Ke ʼAua Naʼa Koutou Tūkia ʼi Takotou ʼIta

“ E TONU ke ʼau ʼutaki!” “Kātaki pe!” ʼE koutou māhani koa ki te ʼu palalau ʼaia? ʼE lagi koutou fai kia koutou te ʼu palalau ʼaia mokā koutou faiga ke koutou fakamalū tokotou ʼita. Ko ʼihi moʼo tāʼofi tanatou ʼita kovi, ʼe nātou ʼolo ʼo haʼele. ʼE ko he ʼu meʼa faigafua ʼaia moʼo lolomi te ʼita pea mo taupau he ʼu felogoi lelei mo te hahaʼi.

ʼI te ʼu taʼu ʼaenī kua hili, neʼe fai e te kau popoto he ʼu tokoni ʼe mole ʼalutahi ʼo ʼuhiga mo te tāʼofi ʼo te ʼita pea mo te hoko ʼita, pea ʼe feʼekeʼaki ai te hahaʼi pe koteā te meʼa ʼaē ʼe tonu ke nātou fai. Ohage la, ʼi te manatu ʼa ʼihi tōketā ʼe mole tonu ke koutou tāʼofi takotou ʼita “mo kapau ʼe koutou logolelei ai.” Kae ʼe fakatokagaʼi e ʼihi ko te hoko ʼita tuʼumaʼu “ ʼe kovi age ia ʼi te suluka, te tosio, pea mo te cholestérol ʼaē ʼe feala ke mate ai he tahi ʼe kei tūpulaga.” ʼE ʼui fakahagatonu fēnei e te Folafola ʼa te ʼAtua: “Siʼaki te ʼita pea mo līaki te makalililili; ʼaua naʼa ke vela ki te fai ʼo te meʼa ʼaē ʼe kovi.” (Pesalemo 37:8) He koʼe ʼe fai e te Tohi-Tapu te ʼu tokoni ʼaia?

Kapau ʼe mole kita lava lolomi te ʼu meʼa ʼaē ʼe kita logoʼi ʼi tokita loto, pea ʼe kita fai anai he ʼu meʼa fakavale. Neʼe hā lelei te faʼahi ʼaia ʼi te kamataʼaga ʼo te hisitolia ʼo te tagata. ʼE tou lau fēnei: “Neʼe hake te ʼita lahi ia Kaino, pea neʼe fakatotoho tona fofoga.” Neʼe koteā tona ikuʼaga? Neʼe pule kia ia tona ʼita pea neʼe ina fakafefeka tona loto ʼo mole fakalogo ki te fakaloto mālohi ʼaē neʼe fai age e Sehova ke ina fai te meʼa ʼaē ʼe lelei. Koteʼuhi neʼe mole lava lolomi e Kaino tona ʼita, pea neʼe ina fai he agahala mamafa​—neʼe ina fakapogi ai tona tēhina.​—Senesi 4:​3-8.

ʼO toe feiā pe mo Saulo, te ʼuluaki hau ʼo Iselaele, neʼe ʼita lahi ʼi tana logo ki te vikiʼi ʼo Tavite. “Neʼe fakafiafia te hahaʼi fafine pea neʼe nātou tali pea mo ʼui fēnei: ‘Neʼe matehi e Saulo tana toko lauʼi afe, pea ko Tavite, tana toko lauʼi hogofulu afe.’ Pea neʼe ʼita lahi ai ia Saulo, pea ʼi tana manatu neʼe kovi te ʼu palalau ʼaia.” Ko te ʼita ʼa Saulo neʼe ina puleʼi tona ʼatamai, pea neʼe ina uga ia ia ke ina faiga liuliuga ke ina matehi ia Tavite. Logope la neʼe faiga ia Tavite ke fakakaumeʼa mo ia, kae neʼe mole fia fai ia Saulo ki te tokalelei pea neʼe mole ina loto ke nā fakatokatoka tonā fihifihia. Moʼo fakaʼosi, neʼe mole kei tapuakina ia ia e Sehova.​—1 Samuele 18:​6-​11; 19:​9, 10; 24:​1-​21; Tāʼaga Lea 6:​34, 35.

ʼE mahino papau ia, mokā mole lava lolomi e he tahi tona ʼita, pea ʼe ina fai anai he meʼa peʼe ko he palalau ʼe fakatupu mamahi anai ki te hahaʼi. (Tāʼaga Lea 29:22) Neʼe ʼiʼita ia Kaino pea mo Saulo he neʼe nā loto maheka. Kae ʼe lahi te ʼu meʼa ʼe feala ke tupu ai tokita ʼita. ʼE lagi ʼita anai he tahi he neʼe fai he fatufatu kia ia kae neʼe mole hona tupuʼaga, peʼe ʼuhi ko he palalau kovi, pe ko he femahinohalaʼaki, pe ko he aga heʼe faitotonu.

ʼE hā ʼi te ʼu meʼa ʼaē neʼe hoko kia Kaino pea mo Saulo, neʼe tatau te meʼa ʼaē neʼe nā tūkia ai. Neʼe hā ʼi te mōlaga ʼa Kaino neʼe mole ina fai ʼaki te tui. (Hepeleo 11⁠:⁠4) Pea ʼuhi ko te mole fakalogo ʼa Saulo ki te ʼu fakatotonu ʼa Sehova pea mo tana ʼu faiga ʼaē ke ina faka lākatonuʼi ia ia, neʼe mole kei ina maʼu te ʼofa ʼa te ʼAtua pea mo tona laumālie maʼoniʼoni. ʼE hā lelei mai, ko te ʼu tagata ʼaia e lua neʼe nā maumauʼi tonā ʼu felogoi mo Sehova.

Koutou fakatatau te ʼu aga ʼaia pea mo te aga ʼa Tavite, ʼaē neʼe tonu ke ʼita ʼuhi ko tona gaohi koviʼi e Saulo. Kae neʼe lolomi e Tavite tona loto. Koteā tona tupuʼaga? Neʼe ina ʼui fēnei: “ ʼE mole feala kia ʼau, ʼo ʼuhiga mo te manatu ʼa Sehova, ke ʼau fai te meʼa ʼaia ki toku ʼaliki, te fakanofo ʼa Sehova.” Neʼe maʼuhiga kia Tavite tana felogoi mo Sehova, pea neʼe malave ki tana felogoi mo Saulo. ʼAki he agavaivai neʼe ina tuku tona fihifihia kia nima ʼo Sehova.​—1 Samuele 24:​6, 15.

ʼE moʼoni, kapau ʼe mole kita lolomi tokita ʼita pea ʼe feala ke ʼi ai hona ʼu fua kovi. Neʼe fai e te ʼapositolo ko Paulo te fakatokaga ʼaenī: “Iʼita pe, kae aua naa koutou agahala ai.” (Efeso 4:​26) Logope la ʼi ʼihi temi ʼe feala ke lākatonu tokita ʼita, kae ʼe tonu ke kita tokaga tuʼumaʼu naʼa liliu te ʼita ko he meʼa fakatupu tūkia. Kua mahino kia tatou ʼe ko he meʼa faigataʼa hakita lolomi tokita ʼita. ʼE lava feafeaʼi hakita fai te faʼahi ʼaia?

ʼUluaki, ʼe tonu ke kita felogoi lelei mo Sehova. ʼE ina fakaloto mālohiʼi koutou ke koutou avahi tokotou loto pea mo tokotou ʼatamai kia te ia. Koutou fakahā kia te ia takotou ʼu tuʼania mo te ʼu meʼa ʼe koutou hoha ai, pea koutou kole ke ina foaki atu he loto fakatokatoka moʼo fakamalū tokotou ʼita. (Tāʼaga Lea 14:30) Koutou tui papau, “ko fofoga o te Aliki e nofo i te hahai agatonu, pea e ava ona taliga ki anatou faikole.”​—1 Petelo 3:​12.

Ko te faikole ʼe feala ke ina gāueʼi koutou pea mo takitaki koutou. ʼO feafeaʼi? ʼE feala ke malave mālohi ki takotou ʼu felogoi mo te hahaʼi. Koutou manatuʼi peʼe feafeaʼi te aga ʼa Sehova kia koutou. Ohage ko tona ʼui e te Tohi-Tapu, “neʼe mole ina fai he meʼa kia tatou ʼo mulimuli ki tatatou ʼu agahala.” (Pesalemo 103:10) ʼE tonu ke tou maʼu he loto fakamolemole “naʼa kākāʼi tatou e Satana.” (2 Kolonito 2:​10, 11, MN) Tahi ʼaē meʼa, ko te faikole ʼe ina avahi totatou loto ke ina tali te laumālie maʼoniʼoni, pea ʼe feala ke tou fetogi ai he ʼu agamāhani ʼe tauaka ʼi totatou maʼuli. ʼE foaki fakafiafia e Sehova te ‘tokalelei ae e fakalaka i te atamai fuape,’ pea ʼe feala ke faka ʼāteaina ai koutou mai te mālohi ʼo te ʼita.​—Filipe 4:7.

Kae ʼo hilifaki ki te faikole, ʼe tonu ke tou vakaʼi tuʼumaʼu te Tohi-Tapu ke tou “mahino pe kotea te finegalo o te Aliki.” (Efeso 5:​17; Sakopo 3:​17) Kapau ʼe faigataʼa kia koutou hakotou lolomi tokotou ʼita, pea koutou faiga ke koutou maʼu te manatu ʼa Sehova ʼo ʼuhiga mo te faʼahi ʼaia. Koutou toe vakaʼi te ʼu vaega Tohi-Tapu ʼaē ʼe palalau ai ki te lolomi ʼo te ʼita.

ʼE fai mai kia tatou e te ʼapositolo ko Paulo te fakamanatu ʼaenī: “Tou fai ia te lelei ki te tagata fuape, kae tafito ia te lelei o te kaiga o te tui.” (Kalate 6:​10) Koutou manatu tāfito ki te ʼu meʼa lelei ʼaē ʼe feala ke koutou fai ki te hahaʼi pea koutou fakahoko te faʼahi ʼaia. Ko te faʼahiga manatu lelei ʼaia ʼe ina uga anai koutou ke koutou manavaʼofa pea ke koutou falala ki te hahaʼi, pea ʼe tokoni atu anai ke koutou fakatokatoka te ʼu femahinohalaʼaki ʼaē ʼe feala ke tupu ʼaki ai takotou ʼita.

Neʼe ʼui fēnei e te tagata fai pesalemo: “Fakapipiki maʼu toku ʼu tafuga vaʼe ki tau palalau, pea ke ʼaua naʼa ʼi ai he meʼa fakatupu mamahi ʼe pule kia te ʼau. ʼE mahu te tokalelei kia nātou ʼaē ʼe ʼoʼofa ki tau lao, pea maʼa nātou ʼe mole ʼi ai he maka fakatupu tūkia.” (Pesalemo 119:133, 165) ʼE feala ke hoko kia koutou te faʼahi ʼaia.

[Talanoa ʼo te pasina 9]

MOʼO LOLOMI TE ʼITA

□ Koutou faikole kia Sehova.​—Pesalemo 145:18.

□ Koutou vakaʼi te Tohi-Tapu ʼi te ʼaho fuli.​—Pesalemo 119:133, 165.

□ Koutou fai he ʼu tuʼuga gāue lelei.​—Kalate 6:​9, 10.