Te Meʼa ʼOfa Lahi Tokotahi ʼa Te ʼAtua​—He Koʼe ʼe Maʼuhiga?

KO AI ʼAE NEʼE INA FOAKI?

Ko ʼihi meʼa ʼofa ʼe maʼuhiga koteʼuhi neʼe foaki mai e he tahi ʼe ʼi ai hona peʼe ko he tahi ʼe tou fakamaʼuhigaʼi. Ko ʼihi meʼa ʼofa ʼe tou leleiʼia logo la ʼe mole totogi kovi. Kotea tona tupuʼaga? Koteʼuhi neʼe foaki mai e he tahi ʼo totatou famili peʼe ko hotatou kaumeʼa lelei. Ohage pe ko te meʼa ʼofa ʼae neʼe foaki age e Russell kia Jordan, ʼae neʼe tou talanoa ki ai ʼi te ʼuluaki alatike. Kaʼe ʼe feafeaʼi ʼo ʼuhiga mo te sakilifisio ʼo Sesu?

ʼUluaki, ʼe ui fenei ʼi te Tohi-Tapu: “[Ko te ʼAtua], neʼe ina fekauʼi mai tona ʼAlo ʼulu tokotahi ki te malamanei ke feala ai hatatou maʼu te maʼuli ʼaki ia ia.” (1 Soane 4:⁠9) ʼEi, ʼe ha mai ko te meʼa ʼofa ʼaia ʼe maʼuhiga ʼaupito, koteʼuhi ʼe mole he tahi ʼe maʼoluga age ʼi te ʼAtua. Koia, neʼe tohi fenei ai e he tagata faipesalemo Hepeleo ʼo ʼuhiga mo ia: “Ko koe toko tahi ae e higoa ko [Sehova], ko koe ko te Maoluga i te kele katoa!” (Pesalemo 83:19) ʼEi, ko te matapuna maʼoluga tokotahi pe ʼaia ʼo meʼa ʼofa fuli.

Lua, ko te ʼAtua ʼe ko ‘tatatou Tamai.’ (Esaia 63:16) Kotea tona tupuʼaga? Koteʼuhi neʼe ina foaki mai te maʼuli. Pea tahi, ʼe tokaga moʼoni kia tatou ohage pe ko he tamai ʼe tokaga lelei ki ʼana fanau. Neʼe ui fenei e te ʼAtua ʼi tana palalau ki tana hahaʼi Efalaimi: “Ko Efalaimi ko he foha ofaina kia au? He fanau ae e ina fakafiafiai toku loto? . . . E mamahi . .  toku fatu o tupu ko ia: E au ofa anai kia ia.” (Selemia 31:20) ʼO toe feia pe ia ʼaho nei, ʼe toe logoʼi e Sehova te faʼahi ʼaia ʼo ʼuhiga mo ʼana kaugana. ʼE mole pe ko totatou Tupuʼaga mafimafi kaʼe ʼe ko tatatou Tamai pea mo Kaumeʼa. ʼEi, ko te tupuʼaga la ʼaia ʼo te maʼuhiga kia tatou ʼo te meʼa ʼofa ʼaia.

HE KOʼE NEʼE INA FOAKI?

Ko ʼihi meʼa ʼofa ʼe maʼuhiga koteʼuhi neʼe foaki ʼaki he lotolelei kaʼe mole ʼuhi he neʼe fakamaʼua age. Ko he tahi ʼe ina foaki he meʼa ʼofa ʼaki he lotolelei ʼe mole fakaʼamu ia ke toe liufaki age he meʼa.

Neʼe foaki mai e te ʼAtua tona ʼAlo koteʼuhi ʼe ʼofa ia tatou. ʼE ui fenei ʼi te Tohi-Tapu: “Neʼe fakaha mai e te ʼAtua tona ʼofa kia tatou ʼi te aluʼaga ʼaeni: Neʼe ina fekauʼi mai tona ʼAlo ʼulu tokotahi.” Kotea tona tupuʼaga? “Ke feala ai hatatou maʼu te maʼuli ʼaki ia ia.” (1 Soane 4:⁠9) Neʼe ko he maʼua koa ʼo te ʼAtua ke ina fai te faʼahi ʼaia? Kailoa ia. Kaʼe, “ko te totogi ʼae neʼe foaki e Kilisito Sesu” ʼe ha ai te “ ʼofa makehe” ʼo te ʼAtua.​​—Loma 3:⁠24.

He koʼe neʼe foaki e te ʼAtua te meʼa ʼofa ʼaia ʼuhi ko tona “ ʼofa makehe”? ʼE ui fenei ʼi te Tohi-Tapu: “ ʼE fakaha mai e te ʼAtua ia tona ʼofa, ʼaki te mate ʼa Kilisito maʼa tatou ʼi tatatou kei agahala.” (Loma 5:⁠8) Ko te ʼofa ʼo te ʼAtua ʼae neʼe ina uga ai ia ia ke ina fai he puleʼaki maʼa te hahaʼi ʼae ʼe mole ʼi ai hanatou ʼamanaki, mo lotovaivai pea mo agahala. ʼEi, neʼe mole tuha mo tatou te meʼa ʼofa ʼaia pea ʼe mole feala ke tou toe liufaki. Koia, ko te meʼa ʼofa ʼaia ʼe ko te fakamoʼoni lahi ʼaia ʼo tona ʼofa ki te malamanei.

KOTEA TE ʼU SAKILIFISIO NEʼE INA FAI?

Ko ʼihi meʼa ʼofa ʼe maʼuhiga koteʼuhi ko ia ʼae neʼe ina fai te meʼa ʼofa, neʼe ina fai ʼaki he ʼu sakilifisio. Ka foaki mai e he tahi he meʼa neʼe maʼuhiga kia ia, pea ʼe tonu ke tou fakamaʼuhigaʼi te meʼa ʼofa ʼaia, ʼuhi ko te ʼu sakilifisio ʼae neʼe ina fai.

Ko te ʼAtua neʼe ina “foaki . . . tona ʼAlo ʼulu tokotahi.” (Soane 3:16) ʼEi, neʼe ina foaki mai he tahi neʼe ʼofa mamahi ai. ʼI te temi ʼae neʼe fakatupu ai e te ʼAtua te ʼatulaulau, neʼe gaue fakatahi ia Sesu mo ia pea neʼe liliu “ko he tahi neʼe ʼofa tafito ki ai.” (Taʼaga Lea 8:​30, MN ) Ko Sesu neʼe ko te “ ʼAlo ʼofaina” ʼo te ʼAtua pea ko “te pāki ʼo te ʼAtua fakapulipuli.” (Kolose 1:​13-15) ʼEi, ko te ʼu felogoʼi lelei ʼa te ʼAtua mo Sesu ʼe mole ʼi ai hona ia fakatatau.

Kaʼe, ko te ʼAtua neʼe mole ina “fakahao tona ʼAlo totonu.” (Loma 8:32) Neʼe foaki e Sehova te meʼa ʼae ʼe lelei tukupau. Pea neʼe ina foaki ia te meʼa ʼofa lahi tokotahi maʼa te malamanei, ia tona ʼAlo ʼofaina.

ʼE ʼAOGA MOʼONI KIA TATOU

Ko ʼihi meʼa ʼofa ʼe maʼuhiga koteʼuhi ʼe ʼaoga moʼoni kia koe. Ohage la, ʼe mole ke lava totogi he faitoʼo moʼo haofaki tou maʼuli. Kaʼe ko he tahi ʼe ina totogi te faitoʼo ʼaia. ʼE mole koa la ke lotofakafetaʼi ki ai ʼi tana totogi ia te faitoʼo moʼo haofaki tou maʼuli? ʼE mahino ia, ʼe maʼuhiga ʼaupito anai kia koe te meʼa ʼofa ʼaia.

“Ohage pe ko te mamate ʼa te hahaʼi fuli ʼuhi ko Atama, ʼo toe feia aipe ʼe toe maʼuʼuli ake anai te hahaʼi fuli ʼaki ia Kilisito.” (1 Kolonito 15:22) ʼEi, ʼe tou hifo fuli mai ia Atama. Koia ʼae ʼe tou “mamate” fuli ai. ʼE mole feala ke tou hao mai te mahaki pea mo te mate. Peʼe tou fakatokatoka ia tatou totonu mo te ʼAtua pea mo ʼateaina mai te ʼu hala ia muʼa ʼo te ʼAtua. Pea ʼi totatou ʼuhiga tagata vaivai, ʼe mole feala ke tou haofaki ia tatou totonu peʼe ko he tahi ‘maʼuli.’ ʼE ui fenei ʼi te Tohi-Tapu: “E mole pe feala ke totogi e he tagata he tahi tagata, pee ke foaki e he tagata ki te Atua te totogi o tona [“maʼuli,” MN ] . . . E mole feala ke hoko te mea aena i he aho.” (Pesalemo 49:​8, 9) ʼEi, ʼe ʼaoga moʼoni kia tatou he tokoni koteʼuhi ʼe mole tou lava totogi te sakilifisio ʼo Sesu. Pea ʼe mole ʼi ai hatatou ʼamanaki.

Neʼe lotolelei ia Sehova ke ina totogi he “faitoʼo” moʼo haofaki ʼotatou maʼuli. He koʼe neʼe ina fai te faʼahi ʼaia? ʼUhi ko te lahi ʼo tona ʼofa. Pea “ ʼe toe maʼuʼuli ake anai te hahaʼi fuli” ʼuhi ko Sesu. Neʼe lava fakahoko feafeaʼi te faʼahi ʼaia ʼaki te sakilifisio ʼo Sesu? ʼE ui fenei ʼi te Tohi-Tapu: “ ʼE fakamaʼa tatou mai te ʼu agahala fuli ʼaki te taʼataʼa ʼo tona ʼAlo ko Sesu.” ʼEi, ko tatatou tui ki te taʼataʼa ʼo Sesu ʼe ina fakafealagia te fakamolemole ʼo te ʼu agahala pea ke tou maʼu te maʼuli heʼe gata. (1 Soane 1:7; 5:13) Pea ʼaki te sakilifisio ʼo Sesu, kotea ʼe hoko anai kia natou ʼae kua mamate neʼe tou ʼofa mamahi ai? ʼE ui fenei ʼi te Tohi-Tapu: “Mai tona aluʼaga ʼae neʼe haʼu te mate ʼaki he tagata, ʼo toe feia aipe, ʼaki he tagata [Sesu] ʼe feala ke fakatuʼuake te kau mate.”​​—1 Kolonito 15:21.a

ʼE mole he tahi age meʼa ʼofa ʼe tatau mo te sakilifisio ʼo Sesu. Kotea tona tupuʼaga? Koteʼuhi neʼe foaki mai e he tahi ʼe maʼoluga pea neʼe ina foaki mai ʼuhi ko te lahi ʼo tona ʼofa ia tatou. Neʼe lahi tokotahi te meʼa ʼofa ʼae neʼe foaki mai e Sehova ʼAtua kia tatou. Pea ʼe mole he tahi age meʼa ʼofa neʼe ʼaoga moʼoni kia tatou ʼi te sakilifisio ʼae ʼe ina fakaʼateainaʼi tatou mai te agahala pea mo te mate. ʼEi, ʼe mole ʼi ai he tahi age meʼa ʼofa ʼe tatau mo te meʼa ʼofa taulekaleka ʼae ko te sakilifisio ʼo Sesu.