ʼE Koutou Maʼu Koa Te Loto Fia Foaki?

NEʼE koutou fakatokagaʼi koa ʼe ʼi ai te tahi meʼa ʼe ina uga ai te hahaʼi ke nātou foaki he ʼu meʼa ʼofa? Ko te meʼa ʼaē ʼe tou foaki e lagi ko he fakahā ʼo he lotoʼofa, he loto fia foaki, peʼe ʼuhi ko hatatou leleiʼia he tahi. Kae neʼe mole koa la koutou fakatokagaʼi ko te tupuʼaga ʼo te foaki ʼo he meʼa ʼofa, ko te loto ʼaē ke leleiʼia tatou? Peʼe lagi feala ke tou foaki he meʼa ʼofa heʼe hage kia tatou ko he meʼa ʼe fakamaʼua mai, peʼe lagi loto e ia ʼaē neʼe ina foaki mai te meʼa ʼofa, ke tou liufaki age he meʼa.

Ko te meʼa ʼofa e lagi ko he meʼa neʼe takafi pea neʼe haʼi ʼaki he kiʼi lipine matalelei. Kae ʼe mole koa la moʼoni ko he meʼa ʼofa, ʼe feala ke fai ʼaki he ʼu fisiʼi teu, he meʼa kai, peʼe ko he aga ʼe lelei? ʼI tona fakahagatonu, ko te ʼu meʼa ʼaē ʼe leleiʼia tāfito, ʼe ko te foaki ʼo kita totonu.

ʼE Koutou Kumi Koa He ʼOfa ʼa He Tahi?

ʼE ko he agamāhani ki he tahi ke ina foaki he meʼa ʼofa moʼo maʼu he ʼofa ʼa he tahi. ʼI ʼihi fenua, kapau ʼe loto e he talavou ke ʼofa kia ia te finemui ʼaē ʼe fakapapau ke nā ʼohoana, e lagi ina foaki kia ia he foʼi teu. Kae ko te fafine poto ʼe mole gata pe tana sio ki te meʼa ʼaē neʼe foaki age ki ai. ʼE ina tokagaʼi te manatu ʼaē neʼe hā ʼi te meʼa ʼofa ʼaia ʼa te talavou, ko he tahi ʼe ʼofa, ʼe liliu anai ko he tagata ʼohoana ʼe agalelei. Ko te taʼi meʼa ʼofa ʼaia, kapau neʼe fai ʼaki he aga faka lotu, ʼe feala ke ina fakatupu he fiafia lahi kia ia ʼaē ʼe ina foaki te meʼa ʼofa pea mo ia ʼaē ʼe ina tali te meʼa ʼofa ʼaia.

ʼE talanoa te Tohi-Tapu ki te lakaga ʼaē neʼe teuteuʼi fakavilivili ai e Apikaela, te ʼohoana ʼo Napale, he meʼa ʼofa kia Tavite, he neʼe ina ʼiloʼi ko ia ʼaē neʼe fili e te ʼAtua ke liliu ko te hau ʼo Iselaele. Neʼe ina toe kumi foki mo ia te ʼofa. Neʼe fehiʼa tona ʼohoana kia Tavite pea neʼe ina leakoviʼi te kau tagata ʼa Tavite. Neʼe takitaki e Tavite te toko 400 kau tagata tau, ke nātou ʼolo ʼo fakaʼauha ia Napale pea mo tana ʼu hahaʼi. Kae neʼe fakamomoli fakavilivili e Apikaela kia Tavite te meʼa ʼofa, ko te ʼu meʼa kai maʼa tana kau tagata. ʼI tana ʼosi fakamomoli tana meʼa ʼofa, neʼe haʼu totonu kia Tavite ʼo fai fakalelei ʼaki he agavaivai ʼo ʼuhiga mo te meʼa ʼaē neʼe fai e tona ʼohoana, pea neʼe ina fakahā he fakasiosio poto lahi ʼi tana palalau ʼaē mo Tavite, ke ina fakakaukauʼi te ʼu fua ʼo te meʼa ʼaē ka ina fai anai.

Neʼe maʼuhiga te fakatuʼutuʼu ʼaē neʼe fai e Apikaela, pea neʼe iku ki he meʼa lelei. Neʼe tali e Tavite tana meʼa ʼofa pea neʼe ina ʼui fēnei age ki ai: “Hake mo te tokalelei ki tou ʼapi. Sio: neʼe ʼau fakalogo ki tou leʼo, ke ʼau fakatokagaʼi ia koe.” Ki muli age, ʼi te hili ʼo te mate ʼo Napale, neʼe kole e Tavite ke ʼohoana mo Apikaela, pea neʼe ina tali lelei.—1 Samuele 25:13-42.

Kae, ʼi ʼihi faʼahi, ko te ʼofa ʼaē ʼe kumi e he tahi ʼe feala ke faka ʼuhiga ki te fakahā ʼo he fakapalatahi, peʼe ko te fakaʼaogaʼi kovi ʼo te faitotonu. ʼI te faʼahi ʼaia, ko te meʼa ʼofa ʼe ko he aga fakahehema. ʼE manatu e ia ʼaē ʼe ina foaki te meʼa ʼofa ʼe fua lelei anai kia ia, kae ʼe mole kei ina maʼu te tokalelei ʼo te ʼatamai. ʼE ʼi ai tuʼumaʼu pe te tuʼutāmaki ʼi te liliu anai ʼo ʼiloʼi e niʼihi, ʼo tonu ai ke ina utu te fua ʼo tana aga. Māʼiape la peʼe ina maʼu te ʼofa ʼaē neʼe ina kumi, ʼe feala ke ʼiloa leva ʼi te temi ʼaia ko he tahi ʼe mole lelei te ʼu meʼa ʼaē ʼe ina uga ia ia. ʼI tana fakahā he agapoto ʼaki he aga faka lotu, ʼe fakatokagaʼi mai e te Tohi-Tapu ke ʼaua naʼa tou fai te ʼu taʼi meʼa ʼofa ʼaia.—Teutalonome 16:19; Tagata Tānaki 7:7.

ʼE Haʼu Koa Te Meʼa ʼOfa Mai He Lotolelei?

Kua tou ʼiloʼi papau—ko te foaki ʼo he meʼa ʼofa ki he tahi ʼe koutou ʼofa ai ʼuhi he koutou loto kiai, ʼe koutou maʼu ai he ʼofa ʼe lahi age, ʼi te foaki ki he tahi ʼuhi he neʼe fakahā atu e ʼihi ʼe tonu ke koutou fai te faʼahi ʼaia.

ʼI te temi ʼaē neʼe tānaki ai te ʼu meʼa ʼofa moʼo tokoni ki te kau Kilisitiano ʼaē neʼe māsisiva, neʼe tala e te ʼapositolo ko Paulo niʼihi ʼu pelesepeto lelei ʼaupito ʼo ʼuhiga mo te fia foaki ʼaē ʼe fai ʼaki he aga faka lotu. Neʼe ina tohi fēnei: “Kapau ʼe ʼi ai tāfito te lotolelei, ʼe lelei tāfito ia, ʼo fakalogo pe ki te meʼa ʼaē ʼe maʼu e he tahi, ka mole fai ʼaki he meʼa ʼe mole maʼu e he tahi.” Neʼe ina toe ʼui fēnei: “Ke tahi fai pe ki te meʼa kua ina fakatotonu ʼi tona loto, ʼo mole fai ʼaki he fakahemala peʼe ʼaki he loto fakakinau, heʼe ʼofa te ʼAtua kia ia ʼaē ʼe ina foaki ʼaki te loto fiafia.” (2 Kolonito 8:12; 9:7) Koia, ʼe lahi te ʼu faʼahi ʼe fakalogo kia koutou. ʼE koutou fakaʼaogaʼi fakapotopoto koa takotou falā, ʼo mole koutou toʼo maʼua ʼi takotou foaki ʼaē ʼo he ʼu meʼa ʼofa ʼe totogi kovi? ʼE koutou fai koa te meʼa ʼaē neʼe kua koutou ʼosi fakatuʼutuʼu kiai, ʼo mole fakamaʼuaʼi koutou ke koutou foaki ʼuhi ko te fakamālohiʼi ʼa te hahaʼi peʼe ko te ʼu fale fakatau koloā? ʼO ʼuhiga mo te ʼu ʼuluaki Kilisitiano ʼaē neʼe nātou maʼuliʼi te ʼu taʼi pelesepeto aga faka lotu ʼaia, neʼe tohi fēnei e Paulo: “Kae ko nātou totonu, neʼe nātou kole mai kia mātou te pilivilesio ʼaē ko te foaki ʼaki te lotolelei pea ke nātou kau ki te minisitelio ʼa te kau maʼoniʼoni.”—2 Kolonito 8:4.

ʼO mole ʼalutahi mo te faʼahi ʼaia, neʼe ʼui fēnei e te nusipepa Royal Bank Letter ʼo Novepeli/Tesepeli 1994, ʼo ʼuhiga mo te ʼu vāhaʼa ʼaē ʼi muʼa ʼo te hoko ʼo te Po Tapu: “Ko te ʼu temi fakafiafia e lagi feala ke liliu ko he ʼu ʼaho moʼo fakaneke ʼo te hahaʼi ke nātou toʼo he ʼu meʼa neʼe mole lagi nātou fakatuʼutuʼu ke nātou toʼo.” Kapau neʼe toʼo maʼua te ʼu meʼa ʼaia, logope te fiafia ʼaē ʼe feala ke maʼu ʼi te foaki ʼo te ʼu meʼa ʼofa, kae ʼe feala ke puli vave ʼi te temi ʼaē ʼe tonu ai ke huʼi te ʼu maʼua.

Koteā Te Faʼahi ʼAē ʼe Maʼuhiga Tāfito—Ko Te Lakaga ʼAē ʼe Koutou Foaki Ai Te Meʼa ʼOfa Peʼe Ko Te Fakahā ʼo Tokotou ʼOfa?

ʼE koutou manatu koa ʼe koutou foaki he ʼu meʼa ʼofa ʼi te ʼu temi ʼaē ʼe maʼua ke fai ai? Kapau koia ʼaia, e lagi feala ke mole ia koutou te fiafia lahi ʼaē ʼe kita maʼu ʼi takita foaki he meʼa ʼofa ʼi te temi pe ʼaē ʼe tou loto kiai.

Tokolahi ʼe mole nātou leleiʼia te ʼu fua ʼaē ʼe nātou maʼu ʼi te foaki ʼo he meʼa ʼofa ʼi te ʼu ʼaho ʼaē kua hinoʼi ke fai ai te meʼa ʼaia. Neʼe fakamoʼoni e te faʼe, ko te fafine faitohi, neʼe ʼasi ʼi tana ʼu fānau te loto mānumānu ʼi te fakaōvi ki te ʼaho ʼaē neʼe nātou ʼamanaki ai ke foaki age he ʼu meʼa ʼofa. Neʼe ina tala ko tana leleiʼia he meʼa ʼofa matalelei neʼe puli ʼuhi he neʼe ʼamanaki ia ki he tahi age meʼa ʼofa. Ko te tokolahi ʼe nātou ʼui ko te ʼu aga fakafiafia pea mo te fefoakiʼaki ʼo te ʼu meʼa ʼofa, ʼe ko te ʼu temi ʼaia ʼe hoko ai te ʼu lotomamahi pea mo te ʼinu fakavale ʼo te kava.

ʼI tana sio ʼaē ki te lave kovi ʼi ʼihi temi ki te ʼu fānau te faka maʼuhigaʼi ʼo te foaki ʼo te ʼu meʼa ʼofa ʼi te ʼu temi lafeti, neʼe fakatokaga fēnei e te polofesea ʼiloa ʼi te sulunale The New York Times: “Koutou vakaʼi, ʼe feala ke siʼisiʼi te lotohoha mo kapau ʼe foaki he ʼu meʼa ʼofa ʼi ʼihi age lakaga.” ʼE koutou manatu koa ʼe fua lelei anai?

Neʼe tohi fēnei e Tammy, ʼe taʼu 12 pea ʼe mole fai ʼi tona loto fale te Po Tapu peʼe ko te fakamanatu ʼo te ʼaho tupu: “ ʼE lahi age te fiafia mokā foaki atu he meʼa ʼofa kae neʼe mole koutou ʼamanaki ʼe fai atu.” Neʼe ina ʼui ʼe mole foaki age he ʼu meʼa ʼofa ʼo tuʼa tahi peʼe tuʼa lua ʼi te taʼu, kae ko tana ʼu mātuʼa ʼe nā foaki he ʼu meʼa ʼofa kia ia pea mo tona tokolua lolotoga te taʼu katoa. Kae ʼe ʼi ai te meʼa ʼe maʼuhiga age ia kia ia ʼi te ʼu meʼa ʼofa ʼaia. Ohage ko te meʼa ʼaē ʼe ina ʼui: “ ʼE ʼau maʼu he maʼuli faka famili fiafia.”

ʼE tala fakahagatonu e te tohi Secrets of Strong Families ʼo ina ʼui fēnei: “Tuʼa lahi ʼi te taʼu, tokolahi ia tatou ʼe tou pulihi totatou temi pea mo tatatou paʼaga moʼo filifili ʼo te ʼu meʼa ʼofa ʼaē ʼe tau mo nātou ʼaē ʼe tou ʼoʼofa ai mokā hoko tonatou ʼaho tupu, pe ko te ʼu lafeti ʼaē ʼe fai moʼo fakamanatuʼi ʼo he meʼa maʼuhiga, pe ko honatou lafeti. Kae ko te meʼa ʼofa ʼaē ʼe lelei age ʼi te ʼu meʼa ʼofa fuli ʼe mole ko he meʼa ia ʼe totogi. Pea ʼe mole ʼaoga he pepa moʼona takafi. Kapau ʼe koutou tui, ohage ko te tokolahi, ko tokotou maʼuli ʼe ko te meʼa ia ʼaia ʼe maʼuhiga age ʼi te ʼu meʼa ʼaē ʼe koutou maʼu, pea ko he koga ʼo tokotou temi ʼe ko te meʼa ʼofa maʼuhiga ʼaē ʼe feala ke koutou foaki. ʼE tou foaki te meʼa ʼofa ʼaia ʼi te lahi ʼo te temi ʼaē ʼe tou foaki kia nātou ʼaē ʼe tou ʼoʼofa ai.”

ʼE feala ke koutou foaki te meʼa ʼofa ʼaia ʼo mole faka tuʼakoi pe ki takotou famili. ʼE feala ke koutou maʼu he fiafia makehe, mo kapau ʼe koutou fakaʼaogaʼi tokotou temi kia nātou ʼaē ʼe ʼaoga moʼoni kiai. Neʼe fakaloto mālohiʼi tatou e Sesu Kilisito ke tou fakahā te taʼi ʼofa ʼaia ki te hahaʼi masiva, te hahaʼi ketu, pea mo te hahaʼi kivi, ʼo ina toe ʼui fēnei: “ ʼE ke fiafia ai anai, koteʼuhi heʼe mole ʼi ai hanatou meʼa ke nātou tauʼi ʼaki atu.”—Luka 14:12-14.

Neʼe mole heʼeki faʼa fualoa neʼe fakamatala e te sulunale ʼo te Rockland Journal-News (ʼi Amelika) te faʼifaʼitaki ʼo te taʼi faʼahiga foaki ʼaia. Neʼe maumau te ʼapi ʼo te finematuʼa kivi, pea neʼe faʼu e tona ʼu kaumeʼa tona ʼapi foʼou. Neʼe foaki te ʼu meʼa ʼofa e te ʼu fale gāue lalahi, pea ko te meʼa ʼofa faka paʼaga neʼe fai e te fale gāue ʼo te puleʼaga ʼo te kolo. Neʼe ʼui e te nusipepa: “Kae ko te meʼa tāfito, ko te toko 150 tupu hahaʼi, ʼaē ʼe tokolahi ia nātou ʼe nātou kau ki te kokelekasio ʼa te kau Fakamoʼoni ʼa Sehova ʼi Haverstraw, neʼe nātou foaki tonatou temi moʼo laga tona ʼapi.”

Neʼe toe hoko atu te alatike ʼo ina ʼui fēnei: “ ʼI te potu ʼaē neʼe laga ai te ʼapi ʼaia, neʼe mole gata pe ʼi te ʼu meʼa gāue, kae neʼe toe ʼi ai pe foki mo te ʼu laupapa neʼe tapuke ai te meʼa kai. Ia ʼaho e lua neʼe laga e te hahaʼi gāue te ʼapi ʼe laufata lua. . . . ʼE ʼiloa te kau Fakamoʼoni ʼa Sehova ʼi tanatou popoto ʼaē ʼi te laga fakavilivili ʼo he ʼu fale. . . . Kae ko te taʼi gāue fakavilivili ʼaia ʼe kehekehe ia mo te minisitelio ʼaē ʼe nātou fai tuʼumaʼu, ʼaē ko te foaki tuʼumaʼu ʼi he gāue ʼofa. Neʼe mole feala ki te finematuʼa ko Blakely ke sio ki tona ʼapi foʼou, kae neʼe feala ke fāfā kiai tona ʼu nima, pea neʼe malave ʼaupito ki tona loto te ʼofa ʼa te hahaʼi kia ia.”

Ko Te Loto Fia Foaki ʼe Fakahā ʼi Te Lolotoga ʼo Te Taʼu

Ko nātou ʼaē ʼe nātou loto fia foaki moʼoni, ʼe mole nātou talitali ki he ʼu ʼaho makehe. ʼE mole faʼufaʼu tonatou maʼuli ʼo mulimuli ki te ʼu meʼa ʼaē ʼe ʼi ʼonatou tafa. ʼI te temi ʼaē ʼe nātou maʼu ai he meʼa ʼe lelei, ʼe nātou fiafia ʼi te vaevae mo niʼihi. ʼE mole faka ʼuhiga leva te faʼahi ʼaia ko he ʼu hahaʼi ʼe nātou foaki tuʼumaʼu he ʼu meʼa. ʼE mole faka ʼuhiga leva ke lahi te ʼu meʼa ʼaē ʼe nātou foaki, kae hala tonatou famili. ʼE mole faka ʼuhiga ʼe nātou foaki ʼo mole nātou fakatokagaʼi te meʼa ʼaē ka hoko kia ia ʼaē ka ina tali te meʼa ʼofa ʼaia. Kae ʼe ʼi ai te ʼu hahaʼi ʼe nātou “tokaga ʼo foaki,” ohage ko te akoʼi age e Sesu ki tana kau tisipulo ke nātou fai.—Luka 6:38.

ʼE nātou ʼiloʼi te ʼu lakaga ʼaē ʼe ʼaoga ai he faka lotomālohi ki te ʼu kaumeʼa pea mo te ʼu hahaʼi ʼo tonatou vāhaʼa fale ʼaē ʼe matutuʼa, mo mahahaki, peʼe ko he tahi e lagi ʼaoga ki ai he faka lotomālohi. Ko tanatou “meʼa ʼofa” ʼe ko tanatou fai te ʼu fekau peʼe ko te tokoni ki te ʼu gāue ʼo te loto fale. ʼE feala pe ke nātou ʼolo ʼo fai fafie peʼe ko te keli ʼo te nive. ʼE feala ke nātou teuteuʼi he meʼa kai peʼe ko he ʼahiʼahi pea mo lautohi fakatahi. ʼE feala pe ke nātou maʼumaʼua ʼi tonatou maʼuli, kae mole nātou maʼumaʼua fau moʼo tokoni ki niʼihi. Neʼe nātou ako mai te ʼu meʼa ʼaē neʼe hoko ʼi tonatou maʼuli, “ ʼe lahi age te manuʼia ʼo takita foaki, ʼi te foaki mai ʼaē kia kita.”—Gāue 20:35.

ʼE mahino papau ia, ko ia tokotahi ʼaē ʼe lahi te ʼu meʼa ʼaē ʼe ina foaki, ʼe ko Sehova ʼAtua, totatou Tupuʼaga. ʼE ina “foaki ki te hahaʼi fuli te maʼuli pea mo te mānava, pea mo te ʼu meʼa fuli.” (Gāue 17:25) ʼE fakahā mai ʼi te Tohi-Tapu tana fakatuʼutuʼu ʼaē ke ina fakagata te agakovi, te mahaki, pea mo te mate, pea mo fakaliliu te kele ko he palatiso. (Pesalemo 37:10, 11; Fakahā 21:4, 5) ʼI tanatou akoʼi te faʼahi ʼaia, ʼe mole taupau e nātou ʼaē ʼe loto fia foaki te logo lelei ʼaia maʼa nātou. Ko te meʼa ʼaē ʼe nātou leleiʼia tāfito, ko te vaevae ʼo te logo lelei ʼaia mo ʼihi. Ko te loto fia foaki ʼaē ʼe nātou fakahā, ʼe ko he aga faka lotu moʼoni ʼaia. ʼE koutou maʼu koa te taʼi manatu ʼaia?

[Paki ʼo te pasina 7]

Ko ʼihi ʼu meʼa ʼofa maʼuhiga ʼe mole totogi