Ko Te Tehina Foʼou ʼi Te Kolesi Pule

ʼI te Feliafa uhu, ʼaho 5 ʼo Sepetepeli 2012, neʼe tala ifo ki te ʼu famili ʼo te ʼu Petele ʼo Amelika mo Kanata kua kau te tehina foʼou ʼi te Kolesi Pule ʼa te kau Fakamoʼoni ʼa Sehova. Ko te tehina ko Mark Sanderson, neʼe kamata gaue ʼi te Kolesi Pule ʼi te ʼaho 1 ʼo Sepetepeli 2012.

Ko te tehina ko Sanderson neʼe pusiaki e ʼana matuʼā Kilisitiano ʼi San Diego, ʼi Californie, ʼi Amelika, pea neʼe papitema ʼi te ʼaho 9 ʼo Fepualio 1975. Neʼe kamata pionie ʼi Saskatchewan, ʼi Kanata, ʼi te ʼaho 1 ʼo Sepetepeli 1983. ʼI te Tesepeli 1990, neʼe maʼu tana pepa mai te fitu kalasi ʼo Te Ako ʼo Te Minisitelio (ʼae ʼe higoa ʼi te temi nei ko Te Ako Tohi-Tapu ʼo Te ʼu Tehina Selipatea) neʼe fai ʼi Amelika. ʼI te Apelili 1991, neʼe hinoʼi te tehina ko Sanderson ke pionie makehe ʼi te motu ko Terre-Neuve, ʼi Kanata. Hili tana gaue ohage ko he tehina fetogi ʼo te taupau fakasiliko, neʼe fakaafe leva ke kau ki te famili ʼo te Petele ʼo Kanata ʼi Fepualio 1997. ʼI te Novepeli 2000, neʼe hinoʼi leva ke alu ki te filiale ʼo Amelika, ʼo gaue ʼi te Selevise Kumi Logo Fakatoketa pea ki muli age ʼi te Selevise Gaue.

ʼI te Sepetepeli 2008, neʼe kau te tehina ko Sanderson ki Te Ako ʼo Te ʼu Tehina ʼo Te Filiale pea hinoʼi leva ki muli age ke kau ki te Komite ʼo te Filiale ʼo Filipine. ʼI te Sepetepeli 2010, neʼe fakaafe ke toe liliu ki Amelika, ʼo gaue ohage ko he tehina lagolago ki te Komite Gaue ʼo te Kolesi Pule.