ʼE Feala Koa Hakotou ʼOlo ʼo Faka Mafola ʼi He Tahi Fenua?

“NEʼE ʼau fakaʼamu tuʼumaʼu ke ʼau kau ʼi te gāue faka misionea. ʼI taku kei selipatea, neʼe ʼau fai faka mafola ʼi te kolo ʼo Texas, ʼi Amelika, ʼaē neʼe ʼaoga lahi ai he kau fai faka mafola. ʼI taku ʼosi ʼohoana, neʼe ma ʼōmai fakatahi mo toku ʼohoana ki henī. ʼI te tupu ʼo tamā taʼahine, neʼe ʼau manatu ai ‘ ʼE mole kei feala haku fakahoko taku fakatuʼutuʼu.’ Kae ʼe fakahoko e Sehova te ʼu meʼa ʼaē ʼe tou fakaʼamu kiai, tāfito mo kapau ʼe ʼalutahi mo tona finegalo.”​—Ko Jesse, ʼaē ʼe gāue nei ʼi Équateur mo tona ʼohoana pea mo tana ʼu toe e tolu.

“Neʼe ʼau manatu ʼe mole feala anai ke ʼau pionie ʼi he tahi fenua, gata pe mo kapau ʼe ʼau kau ki te Ako ʼo te kau misionea ʼi Kalaate. ʼI taku sio ʼaē ki te tahi ʼo taku kau ako neʼe ina fai tana kiʼi akonaki pea mo fai faka mafola, neʼe ʼau fiafia ʼaupito ai, pea neʼe ʼau fakamālo kia Sehova ʼi tana foaki mai kia ʼau te faigamālie ʼaia.”​—Ko Karen, ko te tuagaʼane selipatea pea kua taʼu valu tana gāue pionie ʼi Amelika ʼo te Potu Toga.

“Hili kiai taʼu e 13 ʼo tamā pionie katoa ʼi Amelika, neʼe ma manatu ai mo toku ʼohoana ke ma fai he tahi fakatuʼutuʼu. ʼI te temi nei, ʼe lahi age tamā fiafia; ʼe mahino ia ʼe ko he faʼahiga maʼuli ʼe ma leleiʼia ʼaupito.”​—Ko Tom, ʼe pionie mo tona ʼohoana ko Linda ʼi Amazonie.

Ko te ʼu fakamatala fakafiafia ʼaia neʼe fai e te ʼu hahaʼi neʼe mole feala, ʼuhi ko tonatou ʼu ʼaluʼaga, ke nātou kau ki te ako ʼo te kau misionea ʼi te Faleako Faka Tohi-Tapu ʼo Kalaate ʼo te Sosiete Watchtower. Kae neʼe nātou maʼu te ʼu fiafia pea mo nātou tau mo te ʼu faigataʼaʼia ʼi tanatou ʼolo ʼo fai faka mafola ʼi he tahi fenua. Neʼe hoko feafeaʼi te faʼahi ʼaia? ʼE feala koa ke koutou kau ki te gāue ʼaia?

ʼE Maʼuhiga Ke Tou Maʼu Ni ʼu Manatu Lelei

Ke fua lelei takita ʼalu ʼo fai faka mafola ʼi he tahi fenua, ʼe mole feʼauga pe takita manatu ʼaē ʼe tou sio anai ki he ʼu meʼa foʼou. Ko nātou ʼaē neʼe nātou lavaʼi te faʼahi ʼaia, neʼe tonu ke nātou maʼu he ʼu manatu lelei moʼo uga ʼo nātou. Ohage ko te ʼapositolo ko Paulo, neʼe nātou manatu ʼe ʼi ai tonatou maʼua ki te ʼAtua pea mo te hahaʼi. (Loma 1:​14) Neʼe nātou lavaʼi te fakahoko ʼo te fakatotonu fakaʼatua ʼaē ke nātou fai faka mafola, ʼi tanatou kau ki te minisitelio ʼaē neʼe fakahoko ʼi te fenua ʼaē neʼe nātou tutupu ai. (Mateo 24:14) Kae neʼe nātou manatu ʼe kei ʼi ai pe tanatou maʼua pea neʼe uga ai nātou ke nātou ʼolo ʼo tokoni ki te hahaʼi ʼaē ʼe tahitahiga tanatou logo ki te logo lelei.

ʼI te agamāhani, ko te tahi meʼa ʼaē ʼe ina uga tatou ke tou fia ʼolo ʼo gāue ʼi he tahi telituale, ʼe ko te tuputupu lelei ʼo te telituale ʼaia, pea ʼe ko he manatu lelei ʼaia. Ko ai ʼaē ia tatou, mokā sio ki he tagata gelu ʼe lahi te ʼu ika ʼaē ʼe ina maʼu, ʼe mole tou fakaōvi anai ki te faʼahi ʼaē ʼe gelu ai? ʼO toe feiā pe, ko te ʼu tānaki fakaloto mālohi ʼo te tuputupu ʼi te tahi ʼu fenua, neʼe ina uga ai te tokolahi ke nātou ʼolo ki te ʼu potu ʼaē ʼe “ika maumau ai.”​—Luka 5:​4-​10.

Koutou Fakakaukauʼi Te ʼu Faigataʼaʼia

ʼE lahi te ʼu fenua ʼe mole fakagafua ai ki te ʼu hahaʼi lotu matāpule ke nātou gāue faka papālagi. Koia, ko nātou ʼaē ʼe fia ʼolo ʼo fai faka mafola ʼi he tahi fenua, ʼi te agamāhani ʼe tonu ke nātou fakatuʼu hanatou kiʼi matagi gāue ke maʼu hanatou falā. Neʼe nātou lava tauʼi feafeaʼi te faigataʼaʼia faka ekonomika ʼaia? Ko ʼihi neʼe nātou fakatau peʼe nātou fakalue tonatou ʼapi ke nātou maʼu te falā ʼaē ʼe ʼaoga kia nātou. Ko ʼihi neʼe nātou fakatau tanatou matagi gāue. Ko ʼihi neʼe nātou tānaki tanatou falā moʼo fakahoko tanatou fakatuʼutuʼu ʼaia. Pea ko ʼihi leva neʼe nātou ʼolo ʼo faka mafola ʼi he tahi fenua lolotoga te taʼu katoa peʼe lua, pea nātou toe liliu ki te fenua ʼaē neʼe nātou tutupu ai, ʼo nātou gāue ai pea mo tānaki ai hanatou falā, pea nātou toe liliu ʼo hoko atu tanatou fai faka mafola.

Ko te meʼa ʼaē ʼe lelei ʼi he fenua masiva, heʼe totogi siasia age ia te maʼuli ʼi he fenua ʼe tuputupu ʼi te faʼahi fakakoloa. Neʼe feala ai ki ʼihi ke nātou maʼuli lelei logope la te mole faʼa lahi ʼo tanatou falā. Kae ʼe mahino ia, ʼe fakalogo anai te faʼahiga maʼuli ʼaē ʼe kita loto kiai ki te falā ʼaē ʼe kita fia fakaʼaogaʼi. Māʼiape la ʼi te ʼu fenua ʼaē ʼe tuputupu, ʼe feala ke kita maʼuli lelei ai kae ʼe lagi totogi kovi age.

ʼE hā lelei mai, ʼe tonu ke kita fakakaukauʼi te ʼu meʼa ʼaē ka kita totogi ʼi muʼa ʼo hakita ʼalu ki he tahi fenua. Kae ʼe mole gata pe anai ki te faʼahi faka ekonomika. ʼE lagi ʼaoga anai ke koutou ʼiloʼi te ʼu manatu ʼo te hahaʼi ʼaē ʼe fai faka mafola ʼi Amelika ʼo te Potu Toga.

Te Meʼa ʼAē ʼe Faigataʼa Tāfito

ʼE manatuʼi fēnei e Markku, mai Finlande: “Neʼe faigataʼa ʼaupito kia ʼau taku ako te faka Sepania. Neʼe ʼau manatu ai, ʼuhi ko taku mole ʼiloʼi ia te lea, ʼe ʼau talitali fualoa anai ʼi muʼa ʼo haku liliu ko he tagata faifekau faka minisitelio. Kae hili pe māhina e tolu, neʼe ʼau punamaʼuli ki te kole mai ʼaē ke ʼau takitaki te ako tohi! ʼE mahino ia neʼe ʼi ai te ʼu temi neʼe ʼau ufiufi ai. Neʼe faigataʼa tāfito kia ʼau taku puʼaki te ʼu higoa. ʼI te tahi ʼaho, neʼe ʼau fakahigoaʼi te tēhina ko Sancho ko ‘Tēhina ko Chancho (puaka),’ pea ʼe mole galo anai kia ʼau taku fakahigoaʼi ia te tuagaʼane ko Salamea ko tuagaʼane ko ‘Malasea (agakovi).’ Meʼa lelei foki he neʼe mole ʼiʼita te ʼu tēhina mo te ʼu tuagaʼane.” Ki muli age, neʼe liliu ia Markku ko te tagata taupau feʼaluʼaki ia taʼu e valu ʼi te telituale ʼaia mo tona ʼohoana, ko Céline.

ʼE fakamatala fēnei e Chris, te ʼohoana ʼo Jesse ʼaē neʼe tou talanoa kiai ʼi te kamata: “ ʼE ʼau manatuʼi tomatou ʼuluaki ʼaʼahi e te tēhina taupau faka silikosipisio, neʼe kua hili pe kiai māhina e tolu ʼo tamā nonofo ʼi henī. Neʼe ʼau ʼiloʼi neʼe fakaʼaogaʼi e te tēhina he ʼu lea fakatātā pea mo he ʼu palalau lave loto, kae neʼe mole ʼau mahino ki ai. Neʼe ʼau tagi ai ʼi te Fale fono. Neʼe mole ko haku tagi fakameʼameʼa. ʼI te ʼosi ʼo te fono, neʼe ʼau faiga ke ʼau fakamahino ki te tēhina taupau faka silikosipisio pe koʼe neʼe ʼau tagi. Neʼe agalelei ʼaupito pea neʼe ina fai mai te ʼu palalau ʼaē neʼe tau ʼui mai e ʼihi, ‘Ten paciencia, hermana’ (‘Ke ke faʼa kātaki, tuagaʼane’). Hili taʼu e lua peʼe tolu, neʼe ma toe felāveʼi pea neʼe ma palalau ia minuta e 45, ʼo ma fiafia ʼi tamā lava fai palalau.”

ʼE ʼui fēnei e te tahi tēhina: “ ʼE maʼuhiga ke kita ako te lea. Kapau ʼe tou faiga lahi ke tou ako te lea, pea ʼe faigafua anai hatatou palalau mo te hahaʼi.”

ʼE nātou manatu fuli ʼe tapuakina lahi anai tanatou ʼu faiga ʼaia. Ka faiga he tahi ke ina ako he lea foʼou pea ʼe liliu ʼo agavaivai, mo faʼa kātaki pea mo lotomālohi. ʼE ko he fealagia lahi ʼaia ke kita faka mafola te logo lelei ki te hahaʼi. Ohage la, ko te ako ʼo te lea faka Sepania, ʼe feala ai hakita palalau te lea ʼa te hahaʼi ʼe toko 400 miliona ʼi te malamanei. Tokolahi ia nātou ʼaē ʼe toe liliu ki te fenua ʼaē neʼe nātou tutupu ai, ʼe feala ke nātou fakaʼaogaʼi tanatou poto ʼi te faka Sepania ke nātou fai palalau ai mo nātou ʼe palalau ʼi te lea ʼaia.

E Feafeaʼi Mokā Kita Manamanatu Ki Tokita Fenua?

ʼE manatuʼi fēnei e Déborah, ʼaē neʼe fai faka mafola mo tona ʼohoana ko Gary, ʼi Amazonie: “ ʼI tamā ʼuluaki ʼōmai ki Équateur ʼi te taʼu 1989, neʼe ʼau tau manamanatu ki toku fenua. Kua ʼau falala ki toku ʼu tēhina mo tuagaʼane ʼo te kokelekasio. Kua nātou liliu ko hoku famili.”

ʼE ʼui fēnei e Karen, ʼaē neʼe tou talanoa kiai ʼi te kamata: “Neʼe ʼau faiga ke mole ʼau manamanatu ki toku fenua, ʼo ʼau fai faka mafola ʼi te ʼaho fuli. ʼI taku fai feiā, neʼe mole ʼau manatu ai ki toku fenua. Neʼe ʼau toe manatuʼi foki neʼe fiafia taku ʼu mātuʼa ʼi te gāue ʼaē ʼe ʼau fai ʼi he tahi fenua. Neʼe fakaloto mālohi tuʼumaʼu ʼau e taku faʼe, ʼo ina ʼui fēnei: ‘ ʼE tokaga lelei age ia Sehova kia koe ia ʼau.’ ”

Ko Makiko, te tuagaʼane Saponia, ʼe ina ʼui fakakata fēnei: “Ka ʼau ʼosi fai faka mafola ʼi te ʼaho katoa, pea ʼe ʼau gaʼegaʼe ʼaupito. Koia, ka ʼau haʼu ki fale pea mo ʼau kamata manamanatu ki toku famili, ʼi te agamāhani ʼe ʼau tulemoe, pea ʼe puli atu aipe taku manamanatu ki toku fenua.”

E Feafeaʼi ʼo ʼUhiga Mo Te Fānau?

Kapau ʼe ʼi ai hakotou fānau, pea ʼe tonu ke vakaʼi te ʼu meʼa ʼaē ʼe ʼaoga kia nātou, ohage ko te ako. ʼO ʼuhiga mo te faʼahi ʼaia, neʼe fili e ʼihi mātuʼa ke ako tanatou tamaliki ʼi fale pea ko ʼihi mātuʼa, ʼe nātou fili ke ʼolo tanatou fānau ki he faleako.

Ko Al pea mo tona ʼohoana neʼe nā ʼolo ki Amelika ʼo te Potu Toga, mo tana ʼu toe e lua, pea mo tana faʼe. ʼE ina ʼui fēnei: “Neʼe ma manatu ʼe lelei age ki te fānau tanatou ʼolo ki he faleako, ke nātou ako vave ai te lea. Hili māhina e tolu, neʼe kua popoto lelei ʼi te palalau.” Kae ki te ʼu tama e lua ʼa Mike pea mo Carrie, ʼe fai tanā ako e te ʼu polofesea ʼe nātou fefaitohiʼaki. ʼE ʼui fēnei e te ʼu mātuʼa: “Neʼe ma fakatokagaʼi ʼe mole tonu ke ma tuku ke fai tokotahi e tamā ʼu tama te taʼi faʼahiga ako ʼaia. Neʼe tonu ke ma tokoni kia nāua pea mo vakaʼi ke mole nā tauhala ʼi te ʼu meʼa ʼaē ʼe tonu ke nā ako.”

Ko David pea mo Janita, mai Ositalalia, ʼe nā ʼui fēnei ʼo ʼuhiga mo tanā ʼu tama e lua. “Neʼe ma loto ke sio tonu e tamā ʼu tama peʼe feafeaʼi te maʼuli ʼa te hahaʼi. ʼE faigafua hakita manatu ko te faʼahiga maʼuli ʼaē neʼe kita tupu ai ʼe ko te faʼahiga maʼuli ʼaē ʼe lelei, kae kapau ʼe tou fakasiosio lelei, ʼe tou tokosiʼi. Tahi ʼaē meʼa, neʼe nā sio peʼe feafeaʼi te ʼaoga ʼo te ʼu pelesepeto faka teokalatike ʼi te malamanei, tatau aipe pe kofea te fenua ʼaē ʼe kita nofo ai, pea mo tona ʼu agaʼi fenua.”

ʼE manatuʼi fēnei e Ken: “Neʼe ʼau taʼu fā ʼi te temi ʼaē neʼe mātou mavae ai ʼi Pilitania ʼi te taʼu 1969. Neʼe mole ʼau fiafia he neʼe mole mātou nonofo ʼi he fale lau ohage ko te meʼa ʼaē neʼe ʼau ʼamanaki kiai, kae neʼe ʼau manatu ʼe ʼau fiafia ʼaupito ʼi toku temi tūpulaga. Neʼe ʼau fakaʼofaʼofa ki te ʼu tamaliki ʼaē neʼe mole nātou maʼu te fealagia ʼaia! ʼI taku fakatahi lelei mo te kau misionea pea mo te kau pionie makehe, neʼe ʼau kamata pionie vaeluaʼi temi ʼi toku taʼu hiva.” ʼI te temi nei, ko Ken ko te tagata taupau feʼaluʼaki.

ʼE fakamoʼoni fēnei e Gabriella, te ʼofafine ʼo Jesse: “Kua liliu moʼoni ia Équateur ko tomatou fenua. ʼE ʼau fiafia ʼi te tonu ʼaē neʼe fai e taku ʼu mātuʼa ke mātou ʼōmai ki henī.”

ʼI te tahi faʼahi, neʼe ʼi ai te ʼu tamaliki neʼe mole nātou lavaʼi te ʼu fenua ʼaē neʼe nātou hiki kiai mo tanatou ʼu mātuʼa, pea neʼe nātou toe liliu mo tanatou ʼu mātuʼa ki tanatou fenua. Koia, ʼe lelei age ke koutou ʼuluaki ʼaʼahi muʼa te fenua ʼaē ʼe koutou fia ʼolo ʼo nonofo ai. ʼE feala ai ke koutou fai he ʼu tonu ʼo koutou fakatafito ki te ʼu meʼa ʼaē neʼe koutou sio tonu kiai.

Te ʼu Tapuakina Mokā Koutou ʼOlo Ki He Tahi Fenua

ʼE moʼoni, mokā koutou ʼolo ki he tahi fenua, pea ʼe koutou felāveʼi mo ni ʼu faigataʼaʼia pea ʼe tonu ke koutou fai ni ʼu sakilifisio. Neʼe maʼu koa he ʼu fua lelei e nātou ʼaē neʼe ʼolo ki he tahi fenua? Tou tuku ke nātou tali kiai.

Ko Jesse: “ ʼI te ʼu taʼu e hogofulu ʼaē neʼe mātou nonofo ai ʼi te kolo ʼo Ambato, neʼe mātou sio neʼe tuputupu te ʼu kokelekasio e 2 ʼo liliu ko kokelekasio e 11. Neʼe mātou maʼu te pilivilesio ʼaē ke mātou tokoni ki te kamakamata ʼo kokelekasio e nima, pea neʼe mātou kau ki te laga ʼo te ʼu Fale ʼo te Puleʼaga e lua. Neʼe mātou toe fiafia foki ʼi tamatou tokoni kia ako e lua ʼi te taʼu fuli ke nātou aʼu ki te papitema. Ko taku fakahemala pe e tahi​—ko taku mole haʼu ki henī ia taʼu e hogofulu ki muʼa atu.”

Ko Linda: “ ʼE mātou lotomālohi ʼi tamatou sio ki te hahaʼi ʼe nātou leleiʼia te logo lelei pea mo tamatou ʼu faiga lahi. Ohage la, ʼi te kiʼi kolo veliveli ʼi te vao matuʼa, ko te tagata ako ʼe higoa ko Alfonso neʼe mahino kia ia te ʼaoga ʼaē ke fai he ʼu akonaki ʼi te koga meʼa ʼaē ʼe nofo ai. Neʼe hiki leva ki tana kiʼi ʼapi papa foʼou, ʼaē ʼe mole faʼa mamaʼo ʼi te kolo. Neʼe sio ia neʼe ko tona ʼapi pe ʼaē neʼe tau mo feʼauga mo Sehova, koia neʼe toe liliu ai ki tana kiʼi fale lau, kae ina foaki tona kiʼi ʼapi papa ki te ʼu tēhina ke nātou fakaʼaogaʼi ohage ko he Fale ʼo te Puleʼaga.”

Ko Jim: “Ko te temi ʼaē ʼe mātou fakaʼaogaʼi moʼo fai palalau mo te hahaʼi ʼi te fai faka mafola, ʼe lahi age ʼi te temi ʼaē ʼe mātou fakaʼaogaʼi ʼi Amelika. Pea tahi ʼaē meʼa, ʼe fīmālie age te maʼuli ʼi henī. Ei ʼe lahi age te temi ki te ako pea mo te fai faka mafola.”

Ko Sandra: “ ʼE ko he meʼa fakafiafia ʼaupito kia ʼau, taku sio ki te ʼu fetogi ʼa te hahaʼi ʼuhi ko te moʼoni ʼo te Tohi-Tapu. Neʼe ʼau fai te ako Tohi-Tapu ʼa Amada, ko te fafine e taʼu 69 pea ʼe ʼi ai tana kiʼi fale koloā. Ko te meʼa neʼe ina fai māhani, ko te fakafio te vai mo te huʼa pipi. Pea neʼe ina kākāʼi te hahaʼi ʼo ina fakatau kia nātou te moʼi huʼa pipi ʼaia neʼe fio pea neʼe mole ina fakafonu lelei. Kae ʼi tana ʼosi ako te kapite 13 ko tona kupu tāfito ‘He Koʼe Ko Te Maʼuli ʼo Te Aga Faka Lotu ʼe Ina ʼAumai Te Fīmālie’ ʼi te tohi Te ʼAtamai Mālama ʼAē ʼe Ina Taki Ki Te Maʼuli Heʼegata, neʼe fakagata e Amada tana aga kovi ʼaia. Neʼe ko he meʼa fakafiafia lahi kia ʼau tana papitema ki muli age!”

Ko Karen: “Neʼe mole he temi neʼe lahi feiā taku falala kia Sehova pea mo ina fakaʼaogaʼi lahi feiā ʼau ʼi henī. Neʼe toe ʼāsili ai taku ʼofa kia Sehova pea mo mālohi.”

Kaeā Koutou?

Lolotoga ni ʼu taʼu, ko Fakamoʼoni ʼe lauʼi afe neʼe nātou ʼolo ki he fenua matāpule moʼo fai faka mafola ai. Ko ʼihi neʼe nonofo ai taʼu katoa peʼe taʼu lua, pea ko ʼihi kua nātou talu ai. Neʼe nātou fakaʼaogaʼi ai tanatou kua māhani, mo tanatou kua popoto ʼi te faʼahi fakalaumālie, pea mo tanatou paʼaga, ʼaki te fakatuʼutuʼu ʼaē ke mafola te logo ʼo te Puleʼaga ʼi te telituale matāpule ʼaia. Neʼe nātou lava gāue ʼi te ʼu koga meʼa ʼaē neʼe mole lava gāue ai te ʼu kaugā fai faka mafola ʼuhi ko te mole maʼu ʼo he gāue papālagi. Tokolahi neʼe nātou totogi hanatou ʼu motokā ke feala hanatou ʼolo ki he telituale ʼe tuʼu mamaʼo. Ko ʼihi, ʼaē neʼe nātou leleiʼia tāfito te maʼuli ʼi te ʼu kolo lalahi, kua ʼaoga tanatou gāue ʼi te ʼu kokelekasio ʼaē neʼe mole lahi ai te kau tagata ʼāfea. Kae neʼe ʼui fakalelei e nātou fuli ʼaia, neʼe lahi tāfito tanatou tapuakina ʼi te faʼahi fakalaumālie.

ʼE koutou lava kau koa ki te pilivilesio ʼaē ko te fai faka mafola ʼi he tahi fenua? Kapau ʼe feala hakotou fai te faʼahi ʼaia, pea he koʼe ʼe mole koutou fai te faʼahi ʼaia? Ko te ʼuluaki meʼa ʼaē ʼe tonu ke koutou fai pea ʼe maʼuhiga te faʼahi ʼaia, koutou faitohi ki te filiale ʼo te koga meʼa ʼaē ʼe koutou fia ʼolo ʼo gāue ai. Ko te ʼu tokoni lelei ʼaē ka nātou foaki atu anai, ʼe tokoni atu anai ke koutou fakakaukauʼi te ʼu meʼa ʼe feala ke koutou fai ke fua lelei kia koutou. Pea tahi ʼaē meʼa, ʼe feala ke koutou maʼu he tahi ʼu tokoni ʼi te alatike “Sors de ton pays et de ta parenté,” ʼi Te Tule Leʼo Fakafalani ʼo te ʼaho 15 ʼo ʼAukusito 1988. Kapau ʼe koutou fai he ʼu fakatuʼutuʼu lelei ʼaki te tokoni ʼa Sehova, ʼe feala anai ke koutou ʼiloʼi mo koutou te fiafia ʼi te fai faka mafola ʼi he tahi fenua.

[Paki ʼo te pasina 24]

KO TOM MO LINDA ʼI TE KIʼI ALA ʼE FAKAAʼU KI TE KOLO INITIA, KO SHUAR

[Paki ʼo te pasina 25]

TOKOLAHI ʼE NĀTOU FAI FAKA MAFOLA ʼI QUITO, TE KOLO MUʼA ʼO ÉQUATEUR

[Paki ʼo te pasina 25]

ʼE FAKA MAFOLA IA MAKIKO ʼI TE ʼU MOʼUGA ʼO TE ʼU ANDES

[Paki ʼo te pasina 26]

KUA TAʼU NIMA TE FAKA MAFOLA ʼA TE FAMILI HILBIG ʼI ÉQUATEUR