Koutou Katoa Pea Mo Koutou Tui Mālohi

Ko Te Tohi-Tapu Traduction du monde nouveau—ʼE Leleiʼia e Te Lauʼi Miliona Hahaʼi ʼi Te Malamanei

KO TAʼU e 12, mo māhina e 3 pea mo ʼaho e 11 neʼe fai ai te toe gāue kinakina ʼaia. Kae ʼi te ʼaho 13 ʼo Malesio 1960, neʼe ʼosi katoa ai te fakaliliu ʼo te Tohi-Tapu foʼou. Neʼe fakahigoaʼi te Tohi-Tapu ʼaia ko te Les Saintes Écritures—Traduction du monde nouveau.

Hili kiai te taʼu katoa, pea tā e te kau Fakamoʼoni ʼa Sehova te Tohi-Tapu katoa ʼaia. ʼI te 1961, ko Tohi-Tapu e tahi miliona neʼe tā. Ia ʼaho nei, kua fakalaka tona tā ʼi te teau miliona, pea ko te Tohi-Tapu ʼaia ʼe lahi ʼaupito tona tufa ʼi te malamanei. Kae koteā ʼaē neʼe ina uga te kau Fakamoʼoni ke nātou fakaliliu te Tohi-Tapu ʼaia?

He Koʼe Neʼe Nātou Fai He Tohi-Tapu Foʼou?

Moʼo fakamahino pea mo tala te logo ʼo te Tohi-Tapu, neʼe fakaʼaogaʼi fualoa e te kau Fakamoʼoni ʼa Sehova te ʼatu ʼu Tohi-Tapu kehekehe. Kae neʼe fakamuʼamuʼa e te ʼu Tohi-Tapu fuli ʼaia tanatou ʼu manatu, he neʼe nātou mulimuli ki te ʼu talatisio faka lotu pea mo te ʼu akonaki ʼa te Keletiate. (Mateo 15:6) Koia neʼe mahino ai ki te kau Fakamoʼoni ʼa Sehova ʼe tonu ke nātou fakaliliu fakalelei te Tohi-Tapu moʼo fakahā te ʼu manatu ʼaē ʼe haʼu mai te ʼAtua.

Neʼe kamata te gāue ʼaia ʼi te māhina ʼo ʼOketopeli 1946 ʼi te fakaʼui e Nathan H. Knorr, ko te tēhina neʼe kau ki te Kolesi Pule ʼa te kau Fakamoʼoni ʼa Sehova, ke fai he fakaliliu foʼou ʼo te Tohi-Tapu. ʼI te ʼaho 2 ʼo Tesepeli 1947, neʼe fakatuʼutuʼu e te Komite Fakaliliu ʼo te Traduction du monde nouveau ke nātou fakaliliu te Tohi-Tapu ʼo mulimuli fakalelei ki te ʼu tohi ʼāfea, ke nātou fakaʼaogaʼi te ʼu pepa foʼou neʼe maʼu e te hahaʼi fai Tohi-Tapu, pea mo nātou fakaliliu te Tohi-Tapu ʼaia ki he lea ʼe faigafua anai tona lau.

ʼI te tā ʼo te ʼuluaki koga ʼo te Tohi-Tapu ʼaia—Les Écritures grecques chrétiennes—Traduction du monde nouveau—neʼe hā lelei ʼi te taʼu 1950 neʼe hoko katoa te fakatuʼutuʼu ʼa te ʼu tēhina fakaliliu. Neʼe nātou fakaliliu te ʼu koga ʼo te Tohi-Tapu ʼaē neʼe mole tou faʼa mahino lelei kiai ke kita mahino lelei kiai. Ohage la, koutou fakatokagaʼi te faigataʼa ʼo te koga tohi ʼo Mateo 5:3: “Manuʼia ia nātou ʼe māsisiva ʼi te laumālie.” (King James Version) Pea neʼe fakaliliu fēnei leva (MN ): “Manuʼia ia nātou ʼaē ʼe nātou ʼiloʼi tonatou masiva fakalaumālie.” Ko te tokoni ʼa Paulo ʼaē ʼe ina ʼui fēnei “ ʼAua naʼa koutou tokagaʼi he meʼa” (King James Version) neʼe fakaliliu fēnei “ ʼAua naʼa koutou tuʼania ki he meʼa.” (Filipe 4:6, MN ) Pea ko te talanoa ʼa te ʼapositolo ko Soane ki te “mānumānu ʼo te kakano” (ʼi te Tohi-Tapu Douay) ʼe tou lau fēnei, “holi ʼo te kakano.” (1 Soane 2:16) ʼE hā ʼaki ai, neʼe faka faigafua e te Traduction du monde nouveau ia te lau ʼo te Tohi-Tapu.

Neʼe ōfo te ʼu hahaʼi fai Tohi-Tapu. Ohage la ko te tagata fai Tohi-Tapu Pilitania ko Alexander Thomson, neʼe ina ʼui neʼe fakaliliu fakalelei e te Traduction du monde nouveau te lea faka Keleka. Tou toʼo he faʼifaʼitaki: ʼE ʼui fēnei ia Efeso 5:25, MN: “ ʼU tagata ʼohoana, ke koutou haga ʼofa ki ʼokotou ʼohoana” kae ki te Tohi-Tapu King James Version, ʼe ʼui fēnei ai: “ ʼU ʼohoana, koutou ʼofa ki ʼokotou ʼohoana.” Neʼe ʼui fēnei e Thomson ʼo ʼuhiga mo te Traduction du monde nouveau: “ ʼE mole maʼu ʼi he tahi age Tohi-Tapu te fakaliliu fakalelei ʼaenī ʼo te lea faka Keleka, heʼe katoa ai ia meʼa fuli.”

Ko te tahi meʼa maʼuhiga ʼi te Traduction du monde nouveau ko tana fakaʼaogaʼi ia te huafa ʼo te ʼAtua ko Sehova, ʼi te ʼu Tohi Faka Hepeleo pea mo te ʼu Tohi Faka Keleka. Kapau ʼe tuʼa 7 000 te fakaʼaogaʼi ʼo te huafa faka Hepeleo ʼo te ʼAtua ʼi te Tauhi ʼĀfea, pea ʼe mahino ia, ʼe loto e totatou Tupuʼaga ke fakaʼaogaʼi tona huafa e tana kau atolasio pea ke nātou mahino ko te ʼAtua maʼuli. (Ekesote 34:6, 7) Neʼe tokoni te Traduction du monde nouveau ki te toko lauʼi miliona hahaʼi ke nātou fai te faʼahi ʼaia.

Neʼe Fakaliliu Te Traduction du monde nouveau Ki Te ʼu Lea Kehekehe

Talu tona tā ʼi te lea faka Pilitania, kua loto te kau Fakamoʼoni ʼa Sehova ʼo te malamanei ke tā te Traduction du monde nouveau ki tanatou lea—pea ʼe ʼi ai tona tupuʼaga tāfito. ʼI ʼihi fenua neʼe faigataʼa te maʼu ʼo he ʼu Tohi-Tapu ʼi te lea ʼo te fenua, ʼuhi ko te hahaʼi ʼo te ʼu Sosiete Fai Tohi-Tapu ʼaē neʼe nātou tufa te ʼu Tohi-Tapu, neʼe mole nātou leleiʼia te ʼōmai ʼa te kau Fakamoʼoni ʼa Sehova ʼo toʼo tanatou ʼu Tohi-Tapu. Tahi ʼaē meʼa, ʼe mole fakahā lelei e te ʼu Tohi-Tapu ʼaia te ʼu akonaki maʼuhiga. Ohage la ko te Tohi-Tapu ʼi te lea ʼo te potu saute ʼo Eulopa, neʼe mole tuʼu ai te huafa ʼo te ʼAtua, kae neʼe ina fetogi te ʼu palalau ʼaenī ʼa Sesu “Ke tāpuhā tou huafa, MN” ʼaki te ʼu palalau ʼaenī “Ke faka maʼuhigaʼi koe e te hahaʼi.”—Mateo 6:9.

ʼI te 1961, neʼe kamata fakaliliu e te ʼu tēhina te ʼu koga tohi faka Pilitania ʼo te Traduction du monde nouveau ki te tahi ʼu lea. Hili pe kiai taʼu e lua, pea ʼosi te fakaliliu ʼo te Les Écritures grecques chrétiennes—Traduction du monde nouveau ki te tahi ʼu lea e ono. Koia ko te toko 3 ʼi te toko 4 ʼo te kau Fakamoʼoni ʼi te malamanei neʼe nātou lava lau te Tohi-Tapu ʼi tanatou lea. Kae neʼe kei toe te gāue lahi, he neʼe tonu ke hoko atu te fakaliliu ʼo te ʼu tohi faka Keleka ʼaia, pea ke fakatoʼo e te kau Fakamoʼoni ʼa Sehova te ʼu tohi ʼaia ki te toko miliona hahaʼi.

Neʼe lava hoko te fakatuʼutuʼu ʼaia ʼi te 1989 he neʼe fakatuʼu te Selevisi ʼo te Fakaliliu ʼi te ʼu pilō lalahi ʼa te kau Fakamoʼoni ʼa Sehova. Neʼe fakatuʼutuʼu e te selevisi ʼaia te faʼahiga fakaliliu ʼe fakaʼaogaʼi ai he ʼu ako ʼo te ʼu kupu faka Tohi-Tapu pea mo te fakaʼaogaʼi ʼo te ʼu olotinatea. ʼI te fakaʼaogaʼi ʼo te faʼahiga fai ʼaia, neʼe fakaliliu ai leva te ʼu Tohi Faka Keleka Faka Kilisitiano ki te tahi ʼu lea ʼi te taʼu katoa, pea ko taʼu e lua moʼo fakaliliu te ʼu Tohi Faka Hepeleo—ʼo siʼisiʼi ʼosi te temi ʼaē neʼe tonu ke fakaʼaogaʼi ki he fakaliliu ʼo te Tohi-Tapu. ʼI te fakahoko ʼo te faʼahiga fakaliliu ʼaia, ko tohi e 29 ʼo te Traduction du monde nouveau neʼe fakaliliu mai te lea Fakapilitānia, pea neʼe tā ki te ʼu lea ʼe popoto ai te hahaʼi e lua miliale tupu. Kua toe fakaliliu te Tohi-Tapu ki te tahi ʼu lea e 12. ʼO aʼu mai ki te ʼaho nei, neʼe fakaliliu fakakoga peʼe katoa Les Saintes Écritures—Traduction du monde nouveau ki te tahi ʼu lea e 41.

Kua hili nei kiai taʼu e 50 talu te tā ʼo te ʼuluaki koga ʼo te Les Saintes Écritures—Traduction du monde nouveau ʼi te ʼaho 3 ʼo ʼAukusito 1950, ʼi te Fakatahi Lahi ʼo ʼUhiga Mo Te Tuputupu Faka Teokalatike ʼi New York. ʼI te fakatahi ʼaia neʼe fakaloto mālohiʼi fēnei e Nathan H. Knorr ia nātou: “Koutou toʼo te Tohi-Tapu ʼaia. Koutou lau katoa. Koutou ako heʼe tokoni atu anai kia koutou moʼo fakamāsila takotou mahino ki te Folafola ʼa te ʼAtua. Koutou tufa ki te hahaʼi.” ʼE mātou fakaloto mālohiʼi koutou ke koutou lau te Tohi-Tapu ʼi te ʼaho fuli, heʼe tokoni atu anai “ke koutou katoa pea mo koutou tui mālohi ʼo ʼuhiga mo te finegalo katoa ʼo te ʼAtua.”—Kolose 4:12, MN.

[Talanoa ʼo te pasina 8, 9]

“Te Tā ʼo Te Tohi-Tapu Traduction du monde nouveau”

Neʼe ʼuluaki tā te Tohi-Tapu ʼo te Traduction du monde nouveau ʼi te lea Fakapilitānia, pea ʼi te temi nei kua maʼu katoa peʼe faka koga ʼi te tahi ʼu lea e 41

1950 1

1960-69 6 5

1970-79 4 2

1980-89 2 2

1990 mo te temi nei 29 19