ʼE Tou Koloaʼia ʼi Te Tapuakina ʼa Sehova
“Ko te tapuakina ʼa Sehova—koʼena te meʼa ʼaē ʼe ina fakakoloaʼia, pea ʼe mole maʼu ai he mamahi.”—Tāʼaga Lea 10:22.
1, 2. He koʼe koa ʼe mole ʼalutahi ia te fiafia mo te koloā fakamālama?
KO TE maʼuli ʼo te toko lauʼi miliona hahaʼi ia ʼaho nei ʼe takitaki e te mānumānu koloā. Kae ʼe nātou fiafia koa ʼaki te ʼu koloā ʼaia? ʼE ʼui fēnei e te The Australian Women’s Weekly: “Neʼe mole heʼeki he temi neʼe tatau ai te maʼuli ʼo te hahaʼi ohage ko te temi nei. ʼE kehekehe ʼaupito. Neʼe ʼui mai kia mātou ʼe haʼele lelei te maʼuli fakasino ʼi Ositalalia, pea ʼe lelei ai mo te maʼuli. . . . Kae ʼe maʼuli tuʼania te hahaʼi ʼo te fenua. Ko te hahaʼi tagata pea mo te hahaʼi fafine ʼe nātou manatu tahi, ʼe ʼi ai te meʼa ʼi tonatou maʼuli ʼe mole nātou maʼu kae mole nātou ʼiloʼi pe koteā te meʼa ʼaia.” ʼE fakahā lelei e te Tohi-Tapu, ko te fiafia pea mo te maʼuli ʼe mole maʼu mai te ʼu koloā ʼaē ʼe tou maʼu!—Tagata Tānaki 5:10; Luka 12:15.
2 ʼE fakahā e te Tohi-Tapu, ʼe maʼu te fiafia lahi mai te tapuakina ʼa te ʼAtua. Ki te faʼahi ʼaia, ʼe ʼui fēnei ia Tāʼaga Lea 10:22: “Ko te tapuakina ʼa Sehova—koʼena te meʼa ʼaē ʼe ina fakakoloaʼia, pea ʼe mole maʼu ai he mamahi.” ʼI te agamāhani, ʼe tupu te lotomamahi mai te mānumānu fau ki te ʼu koloā fakamālama. Koia neʼe fai ai e te ʼapositolo ko Paulo te fakatokaga ʼaenī: “Ko nātou ʼaē kua nātou fakapapau ke nātou maʼu koloā ʼe nātou higa ki te fakahala, ki he hele pea mo te ʼu holi fakavale lahi pea mo fakatupu kovi, ʼe nātou fakatō te tagata ki te fakaʼauha pea mo te pulinoa. Heʼe ko te manako ki te paʼaga ʼe ko te aka ʼaia ʼo te ʼu meʼa kovi fuli, pea ko ʼihi, ʼi tanatou fakaʼamu ki te holi ʼaia, neʼe nātou hē mamaʼo ʼi te tui pea mo nātou fehukiʼaki ia nātou totonu ʼaki te ʼu mamahi lahi.”—1 Timoteo 6:9, 10, MN.
3. He koʼe ʼe tau te ʼu kaugana ʼa te ʼAtua mo te ʼu ʼahiʼahi?
3 Tahi ʼaē meʼa, ko te ʼu tapuakina ʼaē ʼe mole tou mamahi ai, ʼe maʼu pe ʼe nātou fuli ʼaē ʼe nātou “haga fakalogo ki te leʼo ʼo Sehova.” (Teutalonome 28:2) Kae ʼe lagi ʼui fēnei anai e ʼihi, ‘Kapau ʼe mole he mamahi ʼi te tapuakina ʼa Sehova, he koʼe ʼe lahi te ʼu kaugana ʼa te ʼAtua ʼe nātou maʼuli mamahi?’ ʼE fakahā e te Tohi-Tapu, neʼe fakagafua e te ʼAtua ke ʼahiʼahiʼi tatou kae ʼi tona fakahagatonu, ʼe tou mamahi ʼuhi ko Satana mo te mālama ʼaenī, pea mo totatou ʼuhiga agahala. (Senesi 6:5; Teutalonome 32:4, 5; Soane 15:19; Sakopo 1:14, 15) Ko Sehova ʼe ko te matapuna ʼo “te meʼa ʼofa lelei fuli pea mo te mōlaga haohaoa fuli.” (Sakopo 1:17, MN ) Koia, ʼe mole fakamamahi tana ʼu tapuakina. Tou vakaʼi te tahi ʼu mōlaga haohaoa mai te ʼAtua.
Ko Te Folafola ʼa Te ʼAtua—Ko Te Meʼa ʼOfa Maʼuhiga
4. Koteā te tapuakina pea mo te meʼa ʼofa lahi ʼe maʼu e te hahaʼi ʼa Sehova ʼi “te temi fakaʼosi” ʼaenī?
4 ʼO ʼuhiga mo “te temi fakaʼosi,” ʼe ʼui fēnei e te lea faka polofeta ʼo Taniela: “Ko te ʼatamai mālama moʼoni ʼe mahu anai ia.” Kae ʼe toe ʼui fēnei: “ ʼE mole mahino anai te kau agakovi ki he meʼa; kae ʼe ko nātou ʼaē ʼe fakasiosio poto ka mahino anai kiai.” (Taniela 12:4, 10) Koutou fakakaukauʼi age muʼa! Ko te Folafola ʼa te ʼAtua—ia te lea faka polofeta—ʼe fakahā ʼaki te poto fakaʼatua ke mole mahino te kau agakovi kiai, gata pe ki te hahaʼi ʼaē ʼa Sehova. Neʼe faikole fēnei te ʼAlo ʼo te ʼAtua: “E au fakavikiviki kia te koe, Tamai, te Aliki o Selo mo te kelekele koteuhi nee ke fufu ia mea aeni mai te kau poto mo te kau atamai pea nee ke fakaha ia ki te u fanau liliki.” (Luka 10:21) ʼE ko he tapuakina ia te maʼu ʼo te meʼa ʼofa maʼuhiga ʼo te ʼAtua ia te Folafola, te Tohi-tapu, pea mo tou kau ia nātou ʼaē neʼe faka fealagia e Sehova ke nātou maʼu ia te mālama ʼi te faʼahi fakalaumālie!—1 Kolonito 1:21, 27, 28; 2:14, 15.
5. Koteā te poto, pea ʼe tou lava maʼu feafeaʼi?
5 Mo kanapau la neʼe mole ʼi ai “te poto mai oluga,” neʼe mole feala kia tatou ke tou maʼu he fakasiosio poto ʼi te faʼahi fakalaumālie. (Sakopo 3:17) Ko te poto ʼe ko te fakaʼaogaʼi ʼo te ʼatamai mālama moʼo fakatokatoka ʼo he ʼu fihifihia, moʼo tekeʼi peʼe moʼo ʼiloʼi he ʼu tuʼutāmaki, moʼo fakahoko he ʼu fakatuʼutuʼu, peʼe moʼo foaki he ʼu tokoni ʼe fakapotopoto. E feafeaʼi takita maʼu ia te poto fakaʼatua? ʼE ʼui fēnei ia Tāʼaga Lea 2:6: “[ʼE] foaki e Sehova totonu ia te poto; ʼe haʼu mai tona gutu te ʼatamai mālama pea mo te fakasiosio tonu.” Ei, ko Sehova ʼe ina tapuakina anai tatou ʼaki te poto mo kapau ʼe tou haga kole, ohage ko tana foaki ʼaē ki te Hau ko Salomone ia “te poto pea mo te loto fakalogo.” (1 Hau 3:11, 12; Sakopo 1:5-8) Ke kita maʼu te poto, ʼe tonu foki ke tou haga fakalogo kia Sehova ʼaki te ako tuʼumaʼu ʼo tana Folafola pea mo maʼuliʼi.
6. He koʼe ʼe fakapotopoto ia takita maʼuliʼi te ʼu lao pea mo te ʼu pelesepeto ʼa te ʼAtua?
6 ʼE tou maʼu te ʼu faʼifaʼitaki lelei ʼo ʼuhiga mo te poto fakaʼatua ʼi te ʼu lao pea mo te ʼu pelesepeto ʼo te Tohi-Tapu. Ko te ʼu lao pea mo te ʼu pelesepeto ʼaia ʼe ʼaoga kia tatou, ʼi te faʼahi fakasino, ʼi te faʼahi ʼo te fakakaukau, ʼi te faʼahi ʼo te loto, pea mo te faʼahi fakalaumālie. Koia neʼe hiva fēnei ai te tagata fai pesalemo: “Ko te lao ʼa Sehova ʼe haohaoa, ʼo ina fakamaʼuli te nefesi. Ko te fakamanatu ʼa Sehova ʼe tāu mo te falala, ʼo ina fakaliliu ke poto ia ia ʼaē ʼe mole heʼeki fakapotopoto. Ko te ʼu fakatotonu ʼa Sehova ʼe totonu, ʼo nātou fakafiafia te loto; ko te fakatotonu ʼa Sehova ʼe maʼa, pea ʼe ina fakagigila te ʼu mata. Ko te manavasiʼi kia Sehova ʼe maʼa, pea ʼe tuʼu ia ʼo talu ai. Ko te ʼu tonu ʼo te ʼu fakamāu ʼa Sehova ʼe moʼoni ia; pea ʼe kua ʼiloga mai ia ʼe totonu katoa. ʼE moʼoni te ʼu tonu ʼo te ʼu faifakamāu ʼa Sehova; neʼe ʼiloga tonatou totonu katoa. ʼE lahi ake tonatou manakoʼia ʼi te aulo, ʼio, ʼi he tuʼuga aulo kua fakamaʼa.”—Pesalemo 19:7-10; 119:72.
7. Koteā te ʼu fua ʼe tou maʼu mokā ʼe tou meʼa noaʼi te ʼu lekula faitotonu ʼo te ʼAtua?
7 Tahi ʼaē meʼa, ko te hahaʼi ʼaē ʼe mole nātou fakalogo ki te ʼu lekula faitotonu ʼa te ʼAtua, ʼe mole nātou maʼu te fīmālie pea mo te ʼāteaina ʼaē ʼe nātou kumi. ʼAki te temi, ʼe mahino kia nātou ʼe mole tonu ke manukiʼi te ʼAtua, heʼe utu pe anai e he tahi te meʼa ʼaē neʼe ina to. (Kalate 6:7) Ko te toko lauʼi miliona ʼaē neʼe nātou meʼa noaʼi te ʼu pelesepeto ʼo te Tohi-Tapu, neʼe nātou utu te ʼu fua kovi ohage la ko te faitama neʼe mole loto kiai, te ʼu mahaki fakamataku, peʼe ko te fakaʼaogaʼi fakavale ʼo ʼihi ʼu meʼa. Kapau ʼe mole nātou fakahemala ʼo fetogi tonatou faʼahiga maʼuli, pea ʼe nātou mamate anai pea lagi fakaʼauha anai nātou e te ʼAtua.—Mateo 7:13, 14.
8. He koʼe ʼe fīmālie te hahaʼi ʼaē ʼe nātou manako ki te Folafola ʼa te ʼAtua?
8 Kae kia nātou ʼaē ʼe nātou manako ki te Folafola ʼa te ʼAtua pea mo nātou maʼuliʼi, ʼe nātou maʼu anai te ʼu tapuakina lahi ʼi te temi nei pea mo te temi ka haʼu. ʼE mole mamafa kia nātou te ʼu lao ʼa te ʼAtua, ʼe nātou fīmālie moʼoni, pea kua nātou fakaʼamu ki te temi ʼaē ka nātou ʼāteaina ai mai te agahala pea mo tona ʼu ikuʼaga kovi. (Loma 8:20, 21; Sakopo 1:25) ʼE moʼoni te ʼamanaki ʼaia heʼe fakatafito ki te meʼa ʼofa lahi ʼo te ʼAtua ʼaē ki te malamanei—ia te sakilifisio faitotogi ʼo tona ʼAlo ʼulu tokotahi ko Sesu Kilisito. (Mateo 20:28; Soane 3:16; Loma 6:23) ʼE hā ʼi te taʼi meʼa ʼofa makehe ʼaia ia te ʼofa lahi ʼo te ʼAtua ki te malamanei, pea mo fakamoʼoni ai te ʼu tapuakina heʼegata ʼe maʼu ʼe nātou fuli ʼaē ʼe nātou haga fakalogo kia Sehova.—Loma 8:32.
Tou Loto Fakafetaʼi Ki Te Meʼa ʼOfa ʼo Te Laumālie Maʼoniʼoni
9, 10. ʼE tou maʼu feafeaʼi te meʼa ʼofa ʼa Sehova ʼaē ko te laumālie maʼoniʼoni? Koutou tuku mai he faʼifaʼitaki.
9 ʼE tonu ke tou loto fakafetaʼi ki te tahi meʼa ʼofa ʼa te ʼAtua, ʼe ko tona laumālie maʼoniʼoni. ʼI te ʼaho ʼo te Penikosite ʼo te taʼu 33 ʼo totatou temi, neʼe fakaloto mālohiʼi e te ʼapositolo ko Petelo ia te hahaʼi tokolahi ʼo Selusalemi ʼo ina ʼui fēnei: “Koutou fakahemala pea koutou tahi papitema i te huafa o Sesu Kilisito o uhiga mo te fakamolemole o autou agahala, pea e koutou tali anai mo te Laumalie-Maonioni.” (Gaue 2:38) Ia ʼaho nei, ʼe foaki e Sehova tona laumālie maʼoniʼoni ki tana ʼu kaugana ʼaē ʼe nātou kole age pea mo nātou fia fai tona finegalo. (Luka 11:9-13) ʼI te temi ʼāfea, ko te mālohi lahi ʼaupito ʼaia ʼo te ʼatulaulau—ia te laumālie maʼoniʼoni ʼo te ʼAtua, peʼe ko te mālohi gāue—neʼe ina fakamālohiʼi te ʼu tagata pea mo te ʼu fafine tui, ʼo feiā mo te kau ʼuluaki Kilisitiano. (Sakalia 4:6; Gaue 4:31) ʼE ina lava fai te meʼa ʼaia maʼa tatou, tatau aipe mokā tou tau mo he ʼu faigataʼaʼia lahi ʼi totatou ʼuhiga hahaʼi ʼa Sehova.—Soele 2:28, 29.
10 Tou vakaʼi te faʼifaʼitaki ʼa te tuagaʼane ko Laurel, ʼaē neʼe tau mo te mahaki ko te polio (ko te mahaki ʼo te uho ʼo te hui tuʼa tofu) pea neʼe maʼuli ʼi te foʼi masini ia taʼu e 37.a Logola te ʼu ʼaluʼaga faigataʼa ʼaia, kae neʼe tauhi fakamalotoloto ki te ʼAtua ʼo aʼu ki tona mate. Lolotoga he ʼu taʼu, neʼe maʼu e Laurel te ʼu tapuakina lahi mai ia Sehova, he neʼe tokoni ki te toko 17 hahaʼi ke nātou maʼu te ʼatamai mālama totonu ʼo te moʼoni ʼo te Tohi-Tapu, logola neʼe maʼuli ʼi te ʼaho fuli ʼi te foʼi masini ʼaia! Ko te ʼaluʼaga ʼaē neʼe tau mo ia, ʼe tou manatuʼi ai te ʼu palalau ʼaenī ʼa te ʼapositolo ko Paulo: “E hoki au malohi moka e hoki au vaivai.” (2 Kolonito 12:10) Ei, ko te fua lelei ʼo tatatou faka mafola ʼo te logo lelei, ʼe mole fakalogo ki tatatou ʼu fealagia pea mo totatou mālohi, kae ʼaki te tokoni ʼo te laumālie maʼoniʼoni, ʼaē ʼe foaki e te ʼAtua ki te hahaʼi ʼaē ʼe fakalogo ki tona leʼo.—Isaia 40:29-31.
11. Koteā te ʼu kalitate ʼe fakatuputupu e te laumālie ʼo te ʼAtua ia nātou ʼaē kua nātou kofuʼi te “ ʼulugaaga foʼou”?
11 Kapau ʼe tou talagafua ʼo fakalogo ki te ʼAtua, ʼe fakatuputupu e tona laumālie ia tatou te ʼu kalitate ʼaē ko te ʼofa, te fiafia, te tokalelei, te kātaki fualoa, te finegaloʼofa, te agalelei, te tui, te agamālū, te lolomi ʼo kita. (Kalate 5:22, 23) Ko te “fua o te Laumalie” ʼaia ʼe kau ki te “ ʼulugaaga foʼou” ʼaē kua kofuʼi e te kau Kilisitiano moʼo fetogi ʼaki te ʼu aga neʼe lagi nātou maʼu ʼi te temi muʼa, ʼaē ko te aga fefeka pea mo mālohi. (Efeso 4:20-24, MN; Isaia 11:6-9) ʼI te fua ʼaia, ko te kalitate ʼaē ʼe maʼuhiga tāfito ʼe ko te ʼofa, te “noʼo haohaoa ki te logo tahi.”—Kolose 3:14, MN.
Ko Te ʼOfa Faka Kilisitiano—Tou Fakafetaʼi Ki Te Meʼa ʼOfa ʼAia
12. Neʼe fakahā feafeaʼi e Tapita pea mo ʼihi Kilisitiano ʼo te ʼuluaki sēkulō ia tonatou ʼofa?
12 Ko te ʼofa faka Kilisitiano ʼe ko he tahi meʼa ʼofa mai ia Sehova—pea ʼe tonu ke tou taupau fakalelei. ʼE mulimuli ki te ʼu pelesepeto, kae ʼe mahu ʼi te agalelei heʼe ina lava faka felogoi te hahaʼi ohage pe ko he foʼi famili. (Soane 15:12, 13; 1 Petelo 1:22) Ohage la, ko Tapita neʼe ko te fafine Kilisitiano agalelei ʼo te ʼuluaki sēkulō. “Nee lahi ana gaue lelei mo tana faiofa,” tāfito la maʼa te kau fafine vitua ʼi te kokelekasio. (Gaue 9:36) ʼE lagi neʼe kāiga ia Tapita mo te ʼu fafine vitua ʼaia, kae neʼe fia tokoni kia nātou pea mo fakaloto mālohiʼi ia te ʼu fafine vitua ʼaia. (1 Soane 3:18) ʼE ko he faʼifaʼitaki lelei neʼe tuku mai e Tapita! ʼAki te ʼofa faka Kilisitiano, ko Pilisika mo Akila neʼe ‘meihiʼi tuʼusi tonā ʼu kia’ maʼa Paulo. Neʼe toe uga e te ʼofa ʼo Epafalase, mo Luka, mo Onesifolo, pea mo ʼihi ke nātou tokoni ki te ʼapositolo ʼaia ʼi tana nofo pilisoni ʼi Loma. (Loma 16:3, 4; 2 Timoteo 1:16; 4:11; Filemone 23, 24) Ei, ko he ʼu Kilisitiano feiā ia ʼaho nei, ʼe nātou ‘femaʼuʼaki te ʼofa,’ ʼaē ʼe ko he meʼa ʼofa mai te ʼAtua, pea ʼe fakahā ai ko nātou ʼe ko te ʼu tisipulo moʼoni ʼa Sesu.—Soane 13:34, 35.
13. ʼE tou lava fakahā feafeaʼi ʼe tou leleiʼia ʼaupito totatou foʼi famili fale tautēhina?
13 ʼE koutou fakafetaʼi koa ki te ʼofa ʼaē ʼe koutou maʼu ʼi te kokelekasio faka Kilisitiano? ʼE koutou fakafetaʼi koa ki totatou foʼi famili fale tautēhina ʼaē ʼi te malamanei katoa? ʼE ko te tahi ʼaia ʼu meʼa ʼofa mai te ʼAtua. ʼE tou lava fakahā feafeaʼi, ʼe maʼuhiga kia tatou te ʼu ʼofa ʼaia? ʼAki hatatou tauhi taputapu ki te ʼAtua, pea mo tatatou kau ki te ʼu fono faka Kilisitiano, pea mo tatatou fakahā te ʼofa pea mo te ʼu fua ʼo te laumālie ʼo te ʼAtua.—Filipe 1:9; Hepeleo 10:24, 25.
“Ko He ʼu Meʼa ʼOfa Ko He ʼu Tagata”
14. Koteā ʼaē ʼe fakamaʼua ki he Kilisitiano mo kapau ʼe fia liliu ko he tagata ʼāfea peʼe ko he tagata faifekau faka minisitelio?
14 Ko te ʼu tēhina ʼaē ʼe nātou fakaʼamu ke nātou tagata ʼāfea peʼe tagata faifekau faka minisitelio, moʼo kaugana ki tonatou ʼu tēhina mo tuagaʼane, ʼe ko he fakatuʼutuʼu lelei. (1 Timoteo 3:1, 8) Ko he tēhina ʼe ina maʼu te ʼu pilivilesio ʼaia, ʼe tonu ke manako ki te ʼu meʼa fakalaumālie, pea mo ina ʼiloʼi lelei te Tohi-Tapu pea mo faʼafai ʼi te minisitelio. (Gaue 18:24; 1 Timoteo 4:15; 2 Timoteo 4:5) ʼE tonu ke agavaivai, mo fia mālalo, pea mo loto ʼutaki, heʼe ko te ʼu tapuakina fakaʼatua ʼe mole maʼu e te hahaʼi ʼaē ʼe fialahi, mo fiatuʼu pea mo maheka. (Tāʼaga Lea 11:2; Hepeleo 6:15; 3 Soane 9, 10) Kapau kua ʼohoana, ʼe tonu ko he pule famili ʼofa, poto ʼi te takitaki ʼo tona loto fale katoa. (1 Timoteo 3:4, 5, 12) ʼE maʼu e te taʼi tagata ʼaia te tapuakina ʼa Sehova heʼe manako ki te ʼu koloā fakalaumālie.—Mateo 6:19-21.
15, 16. Ko ai te “ ʼu meʼa ʼofa ko he ʼu tagata”? Koutou tuku mai he ʼu faʼifaʼitaki.
15 Ko te kau tagata ʼāfea ʼaē ʼe nātou gāue mālohi ʼi te faka mafola ʼo te evaselio, pea mo te gāue tauhi ōvi, pea mo te faiakonaki, ʼe ko he ʼu tupuʼaga lelei ʼaia ke tou fakafetaʼi ai ki te ʼu “meʼa ʼofa ko he ʼu tagata.” (Efeso 4:8, 11, MN ) ʼE lagi ko nātou ʼaē ʼe fua lelei kiai te gāue ʼofa ʼaia, ʼe mole nātou fakahā tuʼumaʼu tonatou loto fakafetaʼi, kae ko Sehova ʼe sio ifo ki te ʼu gāue fuli ʼaē ʼe fai e te kau tagata ʼāfea. ʼE mole ina galoʼi anai ia te ʼofa ʼaē neʼe nātou fakahā ki tona huafa, ʼi tanatou kaugana ʼaē ki tana hahaʼi.—1 Timoteo 5:17; Hepeleo 6:10.
16 Tou vakaʼi te tagata ʼāfea ʼe gāue kinakina, neʼe ina ʼaʼahi te finemui Kilisitiano neʼe tafa tona ʼuto. Neʼe tohi fēnei e te kaumeʼa ʼo te famili: “Neʼe agalelei, neʼe fia tokoni pea mo agaʼofa. Neʼe ina kole mai peʼe lava faikole mo mātou kia Sehova. ʼI te temi ʼaē neʼe faikole ai, neʼe tagi te tāmai, pea neʼe mātou fetāgihi fuli ʼi te kogafale ʼo te lopitali. Neʼe malave ʼi ʼomātou loto te faikole ʼa te tagata ʼāfea, pea neʼe ko he fakatuʼutuʼu ʼofa ʼa Sehova ʼi tana fekauʼi ke haʼu ʼi te taʼi lakaga ʼaia!” Ko te tahi Fakamoʼoni neʼe mahaki, neʼe ina ʼui ʼo ʼuhiga mo te ʼu tagata ʼāfea neʼe nātou ʼaʼahi ia ia: “Mokā nātou fakaōvi mai kia ʼau ʼi te kogafale mahaki ʼo te réanimation, neʼe mahino kia ʼau ko te ʼu meʼa fuli ʼaē ka hoko kia ʼau ʼe ʼau lava kātakiʼi. Neʼe ʼau mālohi pea mo fīmālie.” ʼE lava koa ki he tahi ke ina totogi te taʼi tokaga ʼofa ʼaia? Kailoa! ʼE ko te meʼa ʼofa ʼaia mai te ʼAtua, ʼe maʼu pe ʼi te kokelekasio faka Kilisitiano.—Isaia 32:1, 2.
Ko Te Meʼa ʼOfa ʼAē Ko Te Minisitelio
17, 18. (a) Koteā te gāue ʼofa neʼe faka fealagia e Sehova ki tana hahaʼi fuli? (b) Koteā te tokoni ʼe foaki mai e te ʼAtua ke tou lava fakahoko ai tatatou minisitelio?
17 Ko te pilivilesio lahi ʼe lava maʼu e he tagata, ʼe ko tana tauhi kia Sehova, ia te Māʼoluga. (Isaia 43:10; 2 Kolonito 4:7; 1 Petelo 2:9) Kae ko te pilivilesio ʼaē ko te faka mafola ʼe foaki ki te hahaʼi fuli—te kau tūpulaga, te hahaʼi matutuʼa, fafine mo tagata—ʼaē ʼe nātou fia tauhi moʼoni ki te ʼAtua. ʼE koutou fakaʼaogaʼi koa te meʼa ʼofa maʼuhiga ʼaia? Lagi ko ʼihi ʼe nātou holomuli ʼi te fai ʼo te gāue ʼaia, heʼe nātou manatu ʼe mole nātou lavaʼi, kae koutou manatuʼi ʼe foaki e Sehova te laumālie maʼoniʼoni kia nātou ʼe nātou tauhi kia te ia, pea ʼe ina foaki age kia nātou he faʼahiga meʼa ʼe mole nātou maʼu.—Selemia 1:6-8; 20:11.
18 Neʼe tuku e Sehova te faka mafola ʼo te Puleʼaga ki tana kau kaugana agavaivai, kae mole ko ni hahaʼi fialahi pea mo falala pe ki tonatou ʼu fealagia. (1 Kolonito 1:20, 26-29) Ko te hahaʼi agavaivai pea mo fia mālalo, ʼe nātou ʼiloʼi tonatou ʼu tuʼakoi pea ʼe nātou mulimuli ki te tokoni ʼa te ʼAtua mokā nātou kau ki te gāue faka minisitelio. ʼE nātou toe leleiʼia te tokoni fakalaumālie ʼaē ʼe foaki age e te “faifekau agatonu.”—Luka 12:42-44; Tāʼaga Lea 22:4.
Te Maʼuli Faka Famili Fiafia—Ko He Meʼa ʼOfa Lelei
19. Koteā te ʼu meʼa ʼaē ʼe nātou tokoni lelei ki te akoʼi ʼo te ʼu fānau?
19 Ko te nofo ʼohoana pea mo he maʼuli faka famili fiafia ʼe ko te ʼu meʼa ʼofa ʼaia mai te ʼAtua. (Lute 1:9; Efeso 3:14, 15) Ko te fānau ʼe ko te tahi ʼaia “tofiʼa [maʼuhiga] mai ia Sehova,” heʼe fakafiafia ai te ʼu mātuʼa ʼaē ʼe nātou akoʼi fakalelei ki tanatou fānau te ʼu kalitate fakaʼatua. (Pesalemo 127:3) Kapau ko koutou ko he ʼu mātuʼa, koutou haga fakalogo ki te leʼo ʼo Sehova ʼo koutou akoʼi ki takotou fānau tana Folafola. Ko nātou ʼaē ʼe nātou fai feiā, ʼe nātou maʼu moʼoni anai te tokoni pea mo te tapuakina lahi ʼa Sehova.—Tāʼaga Lea 3:5, 6; 22:6; Efeso 6:1-4.
20. Koteā ʼaē ʼe lava tokoni ki te ʼu mātuʼa ʼaē ʼe līaki e tanatou ʼu fānau te tauhi moʼoni?
20 Logola te ʼu faiga fakamalotoloto ʼa te ʼu mātuʼa faka lotu, kae lagi ko ʼihi ʼi tanatou ʼu fānau ʼe nātou fili anai ke nātou līaki te tauhi moʼoni mokā nātou lalahi ake. (Senesi 26:34, 35) ʼE ko he meʼa fakatupu lotomamahi ki te ʼu mātuʼa. (Tāʼaga Lea 17:21, 25) Kae ke ʼaua naʼa nātou lotovaivai, ko te meʼa ʼaē ʼe lava tokoni kia nātou, ke nātou manatuʼi te lea fakatātā ʼa Sesu ʼo ʼuhiga mo te foha maumau koloā. Logola te mavae ʼa te tama ʼaia ʼi te loto fale pea mo maʼuli fiatuʼu, ki muli age neʼe toe liliu mai ki te ʼapi ʼo tana tāmai, ʼaē neʼe ina tali fakafiafia ia ia pea mo ʼofa ki ai. (Luka 15:11-32) Tatau aipe pe koteā ʼaē ʼe lava hoko, ko te ʼu mātuʼa Kilisitiano agatonu ʼe tonu ke nātou ʼiloʼi papau ko Sehova ʼe lotomahino, ʼe ʼofa, pea mo fia tokoni.—Pesalemo 145:14.
21. Ko ai ʼaē ʼe tonu ke tou fakalogo ki ai, pea koteā tona tupuʼaga?
21 Koia tou haga tokaga takitokotahi ki te meʼa ʼaē ʼe maʼuhiga moʼoni ki totatou maʼuli. ʼE tou kumi fau koa he ʼu koloā fakamālama, ʼaē ʼe lava ai ke nātou fakamamahi tatou pea mo totatou famili? Peʼe tou haga kumi koa ‘te ʼu meʼa ʼofa lelei pea mo te ʼu mōlaga haohaoa’ ʼaē ʼe haʼu mai te “Tamai o te u malama?” (Sakopo 1:17) ʼE loto e Satana ia “te tamai o te kaka,” ke tou gāue kinakina moʼo maʼu ʼo he ʼu koloā fakamālama, kae ke mole tou maʼu te fīmālie pea mo te maʼuli. (Soane 8:44; Luka 12:15) Kae ko Sehova ʼe ina loto ke fua manuʼia totatou maʼuli. (Isaia 48:17, 18) Koia tou haga fakalogo ki totatou Tāmai ʼofa pea mo tou “fakafiafia” tuʼumaʼu ia Ia. (Pesalemo 37:4) Kapau ʼe tou haga maʼuli feiā, pea ko te ʼu meʼa ʼofa lahi ʼa Sehova pea mo tana tapuakina lahi ʼe nā fakakoloaʼia anai tatou—pea mole tou mamahi ai.
[Kiʼi nota]
a Koutou vakaʼi te Réveillez-vous ! ʼo te ʼaho 22 ʼo Sanualio 1993, ʼi te pasina 18 ki te 21.
ʼE Kei Koutou Manatuʼi Koa?
• ʼE tou lava maʼu koa ʼifea te fiafia lahi?
• Koteā te ʼu meʼa ʼofa ʼaē ʼe foaki e Sehova ki tana hahaʼi?
• He koʼe ʼe ko te gāue faka minisitelio ʼe ko he meʼa ʼofa?
• Koteā ʼaē ʼe lava fai e te ʼu mātuʼa ke nātou maʼu te tapuakina ʼa te ʼAtua ʼi tanatou ako ʼo tanatou fānau?
[Paki ʼo te pasina 16]
ʼE koutou loto fakafetaʼi koa ki te meʼa ʼofa ʼo te ʼAtua ia tana Folafola?
[Paki ʼo te pasina 17]
Logola te ʼu ʼaluʼaga faigataʼa, neʼe tauhi fakamalotoloto ia Laurel Nisbet ki te ʼAtua
[Paki ʼo te pasina 18]
Ohage ko Tapita, ʼaki te gāue ʼofa ʼa te kau Kilisitiano ʼe ʼiloʼi ai nātou ia ʼaho nei
[Paki ʼo te pasina 19]
ʼE tokaga te kau tagata ʼāfea ki tonatou ʼu kaugā fagona