Te ʼu Fehuʼi ʼa Te Kau Lautohi

ʼE lahi te ʼu koga meʼa ʼi te malamanei, ʼe ko te agamāhani te foaki meʼa ʼofa ʼi he fai ʼohoana. Koteā te ʼu pelesepeto faka Tohi-Tapu ʼe tonu ke tou vakaʼi mokā tou foaki peʼe ka fai mai he ʼu meʼa ʼofa?

ʼE tali e te Tohi-Tapu te foaki meʼa ʼofa mokā fai ʼaki he ʼu manatu ʼe lelei pea ʼi he ʼaluʼaga ʼe lelei. ʼO ʼuhiga mo te foaki, ʼe fakaloto mālohi e te Tohi-Tapu te kau Kilisitiano moʼoni ke nātou faʼifaʼitaki ia Sehova, ʼaē ʼe ina Foaki lahi kia nātou. (Sakopo 1:​17) Neʼe uga fēnei e te ʼapositolo ko Paulo te kau Kilisitiano: “Vakai naa koutou galoi te fai o te mea e lelei pea mo te mauli vaevae, koteuhi ko te u faahiga sakilifisio aia e leleiʼia e te Atua.” Koia, ʼe fakaloto mālohiʼi te kau Kilisitiano ke nātou loto fia foaki.​—Hepeleo 13:16; Luka 6:​38.

ʼI Amelika, ʼe ko he agamāhani te fakaʼaogaʼi ʼo he lisi ʼe tohi ai te ʼu meʼa ʼofa. ʼI Pilitania, ʼe toe fakaʼaogaʼi mo te lisi ʼo te ʼu meʼa ʼaē ʼe feala ke foaki ki te ʼohoana. Ko he toko lua ʼe nā tohi tonā higoa ʼi he fale koloā lahi, ʼe nā vakavakaʼi te ʼu meʼa ʼaē ʼe maʼu ʼi te fale koloā pea mo fai he lisi ʼo te ʼu meʼa ʼaē ʼe nā loto anai ke foaki kia nāua. Ko te toko lua ʼaē ka ʼohoana, ʼe nā fakahā ʼi te pepa fakaafe ki te famili pea mo te ʼu kaumeʼa, te fale koloā ʼaē ʼe feala ke nātou ʼolo ʼo toʼo ai he ʼu meʼa ʼofa. ʼE ko he fakatuʼutuʼu lelei ʼaia heʼe feala anai ki te kau fakaafe ke mole nātou puli temi moʼo kumi ʼo he ʼu meʼa ʼofa, pea ʼe mole toe fakaliliu anai te meʼa ʼofa ʼaia mo kapau ʼe mole leleiʼia e te taumatuʼa.

ʼE vakaʼi anai e nāua toko lua peʼe nā fakaʼaogaʼi anai peʼe kailoa he lisi ʼo te ʼu meʼa ʼofa ki tonā ʼohoana. Kae ʼe tokaga anai te Kilisitiano ke ʼaua naʼa ina fai he meʼa ʼe ina maumauʼi ai te ʼu pelesepeto ʼo te Tohi-Tapu. Ohage la, e feafeaʼi mo kapau ko te tama pea mo te taʼahine ʼaē ka ʼohoana, ʼe nā fai he lisi ʼo he ʼu meʼa ʼe totogi kovi ʼaupito? ʼI te faʼahi ʼaia, ko nātou ʼaē ʼe mole fealagia ʼi te faʼahi ʼo te falā, ʼe lagi mole feala anai ke nātou foaki he meʼa ʼofa, peʼe lagi nātou manatu anai ʼe lelei age tanatou fakafisi ki te fakaafe, ke mole nātou toʼo he meʼa ʼofa ʼe totogi kovi. Neʼe tohi fēnei e te fafine Kilisitiano: “Kua liliu ko he kavega te foaki meʼa ʼofa. ʼE ʼau faiga ke ʼau foaki lahi, kae ʼi te temi nei, ʼe mole kei ʼau maʼu he fiafia ʼi te foaki ʼo he meʼa ʼofa.” ʼE mole lelei anai mo kapau ʼe liliu he fai ʼohoana ko he meʼa fakaloto vaivai.

ʼE mole tonu ke hage kia ia ʼaē ʼe foaki meʼa ʼofa, ʼe tonu ke ʼalu ʼo toʼo he meʼa ʼofa mai he fale koloā makehe, peʼe ke lahi tana puli falā ki he meʼa ʼofa, ke feala ke leleiʼia te meʼa ʼofa ʼaia. He neʼe ʼui e Sesu Kilisito ko te meʼa ʼaē ʼe maʼuhiga age kia mata ʼo te ʼAtua, ʼe ko te loto ʼo ia ʼaē ʼe ina foaki, kae mole ko te meʼa ʼofa ʼaē ʼe foaki. (Luka 21:​1-4) ʼO toe feiā pe, ʼo ʼuhiga mo te ʼu meʼa ʼofa ʼo te manavaʼofa ki te hahaʼi ʼaē ʼe nonofo ʼi te faigataʼaʼia, neʼe tohi fēnei e te ʼapositolo ko Paulo: “Ke tahi fai e te tagata takitokotahi ohage pe ko te meʼa kua ina fakatotonu ʼi tona loto, ʼo mole fai ʼaki he loto fakahemala peʼe ʼaki he loto fakakinau, heʼe ko te ʼAtua ʼe ʼofa kia ia ʼaē ʼe ina foaki ʼaki te loto fiafia.”​—2 Kolonito 9:7, MN.

ʼO mulimuli ki te Tohi-Tapu, ʼe mole kovi te tohi ʼo tokita higoa ki te meʼa ʼofa ʼaē ʼe tou fai, lagi tou tohi he kiʼi manatu ke fakapipiki ki te meʼa ʼofa. Kae ʼi ʼihi koga meʼa, ʼe ko he agaʼi fenua te fakahā ki te hahaʼi fuli te higoa ʼo ia ʼaē neʼe ina foaki te meʼa ʼofa. Ko te taʼi fai ʼaia ʼe lava tupu ai he ʼu fihifihia. Ko nātou ʼaē ʼe nātou foaki he meʼa ʼofa ʼe mole lagi nātou loto ke fakahā tonatou higoa ke mole tokagaʼi fau nātou. Ko te hahaʼi ʼaia ʼe nātou mulimuli ki te pelesepeto ʼaē ʼe tou maʼu ia Mateo 6:3, ʼaē ʼe ʼui fēnei ai Sesu: “Kaʼe kia koe, ka ke fai hou ʼu meʼa ʼofa ki te hahaʼi māsisiva, ke ʼaua naʼa ʼiloʼi e tou nima hema te meʼa ʼaē ʼe fai e tou nima mataʼu.” ʼE lagi manatu e ʼihi ko te meʼa ʼofa ʼe ko he meʼa ʼe mole tonu ke ʼiloʼi e te hahaʼi, ʼe tonu pe ke ʼiloʼi e ia ʼaē ʼe ina foaki pea mo ia ʼaē ʼe ina tali te meʼa ʼofa. Tahi ʼaē meʼa, ʼe feala ke hoko ai he fakatatau ʼo te ʼu meʼa ʼofa, “ ʼo fakatupu ai he ʼu fakataupiepie.” (Kalate 5:​26, MN ) ʼE mahino ia ʼe mole loto e te kau Kilisitiano ke ufiufi he tahi ʼuhi ko te tala ʼaia ia muʼa ʼo te hahaʼi te ʼu higoa ʼo nātou ʼaē neʼe nātou foaki he ʼu meʼa ʼofa.​—1 Petelo 3:8.

Koia, kapau ʼe tou mulimuli ki te ʼu pelesepeto ʼaē ʼe tou maʼu ʼi te Folafola ʼa te ʼAtua, ʼe tou haga foaki anai he ʼu meʼa ʼofa ʼaki te fiafia.​—Gaue 10:35.