“Neʼe Ko Te Meʼa ʼOfa Lelei Tukupau Neʼe Au Maʼu”

Ko te ʼu palalau ʼaeni neʼe fai e te kiʼi taʼahine ʼi te foaki age ʼo te kiʼi kuli. Mo te fafine, ʼi tana kei ako ʼi te lise neʼe foaki age e tana tamai tana olotinatea. Neʼe ina ui leva ko te meʼa ʼofa ʼaia neʼe ina fetogi tona maʼuli. Pea mo te taumatuʼa, neʼe foaki age e te fafine te kiʼi kate moʼo fakamanatu ʼo te taʼu katoa ʼo tanā nofo ʼohoana. Neʼe ina ui ai e te tagata ko te ʼuluaki meʼa ʼofa lelei tukupau ʼaia.

ʼI te taʼu fuli, ko te tokolahi ʼe natou toʼo he temi mo he ʼu faiga ke natou foaki he meʼa ʼofa ʼe “lelei tukupau” ki honatou kaumeʼa peʼe ko he tahi ʼo tonatou famili, moka hoko he aluʼaga maʼuhiga. Pea ko te tokolahi ʼe natou fiafia moka fai age e he tahi te ʼu palalau ʼae ʼe tohi ʼi te kamata. Kae ʼe feafeaʼi kia kotou? ʼE kotou fia foaki koa peʼe ʼe kotou loto koa ke foaki atu he meʼa ʼofa ʼe lelei ʼaupito?

Koia, ʼe lelei ke tou fakakaukauʼi pe kotea ʼae ka logoʼi anai e ia ʼae ʼe ina tali te meʼa ʼofa, ʼo feia mo te meʼa ʼae ka logoʼi anai e ia ʼae neʼe ina foaki te meʼa ʼofa. ʼE ui fenei ʼi te Tohi-Tapu: “ ʼE lahi age te fiafia moka kita foaki, ʼi takita tali.” (Gaue 20:35) ʼE moʼoni ʼe tou fiafia moka tou foaki he meʼa ʼofa ki he tahi. Kae ʼe toe lahi age totatou fiafia moka ʼe leleiʼia e ia ʼae ʼe ina maʼu ia te meʼa ʼofa ʼaia.

Kae kotea ʼe tonu ke kotou fai ke kotou fiafia ai ʼi te meʼa ʼofa ʼae ka kotou foaki, ʼo feia mo ia ʼae ka ina maʼu takotou meʼa ʼofa? Pea kapau ʼe mole feala ke kotou maʼu te meʼa ʼofa ʼae ʼe “lelei tukupau”, kotea ʼae ʼe feala ke kotou fai ke natou leleiʼia moʼoni takotou meʼa ʼofa?