Koutou Faʼa Kātaki ʼo Aʼu Ki Te Fakaʼosi

“Tou lele mo te kataki i te lele kua tuku mai kia tatou.”​—Hepeleo 12:1.

1, 2. Koteā te faka ʼuhiga ʼo te kupu faʼa kātaki?

NEʼE tohi fēnei e te ʼapositolo ko Paulo ki te kau Kilisitiano Hepeleo ʼo te ʼuluaki sēkulō: “ ʼE tonu ke koutou faʼa kātaki.” (Hepeleo 10:​36, MN) Neʼe fakahā lelei e te ʼapositolo ko Petelo te maʼuhiga ʼo te kalitate ʼaia, he neʼe ina toe uga fēnei te kau Kilisitiano: “[Koutou] fakatahiʼi ki tautou tui . . . te kataki.” (2 Petelo 1:​5, 6) Koteā koa te faka ʼuhiga ʼo te faʼa kātaki?

² ʼI te tikisionalio faka Keleka pea mo Fakapilitānia, ko te kupu Keleka ki te “kātaki” ko tona faka ʼuhiga “ ʼe kita nofo maʼu kae mole kita hola . . . ke kita tuʼu maʼu, ke kita lotoʼutaki.” ʼO ʼuhiga mo te kupu “faʼa kātaki,” ʼe ʼui fēnei e te tohi: “ ʼE ko te kalitate ʼaē ʼe ina faka fealagia ki he tahi ke ina ʼutakiʼi, ʼo mole kita fai fakakinau, kae ʼaki he ʼamanaki mālohi . . . Ko te kalitate ʼaia ʼe ina faka fealagia ki he tagata ke tuʼu maʼu ʼo haga ki te matagi. Ko te kalitate ʼaia ʼe ina lava fakaliliu he ʼahiʼahi faigataʼa ko he fakapale, koteʼuhi ʼe mole gata pe tana sio ki te mamahi kae ʼe sio ki tona ikuʼaga.” Koia, ko te faʼa kātaki ʼe ina faka fealagia ki he tahi ke lotoʼutaki ʼi te ʼu fihifihia pea mo te ʼu faigataʼaʼia, pea mo ina taupau tuʼumaʼu tana ʼamanaki. Ko ai ʼaē ʼe ʼaoga tāfito ki ai te kalitate ʼaia?

3, 4. (a) Ko ai ʼaē ʼe tonu ke nātou maʼu te faʼa kātaki? (b) He koʼe ʼe maʼuhiga ke tou faʼa kātaki ʼo aʼu ki te fakaʼosi?

³ ʼI hona ʼaluʼaga fakatā, ʼe kau fuli te kau Kilisitiano ki he lele ʼe maʼua ai ke nātou maʼu te faʼa kātaki. ʼI te lagi taʼu 65 ʼo totatou temi, neʼe tohi e te ʼapositolo ko Paulo te ʼu palalau fakaloto fīmālie kia Timoteo, ʼaē neʼe kaugā gāue mo ia pea neʼe ko tana kaumeʼa agatonu ʼi tana ʼu folau, ʼo ina ʼui fēnei: “Nee au tau i te tau lelei, kua kaku taku lele ki tona gataʼaga, pea nee au taupau te tui.” (2 Timoteo 4:7) ʼI tana ʼui ʼaē “kua kaku taku lele ki tona gataʼaga,” neʼe fakatatau e Paulo tona maʼuli faka Kilisitiano ki he lele, ʼe ʼi ai tona kamataʼaga pea ʼe ʼi ai mo tona gataʼaga. ʼI te temi ʼaia, neʼe kua fakaōvi Paulo ki te fakaʼosi ʼo te lele, pea neʼe fakaʼamu ʼaki he loto falala ke ina maʼu te fakapale. Neʼe ina toe ʼui fēnei: “Kua tuku o fakalogo mai kia te au te kolona o te susitisia, pea e foaki mai anai kia te au, i te aho aia, e te Aliki.” (2 Timoteo 4:8) Neʼe ʼiloʼi papau e Paulo ʼe ina maʼu anai te fakapale, he neʼe faʼa kātaki ʼo aʼu ki te fakaʼosi. Kae feafeaʼi kia tatou?

⁴ Moʼo fakaloto mālohiʼi ia nātou ʼaē kua kamata lele, neʼe tohi fēnei e Paulo: “Tou lele mo te kataki i te lele kua tuku mai kia tatou.” (Hepeleo 12:1) ʼI totatou ʼuhiga Kilisitiano, neʼe tou kamata te lele ʼaia ʼi te temi ʼaē neʼe tou foaki ai totatou maʼuli kia Sehova ʼAtua ʼaki ia Sesu Kilisito. ʼE maʼuhiga ke tou kamata lelei tatatou lele ʼi totatou ʼuhiga tisipulo Kilisitiano, kae ko te meʼa ʼaē ʼe maʼuhiga tāfito, ʼe ko tatatou fakaʼosi ia te lele ʼaia. Neʼe tala fēnei e Sesu: “Ko ae e kataki anai ki te gataʼaga, e mauli anai.” (Mateo 24:13) ʼE ko te maʼuli heʼegata ʼaē ka fakapale ʼaki ia nātou ʼaē ka nātou fakaʼosi lelei te lele! Koia, ʼe tonu mo tatou ke ʼi ai hatatou fakatuʼutuʼu, ke tou kātaki ʼo aʼu ki te fakaʼosi. Koteā ʼaē ka tokoni anai kia tatou ke tou aʼu kiai?

ʼE Maʼuhiga Ke Lelei Takotou Meʼa Kai

5, 6. (a) Kapau ʼe tou fia kau tuʼumaʼu ʼi te lele ki te maʼuli, koteā ʼaē ʼe tonu ke tou tokaga kiai? (b) Koteā te ʼu fakatuʼutuʼu fakalaumālie ʼaē ʼe tonu ke tou fakaʼaogaʼi, pea koteā tona tupuʼaga?

⁵ ʼO ōvi ki te kolo ʼo Kolonito, ʼi Heleni, neʼe ʼi ai te koga meʼa neʼe fai ai ʼi te temi muʼa te ʼu faigaoʼi ʼiloa ʼaē ko te ʼu Gaoʼi Isthmiques. Neʼe lagi ʼiloʼi e Paulo kua ʼosi sio te ʼu tēhina ʼo Kolonito ki te ʼu faigaoʼi ʼaē neʼe fai ai. Neʼe ina fakaʼaogaʼi te meʼa ʼaia kua nātou ʼiloʼi, ʼo ina fakamanatuʼi age kia nātou te lele ki te maʼuli ʼaē kua nātou kau kiai, ʼo ina ʼui fēnei: “E mole koutou iloi ko te kau lele i te malae faigaoi, e natou lele fuli, kae ko te tokotahi e ina mau te fakapale? Koia, koutou lele ke koutou mau ia.” Neʼe fakahā lelei e Paulo te maʼuhiga ʼaē ke nātou haga lele tuʼumaʼu, pea ke nātou faiga mālohi ʼo aʼu ki te fakaʼosi. Kae koteā ʼaē ka tokoni anai kia nātou ke nātou fai feiā? Neʼe ina toe ʼui fēnei: “E fakamaua e natou fuli e faigaoi he lekula mamafa ki tonatou akoi.” Ei, ko nātou ʼaē neʼe kau ki te ʼu faigaoʼi ʼo te temi muʼa, neʼe nātou mulimuli ki te ako fefeka ʼaē neʼe fai kia nātou, ʼo nātou tokakaga fakalelei ki te ʼu meʼa ʼaē neʼe nātou ʼinu pea mo te ʼu meʼa ʼaē neʼe nātou kai, pea neʼe nātou sivisivi te ʼu meʼa fuli ʼaē neʼe nātou fai ke feala hanatou mālo.​—1 Kolonito 9:​24, 25.

⁶ E feafeaʼi ʼo ʼuhiga mo te lele ʼaē ʼe kau kiai te kau Kilisitiano? ʼE ʼui fēnei e te tagata ʼāfea ʼo te kokelekasio ʼa te kau Fakamoʼoni ʼa Sehova: “ ʼE tonu ke koutou tokakaga ki takotou meʼa kai fakalaumālie, mo kapau ʼe koutou lolotoga kātakiʼi te lele ki te maʼuli.” Tou vakaʼi pe koteā te meʼa kai fakalaumālie ʼaē ʼe foaki mai kia tatou e Sehova, “te ʼAtua ʼaē ʼe ina foaki ia te faʼa kātaki.” (Loma 15:​5, MN) ʼE tou maʼu tāfito te meʼa kai fakalaumālie ʼi tana Folafola, te Tohi-Tapu. ʼE mole tonu koa la ke tou fai fakalelei hatatou polokalama ki te lau ʼo te Tohi-Tapu? ʼAki “te kaugana agatonu mo fakapotopoto,” ʼe toe foaki mai e Sehova te ʼu nusipepa Te Tule Leʼo pea mo te Réveillez-vous! pea mo te tahi ʼu tohi faka Tohi-Tapu. (Mateo 24:45) Kapau ʼe tou ako fakalelei te ʼu tohi ʼaia, pea ʼe tou lotomālohi anai ʼi te faʼahi fakalaumālie. Ei, ʼe tonu ke tou toʼo hotatou temi​—‘ke tou fakaʼaoga lelei te temi-nei’​—moʼo fai ʼo hatatou ako takitokotahi.​—Efeso 5:​16.

7. (a) He koʼe ʼe mole tonu ke tou nofo pe ʼi te ʼu akonaki ʼaē neʼe tou ako ʼi te kamata? (b) ʼE lava feafeaʼi hatatou “hiki atu ki te katoa o te tagata kua lahi”?

⁷ Kapau ʼe tou loto ke haga hoko atu tatatou lele ʼi totatou ʼuhiga tisipulo Kilisitiano, pea ʼe mole tonu ke tou nofo pe ʼi “te akonaki o te kamataʼaga” kae ke “tou hiki atu ki te katoa o te tagata kua lahi.” (Hepeleo 6:1) Koia ʼe tonu ke tou fakatuputupu ia tatou te fia ʼiloʼi ʼo “te laulahi, mo te loa, mo te maoluga pea mo te loloto” ʼo te moʼoni pea mo tou kai ki te “meakai fefeka maʼa te hahai lalahi.” (Efeso 3:​18; Hepeleo 5:​12-​14) Ohage la, koutou lau te ʼu evaselio e fā ʼo ʼuhiga mo te maʼuli ʼa Sesu ʼi te kele​—te ʼu Evaselio ʼo Mateo, mo Maleko, mo Luka, pea mo Soane. Kapau ʼe tou ako fakalelei te ʼu Evaselio ʼaia, ʼe tou ʼiloʼi anai te ʼu gāue ʼaē neʼe fai e Sesu pea mo tona ʼu kalitate, pea tahi ʼe tou ʼiloʼi anai te faʼahiga manatu ʼaē neʼe ina uga ia ia ke ina fakahoko tana ʼu gāue. Pea ʼe feala ai leva ke tou “mau te manatu a Kilisito.”​—1 Kolonito 2:​16.

8. ʼE tokoni feafeaʼi mai te ʼu fono faka Kilisitiano ke tou faʼa kātaki ʼi te lele ki te maʼuli?

⁸ Neʼe tokoni fēnei ia Paulo ki tana ʼu kaumeʼa ʼi te tui: “Pea tou fe’tokagaʼaki o fakaʼalaʼala ki te fai o te ofa pea mo te u gaue lelei. Aua naa tou liaki atatou fakatahi o hage ko te aga mahani a ihi, kae tou fe’tokoniʼaki, pea tafito leva, e koutou mamata ki te fakaovi mai o te Aho.” (Hepeleo 10:24, 25) ʼE tou maʼu he ʼu fakaloto mālohi ʼi te ʼu fono faka Kilisitiano! Pea ʼe tou toe loto fīmālie ʼi tatatou fakatahi mo ʼotatou tēhina mo tuagaʼane ʼe nātou ʼofa kia tatou pea mo tokoni kia tatou ke tou kātakiʼi ʼo aʼu ki te fakaʼosi! ʼE mole feala ke tou meʼa noaʼi te fakatuʼutuʼu ʼaia ʼaē ʼe foaki mai e Sehova ʼaki te ʼofa. ʼI tatatou fai fakalelei tatatou ako takitokotahi pea mo tatatou kau tuʼumaʼu ki te ʼu fono, tou liliu ʼo “fakakaukau o hage ko he u tagata lalahi.”​—1 Kolonito 14:20.

Ko Nātou ʼAē ʼe Mamata ʼe Feala Ke Nātou Fakaloto Mālohi Koutou

9, 10. (a) ʼE lava fakaloto mālohiʼi feafeaʼi tatou e nātou ʼaē ʼe mamata ki tatatou lele mānava? (b) Ko ai ‘te ao o te kau fakamooni ae e ina takatakai tatou’ pea mo talanoa kiai ia Hepeleo 12:1?

⁹ Tatau aipe peʼe teuteu lelei ia ia ʼaē ʼe kau ki te lele, kae ʼe feala ke ʼi ai he ʼu meʼa ʼi te ala ʼe tūkia ai anai. Neʼe fehuʼi fēnei e Paulo: “Nee koutou lele lelei! Pe ko ai ae nee ina taofi tautou fakalogo ki te mooni?” (Kalate 5:7) ʼE ʼasi mai, ko ʼihi Kilisitiano ʼo Kalate neʼe ʼi ai tanatou ʼu fakakaugā kovi ʼo tupu ai tanatou mole kei tokakaga ki tanatou lele ki te maʼuli. Kae ʼi te tahi faʼahi, ko te tokoni pea mo te fakaloto mālohi ʼa ʼihi ʼe feala ke faigafua ai kia tatou ke tou kātakiʼi te lele. ʼE hage pe ko nātou ʼaē ʼe mamata ki he faigaoʼi, ʼe feala ke nātou tokoni pea mo fakaloto mālohiʼi ia te kau faigaoʼi. Kapau ko te hahaʼi ʼe nātou fiafia pea ʼe nātou fakaʼāsili te mālohi ʼa te kau lele ʼo aʼu ki te fakaʼosi. Ko te ʼu pākalaga ʼa te hahaʼi, ʼo fakatahi kiai te musika pea mo te ʼu pasipasi, ʼe ina toe fakaʼāsili mālohiʼi te kau lele ke feala hanatou kaku ki te fakaʼosi. Koia, kapau ʼe lagolago lelei te hahaʼi ʼaē ʼe mamata, pea ʼe fua lelei anai ki te kau lele.

¹⁰ ʼI te lele ki te maʼuli ʼaē ʼe kau kiai te kau Kilisitiano, ko ai koa te hahaʼi ʼaē ʼe mamata? ʼI tana ʼosi talanoa ia Hepeleo kapite 11 ki te kau fakamoʼoni agatonu ʼa Sehova ʼaē neʼe maʼuʼuli ʼi muʼa ʼo te temi faka Kilisitiano, neʼe tohi fēnei e Paulo: “Koia leva, pea mo tatou, i totatou kua takatakai e he ao feia o te kau fakamooni, . . . tou lele mo te kataki i te lele kua tuku mai kia tatou.” (Hepeleo 12:1) ʼI tana fakaʼaogaʼi te fakatātā ʼo te ʼao, neʼe mole fakaʼaogaʼi e Paulo te kupu faka Keleka ʼaē ʼe faka ʼuhiga ki he ʼao ʼe tou sio lelei ki tona laulahi pea mo tona agaaga. Kailoa, kae ʼo mulimuli ki te meʼa neʼe ʼui e W. E. Vine ʼi tana tikisionalio, neʼe ina fakaʼaogaʼi te kupu “ ʼe faka ʼuhiga ki he toe ʼao lahi, ʼe ina ʼaofi te lagi.” Koia, neʼe manatu ai e Paulo ki he kau Fakamoʼoni ʼe kaugamālie ʼaupito​—ko tanatou kaugamālie ʼaia ʼe hage ko he toe ʼao lahi.

11, 12. (a) ʼI hona ʼaluʼaga fakatātā, ʼe fakaloto mālohiʼi feafeaʼi tatou e te kau fakamoʼoni ʼaē neʼe maʼuʼuli ʼi muʼa ʼo te temi faka Kilisitiano, ke tou faʼa kātaki ʼi te lele? (b) Koteā ʼaē ʼe tonu ke tou fai ke fua lelei kia tatou te ‘ao o te kau fakamooni’?

¹¹ ʼE feala koa ʼi te temi nei, ki te kau fakamoʼoni agatonu ʼaē neʼe maʼuʼuli ʼi muʼa ʼo te temi faka Kilisitiano ke nātou mamata ki tatatou lele? Kailoa ia. Kua mamate fuli nātou, pea ʼe nātou talitali ki te fakatuʼuake. Kae ʼi tanatou kei maʼuʼuli, neʼe nātou mālo ʼi tanatou lele, pea ʼe fakamatala tanatou ʼu faʼifaʼitaki ʼi te ʼu pasina ʼo te Tohi-Tapu. Ka tou ako te Tohi-Tapu, pea ʼe lagi feala ke tou sio fakaʼatamai ki te kau agatonu ʼaia, pea ʼe feala ke nātou fakaloto mālohiʼi tatou ke tou lele ʼo aʼu ki te fakaʼosi.​—Loma 15:4.a

¹² Ohage la, ka fakahalaʼi tatou e he ʼu meʼa ʼo te mālama, ko te fakafisi ʼa Moisese ki te kolōlia ʼaē neʼe feala ke ina maʼu ʼi Esipito, ʼe ina fakaloto mālohiʼi anai tatou ke tou hoko atu tatatou lele. Kapau ʼe tou felāveʼi mo he ʼahiʼahi faigataʼa, ko tatatou manatuʼi te ʼahiʼahi ʼaē neʼe hoko kia Apalahamo, ʼi te temi ʼaē neʼe kole age ki ai ke ina momoli tona foha ko Isaake, ʼe tokoni anai kia tatou ke ʼaua naʼa tou līaki te tau ʼo te tui. ʼE feala ki te ‘toe ʼao’ ʼaia ke ina fakaloto mālohiʼi tatou ʼi tatatou lele, mo kapau ʼe tou mālama lelei ki te kau fakamoʼoni agatonu ʼaia.

13. ʼI tatatou lele ki te maʼuli, e feafeaʼi te haga fakaloto mālohiʼi ʼo tatou e te kau Fakamoʼoni ʼa Sehova ʼo totatou temi?

¹³ ʼE toe ʼatakai tatou e he tokolahi ʼo te kau Fakamoʼoni ʼa Sehova ʼo te temi ʼaenī. Neʼe ko he ʼu faʼifaʼitaki lahi ʼo te tui ʼaē neʼe tuku mai e te kau Kilisitiano fakanofo, ʼo feiā mo te ʼu tagata pea mo te ʼu fafine ʼo te “toe hahaʼi tokolahi”! (Apokalipesi 7:​9, MN) ʼE feala ke tou lau te fakamatala ʼo tanatou ʼu maʼuli ʼi te nusipepa ʼaenī pea mo te tahi ʼu tohi ʼo te Sosiete.b ʼI tatatou fakakaukauʼi tonatou tui, ʼe fakaloto mālohiʼi ai tatou ke tou kātakiʼi ʼo aʼu ki te fakaʼosi. Pea ʼe ko he meʼa fakatalakitupua tatatou maʼu te tokoni ʼo hatatou ʼu kaumeʼa pea mo kāiga, ʼe nātou tauhi agatonu mo nātou kia Sehova! Ei, ʼe tokolahi ia nātou ʼaē ʼe feala ke nātou fakaloto mālohiʼi tatou ʼi te lele ki te maʼuli.

Koutou Lele Fakapotopoto

14, 15. (a) He koʼe ʼe maʼuhiga ke tou lele fakapotopoto? (b) He koʼe ʼe tonu ke tou fakapotopoto ʼo ʼuhiga mo te ʼu fakatuʼutuʼu ʼaē ʼe tou fai?

¹⁴ Kapau ʼe ko he lele loaloaga, ohage la ko te lele mānava, pea ʼe tonu ki te tagata lele ke lele fakapotopoto. ʼE ʼui fēnei e te nusipepa New York Runner: “Kapau ʼe vave fau takotou lele ʼi te kamata, pea ʼe mole koutou aʼu anai ki te fakaʼosi; ʼe lagi faigataʼa ʼaupito anai takotou lele ʼi te ʼu kilometa fakamuli, peʼe koutou tuku anai.” ʼE manatuʼi fēnei e te tagata neʼe kau ʼi te lele mānava: “ ʼI muʼa ʼo taku lele, neʼe ʼau kau ki te fono teuteu, neʼe fai mai ai te fakatokaga ʼaenī: ‘ ʼAua naʼa koutou faiga ke koutou vaʼevave age ia nātou ʼaē ʼe lele vave. Koutou mulimuli pe ki takotou faʼahiga lele. Heʼe feala anai ke koutou gaʼegaʼe pea lagi koutou tuku anai takotou lele.’ Neʼe ʼau mulimuli ki te tokoni ʼaia, pea neʼe ʼau lava fakaʼosi ai taku lele.”

¹⁵ ʼI te lele ki te maʼuli, ʼe tonu ke faiga mālohi te ʼu kaugana ʼa te ʼAtua. (Luka 13:24) Kae neʼe tohi fēnei e te tisipulo ko Sake: “Ko te poto mai oluga . . . e [“agapoto,” MN].” (Sakopo 3:​17) ʼE lahi te ʼu meʼa ʼe feala ke tou fai ʼaki te faʼifaʼitaki lelei ʼaē ʼe tuku mai e ʼihi, kae kapau ʼe tou agapoto, pea ʼe feala anai ke tou fai he ʼu fakatuʼutuʼu fakapotopoto ʼo mulimuli ki totatou ʼu fealagia pea mo totatou ʼaluʼaga. ʼE fakamanatuʼi mai kia tatou e te Tohi-Tapu: “Ke tahi vakai e te tagata tana gaue, e ina mau ai anai he mea ke fiameamea ai, kae mole ko he gaue a he tahi kehe. Koteuhi, e tahi fua’pe anai e te tagata tana kavega totonu.”​—Kalate 6:​4, 5.

16. He koʼe ʼe ʼaoga te agavaivai ʼi te fakatuʼutuʼu ʼaē ʼo tatatou faʼahiga lele?

¹⁶ Ia Mikea 6:8, ʼe fai mai kia tatou te fehuʼi ʼaenī: “Koteā ʼaē ʼe kole atu e Sehova kia te koe, ʼe mole koa la . . . ke ke haʼele mo tou ʼAtua ʼaki he agavaivai?” Ko te faka ʼuhiga ʼo te agavaivai ke kita ʼiloʼi totatou ʼu tuʼakoi. ʼE mole tuʼakoi koa la tatatou tauhi ki te ʼAtua, ʼuhi ko tatatou mahamahaki peʼe kua tou matutuʼa? ʼAua naʼa tou lotovaivai. ʼE tali e Sehova te ʼu faiga pea mo te ʼu sakilifisio ʼaē ʼe tou fai ‘ ʼo mulimuli ki te meʼa ʼaē ʼe tou maʼu, kae mole ki te meʼa ʼaē ʼe mole tou maʼu.’​—2 Kolonito 8:​12; vakaʼi ia Luka 21:​1-4.

Koutou Sio Tuʼumaʼu Ki Te Totogi

17, 18. Koteā ʼaē neʼe tokagaʼi tuʼumaʼu e Sesu pea mo tokoni kia ia ke ina kātakiʼi te pou fakamamahi?

¹⁷ ʼI tana fakahā ki te kau Kilisitiano ʼo Kolonito te ʼaoga ʼaē ke nātou kātaki ʼi te lele ki te maʼuli, neʼe talanoa Paulo ki te tahi faʼahi neʼe tonu ke nātou tokagaʼi ʼo ʼuhiga mo te ʼu Gaoʼi Isthmiques. ʼO ʼuhiga mo nātou ʼaē ʼe kau ki te ʼu faigaoʼi ʼaia, neʼe tohi fēnei e Paulo: “E natou [lele] ke natou mau he kolona popo gafua, kae kia tatou e ko he kolona e mole popo. Koia, e au lele fenei, e mole au hoko lele feiape; e au fuhu fenei, e mole au hoka te aele.” (1 Kolonito 9:​25, 26) Ko te fakapale ʼi te ʼu faigaoʼi ʼaia ʼo te temi muʼa, neʼe ko he kolona peʼe ko he pale neʼe faʼu ʼaki te ʼu lau ʼo te fuʼu ʼakau ko te sapa peʼe ko te tahi ʼu fuʼu ʼakau, peʼe ʼaki te ʼu lau selelī neʼe fakamoamoa​—ei neʼe ko “he kolona popo gafua.” Kae koteā ʼaē ka foaki anai ki te kau Kilisitiano ʼaē ʼe nātou kātaki ʼo aʼu ki te fakaʼosi?

¹⁸ ʼI tana talanoa ʼo ʼuhiga mo tatatou Faʼifaʼitakiʼaga, ia Sesu Kilisito, neʼe tohi fēnei e Paulo: “ ʼUhi ko te fiafia ʼaē neʼe fakapapau age kia te ia, neʼe ina kātakiʼi te pou fakamamahi, ʼo ina meʼa noaʼi te ufiufi, pea heka ia ʼi te toʼomataʼu ʼo te hekaʼaga hau ʼo te ʼAtua.” (Hepeleo 12:​2, MN) Neʼe faʼa kātaki Sesu ʼo aʼu ki tana mate, ʼo mole ina tokagaʼi te pou fakamamahi kae ina tokagaʼi tana fakapale, ʼaē neʼe kau kiai tana fiafia ʼi tana fakamaʼa ia te huafa ʼo Sehova, tana totogi te hahaʼi fuape mai te mate, pea mo tana pule ʼi tona ʼuhiga Hau pea mo Pelepitelo Lahi moʼo foaki ki te hahaʼi fakalogo te maʼuli heʼegata ʼi te palatiso ʼi te kele.​—Mateo 6:​9, 10; 20:28; Hepeleo 7:​23-​26.

19. Koteā ʼaē ʼe tonu ke tou sioʼi tuʼumaʼu ʼi tatatou hoko atu tatatou lele ʼi totatou ʼuhiga tisipulo Kilisitiano?

¹⁹ Koutou fakatokagaʼi te fiafia ʼaē ʼe fakapapau mai mo kapau ʼe tou haga fai tatatou lele ʼi totatou ʼuhiga tisipulo Kilisitiano. Neʼe foaki mai kia tatou e Sehova te gāue fakafiafia lahi, ʼaē ko te faka mafola ia te logo lelei ʼo te Puleʼaga ʼo te ʼAtua pea mo tou fakahā ki te hahaʼi te ʼatamai mālama ʼo te Tohi-Tapu ʼaē ʼe ina foaki te maʼuli. (Mateo 28:19, 20) ʼE ko he meʼa fakafiafia hatatou maʼu he tahi ʼe ina fia ʼiloʼi te ʼAtua moʼoni, pea mo hatatou tokoni kia ia ke kau ki te lele ʼaē ki te maʼuli! Pea tatau aipe peʼe koteā te faʼahiga tali ʼa te hahaʼi ki tatatou fai faka mafola, kae ʼe ko he pilivilesio hatatou kau ki te gāue ʼaē ʼe pipiki ki te fakamaʼa ʼo te huafa ʼo Sehova. Ka tou faʼa kātaki ʼi te minisitelio logola te mole fia logo peʼe ko te fakafeagai ʼa te hahaʼi ʼo tatatou telituale, pea ʼe tou fiafia pe tatou heʼe tou fakafiafia te loto ʼo Sehova. (Tāʼaga Lea 27:11) Pea ko te fakapale lahi ʼaē ʼe ina fakapapauʼi mai ʼe ko te maʼuli heʼegata. ʼE ko he fakafiafia lahi anai! ʼE tonu ke tou manatuʼi tuʼumaʼu te ʼu tapuakina ʼaia pea mo tou kātaki ʼi te lele.

Kua Ōvi Mai Te Fakaʼosi

20. Koteā ʼaē ʼe feala ke fakatupu faigataʼa ki tatatou lele ki te maʼuli, ʼi te ōvi mai te fakaʼosi?

²⁰ ʼI te lele ʼaē ki te maʼuli, ʼe tonu ke tou tauʼi totatou fili lahi, ʼaē ko Satana te Tevolo. ʼI tatatou kua ōvi ʼaē ki te fakaʼosi, ʼe ina faigaʼi mālohi anai ke tou tūkia peʼe ke tou lotovaivai ʼi tatatou lele. (Apokalipesi 12:12, 17) Pea ʼe mole faigafua hatatou fakahoko totatou ʼuhiga kaugā fai faka mafola agatonu ʼo te Puleʼaga, mokā hoko te ʼu tau, mo te ʼu hoge, mo te ʼu mahaki, pea mo te tahi ʼu faigataʼaʼia ʼaē ʼe hoko ʼi “te temi fakaʼosi.” (Taniela 12:4; Mateo 24:​3-​14; Luka 21:11; 2 Timoteo 3:​1-5) Pea tahi ʼaē meʼa, ʼe feala ʼi ʼihi temi, ke hage kia tatou ʼe kei tuai mai te fakaʼosi, tāfito la mo kapau kua lauʼi taʼu tatatou kau ʼi te lele. Kae ʼe fakapapau mai e te Folafola ʼa te ʼAtua ʼe hoko mai anai te fakaʼosi. ʼE ʼui e Sehova ʼe mole tuai anai. Kua ʼamanaki hoko mai te fakaʼosi.​—Hapakuke 2:3; 2 Petelo 3:​9, 10.

21. (a) Koteā ʼaē ka ina fakaloto mālohiʼi tatou ʼi tatatou lele ki te maʼuli? (b) Koteā te meʼa ʼaē ʼe tonu ke tou lotomālohi ʼo fai ʼi te kua ōvi mai ʼo te fakaʼosi?

²¹ Koia, kapau ʼe tou fia aʼu ki te fakaʼosi ʼo te lele ki te maʼuli, pea ʼe tonu ke tou fakaʼaogaʼi te mālohi ʼaē ʼe tou maʼu ʼi te meʼa kai fakalaumālie ʼaē ʼe foaki fakaʼofa mai e Sehova. ʼE toe ʼaoga foki kia tatou te ʼu fakaloto mālohi ʼaē ʼe feala ke tou maʼu ʼi tatatou fakatahi tuʼumaʼu mo tatatou ʼu kaumeʼa ʼi te moʼoni, ʼaē ʼe kau mo nātou ki te lele ʼaia. Tatau aipe peʼe hoko he ʼu fakataga peʼe ko ni ʼu meʼa neʼe mole tou ʼamanaki kiai, ʼo faigataʼa ai tatatou lele, kae ʼe feala hatatou kātakiʼi ʼo aʼu ki te fakaʼosi heʼe foaki mai e Sehova “te malohi tauʼoluga.” (2 Kolonito 4:7) ʼE ko he meʼa fakaloto fīmālie tatatou ʼiloʼi ʼaē ʼe loto e Sehova ke tou fakaʼosi te lele! Koia ʼe tou lotomālohi anai ke “tou lele mo te kataki i te lele kua tuku mai kia tatou,” ʼo tou falala katoa ʼe “tou utu anai moka hoko mai tona temi, kapau foki e mole tou lotovaivai.”​—Hepeleo 12:1; Kalate 6:⁠9.

[Nota ʼi te lalo pasina]

ʼE Kei Koutou Manatuʼi Koa?

◻ He koʼe ʼe tonu ke tou faʼa kātaki ʼo aʼu ki te fakaʼosi?

◻ Koteā te ʼu fakatuʼutuʼu ʼa Sehova ʼe mole tonu ke tou meʼa noaʼi?

◻ He koʼe ʼe maʼuhiga ke tou lele fakapotopoto?

◻ Koteā te fiafia ʼaē ka tou maʼu anai mo kapau ʼe tou haga hoko atu tatatou lele?

[Paki ʼo te pasina 18]

ʼE tou maʼu he ʼu fakaloto mālohi ʼi te ʼu fono faka Kilisitiano