Ke ʼAua Naʼa Liliu Tokotou Mālohi Ko Hokotou Vaivaiʼaga
Neʼe ʼui ʼo ʼuhiga mo te foʼi vaka matalelei ko te Titanic, ʼe mole feala ke moū, he neʼe ʼi ai te ʼu koga e 16 ʼo te sinoʼi vaka neʼe mole feala ke ulu ai te vai. Kae ʼi tana ʼuluaki folau ʼi te taʼu 1912, neʼe ko te vaelua pe ʼo te ʼu vakapā ʼaē neʼe ʼave. Neʼe ʼī te vaka ki te foʼi maka ʼaisi pea neʼe moū ai, pea mamate ai te toko 1 500.
KO TE Hau ʼo te Selusalemi ʼāfea ko Osiasi ʼaē neʼe manavasiʼi ki te ʼAtua, neʼe ko he kamutoa faiva ʼi te takitaki ʼo te ʼu kautau. ʼAki te tokoni ʼa Sehova, neʼe mālo ʼi tona ʼu fili fuli. “Pea neʼe mafola mamaʼo tona logona [ʼa Osiasi], he neʼe fai age he lagolago lelei kia ia ʼo aʼu ki tana liliu ʼo mālohi.” Kae “neʼe liliu tona loto ʼo fialahi . . . pea neʼe mole nofo agatonu kia Sehova tona ʼAtua.” ʼUhi ko te fialahi ʼa Osiasi, neʼe ina maʼu ai te kilia.—2 Fakamatala 26:15-21; Tāʼaga Lea 16:18.
ʼE tou ako mai te ʼu fakamatala ʼaia e lua, ko te mālohi ʼaē ʼe mole ʼalutahi mo te poto, mo te agavaivai, pea mo te fia mālalo, ʼe feala ke liliu ko he vaivaiʼaga. ʼE maʼuhiga te faʼahi ʼaia, heʼe ko tatou fuli, ʼe ʼi ai te ʼu faʼahi ʼe tou mālohi ai, peʼe tou maʼu he faʼahiga poto, pea ʼe tou fia fakaʼaogaʼi te ʼu meʼa ʼaia ke tou fiafia ai pea ke fiafia ai mo ʼihi, kae tāfito ki totatou Tupuʼaga. ʼE mahino ia, ʼe tonu ke tou fakaʼaogaʼi fakalelei te ʼu poto ʼaē neʼe foaki mai e te ʼAtua, kae toe maʼua foaki ke tou fakafuafua lelei te poto ʼaia naʼa liliu ko hotatou vaivaiʼaga.
Ohage la ko he tahi ʼe manako ki tana gāue, ʼe feala pe ke liliu te faʼahi ʼaia ko hona vaivaiʼaga, mo kapau ʼe ko te meʼa pe ʼaia e tahi ʼe ina fai ʼi tona maʼuli. Pe ko he tahi ʼe aga fakaʼeteʼete, ʼe moʼoni ʼe mole kākāʼi anai ia ia, kae kapau ʼe lahi fau tana aga fakaʼeteʼete, pea ʼe mole ina lava fai anai he ʼu tonu. Ko te faʼa gāue ʼe ko he kalitate lelei, kae kapau ʼe kita faiga pe ke lahi tuʼumaʼu te gāue, ʼo mole kita tokagaʼi te ʼu tuʼakoi ʼa te tagata, pea ʼe feala ke mole kita felogoi ai mo te kau gāue, pea mo nātou lotomamahi. Koia koutou toʼo he temi moʼo fakakaukauʼi takotou ʼu fealagia. ʼE koutou fakaʼaogaʼi fakapotopoto koa te ʼu fealagia ʼaia? ʼE ko he tapuakina koa ki ʼihi? Kae ko te faʼahi ʼaē ʼe maʼuhiga tāfito, ʼe koutou fakaʼaogaʼi koa moʼo fakavikiviki kia Sehova, te Tupuʼaga ʼo te “meaofa lelei fuape”? (Sakopo 1:17) Moʼo fai te faʼahi ʼaia, tou vakaʼi he ʼu faʼifaʼitaki ʼo ʼuhiga mo he ʼu fealagia ʼe feala ke liliu ko he ʼu vaivaiʼaga pea mo kita tuʼutāmaki ai, mo kapau ʼe mole tou tokakaga lelei kiai.
Koutou Fakaʼaogaʼi Fakapotopoto Takotou ʼu Fealagia Fakakaukau
Ko he tahi ʼe ʼatamai ʼe ko he meʼa lelei. Kae ʼe feala ke liliu ko hakita vaivaiʼaga mo kapau ʼe kita falala fau kia kita totonu, peʼe kita fialahi, pea tāfito mo kapau ʼe vikiʼi kita e te hahaʼi. Peʼe lagi liliu anai takita ako te Tohi-Tapu pea mo te ʼu tohi faka Tohi-Tapu, ko he ako fakaʼatamai pe ia.
Ko te falala fau ʼaē kia kita totonu, ʼe ʼi ai tona ʼu agaaga kehekehe. Ohage la ʼi te kokelekasio, ka avage he akonaki ki he tahi ʼe ʼatamai, lagi ko he akonaki ki te kaugamālie peʼe ko he akonaki ʼi te Ako ʼo Te Minisitelio Faka Teokalatike, pea ʼe lagi hoki ina teuteuʼi anai ʼi te ʼaho tonu ʼaē ka fai ai te fono, pea ʼe mole lagi faikole anai ke tapuakina ia ia e Sehova. Kae ʼe falala ki tona ʼatamai mālama pea mo tona fealagia ʼaē ke ina maʼu vave te ʼu manatu. ʼI te kamata, ʼaki tana fealagia ʼaia, ʼe mole lagi hā anai tana mole teuteuʼi lelei tana akonaki, kae kapau ʼe mole tapuakina katoa e Sehova tana faiakonaki, pea ʼe mole tuputupu lelei anai ʼi te faʼahi fakalaumālie, peʼe lagi gata ʼosi anai te tuputupu ʼaia. ʼE ko he maumau lahi anai ʼo tona kalitate lelei!—Tāʼaga Lea 3:5, 6; Sakopo 3:1.
Ko he tahi ʼe ʼatamai māsila, ʼe lagi ina sivi anai te Tohi-Tapu pea mo te ʼu tohi faka Tohi-Tapu, ʼaki pe tona ʼatamai. Kae ko te ʼatamai mālama ʼaia “e fiameamea,” peʼe ina vikiʼi ia kita totonu; kae ʼe mole ina ‘lagai’ he felogoi faka Kilisitiano. (1 Kolonito 8:1; Kalate 5:26) Ko te tagata ʼaē ʼe ina leleiʼia te ʼu meʼa fakalaumālie, tatau aipe pe koteā tona ʼu fealagia fakakaukau, kae ʼe faikole tuʼumaʼu ke foaki age e te ʼAtua tona laumālie, pea ʼe falala kiai. Ko tana fealagia ʼaia ʼe liliu ko hona kalitate heʼe tuputupu tana ʼofa, mo tana agavaivai, mo tona ʼatamai mālama, pea mo tona poto—pea ʼe fakafuafua lelei te ʼu kalitate fuli ʼaia.—Kolose 1:9, 10.
Ko he kalitate ʼe feala ke liliu ko he vaivaiʼaga mo kapau ʼe tou laupisi kiai, pea ʼe hā ʼaki ai ʼe mole tou agavaivai. Ko te tagata ʼaē ʼe ina maʼu he ʼu fealagia—pea mo nātou fuli ʼaē ʼe lahi fau tanatou fakaʼapaʼapa ki ai—ʼe feala ke galo kia nātou ko Sehova, “ ʼe mole ina sioʼi ia nātou ʼaē ʼe nātou popoto ʼi tonatou loto,” tatau aipe peʼe ʼi ai honatou ʼu faʼahiga fealagia. (Sopo 37:24) ʼE ʼui e te Folafola ʼa te ʼAtua, “ko te poto ʼe maʼu e nātou ʼaē ʼe fiamālalo.” (Tāʼaga Lea 11:2) Ko te ʼapositolo ko Paulo, logola tana poto pea mo te lelei ʼo tana ako, neʼe ina ʼui fēnei ki te kau Kolonito: “Pea mo au, i taku alu atu kia koutou, u tehina, nee mole au alu atu aki te faiva lea mo te poto . . . nee au nofo mo koutou i te vaivai, mo te tuania, pea mo te tete lahi: pea nee mole fakatafito taku lea mo taku akonaki ki te u lea fakaoloolo o te poto, kae nee fakatafito ki he fakaha o te Laumalie mo te malohi, koteuhi ke aua naa fakatafito tautou tui ki te poto o te tagata kae ki te Mafimafi o te Atua.”—1 Kolonito 2:1-5.
Ko ia ʼaē ʼe poto moʼoni, ʼe mole kākāʼi ia e te ʼu manatu ʼa te mālama ʼo ʼuhiga mo te poto, pea mo te faʼahiga sio ʼa te mālama ki te lava lelei ʼo tokita maʼuli. Koia ʼe mole ina fakaʼaogaʼi tona poto ke vikiʼi ia ia e te hahaʼi peʼe maʼu koloā ai, kae ʼe tauhi lelei kia Ia ʼaē neʼe ina foaki age te maʼuli pea mo tona poto. (1 Soane 2:15-17) Moʼo fai te faʼahi ʼaia, ʼe ina fakamuʼamuʼa te ʼu meʼa ʼo te puleʼaga ʼi tona maʼuli, pea ʼe liliu ohage “ko he fuʼu ʼakau ʼe to ōvi ki te ʼu vaitafe.” ʼAki te tapuakina ʼa Sehova, kae mole ʼaki tana poto, “ko meʼa fuli ʼe ina fai ʼe fua anai.”—Pesalemo 1:1-3; Mateo 6:33.
Ko Te Lotu Faka Kilisitiano ʼe Ina Foaki Mai He Tahi ʼu Kalitate
ʼE lahi ʼaupito te ʼu kalitate ʼaē ʼe kita maʼu ʼi te Lotu Faka Kilisitiano, pea ko te ʼu filosofia ʼa te mālama ʼe ko he ʼu meʼa noa mokā fakatatau kiai. Ohage la ko te Lotu Faka Kilisitiano, ʼe ina fakaliliu te ʼu tagata pea mo te ʼu fafine ʼohoana ko he ʼu hahaʼi agalelei, ko he ʼu vāhaʼa fale agalelei, pea ko he kau gāue faiva—ko he hahaʼi ʼe nātou aga fakahagatonu, mo fakaʼapaʼapa, mo tokalelei, pea mo faʼa gāue. (Kolose 3:18-23) Tahi ʼaē meʼa, ko te ako ʼaē ʼe fai ki te kau Kilisitiano ʼo ʼuhiga mo te fai palalau pea mo te faiakonaki, ʼe tokoni kia nātou ke nātou poto ʼi te palalau mo te hahaʼi. (1 Timoteo 4:13-15) Koia ʼe mole punamaʼuli ai te kau Kilisitiano mokā kole age e tonatou patolo ke nātou fakahoko he tahi ʼu gāue pea mo nātou hikihiki tonatou tuʼulaga. Kae ko te ʼu kalitate ʼaia ʼe feala ke fakaʼaogaʼi kovi mo kapau ʼe mole kita tokaga lelei kiai. Kapau ʼe kita tali he tuʼulaga foʼou ʼi tokita matani gāue, pea ʼe lagi tonu anai ke kita fakaʼaogaʼi tokita temi katoa kiai, ʼo kita tō fono tuʼumaʼu, peʼe kita maumauʼi he temi neʼe feala ke kita fakaʼaogaʼi ki tokita famili.
ʼI Ositalalia, neʼe ʼi ai te tāmai ʼe ko te tagata ʼāfea, pea neʼe ko te tagata faifakatau faiva, pea neʼe feala pe ke lahi tana maʼu koloā ʼaki tana gāue ʼaia. Kae neʼe mole fakaʼamu ki te faʼahi ʼaia ʼi te mālama ʼaenī. Neʼe ina ʼui fēnei, “neʼe ʼau fia fakaʼaogaʼi he temi lahi ki toku famili pea mo te minisitelio faka Kilisitiano. Koia neʼe ma fakatuʼutuʼu mo toku ʼohoana ke ʼau fakasiʼisiʼi te temi ʼaē neʼe ʼau fakaʼaogaʼi ki taku gāue.” Pea neʼe ina toe ʼui fēnei, “koteā te ʼuhiga ʼo taku gāue ia ʼaho e nima ʼi te vāhaʼa kae mole hona ʼaoga kia ʼau?” Neʼe fai e te tagata ʼāfea ʼaia he ʼu kiʼi fetogi ʼi tona maʼuli, pea neʼe mahino kia ia ʼe feala anai hana taupau tona famili ʼaki pe tana gāue ia ʼaho e tolu peʼe fā ʼi te vāhaʼa. ʼAki te temi, neʼe fakaafe ia ia ke ina fakahoko he ʼu pilivilesio faka Kilisitiano, ohage ko tana kau ʼi te Komite ʼo te Fale Fakatahi pea mo te fai ʼo te ʼu fakatuʼutuʼu ʼo ʼuhiga mo te ʼu fakatahi faka tisitilike. ʼI tana fakaʼaogaʼi fakapotopoto tana ʼu kalitate, kua maʼuli fiafia te tēhina ʼaia pea mo tona famili.
Ko He Manatu Fakapotopoto ʼo ʼUhiga Mo Te ʼu Pilivilesio
ʼE fakaloto mālohiʼi te ʼu tēhina Kilisitiano ke nātou faiga ki he ʼu pilivilesio ʼi te kokelekasio. “Kapau ʼe loto he tahi ki he gāue faka taupau, ʼe loto ia ki he gāue matalelei.” (1 Timoteo 3:1, MN) Ohage pe ko te ʼu kalitate ʼaē neʼe tou talanoa kiai ʼi muʼa atu, ko takita fakaʼamu ʼaē ke kita tali he ʼu pilivilesio, ʼe tonu ke ʼalutahi mo te aga fakapotopoto. ʼE mole tonu ke kita tali he ʼu pilivilesio ʼe lahi fau, heʼe feala ai ke puli tokita fiafia ʼi takita tauhi kia Sehova. Ei, ʼe lelei takita holi ʼaia ki he ʼu gāue, pea ʼe ʼaoga te faʼahiga manatu ʼaia, heʼe mole leleiʼia e Sehova te hahaʼi ʼaē ʼe nātou manatu pe kia nātou totonu; kae ko takita holi ʼaia ʼe tonu ke hā ai tokita “mauli fakapotopoto.”—Tito 2:12; Apokalipesi 3:15, 16.
ʼUhi ko te agalelei ʼa Sesu, mo tana fakasiosio poto, pea mo tana lotomahino, neʼe feala māʼia ki te hahaʼi vaivai ke nātou fakaōvi gafau kia te ia. ʼO feiā pe ia ʼaho nei, ʼe fīmālie te hahaʼi ʼi tanatou fakatahi mo he tahi ʼe lotomahino pea mo lotoʼofa. ʼI te kokelekasio faka Kilisitiano, ko te kau tagata ʼāfea agalelei ʼaē ʼe faigafua he ʼolo ki ai ʼa te ʼu tēhina mo tuagaʼane, ʼe ko he ʼu “meaofa” fakatagata moʼoni. ʼE nātou hage “ko he nonoʼaga mokā matagi pea ko he holaʼaga mokā afā, ohage ko he ʼu kiʼi vaitafe ʼi he potu moamoa, ohage ko te malumalu ʼi he maka lahi ʼi he kele kakā.”—Efeso 4:8; Isaia 32:2.
Kae ʼe tonu ki te kau tagata ʼāfea ke nātou fakafuafua te temi ʼaē ʼe nātou fakaʼaogaʼi moʼo tokoni ki ʼihi, pea mo te temi ʼaē ʼe ʼaoga ki tanatou ako takitokotahi, mo tanatou metitasio, mo te faikole, pea mo tanatou minisitelio. ʼE mahino ia, ko te kau tagata ʼāfea ʼaē kua ʼohoana, ʼe tonu ke nātou fakaʼaogaʼi he temi ki tonatou famili, ʼaē ʼe tonu ke faigafua tanatou felogoi mo ia.
Ko Te ʼu Fafine ʼOhoana Faiva—Ko He Tapuakina Moʼoni
Ohage ko te kau tagata ʼāfea faiva, ko te ʼu tuagaʼane ʼaē ʼe nātou leleiʼia te ʼu meʼa fakalaumālie ʼe ko he meʼa lelei ki te kautahi ʼo Sehova. ʼI te agamāhani, ʼe ʼi ai te kalitate ʼa te hahaʼi fafine, ko te fia tokoni ki ʼihi—pea ko te kalitate ʼaia ʼe leleiʼia e Sehova pea ʼe ina fakaloto mālohiʼi tatou ke tou maʼu. Neʼe tohi fēnei e te ʼapositolo ko Paulo, “aua naa tahi vakai ifo ota lelei kia kita, kae kita vakai te u lelei ki te kaiga alâ.” (Filipe 2:4) Kae ʼe ʼi ai te ʼu tuʼakoi ʼo tatatou ‘vakaʼi te lelei’ ʼa ʼihi, heʼe mole tonu ke liliu te kau Kilisitiano ko he ʼu hahaʼi ʼe nātou “fakatupu kovi i te u mea e mole piki ai a te tahi kaiga.”—1 Petelo 4:15; 1 Timoteo 5:13.
ʼE ʼi ai te tahi ʼu kalitate ʼa te ʼu tuagaʼane. Ohage la, ko he fafine Kilisitiano ʼe lagi ʼatamai age ʼi tona ʼohoana. Kae ʼi tona ʼuhiga “ ʼohoana faiva” ʼaē ʼe manavasiʼi kia Sehova, ʼe fakaʼapaʼapa anai ki tona ʼohoana pea mo ina fakaʼaogaʼi anai tona ʼu kalitate moʼo tokoni kia ia, kae mole fakataupiepie anai kia ia. Pea ko te tagata ʼohoana, ʼe mole maheka anai kia ia peʼe ʼita anai ki ai, kae kapau ʼe aga fakapotopoto pea mo agavaivai, pea ʼe ina faka maʼuhigaʼi anai te ʼu kalitate ʼo tona ʼohoana pea mo fiafia ai. ʼE ina fakaloto mālohiʼi anai tona ʼohoana ke ina fakaʼaogaʼi tona ʼu kalitate moʼo tokoni ki tona loto fale pea mo tana ʼu fānau ke nātou “manavasiʼi kia Sehova,” ohage pe ko ia. (Tāʼaga Lea 31:10, 28-30; Senesi 2:18) Ko te ʼu tagata pea mo te ʼu fafine ʼohoana ʼaia ʼe agavaivai pea mo fia mālalo, ʼe nātou fiafia moʼoni ʼi tanatou nofo faka taumatuʼa, pea ʼe ko he fakavikiviki ʼaia kia Sehova.
Tou Lolomi Tatatou Agaaga Mālohi
Kapau ko te agaaga mālohi ʼa he tahi ʼe fakatafito ki te faitotonu pea mo ina fai te finegalo ʼo Sehova ʼaki tona loto katoa, pea ʼe feala ke ʼui ʼe ko he kalitate lelei mo kapau ʼe ʼalutahi mo te agavaivai pea mo te fia mālalo. Kae ʼe feala ke liliu ko he vaivaiʼaga mo kapau ʼe kita faiga ke kita puleʼi ʼihi peʼe kita fakamatakuʼi nātou. ʼE moʼoni tāfito te faʼahi ʼaia ʼi te kokelekasio faka Kilisitiano. ʼE tonu ke faigafua te ʼu felogoi ʼa te kau Kilisitiano, pea ʼe toe moʼoni te faʼahi ʼaia mokā nātou fai palalau mo te kau tagata ʼāfea.—Mateo 20:25-27.
Tahi ʼaē meʼa, ʼe tonu ke faigafua te faka felogoi ʼa te kau tagata ʼāfea. Pea ka nātou fono fakatahi, ko te ʼu tonu ʼaē ʼe nātou fai, ʼe fai ʼaki te takitaki ʼo te laumālie maʼoniʼoni, kae mole fai ʼuhi ko te agaaga mālohi ʼa he tahi. ʼE moʼoni, he ko te laumālie maʼoniʼoni ʼe feala ke ina uga he tahi ia nātou, peʼe kei tūpulaga peʼe ko he tēhina ʼe mole faʼa palalau. Koia ko nātou ʼaē ʼe mālohi age tonatou agaaga, tatau aipe peʼe nātou ʼiloʼi ʼe nātou tonu, kae ʼe tonu ke nātou tokagaʼi ʼihi, pea ke nātou ‘fakaʼapaʼapa’ ki tonatou ʼu tēhina tagata ʼāfea. (Loma 12:10) ʼE fai te fakatokaga agaʼofa ʼaenī ia Tagata Tānaki 7:16: “ ʼAua naʼa ke fia agatonu fau, peʼe ke fia poto fau. He koʼe koa ʼe ke fakatupu anai tou fakaʼauha?”
Ko Sehova, te Matapuna ʼo “meaofa lelei fuape,” ʼe haohaoa tana fakafuafua tona ʼu kalitate. (Sakopo 1:17; Teutalonome 32:4) Pea ko Ia ʼaē ʼe ina akoʼi tatou! Koia tou tuku ke ina akoʼi tatou, pea tou gāue mālohi ke tou fakatuputupu totatou ʼu kalitate, pea ke tou faka ʼalutahi te ʼu kalitate ʼaia mo te poto, mo te agavaivai, pea mo te ʼofa. Kapau ʼe tou fai feiā, pea ʼe tou liliu moʼoni anai ko he tapuakina ki ʼihi!
[Paki ʼo te pasina 27]
Ko tatatou tuputupu ʼi te faʼahi fakalaumālie ʼe fakalogo ki te ako takitokotahi ʼi te faikole pea mo te falala kia Sehova
[Paki ʼo te pasina 29]
ʼE ko he tapuakina, mo kapau ʼe kita tokaga ki ʼihi ʼaki he agavaivai
[Haʼuʼaga ʼo te paki pasina 26]
Courtesy of The Mariners’ Museum, Newport News, VA