tahi meʼa ʼaē ʼe feala ke maumauʼi ai te ʼu faʼahiga felogoi fuli ʼe ko te nofo fakalogologo. Ka ʼita he tahi, ʼe lagi fute anai, peʼe toʼetoʼe, peʼe gāue ohage ko he masini, peʼe mole fia palalau. Ko te hoa ʼaē ʼe feiā ʼe ina fakahā ai tana mole fiafia. Kae ʼe lelei age ke ina fakahā fakahagatonu ʼaki he agalelei tana ʼu manatu pea mo te ʼu meʼa ʼi tona loto, ʼi hana nofo fakalogologo pea mo nofo fute.
Ko te tahi meʼa ʼaē ʼe tonu ke tou tokaga kiai, kapau ʼe tou fia maʼu he ʼu felogoi lelei, ʼe ko te agamāhani ʼaē ke mole tou fakalogo lelei peʼe mole tou fakalogo ki te meʼa ʼaē ʼe ʼui mai e totatou ʼohoana. Lagi ʼe tou gaʼegaʼe fau peʼe tou maʼumaʼua fau ʼo faigataʼa ai hatatou fakalogo lelei ki totatou ʼohoana. ʼE toe feala ke tupu ai he ʼu kē he neʼe mole mahino he tahi ki he fakatuʼutuʼu, kae ʼi te manatu ʼo tona ʼohoana kua fakatokatoka te faʼahi ʼaia. ʼE mahino ia, ʼe tupu te ʼu fihifihia ʼaia heʼe mole feʼauga te fepalalauʼaki ʼa te taumatuʼa.
Koteā ʼAē ʼe Tupu Ai Anai He Felogoi Lelei
ʼE maʼuhiga ʼaupito ke tou maʼu he temi ke tou fepalalauʼaki ʼaki he agaʼofa! Ko ʼihi ʼe lahi fau tanatou sioʼi te televisio, ʼo nātou sioʼi te maʼuli ʼo te tahi ʼu hahaʼi kae mole kei toe honatou temi moʼo tokagaʼi tonatou maʼuli totonu. Koia ʼe lagi ʼaoga anai ke tou matehi te televisio ke feala hatatou fai palalau.
ʼE ʼi ai te temi ke kita palalau ai, pea ʼe toe ʼi ai foki mo te temi ke kita nofo fakalogologo ai. Neʼe ʼui fēnei e te tagata poto: “Kia meʼa fuli ʼe ʼi ai tona temi kua fakakatofa, . . . te temi moʼo fakalogologo pea mo te temi moʼo palalau.” Ei, ʼe tonu ke kita tokaga ki te ʼu faʼahiga palalau ʼaē ʼe kita fai. ʼE ʼui fēnei e he tāʼaga lea: “ ʼE fiafia te tagata ʼi te tali ʼo tona gutu, pea ʼe ko he meʼa lelei te fai ʼo he palalau ʼi tona temi totonu!” (Tagata Tānaki 3:1, 7; Tāʼaga Lea 15:23) Koia koutou filifili lelei te meʼa ʼaē ka koutou palalau kiai peʼe ko te temi fea ʼaē ka koutou fakahā ai takotou loto tuʼania. Koutou feʼekeʼaki fēnei: ‘ ʼE gaʼegaʼe koa toku ʼohoana, peʼe lelei pe? Ko te faʼahi ʼaē ʼe ʼau fia palalau kiai, ʼe feala koa ke tupu ai hamā kē? Ko te ʼu palalau fea ʼaē neʼe mole leleiʼia e toku ʼohoana ʼi tamā palalau ki muʼa atu?’
ʼE lelei ke tou manatuʼi, kapau ʼe tou fai he kole pea ʼe tali gafua anai e te hahaʼi mo kapau ʼe nātou sio ki te ʼu lelei ʼaē ka nātou maʼu ai. Kapau neʼe tupu he fihifihia ʼi te taumatuʼa, pea ʼe feala ki he tahi ia nāua ke ina ʼui fēnei, “ ʼE ʼi ai te meʼa ʼe ʼau ʼita ai, pea ʼe tonu ke tā fakatokatoka vave te faʼahi ʼaia.” ʼE mahino ia, ko tatatou faʼahiga palalau ʼe fakalogo anai ki te meʼa ʼaē neʼe hoko, kae ʼe lagi lelei age ke tou fai te palalau ʼaenī, “Neʼe ʼau fakakaukauʼi lelei te faʼahi ʼaē neʼe kua tā palalau kiai, pea neʼe ʼau toe fakakaukauʼi peʼe lava feafeaʼi hatā fakatokatoka te faʼahi ʼaia.” Ko te palalau fea ʼaē ʼe lagi leleiʼia anai e tokotou ʼohoana?
Ei, ʼe maʼuhiga ʼaupito te faʼahiga ʼaveʼave ʼo he palalau. Neʼe tohi fēnei e te ʼapositolo ko Paulo: “Ke lelei tuumau tautou lea, i tona fakakonakona aki te masima.” (Kolose 4:6) Koutou faiga ke koutou ʼaveʼave mālie tokotou leʼo pea mo koutou filifili lelei takotou ʼu palalau. Koutou manatuʼi “ko he ʼu palalau ʼe lelei ʼe ko he meli ʼe malie ki te nefesi pea ʼe ko he faitoʼo ki te ʼu hui.”—Tāʼaga Lea 16:24.
Ki ʼihi taumatuʼa ʼe faigafua tanatou felogoi ʼi tanatou fai fakatahi te ʼu gāue ʼo te loto fale. ʼE lelei te taʼi faʼahiga felogoi ʼaia heʼe nātou vaevae ai he meʼa pea ʼe nātou toe maʼu ai te temi ke nātou fepalalauʼaki. Ki ʼihi taumatuʼa, ʼe lelei age tanatou mālōlō fakatahi, heʼe faigafua age kia nātou ke nātou fepalalauʼaki.
ʼE lahi te ʼu meʼa ʼe feala ke tou ako mokā tou vakaʼi peʼe feafeaʼi te felogoi ʼa he taumatuʼa ʼe nā fefakakatoaʼaki. Koteā ʼaē neʼe tupu ai tanā felogoi lelei ʼaia? ʼE mahino ia, ko tanā logo tahi pea mo tanā ʼu faifaitahi ʼe tupu ko tanā ʼu faiga, mo tanā loto faʼa kātaki, mo tanā ʼofa pea mo tanā fefakaʼapaʼapaʼaki. Neʼe lahi te ʼu meʼa neʼe tonu ke nā ako ʼi te lolotoga ʼo tanā nofo ʼohoana, heʼe mole hoko feiā pe te ʼu ʼohoana fiafia. Koia ʼe maʼuhiga ʼaupito ke koutou tokagaʼi te ʼu manatu ʼo tokotou hoa, ke koutou mahino ki te ʼu meʼa ʼaē ʼe ʼaoga kia ia, pea ke koutou fai he ʼu palalau fakapotopoto mokā hoko he ʼu fihifihia. (Tāʼaga Lea 16:23) Koia kapau kua koutou ʼohoana, koutou faiga ke koutou liliu ko he tahi ʼe mole faigataʼa, pea ʼe faigafua hakita faifakalelei ki ai. ʼE ko he tokoni lelei ʼaia moʼo fakamālohiʼi tokotou vāhaʼa faka taumatuʼa.
ʼE loto e Sehova ʼAtua ke maʼuli fiafia te hahaʼi ʼi tanatou nofo ʼohoana pea ke tologa te faʼahi ʼaia. (Senesi 2:18, 21) Kae ko te ʼu taumatuʼa ʼe nātou maʼu te puleʼaki ki te faʼahi ʼaia. ʼE ʼaoga ke feʼofani te taumatuʼa, ke nā gāue fakatahi moʼo avahi te matapā ʼo he nofo ʼohoana fiafia pea ke nā felogoi lelei.
[Paki ʼo te pasina 22]
ʼE lahi anai te temi ʼaē ka koutou fai palalau ai, mo kapau ʼe koutou matehi te televisio
[Paki ʼo te pasina 23]
Ko te felogoi lelei ʼe tokoni anai ke tuputupu te ʼofa ʼa he taumatuʼa pea ke tologa te faʼahi ʼaia