Te Meʼa Makehe Maʼa Te Hahaʼi ʼAē ʼe Manako Ki Te Folafola ʼa Te ʼAtua

ʼI te taʼu 1998 neʼe hoko te meʼa makehe ki te hahaʼi fuli ʼaē ʼe manako ki te Folafola ʼa te ʼAtua. ʼI te taʼu ʼaia, neʼe tā te lauʼi teau miliona tohi ʼo te Tohi-Tapu “Les Saintes Écritures — Traduction du monde nouveau.” Kua kau leva te Tohi-Tapu ʼaia ʼi te ʼu Tohi-Tapu ʼaē ʼe lahi tokotahi tonatou tufa ʼi te malamanei ʼi te sēkulō ʼaenī!

ʼE KO he meʼa fakaofoofo ʼaia he neʼe valokiʼi te Tohi-Tapu ʼaia ʼi tona ʼuluaki tā. Kae neʼe ina lavaʼi te ʼu valoki ʼaia pea neʼe tuputupu tona leleiʼia ʼo hū ki te ʼu lauʼi miliona ʼapi​—pea mo malave ki te ʼu lauʼi miliona loto​—ʼi te malamanei katoa! Koteā te haʼuʼaga ʼo te fakaliliu makehe ʼaia? Ko ai ʼaē neʼe ina fai? Pea koteā anai tona ʼu fua lelei kia koutou kapau ʼe koutou fakaʼaogaʼi?

He Koʼe Neʼe Fai He Fakaliliu Foʼou?

Talu mai taʼu e teau tupu, ʼe tufa te ʼu Tohi-Tapu e te Watch Tower Bible and Tract Society, te fakafofoga ʼo te kau Fakamoʼoni ʼa Sehova ʼi te lao. Kae he koʼe koa neʼe nātou manatu ʼe ʼaoga ke fai he tahi fakaliliu ʼo te Folafola ʼa te ʼAtua? E ʼui fēnei ʼi te tohi So Many Versions?, ʼaē neʼe fai e Sakae Kubo pea mo Walter Specht: “ ʼE mole feala ke kita ʼui kua ʼosi te fakaliliu ʼo te Tohi-Tapu. Ko te ʼu fakaliliu ʼe tonu ke ʼalutahi mo te ʼu meʼa foʼou ʼaē kua ʼiloʼi ʼo ʼuhiga mo te Tohi-Tapu pea mo te ʼu fetogi ʼo te ʼu lea.”

ʼI te sēkulō ʼaenī kua lelei age te mahino ki te faka Hepeleo, mo te faka Keleka pea mo te faka Alamea​—te ʼu ʼuluaki lea ʼaē neʼe tohi ʼaki te Tohi-Tapu. Tahi ʼaē meʼa, neʼe maʼu he ʼu tohi ʼāfea ʼo te Tohi-Tapu, pea ʼe lelei age ʼi te ʼu tohi ʼaē neʼe fakaʼaogaʼi ki muʼa atu e te tokolahi ʼo te kau fakaliliu Tohi-Tapu. Koia ʼi te temi nei ʼe feala ke fai he ʼu fakaliliu Tohi-Tapu ʼe lelei age ʼi te ʼu fakaliliu ʼāfea! Ko te tupuʼaga la ʼaia ʼaē neʼe faʼu ai te Komite Fakaliliu ʼo te Tohi-Tapu Traduction du monde nouveau, ke ina fai he fakaliliu ʼaki te ʼu faʼahiga lea ʼo totatou temi.

ʼI te taʼu 1950 neʼe tā te fakaliliu Fakapilitānia Les Écritures grecques chrétiennes — Traduction du monde nouveau. Ko tona kupu tāfito ʼaia neʼe ko he fakafisi ʼaki he lototoʼa ki te talatisio ʼaē neʼe ina ʼui, ko te Tohi-Tapu ʼe faʼufaʼu e te “Tauhi ʼĀfea” pea mo te “Tauhi Foʼou.” ʼI te ʼu taʼu e hogofulu neʼe hoa kiai, neʼe tā he ʼu koga ʼo te ʼu Tohi Faka Hepeleo. ʼI te taʼu 1961, neʼe tā Fakapilitānia te Tohi-Tapu katoa ko he foʼi tohi pe e tahi.

Ko ai ʼaē neʼe ina fakaliliu te Tohi-Tapu fakaofoofo ʼaia? Neʼe ʼui fēnei e Te Tule Leʼo ʼo te ʼaho 15 ʼo Sanualio 1951: “Neʼe ʼui e te ʼu tagata ʼaē ʼe nātou faʼufaʼu te komite fakaliliu ʼe mole nātou loto . . . ke fakahā tonatou higoa ʼi tanatou kei maʼuli pea mokā nātou mamate anai. Ko te fakatuʼutuʼu ʼo te fakaliliu ʼaia ʼe ko te fakavikiviki ki te huafa ʼo te ʼAtua moʼoni mo maʼuli.” Ko ʼihi hahaʼi neʼe nātou ʼui ʼe tonu ke līaki te gāue ʼaia he neʼe mole fai e he ʼu hahaʼi faiva, kae neʼe mole fefeka feiā te manatu ʼa te hahaʼi fuli. Neʼe tohi fēnei e Alan S. Duthie: “Kapau ʼe tou ʼiloʼi pe ko ai te kau fakaliliu, pe ko te hahaʼi ʼaē ʼe nātou tā te Tohi-Tapu, pea ʼe tokoni mai koa te faʼahi ʼaia ke tou ʼui peʼe lelei te fakaliliu peʼe kovi? Kailoa, ʼe mole feʼauga. ʼE tonu ke tou vakaʼi te ʼu agaaga ʼo te ʼu fakaliliu fuli.”a

Tona ʼu Agaaga Makehe

Ko te kau lautohi ʼe lauʼi miliona neʼe nātou fai te faʼahi ʼaia pea neʼe mahino kia nātou ʼe faigafua age te lau ʼo te Traduction du monde nouveau pea ʼe totonu ʼaupito. Neʼe gāue te kau fakaliliu ʼaki te ʼu lea ʼāfea, te faka Hepeleo, mo te faka Alamea pea mo te faka Keleka, ʼo nātou fakaʼaogaʼi te ʼu tohi ʼaē ʼe lelei ʼaupito.b Neʼe nātou tokaga ʼaupito ke mulimuli te fakaliliu ki te faʼahiga palalau ʼāfea, kae ke mahino gafua. Neʼe vikiʼi e ʼihi hahaʼi popoto te fakaliliu ʼaia heʼe ʼalutahi mo te ʼu ʼuluaki tohi pea ʼe totonu. Ohage la, neʼe ʼui fēnei e te nusipepa Andover Newton Quarterly ʼo Sanualio 1963: “ ʼE hā lelei ʼaki te fakaliliu ʼo te Tauhi Foʼou, ʼe ʼi ai he ʼu hahaʼi popoto ʼi tonatou kautahi pea ʼe nātou faiva ʼi te fakaliliu ʼo te Tohi-Tapu.”

Neʼe fakafoʼou e te kau fakaliliu ʼaia te mahino ki te Tohi-Tapu. Kua feala ke tou mahino lelei ki te ʼu vaega Tohi-Tapu ʼaē neʼe mole tou faʼa mahino kiai. Ohage la, neʼe fakapunamaʼuli te ʼuluaki fakaliliu ʼaenī ʼo Mateo 5⁠:​3, “Manuia te hahai e masiva i onatou loto,” pea neʼe lelei age tona fakaliliu fēnei “Manuʼia ia nātou ʼaē ʼe nātou ʼiloʼi tonatou masiva fakalaumālie.” ʼI te Traduction du monde nouveau katoa, ʼe tatau tuʼumaʼu te fakaliliu ʼo te ʼu kupu tāfito. Ohage la ko te kupu faka Keleka psy·kheʹ, neʼe fakaliliu tuʼumaʼu ʼaki te kupu “nefesi.” Koia, ʼe mahino vave ki te kau lautohi, ʼe mole maʼuli tuputupua te nefesi, ohage ko tona ʼui e te ʼu akonaki ʼa te ʼu lotu!​—Mateo 2:​20; Maleko 3:4; Luka 6:9; 17:33.

Te Toe Fakatuʼu ʼo Te Huafa ʼo Te ʼAtua

Ko he agaaga makehe ʼo te Traduction du monde nouveau ʼe ko te toe fakatuʼu ai ʼo te huafa ʼo te ʼAtua, ko Sehova. ʼI te ʼu tohi ʼāfea ʼo te Tohi-Tapu faka Hepeleo, neʼe tuʼu ai te huafa ʼo te ʼAtua ʼaki te ʼu mataʼi tohi e fā YHWH peʼe ko JHVH. Ko te huafa ʼaia ʼe tuʼa 7 000 tona tuʼu ʼi te koga Tohi-Tapu ʼaē ʼe higoa ko te Tauhi ʼĀfea. (Ekesote 3:​15; Pesalemo 83:18) ʼE mahino ia, neʼe loto totatou Tupuʼaga ke ʼiloʼi e tana kau atolasio tona huafa pea ke nātou fakaʼaogaʼi!

Kae ʼuhi ko tanatou mataku fakavale, neʼe mole toe fakaʼaogaʼi e te hahaʼi Sutea te huafa fakaʼatua. ʼI te ʼosi mate ʼa te kau ʼapositolo ʼa Sesu, ko te ʼu tagata ʼaē neʼe nātou hiki te ʼu Tohi Faka Keleka neʼe nātou kamata fetogi te huafa ʼo te ʼAtua ʼaki te ʼu kupu faka Keleka Kyʹri·os (ʼAliki) peʼe ko te kupu The·osʹ (ʼAtua). Meʼa fakaʼofaʼofa foki, he ko te kau fakaliliu ʼo totatou temi ʼe nātou hoko atu te talatisio ʼaia ʼaē ʼe ina fakalainoaʼi te ʼAtua, ʼo nātou molehi te huafa ʼo te ʼAtua pea mo nātou fufū ki te hahaʼi ʼe ʼi ai te huafa ʼo te ʼAtua. Ohage la, ia Soane 17⁠:​6, ʼe tou maʼu ai te ʼu palalau ʼaenī ʼa Sesu: “Neʼe ʼau fakaʼilo tou huafa.” Kae ʼe ʼui fēnei e te fakaliliu Today’s English Version: “Neʼe ʼau fakaʼilo ia koe.”

ʼE lagolago ʼihi hahaʼi popoto ki te molehi ʼo te huafa fakaʼatua ʼi te Tohi-Tapu, heʼe nātou ʼui ʼe mole ʼiloʼi tona puʼaki totonu. Kae ko te ʼu fakaliliu māhani ʼo te ʼu higoa ʼaē ʼe tuʼu ʼi te Tohi-Tapu ohage ko Selemia, mo Isaia pea mo Sesu, ʼe mole tatau mo te puʼaki moʼoni ʼo te ʼu higoa faka Hepeleo. Mai tona ʼuhiga ʼaē, ʼe totonu te fakaliliu ʼo te huafa ʼo te ʼAtua ʼaki te huafa ko Sehova​—pea kua māhani kiai te tokolahi​—koia ko te ʼu fakafeagai ʼe fai kiai ʼe mole honatou ʼuhiga.

Neʼe ko he lototoʼa ʼa te Komite Fakaliliu ʼo te Traduction du monde nouveau tana fakaʼaogaʼi te huafa Sehova ʼi te ʼu Tohi Faka Hepeleo pea mo te ʼu Tohi Faka Keleka ʼo te Tohi-Tapu. Neʼe kua fai te faʼahi ʼaia e te kau misionea ʼaē neʼe nātou fakaliliu te Tohi-Tapu maʼa te hahaʼi ʼo Amérique centrale, mo te Pasifika Saute pea mo te ʼu fenua ʼo te Potu Hahake. Kae ko te fakaʼaogaʼi ʼo te huafa ʼo te ʼAtua ʼe mole ko he meʼa ʼe maʼuhiga pe ʼi te faʼahi ʼo te sivi lea. Kae ʼe toe maʼuhiga foki ke tou ʼiloʼi ia ia. (Ekesote 34:​6, 7) Ko te Traduction du monde nouveau neʼe ina uga te kau lautohi ʼe lauʼi miliona ke nātou fakaʼaogaʼi tona huafa!

Te ʼu Fakaliliu Ki Te Hahaʼi ʼe Mole Lea Fakapilitānia

Mai te taʼu 1963 ʼo aʼu ki te taʼu 1989, neʼe fai he ʼu fakaliliu fakakoga peʼe katoa ʼo te Traduction du monde nouveau ia lea e hogofulu. Kae neʼe ko he gāue faigataʼa pea neʼe fai ʼihi fakaliliu ia taʼu e 20 peʼe laka age. Pea ʼi te taʼu 1989, neʼe fakatuʼu te Selevisi ʼo te Fakaliliu ʼi te pilō faka malamanei ʼo te kau Fakamoʼoni ʼa Sehova. ʼI te takitaki ʼo te Komite Faitohi ʼo te Kolesi Pule, neʼe faʼu te selevisi ʼaia ke vave ai te fakaliliu ʼo te Tohi-Tapu. Neʼe fakatuʼutuʼu he faʼahiga fakaliliu ʼe fakaʼaogaʼi ai he ʼu ako ʼo te ʼu kupu faka Tohi-Tapu pea mo te fakaʼaogaʼi ʼo te ʼu olotinatea. ʼO feafeaʼi?

Ka tali e te Komite Faitohi ke fakaliliu te Tohi-Tapu ʼi he lea foʼou, pea ina hinoʼi leva he kau Kilisitiano kua foaki tonatou maʼuli ki te ʼAtua ke nātou faʼufaʼu he kūtuga fakaliliu. Ka gāue fakatahi he kūtuga, pea ʼe maʼu ai he ʼu fakaliliu ʼe lelei age ʼi te gāue ʼa he tokotahi. (Fakatatau mo Tāʼaga Lea 11:14.) ʼI te agamāhani, ko te kau fakaliliu fuli ʼaia kua nātou popoto ʼi te fakaliliu ʼo te ʼu tohi ʼo te Sosiete. Pea ʼe akoʼi fakalelei age kia nātou te ʼu pelesepeto ʼo te fakaliliu ʼo te Tohi-Tapu, pea mo te fakaʼaogaʼi ʼo te ʼu polokalama olotinatea ki te fakaliliu. ʼI tona fakahagatonu, ʼe mole ko te olotinatea ʼaē ʼe ina fai te fakaliliu, kae ʼe ko he tokoni lelei ki te kau fakaliliu, heʼe feala ai ke nātou fai he ʼu kumi pea mo nātou taupau ai te ʼu tonu ʼaē neʼe nātou fai.

Ko koga e lua ʼi te fakaliliu ʼo te Tohi-Tapu. ʼUluaki, ʼe foaki ki te kau fakaliliu he lisi ʼo te ʼu kupu pea mo te ʼu kupuʼi palalau ʼaē ʼe fakaʼaogaʼi e te Traduction du monde nouveau Fakapilitānia. ʼE tānaki te ʼu kupu Fakapilitānia ʼaē ʼe teitei tatau tonatou faka ʼuhiga, ohage la ko te ʼu kupu “faifakalelei” pea mo “faitotogi,” ke fakatokagaʼi e te kau fakaliliu te ʼu kiʼi kehekehe ʼo te ʼu kupu ʼaia. Pea ʼe nātou fai he lisi ʼo te ʼu kupu ʼaia ʼi te lea ʼaē ʼe nātou fakaliliu. Kae ʼi ʼihi temi ʼe feala ke faigataʼa te fakaliliu ʼo he vaega. ʼE fakahā e te polokalama olotinatea kia ia ʼaē ʼe fai fakaliliu, ia te ʼu fakamahino ʼo ʼuhiga mo te ʼu kupu faka Keleka pea mo te ʼu kupu faka Hepeleo, pea ʼe feala ke ina fai he ʼu kumi ʼi te ʼu tohi ʼo te Sosiete Watch Tower.

Lua, ko te polokalama olotinatea ʼe ina ʼai ki te Tohi-Tapu te ʼu kupu ʼaē neʼe filifili ʼi te lea ʼaē ʼe fakaliliu. ʼE feala ai ke totonu te fakaliliu pea ke tatau tuʼumaʼu te ʼu kupu ʼaē ʼe fakaʼaogaʼi. Kae ko te fakaliliu ʼaē ʼe fai ʼaki te polokalama “kumi mo fetogi,” ʼe teitei ke kita mahino gataʼa kiai. ʼE tonu ke toe gāueʼi te fakaliliu ʼaia, moʼo fetogi te ʼu faʼahiga palalau ʼo te ʼu vaega ke feala hakita mahino gafua kiai.

Kae ʼe haʼele lelei te faʼahiga fakaliliu ʼaia. Neʼe lavaʼi e te kūtuga fakaliliu te fai ʼo te ʼu Tohi Faka Keleka ia taʼu pe e lua. Kae ko te taʼi gāue ʼaia, neʼe taʼu 16 tona fai e he kau fakaliliu neʼe mole hanatou olotinatea. Talu mai te taʼu 1989, neʼe fai he tahi ʼu fakaliliu e 18 ʼo te ʼu Tohi Faka Keleka. ʼE feala ke maʼu fakakoga peʼe maʼu katoa, te fakaliliu ʼo te Traduction du monde nouveau ia lea e 34. Koia ko te toko 80 ʼi te teau ʼo te kau Fakamoʼoni ʼa Sehova, ʼe nātou maʼu te ʼu Tohi Faka Keleka Faka Kilisitiano ʼi tonatou lea.

ʼE fakahā mai e te ʼu Sosiete United Bible ʼe maʼu te ʼu koga ʼo te Tohi-Tapu ia lea e 2 212 ʼi te ʼu lea e 6 500 ʼo te malamanei.c ʼE gāue he kau fakaliliu ʼe toko 100 moʼo fai te Traduction du monde nouveau ʼo te ʼu Tohi Faka Hepeleo ʼi te ʼu lea e 11 pea mo te ʼu Tohi Faka Keleka ʼi te ʼu lea e 8. Ko te finegalo ʼo te ʼAtua, “ke fakamauli te tagata fuape, pea ke natou kaku ki te iloi o te mooni.” (1 Timoteo 2:4) ʼE mahino papau ia, ʼe toe maʼuhiga anai te gāue ʼa te Traduction du monde nouveau ʼi te faʼahi ʼaia.

Koia ʼe mātou fiafia he neʼe mātou lava fai te ʼu tohi e teau miliona ʼo te fakaliliu ʼaia, pea ʼe mātou faikole ke toe fai he ʼu lauʼi miliona tohi feiā ʼi te ka haʼu. ʼE mātou fakaloto mālohiʼi koutou ke koutou vakaʼi mo koutou totonu. ʼE koutou leleiʼia anai te tahi ʼu agaaga lelei ohage ko te matalelei ʼo te faitohi, mo te tohi ʼo te ʼu kupu tāfito ʼi te kamata ʼo te ʼu pasina, mo te index ʼaē ʼe feala ke tokoni atu ke koutou maʼu gafua te ʼu vaega ʼaē ʼe koutou ʼiloʼi lelei, mo te ʼu mape pea mo te appendice. Ko te meʼa ʼaē ʼe maʼuhiga tāfito, heʼe feala hakotou lau te Tohi-Tapu ʼaia pea ke koutou falala ʼe tuʼu ai te ʼu folafola moʼoni ʼa te ʼAtua ʼaē neʼe fakaliliu ʼi tokotou lea.

[Nota ʼi te lalo pasina]

[Talanoa ʼo te pasina 29]

“Ko te fakaliliu ʼo te Tauhi Foʼou ʼe ko he fakamoʼoni ʼaia ʼe ʼi ai he ʼu hahaʼi popoto ʼi tonatou kautahi, pea ʼe nātou faiva ʼi te fakaliliu ʼo te Tohi-Tapu.”—ANDOVER NEWTON QUARTERLY, SANUALIO 1963

[Talanoa ʼo te pasina 30]

“Ko te ʼu fakaliliu ʼe tonu ke ʼalutahi mo te ʼu meʼa foʼou ʼaē kua mālama kiai ʼo ʼuhiga mo te Tohi-Tapu pea mo te ʼu fetogi ʼo te ʼu lea”

[Talanoa ʼo te pasina 31]

ʼE VIKIʼI TE TRADUCTION DU MONDE NOUVEAU

ʼO ʼUHIGA mo te tohi Les Écritures grecques chrétiennes — Traduction du monde nouveau, ko Edgar J. Goodspeed, ko te tagata fakaliliu ʼo te “Tauhi Foʼou” Faka Keleka ʼo te Tohi-Tapu An American Translation, neʼe ina fai te tohi ʼaenī ʼi te ʼaho 8 ʼo Tesepeli 1950: “ ʼE ʼau fia ʼiloʼi te gāue misionea ʼaē ʼe fakahoko e takotou hahaʼi pea mo tona mafola ʼi te malamanei katoa, pea ʼe ʼau leleiʼia ʼaupito te fakaliliu fakahagatonu pea mo mālohi ʼaē neʼe koutou fai. ʼE ʼau fakamoʼoni ki te ʼu kumi lalahi neʼe fai ai.”

Neʼe tohi fēnei e Alexander Thomson, te tagata sivi ʼo te faka Hepeleo pea mo te faka Keleka: “ ʼE hā lelei ʼe ko te ʼu hahaʼi popoto mo faiva ʼaē neʼe nātou fai te fakaliliu ʼaia, pea neʼe nātou faigaʼi ke nātou fakahā te ʼuhiga moʼoni ʼo te lea faka Keleka ʼo mulimuli ki te ʼu fealagia ʼo te Fakapilitānia.”​—The Differentiator, ʼApelili 1952, pasina 52 ki te 57.

ʼI te taʼu 1989, neʼe ʼui e te polofesea ko Benjamin Kedar, ko te tagata ʼe ina sivi te faka Hepeleo ʼi Iselaele: “ ʼI taku ʼu kumi ʼo ʼuhiga mo te lea, mo te Tohi-Tapu Faka Hepeleo pea mo te ʼu fakaliliu, ʼe ʼau tau fakaʼaogaʼi te tohi Fakapilitānia ʼaē ʼe higoa ko te Traduction du monde nouveau. ʼI taku fai te faʼahi ʼaia, ʼe ʼau sio tuʼumaʼu ko te tohi ʼaia ʼe ko he faiga fakamalotoloto ke fakahā te mahino totonu ki te [Tohi-Tapu].”