Ko Te ʼu Tēhina Foʼou ʼo Te Kolesi Pule

ʼI TE Moeaki ʼaho 2 ʼo ʼOketopeli 1999, ko te Fono ʼaē ʼe fai ʼi te taʼu fuli e te Watch Tower Bible and Tract Society ʼo Pennsylvania, neʼe fakaʼosi ʼaki te tala ʼo te logo foʼou. Ko te toko 10 594 ʼaē neʼe kau ʼi te fono ʼaia, pe neʼe nātou fakalogo ʼaki te telefoni, neʼe nātou fiafia ʼi tanatou logo ʼaē neʼe fili te ʼu tēhina foʼou e toko fā ki te Kolesi Pule ʼo te kau Fakamoʼoni ʼa Sehova. Koʼeni te ʼu higoa ʼo te ʼu tēhina foʼou ʼaia, ko te ʼu Kilisitiano fakanofo, ko Samuel F. Herd; mo M. Stephen Lett; mo Guy H. Pierce; pea mo David H. Splane.

• Neʼe kamata pionie ia Samuel Herd ʼi te taʼu 1958, pea mai te taʼu 1965 ki te taʼu 1997, neʼe kau ki te gāue faka silikosipisio pea mo faka tisitilike. Ki muli age, neʼe nā kau mo tona ʼohoana ko Gloria, ki te famili ʼo te Petele ʼo Amelika, ʼaē neʼe gāue ai te Tēhina ko Herd ʼi te Selevisi ʼo te Gāue. Neʼe toe tokoni foki ki te Komite Gāue.

• Neʼe kamata pionie ia Stephen Lett ʼi Tesepeli 1966, pea mai te taʼu 1967 ki te taʼu 1971, neʼe gāue ʼi te Petele ʼo Amelika. ʼI ʼOketopeli 1971, neʼe ʼohoana mo Susan, pea neʼe nā toʼo te selevisi pionie makehe. Mai te taʼu 1979 ki te taʼu 1998, neʼe tagata taupau faka silikosipisio. Talu mai te māhina ʼo ʼApelili 1998, ko ia mo Susan kua nā kau ki te famili ʼo te Petele ʼi Amelika. Neʼe gāue ai ʼi te Selevisi ʼo te Gāue pea neʼe tokoni ki te Komite Faiako.

• Neʼe taupau e Guy Pierce tana famili, pea ʼaki tona ʼohoana, neʼe nā kamata pionie ʼi ʼApelili 1982. Neʼe tagata taupau faka silikosipisio mai te taʼu 1986 ʼo aʼu ki te taʼu 1997, pea ko ia mo tona ʼohoana neʼe nā kau ki te famili ʼo te Petele ʼi Amelika. Neʼe tokoni te Tēhina ko Pierce ki te Komite ʼo te Hahaʼi Gāue.

• Neʼe kamata pionie ia David Splane ʼi Sepetepeli 1963. Neʼe maʼu tana pepa misionea ʼi te 42 kalasi ʼo Kalaate, pea neʼe gāue misionea ʼi Sénégal, ʼi Afelika, pea lolotoga taʼu e 19 neʼe kau ʼi te gāue faka silikosipisio ʼi Kanata. Ko ia mo tona ʼohoana ko Linda, neʼe nā hū ʼi te taʼu 1990 ki te Petele ʼi Amelika, ʼaē neʼe gāue ai te Tēhina ko Splane ʼi te Komite Gāue pea mo te Komite Faitohi. Talu mai te taʼu 1998, neʼe tokoni ki te Komite Faitohi.

ʼAki te ʼu tēhina foʼou ʼaia ʼe toko fā, kua faʼufaʼu ʼi te temi ʼaenī te Kolesi Pule e te ʼu tēhina ko C. W. Barber, mo J. E. Barr, mo M. G. Henschel, mo G. Lösch, mo T. Jaracz, mo K. F. Klein, mo A. D. Schroeder, mo L. A. Swingle, pea mo D. Sydlik. ʼE tou faikole fuli ke hoko atu e Sehova tana tapuakiʼi pea mo fakaloto mālohiʼi te Kolesi Pule, ʼaē kua fakalahi ʼi te temi ʼaenī, ke hoko atu tana leʼoleʼo te ʼu gāue ʼo te hahaʼi ʼa te ʼAtua ʼi te malamanei katoa, pea mo foaki kia nātou te ʼu meʼa ʼaē ʼe ʼaoga ki tonatou maʼuli fakalaumālie.